اللى تكسبوا العبوا

[MaYousof]

عزيزي ...

إذا كنا لا نناقش ملائكية المقولة أو شيطانيتها فلا ضير لأحد في إقراني لهذه المقولة بتلك .. فليس عندئذٍ لملائكية إحداهن أو شيطانيتها محل ..

أحمد الله تعالى على نعمه ورزقه وأسأله تعالى وحده دوامها .. وهو تعالى على كل شيء قدير ..

كن بخير

عزيزي ...

اذا أنت تفتح نقاشا جديدا غير الذي نحن فيه

لا ضير من ذلك أبدا

ولكن يبقى النقاش الأساسي هو الأصل

دعنا نستكمل النقاش الأساسي ثم يكون لحديثنا بقية بإذن الله

كن كما أنت ... بخير

اللي تشوفه يا أستاذي الفاضل

كن بجد بألف خير

[لماضة مصرية جدا]

السلام عليكم و رحمة الله و بركاته

صباح حضرتك اصفي من اللبن الحليب

لما قريت العبارة..."اللي تكسبه العبه"

انا جه في دماغي صورة ذهنية كده....واحد بيلعب لعبة الشايب بالكوتشينة ماشي....

و معاه مثلا في ايده خمس ورقات...و هو قبل ما بينزل اي ورقة ع الارض بيفكر انهي ورقة لازم العبها عشان اكسب بيها و الشايب ما يلبسشي في وشي

طبعا حضرتك هتقوليلي دلوكيتي....ايه يا بنت يا ريهام قعدة القهاوي دي

هقول لحضرتك....طب مش هي الدنيا كده برضه....لعبة....صح

أوراق اللعب....هي الطرق اللي بنحاول نسلكها

و المكاسب....هي النتايج اللي بنحلم بيها...و عايزين نوصلها

بس السؤال....هتكسب ايه....و هتلعب إزاي

و طالما اكيد بنتكلم عن مكاسب حلال و بطرق غير ملتوية و حلال برضه

يبقي انا اللي فهمته بقي من العبارة دي التالي

في فترة من الحياة الواحد لازم يتعامل انه عجينة صلصال و يكون من المرونة الكافية انه يعيد اكتشاف نفسه كل شوية...لانه بكده بيوسع دايرة الخيارات قدامه...و بالتالي بيوصل ل "مكسب"....او نتيجة احسن

علي مستوايا الشخصي....في بداية حياتي....(وش واحدة عجوزة قاعدة في البلكونة و بتقزقز لب... :vian: )...اشتغلت في مكان ظريف جدا....و كانت الساعة بعشرة جنية....و لما المدير كان بيزودني...كان معدل الزيادة بالجنية.....شفتي الحلاوة بقي

انا ايه اللي خلاني اقبل الوظيفة الهزق دي....انا كنت حاطة قدام عيني انها محطة ترانزيت....يعني مرور مؤقت...بس حتي المرور المؤقت ده كنت محتاجة منه 3 حاجات..."مكاسب يعني"

1- التزم في نظام عمل...لاني فوضوضية شوية.

2- المكان كان ليه علاقات مع الجامعة الامريكية و الحقيقة كان مهم بالنسبة لي اني اوصل هناك.

3- كنت بحوش....عشان كنت عايزة اكمل دراستي العليا

سبحان الله "كيفت" نفسي....و لعبت بالورقة دي في الوقت ده

و برضه سبحان الله....لقيت ان فيه مجال خبرة جامد جدا.....غير ال 3 "مكاسب" اللي كنت حاطاهم لنفسي..خالص...اشتغلت في مجال الاعلام و بعدين في مجال التنمية الانسانية علي مستوي دولي......و بعدين دخلت علي حقوق الانسان....و بعدين....... (مش هقول انا بشتغل ايه بقي دلوقتي....غلااااااااسة)

انا كنت داخلة بتصور معين....لكن اكتشفت ان الرحلة اللي قضيتها في محطة الترانزيت كانت ثرية اوي بالنسبة لي...و كانت باب خير بفضل الله لحاجات تانية بعدها

بس فيه ناس تانية....استحالة تكون من المرونة انها تعمل كده...و دي اختلافات بين الناس....حتي بين الاخوات في البيت الواحد

الخلاصة ايه بقي...عشان الدنيا سقعت و انا لازم اقوم من البلكونة عشان الروكب و كده يعني

عجبتني كلمة استاذ الكاشف فوق....

"اعرف نفسك...كن نفسك"...

و لو يسمحلي اكمل عليها.....

و خليك دايما في حالة مرونة عشان تفضل تكتشف قدرات جديدة في نفسك....

و كن دايما منفتح علي العالم من حواليك....

لانك دوما ستجد ما يدهشك.....

إذا اندهشت....

يبقي انت في عالم جديد قطعا يستحق المغامرة و الاكتشاف....

و قطعا يحتاج لاعادة قراءة "أوراق اللعب"....و إعادة تحديد "المكاسب"

و دي وجهة نظري

صباحك....نادي ان شاء الله

ع جنب بقي

متنسيش تقفلي البلكونة كويس....احسن ان رصرصت من البرد cld: cld:

[Howayda Ismail]

"اللي تكسبّ بُه إلعبّ بُه" هو الصيغة العامية لمبدأ "الغاية تبرر الوسيلة" ..

:)

هو بالضبط اللى فهمته لما قرايت توبيك الفاضلة قلب ابيض وبسال ليه النظرية الميكافيللية اصبحت

مسيطرة على عقول الكثيرين واكثرهم من المتعلمين والمثقفين الذين انجذبوا لاقوال الجهلة ان الجنيه غلب

الكارنيه. احيانا الظروف تعاند الانسان ويكون صعب سباحته ضد التيار لكن مش مبرر برضه ان الانسان يتنازل

عن مبادئ او قيم اتربى عليها كى يواكب الموجة السايرة

[لماضة مصرية جدا]

"اللي تكسبّ بُه إلعبّ بُه" هو الصيغة العامية لمبدأ "الغاية تبرر الوسيلة" ..

:)

هو بالضبط اللى فهمته لما قرايت توبيك الفاضلة قلب ابيض وبسال ليه النظرية الميكافيللية اصبحت

مسيطرة على عقول الكثيرين واكثرهم من المتعلمين والمثقفين الذين انجذبوا لاقوال الجهلة ان الجنيه غلب

الكارنيه. احيانا الظروف تعاند الانسان ويكون صعب سباحته ضد التيار لكن مش مبرر برضه ان الانسان يتنازل

عن مبادئ او قيم اتربى عليها كى يواكب الموجة السايرة

السلام عليكم و رحمة الله و بركاته

مهم يا تانت الجزئية اللي حضرتك قولتي عليها

"الانسان ميتنازلشي"

و يكون ليه حدود و إطار بيتحرك فيه....هو عارف ايه اللي يقدر يعمله و ايه اللي استحالة يعمله

سؤال بس

هو ليه لما بنسمع المثل اللي زي ده....عادة بترتبط في ذهننا حاجتين....يا انسان فهلوي اوي....من نوعية شجر اللبلاب...يعني عايز يتسلق عشان يوصل باي تمن

او انسان تاني....معدوم الملامح....يعني....بيمشي ورا الموجة و معندوش مانع يتنازل عن اي حاجة عشان برضه يوصل مهما داس في سكته

هو مش ممكن يكون ليه معني تاني مثلا؟؟؟

و لا النماذج اللي بنقابلها في حياتنا بتفرض علينا تفسير واحد...او زاوية محددة للتصور؟؟؟

هو مين المفروض يجي الاول...المثل و بعدين نقيس عليه الحياة

و لا الحياة بمعطياتها الثرية جدا....بتمنحنا جزء من حكمتها في المثل...و يفضل جزء واحد فقط....و تبقي هناك اوجه اكثر....لم نراها بعد؟؟؟

ايه ده.....انا كده بهلوس....يبقي انا كده جعانة

بحب افكر معاكم بصوت عالي

فوتكم بعافية

[samehmagdy]

السلام عليكم

ماما قلب ابيض

انا اول ما سمعت جيت على طول

ولكن ماذا اقول بعد ما قيل

بصراحه الناس كلها قالت بما فيه الكفايه

بصراحه arkan وعجبنى تعليق

فانت اكيد مش قصدك مبدا الغايه تبرر الوسيله اللى بيحلل كل حاجه فى سبيل الوصول للهدف مش مهم ان كان حلال ولا حرام صح ولا غلط

باختصار شديد كده مش هطول عليكم قولو طول smk:

احنا لما كل واحد فينا درس وتخصص وهو فى الجامعه كان هدفه ايه من الاساس

اعتقد انه كان من اهدافه الجانب المادى والمعنوى بعد ما اخلص الجامعه

طيب بعد ما خلصت واتصدمت بالواقع ولقيت ان اللى بدور عليه بتخصصى ودراستى مش هلاقيه

اكيد مش هقعد اندب حظى والعن فى الدنيا وفى الظروف اللى وصلتنى لكده واعمل بيات شتوى لنفسى طول عمرى جوه الشهاده والتخصص اللى ضيعت فيه سنين كتير من عمرى

فلازم فى وقتها على طول اخد قرار سريع ومدروس بانى اغير طريقى واتكييف مع الواقع المتاح بما يحقق لى الاهداف اللى انا بحلم بيها

(وهو دى مبدا اللى تكسب بيه تلعب بيه)

انما مقبلش بوضع غير مناسب او اقل من اللى بحلم بيه الا اذا كان لفتره موقته اكون خلالها بجهز

نفسى فيها لبكره مش استسلام للامر الواقع

والكلام دى نقدر نطبقه على حاجات كتير فى حياتنا مش فى الشغل بس

معلش طولت عليكم قولو ولا يهمك

تصبحو على خير

تم تعديل 22 نوفمبر 2010 بواسطة samehmagdy