برَّه السور

[أشرف محمد شلقامي]

____ ف نُصّ الصفحه ____

قال أستاذ العربى ف درس الإملا

اكتبوا كلمة " حريه "

من وسط عيال الفصل لوحدى رفعت إيديا

من فضلك قولى يا استاذ.....

إيه يعنى كلمة حر.............. وقبل ما اكمِّل

قال لى اقعد وشخط فيا

وكأنه لمح ف عنيا كلامى

من ورا عدسات النضاره ( قعر الكبايه)

لمحت عنيه بتطق شرار

جوّاه مقدرش الغيظ يداريه

وكأنى سحبت الكرسى قبل ما يقعد من تحتيه

ولا قدرت تمنعنى الضحكه الصفرا

__ لحظة لمح الناظر ماشى __

من إنى أشوف القرف المتكرمش..........

فوق قورته وتحت عنيه

ودا ليه ؟!

دا لأنى مكنتش برضى اكتب له أسامى عيال ف الفصل ....

مكنتش بتاخد درس خصوصى حداه

ولأنى مكنتش برضى اتصنّت على استاذالعربي التاني

واعرف مين أو إيه ويّاه

ولأنى مكنتش برضى اكون مرسال..............

بينه وبين الأبله الحلوه بتاع الرسم

كان نفسه يموت وتروح ويّاه

ولأنى مكنتش برضي اسرق له الطباشير

ولأنى وأنى وأنى

ولأسباب أنا كنت ساعتها ما بعرفهاش

خلع النضاره قعر الكبايه

ومسح منخيره الحمرا فى منديله

وبغيظ كان أوضح من الطباشير

فوق عضم السبوره الجربانه

قالي: اطلع برّه

وشتمنى بأمى وقفل الباب

ونا بابعد خطوه

كان صوته واصل لى من الشباك:

لو عيّل يا ولاد الكلب قال نفس كلامه

هاخرب بيته

هايسقط

يوم ما يموت هايخش النار

ونا بابعد تالت خطوه عن الشباك

لمحت عيال الفصل بيبصوا لبعض وللاستاذ

وهوّ من الشباك بيشاور.......

للأبله الحلوه بتاع الرسم

والأبله الحلوه بتاع الرسم بتوشوش ف ودان الناظر

مسكين مش قادر يصلب طوله

وعنيه مش عارفه بتقرا ف إيه

والفاضل فيه بيشمشم كان بحلاوة روح

ف الباين من فستان الأبله الحلوه بتاع الرسم

ونا واقف برّه السور ف الشارع

لقيتنى ف إيدى صباع طباشير مسروق

وبا بصّ لهم كده من تحت لفوق

امتى عيال الفصل تفوق

وتكتب زيىّ على الأسفلت

برّه السور تبقى الحريه

برّه السور تبقى الحريه

برّه السور تبقى الحريه

[طه بدر]

الاخ العزيز الاستاذ اشرف

لن تستطيع ان تدرك مدى سعادتى بالتعرف على قصيدة اخرى لك

جميلة وبارعة ككوم تراب

تحياتى وفى انتظار المزيد والمزيد

ملاحظة

ان كان لى الحق فى نصيحة بسيطة

ان تهتم اكثر بطريقة كتابة القصيدة وتنسيقها على الموقع فكما لا يخفى عليك طريقة العرض من وقفات وترتيب السطور سيزيد من متعة القراء اكثر واكثر

عفوا للملاحظة

وتحياتى

تم تعديل 23 نوفمبر 2010 بواسطة طه بدر

[فولان بن علان]

تمكن رائع من تطويع الكلمات الصعبة في شكل شعري منغوم

وقصة محبوكة وهدف واصل

رفض الانسياق في الواقع المسموم

خارج سور الفساد حرية

تحياتي للشاعر الجميل

القصيدة ذكرتني بالآية الكريمة

اخرجوا آل لوط من قريتكم إنهم أناس يتطهرون

[أشرف محمد شلقامي]

أستاذي الفاضل / طه بدر

السلام عليكم ورحمة الله

سعادتي أكبر وأكثر باهتمامك ، أنت تمنحني أكثر مما أستحق

أعتذر عن عدم توفيقي في الكتابة بالشكل الذي يليق

أعدكم أستاذي الكريم بمحاولة الكتابة والعرض بشكل أفضل

تقبَّل خالص شكري وتقديري واحترامي ومحبتي

تلميذك / أشرف محمد

[أشرف محمد شلقامي]

الأستاذ الفاضل / فولان أبن علان

السلام عليكم ورحمة الله

جميل أن لاقت ( برَّه السور ) بعض القبول

والأجمل هو أني شرفت بك

تقبَّل أستاذي خالص شكري وتقديري واحترامي ومحبتي