نقابات واتحادات وجمعيات .. لمن يدفع أكثر

[Sherief AbdelWahab]

قبل الكلام : مش كل أشكال الفساد في المجتمع هي اللي مرتبطة بشكل أو بآخر بالسلطة أو بالنظام الحاكم في أي بلد.. فيه أشكال تانية بعيدة عن العين والعقل لا تضرب إلا بشكل فجائي وغير متوقع وعنيف..

ليه عندي شك بعد التصريح اللي عمله "النويهي" امبارح ونشرته الوفد ونقلته عنها في موضوع حوادث الطرق في مناقشات الفساد إن التصريح هو جزء من شيء أكبر..

ممكن تعتبروا اللي جاي دة شطح خيالي أو نظرية مؤامرة.. بس خلونا نتخيل ونفكر..

الحراك السياسي إدى دور وأهمية للنقابات الصغيرة جداً ، أو الاتحادات العمالية الصغيرة جداً ، أو الروابط العمالية الصغيرة (رابطة عمال كذا..اللجنة النقابية لكذا) وهكذا .. بل إن فيه نقابات موازية ظهرت بالفعل..مش بس بفعل أبناءها لأ كمان بفعل عوامل خارجية زي المال السياسي طبعاً ، اللي بيحارب النظام وفكرة الدولة نفسها بدعم تنظيمات وكيانات موازية للي موجودة دلوقت وبترعاها الدولة زي النقابات المهنية المعروفة..

المال السياسي يعني فلوس ومصالح ودور..وعشان يحمي الفلوس والمصالح لازم يبقى له دور..

هل صحيح إن المال السياسي "اشترى" جمعيات مهنية زي جمعيات النقل لحماية مصالحه واستثماراته الضخمة في العقارات اللي ليها علاقة بنقل الأسمنت ومواد البناء وأشياء أخرى واللي بتتم بشكل شبه حصري عن طريق اللواري؟ يحرك الجمعيات دي زي الشطرنج تعمل إضراب تعمل قلق تعمل مشاكل؟

هل ممكن المال السياسي يشتري ما هو أكبر من نقابات وروابط عمالية صغيرة علشان يلاعب بيها النظام ويلاعبنا معاه؟

إيه مدى أخلاقية الممارسة دي؟ مش دة بيتناقض مع ادعاءات رجال الأعمال دول بإنهم مبعوثي العناية الإلهية لإنقاذ مصر من الفساد؟

وإيه الجدوى من الجمعيات دي طالما إن آخر شيء بتعمله هو حماية مصالح أعضاءها وتحويلها لأذرع تضرب عن آخرين بالوكالة؟

خلص الكلام