الخمر والمخدرات

[eslam elmasre]

الخمر والمخدرات وجهان لعملة واحدة

لكن جميع دول العالم تبيح تعاطي الخمور وتمنع وتجرم تعاطي المخدرات

اريد ان اعرف الفروق الجوهرية بين الخمور والمخدرات

الذي اعلمه ان ادمان الخمور لا يمكن الشفاء منه وادمان المخدرات يمكن الشفاء منه

الخمور بتذهب العقل اذا تم تعاطيها بنسبة معينة علي حسب قدرات كل متعاطي

المخدرات بتذهب العقل بنفس القدر

الخمور بيعمل في صناعتها ملايين البشر ويتكسبون منها وهي مجال للاستثمار وجذب رؤوس الاموال

المخدرات نفس الشيء

المخدرات بتتلف اجهزة الجسم اذا تم الافراط فيها

الخمور ايضا بتتلف اجهزة الجسم اذا تم الافراط فيها او الاعتياد علي تناولها

اريد ان اعرف الفرق

[جويرية]

دي ملحوظة فعلا ليه ممنوع تجارة المخدرات ولا تمنع الخمور

وكمان حاجة تانية ، فيه ادوية في الصيدليات فيها نسبة مخدر ، تحت اسم ادوية الجدول

[ابو محمود]

العزيزة الاخت جورية بصراحة معلوماتى محدودة جدآ عن الفارق لانى يادوب كنت بتفرج من بعيد ههههههههههههههههههههههههههههههههههههههههههههههههههههههه

ممكن حد من الاخوة يكون دارس طب يقول الفارق اية دة من الناحية العلمية

اما موضوع الدين والأنسانية اعتقد انها تغير اى الخمور والمخدرات معآ تعمل على اللعب بأكبر معجزات رب العزة وهى العقل اذآ كرم الله الانسان عن دون مخلوقاتة بالعقل فعندما نتناول الخمور والمخدرات نتلف العقل ونحول الانسان الى مخلوق بدون عقل .. فمن الممكن ان يسرق ويقتل ويزنى ومن هنا اجدها لا أختلاف بينهما اما منع احداهما وترك الاخر فدة موضوع اخر (سياسى ) الخمر يشربة الناس اصحاب الديانات الاخرى بل يقدم فى معابدهم ولو بنسبة قليلة ويتم تصنيعة داخل دور العبادة فلا يمكن للحكومات ان تناهض البشر ممن تحكمهم وتركت الخمر لانة من غير الممكن منعة ....اما المخدرات فهناك تعامل سياسى كبير مع الموضوع ويعتبر سلاح للقضاء على شعوب بأن يتم اغراق اسواقها بالمخدرات لاسباب سياسية ومن هنا اتخذت الدول حظرها من تلك المنتجات وعملت على محاربتها مثال انتشرت فى مصر انواع من المخدر تسمى بالبانجو وظهرت مساوءة على رجال الشرطة وعلى من يتناولة من انة يمكنة من ارتكاب جرائم شديدة وخطرة جدآ ويتحول المدمن الى شرير وغير سوى ومن هنا تم القضاء علية .. كيف تم ؟

تم اغراق الدولة بمخدر الحشيش وتم تنزيل اسعارة مما استدعى معة مدمن البانجو الى الاتجاة الى الارخص علمآ بان اسعار البانجو كانت بملاليم بالنسبة للحشيش وهنا سنجد ان الدول تحارب المخدرات لانها سلاح لاعدائها للنيل من شباب تلك الدول وهنا نصل الى ان المخدرات يمكن اتصنيعها كيميائيآ وهذا يصيب الانسان بالادمان الغير شافى وهنا مكمن الفرس الخطورة .. حمى الله بلادنا واولادنا من شر الخمور والمخدرات .. والحمد لله رب العالمين على نعمة الاسلام . وكل سنة وانتى طيبة اختى العزيزة

[جويرية]

اما يكون فيه مرض في الجهاز العصبي ، حد مش بينام مثلا ، بياخد مهدئ ، بتبقي فيه نسبة مخدر ، بس الطبيب بيكتبه بجرعة معينة و لفترة معينة

طيب ما فيه مرضي ، بياخدوا المخدر ده علاج ، بدون طبيب و روشتة

كنت بستغرب من اللي بيستشهد بكلام الممثلين في الأفلام

بس اسمحولي بالجملة دي

محمود ياسين في فلم الجزيرة بيقول ، الحكومة بتجرم المخدرات و بتبيعها في الصيدليات

[MZohairy]

بعيد عن الحلال و الحرام

لا اعتقد (صحيا) ان سيجارة حشيش كل شهر او مرتين في الشهر ممكن يكون ليها اي أثر سيئ

ايضا لا اعتقد ان كاسين ويسكي مره كل شهر ممكن يكون ليهم اثر سيئ

انما انا مؤمن ان تناولهم حرام لأن الإنسان من الصعب ان يتحكم في نفسه في التوقف عنهم عند اللزوم

و عموما الإفراط في اي شيئ مؤذي حتى الميه الساقعه

[رضوي]

السلام عليكم ورحمة الله وبركاته

بداية اعتقد ان سبب تجريم الحكومات للمخدرات وعدم تجريمها للخمور .......... هو حلية الخمور في بعض الاديان ...... يعني فيه اديان مابتحرمش الخمور

علشان كدة ماينفعش الدولة تجرم حاجة ويكون الدين الرسمي للدولة دي بيحللها

سؤال الفاضلة جويرية عن الجدول في الصيدليات وكلمة محمود ياسين

بعض الامراض (وقانا الله منها واياكم ) بتحتاج لأنواع عالية من المسكنات وطبعاً لازم يكون الدوا موجود في الصيدلية ......... زي الافيون مثلاً .....

كنت مرة بستمع لبرنامج اذاعي طبي ..... والدكتور الضيف في البرنامج اتكلم عن الافيون باعتباره المادة الفعالة في معظم الادوية الهامة ...... وازاي نسبته بتختلف من دوا للتاني باختلاف المرض ...... يعني فيه دوا مخصص لمرض معين نسبة الافيون فيه بسيطة ....... ودوا تاني لمرض تاني نسبة الافيون فيه اكتر ....... وهكذا

الادوية الموجودة علي الجدول هي ادوية تمت صناعتها للعلاج من امراض موجودة بالفعل والناس محتجاها ............. علشان كدة ماينفعش تتصرف الا بالروشتة ........ لأن فيه بعض المدمنين بيعتمدوا عليها

اعتقد ان الحكومة لما توفر الادوية دي وتقنن استخدامها يبقي دي حاجة كويسة

ربنا - سبحانه وتعالي - خلق بعض نباتات ووضع فيها القدرة علي تسكين الآلام القوية اللي يصعب علي الانسان تحملها ....... ووضع فيها القدرة علي الشفاء من بعض الامراض (سبحانه يخلق الداء والدواء ) ........ لكن لكل شيء استخدامين احدهما سليم والآخر خاطيء ....... فيه ناس بقي بتاجر بألآم الناس ......... وبتحول الدوا لمخدر دة اسمه سوء استخدام

بس اللي اعرفه ان ممنووووووع صرف الادوية دي بدون روشتات ...... دة المفروض يحصل ...... اللي بيحصل فعلاً ايه ...... بصراحة معرفش .

الخمور بقي بتختلف لأنها محرمة في ديننا الحنيف ........ طيب حكومتنا المصرية بتبيح تداولها لييييييييييه ؟؟؟؟؟؟؟؟؟

الحكومة بتعزي السبب دة علشان السياحة !!!!!!

والله تعالي اعلي واعلم

[Om Zayd]

أقولكم نكتة .. برة بيستدلوا بعدم تجريم الخمور و السجائر على تقنين تداول بعض المخدرات .. على أساس ان السجاير و الكحول أكثر ضررا

و دول ابتدت تسمح بتداول المخدرات - بعضها - للاستخدام الشخصي و الجدل عنيف حولها في انجلترا

[مغتربة]

لأزهر يناقش إباحة الحشيش.. علاجا

القاهرة. شمس

ناقش مجمع البحوث الإسلامية بالأزهر في جلسته الشهرية، أمس، مشروعية استخدام الحشيش في علاج تليف الكبد. وقال وكيل الأزهر عضو المجمع الدكتور محمد واصل إن سؤالا ورد إلى المجمع من أستاذة أمراض الكبد والجهاز الهضمي بإحدي كليات الطب المصرية تسأل فيه عن شرعية استخدام مادة مستخرجة من الحشيش في علاج التليف الكبدي، بعد أن أثبتت بعض الأبحاث الأمريكية فعالية هذه المادة.

لكن المتحدث باسم الأزهر السفير محمد رفاعة الطهطاوي لم يذكر في تصريحات عقب الاجتماع الرأي النهائي في هذا الموضوع، مكتفيا بتأكيد أن المجمع ناقش قضية فقهية وردت له من نيجيريا حول مسألة تطبيق عقوبة حد السرقة وقطع يد السارق في بعض الولايات النيجيرية التي تطبق الشريعة الإسلامية وتعاني فقرا شديدا. وقال الطهطاوي إن المجمع رأى بالإجماع «أن حد السرقة من الحدود الإسلامية الثابتة قطعا إلا أن تطبيقه يتوقف على درء الحدود بالشبهات».

وأفتى المجمع أنه على القاضي أن ينزل بالعقوبة من القطع إلى التعزير «خاصة أن هناك حالة من الفقر وسوء توزيع للثروة، لأن الإسلام يقيم العدل قبل الحد».

المخدرات و الخمور ليست شر خالص اكيد فيها بعض المنافع لكن المشكله ان اضرارها اعظم من منافعها و علشان كدا تم تحريمها

الاسلام هو الدين الوحيد الى بيحرم صراحه الخمر علشان كدا اغلب الدول الاخرى مبتمنعهوش لانه ببساطه بيدخل فى طقوسها الدينيه بشكل مباشر

حتى و ان كان بكميات يسيره كمان اعتقد و دا راى الشخصى مش راى طبى و لا حاجه اعتقد ان الادمان على المخدرات بيكون اسرع من الكحوليات و اخطار الوفاه بالجرعه المفرطه اعلى من اخطار الوفاه من ادمان الكحوليات و اسرع طبعا مش كل انواع المخدرات لكن الهيروين و الحاجات الى شبهه

تم تعديل 26 نوفمبر 2010 بواسطة مغتربة

[eslam elmasre]

بعيد عن الحلال و الحرام

لا اعتقد (صحيا) ان سيجارة حشيش كل شهر او مرتين في الشهر ممكن يكون ليها اي أثر سيئ

ايضا لا اعتقد ان كاسين ويسكي مره كل شهر ممكن يكون ليهم اثر سيئ

انما انا مؤمن ان تناولهم حرام لأن الإنسان من الصعب ان يتحكم في نفسه في التوقف عنهم عند اللزوم

و عموما الإفراط في اي شيئ مؤذي حتى الميه الساقعه

مش فكرة تأثير او لا تأثير يا زهيري

ماهو لو الموضوع كده يبقي مافيش ضرر بردوا من اكل لحوم الخنزير

احنا لا نشرب الخمور ولا نأكل لحم الخنزير لانهما حرام بنص من كتاب الله

لكن كلامي هو عن الكيل بمكيالين رغم تاثيرهما الواضح علي صحة الانسان في حالة الاعتياد علي تعاطيهما وقد يؤدي الامر في كثير من الاحيان الي الادمان وإتلاف اجهزة الجسم

نسبة كببيرة من اسباب حوادث السيارات او جرائم الاغتصاب يكون مرتكبها واقع تحت تأثير إما المخدرات او الخمور فهذا لا يدفعنا لاباحة تعاطي الخمور وعدم اباحة تعاطي المخدرات والا فعلينا بمعنهما معا لا ان نحارب نوع ونشجع نوع وهما الاثنين انيل من ستي الا سيدي

وبعدين المخدرات فيها انواع مدمرة بالفعل مثل الانواع المخلقة لكن الانواع الطبيعيه تستخدم بالفعل في التداوي وتخفيف الالام للمرضي

اعرف ناس يتعاطون المخدرات ليعطيهم قدرة علي التحمل اكثر من طاقته فالمخدر يخدر اجهزة الجسم ويسمح لها بالاستمرار في العمل اكثر من طاقة البشر مثل بعض السائقين الذين يظلون يقودون سياراتهم ليومين متواصلين دون ان تربش عيونهم ولو لحظة

كان هذا ناتج عن تسكين اجهزة اجسامهم بالمخدر

وسمعت ان هناك من الفنانين والمبدعين يقدمون اعظم نتاج فنهم تحت تأثير المخدرات