أستاذ جامعي يبلغ الشرطة ضد زوجته

[moody00x]

أستاذ جامعي يبلغ الشرطة ضد زوجته اكتشف بعد الزفاف أنها صلعاء

كتب دسوقي عمارة:

تحقق نيابة حلوان في بلاغ غريب تقدم به استاذ جامعي ضد زوجته.. ابلغ الزوج قسم حلوان انه عقب زواجه من زوجته الحسناء اكتشف ان زوجته الشابة صلعاء وأنها كانت تتزين بباروكة وتمكنت من خداعه طوال فترة الخطوبة.

كان الزوج '40 سنة' قد تقدم لخطبة زوجته '34 سنة' حاصلة علي دبلوم تجارة في يناير الماضي وطوال فترة الخطوبة تفننت في اخفاء رأسها الصلعاء تحت باروكة من الشعر المسترسل. وليلة الدخلة اصيب بخيبة امل عندما راحت عروسه في نوم عميق وانزاحت الباروكة عن رأسها.. ايقظها الزوج وصرخ فيها ثم تقدم ببلاغ الي قسم حلوان يطالب فيه باثبات حالة صلع زوجته للاحتفاظ بحقه امام المحكمة حتي يتم فسخ العقد دون الزامه بأي مستحقات لقيام زوجته بالغش والتدليس.

fsh:: fsh:: fsh::

إن كيدهن عظيم

[Cleo]

مش فاهمة والله الرجالة دووووول..!!!

إيه يعنى صلعاء..!!

المهم الجوهر...!!

هو مش شافها قبل الاكتشاف ده و عجبته؟؟؟!!!! afr2:

[maksoof]

يا ترى هل كونها صلعاء غير حاجة فى شخصيتها؟ و اللا الشخصية ما كانش لها أهمية بالنسبة له أصلا؟

و مجرد سؤال: إزاى القصة دى وصلت للصحف؟

[فــيــروز]

أعتقد ان اخفاءها للامر هو اكبر دليل على عدم اقتناعها بتقبل الناس لهذا الموضوع ومعرفتها المسبقه بهذا الموقف ..

وبالطبع لا ذنب لاحد فى شكله او فيما يصيبه ويغير من هذا الشكل

لكن كما ينبغى للانسان ان يكون عادلا مع نفسه ينبغى ان يكون عادلا مع الآخرين .. وانا لا احب سياسة الامر الواقع او لوى الدراع .. وكان مفروض انها تتصارح معه بالامر و تترك له حرية القرار بدلا من هذا الموقف الحرج جدا الذى يواجهانه :angry:

[ragab2]

على الأقل لو صلعاء فعلا

ستوفر عليه الكوافير

وحاتضطر تتحجب

[amir]

حاجه غريبه فعلا

يعنى الخطوبه فى شهر يناير و الجواز نقول تم فى شهر يونيو , يعنى 6 شهور ماشفش فيهم أن شعرها عباره عن بروكه ؟!

و بعدين هو عنده 40 سنه يعنى مش صغير و اكيد يقدر يفرق بين الشعر الطبيعى و الباروكه .... امال استاذ جامعى ازاى ؟؟

:angry:

اللى فوق دى باروكه يا استاذ !!

[Masrawy Abroad]

كما ينبغى للانسان ان يكون عادلا مع نفسه ينبغى ان يكون عادلا مع الآخرين .. وانا لا احب سياسة الامر الواقع او لوى الدراع .. وكان مفروض انها تتصارح معه بالامر و تترك له حرية القرار بدلا من هذا الموقف الحرج جدا الذى يواجهانه  :angry:

أتفق تماماً مع رأي فيروز

[Abouhemeed]

أنا من رأيي إنه بيتلكك !!

[crossfield]

فيه جزء من الخبر مودى اختصر و مقالوش

العروسة دبلوم تجارة

لكن جميلة

و هو ده شكله الدافع الرئيسى للجوازة(إن مكنش الوحيد)

فى الحالة دى

أكيد هتفرق مع الأستاذ الجامعى

أكيد هيقول لنفسه

"يعنى دبلون

و كمان صلعة!!!!

:rolleyes:

B)

بصراحة عنده حق

لأنها مكنتش صريحة من الأول

بس كانت هتقولها له ازاىىىىىىىى؟ B)

[Abouhemeed]

تقول له....

أنا قرعه .... :rolleyes:

[moody00x]

أنا بقى مش متخيل صلعة إزاى والله...

هنا فى أمريكا شفت واحدة ست كبيرة وشعرها فعلآ منحول خالص بس كان واضح إنها تقريبآ كده من الكانسر والعياذ بالله ...لكن فعلآ أنا عمرى ماشفت واحدة شابة كده ودبلون تجارة وصلعة

[Lighthouse]

تقدم ببلاغ الي قسم حلوان يطالب فيه باثبات حالة صلع زوجته للاحتفاظ بحقه امام المحكمة حتي يتم فسخ العقد دون الزامه بأي مستحقات لقيام زوجته بالغش والتدليس.

هو ده بيت القصيد

بصراحة مش فاهمة ازاي واحد كبير كده ومش قادر يفرق بين الشعر الطبيعي والمستعار B)

وبعدين دبلوم تجارة وحسناء ;)

وهو ده السبب في زواجه منها

فجأة كده اكتشف انها صلعاء ha)

طيب ولو طلع هو اصلع وبيكذب ولابس باروكة

ممكن تطلب الطلاق للضرر وتاخد حقوقها من حبابي عينيه mc:

ولا الف مين ح يقول لها يابنتي اصبري :rolleyes:

ضل راجل ولا ضل حيطة

والست الاصيلة ماتبعيش جوزها علشان الحاجات البسيطة دي mc(:

الا هو ليه بس المفروض الست تبقى اصيلة وتصبر على العيوب والزواج لأ ups:

هذا طبعا مع رفضي التام لاسلوبها في الكذب والخداع B)

[kfaya]

كروسفيلد كتبت :

بصراحة مش فاهمة ازاي واحد كبير كده ومش قادر يفرق بين الشعر الطبيعي والمستعار 

وبعدين دبلوم تجارة وحسناء 

وهو ده السبب في زواجه منها

فجأة كده اكتشف انها صلعاء 

دكتور أو حتى واحد مقطع السمكة من ديلها ... لو الزوجة طوال فترة الخطوبة و كتب الكتاب وهى محجبة و ملتزمة... ورافعة الراية السوداء ممنوع الاقتراب و اللمس ...كان هيعرف أزاى !!!!؟؟؟؟؟

[maksoof]

دكتور أو حتى واحد مقطع السمكة من ديلها ... لو الزوجة طوال فترة الخطوبة و كتب الكتاب وهى محجبة و ملتزمة... ورافعة الراية السوداء  ممنوع الاقتراب و اللمس ...كان هيعرف أزاى !!!!؟؟؟؟؟

و الله يا كفاية ده كلام سليم!

أنا أرشحك نائب لحكيم البلاد.

:rolleyes:

[MuslimaEgyptian]

لو الزوجة طوال فترة الخطوبة و كتب الكتاب وهى محجبة و ملتزمة... ورافعة الراية السوداء ممنوع الاقتراب و اللمس ...كان هيعرف أزاى !!!!؟؟؟؟؟

مثله كمثل أى عله غير ظاهره ـ كمرض ما، او عدم قدره على الإنجاب ـ يجب أن يصرح به (بضم الياء وفتح الصاد). ولو فيه حرج، الحاجات دى بتتقال للوسيط أو تتناولها الأمهات وهكذا. ولكن لازم تعلم الطرف الآخرطبعا ولكل طرف حق الإختيار وهو او هى على بينه من أمور زواجهم...

للأسف وجدت نفسى فى موضع كهذا شخصيا (لا، لست صلعاء الحمدلله) :) أى أقصد أن لم يصرح الشخص لنا بأمور كان يجب أن يصرح بها قبل قراءه الفاتحه وأدى ذلك لعناء وشقاء كنا بدون حاجه لهما..والحمدلله على كل حال..

‏حدثنا ‏ ‏هناد ‏ ‏حدثنا ‏ ‏أبو معاوية ‏ ‏عن ‏ ‏الأعمش ‏ ‏عن ‏ ‏شقيق بن سلمة ‏ ‏عن ‏ ‏عبد الله بن مسعود ‏ ‏قال ‏ ‏قال رسول الله ‏ ‏صلى الله عليه وسلم ‏ ‏عليكم بالصدق فإن الصدق يهدي إلى البر وإن البر يهدي إلى الجنة وما يزال الرجل يصدق (‏‏أي في قوله وفعله) ‏ويتحرى ‏‏ الصدق‏ (أي يبالغ ويجتهد فيه) حتى يكتب عند الله صديقا

تم تعديل 10 يوليو 2004 بواسطة MuslimaEgyptian

[se_ Elsyed]

نفهم من كده يعني إن المدافعون عن الزوجة إنهم بيدافعوا عن الغش والتدليس ؟... وإن شالله الراجل يكون عنده 70 سنة أليس من حقه أن يتزوج إنسانة صادقة مع نفسها ..

ده الرجال زمانه قطع الخلف وجاتله صدمة إنكشارية لما يصحى في امان الله ومش مدي أي خوانه يلاقي نفسه نايم جنب السطوح ... ده حتى مش حلو عشان عقله الباطن .

وما لا نرضاه للرجل لا نرضاه للمرأة أيضاً .. فهل يمكن ان تدافعوا عن شخص لدية علة ما فيقوم بخداع إنسانه بريئة ويُخفي ذلك عنها وبعد الزواج تكتشف تلك العلة .

يا سادة تلك المرأة غشاشة ومخادعة واخفت حقيقة ما أصابها طوال فترة الخطبة ولو كانت صادقة كانت صارحته وبالتالي فكان له مطلق الحرية يرفض ام يستمر في الخطبة .

أما بقى الشعارات اللي مالهاش لازمة من نوعية " يعني هو متجوز واحده عشان شعرها " " طب ما يبص لشخصيتها والمميزات اللي عندها " وما إلى ذلك فكل هذا لا يعفيها من تهمة الغش ..

وبعدين بقى الواحد بعد كده يعمل زي ماري منيب ويروح يشد العروسة اللي متقدملها من شعرها ويجيب معاه بندق لأ بلاش ده ده الكيلو ممكن يعمل له 70 جنية في مصر .. فممكن يجيب معاه دووم من قدام أي مدرسة ويخليها تقرقشه عشان يشوف عندها سنان ولا بتمشي حالها بطقم ..

حشيش خلي بالك من الحاجات دي وخد معاك واحد خبير في منتجات السليكون ماحدش ضامن الحاجات اللي قدامه دي أصلي ولا تايواني :)

وكما قال الشاعر اللي كان شغال عندي في الصالون ( مش المنتدى لأ التاني صالون الحلاقة ... راضي عفو الخلاق .. الأسطى س س الحلاق )

لا تصاحب الأقرع ولا تاخد منه نصيحة .. لو كان ربنا بيحبه كان خلى راسه صحيحة ..

الحق أحق أن يُتبع .... وبطلوا بقى ... مليتوا البلد .

[maksoof]

يا سادة تلك المرأة غشاشة ومخادعة واخفت حقيقة ما أصابها طوال فترة الخطبة ولو كانت صادقة كانت صارحته وبالتالي فكان له مطلق الحرية يرفض ام يستمر في الخطبة .

أما بقى الشعارات اللي مالهاش لازمة من نوعية " يعني هو متجوز واحده عشان شعرها " " طب ما يبص لشخصيتها والمميزات اللي عندها " وما إلى ذلك فكل هذا لا يعفيها من تهمة الغش ..

..........

لا تصاحب الأقرع ولا تاخد منه نصيحة .. لو كان ربنا بيحبه كان خلى راسه صحيحة ..

الحق أحق أن يُتبع .... وبطلوا بقى ... مليتوا البلد .

بالراحة علينا يا س.س. !

و هو مين فينا ما فيهوش علة و مش بيحاول يخفيها؟ و سبحان من له الكمال.

يعنى إحنا بنفترض إنها كذبت عليه و ده ممكن يكون فرض خاطئ.

يمكن ما قالتش إن ده مش شعرها الطبيعى بس كمان يمكن ما قالتش إنه شعرها يبقى (من ناحية الصدق فهى لم تكذب)

يمكن بتطمع إنه يديها فرصة تبين له صفات تانية حميدة فى شخصيتها تخليه يتغاضى عن الشكل الخارجى

"وإن كرهتموهن فعسى أن تكرهوا شيأ و يجعل الله فيه خيرا كثيرا"

و يقول الرسول عليه السلام:

"إن الله لا ينظر إلى أجسادكم و لا إلى صوركم و لكن ينظر الى قلوبكم"

قل لى بقى يا سيدنا: هل محاولة إخفاء عيب خلقى إبتلاها الله به أخف أم محاولة إخفاء صفة ذميمة زي الحقد أو النميمة أو الكذب أو الرياء .. الخ؟

مش دي كلها (و غيرها) عيوب بتظهر للزوج أو الزوجة بعد الجواز و المعاشرة؟

واللا يعنى عشان الصلع صفة ظاهرة؟

هل سمعت عن حد عمل محضر لمراته (أو لجوزها) عشان ظهر فيه عيب من العيوب دى بعد الجواز؟

و بعدين حتى لو كان الوضع مش عاجبه فإيه لزوم محضر الشرطة و النشر فى الصحف (و دلوقت على الإنترنت) ؟ مش دى تعتبر من عورات البيوت؟ و زى ما بيقال "ربنا أمر بالستر".

و سؤال أخير: إحنا عمالين نذم فى الصلع فى الوقت اللى مانعرفش الإخوات اللى بنتكلم معاهم هنا فى المحاورات شكلهم إيه فيا ترى حيكون رد فعلنا إيه لو مرة إتقابلنا و لقينا واحدة منهم (و كلهم أعزاء علينا) صلعة؟

إرحموا من فى الأرض يرحمكم من فى الساء

و استروهم عشان ربنا يستركم.

[فــيــروز]

الاخ العزيز مكسوف ups:

اعتقد ان هناك فرق بين لقائنا ببعض كزملاء فى موقع لا يفترض ان يعنى شكلى -مثلا- بالنسبه لاحد اى شئ لانه ليس بيننا مشروع زواج .. فشكلى فى هذه الحاله او حتى العيوب الظاهره او الخفيه فيه لا تعنى احد ولست ملزمه بذكرها لاحد !!

لكن فى الزواج .. الشخصيه و الاخلاق و الاسره و العائله و ... الشكل كلها معا تمثل حزمه واحده .. يتقبلها الطرفان كلها على بعض او لا يتقبلاها .. وليس من حق اى طرف ان يخفى عيب فيها لان كل انسان حر فى ان يختار لنفسه ما يشاء ..

صدقنى انا والله العظيم لا اقصد ان اتحامل على الزوجه .. لسبب بسيط ان شكل الانسان بالذات ليس من اختياره ولا ذنب لاحد فى شكله .. لكن الم يكن من الافضل -للزوجه تحديدا- ان يكون هناك مصارحه قبل الزواج بدلا من هذا الموقف؟

واحده متجوزه واحد و عارفه ان ما جذبه اليها هو شكلها بالدرجه الاولى "افترض هذا نظرا لتفاوت المستوى التعليمى بينهما" كيف يمكن ان تظن انه سيغفر لها مثل هذا الامر !! :unsure:

[maksoof]

الاخ العزيز مكسوف ups:

اعتقد ان هناك فرق بين لقائنا ببعض كزملاء فى موقع لا يفترض ان يعنى شكلى -مثلا- بالنسبه لاحد اى شئ لانه ليس بيننا مشروع زواج .. فشكلى فى هذه الحاله او حتى العيوب الظاهره او الخفيه فيه لا تعنى احد ولست ملزمه بذكرها لاحد !!

لكن فى الزواج .. الشخصيه و الاخلاق و الاسره و العائله و ... الشكل كلها معا تمثل حزمه واحده .. يتقبلها الطرفان كلها على بعض او لا يتقبلاها .. وليس من حق اى طرف ان يخفى عيب فيها لان كل انسان حر فى ان يختار لنفسه ما يشاء ..

صدقنى انا والله العظيم لا اقصد ان اتحامل على الزوجه .. لسبب بسيط ان شكل الانسان بالذات ليس من اختياره ولا ذنب لاحد فى شكله .. لكن الم يكن من الافضل -للزوجه تحديدا- ان يكون هناك مصارحه قبل الزواج بدلا من هذا الموقف؟

واحده متجوزه واحد و عارفه ان ما جذبه اليها هو شكلها بالدرجه الاولى "افترض هذا نظرا لتفاوت المستوى التعليمى بينهما" كيف يمكن ان تظن انه سيغفر لها مثل هذا الامر !!  :unsure:

يا فيروزتنا العزيزة

اللى أنا أقصده هو المثل الشعبى اللى س.س. ذكره. يعنى إنه ممكن يكون بيزعل حد عزيز عليه بدون أن يعلم. يعنى لو إحنا زملاء و أنا مثلا أعرج و سعادتك كتبتى حاجة فيها إهانة للعرج هل تعتقدى إنى سأعتبرك زميلة؟

خاصة إن ده عيب ربنا إبتلانى به و ماليش دخل فيه؟ فاللى أقصده هو إننا ممكن نجرح شعور ناس أعزاء علينا بدون أن نشعر أو بدون قصد.

أما بخصوص موضوع الزواج و الأسرة فأنا قصدى إن كلنا فينا عيوب و مش بتظهر إلا بعد الزواج و لكن بنتغاضى عنها لإنها ثانوية بالنسبة لمميزات تانية فينا. و لو ما كانش التغاضى عنها ممكن يبقى ننفصل بهدوء و من غير فضايح

"فأمسكوهن بمعروف أو سرحوهن بمعروف"

و جايز كان من الأفضل إنها تصارحه قبل الجواز و لكن أنا بحاول أفترض حسن النية و أقول إنها يمكن كانت بتأمل إنه يلاقى فيها صفات كويسة تخليه يتغاضى عن عيوبها.

مش يمكن لو كان سامحها و سترها كانت حتريحه (وتتغاضى عن عيوبه) ؟ هل دى تبقى أحسن و اللا واحدة مليانة شعر و ما تجيبش لجوزها و ولادها غير النكد و المصايب (زى اللى الدكتور رجب كتب عنها فى موقع آخر)؟

[فــيــروز]

شوف بقى يا استاذ مكسوف يا عزيزي :unsure:

انا شخصيا سعيده جدا ان هناك رجل شرقى يفكر بطريقتك و لديه رحمه و رافه تجاه شئ لا ذنب لهذه السيده فيه .. ولو كنت اتحدث عن رايى الشخصى فانا اتفق مع من قال ان موضوع الشعر لا علاقه له اطلاقا بجمال الروح و الطباع !! ويكفى جدا ان يجد الانسان شريك حياه شاريه "باحب الكلمه دى اوى" كى يضحى بالشكليات .. لاننا فى النهايه نعتاد الشكل مهما كان !! ولان ما يبقى هو الصحبه العطره و الذكريات الجميله بعيدا عن الشكل الخارجى ..

لكن ربما لا يكون رايى او رايك هو ما يهم صاحب الشان الذى رفع قضيه على زوجته لابرائه من النفقه و خلافه مما يتوقع دفعه لو حدث طلاق ..

الحقيقه بخصوص العيوب الجسديه عموما انا الحقيقه اتحرج بشده من الحديث له علاقه بالمواضيع دى حتى لا اجرح احد دون قصد .. وحتى النكت التى تسخر من بعض العاهات الحقيقه تشعرنى بالضيق لكن مش باحب اقلب الموضوعات كلها نكد ..

والله العظيم انا متعاطفه جدا مع هذه الزوجه من ساعة ما قرات الموضوع فى اخبار اليوم يوم السبت الماضى

لكن والله تعاطفى هذا هو السبب انى باقول كانت تصارحه من الاول اشفاقا عليها هى من هذا الموقف المؤلم لانى سهل جدا اضع نفسى مكانها و اشعر انى مرفوضه لشئ لا ذنب لى فيه .. موقف صعب على اى انسان

علاوة على حظها العاثر بوجودها فى مجتمع يأخذ بمظهر الإنسان أكثر مما يأخذ من جوهرة، أو تعاملة - فليساعدها الله ...

بالظبط .. فليساعدها الله و يجعل زوجها يترفق بها ..