الســــــواقــــة - فـن وذوق وأدب

[اغابي]

بصراحة اللى شجعنى اكتب فى الموضوع داه - اللى بشوفوه كل يوم فى الطريق

اللى داخل عليك بدون اشارة وبقمة فى الــ ...... مش مهم اقول شتمة - المهم يبتسم ويضرب سلام قال يعنى استأذن وانا سمحتله

واللى فجأه يزنق عليك فى الطريق - واللى يستظرف على الطريق وهو راكب عربية تريلا وماشي فى الحارة الغلط

وبرغم انى ملتزمة جدا ان امشي فى الحارة اللى تناسب سرعتى الا انى بشوف تجاوزات وحركات كدا مستفذة اوى

لا لا لا - ما تقولوش علشان انتي ست بيحاولوا يضايقوكى - لا - مش كدا خالص

هو فى الاغلب اللى ماشي غلط وبدون اشارة وبيضرب لايت عالى مش بيبقى فى الاغلب واخد

باله مين اللى بيسوق راجل ولا ست

ولا كمان لما طفل يبقى راكب عربية جيب ضخمة وبيستعرض فى الطريق وعمره لا يتعدي الـ 14 سنة

بصراحة ربنا يحمينا شر الطريق

ليا سنين بسوق والناس الذوق اللى قابلونى على الطريق يتعدو على الصوابع

نادرا ما حد يقولى اتفضلى قبلى او اى حاجة تدل على ان الدنيا لسة بخير

كل الناس مستعجلة

وكل الناس عصبية

وكل الناس عاوزة تلحق سيارة الاسعاف

وكل الناس خلقها ضيق

مع انى حتى لو مستعجلة بقول لاى حد اتفضل واسمحله يعدي قبلى

وبحترم انى ادى الاشارات فى اى اتجاه ناوية ادخله

بصراحة الموضوع طويل جدا

لان السواقة - فن وذوووووووووووووووق وأدب

اغابي

[تامر مصطفى]

انصحك بالسواقة في مصر لمدة 3 شهور وانتي هتخفي وتبقي كويسة

فكرتيني بسواقة مراتي

لو واحد جاي من بعيييييييييييييييييييد تفضل تقولي بص داخل ازاي؟؟؟؟؟

وانا كل مرة اقولها ما احنا بعيد عنه بسنه ضوئية

تحياتي لسواقتك الملتزمة

[rewsha]

انصحك بالسواقة في مصر لمدة 3 شهور وانتي هتخفي وتبقي كويسة

ايه ده :unsure:

طب مانا باسوق في مصر لمده اكتر من 3 شهور اُمال ماخفيتش ليه لحد دلوقتي؟

:P

بس بصراحه اللي يسوق في مصر يعرف يسوق في اي حته تانيه

لكن مش اي حد يعرف يسوق في مصر

انا عندي بنات اخويا ومراته كلهم بيسوقوا في الامارات .لكن مافيش واحده فيهم تجروء انها تحاول تسوق في مصر

مصر دي حاجه تانيه

(مصر ام الدنيا)

[herohero]

تحياتي للفن والذوق والأخلاق في القياده

حضرتك عليكي وعلى تجربة القيادة في شارع شبرا غالبا في اي وقت وساعتها تعرفي

وياسلام حضرتك لو تسوقي ع الطريق الدائري

ولا ياسلام بقى لو دخلت في شوارع حدائق القبة ولا وسط البلد

سواقه الخليج والكويت ده نعممممممممممممممة

وبعدين انت بتتكلمي ع الكويت اللي هي صغنونه

تعالي شوفي السواقه ف السعوديه أقل حاجه 140 وبيبقى عمال يقلب ليكي وكده تبقى بطيء جدااااااااااا

حضرتك انزلي مصر وسوقي اسبوع ساعتها هتنسي

القياده فن + ذوق + أخلاق

كل ده مش موجود القياده= فهلوة+غلاسة + قلب ميت

شرط صغنن ماتبقيش خايفه ع العربية ده شيئ مهم

جمد قلبك "ماونتن ديوووووو

[Dreamwithme]

حبيبتي أغابي

إليكي قواعد السواقة الجديدة في مصر حاليا

القاعدة الأولى:

لو عربيتك كبيرة أو قديمة، أستخدم المبدأ القانوني: اللي خايف على عربيته يوسع!! :angrycop:

ملحوظة: ابعد عن سكة العربيات المخرشمة ، بيسوقوا بنظرية ضربوا الأعور على عينه!!

القاعده الثانيه:

البوز بيز Booze Base: اللي يدخل ببوز عربيته الأول للتقاطع هو صاحب أولوية المرور! :victory:

احرص على أن تكون صاحب أول بوز.

ملحوظة: لا تطبق الـ Booze Base مع أي لوري أو أتوبيس، حرصاً على بوزك لا مؤاخذة.

القاعدة الثالثة:

الإشارات تكشف نواياك للأعداء، أياك أن تستخدمها!

القاعدة الرابعة:

لا تترك مسافة للأمان بينك و بين السياة التي أمامك فهذا له عدة مخاطر:

1. عربية ثانية حتملا الفراغ في ثواني و برضوه ما يبقاش فيه مسافة بينك و بين الي قدامك، كل الي كسبته انك اتأخرت لورا شوية.

2. حتدي فرصة للعيال يعملوا غرز قدامك.

3. كل المشاة حيغمضوا عينيهم و يعدوا من الحته دي.

4. الي وراك حيقعد يزمر - لو كان مؤدب - أو تسمع شوية أسامي حيوانات لو كان سواق تاكس - مؤدب - ، أو حيخبطك من ورا لو كان سواق ميكروباص - و دول مفيش حد منهم مؤدب -.

الإشارات مش معمولة علشان تنظم المرور ، معمولة علشان شكل القاهرة يبقى متحضر بس! :blush:

اعتمد على العساكر ( مع تحملك كامل المسؤلية لو واحد منهم شاورلك تعدي و بلدياته الناحية الثانية فتح السكة للوري ) أو يفضل أن تستعمل البوز بيز ( راجع القاعدة الثانية ).

القاعدة الخامسة:

اذا كنت مش واقف في الصف الأول في الاشارة اعمل حسابك تزمر بشكل متواصل و هستيري أول ما الأشارة تفتح، لأن الناس الي قدام بيبقوا واقفين في الاشارة من زمان و جايز جداً يكونوا ناموا!! :trumpet:

القاعدة السادسة:

معظم الحوادث تحدث في التقاطعات أول الأشارة ما تحمر، كل ما عديت الإشارة الحمراء أسرع كل ما قلت فرصة انك تتخبط!

القاعدة السابعة:

الشارع مكان مقرف، سوق بأسرع ما يمكن حتى تتخلص من هذا الهم بسرعة،

الناس الي ماشيين بالراحة مرضى نفسيين بيستمتعوا بالعذاب ، يستاهلوا الي يجرى لهم.

القاعدة الثامنة:

من حقوقك الدستورية أن تركن أمام باب المحل الذي تريد أن تشتري منه، prt:

اذا سبقك واحد ابن ستين في سبعين و ركن قدام الباب، فمن حقك أن تقفل عليه و تركن صف ثاني أو ثالث، و مش مهم لو الشارع اتقفل، ايه يعني أما الناس تتعطل عشر دقائق علشان تستمتع بحقوقك الدستورية؟ هيا يعني الدنيا طارت ولا كان وراهم الديوان؟

القاعدة التاسعة:

من حقك أيضاً أن تخرج من مكان انتظارك في أي لحظة تشاء، اكسر الدركسيون شمال و اطلع، أي حد ماشي في الشارع لازم يقف لك فوراً، راجع البند السابق.

القاعدة العاشرة:

إحترس من ثلاث أنواع من السائقيين بيسوقوا و كأنهم مش ممكن يموتوا :

1. العيال الروشين الي بيلعبوا Computer Games و فاكريين إن ممكن يكسبوا Life زيادة لو ساقوا أسرع.

2. موتوسيكلات توصيل الطلبات ( Home Delivery ).

3. سواقين الميكروباص.

ملحوظة: إوعى تحاول تثبت لحد منهم إن فكرته غلط. فاهمني!!!.

القاعدة الحادية عشر:

لما تشوف حادثة لازم تهدي و تتفرج - مش مهم تساعد - الحجات دي دمها أخف من الأخبار المملة بتاعة التلفيزيون، و بعدين لما الطريق وراك يقف تحمي المجتمع من حادثة تانية.

القاعدة الثانية عشر:

الكناسين لازم يحللوا اللقمة الي بياكلوها، حاول تنفعهم و ترمي أي حاجة من الشباك.

القاعدة الثالثة عشر:

لما تخلص سيجارة أوعى تحطها في الطفاية، ارميها من الشباك أول ما تشوف واحد بموتوسيكل معدي جنبك ( علشان يحرم يعمل غرز ).

القاعدة الرابعة عشر:

من حقك أن تعبر الشارع في أي وقت و من أي مكان flrt: .

القاعدة الخامسة عشر:

اذا كان هناك سيارة قادمة اعمل نفسك مش واخد بالك و عدي براحتك خالص،ما تخافش، هوا حيقف، هو اهبل يدوسك و يودي نفسه في داهية؟

القاعدة السادسة عشر:

اياك أن تنظر نحو السيارات القادمة، أعبر الطريق و ظهرك لها حتى لا يشك أحد قائدي السيارات أنك تراه و يحاول يخوفك علشان تقف انت.

القاعدة السابعة عشر:

حتى لو شفته أوعى تخاف - خصوصاً لو معاك مراتك - تبقى راجل ملو هدومك و تخاف من حته عربية؟

عرض قفاك و سيبه يتفلق.

القاعدة الثامنة عشر:

الرصيف ليس للمشاه، بل لركن السيارات و فرشات الباعة الجائليين و المحلات... الخ،

لذلك يحق للمشاة السير في وسط الشارع، لمزيد من الأمان، راجع القاعدة السابقة.

القاعدة التاسعة عشر:

إذا كان الماشي من فئة النقل الثقيل، فمن أبسط حقوقة إنه يمشي على أقل من مهله و يهتز براحته. واللي مش عاجبة الهز يدور على لوري يخبطة....

:copied:

[MZohairy]

اسوأ سواقه و مرور شوفتهم في حياتي في القاهره حيث العشوائية بلا اي نظام او ضوابط

يليها في الرياض و جده حيث الرعونه و التهور و اللا مبالاه

بينما تأتي مسقط في قمة المدن العربيه من حيث الإنتظام و الالتزام و النظام و الأدب

طبعا مش حجيب سيرة كندا

[capitshino]

يليها في الرياض و جده حيث الرعونه و التهور و اللا مبالاه

الرياض و جدة ..

يبقى حضرتك اكيد ماجربتش تسوق فى الطائف bsh:)

[الســـاري]

يليها في الرياض و جده حيث الرعونه و التهور و اللا مبالاه

الرياض و جدة ..

يبقى حضرتك اكيد ماجربتش تسوق فى الطائف bsh:)

متفائل كثير بنظام ساهر .. السواقة بالمدينة المنورة اختلفت خالص بعد تعميم نظام ساهر فيها ..

ما اعرف الطائف اشتغل النظام فيها الان ولا لسه

[اغابي]

طيب - نهاردة وعلى وش الصبح كدا والطريق زحمة - مدارس بقى وموظفين

والاقى الشرطة واقفة على حارة الطوارئ وايه عاملين صرب عربيات 3 عربيات مترصصين قال ايه بيفكوا الزحمة مع ان هما السبب الرئيسي فى الزحمة

مش عارفة ليه بس تطلع من الجزء اللى فيه سيارات الشرطة تلاقى الطريق فك وبقى واسع وبراح وما خلصناش على كدا

لا .... الرخامة بقى وقلة الزوق ترجع من تانى - اللى كاسر عليك بدون اشارة والطريق فاضي قدامه طب انت عاوز ايه فهمنى

بصراحة كانت استفزاز جامد وانا ندمت انى اخدت طريق الغزالى

لو اخدت الدائري الخامس افضلى

الله يسترها علينا

[اغابي]

اه بالنسبة لسواقة مصر

معايا تجربة فعلا حقيقية حصلت قدامى - اخو جوزى وهو مهندس مدنى وبعد ما اشترى عربية ب 120 الف جنيه

بس شهرين صدقونى بجد وركنها فى باركن العمارة ورجع لمواصلات

زماااااااان واتوبيش الشغل اللى بيوصل الموظفين كدا اريح

اللى حصل انه جاله السكر - بس بجد جاله السكر برغم عمره 45 سنة

هو عصبي اوى وفعلا مراته بتقولك كنا ماشيين بالعربية وهو خايف كمان عليها لانها جديدة

واتعصب فى الطريق المهم رجع تعبان راح المستشفى طلع عنده السكر هو بيشكر ربنا لانه بيعتقد

ان كمان شهرين تانى فى سواقة الشوارع دى ممكن يجيله شلل رعاش

لا مش هزار داه نفسيته تعبت جدا هو دلوقتى العربية كدا ديكور فى الباركن علشان اسمه عنده عربية

ونفس الحركة دى مع ابن خالتى لكن ما جلهوش السكر هو بس لاقى نفسه بيتحرق دمه اكتر ما بيتحرق بنزين العربية

كانو بيحكولى حاجات عن سواقين الميكروباصات تشييييييييب

[capitshino]

يليها في الرياض و جده حيث الرعونه و التهور و اللا مبالاه

الرياض و جدة ..

يبقى حضرتك اكيد ماجربتش تسوق فى الطائف bsh:)

متفائل كثير بنظام ساهر .. السواقة بالمدينة المنورة اختلفت خالص بعد تعميم نظام ساهر فيها ..

ما اعرف الطائف اشتغل النظام فيها الان ولا لسه

لسه ما اشتغلش فى الطائف