أه يافتيسي ياني

[ozoozo]

حبايبي الحلوين النهارده ابله فضيله هاتحكيلكم حكايه الشاطر اوزو مع فتيسه

كان مره من ذات المرات الشاطر اوزو ماشي بعربيته النيسان تيدا موديل 2008 ذات الجير الاوتوماتيك وبعدين بص في العداد لقي العداد داخل علي 80 الف كيلو قام قاللك بس ياواد دلوقتي لازم نغير زيت الجير زي ما الكتاب بيقول -حيث انه محسوك حبتين -ومتابع صياناتها زي الكتالوج بس بره الوكاله عشان ارخص. كان عنده خيارين

اول خيار:انه يروح ورشه عاديه وده هايكلفه شاكب راكب 200 ريال

تاني خيار:انه يروح التوكيل وده هايكلفه 1100 ريال

راح قال لنفسه ياواد وانت ليك كام فتيس يعني وبعدين فتيس الواحد ده زي عود الكبريت مايتفكش بره التوكيل ابدا وخصوصا لو كان اوتوماتيك

المهم ماطولش عليكم دخلتها التوكيل والعربيه بصحه جيده وزي الفل وما بتشتكيش من حاجه

واذ (فاجأتن)

اروح استلم المحروسه الفتيس مابينطقش تجيبه علي الدي العربيه مابتتحركش لازم تغيره مانيوال اول تاني وبعدين الدي تبتدي تمشي

طبعا عملتلهم فرح ادام الوكاله المهندس الهندي قعد يهز في دماغه ويقولي لا حبيبي هيا كان فيها خراب من الاول حبيبي قولتله وحياه ماما قالي خلاص احنا هانشحنها علي حسابك لجده ويصلحوها علي حسابك هناك لان مفيش حد بيفهم في الاوتوماتيك هنافروحت قولتله ...........حذف بمعرفه الرقابه

المهم روحت للمدير وجيت من عند المدير والمدير بيفطر-بيتغدي -بيصلي

بعدين جه المهندس الهندي مدير الورشه قاللي بص صديج انت اجنبي سيم سيم وانا عايز اساعد خلاص انا هابعتلك السياره علي حساب الشركه جده للتصليح قلتله لا ماتبعتهاش مجامله تبعتها حق عشان انتو اللي مبوظينها وتديني عربيه بديله لغايه ماتصلحوهاوطبعا رفض

انتظرونافي الحلقه القادمه

تم تعديل 5 ديسمبر 2010 بواسطة ozoozo

[ozoozo]

روحت كاتب اميل محترم وباعته للشركه الام في اليابان والمكتب الاقليمي للشرق الاوسط في دبي وللفرع الرئيسي في جده

وخدت العربيه ولفيت بيها علي الورش كل واحد يقولك انا اصلا مابفهمش في النيسان عايزني اصلح الجير كمان لغايه ماروحت لورش متخصصه في الجير فالولي تشتري جير جديد من التشليح ب4000 ريال وشغل ايد تركيب 2000 ريال يعني 6000 ريال واصلا عشان العربيه لسه نازله جديد مالهاش قطع غيار في التشليح يبقي تشتري جير جديد ب14000 ريال من التوكيل جديد

وطبعا العربيه ماتتبعش علي حالتها كده باكتر من 5000 ريال

في هذه الاثناء كانت الشكوي عملت مفعولها واتصلوا بيا قالولي هات العربيه نصلحهالك قولتلهم لا تجيبولي عربيه بديله لغايه ماتخلصوها -قصه جده دي هاتاخد شهرين علي الاقل -وانا هأجر عربيه علي حسابي ب4000 ريال في الفتره دي فقولت احاول اصلحها انا احسن وطبعا رفضوا موضوع العربيه البديله ده

قوم ايه الوكيل الاقليمي في دبي يكلمني امبارح ويتابع معايا الموضوع وقالولي خلاص هانديك عربيه لغايه ما تتصلح

المهم ربنا اكرمني امبارح بواحد ميكانيكي مصري غير متعلم بالمره يعني لا مهندس ولا حاجه

راح فاكك الجير وكانت المفاجأه

في مسمار مكسور من الوكاله وده السبب في المشكله كلها اشتريت مسمار جديد بريال واحد والراجل ركبهولي وخد 150 ريال (من اربعتاشر الف ل150 ريال)والعربيه ماشيه زي الفل ورجعت احسن من الاول

الكارثه الاكبر من المسمار اني لقيت الفلتر اللي انا دافع حقه مش متغير ............

[ozoozo]

الحمدلله بعد المشكله مااتحلت دلوقتي طبعا مش هاسيبهم علي الاقل اخد الالف ريال اللي غيرو بيها الزيت وبوظوا بيها العربيه فهاعمل كالاتي

1-انا كلمت مدير الصيانه في جده وقالي هانحقق في الموضوع

2- الصبح هاروح اعملهم فرح ادام الوكاله لغايه مايقولوا مشاوي علي طول الزمان

3-هاقدم شكوي للغرفه التجاريه

4-هاقدم شكوي لجمعيه حمايه المستهلك

مش عارف اعمل محضر في الشرطه ولا مالوش لازمه لان ده يعتبر غش عشان ماغيروش الفلتر اللي واخدين حقه ناهيك عن خراب السياره

حد عنده اي جهات تانيه ممكن اشحورهم فيها هي مش مشكله الالف ريال قد ماهي مشكله اني ابهدلهم شويه زي ماخلوني الف حوالين نفسي

ودي نصيحه لاي حد يفكر يروح التوكيل وخصوصا في القري والنجوع زي كفر ابو ابها نجع جيزان قريه ينبع الحضاريه وكل ماهو بعيد عن الرياض وجده والدمام -ده لو لقيت حد بيفهم هناك اصلا-

تم تعديل 5 ديسمبر 2010 بواسطة ozoozo

[mustafagamiel]

بواحد ميكانيكي مصري غير متعلم بالمره يعني لا مهندس ولا حاجه

راح فاكك الجير وكانت المفاجأه

في مسمار مكسور من الوكاله وده السبب في المشكله كلها اشتريت مسمار جديد بريال واحد والراجل ركبهولي وخد 150 ريال (من اربعتاشر الف ل150 ريال)والعربيه ماشيه زي الفل ورجعت احسن من الاول

ماشاء الله عليه

هو انت كده زي الفل اوووي وشكلك هتاخد تعويض محترم وشامم ريحة ليكزسس في الطريق اليك

مبروووك مقدما

[akramgroup]

انت كمان عاوز جهات تانيه تشحورهم فيها

ده التوكيل صعب عليا من كتر اللى هاتعمله فيهم

بعيدا عن الهزار

احسن حل اللى انته عملته بتاع ايميل اليابان ده

تصرف احييك عليه

[raouf]

شوف يا ريسنا فى الوطن العربى لا يوجد اى معنى ولا سلطة لحماية المستهلك لان اصلا لا يوجد احد يهمه حماية المستهلك

هذا اولا

افضل شىء عملته انك راسلت الشركة الام

موضوع الوكالات هنا فى السعودية مصيبة سودة فعلا يعنى تدفع فلوس ومضاعفة فى مقابل خدمة سيئة

موضوع ان الحمرانى بيحاسبك على قطع غيار ومش بيحطها سمعتها فعلا من كذا شخص

وموضوع ان العمالة بتاعته تعبانه برضه موجودة والدليل عدم قدرتهم على تغيير زيت وفلتر وده كارثة

على فكرة تغيير زيت الجير والفلتر لاى سيارة مش معقد زى ما انتم متصورين

اللى صعب هو تغيير زيت الكرونة

المهم نرجع لموضوعك اخرك بالظبط انك تاخد فلوسك اللى دفعتها وتحاول تاخد صيانة مجانية مرة كتعويض واكثر من ذلك مش هاتطول حاجة

[ozoozo]

المشكله بقي انك تثبت انهم فعلا ماغيروش الفلتر ويدخلوك في متاهات انا مش عايز الفلوس قد ماعايز أذيتهم بصراحه

النهارده روحت الوكاله وكلمت مدير الفرع بصراحه راجل محترم وكتبت شكوي وقدمتهاله وقالي هانبعتها جده واول مايوفقوا هانديك فلوسك

المهم وانا ماشي قلت اعدي علي الراجل الهندي اللي عامل نفسه مدير كبير اتسلي عليه شويه وابينله انه حمار

طبعا مارضيش يسلم عليا -ده دليل انه اتشد جامد وفي مشكله كبيره عليه - وبعدين لقيت الراجل السوداني مدير الاستقبال خدني من ايدي وقالي تعالي نقعد في المكتب شويه

رحت معاه قاللي انت ماشي بعربيه وعلي عجل وحرام عليك ماتأذيش حد عشان ممكن يدعي عليك وكل مكان بيبقي في اخطاء واحنا هانحاول نعوضك في الفلوس اللي دفعتها ونعملك صيانه التمانين الف بخصم كبير -مش مجانا كمان-

طبعا رديت عليه يعني انتم تبوظو العربيه بتاعتي وتدعو عليا كمان ده انتو حاجه فل اوبشن بصراحه وكمان عايزني اجيلك الوكاله برجليه تاني ؟

قاللي مانت مسيرك تحتاجنا في برمجه الكومبيوتر للسياره لو احتاجت برمجه

قلتله ليه ولو احتاجتها مش هاتعملوه؟ لا ده انتم تعملوها غصبا عنكم بفلوسي وهي الشركه دي بتاعتك شخصيا ولا انت مجرد موظف في الشركه اللي موكلاها الشركه الام؟

فاللي حصل ده شئ كويس وانا مبسوط انهم بيحاولوا يهندلوني معني كده اني مسببلهم مشكله وصداع

والي اللقاء في تطورات جديده

[doha]

طبعا رديت عليه يعني انتم تبوظو العربيه بتاعتي وتدعو عليا كمان ده انتو حاجه فل اوبشن بصراحه وكمان عايزني اجيلك الوكاله برجليه تاني ؟

قاللي مانت مسيرك تحتاجنا في برمجه الكومبيوتر للسياره لو احتاجت برمجه

قلتله ليه ولو احتاجتها مش هاتعملوه؟ لا ده انتم تعملوها غصبا عنكم بفلوسي وهي الشركه دي بتاعتك شخصيا ولا انت مجرد موظف في الشركه اللي موكلاها الشركه الام؟

الحته دي بالذات ارسل بيها ايميل للشركه الام ووضح لهم انك هتحاول تستبدل سيارتك في القريب وانك مستحيل ( توصي ) بسيارة مماثلة لصديق طالما ان برمجة الكمبيوتر امر لا غنى عنه في نفس الوقت الي بيستغله الفرع ضدك كمساومه ..

الجزئية دي بالذات ممكن تحسم القضية لصالحك من الجولة الاولى ..

[shawshank]

المهم ربنا اكرمني امبارح بواحد ميكانيكي مصري غير متعلم بالمره يعني لا مهندس ولا حاجه

راح فاكك الجير وكانت المفاجأه

حضرتك بتفكرني بواحد صديقي في أمريكا كان دايمًا يقول لي: انت لو عرفت تفك وتركب الفتيس الأوتوماتيك ده، تاخد دكتوراه وتكسب دهب

ألف حمد الله على سلامة العربية

تم تعديل 5 ديسمبر 2010 بواسطة shawshank

[Ahmed Anwer]

مية مية ،،،

بس القكرة هتثبت الحاجات دي إزاي

ما الحمد لله ،،، أنتا صلحتها خلاص ،،

هأقولك علي فكرة كويسة تانية كمان

دور علي منتديات سيارات سعودية

و اكتب فيها موضوعك ده ،،

و متسيبهومشي مش عشان حقك أنتا شخصيا ،،،،

عشان أي عميل تاني غيرك حتي

[اغابي]

ازوزو انا ما بفهمش فى السيارات وعربيتي لمابتعطل داه مش اختصاص

لكن داخلة اشد من ازرك واواسيك فى محنتك واقولك شد حيلك واحنا كلنا هنا اخوة وبنساعد

اى خدمة اقدر اقوم بيها انا تحت امرك - اعيط - اصوت - اى حاجة

شد حيلك

:redrose:

تم تعديل 12 ديسمبر 2010 بواسطة اغابي

[ozoozo]

شكرا لكل من بارك وهنا

ونصح وارشد

وعيط وزغرط

انا بعد ماهديت والحمدلله العربيه اتصلحت بفكر اكبر دماغي لان لغايه دلوقتي مفيش جديد حصل

وبيني وبينكم ضميري بيأنبني اني اكون اذيت حد

تم تعديل 12 ديسمبر 2010 بواسطة ozoozo

[عادل أبو عمر]

OZOOZO

مصر خسرتك بجد

عارف لو 10% من المصريين زيك عندهم روح محاربة الفساد ( اللي كان بيتكلم عليها أخويا أكرم ) مش محتاجة كلام كان حالنا بئى غير الحال

كل التحية ليك لأنك ماسيبتش حقك اللي اتاخد منك وكنت إيجابي بما تعنيه الكلمة

[ozoozo]

المشكله ان في مصر محدش هايرد عليك ولا يسأل فيك انما هنا علي الاقل بيردوا عليك حتي لو معملوش خطوه ايجابيه بس علي الاقل عبروني

تخيل في مصر من سنتين قولت اقطع تذاكر القطار الي الاسكندريه بالفيزا من النت المهم اكتشفت انهم سحبوا من الفيزا تلات تذاكر بدل من تذكره واحده وقعدت اتصل بيهم لحد ما ربنا كرمني بواحد رد عليا وقالي وانت ايه اللي يخليك تقطع من النت بالفيزا انت فاكر نفسك في امريكا بس الحمدللله رجعوا الفلوس

علي العموم عشان تبقوا معايا ده اخر ايميل وصلني منهم من دبي النهارده

Dear Mr. Mohammed

Thank you for your email.

We will pass it to the management and someone from the Dealership service Department will get back to you.

Best regards,

Customer Service Executive

____________________________________

Customer Service Executive

Regional Customer Communications Centre

Nissan Middle East

P.O. Box 61111, Jebel Ali

Dubai, United Arab Emirates

Tel. (Direct) +971(04) 8032593

Fax.: +971-4-8810979

تم تعديل 12 ديسمبر 2010 بواسطة ozoozo

[مصطفى يونس]

هوا الميكانيكى ده فين بالضبط ياريت اسمه وعنوانه او رقم تليفونه

وانت لو مختش فلوسك تانى ابعت تانى للشركه الام

لانهم بامانه بتوع نيسان دول حراميه ولاد؟؟؟

تم تعديل 12 ديسمبر 2010 بواسطة مصطفى يونس

[ozoozo]

هوا الميكانيكى ده فين بالضبط ياريت اسمه وعنوانه او رقم تليفونه

وانت لو مختش فلوسك تانى ابعت تانى للشركه الام

لانهم بامانه بتوع نيسان دول حراميه ولاد؟؟؟

ابعتهولك ولا يهمك بس هو موجود في صناعيه ابها

انت فين؟

[مصطفى يونس]

انا فى الرياض بس انا بدل ماكنت اغير زيت الفتيس فى الوكاله قولت اروحله احسن بس شكلى هروح الوكاله برده احسن ما امشى 1100 ك م

فكرتنى بابهاانا قعدت هناك سنه فى شركه كهرباء الجنوب اللى على طريق ابها خميس بس كانت احسن سنه ليا فى السعوديه الجو جميل جدا عندك ماعدا فى الشتا برد شويه

[ozoozo]

انا فى الرياض بس انا بدل ماكنت اغير زيت الفتيس فى الوكاله قولت اروحله احسن بس شكلى هروح الوكاله برده احسن ما امشى 1100 ك م

فكرتنى بابهاانا قعدت هناك سنه فى شركه كهرباء الجنوب اللى على طريق ابها خميس بس كانت احسن سنه ليا فى السعوديه الجو جميل جدا عندك ماعدا فى الشتا برد شويه

سيبك من الوكاله انا اكتشفت انهم حراميه مش عماله يقولك ده زيت مخصوص بيجي من بره والكلام الفاضي ده

انا دخلت جوه الورشه واكتشفت انهم بيستخدموا زيت فوكس الازرق اللي متعبي في السعوديه هما بس بيجيبوه في جراكن كبيره عشان يوفروا انما في الاخر هو الزيت ابو 10 ريال بره

انت تروح لاي بنشر لو عربيتك ماشيه اقل من 100 الف وتشفط الزيت القديم وتحط مكانه وغالبا هاتحتاج زيت تكون درجته ديكسترون 3 زي اي سي ديلكو-راجع كتالوج السياره-

لو ماشي اكتر من كده هاتحتاج تغيير فلتر تروح لاي ميكانيكي وحبذا لو كان بتاع جيرات وهي شغلانه سهله جدا هما حوالي 20 مسمار بيتفكوا من قاعده الفتيس وبتلاقي الفلتر تشيله وتحط الجديد-تشتريه من الوكاله-

علي الاقل عند الميكانيكي انت شايف بعينك انما الوكاله ممكن ياخد العربيه يوقفها عنده حوه ساعتين ويقولك خلاص كده

[الغريب]

انا بعد ماهديت والحمدلله العربيه اتصلحت بفكر اكبر دماغي لان لغايه دلوقتي مفيش جديد حصل

وبيني وبينكم ضميري بيأنبني اني اكون اذيت حد

أذيت أيه يا أخي

الكلام ده هو اللي مضيعنه

خليك إيجابي وكمل مسيرتك

دا شغل يا أوزوزو بلاش تدخل فيه العشم وصعبان عليه والكلام ده