كنت فين و بتعمل ايه ساعت ..............

[مغتربة]

بنى وطنى

احم احم

من الاخر كدا فى احداث كتير حصلت فى العشرين سنه الاخيره

يا ترى كل واحد فينا كان بيعمل ايه ساعتها

نسال عن حدث و بعد ما نجاوب كلنا عليه هننتقل للتانى

موافقين

يالله اول حدث سعيد امممم قصدى عصيب

محاوله اغتيال الرئيس مبارك فى اديس ابابا

فاكرينها دى الى قاعدوا يعيدوا علينا فيها اغنيه اخترناه كنوع من التعذيب لاننا لسه على قيد الحياه بعد المحاوله الفاسله

يا ترى كنت فين و بتعمل ايه لما سمعت اول مره عن الحادثه دى؟

[pink rose]

كنت قاعدة في البيت

و لما عرفنا فتحنا التليفزيون

و انا قعدت اعيط ما اعرفش ليه

خوفت على مصر هانعمل ايه ايه اللي هايحصل

لكن بعد ما وصل الكبير بالسلامة

و حكى اللي حصل

و قال ايه لقى ضرب نار على العربية قام قال للسواق لف و ارجع تاني يا بني

و حسسني ان اللي حصل ما هزش شعرة منه

:closedeyes: قولت يا ريته كان غار في داهية

[التونسى]

بنى وطنى

احم احم

من الاخر كدا فى احداث كتير حصلت فى العشرين سنه الاخيره

يا ترى كل واحد فينا كان بيعمل ايه ساعتها

نسال عن حدث و بعد ما نجاوب كلنا عليه هننتقل للتانى

موافقين

يالله اول حدث سعيد امممم قصدى عصيب

محاوله اغتيال الرئيس مبارك فى اديس ابابا

فاكرينها دى الى قاعدوا يعيدوا علينا فيها اغنيه اخترناه كنوع من التعذيب لاننا لسه على قيد الحياه بعد المحاوله الفاسله

يا ترى كنت فين و بتعمل ايه لما سمعت اول مره عن الحادثه دى؟

موضوعاتك كما اعتدناها جميله ومميزه وفيها تشغيل دماغ على اعلى مستوى .. المشكله بس انك بجد بتحرجينى وبتحرجى ناس كتيره عندها اعراض وبوادر الزهايمر .. الموضوع عايز ذاكره قويه .. لكن ححاول :closedeyes:

اناأفتكر انى سمعت بالخبر بعد حدوثه بفتره .. رغم انه كان مالى نشرات الاخبار .. عرفت عن طريق احد جيرانى بالشارع .. اللى لاقيته بيقولى على اللى حصل وكان منبهر اوى برد فعل الرئيس لما قال للسواق بكل هدوء وبرود اعصاب ((لف وارجع يابنى)) وكمان انبهر من رد فعل حرس الرئيس .. ولسه فاكره وهو عمال بيمثل ازاى حرس الرئيس اسقطوا الارهابيين بضرب النار .. هو كان بيحب افلام الاكشن والمسدسات وما شابه .. وكان بيحب صيد العصافير .. وكان مميز فعلا فى التنشين حتى لو كان بالاحجار

انا بقى بقترح بعض الاحداث لانى فاكر انا كنت فين وبعمل ايه ساعتها لانها احداث تاريخيه لا تنسى ..ومنها يوم اغتيال الرئيس السادات .. ويوم الزلزال سواء بتاع 1992 او بتاع 1997 .. ويوم تاهل مصر لكاس العالم 1990 ويوم فوز مصر بكاس افريقيا 2010 .. ويوم احتلال العراق للكويت .. ويوم سقوط بغداد

[se_ Elsyed]

محاوله اغتيال الرئيس مبارك فى اديس ابابا

كنت بأعمل في بنك الرياض بمحافظة الخفجي ... وتابعت الخبر في الفندق ... بس زعلت مش على مبارك .. لكن على مصر ..

-------------

ومنها يوم اغتيال الرئيس السادات

كنت تقريباً في خامسة أو ستة إبتدائي ... وما حدش يتتريق ... كنت رايح أستلف كتاب سلاح التليمذ بتاع بنت زميلتي ( مش عاوز تعليق وفوتها الله لا يسيئكم ) وسمعت قلبان في الشارع والناس بيقولوا الإرسال قطع وناس ضربوا نار على الريس في المنصة .

------------

ويوم الزلزال سواء بتاع 1992

كنت مسنتر نفسي وبأتفرج على فيلم مارلين مونرو " البعض يفضلونها ساخنة

some like it hot

كان بيتكلم عن الهوت تشوكليت طبعاً مش حاجه تانيه

.. ويادوبك ما عداش ربع ساعة من الفيلم اللي كان على القناة الثانية إلا وحسيت بالزنزان - على رأي الناس - ولقيت الكل بيجري ... وما جرتش انا وقلت اللي هايموت في البيت برضوا ممكن يموت في الشارع وعمارة تقع فوق نافوخه

-------------

ويوم تاهل مصر لكاس العالم 1990

في البيت وبصيت من البلكونة لقيت البشر كلهم بيصرخوا " جوهري جوهري هووو هووو "

-------------

ويوم احتلال العراق للكويت

سهران مع مجموعة أصدقاء مصريين على إمارتيين بيدرسوا في مصر .. وكلنا إتصدمنا ... وهما بالذات كانوا في منتهى الرُعب لإن فعلاً كان في تهديد لبلدهم جامد .

-------------

ويوم سقوط بغداد

هنا في الرياض وحدث تاريخي مؤسف ...

------------

ويوم فوز مصر بكاس افريقيا 2010

أنا وزهيري كنا بنتفرج في النادي الصحي بتاع فندق ماريوت

[عادل أبو عمر]

محاوله اغتيال الرئيس مبارك فى اديس ابابا كنت في الجيش .. كان يوم ربنا اللي يعلم بيه . كان جيشي في دهشور ( لا مية و لا نور) و رفعوا درجة الاستعداد و لبسنا الشدة التقيلة ... بالنسبة لي كان كأننا هنحارب ..

يوم اغتيال الرئيس الساداتصدق أو لا تصدق .. كنت بتفرج على التلفزيون و شفت الاغتيال لحظة بلحظة ع الهوا لغاية ما فصلوا الإرسال ....

الله يرحمه و يحسن ختامنا جميعا

[Dreamwithme]

موضوع جميل فعلا وعايز تشغيل مخ بس فعلا زي ما قال أستاذنا الفاضل التونسي

محرج للناس اللي عندها مبادئ زهايمر :o

محاوله اغتيال الرئيس مبارك فى اديس ابابا

كنت راجعة من امتحان الجبر ثانوية عامة وعرفت بس وقتها بصراحة مفكرتش في الموضوع خالص

عشان كانت دماغي في الامتحان خاصة إن الامتحان كان صعب جدا والناس كانت بتشتكي منه

وأنا كنت حاله كويس wst:: (مش عايزين قر :o :h!!!h: ) فكنت مبسوطة جدا ومفيش حاجة كان ممكن تعكر مزاجي

بس بعد كده طبعا اتضايقت علي صورة ومكانة مصر وإننا مبقالناش هيبة

ومنها يوم اغتيال الرئيس السادات

بصراحة أنا مش فاكرة لأني مواليد 78 فكنت صغيرة جدا

بس أختي الكبيرة دائما تحكي قدامي

إننا (أنا وهي ) كنا بنتفرج علي التليفزيون وشفنا المنظر بس أنا مش فاكرة خالص أي حاجة

ويوم الزلزال بتاع 1992

كنت رجعت من المدرسة وكنت نائمة الظهر

وصحيت مفزوعة من النوم وجريت مع ماما وأخواتي :o

ولاقينا ست جارتنا عجوزة مذعورة علي السلم

ولادها جريوا وسابوها فخدتها معايا وهي لغاية دلوقتي فاكرة لي الموقف ده B)

ويوم فوز مصر بكاس افريقيا 2010

ده بقي كان يوم مميز في حياتي لأن كان يوم مناقشة الماجيستير بتاعي :wub:

وكنت بتفرج علي الماتش وأنا قاعدة علي اللاب توب بأصلح حاجات في الرسالة

اللي الممتحنين عايزنها والتقارير الخاصة بالرسالة عشان لازم أسلمها تاني يوم

فكنت فرحانة إني خدت الماجيستير وفي نفس الوقت جو الماتش والأغاني والكلام ده

ياه يا مغتربة بتفكرينا بحاجات ..... جزاكي الله خيرا علي الموضوع

[pink rose]

يوم اغتيال الرئيس الساداتصدق أو لا تصدق .. كنت بتفرج على التلفزيون و شفت الاغتيال لحظة بلحظة ع الهوا لغاية ما فصلوا الإرسال ....

نفس الحكاية

كنا قاعدين بنفطر انا و ماما وبابا و بنتفرج على التليفزيون و شوفنا اللي حصل لحد ما قطعوا الارسال

انا كان عندي وقتها 4 سنين و لسا فاكرة كويس جدا اللي حصل

سبحان الله في حاجات ما بتتمحيش من الذاكرة بسهولة

[مغتربة]

عشان كانت دماغي في الامتحان خاصة إن الامتحان كان صعب جدا والناس كانت بتشتكي منه

ايه دا نتى شكلك كنتى فى التخته الى جنبى و لا ايه

لكن الغريب بقى ان انا الجبر برضه بالنسبه كان جميل و جبت فيه درجات جميله

لكن كله كوم و الكيكانيكا بقى كوم دى الى جابت مجموعه لمس اكتاف هيه و التفاضل

يالله ايام

[مغتربة]

بنى وطنى

احم احم

من الاخر كدا فى احداث كتير حصلت فى العشرين سنه الاخيره

يا ترى كل واحد فينا كان بيعمل ايه ساعتها

نسال عن حدث و بعد ما نجاوب كلنا عليه هننتقل للتانى

موافقين

يالله اول حدث سعيد امممم قصدى عصيب

محاوله اغتيال الرئيس مبارك فى اديس ابابا

فاكرينها دى الى قاعدوا يعيدوا علينا فيها اغنيه اخترناه كنوع من التعذيب لاننا لسه على قيد الحياه بعد المحاوله الفاسله

يا ترى كنت فين و بتعمل ايه لما سمعت اول مره عن الحادثه دى؟

موضوعاتك كما اعتدناها جميله ومميزه وفيها تشغيل دماغ على اعلى مستوى .. المشكله بس انك بجد بتحرجينى وبتحرجى ناس كتيره عندها اعراض وبوادر الزهايمر .. الموضوع عايز ذاكره قويه .. لكن ححاول :closedeyes:

اناأفتكر انى سمعت بالخبر بعد حدوثه بفتره .. رغم انه كان مالى نشرات الاخبار .. عرفت عن طريق احد جيرانى بالشارع .. اللى لاقيته بيقولى على اللى حصل وكان منبهر اوى برد فعل الرئيس لما قال للسواق بكل هدوء وبرود اعصاب ((لف وارجع يابنى)) وكمان انبهر من رد فعل حرس الرئيس .. ولسه فاكره وهو عمال بيمثل ازاى حرس الرئيس اسقطوا الارهابيين بضرب النار .. هو كان بيحب افلام الاكشن والمسدسات وما شابه .. وكان بيحب صيد العصافير .. وكان مميز فعلا فى التنشين حتى لو كان بالاحجار

انا بقى بقترح بعض الاحداث لانى فاكر انا كنت فين وبعمل ايه ساعتها لانها احداث تاريخيه لا تنسى ..ومنها يوم اغتيال الرئيس السادات .. ويوم الزلزال سواء بتاع 1992 او بتاع 1997 .. ويوم تاهل مصر لكاس العالم 1990 ويوم فوز مصر بكاس افريقيا 2010 .. ويوم احتلال العراق للكويت .. ويوم سقوط بغداد

استاذى الفاضل دايما ردودك بتحط لبنه كانت ناقصه علشان الموضوع يكمل

انا فعلا كنت هحط الاحداث الى ذكرتهم ما عدا الرياضيه علشان انا ملياش قوى فيها الصراحه

لكن قلت بدل ما نشتت الناس نحطهم واحده واحده

و فيه حادثه تانيه مهمه و هى احداث 11 سبتمبر

يا ريت الكل يشاركنا و يقولنا استقبل الخبر ازى

تحياتى

[مغتربة]

ومنها يوم اغتيال الرئيس السادات

هو فعلا حادث مهم جدا و اتمنى فعلا من كل الى عاصروه انهم يوصفولنا ازاى استقبلوه

انا طبعا مش فاكره اى حاجه عنه لانه كنت اقل من 3 سنين ساعتها

بس فعلا حابع اعرف الناس اتعاملت مع المفاجاه ازاى خصوصا انه كان منقول على الهوا

[nightmare]

موضوع رائع أ. مغتربة.

محاوله اغتيال الرئيس مبارك فى اديس ابابا

كنت مزوغ من المدرسة وبلعب كورة مع اصحابي:closedeyes: , ولما رجعت البيت عرفت بس ما كنش فارق معايا لانى كنت مشغول بالتفكير ازاى اقول لماما على موضوع الجزمة اللى اتقطعت يومها:unsure:

يوم اغتيال السادات

اه فاكره كويس قوي , كان عندي 5 شهور وماما وقتها كانت بتغيرلي الكفوله:baby:

يوم الزلزال بتاع 92 , ده كان عسل

كان عندنا درس انجليزي في بيت واحد صاحبنا بعد المدرسة على طول , وانا قاعد في الدرس جعان جدا , اول ما جه الزلزال البيت كله طلع يجري واولهم المستر , وانا قعدت زي الباشا وبكل برود شلت الجاتوه بتاع المستر وكلته وكنت في قمة السعادة.et:(

فوز مصر بكأس افريقيا 2010

وده يوم يتنسي , في اليوم ده قلبت الشركة كلها راساً على عقب , كنا في الشغل ومش عارفين نسمع الماتش ازاى , فصلت النت عن اجهزة الشركة كلها ما عدا جهازى ووصلت جهازى بالبروجكتور وكل المصريين اتلموا بما فيهم المدير نفسه واتفرجنا عليه كلنا في الشغل وكإننا قاعدين في سينما , وبعد الجون أحضان وقبلات , وخرجنا بعد الماتش بالعربيات في شوارع جدة بالأعلام المصرية والسعودية وكان تجمع رائع للمصريين على الكورنيش وطبل وزمر للصبح, يارب يكثر أفرحنا بس في حاجة جنب الكورة بقي.bnd5::

مع تحياتي

تم تعديل 29 نوفمبر 2010 بواسطة nightmare

[رضوي]

كعادتك يامغتربة

مواضيع مبتكرة ومشاركات مميزة

بس وبعدين بقي ........ مابلاش ترجعوا اوي في التاريخ ......... خلينا في الحديث شوية

محاولة اغتيال الرئيس مبارك في اديس ابابا ؟؟؟؟؟؟

مش فاكرة اوي ........ بس اللي فاكراه دعاء الشعراوي -رحمه الله- واللقاء بينهم .......... كنت بتفرج ع التليفزيون مع بابا وجدو ....... وماكنتش فاهمة اوي يعني .....

زلازل 92

ايوة انا فاكرة اليوم دة ....... لأني كنت في اول سنة ف المدرسة ....... و لاقينا الدنيا اتقلبت والناس بتجري ...... وانا والعيال مش عارفين ايه اللي بيحصل اساسا ....... وبنجري وخلاص ....... بس ماخوفتش خااااااالص كنت مندهشة بس ....... لحد لما بابا جه ولاقيته بيدور عليا واول ماشافني خطفني من وسط العيال وروحنا ع البيت ......

( كنت متضايقة اوي من لون لبس المدرسة ايون اليونيفورم ........ كحلي ..... ياسااااااتر )

فوز مصر 2010

أيون فاكراااااااااااه اتجمعنا حوالين التليفزيون ......... واتشدينا اوووي جدا للمباراه

بعد المباراه بقي ......... حسيت اد ايه كان نفسي اكون في وسط البلد في وقت زي دة علشان اشوف الفرحة ليف مش من التليفزيون بس

[م تيمور المراغي]

موضوع متميز يا مغتربه كالعاده ,,

محاولة اغتيال مبارك ,,

كنت ماشي في الشارع و شفت الخبر في التليفزيون ,,

انا كنت فاكر ساعتها ان الحرس الخاص بيه هما اللي ضربوه بالنار ,, وكنت حزين اوي ان ازاي اخلص الناس اليه يعملوا معاه كده ,,

ورغم ان الحقيقه انهم هم اللي دافعوا عنه وحموه ,, لكن فضل احساس الحزن ده مخيم على قلبي كام يوم ,,

زلزال 92 ,,

كنت في ثانيه عماره هندسة القاهره وكان عندنا تسليم مشروع وكل الدفعه قاعدين بيبيضوا ,,

المهم ببص لجنبي وبقول لزميلتي يا فلانه بلااش هزار ما تهزيش الديسك الخطوط بتتلخبط

بصيت لقيت فلانه دي مش موجوده والديسك بيتهز لوحده

على لاحظ لو انتم فاكرين كان قبلها بيوم التلفزيون عرض فيلم " كراكون في الشارع " اللي في بدايته العماره اللي ساكن فيها عادل امام وقعت

كنت اول واحد جري من السيكشن لاني كنت فاكر ان المبنى بينهار ,,

و طبعا كمهندسين استخدمنا سلالم الطواريئ بشكل آلي وبقينا زعلانين اوي ان مبنى عماره الجديد حيقع بقى كده ده لسه مفتتحينه السنه دي

طبعا زميلاتي مسكوني تريقه اني اول واحد جري كان انا ,, بس انا اعتبرتها سرعة رد فعل ليس الا ,,

ذكريات ذكريات ,,, :happy:

[jonathan]

مساء الخير و اتمني تقبلوا مشاركتي في الموضوع دة..بصراحة هو موضوع خفيف و شيق ..انا متذكر معظم الاحداث اللي ذكرتوها لاني كنت معاصرها..بس في حدث منهم مازال مرتبط بذاكرتي لانه كان كوميدي في وقت ابعد ما يكون عن الكوميديا..كان في زلزال 92 و انا فاكر كنت لسة راجع من المدرسة و داخل انام ..و في لحظات القيلولة الاولى و حسيت ان السرير بيتهز بشدة كما لو كان مراجيح السبتية..فالتفيت بظهري و متوقع حد من اخواتي بيهزر مثلا ..و اذ تقع عيني على النجفة..و خير اللهم اجعله خير الاقيها بتتمرجح شمال و يمين (بالظبط مشهد النجفة في فيلم ريا و سكينة..من غير طبعا الوجه الصبوح لزوزو الحكيم و نجمة ابراهيم..ما هي مش ناقصة رعب) و لقيت الدولاب بيتحرك في اتجاهي و وراه المكتب كما لو كنت بصور الجزء التالت من فيلم terminator: rise of machines ...طبعا جريت على برة جري..لقيت والدي ووالدتي و اخواتي بيجروا على السلم..مش عارف نسيوني ولا ايه..و هنا كان الجزء الاكثر كوميدية في الموضوع..لقيت الجار الساكن بالدور الارضي بيجري برة العمارة و بينادى على زوجته..و لانه كان بيشتغل كاتب في المحكمة فكان الظاهر بينادي و هو متاثر بطبيعة عمله..اذ وجدته و في مشهد تراجيدي ينادي بعلو الصوت و يقول..يا منيييييره..يا منييييييييره(بكسر الميم و النون) البيت ايل للسقوط..

تم تعديل 29 نوفمبر 2010 بواسطة jonathan

[Scorpion]

حرب 67 ...

ذاكرتي عاملة فلاش علي شقة صغيرة في دور أرضي ... ازاز مدهون ازرق و عليه لزاق ورق ... واحد عمال يقول طفوا النور .. و جيراننا كلنا نازلين عندنا .. و الكل بيصلي قدام صورة للعدرا ...

موت ناصر

اختي بتلعب الحجلة مع صاحباتها و انا في الشارع بلعب نقرة و شبر بنوي المشمش علشان الوالد ما كانش معاه يكفي اني اشتري بلي ازاز زي اللي مع مصطفي خطاب و عاطف جرجس ...

اكتوبر 73

بلعب بنك السعادة مع اختي .. و الوالد خلاني اسيب اللعبة بالعافية و هبدني قدام التليفزيزن ( ماركة باي ابيض و اسود ) علشان اتفرج علي اللي بيحصل و هو بيقوللي افتكر اليوم ده .. افتكر اليوم ده ..

للأسف انا فاكر الموقف ده .. لكن مش فاكر كان فيه ايه في التليفزيون ..

اغتيال السادات

كنت في رحلة مع النادي للعين السخنة و سمعنا الخبر في راديو الأوتوبيس و احنا راجعين ...

بصراحة ما كانش فيه اي تأثير عليا شخصيآ سواء سلبي او ايجابي .. لكن اللي فاكره هو بكاء متواصل من بنت كانت معانا اسمها ميشا ...

الزلزال و محاولة اغتيال مبارك .. كنت في ايطاليا و شعوري بالقلق كان رهيب ساعة الزلزال بس ....

11 سبتمبر 90

كنت في الشغل و فجأة لقيت عميلة امريكية بقميص النوم منهارة قصادي و عمال تعيط و تصرخ و تقول نشرة الأخبار نشرة الأخبار و تشاور علي أوضتها ... في الأول افتكرتها غير متزنة نفسيآ لكن لما فهمت اللي حصل قلت اتنفخنا و الحمد لله ...

ربنا يسامحك يا مغتربة قلبتي عليا شوية مواجع

[التونسى]

شكرا اختى الفاضله مغتربه على ذوق ردك

انا بقى اقترحت الاحداث بس نسيت اقول كنت فين وبعمل ايه ساعاتها :unsure:

يوم اغتيال السادات انا فاكره كويس جدا كأنه لسه حاصل امبارح .. كنت ساعتها فى سنه تانيه ابتدائى .. وكنت فى البيت ..وكانت ماما ونينتى وواحده قريبتى كبيره فى السن بيتفرجوا ..وانا مكنتش فى دماغى .. وفجأه لما حصل الاغتيال.. عرفت بيه لما لاقيت الكل بيبكى بحراره غريبه تبين قد ايه الراجل ده على قد ما اتصرف تصرفات غلط قبل ما يتم اغتياله .. على قد ما كان محبوب من ناس كتير .. وعلى فكره يوميهانزلت رحت لواحد صاحبى فى المدرسه وهو اسمه ايهاب وهو دلوقتى فى هولندا .. ولاقيت عينيه متورمه من البكى والبيت عنده فى حالة حداد بجد

يوم زلزال 1992 وزلزال 1997 انا محستش بيهم خالص رغم ان بقية الناس حست بيه .. لكن تقريبا لاننا كنا ساكنين فى الدور الاول وبيتنا كان من البيوت الخشب القديمه الكبيره والمتينه فى نفس الوقت محسناش بيه .. انا بقى فى الزالزال بتاع 97 عندى حكايه طريفه .. لانى كنت نايم وقتها وبعدين صحيت اتنين الضهر كان عندى محاضره فى الكليه .. المهم كنت خارج فى الشارع وحاسس بشئ غير طبيعى مش قادر افهمه .. الناس وجوهها مكفهره .. وحركة المرور مش منتظمه .. وصلت الكليه لاقيت برده الاجواء غريبه .. وحركه غير عاديه ..والناس بتتكلم فى موضوع مش مفهوم ليا .. فسالت واحده زميلتى((اسمها كان كان غريب شويه ( نجوان)... )) من بلد اسمها ابو كبير ..سالتها هو فيه ايه الدنيا مقلوبه ليه .. ردت عليا بسخريه وضحكه مش قادر انساها لحد النهارده :closedeyes: .. انتى يابنى كنت فين.. وجاى منين . دا كان فيه زالزال .. كان شكلى وحش يوميها.. ووكنت مثار للتعليقات الكوميديه من قبل باقى افراد الدفعه :blush2:

يوم مباراة مصر وغانا فى نهائى كاس افريقيا 2010 كنت فى انجلترا ساعتها وكنت حتفرج على المتش لوحدى على النت .. قوم ايه صديق مصرى يتصل بيا اجى اتفرج معاه لان زوجته الانجليزيه خرجت تزور مامتها .. يعنى براحتنا بقى نشجع وننفعل ونتعصب ونصرخ لو لزم الامر بدون اى تحفظات .. وهو ما كان فعلا .. انا افتكر ساعة احراز جدو لهدف الفوز قعدت اتمرمغ زى المجنون فى الارض وفرحت بشكل هيستيرى .. وبعد المتش نزلنا بالعربيه وشغلنا اغانى مصريه باعلى صوت وفضلنا نسقف ونغنى

يوم 11 سبمتمبر 2001 انا كنت فى شرم الشيخ وتحديدا فى احد فنادقها الخمسة نجوم وبشكل اكثر تحديدا كنت فى قاعة الجيمانزيوم الخاصة بالفندق .. وكان فيه ثلاث شاشات كبيره .. وفجأه نلاقى البث بتاع ضرب الابراج .. يوميها كان فيه مدير انجليزى المسئول عن القاعه واقف قدام الشاشه متسمر كانه تمثال .. مش قادر يصدق اللى حصل .. بصراحه كان يوم عصيب جدا جدا .. لان شرم كلها سياح اجانب . وناس كتير كانت عايزه تلغى رحلاتها وترجع

[جسار]

- أيام نكسة 67 كنت مخلص وقتها أمتحانات القبول وأتفرجت فى التليفزيون الكبير الموبيليا

على حمدى قنديل وهو بيذيع من على كوبرى الفردان وارتال الجيش بتتحرك فى اتجاه سيناء

وبعدها بكام يوم كنت وصيديقى نسير بجوار جامع السيد البدوى وسمعت الراديو يذيع البيانات

العسكرية وسمعت كلمة الدفاع عند ممر الكونتيلا وكنت بأحب الجغرافيا وقوى جدا فيها وأستغربت

وقلت لصديقى هى الكونتيلا دى مش جوه سيناء أمال بيقولوا دخلنا حدود اسرائيل ازاى ؟!!!

- يوم التنحى لعبد الناصر كان يوم مؤثر جدا واللى فاكره أنه قال كلام مفهمتش منه الا ان والدى

وكان رجلا صعيديا من ذوى البأس يجرى فى الصالة وهو يبكى هو واخوتى الكبار وكتبولى تلغراف

ذهبت به للسنترال و أرسلته ببطاقة والدى موجها لناصر نرفض فيه التنحى وبعدها سرت فى مظاهرات

حاشدة حتى اليوم التالى ولم اذهب للبيت ألا للحصول على وجبة طعام سريعة وعن اخى الاكبر الذى سافر

مجانا على ظهر قطار الى القاهرة وشارك فى المسيرات الحاشدة هناك .

- يوم مقتل السادات كنت فى كلية هندسة القاهرة - مش فاكر فى سنة كام خلى الطابق مستور - وكنت

من المعارضين لسياساته وتفرجت على العرض العسكرى فى تليفزيون احد الاصدقاء فى بيت عيلته وكنا

شلة كبيرة حوالى 8 أشخاص كلهم بيلعبوا كوتشينة واللى بيقرا الجرنال وأنا لوحدى اللى قاعد مادد

بوزى فى التليفزيون وسمعت صوت الطلقات وقفزت فجأة وبصوت عالى قلت هييييه أنقلاب يارجاله وعقبال

ما افاقوا من ذهولهم الأرسال قطع وجابوا فيلم لنبيلة عبيد ، وجرينا على اذاعة مونت كارلو وسمعنا

الخبرعلى الساعة 4 العصر ، وذهبت الى المنزل وانا ارتجف من الانفعال ووجدت والدتى تطلب منى ان أذهب

لاحضر التليفزيون الجديد اللى موصية عليه من أسبوع وطبعا التليفزيون كان وشه حلو خالص فاول ما فتحناه

ما جابش ألا مارشات عسكرية وقرآن لمدة اربعين يوما متصلا .

- يوم زلزال 92 كنت فى مامورية عمل بفنار بور سعيد وكنت اتناول غذائى بمفردى فى الفنار ولم احس باى شئ

ألا عندما سمعت صوت سارينة عربية الشرطة بالخارج وصوت احدهم ينادى بالخارج ففتحت البوابة ووجدت امين شرطة

يسألنى هو مش ده مبنى هيئة الزلازل ؟ وتعجبت من سؤاله وأشار الى صوارى اللاسلكى وأجهزة ألكترونية أخرى فرردت

بالنفى وسالته ما الخبر قال لى هو أنت نايم البلد حصل فيها زلزال وبهدل الدنيا وخلانى أغرم جنيه بحاله علشان

اتصل بالبيت وأطمأن عليهم

- يوم حادثة تدمير البرجين كنت فى قلب البحر الاحمر فى جزيرة اسمها الأخوين - يمكنكم معرفة مكانها من الاطلس-

وعرفنا من التليفزيون بالاخبار وطبعا قعدت انا وزميلى و3 جنود حراسة فرحانين ومزقططين وواحد قام يرقص عشرة بلدى

حتى وصل جروب سياحى من هواة الغطس على يخت فاخر كنا نعرف طاقمه ونزل بعضهم لأرض الجزيرة لمشاهدة الفنار

وحضر معهم مدرب الغطس السويسرى وبمنهى العبط والهبل ترجمت له ما حدث وصورت له المشهد مستعينا بتشبيه فيلم

يوم الاستقلال الامريكى ولخيبة أملنا وجدناه مذعورا ومصدوما جدا ولم يصدق الا عندما شاهد التليفزيون بنفسه

وأبلغ المجموعة معه وسرت همهمة بينهم وسرعان ما غادروا الجزيرة وبسرعة بالغة قصدوا اتحاه ميناء سفاجة .

كفاية كده أحسن تعبت ، وأشكركم لاستدعاء جزء من أرشيف ذكرياتى .

[عمرو ياسين]

انا ساعتها كنت في البيت بس عادي انتو عارفين الاعلام لو الريس صبعه اتعور هيحتفل كل سنه بسلامه صبعه ومش بعيد يخلوه اجازه كمان والعيال تسأل بعض بكره اجازه ليه يقولو عشان صبع الريس

[عصام أبوالفتح]

الموضوع شفته بالصدفه فى المواضيع المشابهة التى بتبقى تحت الصفحة . . موضوع هايل يا مغتربة

اسمحيلى اضيف لحظات الثورة الحاسمة واهمها لحظة تنحى مبارك لانها لحظة فارقة فى حياتى وافتكر حياتنا كلنا

ولكن تأدبا مع الموضوع هاحاول اشحذ زناد فكرى وافتكر انا كنت باعمل ايه فى الاوقات اللى ذكرتيها

زلزال 92 صحيت من النومم العصرية لما زهقت من اللى بيهزنى وفتحت عينيا ببطء وضيق ملقيثش حد قدامى خرجت اشوف مين اللى كان بيرجنى كده ملقيتش حد فى الشقة خالص والباب مفتوح وناس بتجرى على السلم لتحت .. مكانش فى اهتزاز فاستغربت بيجروا ليه لكن وراهم وبعدين الاقى الناس بتصرخ وبتبص للمأذنة اللى بتميل يمين شمال ووقعت دراويها على الناس اللى خارجين من صلاة العصر واصيب ناس كتير وماتت ام تيتو الله يرحمها ويحسن اليها

مقتل السادات فاكر انى شفته لحد ما الارسال قطع وفاكر عمى لما جالنا بالليل وحكالنا المشهد بالتفصيل

يوم 11 سبتمبر كنت فى الشغل وجه الخبر بالتلفون للمدير وجمعنا وقالنا . . جريت على الكاسيت بتاعى وفتحت الراديو وطرنا كلنا من الفرح يومها وقضيت باقى اليوم تليفونات تهنئة

يوم تنحى مبارك استدعيت اخويا وقضينا اليوم بالكامل احنا والعيال منتظرين وساعة الاعلان فرحة طاغية وطبل على السلم

ولمينا الجيران والعيال كانوا طايرين ونزلنا اشترينا شيكولاته جواهر خمس علب ووزعنا على كل الجنسيات فى الشارع وكلكسات بالعربية . . مفرحتش فى حياتى زى اليوم ده

[rewsha]

اسمحولي اقول على الاحداث اللي متذكراها دلوقتي

يوم زلزال عام 1992 كنت قاعده في الدرس في بيتنا وفجاْه لقينا الطربيزه بتتحرك :blink:

طبعا سمعنا الجيران بيقولوا زلزال .ونزلنا جري على السلم احنا كمان

ومن اللطيف قوي اني وانا نازله كنت مصممه البس الصندل بتاعي واربطه كويس (وماما) قعدت تزعق لي وتقول لي اجري بسرعه

وانا مصممه (علشان شكلي قدام الناس وانا نازله

ولما نزلت ,لقيت ناس نازله بالروب وناس حافيه و...و...

ولما طلعنا بعدها ,اكتشفنا ان بنت اختي الصغيره (7 سنوات) كانت قاعده تلعب في البلكونه واحنا نسيناها ونزلنا ولما طلعنا لقيناها بتقول (هوه في ايه) انتوا كنتوا بتجروا ليه وقاعده تستغرب لينا

ولما كبرت وكنا بنتذكر سوى اليوم ده

اعترفت لي انها كانت واخده علبة الالوان بتاعت اخوها من وراؤه وبتلعب بيها في البلكونه علشان كده ماحدش شافها ولا كان يعرف هيه فين

اما يوم 11 يناير (يوم التنحي )

كنت في خطوبة بنت جارتنا على صديق ابن اختي(في منزل العروسه)

وذاعوا خبر التنحي ساعة تلبيس الدبل .واول ما سمعنا الخبر سيبنا العروسه والعريس وجرينا كلنا على التلفزيون

وكان موقف لاينسى

وبعد ماالخبر اتذاع رجعنا لهم تاني في الرسيبشن علشان يكملوا تلبيس الدبل

الصدفه الغريبه بقى انها كانت متوقته بالظبط مع وقت لبس الدبل بالظبط