السكن بالدور الأرضى ..والبحث عن دوبلكس بالتجمع

[وليد أهلاوى مصراوى]

أفكر مؤخرا فى الأنتقال للعيش بالتجمع الخامس .... وبدأت البحث عن دوبلكس أرضى ... ولكن أحد الأصدقاء عدد لى مساوىء للسكن بالدور الأرضى

فما رأيكم ؟ أرجو ممن يعيش بدور أرضى أن يشاركنى تجربته

الجزء الثانى من الموضوع أننى أبحث عن فيلا دوبلكس على أن تكون مساحه على الأقل 300 متر ...أرجو مراسلتى على الخاص لأى عرض ...وشكرا لكم

[طبيبة بالخارج]

انا اسكن في شقة ارضي و لكن بالسعودية و لكن انا فهمت السؤال في فكرة السكن في الأرضي عموما و لا قصد حضرتك الأرضي في التجمع فقط؟

على العموم انا اخترت السكن هنا في السعودية في الأرضي لأني لا احب طلوع سلالم كتيرة خصوصا و انا شايلة ابني الصغير او المشتريات الأسبوعية و كمان عشان الأولاد ما يشيلوش شنط المدرسة الثقيلة لأدوار عالية

كمان حولين الشقة في منور مفتوح (حوش) للعب الأولاد و انا اعرف ان اغلب الشقق الأرضي في التجمع معاها حديقة خاصة

و أنا شخصيا كنت عايزة اشتري شقة أرضي برضه في التجمع بس ربنا ما أردش

لأن المدن الجديدة تنظيم الشوارع و قلة الإزدحام و الحدائق حول المنازل حتمنع مساويء الشقق الأرضي داخل الأحياء القديمة و (قصدي الدوشة و الشقة بتكون مجروحة

و ممكن تركب حديد على الشبابيك من اجل الأمان

بس نصيحتي لو عايز دوبلكس بلاش تاخد معاه ارضي منخفض (البدروم) متهيألي العيشة فيه حتكون كئيبة و دخول اشعة الشمس فيه مش مضمونة ده غير قربه الشديد من الحديقة و موضوع الحشرات و الرطوبة بسبب مياه ري الحديقة

[وليد أهلاوى مصراوى]

متشكر جدا على تعليق حضرتك ... المشكله فى التجمع أن كل الدوبليكس أرضى منخفض ... وفعلا أكثر من صديق حذرنى منها

[Abo Yossef]

السلام عليكم

كانت لى تجربة بالسكن مرة بالدور الرابع لكن فى بلدى ثم إنتقلت إلى شقة بالدور الأرضى بالمدن الجديدة و الحقيقة فى فرق شاسع فما قالت الأخت طبيبة بالخارج إن طلوع السلم مشكلة يومية خصوصا إذا كنت تنزل عدة مرات باليوم مثلا للذهاب و العودة من العمل أو شراء إحتياجات المنزل أو الذهاب للمسجد لأداء فروض الصلوات

انا أجد المدن الجديدة أفضل فى السكن الأرضى من المحليات نتيجة للهدوء و مع ذلك من الأفضل ان يكون البناء للأرضى مرتفع قليلا عن الشارع كأن يكون فوق بدروم مثلا

لكن بصرف النظر عن إنصراف البعض عن الأرضى لكنه مريح فى إعتقادى خصوصا عند زيارة الأقارب من كبار السن

و الله الموفق

مهندس محمد

[moamana]

انا اسكن فى الارضى فى مصر

و طبعا دوبلكس الاول ارضى مرتفع و السفلى ارضى منخفض

المشكلة فى الجنينة الحشرات بس محلولة بالرش الدورى

المشكلة الاكبر الزيطة فانا اسكن فى المقطم حيث الهدوء و لكن ان تكلم البواب مع اولاده صباحا مسموع و بالطبع الشقة مسموعة فى الجراج جدا

لو الشقة مش بحرى هتبقى نااااااااار

و طبعا الجنينة عندك مكشوفة للادوار العليا فوقك او من العماير الاخرى

اسوا مشكلة الامان كل الابواب و الشبابيك و البلكونات لازم يكون عليها حديد مضمون جدا جدا

مما يجعلك تشعر انك فى سجن