لو حد فاهم ياريت يفهمنى

[akramgroup]

انا بجد نفسى حد يفهمنى هو ليه كده

يعنى انا بما انى عايش فى الخليج ومنزلتش اجازة الصيف ده وكل ما اسأل حد من وملائى اللى راجعين من مصر

يقولى اسكت اوعى تنزل اجازة وانا اقولهم ليه ياجماعة وكلهم تقريبا نفس الرد اللى هو الناس وحشه اوى فى مصر واتغيروا تماما واوعى حد يفكر انه ينزل مصر نهائى واللى يقدر مينزلش مصر اجازة يبقى عمل خير فى نفسه

بس هو سؤالى يعنى ايه الناس بقت وحشه؟؟

يعنى ايه الناس اتغيرت

انا مش فاهم هو قصدهم نسبة الناس اللى مش كويسه بتزيد؟؟وايه اللى زودها اصلا؟؟

ولا ايه ماهم الناس اللى فى مصر دول اهلى واهلك وجيرانى وجيرانك واصحابنا يعنى ناس زينا كده ولا هيا مصر فيها شعب جديد استوردوه

طبعا اللى هايقدر معنى كلامى ده معظم الناس اللى عايشه برة مصر وبتنزل اجازات كل فترة

بس انا بردو مش فاهم حاجه هو فى ايه اللى حصل ولاهو من الاساس مفيش حاجه اتغيرت والناس زى ماهيا

والمقوله دى بقت موضه لكل واحد راجع من الاجازة

ياريت لو حد فاهم حاجه يفهمنى

ياريت حد يقولى حصل ايه للناس فى مصر وليه حصل كده ده لو فى حاجه حصلت اصلاً

[لماضة مصرية جدا]

السلام عليكم و رحمة الله و بركاته

استاذي أكرم

مستغربة أنا الحقيقة

عارف حضرتك ليه؟؟

لأن المفروض لما الواحد بيقطع التذكرة علي مصر بيبقي مبسوط و مزقطط كده أنه هيشوف أهله و يطمن عليهم و يتونس بيهم

ليه بقي تخلي الناس تسرق فرحة حضرتك دي...فرحة انك ترجع لأهلك و ناسك و بيتك و ابوك و أمك اللي مش عايزين من حضرتك لا ناقة و لا جمل

يمكن الاصدقاء الله يصلح حالهم تعرضوا لمواقف في مصر مش كويسة....بس ايه الفايدة انهم يعمموها يعني

يعني خلاص نفضل راكنين بره و كل شوية نبعت فيزا زيارة و نجيب حد من العيلة...لا مينفعشي طبعا

هو حضرتك لما هتنزل اكيد هتصادف تغييرات كتيرة....بس يعني مش وحشة أوي

طب يعني مش عايز ترمي نفسك في حضن والدتك...و تقولها وحشتيني

طب مش عايز تطلع تصلي في كتف والدك في نفس زاوية الجامع اللي علي اخر الشارع

طب مش عايز تقعد مع اخواتك وولاد عمك ع السطوح لغاية الفجر...و انتوا قاعدين تكركعوا و تجيبوا في قصص هبلة و عبيطة

طب مش عايز تطمن علي اصحابك و تغيظهم و تقولهم اما انا يا ولاد شفت بطيخة في السعودية طالعة بالطول مش كور زي عندنا

طب مش عايز تقعد جنب سواق الميكورباص...و تحس انه هيلبس في عمود النور و ع الرغم من كده....مروق دماغه اخر حاجة

طب مش عايز برضه و انت في نفس الميكروباص الفوقاني...(اوعي تقوم لسه محطتك مجتشي)...تلاقي التباع بيديلك باقي الاجرة بونبوناية...و لما تستغرب و تفتكر ان احنا رجعنا لعصر المقايضة بقي و هننزل بعدد 7 بيضات و نقايض معاهم سواق السوارس....و لما تعترض بصوت عالي في الميكورباص...هتلاقي الجماهير بتلتحم معاك....و لازم تسمع الجملة الخالدة....إييييييه فين أيام زمان..(اموتو اعرف فين زمان دوت)

طب مش عايز تقعد ع القهوة و تطلب كوباية شاي بالنعناع في الكوباية اللي مغسولة من تحت الحوض....بس طعم الحوار في السياسة و الكورة....و التعليم و اسعار الطماطم...و اختفاء الحشيش...كل ده...هينسيك ان اصلا الكوباية فيها سم قاتل

طب مش عايز تتمشي كده من البيت لغاية البيت....(يعني من بيت العيلة لبيت حضرتك)....و تلاقي ناس كتير في الشارع و تقول نفسك هي الساعة كام...و تلاقيها....الساعة 3 الفجر و الناس لسه مصهللة

لو مش عايز كل ده.....يبقي فعلا بلاش تنزل اجازة خالص و خليكي يا راجل...هو فيه احسن من الغربة...هوا تكييف....قصدي نضيف....و العيال....متخندقين في علب الكبريت....و احنا املين زي الروبوتات....الصبح دوام...و بالليل دوام و ما بينهما محاورات

عايز اقول لحضرتك.....اول اجازة...يعني اول لقا ليك مع اهلك بعد طول غيبة...متخليش حد يسرق الفرحة دي

و بعدين حضرتك تروح بالسلامة و لما تيجي ابقي احكيلنا بقي...ليه تقدر الضيق قبل لا قدر الله وقوعه....انت ظبط دماغك...انا نازل انبسط...و هتلاقي نفسك انبسطت....و الله حتي في احلك المواقف كنا بنضحك....حتي لما كنا هنتخطف....و كان فيلم هندي....لقينا نفسنا برضه...واخدناه علي مية باردة....اصلها مش مستاهلة

حضرتك لسه قاعد....قووم حضر الشنطة...و متنساش الهدايا...

مساااااحضرتك....شوق لطلة العينين بعد اول فراق

[Howayda Ismail]

انا اسفة يا استاذ اكرم لكن الوحش بس هو اللى بيشوف الناس وحشة

ماهو مش معقول كل الناس فى مصر بالصورة اللى قالوا لك عليها والا احنا بقى معندناش احساس وقاعدين

فيها ليه لحد دلوقت مع انه فى فرص كتير نخرج منها لكن احنا زى السمك ملناش فى السفر ياا ما بقى احنا

كمان وحشين طيب فين امى وامك واختى واختك وقرايبنا واصحابنا وحتى البياعين السريحة الغلابة فى الشوارع

انا تقريبا بانزل كل يوم اقضى مصالح بيتى واولادى وبتعامل مع فئات مختلفة وطبقات مختلفة وبرضه طباع مختلفة

لكن الحمد لله الصورة مش سودة كده والا كنت حبست نفسى فى بيتى وولادى يقضوها نيابة عنى

هو فى حاجة عاوزة اقولها وجايز ناس تزعل منى بس دى حقيقة شفتها من ناس جريت الفلوس فى ايدهم ودول الشبعة

بعد جوعة بيظنوا ان الناس طمعانة فيهم او بتحسدهم على عيشتهم لانهم هم من جواهم كده وكل مافلوسهم تزيد

يخافوا اكتر ومرضهم النفسى يزيد تلاقيه يتعالى ويتعالى

مش حننكر ان فى ناس وحشة لكن كام 100% مستحيل طبعا انت بتشوف الناس حسب النظارة اللى انت لابسها

سالتهم السبب ايه حتلاقيه مادى من الدرجة الاولى وايه يعنى حتى لو كانت شوية هدايا بسيطة تراضى اهاليهم

اظن انهم نزلوا عند اهاليهم وقرايبهم فهل كل الناس دى بقت وحشة فجأة ومن غير سبب

مصر لسة بخير ليل ونهار والناس برضه بخير رغم اللى بيحاولوا يشوهوها برة او جوة

[raouf]

والله يا اكرم انت جيت على الجرح

انا اول ما سافرت السعودية كنت بانزل مصر 3-4 مرات فى السنة اشوف اهلى

اشوف مصر

اتمشى على النيل او اروح الاهرامات

وكنت باحارب علشان اخد يوم او يومين زيادة فى الاجازة

كنت باهاجم اى واحد مصرى عايز يهاجر واقوله اذا سيبنا احنا مصر مين هايقعد فيها

لازم كلنا نقاوم الفساد والمفسدين اللى يمشوا منها

دى بلدنا احنا مش بلدهم

كنت بأعد الايام واحسبها علشان ارجع نهائى مصر

فى اخر 4 سنين الامور اتغيرت تماما

بدات اقلل من نزولى والسبب العقبات اللى بتواجهنى كل ما انزل

كل ما انزل لازم اعمل شهادة جيش

وتصريح عمل وغيره وغيره

ده غير الللى اصبحت بالاحظه من تدهور سلوكيات واخلاق الناس

ده غير مضايقاتهم وخصوصا لما انزل بالسيارة من هنا

فى الاخير عملت زى البرادعى وعرفت انه مافيش فايدة

بقيت انزل الاجازة متعتى الوحيدة فقط ان ارى امى وابى واخوتى وبعد اسبوعين اقول انا عايز ارجع السعودية ثانى

واستغنيت عن ده انى باعمل لاهلى زيارة ييجوا هنا مرة وانا انزل مرة

وفى الاخير اخدت قرار بعدم الرجوع النهائى لمصر الا بعد تغير الاوضاع اللى انا عارف انها مش هاتتغير

والان انا فى مرحله بحث عن وطن بديل يكبر فيه اولادى بامان بعيد عن المفسدين

تم تعديل 22 نوفمبر 2010 بواسطة raouf

[akramgroup]

الاستاذة ريهام

الاستاذه هند

انا عاوز اقول ان طبعا الكلام ده انا مش مقتنع بيه اصلا وعمرة ماهيأثر عليا اكيد

لانى انا من الناس اللى بتحب مصر جدا مهما حصل وتحت اى ظرف من الظروف وكلنا كده اكيد

اكيد بعض الناس بقى يغلب عليها الطابع المادي وزى ماقالت الاستاذه هند ان بيحسوا ان الناس طمعانين فيهم

طبعا بديهي جدا ان الظروف الاقتصاديه بتأثر على السلوك

وكتير من الناس دلوقتى بقت همها الاول والاخير الفلوس ومبقتش شايفه حاجه غيرها

لكن بجد اكتر حاجه بشوفها فى الشوارع وكل سنه بتزيد بصورة عجيبه

تقريبا اختفاء رجال الشرطه من الشوارع فيما عدا بتوع المرور

مش عارف شكلهم هايلغوا ظباط الشرطه والعساكر من المنهج ولا ايه

[akramgroup]

والله يا اكرم انت جيت على الجرح

انا اول ما سافرت السعودية كنت بانزل مصر 3-4 مرات فى السنة اشوف اهلى

اشوف مصر

اتمشى على النيل او اروح الاهرامات

وكنت باحارب علشان اخد يوم او يومين زيادة فى الاجازة

كنت باهاجم اى واحد مصرى عايز يهاجر واقوله اذا سيبنا احنا مصر مين هايقعد فيها

لازم كلنا نقاوم الفساد والمفسدين اللى يمشوا منها

دى بلدنا احنا مش بلدهم

كنت بأعد الايام واحسبها علشان ارجع نهائى مصر

فى اخر 4 سنين الامور اتغيرت تماما

بدات اقلل من نزولى والسبب العقبات اللى بتواجهنى كل ما انزل

كل ما انزل لازم اعمل شهادة جيش

وتصريح عمل وغيره وغيره

ده غير الللى اصبحت بالاحظه من تدهور سلوكيات واخلاق الناس

ده غير مضايقاتهم وخصوصا لما انزل بالسيارة من هنا

فى الاخير عملت زى البرادعى وعرفت انه مافيش فايدة

بقيت انزل الاجازة متعتى الوحيدة فقط ان ارى امى وابى واخوتى وبعد اسبوعين اقول انا عايز ارجع السعودية ثانى

واستغنيت عن ده انى باعمل لاهلى زيارة ييجوا هنا مرة وانا انزل مرة

وفى الاخير اخدت قرار بعدم الرجوع النهائى لمصر الا بعد تغير الاوضاع اللى انا عارف انها مش هاتتغير

والان انا فى مرحله بحث عن وطن بديل يكبر فيه اولادى بامان بعيد عن المفسدين

واللهى انت اللى جيت على الجرح انت جبت المفيد

الامان ده من الاحتياجات المهمه ويمكن اهمها

المشكله الاساسيه من وجهه نظرى عدم الامان فى مصر وانك وانت ماشى فى الشارع

بتشوف مهازل بتحصل من معاكسات لبلطجه الخ الخ

والناس مبقتش ليها دعوة بحاجه يعنى كل واحد مع نفسه ولاحد يقول عيب ولاحرام

بعكس ماانت عايش فى امان برة مصر وده للأسف الشديد

ماهو انا لسه بتكلم فى اختفاء رجال الشرطه من الشوارع ( ايام ماكانوا رجال بقى )

[raouf]

لكن بجد اكتر حاجه بشوفها فى الشوارع وكل سنه بتزيد بصورة عجيبه

تقريبا اختفاء رجال الشرطه من الشوارع فيما عدا بتوع المرور

مش عارف شكلهم هايلغوا ظباط الشرطه والعساكر من المنهج ولا ايه

لا هم مش هيلغوا الشرطة

هى الشرطة اصبحت فقط مرور لجباية الاموال ودفع رواتب بشوات الشرطة

والباقى امن دوله وامن مركزى

فيه حد ممكن يقولى اخر مرة سمعنا عن القبض على تاجر مخدرات كبير او خلافه :

ايه اخر مرة سمعنا عن القبض على مهرب كبير او حرامى او نصاب ؟

فيه فى مصر ناس الان بتمضى على شيك بمليون جنيه وتقولك هات 10000 جنيه بس

وقابلنى لو اخدت حقك

لقد اصبحنا فى عصر الدولة البوليسية

تطبيق المقولة الشهيرة اللى يدفع يفوت واللى ما يدفعش يموت

ولا عزاء للشرفاء

[MaYousof]

أنا عارف إن كلامي تقيل على كتير منكم ..

بس والله قلبي أبيض زي البفتة البيضا ..

فمعلش يعني استحملوني شوية ..

هو اللي أنا فهمته من مداخلات الأفاضل حتى الآن إن:

الناس بقت وحشة عشان البلد مابقاش فيها أمان لإن جهاز الشرطة دلوقتي مافهوش إلا نسوان ..

صح كده ولا أنا فاهم غلط؟

[Om Zayd]

فى اخر 4 سنين الامور اتغيرت تماما

بدات اقلل من نزولى والسبب العقبات اللى بتواجهنى كل ما انزل

كل ما انزل لازم اعمل شهادة جيش

وتصريح عمل وغيره وغيره

ده غير الللى اصبحت بالاحظه من تدهور سلوكيات واخلاق الناس

ده غير مضايقاتهم وخصوصا لما انزل بالسيارة من هنا

فى الاخير عملت زى البرادعى وعرفت انه مافيش فايدة

بقيت انزل الاجازة متعتى الوحيدة فقط ان ارى امى وابى واخوتى وبعد اسبوعين اقول انا عايز ارجع السعودية ثانى

واستغنيت عن ده انى باعمل لاهلى زيارة ييجوا هنا مرة وانا انزل مرة

وفى الاخير اخدت قرار بعدم الرجوع النهائى لمصر الا بعد تغير الاوضاع اللى انا عارف انها مش هاتتغير

والان انا فى مرحله بحث عن وطن بديل يكبر فيه اولادى بامان بعيد عن المفسدين

كلامك زعلني جدا

بالذا ت انك كنت مقتنع اننا لازم نصلح بلدنا

هو ليه ما بنفرقش بين الوطن و الحكومة؟

كل بلد فيها الكويس و الوحش و وظيفة الدولة انها تنظم العلاقة بين الناس

الدور ده غائب الآن عشان كده مش شايفين غير الوحشين بس

لكن بلدنا و ناسها و الله فيهم خير كتييييييييييييير اوي

في كل حتة ممكن متحسش بالأمان .. في أحسن دول في أماكن و اوقات محدش عاقل يمشي فيهم

حتى الشرطة مالهاش سيطرة عليهم

في انجلترا .. في الاوتوبيس ممكن شوية صيع يرخموا على الناس رغم ان فيه كاميرات

انا كنت واقفة في محطة اتوبيس عند الجامعة مش في حتة متطرفة و ناس كتيييير معايا مستنيين الباس.. و شوية مراهقين قعدوا يخبطولنا على جدران المحطة و يصرخوا و يشتموا و أعلب ده كان موجه لي تحديدا ..طلبت البوليس طبعا .. على التليفون قالولي ده غالبا

antisocial behaviour

مش عشان انت مسلمة و الحجاب

و شكرا على اتصالك

[mekkawy]

السلام عليكم و رحمة الله و بركاته

ربنا يخليك يا عم أكرم طلعتني من السبات الشتوي اللي انا داخل فيه

شوف يا سيد الناس .. القضية زي ما قالت أختنا هند .. و زي ما قوانين الطبيعة بتقول إن العين ترى انعكاساتها .. يعني ايه يا عم مكاوى اينشتاين انت .. أقولك .. يعني انت ورا عينك فيه ايه ؟!! ع القشرة المخية من ورا كدة جنب النخاع مستعد تشوف ايه ؟ مستعد تشوف الجيران و الأهل و الأحباب و الايجابيات و العيال اللي لسة جدعان و ولاد خالتك اللي منتظرينك في المطار؟؟!!

ولا مستعد تشوف الزبالة و القرف و قلة أدب سواقين التاكسي و الميكروباص و بلطجة الشرطة و الكل كليلة؟

عنيك جاهزة تشوف ايه يا باشا ؟ هو ده السؤال اللي بيفرض نفسه .. عاوز تشوف ايه و هتشوفه .. و يا سيدي لو لقيت كيس زبالة برة الصندوق حطه في الصندوق و جزاكم الله خيراً :)

تحياتي للأحباب

مكاوى

[akramgroup]

السلام عليكم و رحمة الله و بركاته

ربنا يخليك يا عم أكرم طلعتني من السبات الشتوي اللي انا داخل فيه

شوف يا سيد الناس .. القضية زي ما قالت أختنا هند .. و زي ما قوانين الطبيعة بتقول إن العين ترى انعكاساتها .. يعني ايه يا عم مكاوى اينشتاين انت .. أقولك .. يعني انت ورا عينك فيه ايه ؟!! ع القشرة المخية من ورا كدة جنب النخاع مستعد تشوف ايه ؟ مستعد تشوف الجيران و الأهل و الأحباب و الايجابيات و العيال اللي لسة جدعان و ولاد خالتك اللي منتظرينك في المطار؟؟!!

ولا مستعد تشوف الزبالة و القرف و قلة أدب سواقين التاكسي و الميكروباص و بلطجة الشرطة و الكل كليلة؟

عنيك جاهزة تشوف ايه يا باشا ؟ هو ده السؤال اللي بيفرض نفسه .. عاوز تشوف ايه و هتشوفه .. و يا سيدي لو لقيت كيس زبالة برة الصندوق حطه في الصندوق و جزاكم الله خيراً :)

تحياتي للأحباب

مكاوى

حمدلله على السلامه يا مكاوى يا اخويا

واحب اطمنك على موضوع الانعكاسات اللى بتتكلم عليه ان الحمدلله كله تمام وانت عندك حق فى كلامك بس انت عارف المشكله انك لازم تشوف كل حاجه غصب عنك والواحد بردو مبيقدرش يتحكم اوى فى موضوع يشوف ايه وميشوفش ايه

يعنى انت بتكون نازل من بيتك فى منتهى السعاده وناوى تروح تقابل اصحابك بتوع زمان وكالعاده تضطر تدخل من اى شارع جانبى عشان الزحمه تتفاجىء بسواق تاكسى اول كلمه بيقولهالك اطفى النور يا.....

وده كله عشان كنت منور النور الوسط بتاع العربيه على اساس انه لو مطفى تاخد مخالفه :closedeyes:

فجأه بتلاقى نفسك لازم تشوف حاجات غصب عنك وحاجات تانيه كتير مضطر تفتح عينك وتشوف

طبعا انت بردو كلامك صح وفى حكمه بتقول:

بني :

عندما تنتقد أحداً .. فبعين النحل تعود أن تبصر ..

ولا تنظر للناس بعين ذباب ... فتقع على ما هو مستقذر!

واسمع الاغنيه دى وقولى رايك

http://www.youtube.com/watch?v=PNr97vgT4Nw

تم تعديل 22 نوفمبر 2010 بواسطة akramgroup

[nightmare]

بص يا كيمو يا حبي مش هزود كثير عن اللى كل الأفاضل قالوه.

اه سلوكيات الناس اتغيرت شوية , الحياة بقت صعبة ومفيش حد فاضي لحد , كله بيلف في الدوامة.

انا واحد من الناس اللى ما بنزلش مصر كثير , كل سنتين مرة والا حاجة بس مش علشان الناس اتغيرت والكلام ده , علشان انا بحب مصر قوي قوي .

فما بحبش انزل اشوف زبالة في الشوارع , ما بحبش انزل اشوف زحمة والناس بتقطع بعضها علشان يركبوا اتوبيس او مترو , ما بحبش انزل اشوف راجل كبير في السن واقف وعيل من دور احفاده قاعد , ما بحبش انزل اشوف السلبية والاهمال واللامبالاة والخنقة والدوشة, واصعب احساس انك تحس بالغربة في بيتك وكله بيعاملك كإنك ضيف كام يوم وماشي.

نفسي اشوف مصر بشكل تانى وصورة ثانية خالص , انزل يا باشا بس لما تنزل ما تحاولش تشوف الا الصورة الجميلة وبس ويكفيك صورة ضحكة امك وابوك واخواتك ووجوهم اللى مليانة حب وخير من غير ما يكونوا منتظرين منك حاجة.

مع تحياتي

[امير مجروح]

["]السلام عليكم ورحمة الله وبركاته

استاذ اكرم

فعلا اغلبية الناس فى مصر اتغيرت ... سلوكيات واخلاق الناس

اتغيرت دلوقتى مفيش حد حامل كلمة لحد خالص ده ممكن تحدث جريمة قتل بسبب كلمة bsh:) ده غير الخناقات الى فى الشوارع كل دقيقة والخناقات بين الاهل والاخوه ده غير الشباب الى بيتحرش بالبنات والى بيشرب مخدرات بجميع انواعهاومفيش حاجة اسمها شهامة ولا مرؤة والرشاوى انتشرت فى كل مجالات الحياة ده حتى الصعيد اتغير مبقتش ذى الاول ... يعنى من الاخر فى ازمة اخلاق فى مصر ... bsh:) bsh:) bsh:)

[لماضة مصرية جدا]

السلام عليكم و رحمة الله و بركاته

ايه ده

امبارح كنا قاعدين ع السطوح و بنحكي في ذكريات الحنين للوطن و كده....

النهاردة الصبح البوليس كبس علينا و التوبيك اتقلب "لدواعي أمنية"

كده انا مبقتشي فاهمة خالص

ايه حكاية الامان بقي اللي مش موجود و الليلة دي....اوعي تكون حضرتك عامل زي ما خالتو ماريا هنا متابعة العاشرة مساء "الله يرحمه"...و برامج الفضايح الحوارية...اللي كل شوية كانت ترفعلنا موضوع الساعة....التحرش...البلطجة....و لغاية دلوقتي...خالتو مش واخدة قرار تنزل مصر!!!

هوانا عجبني اوي كلام تانت هند....

صحيح احنا عايشين في بلد تاني و بقي عندنا بديل تاني....بس ما اهالينا اهم قاعدين في البلد....مجرلهمشي حاجة الحمد لله

وجهة نظري الشخصية.....لو معاك فلوس محترمة....تقدر تعيش في مصر كويس....و تروح حتت مافيهاش تحرش...و لا بلطجة....و لا اي حاجة ...و احتمال كمان تطلع في الاعلان بتاع وزارة السياحة

و هنلف ...نلف....و برضه هنرجع ليها....اومال هنروح فين....كندا مثلا....(سؤال لئيم....مع رغبة مكبوتة بصوت واطي اوي)

صباح حضرتك....خير ان شاء الله

[لماضة مصرية جدا]

كلامك زعلني جدا

بالذا ت انك كنت مقتنع اننا لازم نصلح بلدنا

هو ليه ما بنفرقش بين الوطن و الحكومة؟

السلام عليكم و رحمة الله و بركاته

الغالية أم زيد

ربنا يبارك في حضرتك علي الجملة اللي فوق ديت

و خليني احط سؤوال مع سؤال حضرتك

هو ليه بنقول المصريين اتغيروا....مش هما المصريين هو انا و انت و اخويا و ابويا و امي و ناس كتير زيي و زيك اي حد فينا

هو احنا ليه مصرين ان احنا ناس تانيين غير الناس الاولانيين؟؟؟

مش كلنا مصريين و كلنا في مركب واحدة....و الفساد طال كل واحد منا بس بصورة مختلفة و كل واحد فينا بيحاول يعالجه بطريقة مختلفة؟؟؟

هو ليه بنحب اوي نجلد نفسنا....لو الجلد و تعذيب النفس هيزقنا لقدام....(و لو اني اشك)....يبقي تعالوا نختار اجدعها كرباج....لكن لو ممنهوش فايدة غير....انه يحدفنا لورا....يبقي ليه؟؟؟

و الله حلوة....لسه بشوفها حلوة...او عايزة اشوفها حلوة

و دي وجهة نظر

[امير مجروح]

bsh:) bsh:) bsh:السلام عليكم ورحمة الله وبركاته

على فكرة الكلام ده مش كلا م برامج الكلام ده حقيقة للاسف بيحدث فى الواقع انا عايش فى مصر وعايش الواقع.... bsh:) bsh:) bsh:)

[لماضة مصرية جدا]

bsh:) bsh:) bsh:السلام عليكم ورحمة الله وبركاته

على فكرة الكلام ده مش كلا م برامج الكلام ده حقيقة للاسف بيحدث فى الواقع انا عايش فى مصر وعايش الواقع.... bsh:) bsh:) bsh:)

و عليكم السلام و رحمة الله و بركاته

طب حضرتك مقولتناش.....عايش...إزاي؟؟؟

يعني لسه فيه حلول ممكنة...؟؟؟

و لا ايه؟؟

ع جنب بقي

جاتلي تربنتينة في نافوخي من الايقونة ام شاكوش ديت اللي حضرتك هارتني بيها....(هزار طبعا)

[عنبو]

بص يا استاذ اكرم

انا الشركه اديتنى اجازه عشرين يوم زودت انا عليهم تمانيه من عندى

ومكنتش ناوى ارجع الا لما اكمل الشهرين لولا انهم اتصلوا بيا وقولولى .......... تعالى

وكنت ناوى اعمل توبيك اتكلم فيه عن الفتره اللى قصيتها فى مصر بعد غربه تقريباً سنتين ؟

بس للاسف بسبب انشغالى معرتفش اعمل التوبيك ده

وانا نازل مصر كنت خايف قوى اصل الاقيها اتغيرت وكنت هزعل قوى لو شفت بلدى بصوره غير اللى كنت

بشوفها قبل لما اسافر على العموم فيه ناس كتير قووووووووووى بجد السفر بيغيرهم وتلاقيهم

نازلين البلد وعينهم كلها انتقاد دول بجد الله يصبرهم على ما ابتلاهم به

انزل يا عم اكرم

تحياتى

عنبو بيحب مصر

[raouf]

كلامك زعلني جدا

بالذا ت انك كنت مقتنع اننا لازم نصلح بلدنا

هو ليه ما بنفرقش بين الوطن و الحكومة؟

كل بلد فيها الكويس و الوحش و وظيفة الدولة انها تنظم العلاقة بين الناس

الدور ده غائب الآن عشان كده مش شايفين غير الوحشين بس

لكن بلدنا و ناسها و الله فيهم خير كتييييييييييييير اوي

في كل حتة ممكن متحسش بالأمان .. في أحسن دول في أماكن و اوقات محدش عاقل يمشي فيهم

حتى الشرطة مالهاش سيطرة عليهم

في انجلترا .. في الاوتوبيس ممكن شوية صيع يرخموا على الناس رغم ان فيه كاميرات

انا كنت واقفة في محطة اتوبيس عند الجامعة مش في حتة متطرفة و ناس كتيييير معايا مستنيين الباس.. و شوية مراهقين قعدوا يخبطولنا على جدران المحطة و يصرخوا و يشتموا و أعلب ده كان موجه لي تحديدا ..طلبت البوليس طبعا .. على التليفون قالولي ده غالبا

antisocial behaviour

مش عشان انت مسلمة و الحجاب

و شكرا على اتصالك

لا والله يا ام زياد انا مازلت مقتنع بالتغيير وان احنا اللى هنغير بس حسيت انى واللى زيى بنحارب طواحين الهواء

وان الريح اقوى مننا فالسبيل الوحيد علشان ننجو من الريح يا نهرب منها او نقفل بابنا على نفسنا ونموت بداخل بيتنا مستنين الريح تضعف او تتوقف وده مش هيحصل

كنت كتبت فى موضوع من فترة ايه اللى اكتشفته فى اخر اجازة وهو باختصار ان اكثر من 80 % من شعب مصر مبوسيطين بالفساد اللى فيها وعايزينه يستمر

ال20% الباقيين فيهم 19% قافلين على نفسهم وبيقولوا احنا مالنا

رغم عدم رضاهم عن الوضع لكن ما بيعملوش اى حاجة لتغييره

وال1% الباقين هم اللى بيحاولوا يغيرو ودول صوتهم ضعيييييييييييف جدا يكاد لا يكون مسموع ولو اتسمع مرة بيتخرس بعدها زى البرادعى والشباب اللى بتعمل مظاهرات وبيعترضوا وبيحاولوا يغيروا البلد

انا عندى اقتناع ان تغيير ما حل بمصر يحتاج الى اجيال كاملة يتم فيها بتر كل المفسدين و المنافقين

ابسط شىء خلينا نقارن بين علاقة الجيران ببعضهم من 30 سنة وعلاقتهم الان

زمان كان كل الجيران عارفين بعض ويتزاورون ويهنوا بعض

دلوقتى مافيش حد يعرف الثانى

اتحدى لو حد سمع صوت شقتك بتنكسر وحد بيصوت حتى وحد خبط يقول هو فيه ايه

الان الشقق بتتسرق فى عز النهار ومحدش بيكلف نفسه يكلم الشرطة يخاف الحرامية ينتقموا منه

وقيسى على هذا

هاسالك سؤال كلنا كنا بنلعب فى الشارع والحدائق واحنا اطفال صح ؟ هل انتى بتامنى على ابنك يلعب فى الشارع عندك ؟ او الحديقة اللى امام البيت ؟

هل بتامنى على بنتك تروح الدرس لوحدها من غير ما اخوها او باباها يوصلها

صدقينى ما اراه هى اسوء فترة هتعدى على مصر فى الايام القادمة من ناحية الفساد والانحلال

انا اتحدى اى حد يحب مصر اكثر منى ولكن لكل منا قدرة على التحمل ويجب ان يكون لنا نظرة الى الامور

من وجهة نظرى الان لن يكون هناك اى تغيير من داخل مصر لان الشعب عاجبه كده ومبسوط كده ولو تحبوا اشرح ليكم ازاى اشرح

اما 1% اللى بيفهموا وعايزين يغيروا فدول اجرهم عند الله

شوفتى حضرتك لما واحد كلنا مجتمعين انه من اكثر من افسدوا وسرقوا فى مصر مات الا وهو كمال الشاذلى شفتى كام واحد وازاى استقبلوه فى المطار ؟

شفتى كام واحد كان ماشى فى الجنازة ؟

وماتقوليش دول شرطة ولا حكومة

شفتى بقه حضرتك كام واحد استقبل البرادعى او احمد زويل لما جه مصر ؟

شفتى كام واحد مشى فى جنازة الدكتور مصطفى محمود

لما تفكرى فى اللى قلته هتعرفى ليه انا كتبت كده وبدأت اغير نظرتى للامور

[pocy]

مصر وحشتنى جدا وحشنى فيها كل حاجه الحلو والوحش سيبك من المقوله وانزل وجرب وهتلاقي ان كل سنه تختلف عن التانيه عايزه اقولك ان كل سنه حنينى لمصر بيزيد نفسي انزل حتى لو هضرب هناك بس لازم انزل دانا سايبه فيها حته منى امى وابويا واخواتى وحماتى اللى هى امى برضه واخواتى اللى هم اخوات جوزى واخواته بجد وحشانى يا و مصر بكل اللى فيكى

المقوله اللى بيقولهالك سمعتها سمعتها اكتر من مره

ومن ناس كتير بس لو لاحظت هتلاقي معظمهم عايشين فى القاهره والاسكندريه يعنى الزحمه وعدم الفضا والانشغال الدائم بس لو شوفت اسماعليه ولا السويس ولا بورسعيد والاجازات هنا اد ايه جميله وحتى فى ازحم مكان فيكى يا مصر برضه انا مستمتعه بس انزل محدش يجي وينزلنى

اه يا مصر نفسي انزل واخدك بين احضانى ومرحش بعيد عنك مانتى اللى كنتى اويانى عندك انا اتولدت وكبرت ومن عند بابك رحلت لما قلتى مش عايزانى ولسه برضه برجعلك ماهو انتى دمى وروحى وكيانى

بحبك يا مصر رغم اللى بيقوله عنك جميله واصيله مهما مرمغوا اسمك بحبك ونفسي انزلك واخدك فى احضانى

ااااااااااااااااااااااه وحشانى يا مصر

تحياتى ليك يا استاذ اكرم وشكرا على الموضوع رغم انه فكرنى بالغربه ووحدتى فيها