حوار عربى مع جوليات اسانج مؤسس موقع ويكى ليكس

[aimen]

لقاء مع مؤسس ويكيليكس لتأسيس ويكيليكس العربية

سامي البحيري

http://www.elaph.com/web/templates/article2010.aspx?articleid=615134

جوليان آسانج مؤسس موقع ويكيليكس مطلوب من السويد بتهمة الإغتصاب ومطلوب من المخابرات المركزية الأمريكية ومطلوب من البنتاجون ومطلوب من العديد من الأنظمة العربية والآن أصبح مطلوبا من الإنتربول، وفجأة أصبح مستر "جوليان آسانج" المجرم رقم واحد فى العالم الكل يريد رأسه ولا أحد يعرف مكانه الآن على وجه التحديد، حتى سويسرا رفضت أن تعطيه حق اللجوء السياسى، (الإكوادور) بلد أمريكا الجنوبية الوحيدة التى وافقت على منحه حق الإقامة بها وذلك نظرا لعدائها لأمريكا.

وقد ولد جوليان عام 1971 فى إستراليا وقام بتأسيس موقع "ويكيليكس" عام 2006، وتخصص فى نشر الوثائق السرية من حول العالم وبخاصة الوثائق السرية لوزارة الدفاع الأمريكية والوثائق السرية لسفارات أمريكا حول العالم والتى مازالت تحدث دويا حتى الآن.

http://wikileaks.org/

ومنظمة ويكيليكس هى منظمة (لا ربحية) أى أنها تعمل لوجه الله والحقيقة وليس بغرض الربح، وهو نوع جديد من الصحافة الإلكترونية الذى يعتمد على الوثائق ولا شئ غير الوثائق، وهم لا يصرحون أبدا عن مصدر معلوماتهم التى ممكن أن "تودى فى ستين داهية" .

وقد حاولت لقاء مستر جوليان لعمل حديث صحفى معه، وأخيرا وبمساعدة أحد الإصدقاء المشتركين تقابلنا فى مكان سرى بالكرة الأرضية، وكان هذا الحوار:

- صباح الخير مستر آسانج

- صباح الفل

- إيه شكلك كده مش عاجبنى

- بقالى 72 ساعة ما شفتش النوم ياسامى ياأخويا

- ليه بس سيبك، الأعمار بيد الله

- ما هو ده إللى مخوفنى، لو كانت الأعمار بأيدينا ما كنتش أخاف

- بقى ياراجل تعمل كده فى الست هيلارى كلينتون؟ دى ست زى السكرة وتتحط على الجرح يطيب؟ دى واخدة على خاطرها قوى منك.

- والله أنا ما جبتش حاجة من عندى، كله بالوثائق.

- الله يخرب بيتك ياجوليان، جبت الوثائق دى منين: ربع مليون وثيقة وكل وثيقة تنطح وثيقة

- إنت عارف أنا كنت بأشتغل كومبيوتر (هاكر) قبل كده

- (هاكر) يعنى إيه

- يعنى كنت أقدر أدخل على الكومبيوتر بتاعك فى بيتكم وأقدر أحط فيروس يخسرك كل معلوماتك

- وليه بس الأذية دى

- شقاوة عيال، بعد كده قررت أفضح كل العالم المنافق إللى بيظهر غير حقيقته

- لكن إنت مش معايا، إن السفارات والجيوش وكثير من الجهات من حقها أن يكون لها أسرارها وخصوصيتها، ومش معقول إنك خليت الأسرار دى متاحة لكل من هب ودب؟؟

- الأسرار دى هم إخترعوها للتحكم فى مصائر الشعوب من خلف الكواليس ولكى يظلوا فى مركزالقوة، الحرامية والنصابين هم الوحيدين إللى بيخافوا من الحقيقة

- يعنى إنت مثلا لو كانت لك صديقة فى السر ما تحبش إن مراتك تعرف عنها حاجة وتفضل إن المعلومات دى تظل بينك وبين صديقتك

- تمام أهو إنت جبت مثل كويس جدا، أنا لو رافقت بنت غير مراتى، طبعا ما أحبش مراتى تعرف، وده ليه لأنى إرتكبت جناية وهى جناية الخيانة، أنا عاوز الناس دى كلها تعلن لشعوبها كل ما تقوله وراء الكواليس ووراء الأبواب المغلقة، وكونهم يحاولوا الإختباء وراء كلام عن الدبلوماسية و (سرى للغاية) كل ده "حق يراد به باطل".

- بس إنت غيرت شكلك خاص يا جوليان، ربيت دقنك وقصيت شعرك وصبغته لون تانى، تفتكر يعنى المخابرات العالمية مش حتعرفك؟

- أنا بقال أكثر من شهر لا أنام فى المكان الواحد ليلتين ورا بعض، وأحيانا بأنام فى أكثر من مكان فى ليلة واحدة

- ياعينى عليك، ده إنت و لا بن لادن فى زمانه.

- أنا أخطر من بن لادن فى نظرهم، لأننى ممكن أدمر النظام الراسمالى من أساسه.

- يعنى إيه تدمر النظام المالى من اساسه؟

- أنا عندى دلوقتى وثائق ضد أكبر البنوك العالمية والأمريكية، ولما أنشرها الناس حتعرف الفساد الحقيقى داخل هذه البنوك، إللى هى عماد النظام الراسمالى، عشان كده سارة بالين فى أمريكا بتطالب براسى وكل محافظين أمريكا، وآخرهم أوريلى بتاع الفوكس نيوز إللى أطلق على ّ ألفاظ يعاقب عليها القانون

- أنا سمعت إن فيه بعض الجهات عرضوا عليك ملايين الدولارات عشان تسكت

- ده حقيقى، لكنى مش حأقول عنهم فى الوقت الحالى

- ليه ياجوليان (سرى للغاية)، ده إنت شغلتك كشف الأسرار.

- لأ مش وقته، وأنا ما أحبش أنشر أى شئ بدون توثيق، عشان كده ما فيش حد أبدا قدر ينكر أى وثيقة من بتوعى

- طيب دلوقت أنا عاوز أعرض عليك مشروع هايل

- خير

- إيه رأيك نعمل ويكيليكس عربية ويكون هدفها فضح الأنظمة العربية ومن يساندها

- عاوز تفضحكم أكثر من كده إيه بس، دى أنظمة فضيحتها بجلاجل فى العالم كله

- لأ ... بجد عاوزين نكشف كل الأوراق المستخبية عندنا زى ما عملتها فى هيلارى كلينتون وامريكا.

- أمريكا والغرب عندهم مؤسسات بتحاسب على الأخطاء وفيه رؤوس بتطير عند المحاسبة، عندكم هنا الناس قاعدة على كراسيها ولا يمكن تتحرك ولا بالطبل البلدى، ما يحركهاش إللا الحانوتى.

- يعنى لو سربت لنا شوية أسرار عربية من إللى قلبك يحبهم مش ممكن تصحى الشعوب شوية

- الشعوب عندكم ما فيش حاجة ممكن تصحيها لأنها فى غيبوبة دائمة مثل غيبوبة أريل شارون، وإذا صحيت فتصحى شوية عشان تاكل وتشرب وتحشش وتمارس الجنس (إن أمكن) وإن لم يتوفر فتمارس التحرش الجنسى والعادة السرية وترجع تانى للغيبوبة

- لكن أنا برضه بيتهأ لى إذا أمكن كشف أسرار الصفقات المشبوهة والعلاقات الدولية المشبوهة فى بلادنا حتثير همة الشباب

- الشى الوحيد إللى بيثير الشباب عندكم هو الفرجة على فيديو كليب هيفاء وهبى وروبى .

- يعنى فى رأيك عمل ويكيليكس عربية ما فيش منه فايدة؟

- لأ طبعا... وبعدين البوليس والمخابرات عندكم ما فيش عندهم يا أمه إرحمينى، يعنى لو إتمسكت فى السويد (مهما كانت التهمة) فأنا عارف إنى حتعامل بإنسانية سواء أثناء المحاكمة أو حتى لو أخدت حكم بالسجن، لكن عندكم عم رجب شاويش القسم ما عندوش تفاهم.

- يعنى رأيك أصرف نظر عن الموضوع؟

- طبعا ... أنت أحسن حاجة تعمل موقع جنسى بالعربى وده حيكون له شعبية خرافية!!