أيام و عشناها .. في بلاد الضباب

[Om Zayd]

رحنا نسجل عند الممارس العام

GP

اللي جنبنا

ده كان مهم طبعا عشان لو حد مننا تعب و لاّ حاجة

اديناهم جوازات السفر صوروها .. عقد ايجار الشقة المؤقتة اللي قاعدين فيها و ملينا النموذج

بس خلاص

الرقم التأميني هيوصلكم على البيت

طب سؤال حضرتك .. لغاية ما يوصل .. لو حصل حاجة نعمل ايه؟

تيجوا او تتصلوا او تحجزوا معاد على النت.. انتم خلاص مسجلين معانا هنا

النظام الصحي معتمد على توفر عدد كبير من مراكز الممارس العام .. زي عيادات الأسرة .. بحيث الحالات البسيطة يتم التعامل معها و لو حالة صعبة .. يحولوها للمستشفي المختص "بس الموضوع دبياخد شوية وقت عادة" لو حالة طارئةاو خطيرة .. أساسا بتطلب الاسعاف و يوديك طوارئ المستشفى

الجميل ان وجود الدكتور قريب و ببلاش للكل بيخلي الواحد ما يهملش و بالتالي الحالات لا تتطور للأسوأ

هما صحيح ممكن يبقوا مخنوقين انك كل شوية رايحلهم عشان حاجات هايفة .. بس ما بيتكلموش

:closedeyes:

المهم لما تاخد موعد .. تلتزم به .. لو مش هتروح .. تتصل و تلغيه

مش لازم اللي يشوفك دكتور .. بيخيرك حسب المواعيد المتاحة و الحالة.. ممكن تكون ممرضة و لها حق كتابة الروشتات .. ممكن ممرضة هتغير لك على جرح .. التطعيمات هناك .. متابعة نمو الطفل عند الزائر الصحي

HEALTH VISITOR

بيروح البيت كمان عشان يتابع الحوامل و بعد الولادة لمتابعة الام و الطفل

موضوع الأم و الطفل و رعايتهم و تنظيم الأسرة ممكن نخليه بعدين و نتكلم براحتنا

تكلفة العلاج و الأدوية لو دخلك اقل من حد معين .. تقدم و تاخد اعفاء

في ويلز و اسكتلندا .. الكل واخد الاعفاء ده و بيتعالج و ادويته ببلاش .. تبع التأمين الصحي

NHS

لهم حق الانجليز يتضايقوا

و يقولوا يا ريت تفصلوا اسكتلندا و ويلز و احنا الكسبانين

لو دخلك شريحة أعلى .. تاخد اعفاء جزئي

لكن تظل زيارة الطبيب و المستشفى مجانا للكل

المشكلة في علاج الأسنان .. مكلف جدا هناك .. بالذات الطرابيش و التركيبات

و ما بتدخلش في الاعفاء الجزئي

خدوا لكم بصة

ممكن تأمن تأمين خاص و تدفع -او شغلك- مبلغ كل شهر

الغريب ان اغلب الدكاترة هناك هنود او من اصل هندي

و كذلك الصيدليات

طبعا الدوا يصرف على قدر الحاجة و عليه اسمك و التعليمات

و مش كل الدوا متاح بدون روشتة.. خصوصا .. المضادات الحيوية اللي بنستخدمها زي البنبوني في مصر

بالمناسبة .. المضاد الحيوي لو ما اتاخدش على الاقل يومين او ثلاثة بعد اختفاء الأعراض بنخاطر بظهور ميكروبات عندها مناعة للمضادات الحيوية العادية و نضطر نستخدم الاقوى فالاقوى

ممكن نتكلم في الموضوع ده بالتفصيل في الاستشارات الطبية

الاسكندرانية الجدعة اللي ودتني للممارس ورتني الطريق المختصر للمشاة .. ممكن يتوه حبتين .. فكانت معلماه بصندوق أصفر بيحطوا فيه الملح اللي بيسيحوا بيه الثلج

لو اتشال الصندوق ده كان ممكن نتوووووه

المرة الجاية بإذن الله أحكيلكم على البحث عن بيت

تم تعديل 28 ديسمبر 2010 بواسطة Om Zayd

[Om Zayd]

حاجة مهمة نسيتها

أسلوب التعامل مع المرضى

أولا .. مفيش حاجز بينك و بين الدكتور

المكتب للحيطة و كرسيك جنب المكتب مش في مواجهته

يعني الدكتور قاعد جنبك

اول مرة افتكرتها صدفة .. ان كده بيستغلوا المساحة أفضل .. لكن لاحظت ده في اكثر من مكان .. و بالبحث و التقصي اتضح انه مقصود .. لازالة الجفوة و احساس المواجهة او الانفصال

حاجة نفسية يعني

الاهم .. لازم يشرح الحالة بالتفصيل و بطريقة مفهومة و واضحة

و كذلك الخيارات المتاحة و تفاصيلها

و يترك للمريض حرية القرار تماما

و دي سياسة عامة

محتاجين الثقافة دي في مصر .. مش اللي تشوفه يا دكتور .. و تاخد الدوا و انت مش عارف ليه .. لا و الاهم .. الدكتور الشاطر عندنا هو اللي يشخط و ينطر.. لو عملها في انجلترا يتسحب ترخيصه

عارفة ان مصر ماليانة دكاترة ما شاء الله على اخلاقهم و كفاءتهم

أنا بتكلم ان مفيش نظام حقيقي مفعل

[shiko]

انتظرتك انهاردة ....

ماجتيش ....عله خيرا .....

مستنينك فى شغف

[Om Zayd]

انتظرتك انهاردة ....

ماجتيش ....عله خيرا .....

مستنينك فى شغف

تسلميلي يا شيكو

عندي برد منيمني طول النهار

أنا لقيتك بدأت مذكرات بنوتة مفروسة فخفت ازود الحالة و قلت افهم الأول

بس مقدرش ارفض لك طلب

[Om Zayd]

قبل ما نتكلم عن البحث عن بيت .. نتكلم عن التسجيل مع البوليس

POLICE REGISTRATION

ده لجنسيات معينة .. و بيبقى موضحلك ده و انت داخلة البلد.. ضرورة التوجه للبوليس و تسجيل بياناتك خلال 7 أيام

http://www.ukvisas.gov.uk/en/ecg/ecbasics/policeregistration

أغلب دول الشرق الأوسط ,آسيا الوسطى و افغانستان و روسيا و الصين

لو عنوانك اتغير او مديت الفيزا او غيرتها .. لازم تروحلهم تاني عشان يكتبوا التغييرات دي فيها

بعض الجامعات بتقدم للطلبة بتوعها خدمة التسجيل مع البوليس من خلال الجامعة .. يعني ما بروحش بنفسه لمركز التسجيل .. يجيب الفلوس 34 باوند و صورة عقد الايجار و الباسبور لمكتب في الجامعة و يجكعوا الورق و يبعتوه للبوليس .. أو يبقى فيهممثل للبوليس يستلمه.. بعدين على نفس المكتب يبعتولهم الشهادة في الجامعة و يروحوا يستلموها

الخدمة دي بتبقى في بداية الدراسة .. آخر أسبوع في سبتمبر و أول أسبوع في أكتوبر

طبعا احنا مشرفين في ديسمبر.. لازم نروح مركز التسجيل الرئيسي

واحد زميلنا تطوع ييجي معانا .. ثالث او رابع يوم ما وصلنا .. طبعا كانت الاتجاهات لسة ملخبطة و التوهان مفيش أسهل منه

لففنا لفة غريبة .. الشوارع شبه بعضها

و حاسة اننا بنلف في دواير

وصلنا .. لقينا طابور طوييييييييل .. أغلبه صينيين

رغم ان ديسمبر مش المفروض طلبة كثير بتبتدي دراسة فيه

ما علينا

وقفنا .. و تقولش مختارين ملقف هوا يبنوا فيه المركز

ما علينا

بيدخلوا شوية بشوية 10 -12

يغيبوا ما شاء الله لهم ان يغيبوا و لما يطلعوا .. يدخلوا غيرهم

و احنا واقفين في الطل برة .. و ناس معاها أطفال و رضع .. و الكل بيتكتك

طبعا استغربنا .. لا فيه كراسي و لا امكانية تحجز معاد على النت او بالتليفون

لازم تيجي و تقف في الطابور

رغم ان نفس البيانات دي ممكن يحصلوا عليها - و بيحصلوا عليها فعلا - من جهات كثير من غير وجع قلب

ماعلينا

زميلنا اضطر يسيبنا عشان عنده معاد

فييييييييين .. أخيرا دخلنا

و اكتشفت ليه بيغيبوا جوة

[Om Zayd]

عشان ما اسيبكوش متشوقين كثير

هقولكم بيغيبوا ليه جوة

المفروض ان أغلبهم طلبة .. و المفروض انهم بقوا يشترطوا حد أدنى من إجادة اللغة الانجليزية للقبول في الجامعات و المعاهد

لما دخلنا لقينا الموظفة بتسأل بالانجليزي .. وهما بيردوا بلغة تانية خاااااااااااالص

الست تعيد و تزيد في السؤال .. و تتكلم بشويش و شوية شوية تشاور.. هوا نفس الرد و الابتسامة الثابتة من الطرف الآخر.. و يتضح في النهاية انه كان بيتكلم انجليزي بس بالصيني

أنا أخدت فترة لغاية ما ابتديت اكتشف انه عنجليزي يا مرسي

و يا سلام لو واحد منهم بيتكلم في مؤتمر ... عيييييش

للأمانة .. جنسيات كثير كده

لغتهم الأم مخارجها مختلفة تماما

حتى الاسبان و الايطاليين و الفرنساويين لما ييجوا يتكلموا انجليزي بيتكلموه بطريقتهم

بس كله الا الصينيين

طبعا انا المجموعة بتاعتي كانت ولا عصبة الامم .. على آخر المدة كنت قربت انسى الانجليزي "لولا المشرف و الموظفين و شوية الطلبة الانجليز الغلابة اللي باقيين في الجامعة

:closedeyes:

حاجة تانية لاحظتها في الصينيين .. معندهمش لو سمحت او آسف

يخبط فيك .. و عااااادي

يعدي منك من غير صوت .. طب كح عشان اعرف انك في ضهري

ابببدا

واحدة قالتلي عشان نطق الكلام ده صعب عليهم

المهم .. وصلنا عند الموظفة

بتدينا الطلب نملاه .. لقتنا مجهزينه.. اتبسطت اوي و قالت ده كل واحد ييجي هنا و يفتكر يملاه .. و ده بيعطلنا كثير

()ده السبب التاني انهم بياخدوا وقت طويل)

بصت فيه و باقي الورق .. و بعدين طلبت تعديل في الاستمارة .. طبعا ما ينفعش نشطب .. وقفنا على جنب و عدنا كتابتها

بس طبعا مخدناش وقت.. ما احنا ماليينهاقبل كده

اللي استغربتله .. ليه محدش بيعترض على الطريقة اللي بيتعملبيها التسجيل ده؟

يمكن عشان الجامعات بقت تحاول تسهل و تخليهم يعملوه في الجامعة

يمكن عشان الناس بتحب تمشي جنب الحيط

احنا قعدنا ندعبس لغاية ما لقينا موقع كان اعمله نِك كلِج (نائب رئيس الوزراء حاليا) .. القوانين و الاجراءات اللي انت شايفها ظالمة او عنصرية او ممكن تحسينها تتكلم عنها..و الحزب هيدرسها و يتكلم عنها.. بس على ما اكتشفناه .. كان في طور دراسة المقترحات و ما بيسمحش بأضافة مقترحات او شكاوى جديدة

المهم .. خلصنا و خرجنا

نروّح ازاااااااااااي؟

مشينا شوية بالشبه .. وصلنا وسط البلد و وقفنا .. محطات الباس كثير و مفيهومش رقم الباس بتاعنا

و كل ما نسأل حد .. مش عارف

لقيت ظابطتين معديين .. قلت بس .. هما دول اللي هيجيبوا المفيد

كانوا ودوين جدا

دلونا فعلا و عدنا بسلام الى المنزل

[Om Zayd]

ايييييييييييه .. كانت أيام

وحشتني حاجات كثير هناك .. قرب البيت من الكلية .. العمل الجماعي .. تقريبا كل حاجة على النت و بسهولة توصل للمعلومات .. الطبيعة مختلفة و سهل تستمتع بيها .. المشاكل الشخصية مبتوقفش شغلك

مبسوطة هنا اني في وسط أهلي.. بحاول ابني قد ما اقدر في بلدي و بعيني بشوف التغيير .. ابني بيعرف بلده و اهله أكثر .. بسمع الاذان 5 مرات في اليوم .. بشوف النخل و النيل

مش ندمانة على الرجوع .. لكن جزء من حياتي هناك و بحن له احيانا

عايزة ارجع اكتب في الموضوع ده تاني و مش قادرة

[التونسى]

ايييييييييييه .. كانت أيام

وحشتني حاجات كثير هناك .. قرب البيت من الكلية .. العمل الجماعي .. تقريبا كل حاجة على النت و بسهولة توصل للمعلومات .. الطبيعة مختلفة و سهل تستمتع بيها .. المشاكل الشخصية مبتوقفش شغلك

مبسوطة هنا اني في وسط أهلي.. بحاول ابني قد ما اقدر في بلدي و بعيني بشوف التغيير .. ابني بيعرف بلده و اهله أكثر .. بسمع الاذان 5 مرات في اليوم .. بشوف النخل و النيل

مش ندمانة على الرجوع .. لكن جزء من حياتي هناك و بحن له احيانا

عايزة ارجع اكتب في الموضوع ده تاني و مش قادرة

انا مقدر جدا .. ومتفهم .. لحنين حضرتك لتلك الايام ((والتى بلاشك مميزه)) والى عشتيها ببلاد الضباب .. وتحديدا لندن بصخبها وزحامها وعراقتها .. وكذا التنوع الثقافى والفنى والبشرى والعرقى فيها ..والملفت للنظر وللاندهاش... مما يجعلها فى نظر الكثيرين .. ((عاصمة الدنيا )) او ((عاصمة العواصم)) .. حنينك هذا مررت به بعد زياراتى الاولى لانجلترا.. والتى امتدت لشهرين فقط .. انبهرت بهم ..واصبت بصدمة حضاريه .. مما دفعنى لزيارة اخرى .. ثم قرار بالاقامة .. ثم هجره .. ثم تعايش .. فتململ .. فحنين مرة اخرى اقوى... ولكن للوطن الام مصر .. وهو الحنين الاصدق والابقى .. ولكن لا اخفيكى عليكى ..ان لانجلترا فى قلبى نصيب ليس بضئيل من الحب والعرفان .. تولد بفعل سنوات طوال عشتها هناك .. اغلبها كان عمل مضنى ولكن ممتع .. تخلله ذكريات جميله وسعيده .. وخبرة حياتيه .. ازعم انها صقلتنى كثيرا .. وارتقت بى انسانيا لمرتبة جيده..

لعل مداخلتى تلك تشجعك على مزيد من الكتابة حول تجربتك

تم تعديل 23 أبريل 2011 بواسطة التونسى

[اليمامة]

أم زيد

أسلوب جميل وتفاصيل حلوة استمعت بقرائتها صفحة صفحة

بخصوص الصينين هههه ضحكت والله

فعلا نطقهم غرررررررررررررريب جدا جدا جدا

أما بخصوص الطعام الحلال

فمن المعلوم أن ذبائح أهل الكتاب يجوز أكلها , فليش نضيّق ما حلل الله .

تحياتي ويا ليت تكملين الموضوع

[Om Zayd]

اغلبها كان عمل مضنى ولكن ممتع .. تخلله ذكريات جميله وسعيده .. وخبرة حياتيه .. ازعم انها صقلتنى كثيرا .. وارتقت بى انسانيا لمرتبة جيده..

لعل مداخلتى تلك تشجعك على مزيد من الكتابة حول تجربتك

جزاكم الله خيرا

السطرين اللي حضرتك كتبتهم بيلخصوا حاجات كثيييير عشتها هناك

كان فيه مشاكل .. بس كنت ببقى عارفة آخذ حقي ازاي

تعاملت مع ثقافات كثيييييييير "قلتلكم المعمل بتاعنا كان زي الامم المتحدة .. غير الجيران و الناس في المسجد و الشارع و المحلات

منتظرة موضوع رائع من حضرتك عن تجربتك هناك

[Om Zayd]

أم زيد

أسلوب جميل وتفاصيل حلوة استمعت بقرائتها صفحة صفحة

بخصوص الصينين هههه ضحكت والله

فعلا نطقهم غرررررررررررررريب جدا جدا جدا

أما بخصوص الطعام الحلال

فمن المعلوم أن ذبائح أهل الكتاب يجوز أكلها , فليش نضيّق ما حلل الله .

تحياتي ويا ليت تكملين الموضوع

جزاكم الله خيرا على الثناء الذي لا أظنني أستحقه

بالنسبة لموضوع ذبائح أهل الكتاب

الاختلاف كان على انهم بيدبحوا بعد الصعق بالكهرباء

و هذا الصعق هو اللي عليه الخلاف.. هل الذبيحة بتكون ماتت بالكهرباء قبل الذبح أم لا

عشان كده كنا بنفضل اللي عليها رقابة من هيئة مستقلة بتقول انه حلال

عموما .. الحمد لله كان اللحم الحلال متوفر -أغلى بعض الشيء- حتى في سانسبري و أسدا

و مطاعم كثير عندها فروع كاملة حلال .. غير اللي فيها ده و ده

فيه مدن تانية الموضوع كان بيبقى أصعب..اصحابي كانوا بياكلوا حسب اللي موجود في المحل اليتيم اللي في البلد اللي بيبيع حلال

تحياتي لحضرتك

[Om Zayd]

عدنا

بس مش أوي

:closedeyes:

رجعنا البيت

مفيش انترنت

لأن لسة العقد مش باسمنا و كانوا مفهمينا ان العقد مينفعش يتنقل

اتضح بعد كده انه ممكن تنقل العقد لعنوانك الجديد عادي جدا .. و انك بتدخل الانترنت بسهولة جدا جدا

يا دوب معانا شريحة موبيل مصري تجوال و اشترينا شريحة انجليزي -كارت مش خط- و اسعار الاتصال منها كانت غالية جدا جدا

جنبنا كان فيه كابينة تليفون بالعملة .. عرفنا اننا ممكن نستعمل كروت الاتصال الدولي منه

بس كنا في عز الشتا .. و لازم نتكلفت كويس عشان ننزل نطمنهم علينا في مصر

اللطيف ان موبيلي فصل شحن و موبايل زوجي كان باظ قبل منسافر علطول و قلنا نبقى نشتري واحد جديد من انجلترا

احاول اوصل الشاحن في الفيشة .. طبعا مركبتش

لان الفيشة هناك مثلث .. فيها أرضي و فيشنا اتنين

نحاول ننزل الارضي بتاعها

مفيش فايدة

معرفناش نتصل طبعا بمصر نطمنهم

http://www.egyptiantalks.org/invb/index.php?showtopic=112897&view=findpost&p=659461

المهم .. تاني يوم .. رحت لزوجة كالب مصري ساكن جنبنا جدا-واحد من الاتنين اللياستقبلونا ربنا يجزيهم خير- بحكيلها على موضوع الفيشة و بسألها على مشترك .. قالت ان معندهاش غير اللي موصلة فيه شاحن موبيلها

و لسة بتخلعه منه .. لقيته نفس شاحن موبيلي.. اللي هوا أصلا عمري مشفته مع حد في مصر

المهم أصرت آخد المشترك.. مشتغلش عندي

شكيت في الشاحن.. رحتلها و شحنت موبيلي عندها

و طمناهم في مصر أخيرا

مش عايزة اقولكم القلق كان عامل ازاي و التقطيم برده

:closedeyes:

بالمناسبة.. في الاخر اكتشفنا ان الكام فيشة اللي جربناهم في البيت كانوا الوحيدين اللي بايظين في البيت

!!!!!!!

ما علينا

عايزين نشتري كمبيوتر

برده .. قلنا نجيب واحد من انجلترا أحسن

طبعا فيه ناس قعدت تقطّمنا.. الاسعار هنا أغلى .. خصوصا الاكسسوريز -الماوس و الكيبورد و الكاميرا .. الخ

بس طبعا كل فترة تلاقي عروض رهيييبة و تخفيضات هايلة

كنا خلصنا فلوسنا في الايجار و الفواتير و الاتفاق على البيت الجديد

و التحويل اتأخر

هوب بدأنا أجازات الكريسماس..كل حاجة قدامنا و أسعارها تحفة و مش عارفين نشتريها من قلقنا ان الفلوس تتأخر و ورانا التزامات مهمة و لازم يفضل معانا سيولة

بالتالي كان كريسماس بارد و كئيييب من غير تسوق

:closedeyes:

ايييه

الحمد لله

[Om Zayd]

آه

حاجة تانية لطيفة حصلت في أول يومين

تاني يوم الصبح عدى علينا زميلنا عشان نروح الجامعة

أصريت يشرب شاي

كنا واخدين معانا غلاية مية كهربا

بس طبعا ..مشكلة الفيشة

يادي الكسوف.. أطلع اقولهم ايه؟

الحمد لله كان فيه ميكروويف

غليت المية فيه

و عملت الشاي

:closedeyes:

[اليمامة]

ام زيد

احذري اشد الحذر من غلي الماء أو أي سوائل في المايكروويف

لانه خطير جدا جدا ويتسبب بحروق من الدرجة الاولى واحيانا فقدان جزئي للبصر

فالماء يصل لدرجة الغليان في المايكروويف خلال دقيقتين فقط ودون أن تظهر عليه فقاقيع الغليان

وبمجرد ادخال ملعقة او اضافة نكسافيه مثلا فهو يفور فجأة وينفجر ومعظم حوادث الاحتراق تحصل بسبب غلي الماء بهذه الطريقة

الحمدلله انها جت سليمة

[Om Zayd]

ام زيد

احذري اشد الحذر من غلي الماء أو أي سوائل في المايكروويف

لانه خطير جدا جدا ويتسبب بحروق من الدرجة الاولى واحيانا فقدان جزئي للبصر

ده حقيقي و جزاكم الله خيرا .. كان المفروض اكتب ده في المداخلة اللي فاتت

ربنا ستر الحمد لله ..

و انا بستخدمه في المعمل في تحضير الاجاروز .. مرة مخدتش بالي و صبيته علطول-المفروض نهزها يرفق عشان نخرج فقاعات الهوا-.. بس كنت لابسة الجوجلز

ربنا ستر الحمد لله