هتقدر تربي اولادك هناك؟

[Om Zayd]

السلام عليكم و رحمة الله و بركاته

ممكن تشوفوا البرنامج ده

http://www.youtube.com/watch?v=cQhki5RGLGs

http://www.youtube.com/watch?v=CHwF6pXqubU&feature=related

و قولولي بعده ازاي تقدروا تربوا اولادكم مسلمين بجد هناك

[Damo]

و قولولي بعده ازاي تقدروا تربوا اولادكم مسلمين بجد هناك

السلام عليكم

اولا الإجابة على السؤال ده تعتمد على ايه تعريف حضرتك لمسلمين بجد

المسلمين نفسهم بيختلفوا مع بعض كتير في يعني إيه الواحد يبقى مسلم بجد . فما بالك المسلمين مع غير المسلمين.

أنا شخصيا شايفة طبيعي ان يبقى في مدارس مسلمة في المجتمعات الغربـية ببساطة لان المسلمين عايزين يعلموا اولادهم الاسلام ! زي ماالمسيحين بيعلموا اولادهم المسيحية واليهود اليهودية !

اللمشكلة اللي بتحصل ان مدارس تفشل انها تعرفهم اهمية أننا نسجم في المجتمع اللي عايشين فيه زي اهمية الدين بالظبط. من امتى الاسلام يعني نقفل على نفسنا ومالناش دعوة باللي حوالينا !!!

ومدارس تانية أصلا بتستغل الوضع ده عشان تنشر فكر متطرف ملوش أي داعي.

اعتقد لو في المدارس العاديه عملوا اوبشن لمادة اسلامية أو حاجة من هذا القبيل ناس هتبتدي ترجع تاني ليها و الانفصال عن المجتمع اللي بيقول عليه ده هيبقى اخف.

بعدين حاجة كمان. يعني هما لو مش عاجبهم البلد وشايفين كل اللي فيها 'كفار' قعدين فيها ليه ؟

إيه فكرة إن يجيبه مناهج وكتب السعودية للندن ومعرفش فين ؟؟؟ مايروحوا السعودية.

يعني الواحد يتغرب ويتبهدل عشان يروح امريكا وفي الاخر يدرس منهج سعودي !!!!

ومينفعش حد يقول ده رايح عشان اسلوب العيشه ...ماهو الاسلوب ده اللي بيتهاجم في المدارس دي !

[Dreamwithme]

أولا أنا عايشة في مصر ثانيا أنا معنديش أولاد فيمكن كلامي هيبقي نظري

لكن الموضوع من شقين ...

الشق الأول إزاي نربي أولادنا مسلمين صح في مجتمع غير مسلم ؟

الشق الثاني وهو موضوع الفيديو هو حق المجتمع الانجليزي إنه يضمن إن كل الأطفال يتعلموا تعليم جيد ويندمجوا في المجتمع

ولا يقعوا في براثن أفكار متطرفة......وأعتقد يا أم زيد إن ده ملوش علاقة بالشق الأول

بالنسبة للشق الأول ....طبعا الموضوع صعب جدا وأكيد دي أول حاجة الواحد بيفكر فيها قبل ما يأخد قرار السفر أو الهجرة

وفي نماذج كتير جدا من الأوروبيين بعد دخولهم الاسلام بيقرروا يتركوا بلادهم ويعيشوا في بلد مسلم

عشان يقدروا يربوا ولادهم صح .....وأنا رأيي الشخصي متفق مع وجهة النظر دي

صعب جدا جدا إنك في مرحلة الطفولة وتشكيل الشخصية إنك تربي أطفالك بنفس الطريقة اللي اتربنا بيها

بحيث يفضل محتفظ بهويته بدون تأثير المجتمع عليه وفي نفس الوقت يكون مندمج في المجتمع وغير منعزل

لكن برضه من جانب آخر ...الرغبة في إنك تربي أبنك في بلد متحضر فيه نظام وقانون وتعليم بجد واحترام للبشر

أكيد رغبة تحترم ووارد إني أفكر فيها في يوم من الايام لأن الأحوال في بلادنا مع الأسف تزداد سوءا

الشق التاني حق المجتمع الانجليزي وهو موضوع الفيديو .....أنا بصراحة متعاطفة معهم وشايف إن حقهم إنهم يضمنوا

إن الأطفال يتعلموا بطريقة تؤهل الطفل إنه يكون مندمج في المجتمع

وطبعا الكلام ينطبق علي المدارس المسيحية والمدارس اليهودية

أنا شخصيا لا أفضل إن تكون مدرسة متخصصة لأن الطفل فعلا مش هيتعلم الاندماج

لكن طبعا المدارس المتخصصة لها طبعا مميزات كتير

لكن أنا في نقطة لفتت انتباهي في الفيديو

مينفعش بأي حال من الأحوال إن كتب المواد الاسلامية اللي بيدرسوها تكون نفس المنهج السعودي

ياجماعة لكل مقام مقال ....والحلال بين والحرام بين ...وفي أمور مشتبهات

وفي فتاوي مختلفة ....فلابد أن يكون هناك منهج مخصوص للأطفال اللي عايشين في مجتمعات غير اسلامية

يعلمهم دينهم بلغة وأسلوب يفهمه دينه وفي نفس الوقت يفهمه ويعلمه حب مجتمعه والاندماج فيه والانتماء له

يعني إيه أهمية موضوع عيد الميلاد ده إنه يثار؟ دا إحنا هنا في مصر ناس كتير لغاية فترة قريبة بتحتفل بيه

أعتقد إن المفروض الالتزام بأساسيات الدين ومراعاة فقه الواقع والمجتمع

[nightmare]

الفيديوهات دي تحمل اكثر من موضوع للتحدث فيها

فكرة وجود مدارس مسلمة وتجمعات اسلامية ومراكز للفتوي ودور للعبادة في المجتمعات الغربية , حاجة عادية جدا والمفترض تكون متواجدة في كل ولاية ومقاطعة ومش بس للمسلمين وللمسيحيين واليهود وغيرها , لان حرية العبادة مكفولة للجميع ومن اجل الحرص على اكساب كل طفل تعاليم ومبادئ دينه.

فكرة الإنغلاق المجتمعي دي مشكلة كبيرة جدا , حتة ان الواحد يسيب بلده الأم ويهاجر لبريطانيا او كندا او اى مكان في الدنيا وهو يحمل معاه عادات وتقاليد بلده ويغلق على نفسه الباب ويظل عايش هناك بفكره وعاداته ويرفض الاندماج في المجتمع الآخر ويرفض فكرة اكتساب اى عادات منه يبقي كان ايه اللى سفرك اصلاً , لازم الواحد ينفتح على العالم والمجتمع اللى حواليه بدون التنازل عن عاداته لكن مع مراعاة احترام عادات الآخرين والأخذ منها ما يتماشي مع عاداته وتقاليده.

فكرة التشدد الدينى , والنظرة الدونية لأي شخص من غير ملتك او دينك ودي برضه فكرة غريبة وعجيبة , يعني ايه واحد عايش في بريطانيا ويقيم بها ويعمل بها وفي الآخر يطلع يقولى انهم ( كفار ) ويأمر الناس كمان بعدم التعامل معهم ويأمر الأطفال بعدم مصاحبة اطفالهم , ده للأسف نموذج للجاهل اللى مش فاهم دينه , وطالما انت كده طب ايه اللى مقعدك هناك وايه اللى معيشك وسطهم , دي بلدهم ولو انتا شايفهم كده سيب بلدهم وروح لبلد اسلامية عيش فيها, احترام الأديان واجب والمسلم ما يبقاش مسلم الا إذا آمن بالله وملائكته وكتبه ورسله.

جزئية المدارس الاسلامية في العالم الغربي وتعليم أطفالى بها , فكرة جيدة وعندي استعداد ادخل اطفالى بها بشرط ان اضمن ان ابنى مش هيبقي منغلق على العالم , وان المدارس دي ما تبقاش لمجرد تعليم الطلاب العلوم الدينية والاساسية وفقط , لازم تشمل ايضا مواد لتعليمهم كيفية التعامل مع المجتمع اللى هما فيه , كيفية التعايش في هذا المجتمع , كيفية الإندماج بدون الإخلال بالعقيدة الإسلامية او عاداتها.

وهي دي برضه صفات المسلم اللى بجد , المسلم اللى بجد متمسك بدينه وعاداته , المسلم اللى بجد منفتح على المجتمع اللى هو عايش فيه , المسلم اللى بجد مفيد بعاداته المجتمع وياخذ منه ما يناسبه ويعطيه ما يضيف اليه , المسلم اللى بجد يعيش ويتعايش ويندمج وينشر بلطف وادب مبادئ دينه بسلوكياته وتصرفاته القويمة , هو ده المسلم اللى بجد

لو المجتمع هناك هيساعدنى على كده يبقي هقدر اربي ابنائي هناك , لو مش هيساعدنى على كده واللى هعلمهوله باليمين تيجي مدرسة والا مركز والا غيره يهده بالشمال يبقي مش هقدر طبعاً واكيد هسيب هذا المكان وارحل.

على الهامش بقي

عاوزين نناقش ان شاء الله في موضوع آخر فكرة ضعف دور الإعلام الإسلامى نحو الغرب , لابد ان يكون هناك اعلام اسلامي قوي موجه للغرب لإيصال الفكر الإسلامي الصحيح وان الإسلام ليس دين تطرف او انغلاق.

اللهجة البريطانية دي صعبة موووووت بجد ونص ساعة منها كفاية انها تخلى الواحد

مع تحياتي

[masraweya]

السلام عليكم

جزاكم الله خيرا

أنا أولا ليس لي معرفة بالمناهج السعودية

لكن لفت انتباهي السعودي اللي بعتوه يتجسس عليهم

ترجملهم موضوع اليهود انهم مسخوا قردة و خنازير .. إلى أن اليهود شكلهم قردة و خنازير

ألا يتقي الله؟

ثم ان المشكلة ليست في انفتاح المسلم أو انغلاقه .. المشكلة أن كثيرا من مبادئ الاسلام لا تروقهم

من أول موضوع الشذوذ و الحرية الجنسية إلى الحجاب و حدود الشريعة

أعتقد يا أم زيد أن الإعلام في انجلترا و ربما أوروبا كلها مضاد للدين بصفة عامة

المسلم الذي يعيش في هذه البلاد بحاجة إلى أن يحافظ على دينه هو و أولاده دون أن ينغلق عن المجتمع .. فهو داعية إلى دينه في مجتمعه

معادلة صعبة .. ربنا يعينهم

[shawshank]

الفيديوهات دي تحمل اكثر من موضوع للتحدث فيها

الأخ العزيز/ nightmare

في رأيي أن الموضوع أعقد وأصعب بكثير مما ذكرت حضرتك. وأقتبس هنا مشاركة سابقة لي لبيان وجهة نظري .

... أنا أرى أن تأثير المجتمع فكريًا ومعنويًا على الأبناء (والآباء أيضًا) أشد وأخطر بكثير من التأثير المادي الملموس. فلو كانت التربية من الآباء (والمدرسة الإسلامية والمسجد إن وُجدا) ستتكفل بغرس الأخلاق والأسس والأوامر والنواهي الإسلامية في نفوس الأبناء، بل وجني ثمارها المتمثلة في امتناعهم عن اقتراف ما حرّمه الله من مواعدة الجنس الآخر أو شرب الخمر ... الخ، فإن تأثير المجتمع من الناحية الفكرية المعنوية غير الملموسة عليهم في غاية القوة. ونتيجة لهذا التأثير، ستبزغ مع السنين قضايا فكرية معقدة تواجه الأبناء، مثل تعدد الولاءات، للإسلام أم لمصر أم للغرب أم لمن؟ (وما يستتبع ذلك من مواقف الأبناء من القضايا الكبرى والتي قد تتعارض فيها مصالح الغير مع مصالح دولة المهجر، مثل قضية فلسطين، والعلمانية في مقابل الحكم بالشريعة، والديكتاتورية في الدول الإسلامية)، والاعتقاد/الإيمان بأن كلاً على حق (المسلم والمسيحي واليهودي والبوذي ... الخ)، والصراع الدائم بين ما ترعرع عليه الأبناء من أعراف سائدة حولهم في المجتمع وبين ما يلقنهم إياه الوالدان في البيت (وإن لم يكن هناك منتصر في هذا الصراع، يعيش الابن حالة نفسية صعبة ومعقدة، ولو كان النصر للأول كانت النتائج أفدح)، والعزلة النفسية والفكرية بين الأبناء وبين مجتمعهم الغربي (إلا لو اختاروا الانغلاق على المجتمع الإسلامي الصغير، وهو أمر صعب جدًا وغير عملي)، وأيهما أولى بالاتباع عند التعارض (أو حتى عند الاتفاق)، الشرع الإسلامي أم القانون؟ وبالتأكيد تتضاعف هذه المخاطر على الأجيال اللاحقة. ولدينا نموذج لحالة متقدمة من الكثير من المهاجرين اللبنانيين المسلمين لأمريكا الجنوبية، وبالذات البرازيل. فأحفادهم الآن هناك على غير الإسلام.

ما أود قوله أن التأثير الفكري لأي مجتمع على الطفل الذي ينشأ ويعيش فيه في غاية القوة، ومن الصعب جدًا مقاومته. لأنه يساهم بالتدريج وببطء على مر السنين، رغمًا عن أي مؤثر آخر، في نحت وتشكيل وجدان وعقل وشخصية الطفل، بما يستحيل تغييره مستقبلاً ما أن صار يافعًا.

هذا رأيي الشخصي، والذي يحتمل الخطأ قبل الصواب.

[عبير يونس]

عاوزين نناقش ان شاء الله في موضوع آخر فكرة ضعف دور الإعلام الإسلامى نحو الغرب , لابد ان يكون هناك اعلام اسلامي قوي موجه للغرب لإيصال الفكر الإسلامي الصحيح وان الإسلام ليس دين تطرف او انغلاق.

اللهجة البريطانية دي صعبة موووووت بجد ونص ساعة منها كفاية انها تخلى الواحد

مع تحياتي

الموضوع موجود بالفعل

ياريت حضرتك تزوره و تتناقش فيه

كيف ندعو إلى الإسلام في الغرب؟

http://www.egyptiantalks.org/invb/index.php?showtopic=102473&st=15&p=608806&hl

[MZohairy]

الموضوع معقد جدا

كتير من الناس اللي عايشين في مكه ممكن ولادهم يطلعوا مش متربيين او مش مسلمين بجد

عناصر التربيه كتير جدا و المكان هو احد العناصر فقط

[Om Zayd]

اولا الإجابة على السؤال ده تعتمد على ايه تعريف حضرتك لمسلمين بجد

المسلمين نفسهم بيختلفوا مع بعض كتير في يعني إيه الواحد يبقى مسلم بجد . فما بالك المسلمين مع غير المسلمين.

حبيبتي دامو

الاسلام و العقيدة الصحيحة ما فيش اختلاف عليهم لأن ببساطة القرآن و السنة هما المرجع عند الاختلاف

أنا ما اقصدش الفروع

أنا شخصيا شايفة طبيعي ان يبقى في مدارس مسلمة في المجتمعات الغربـية ببساطة لان المسلمين عايزين يعلموا اولادهم الاسلام ! زي ماالمسيحين بيعلموا اولادهم المسيحية واليهود اليهودية !

اللمشكلة اللي بتحصل ان مدارس تفشل انها تعرفهم اهمية أننا نسجم في المجتمع اللي عايشين فيه زي اهمية الدين بالظبط. من امتى الاسلام يعني نقفل على نفسنا ومالناش دعوة باللي حوالينا !!!

معاكِ حق .. المسلم ما ينفعش ينغلق لأنه كده مش هيقدر يدعوا الناس للاسلام

تصدقي اننا قابلنا في انجلترا ناس بيتبعوا منهج التبليغ و الدعوة .. فرحت .. شوية اكتشفت انهم بيكتفوا بالمسلمين بالفعل و ما بيحاولوش يدعوا غير المسلمين .. فلت يمكن هم أدرى

رغم ان كان بيخبط علينا ناس من الكنيسة عشان يشرحولنا المسيحية

هبقى احكيلكم بالتفصيل في ايام و عشناها

ومدارس تانية أصلا بتستغل الوضع ده عشان تنشر فكر متطرف ملوش أي داعي.

المدارس دي أغلبها بيحاول يقدم الصورة المعتدلة للاسلام

و من التعليقات بين المسلمين في انجلترا .. أغلب الدعاة اللي اتكلموا عنهم في البرنامج معتدلين

اعتقد لو في المدارس العاديه عملوا اوبشن لمادة اسلامية أو حاجة من هذا القبيل ناس هتبتدي ترجع تاني ليها و الانفصال عن المجتمع اللي بيقول عليه ده هيبقى اخف.

تفتكري هيقدموا الاسلام ككل.. و لاّ هينقوا؟ .. يعني بلاه الكلام عن الحدود .. عارفة هتقولوا دول أطفال.. بس ممكن نحدد السن المناسب و طريقة العرض

و بلاش آيات الجهاد .. طب ما تقدمها و تشرحها صح.. بدل ما تقعد تبررر بعدها و تقول السياق التاريخي

و ما فيش داعي للكلام عن اليهود عشان معاداة السامية

ملاحظتي الشخصية انهم عايزين الدين ثقافة على اقصى تقدير

ممكن يؤثر على لبسك و أكلك و شربك و اعيادك.. ما فيش مشكلة و بيحترموا ده جدا

مجتاج تصلي .. يوفرولك المكان .. الوقت.. اتصرف انت

غير كده .. آسفين جدا

بعدين حاجة كمان. يعني هما لو مش عاجبهم البلد وشايفين كل اللي فيها 'كفار' قعدين فيها ليه ؟

إيه فكرة إن يجيبه مناهج وكتب السعودية للندن ومعرفش فين ؟؟؟ مايروحوا السعودية.

يعني الواحد يتغرب ويتبهدل عشان يروح امريكا وفي الاخر يدرس منهج سعودي !!!!

ومينفعش حد يقول ده رايح عشان اسلوب العيشه ...ماهو الاسلوب ده اللي بيتهاجم في المدارس دي !

أنا ما بلومش الانجليز .. دي بلدهم

و لو ان كتيييير من المسلمين هناك انجليز غير مهاجرين .. الجيل التاني و التالت.. ولدوا هناك

و من حقهم يعلموا اولادهم دينهم صح

أنا على فكرة معرفش المناهج السعودية الدينية

بس ضايقني تصوير مخزن الكتب كانه مخزن مخدرات

أكيد الأحسن ان يكون فيه علماء في البلاد دي يدرسوا كويس ازاي ينشئوا الاولاد على الدين الصحيح دون انعزال عن المجتمع

ازاي يعملوا منهم دعاة للجنة

عارفة .. لفت انتباهي تعيق مسلم بريطاني .. بعد ما اتكلم ان الاعلام بيشوه صورة الاسلام و المسلمين "الموضوع ده مثبت بالدراسات" قال ان جزء من المشكلة ان مالناش حد يرد عليهم

مفيش تنظيم للعمل و قيادةو متحدث رسمي

تم تعديل 24 نوفمبر 2010 بواسطة Om Zayd

[Om Zayd]

مينفعش بأي حال من الأحوال إن كتب المواد الاسلامية اللي بيدرسوها تكون نفس المنهج السعودي

ياجماعة لكل مقام مقال ....والحلال بين والحرام بين ...وفي أمور مشتبهات

وفي فتاوي مختلفة ....فلابد أن يكون هناك منهج مخصوص للأطفال اللي عايشين في مجتمعات غير اسلامية

يعلمهم دينهم بلغة وأسلوب يفهمه دينه وفي نفس الوقت يفهمه ويعلمه حب مجتمعه والاندماج فيه والانتماء له

يعني إيه أهمية موضوع عيد الميلاد ده إنه يثار؟ دا إحنا هنا في مصر ناس كتير لغاية فترة قريبة بتحتفل بيه

أعتقد إن المفروض الالتزام بأساسيات الدين ومراعاة فقه الواقع والمجتمع

متفقة معك تماما

بس هما مش معترضين على كده بس .. أي كلام عن الشذوذ و رفضه مرفوض تماما

أي كلام عن اليود و الجهاد .. مرفوض تماما

أي كلام عن ان الاسلام هو الدين الصحيح و جزاء من لا يتبعه.. مرفوض تماما

ربنا يرزقك الذرية الصالحة و يعينا على التربية الصحيحة

[Om Zayd]

جزئية المدارس الاسلامية في العالم الغربي وتعليم أطفالى بها , فكرة جيدة وعندي استعداد ادخل اطفالى بها بشرط ان اضمن ان ابنى مش هيبقي منغلق على العالم , وان المدارس دي ما تبقاش لمجرد تعليم الطلاب العلوم الدينية والاساسية وفقط , لازم تشمل ايضا مواد لتعليمهم كيفية التعامل مع المجتمع اللى هما فيه , كيفية التعايش في هذا المجتمع , كيفية الإندماج بدون الإخلال بالعقيدة الإسلامية او عاداتها.

وهي دي برضه صفات المسلم اللى بجد , المسلم اللى بجد متمسك بدينه وعاداته , المسلم اللى بجد منفتح على المجتمع اللى هو عايش فيه , المسلم اللى بجد مفيد بعاداته المجتمع وياخذ منه ما يناسبه ويعطيه ما يضيف اليه , المسلم اللى بجد يعيش ويتعايش ويندمج وينشر بلطف وادب مبادئ دينه بسلوكياته وتصرفاته القويمة , هو ده المسلم اللى بجد

لو المجتمع هناك هيساعدنى على كده يبقي هقدر اربي ابنائي هناك , لو مش هيساعدنى على كده واللى هعلمهوله باليمين تيجي مدرسة والا مركز والا غيره يهده بالشمال يبقي مش هقدر طبعاً واكيد هسيب هذا المكان وارحل.

متفقين

مش عارفة حكيتلكم المثالين دول و لا لأ قبل كده

مدرسة مسلمة محجبة في مدرسة انجليزية عادية بتنظم مناظرة للبنات في الفصل عن الشذوذ .. و بمنتهى البشاطة قالتلهم انها هتبقى في الجانب المؤيد لحقهم في الاختيار

ممكن تكون بتتصرف بحرفية .. و ده المنهج .. بس تأثير ده إيه على البنات المسلمات اللي بتدرسلهم؟

جندي مسلم بريطاني من أصل باكستاني اتقتل في افغانستن

احتفوا بالحدث ده جدا

أسرته محجبات و بدقون

الجيش مش اجباري.. إيه اللي وداه يحارب مسلمين و يقتلهم؟

و ما تقولوش بيدافع عن بلده.. مين بيحارب مين و مين ابتدا؟

[Om Zayd]

لكن لفت انتباهي السعودي اللي بعتوه يتجسس عليهم

ترجملهم موضوع اليهود انهم مسخوا قردة و خنازير .. إلى أن اليهود شكلهم قردة و خنازير

ألا يتقي الله؟

فعلا .. وجعتني جدا .. بالذات و المذيع بيسأله .. مكتوب كده فعلا؟؟ و بمنتهى الثقة قال له أيوة

حسبنا الله و نعم الوكيل

ثم ان المشكلة ليست في انفتاح المسلم أو انغلاقه .. المشكلة أن كثيرا من مبادئ الاسلام لا تروقهم

من أول موضوع الشذوذ و الحرية الجنسية إلى الحجاب و حدود الشريعة

أعتقد يا أم زيد أن الإعلام في انجلترا و ربما أوروبا كلها مضاد للدين بصفة عامة

حقيقي .. المثفين عادة غير مؤمنين بدين

و برامج كتيييييير بتتعمل ان الاديان اصل الشرور

و الاستهزاء بالله شيء معتاد في الاعلام

المسلم الذي يعيش في هذه البلاد بحاجة إلى أن يحافظ على دينه هو و أولاده دون أن ينغلق عن المجتمع .. فهو داعية إلى دينه في مجتمعه

معادلة صعبة .. ربنا يعينهم

[Om Zayd]

الموضوع معقد جدا

كتير من الناس اللي عايشين في مكه ممكن ولادهم يطلعوا مش متربيين او مش مسلمين بجد

عناصر التربيه كتير جدا و المكان هو احد العناصر فقط

المشكلة في البيئة المحيطة

المجتمع

الإعلام

الأسرة عنصر واحد و باقي العناصر سالفة الذكر تلعب دورا رئيسيا لا يمكن اغفاله

[Om Zayd]

في رأيي أن الموضوع أعقد وأصعب بكثير مما ذكرت حضرتك. وأقتبس هنا مشاركة سابقة لي لبيان وجهة نظري .

جزاكم الله خيرا ان ذكرتني بهذا الموضوع

لي مشاركة فيه ذكرت فيها مثالي المددرسة و الجندي

[Om Zayd]

الموضوع موجود بالفعل

ياريت حضرتك تزوره و تتناقش فيه

كيف ندعو إلى الإسلام في الغرب؟

http://www.egyptiantalks.org/invb/index.php?showtopic=102473&st=15&p=608806&hl

جزاكم الله خيرا

[Mostafa Kasem]

سأحاول هنا الاختصار في الكلام

اولا للتوضيح للاخوة الذين ليسوا بانجلترا أو لهم سابق خبرة بها

البرنامج المذاع هو برنامج بانوراما - يذاع على القناة الرابعة الانجليزية - البي بي سي-

ليسوا اول مرة يتم اذاعة برنامج يسئ للمسلمين على بانوراما سبقتها مرات اخرى

اولا وقت اذاعة البرنامج متكرر و هو اما بعد مناسبة اسلامية (رمضان - حج - عيد - الخ) او قرب مناسبة انجليزية عامة (كريسماس - ربيع - الخ) - الغرض من هذا معروف طبعا لحشد الناس ضد المسلمين و خصوصا ان البرنامج يذاع الساعة الثامنة و نصف منتصف الاسبوع حيث كل الناس موجودون بالبيت وليسوا في الخمارات (يعني لا يذيعون برامج المسلمين ايام الجمعة و السبت حيث نصف الانجليز في الخمارات)

[Mostafa Kasem]

عموما هم لا يأتون بجديد - اساليبهم معروفة لدى الجميع فخلال الفيلم كانت اساليبهم كالاتي

1- اخذ جملة خارج السياق العام في الكتاب

مثلا موضوع اليهود لم يتم الاشارة ان المسخ كان لفئة من اليهود في وقت سابق وليس كلهم و هذا كان مكتوبا في نفس السطر الذي اشار اليه السعودي الخبيث في الفيلم

2- يأتون بامام معارض للفكر الغير مرغوب فيه

الشيخ المتحدث في الفيلم - شيخ ايمن صهيب حسن هو احد المؤسسين لمؤسسة كويليام التابعة للحكومة البريطانية و التي منهجها هو فضح السلفيين و اهل السنة و اظهار الصوفيين بدلا منهم و هو صوفي التوجه

3- يقطعون جزء من حديث احد الخطباء كما حدث مع هيثم حداد في الفيلم كان يتكلم عن اننا سندافع عن ديننا ضد اعداء الدين بدمائنا و هو مقطع من محاضرة غير مكتمل و ليس به شيئا ولكن في سياق الفيلم وضع و كأنه يظهر ان الانجليز المخالفين هم اعداء الاسلام المقصودون - بالمناسبة هيثم الحداد واخد دكتوراة من جامعة لندن في الدراسات الشرقية

3- الاصرار على اظهار المسلمين و كأنهم منعزلين اجتماعيا

اكذوبة كبيرة - المجتمع البريطاني هو نفسه المعزول اجتماعيا - اذا سكنت هنا لا يوجد اي علااقة مع جيرانك و ان كنت تسكن بالسنين - يعني صعب تلاقي واحد في العمل يحكيلك انه ليه علاقة بجاره

70 في المائة من طلاب المدارسي يتعرضون لتحرشات من زملائهم -

63 الف حالة اغتصاب كل سنة

17 الف يموتون بسبب الخمور كل سنة

و الجرائم شاهد على انه مجتمع مفكك بطبيعته

و انا كنت وقعت على احصائية قامت بها مؤسسة جالوب في امريكا ان المسلمين في لندن هم اكثر تفاعلا مع النظام من أقرانهم الانجليز و كانت اغلب المقارنات اما في صالح المسلمين او تقارب الاخرين في الارقام (موجودة لدي للي يريدها)

4- المدارس الاسلامية و الدينية عموما في انجلترا عليها اقبال منقطع النظير وذلك نظرا لانها تعطي شحنة اكبر من الاخلاق المفتقدة في مدارس الحكومية ( وانا افضل شخصيا في عدم وجود مدارس اسلامية ان اودع اولادي مدارس دينية مسيحية حيث يعطونك اختيار الا يحضر الاولاد دروس الدين المسيحي)

وانا لي تجربة طويلة مع طلاب كلا المدارس حيث ادرس لغة عربية لغير الناطقين ووجدت ان طلاب المدارس الاسلامية اكثر خلقا و حضورا من اقرانهم في المدارس الحكومية بفارق كبير من حيث الاهتمام و المواظبة و التحسن .....

وللاختصار ان المدارس الاسلامية مستواها الاكاديمي و نتائجها اعلى بكثير من متوسط الاداء الحكومي بشهادة الحكومة نفسها

[Mostafa Kasem]

و الناظر للموضوع بشكل عام يسأل سؤال

لماذا يهاجمون الاسلام وللاجابة دعونا نلقي نظرة على الاخبار في اهم صحف بريطانيا

1- اثبتت احصائيات المواليد ان اسم محمد هو اكثر الاسماء تسمية من نظيراتها الانجليزية كبول و دانييل وجوناثان

2- المسلمين هم اكثر مرتادي اماكن العبادات من نظرائهم المسحيين (اهل البلد)

3- مدن كمانشستر و برمنجهام و ليدز تصل نسبة المسلمين فيها الى اكثر من الثلث

حتى ان هناك مدارس حكومية ببرمنجهام نسبة المسلمين فيها الى 97 بالمائة

4- معدلات الخصوبة للسكان الاصليين في تناقص مستمر لقلة الزيجات و زيادة الطلاق وعزوف الشباب عن الحياة الاسرية

وبالتوقع المستقبلي يعتقدون انهم سيكونون اقل من نصف السكان في عام 2050

5- بينما المجتمع الانجليزي في تفكك وانحلال يزداد تماسك الجاليات المسلمة اكثر واقبالا على الدين و مظاهر التدين عموما

6- ازدياد دخول الانجليز الاصليين في الاسلام و خصوصا النساء ففي مقالة للجارديان ساقت ان حوالي 50000 بريطاني دخلوا للاسلام منذ 11 سبتمبر و كان ثلثا (66%) منهم نساءا وهذا رقم مخيف مع كل الدعايات المضادة عن دور المرأة المظلوم في الاسلام الذي يقومون به بشكل حثيث

و لكن هناك ايضا اسباب للهجوم على الاسلام و ذلك بسبب المسلمين انفسهم

1- ان المسلمين لا يقومون بالانفتاح كما ينبغي حيث انهم لا يقومون بدورهم بتوعية غير المسلمين بما هو الاسلام ومن هم المسلمون

و هو دور تأخر به المسلمون كثيرا و لكن الان قد افاق كثيرون لهذه النقطة

2- هناك عدم لا مبالاة و احترام للقانون من قبل مسلمين قليلين و لكن الاعلام يظهر ذلك و يعظم حجمه

3- ولكان اخطر مافي الموضوع هو جهل المسلمين الفاضح بدينهم فكثييرا منهم يتعامل مع الاسلام كثقافة و ليس دين و لا يعرف ان يفرق بين الشعائرة و ثقافة الاجداد لذلك تجد هناك كثيرا من الجهل و الخرافات بين المسلمين و التي تجعل بعضهم ينفر من الانجليز و غير المسلمين عموما

[Om Zayd]

***********************

2- هناك عدم لا مبالاة و احترام للقانون من قبل مسلمين قليلين و لكن الاعلام يظهر ذلك و يعظم حجمه

3- ولكان اخطر مافي الموضوع هو جهل المسلمين الفاضح بدينهم فكثييرا منهم يتعامل مع الاسلام كثقافة و ليس دين و لا يعرف ان يفرق بين الشعائرة و ثقافة الاجداد لذلك تجد هناك كثيرا من الجهل و الخرافات بين المسلمين و التي تجعل بعضهم ينفر من الانجليز و غير المسلمين عموما

جزاكم الله خيرا على المشاركة المهمة

النقطتين دول مهمين جدا

كنت دايما ألاحظ ان مناطق المهاجرين و المسلمين فيها تسيب و نسبة جرائم أعلى من العادي و مبشوفش تواجد للشرطة قوي فيها

حتى النظافة فيها أقل.. كنت فاكرة ان ده عشان سلوكيات و تربية الأفراد نفسهم التي تختلف عن تربية البيض

بس شفت مناطق تانية للبيض مهتمين بها جدا رغم ان سلوكياتهم و إجرامهم لا تختلف كثيرا عن المهاجرين بل لعلهم أسوأ- أيضا نتيجة انعدام التربية

الباكستانيين بيمزجوا الدين بالتقاليد و العادات جدا جدا جدا

لدرجة انهم عشان يقنعوهم بالبعد عن زواج الأقارب -نسبة التشوهات عندهم عالية لأنهم بيتزوجوا أولاد عمهم

لجأوا للخطباء و الأئمةحتى يوضحوا لهم ان هذا ليس من الإسلام و المصلحة تقتضي الابتعاد عنه .. و الاستجابة لا زالت ضعيفة

أول ما يشوفوك يكلموك أوردو .. و سيتغربوا جدا انك ما تعرفس اللغة دي .. كأنها لغة الإسلام

و فعلا أسوأ شيء اللي بيبقى مسلم بالاسم فقط و لا يعرف معناه و مقتضاه