مفاجأة في مؤشرات الثانوية العامة من عمو سموره

[se_ Elsyed]

المساء بتاعت سموره العجيب بالإشتراك مع وزير التموين حسين كامل بهاء الدين

مفاجأة في مؤشرات الثانوية العامة

90% نسبة النجاح في المواد التي اشتكي منها الطلاب

تعليمات الوزير: درجتان رأفة في الإنجليزي والعربي و3 لباقي المواد

النسبة العامةللنجاح ..أقل من العام الماضي

كتب- أحمد عمر:

تؤكد مؤشرات التصحيح -حتي الآن- في مختلف مواد الثانوية العامة أن نسبة النجاح بصفة عامة أقل من نسبة العام الماضي والتي بلغت 85.5% للمرحلة الثانية و77.1% للمرحلة الأولي.. وأن مفاجأة المؤشرات تتمثل في أن الدرجات أقل من العام الماضي بكثير.

علمت "المساء" أنه تم الانتهاء من تقدير ورصد إجابات مواد اللغة العربية واللغة الإنجليزية للمرحلتين. واللغة الثانية -الفرنسية والألمانية والايطالية والأسبانية- والجغرافيا والفلسفة وعلم النفس والاقتصاد والاحصاء والرياضة للمرحلتين والتربية القومية والتربية الدينية.. وأنه باق عدد قليل من التقدير والرصد لمواد الكيمياء والأحياء وعلوم البيئة والجيولوجيا والتاريخ.

كما علمت "المساء" أن المواد التي كانت مثار شكوي من الطلاب وصلت نسبة النجاح فيها إلي 90% باستثناء الرياضيات لطلاب المرحلة الأولي فهي أقل من ذلك.

علمت "المساء" أيضا أن وزير التربية والتعليم ووكيل أول الوزارة الرئيس العام لامتحانات الثانوية العامة أصدرا تعليمات لرؤساء قطاعات الكنترول الأربعة برفع نسبة النجاح في اللغة الإنجليزية بحيث يرفع كل طالب حصل علي 8 درجات إلي عشر درجات -الحد الأدني للنجاح- وكذلك في اللغة العربية من 13 إلي 15 درجة.. وباقي المواد من 17 إلي 20 درجة.. لزيادة النسبة العامة للنجاح..وعلمت "المساء" أن الدرجات لطلاب المرحلة الأولي والثانية غير سارة .

طلبة إيه دول ياخويا اللي بيشتكوا من مواد هما مجاوبين فيها 10/10 ... الناس خلاص هاتاكل بعضها والدنيا اتقل خيرها يا أستاذ ... ويمكن الطبة المكاريين عملوا كده عشان الحسد والعين والحاجات دي ..

آه يا سموره يا مثبتاتي يا متجبر ..

التاريخ والجغرافيا بيعيدوا نفسهم يا ولاد ... سنة 89 كنت في الثانوية العامية وفقعونا إمتحان فرنساوي جاب البشر كلها الأرض وحدثت ثورة العبيد والناس إشتكت بعد الأمتحان .. وبرضوا طلع سموره وأعوانه وأوركسترا النفاق السيمفوني وقالوا كل شيء تمام وربنا يخليلنا فتحي سرور - أصلة كان وزير التسمين ساعتها - واللي إشتكوا دول طلبة موتورين وقلة مندسة سوف نضربها بالشوز والعينات اللي حللناها في المعمل بتقول إن الأمتحان حلو وكله تمام .. وصاحبكم س س عك زي اللي عكوا ... وعوك وليس كله كويس ... فتصوروا سؤال من ضمن الأسئلة لناس كبيرها فيرب إيتغ وفيرب افوار لأننا دارسين الفرنساوي 3 سنين بس بيقولنا " تخيل نفسك حنطور وتقوم بنزهة في مكان ما .. فقم بوصف هذا المكان " والحمد لله إنه ما قالش تصور نفسك البغل اللي جارر الحنطور .. إحنا قرينا كده وكنا حنطور من الفرحه ... المهم أتكلت على الله وعلقت السرج واكلت العليقة برسيم وفول وتبن وخلافه وهبلت أي هبل والسلام ولما خلص الامتحان تعبت ونهقت وخرجت في نزهة أنا واصحابي وبعدين برطعت على البيت بس كان الوقت متأخر .. لقيت ماما وأخواتي بيعيطوا وعاملين معزى وبيشربوا قهوة على روحي . ... سألت في إيه يا جدعان ميتم مين ده .. قالوا لي إحنا كنا بنتفرج على القناة الثالثة وجابوا عيال من الطلبة وهما مغمئن عليهم وناس كانت بتولعتفي نفسها عشان موضوع الحنطور ده .. فقولنا ممكن تكون قليت عقلك وأستحمرت وعملت في نفسك حاجة ... فقولت لهم فشر مش مسيو س س اللي يخسر نفسه عشان أمتحان فرنساوي ... الامتحانات بتروح وتيجي .. المهم الرجولة .. هو الراجل مننا حيلته إيه غير أدبه وشرفه .. ماحنا في 56 أضربنا وكنا رجالة .. ورجعنا في 67 أضربنا برضوا وكنا رجالة ووقفنا وقفة ما وقفتهاش دول المحور في الحرب العالمية الثانية .

أُفاجأ بقى يوم النتيجة إني جايب 36 / 40 في الفرنساوي .. والإنجليزي اللي مجاوب عليه زي ما قال ونستون تشرشل في كتابه ستيب باي ستيب وزي ما قالت الملكة فيكتوريا في كتابها إنجليش فور يو ... رزعوني فيه 44/60 ...

اتاريهم قصوا من هنا ولزقوا هنا .. ومش انا بس ده الكل حصل معاه كده ..

قولت آه يا ولاد الحناطير ... الناس دي فعلاً مستحمرانا وبتعمل فينا ما بدالها .... وكرباج ورا يا أسطى عشان العيال اللي متشعبطة دي.

[moody00x]

ياسلام يا س س رجعتنا لأيام الشقاوة....

إحنا كده دفعة واحدة...ألسنة اللى مسك فيها فتحى سرور طابونة التعليم

كانت أسوء سنة فى حياة كل شاب كان فى الثانوية ساعتها....

كنت علمى رياضة..وكل المدرسين كانو بيعتبرونى عقلية علمية معلمية

المهم دخلت إمتحان الفيزياء وألاقيلك مافيش أى سؤال له علاقة بالفيزياء نهائى كل ألأسئلة كانت تفاضل وتكامل.....

طيب ياخوانا إحنا جايين نمتحن فيزياء....قال ايه ده بقى أحدث الطرق العلمية لقياس فهم الطالب العبقرى عن طريق ربط المواد العلمية ببعضها

واستخدام القوانين الرياضية فى حل المسائل الفيزيائية والعكس....

طيب يا سيادنا مش يكون فيه تمهيد للفيلم الهندى ده...طيب مش تجيبوا سؤال واحد بالطريقة دى بدل الامتحان كله....

المهم عملت فيها عبقرينو ودخلت الدول فى بعضها زى ماهما عايزين...

الغريب إنى كان فيه عداء بينى وبين الكيميا وحلت وحش فيها اقوم الاقى

نتيجة الكمييا 50 من 60 ..والفيزيا 32 من 60....

[إبن مصر]

سنة 89 كنت في الثانوية العامية

bxg::

:blink:

mfb:

cr((:

يالهوووووووى ....

من هنا ورايح تقولى يا ابيه ....

ابيه ايه.... قولى يا عمو.....

اول مره احس انى فى ارذل العمر...

cbyb:

[جـورج]

يالهوووووووى ....

من هنا ورايح تقولى يا ابيه ....

ابيه ايه.... قولى يا عمو.....

اول مره احس انى فى ارذل العمر...

cbyb:

يا عجوز يا ابن مصر

bxg::

[MuslimaEgyptian]

المهم دخلت إمتحان الفيزياء وألاقيلك مافيش أى سؤال له علاقة بالفيزياء نهائى كل ألأسئلة

مع إن كل مواد الثانويه العامه صعبه، لكن الفيزياء بالذات كانت موضوع لوحده فعلا يا أخ مودى. أنا كنت فى تانيه إعدادى ساعتها وكنا بنقلق أوى أنا وصحباتى لما كنا بنشوف بتوع ثانوى خارجين من الإمتحان بيعيطوا عياط هيستيرى وكأنهم شافوا فيلم رعب بالداخل. الحمدلله ربنا أكرمنى ولم أمر بهذه التجربه فى مصر واللى مروا بها فعلا أبطال لخضوعهم لهذه التجربه التعليميه الفريده bxg::... كفايه موضوع سنه خامسه وسادسه ده اللى حكايه لوحده...

وطبعا لا أملك أن أنهى المداخله بدون أن ألقى التحيه على أبيه إبن مصر :blink:

cr((:

[سقراط المصري]

الاخ الفاضل ابن مصر

تسمح لي اقولك يا عموووووو!!

الاخ الفاضل س س

كم اسعدني ان تكون انت والاخ مودي دفعة 89 ، دي دفعه الرجاله العظماء .

بس اعتقد ان الامتحان كان فيه سؤال تاني اختياري بدل موضوع الحنطور ده ، وكان بيقول تخيل نفسك عمله ورقيه او معدنيه واحكي عن ذكرياتك وعيش مع نفسك .....ارجو ان تكون ذاكرتي لسه سليمه.

اما امتحان الفزياء، فأنا لم اكن اخشاه بالمره لسبب بسيط جدأ وهو:

هل تصدقوني لو قلت اني اخذت دروس خصوصيه في سنه سادسه ابتدائي فقط ....اكرر فقط.

وبالتالي فأنا كنت غير خائف نهائياً من الثاتويه العامه ، لانه ضريوا الاعور على عينه ، انا اهلى كانوا الحمدلله مستورين ، وايامها والدي كان مكسوف مني قوي في بداية السنه عشان كان خايف اطلب منه دروس ، ماعلينا ...مش موضوعه دلوقت.

احيي س س على فتحه للموضوع.

حذر فزر انا دفعه ثانويه "عاميه" سنه كام.

سقراط

[الأفوكاتو]

على كده أنا جدكم كلكم, ما عدا أخى إخناتون المنتدى, الذى كان من نفس الأسرة الفرعونية التى ننتسب اليها.أيام زمااااااااااااااااااااااااااااااان

[فــيــروز]

دفعة 92 :angry: اصعب امتحان بالنسبه لى كان امتحان الانجليزى خصوصا بعد عرضه على زملاء فى مدارس لغات شعروا تجاهه بالعجز الشديد و للعجب جبت فيه 45 من 50 و الحمد لله قادر على كل شئ ntw:

بس الحقيقه يعنى من غير ضرب

انا كنت باحس ان الطلبه بتتسلبط

دى الامتحانات كانت سهله خالص phn:

وخصوصا الفيزياء i*:

جبت فيها 49 من 50 lo::

بس الوزاره بقت لئيمه جدا

زمان كانت الناس تركز جدا فى حل المسائل .. خصوصا فى مواد زى الفيزياء و الكيمياء كان فيهم اجزاء مسائل و رياضه اكتر من النظرى .. فبقت الناس تركز فى المسائل و تنام فى النظرى قاموا هما لعبوا معاهم عسكر و حراميه وبقى الدق كله فى النظرى :blink: لكن بامانه فعلا انا باحس ان الطلبه على السمعه مش بتذاكر .. يعنى الواحد من دول من اول ما يبقى فى اعدادى يسلم ودانه للناس اللى بتخوفه من الثانويه العامه و البعبع و الحاجات الهبله دى .. رغم ان فعلا فى رايى الامتحانات بقت سهله جدا و ده شئ خطر لانه بيعلى المجاميع بصوره قد تخدع الطلبه نفسهم و تخليهم ياخدوا قلم فى قدراتهم فيدخلوا الجامعه ياخدوا صدمة العمر wst::

[Sherief AbdelWahab]

مبروك علينا التغيير اللي ح يجيبه لنا عمو سمير..أصله بصراحة بقى بيونيك مان زي البيونيك وومان بالضبط..أووول سايز زي مسرحية حلمك يا شيخ علام..

دي مجرد واحدة من كراماته اللي بيقول لنا من خلالها إنه واصل في التعليم ..

و لسة لما ح نشوف كذا وزير من شلته و كذا محافظ من معارفه..حنعرف إنه سمير رجب إكس بي!..

بالمناسبة كاتب المقال من الدفعة المغضوب عليها..الدفعة المزدوجة..ضحايا ف. س و س. ر..و كل فاشل يترك المنصب إلى منصب أكبر..

خلص الكلام

[عصام]

الاخ الفاضل ابن مصر

تسمح لي اقولك يا عموووووو!!

الاخ الفاضل س س

كم اسعدني ان تكون انت والاخ مودي دفعة 89 ، دي دفعه الرجاله العظماء .

أيها الأخوة .. لا تنخدعوا بكلام ابن مصر .. الموضوع مش كده خالص!!

وبمناسبة الحديث عن دفعة العظماء .. دفعة 89 أحب أقول لكم إنى كنت أحد ضحاياها .. بس بشكل غريب شوية .. ومختلف

i*: gt:

مش قادر .. كل ما افتكر .. أموت م الضحك..

شوفوا يا اخوانا .. أنا برضه كنت راجل شعبة رياضة .. ومقطع الدنيا فيزياء وجبر وهندسة فراغية .. وكنت راسم على هندسة .. دا انا كنت حتى والله باذاكر فى كتب أخويا الكبير اللى كان ايامها فى هندسة ..

ومن وجهة نظرى (أيام ما كان عندى نظر wst:: ) كنت شبه متأكد إنى متأهل (سورى يا س س عارف ان الكلمة دى بتسبب لك حساسية كروية)

المهم .. رحت أشوف النتيجة واتفاجئت إنها 67% وهو ما غير مسار حياتى تماما!!

طبعا انتوا دلوقتى بتقولوا إيه اللى بيقوله الجدع ده ؟ .. ما هو كل ده يندرج تحت بند الضحايا الطبيعيين ..

أقول لكم لأ

مش ها اطول عليكم (لأ ... قولوا طول!!)

فى سنة تالتة جامعة - كلية الآداب :angry: أى والله الآداب .. وبلاش قسم إيه عشان نمنع الضحك phn: إحتجت مستخرج من شهادة الثانوية العامة علشان شغل بعد الضهر ..

وبينما أنا قاعد أتأمل الشهادة ....

أن أن أن أن آآآآآآآآآآآآآ

فوجئت إن أنا مش أنا : :blink:

رقم الجلوس المكتوب أعلى الاستمارة .. مختلف تماما (تقريبا) عن الرقم الموجود فوق الدرجات .. lo::

يعنى أنا .... مش أنا :D lo:: lo:: ...مش قادر..

[se_ Elsyed]

أعمامنا الكبار إبن مصر ، الأفوكاتوا ، اخناتون .... أنا من أشد المعجبين بالأسرة السادسة وعارف كل أفرادها نفر نفر .. بصراحه كلهم كانوا رجالة ووقفوا وقفه رجالة في وش الهكسوس وقطعوهم حتت لدرجة إن الهك بقى في ناحية والسوس بقى في الناحية التانية ..

أما نحن فنفتخر بإن نكون جيل حرب الخليج ولولاكي :angry:

[se_ Elsyed]

رقم الجلوس المكتوب أعلى الاستمارة .. مختلف تماما (تقريبا) عن الرقم الموجود فوق الدرجات ..  :angry:

يعنى أنا    ....  مش أنا  :blink:  wst::  phn:    ...مش قادر..

إنت يا عم يا بتاع التأهيل المهني .... ما تبطلوا عادة الري بالتنقيط دي مش كفايه كلله علينا هاتبقى أنت وهي .

طب وبعد ما قعدت 5 سنين في كلية الآداب قسم علم نفس .. واكتشفت أنهم إدولكم نتيجة مش بتاعتك وإن إنت كنت تسحتق تدخل هندسة القاهرة لأنك جايبة 95 % ... عملت إيه ؟

[عصام]

طب وبعد ما قعدت 5 سنين في كلية الآداب قسم علم نفس .. واكتشفت أنهم إدولكم نتيجة مش بتاعتك وإن إنت كنت تسحتق تدخل هندسة القاهرة لأنك جايبة 95 % ... عملت إيه ؟

lo::

i*:

عملت إيه؟

ولا حاجة

gt:

تصور

:D

:angry: :blink: wst:: phn:

[تصحيح]

على كده أنا جدكم كلكم, ما عدا  أخى إخناتون المنتدى, الذى كان من نفس الأسرة الفرعونية التى ننتسب اليها.أيام زمااااااااااااااااااااااااااااااان

و الله يا متر المنتدي ده فيه حاجة عجيبة .. ناس بتتكلم ثانوية 92 ... و ثانوية 90

اعتقد انهم بيغيظوا شيوخ المنتدي .. فين ايام العز ... أيام لما كانت الوجاهة في امتحانات التوجيهية .. و كل التلاميذ لهم شنبات