مداخلات مفصولة من موضوع احصائيات خفيفة

[ozoozo]

مع كل الاحترام للأداره ممكن سؤال

تخيلوا معايا واحد عادي بيدور علي جوجل لقي موضوع عجبه وحب يفتح المحاورات الموقع مابيفتحش هايعرف منين بقي ان الموقع ده دونا عن مواقع الدنيا كلها لي شقلبظات وحركات ود ان اس وحركات معينه عشان يفتحه

طبعا هايمشي ويقول الموقع مش شغال

وبعدين ماكل منتديات ربنا بتفتح لوحدها اشمعني ده

اكيد في مشكله مع الشركه المستضيفه

في البيت عندي اتنين لاب توب علي نفس الشبكه واحد بيدخل والتاني لأ

[se_ Elsyed]

في البيت عندي اتنين لاب توب علي نفس الشبكه واحد بيدخل والتاني لأ

يعني المشكلة كده في المنتدى ؟

إزاي مش فاهم إذا كان عندك نفس مزود الخدمة بس الجهازين مختلفين ... يبقى كده العيب في الموقع ؟؟؟

[MZohairy]

مع كل الاحترام للأداره ممكن سؤال

تخيلوا معايا واحد عادي بيدور علي جوجل لقي موضوع عجبه وحب يفتح المحاورات الموقع مابيفتحش هايعرف منين بقي ان الموقع ده دونا عن مواقع الدنيا كلها لي شقلبظات وحركات ود ان اس وحركات معينه عشان يفتحه

طبعا هايمشي ويقول الموقع مش شغال

وبعدين ماكل منتديات ربنا بتفتح لوحدها اشمعني ده

اكيد في مشكله مع الشركه المستضيفه

في البيت عندي اتنين لاب توب علي نفس الشبكه واحد بيدخل والتاني لأ

في البيت عندي اتنين لاب توب علي نفس الشبكه واحد بيدخل والتاني لأ

يعني المشكلة كده في المنتدى ؟

إزاي مش فاهم إذا كان عندك نفس مزود الخدمة بس الجهازين مختلفين ... يبقى كده العيب في الموقع ؟؟؟

لأ في دي يبقى طبعا في مشكله في الجهاز

[ozoozo]

في البيت عندي اتنين لاب توب علي نفس الشبكه واحد بيدخل والتاني لأ

يعني المشكلة كده في المنتدى ؟

إزاي مش فاهم إذا كان عندك نفس مزود الخدمة بس الجهازين مختلفين ... يبقى كده العيب في الموقع ؟؟؟

لا العيب في الجهاز فعلا بيدخل علي كل المواقع اللي في الدنيا الا المحاورات

[ozoozo]

ده واحد اخر مازهق راح سأل جوجل اذا كانت المحاورات قفلت

http://ejabat.google.com/ejabat/thread?tid=619d74b83ff390a2

[masraweya]

السلام عليكم

كذا مرة ابعت لاصحابي في أركان المعمورة روابط لمواضيع جميلة جدا من المنتدى .. يردوا عليا انهم مش عارفين يدخلوا

شرحتلهم يستخدموا

open DNS

بس مش كله عنده استعداد يتعب نفسه

و اللي بيعمل بحث عن حاجة و يلاقي رابط تبعنا و ما يفتحش معاه أكيد هيفتكر المنتدى مقفول

اقتراح ... نفصل المداخلات الخاصة بديناميكية المنتدى في موضوع مستقل لأن العنوان حاليا غير معبر و ممكن ده يكون سبب مهم ان الناس ما بتدخلش عليه و تشارك

[doha]

حاجه كده زي فيلم الحاسه السادسه الراجل مات وبقي شبح ولسه فاكر ان الناس شايفاه بس مش فاهم هم ليه متجاهلينه ومحدش بيرد عليه

جبت الخلاصة يااوزوزو ...

بكل اسف بعد عده ايام العدد يادوب ثلاثين وفي نفس الوقت عدد الاعضاء الي زاروا الموضوع هو هو ثابت على 57 .. يظهر ان هو ده العدد الحقيقي للاعضاء المتفاعلين في المنتدى نشيط وخامل .. مكملوش ستين عضو وبلاش اقول مية ..

مشكلة تحتاج تدخل سريع بس مش عارفه بقى هيحلوها ازاي ..

مش عارفه يا ضحى

لكن حاسه ان احنا محتاجين اننا نستبدل كلمه ( هيحلوها ازاى ) بكلمه هنحلها ازاى

احنا كلنا هنا بجد اسره و كلنا لينا دور فى بيت العيله الجميل بتاعنا

اكيد الاداره عليها دور و هو محاوله حل المشاكل التقنيه الى بتواجهه الناس هنا و ممكن فعلا تطفش اى حد جديد او مش مرتبط قوى بالمنتدى

لكن احنا كمان ممكن نعمل حاجات كتير

كلنا لينا اصحاب على النت و اغلبنا مشترك فى كذا منتدى

ليه منحاولش ان احنا ندععى معارفنا او اصحابنا او حتى الناس الى فى المنتديات التانيه للمشاركه معانا هنا

ليه مثلا الاميلات الى بنبعتها لصحابنا و الى هى بتكون الرسال الى جايه من جروبات و مش رسائل شخصيه يعنى و غالبا بيكون كل دورنا فيها هو الفروده ليه منحطش فى اخر الرساله رابط المنتدى على اساس انه جزء من الرساله كنوع من التعريف بيه

حاسه ان احنا لو فكرنا مع بعض ممكن نطلع افكار تانيه كتير

الموضوع مش الزام علينا انا عارفه لكن انا شايفه اننا بما اننا بنحب المكان هنا اكيد هيكون عندنا رغبه فى مساعدته

مش عارفه دى الافكار الى عندى و لو عندك افكار شاركينا بيها و اى حد تانى عنده افكار ياريت يشاركنا بيها

اكيد هنطلع بحاجه جميله فى الاخر

تحياتى

بالعكس .. هيحلوها ازاي دي كتباها عمدا بعد ماخلاص بطلت اطمح لتنفيذ شيء من الاقتراحات .. اما لو عاوزه اقتراحات من قبيل الدردشة يعني فده موضوع قديم تناقشنا فيه باستفاضه وكتبت فيه مقترحاتي هتلاقيها في المداخلة 65 واترك لك الحكم ان كان معايا حق اأمل في التغيير ولا لاه ..

[doha]

المشكلة هل نحن نهتم بالكم أم الكيف ؟

يعني مشاركات من عينة مشكور ويعطيك العافية بالكوووووووم .. ولا مشاركات تُضيف شيء جديد ؟

مهو ده الي احنا عمالين بنقوله من الصبح ولهذا السبب تحديدا طرحت تساؤلي عن عدد الاعضاء الفاعلين في المنتدى ..

طبعا المحاورات لا تهتم بالكم بس المصيبة السوده انها تبدوا لي الآن وهي لا تهتم بالكيف برضه ..

لو خدت بالك مفيش ايوه مشاركات مشكور بس برضه مفيش مشاركات بتضيف جديد .. يعني لو استثنينا كام موضوع بينقل اخبار في الثقافة والعلم فقراءة صحيفه زي اليوم الساقع او المصري اليوم وهي المصادر الي بينقل منها ثلاثه ارباع الاعضاء الفاعلين اخبارهم هيكون عندهم نفس المعلومات والاخبار الي هيلاقوها في المحاورات .. ايه الجديد ؟ .. فلو استثنينا مواضيع الاخبار المنقوله من المصدرين دول ولو استثنينا مواضيع الخوض في السنة وعلماء الحديث والتهكم والاعتراض على الفتاوى الي اكيد مبتجيبش جديد عن الي جابته من يوم مابدأت هي هي نفسها كل مرة كوبي وبيست .. لو استثنينا كل ده فاعتقد والله اعلم ان معادش في مشاركات جديده . .والي مش مصدقني يفتح اي باب من ابواب المحاورات ويطلع على عناوين التوبيكات فيه ويشوف ان كان في جديد ولا لاه .. ده حتى الشيف بندق تقريبا بطل يحط اكلات جديده يعني حتى ابسط المواضيع الي ممكن نطلق عليها ابداع شخصي او اجتهاد معادتش موجوده ..

هل بعد كده من حق المحاورات تفتخر بانها خاليه من مداخلات المشكور ؟؟

اخشى مااخشاه ان مفيش مشكور لان معادش في شيء ينشكر عليه ..

ماسبق كان استهلالا لابد منه عشان بس اقول شوفوا لكم حل ياجماعه المنتدى ينهار وطبيعي هتعترضوا على الكلام ده بس الاعتراض لن ينفي كونه واقع يستحق التدخل السريع .. بكرر .. شوفوا .. لكم .. حل ..

تم تعديل 7 ديسمبر 2010 بواسطة doha

[Scorpion]

يا مدام ضحي ...

جعلتيني اشك في ان نسخة المحاورات التي اتابعها تختلف تمامآ عن تلك التي تصفيها الآن ...

المنتدي ينهار .. المنتدي يعتمد علي اليوم الاسقع و مواضيع الهجوم علي السنة ...

فين الكلام ده يا افندم ...

اللي قدامي منتدي مليان ابواب النسبة العظمي من مواضيعها من بنات افكار الزملاء ... حاولي بس حضرتك مرة تبصي ليها من وجهة نظر حيادية مش الباحثة عن السلبيات بس ...

قدامي دلوقتي في الصفحة الرئيسية

الحياة النيابية و موضوع ازمة نظام اللي فيه بيحلل الفاضل طه ( مش صحفي من اليوم السابع ) تداعيات الأنتخابات الأخيرة و ردود الأعضاء علي كده

الفك المفترس .. و ده موضوع الساعة في الدنيا كلها و اثاره المهببة علي موسم السياحة في مصر و احنا داخلين علي اجازات الأعياد في اوربا ...

الأقتصاد و خرائط المدن الجديدة

حملة ازالة الألغام اللي ما حدش عايز يهوب جنب حقل ملغم لا ينفجر فيه

حريق اسرائيل و ده برضه موضوع الساعة في العالم و من ناحيتنا هنا بنناقش هل من الحكمة المشاركة في اخماده و لا نشمت فيهم

عادتنا و تقاليدنا اللي اختفت

جعلوه مجرمآ .. و نظرة المجتمع للسجين السابق و تأثير ده عليه هو شخصيآ

كيف نعامل علماء الدين و ما هي واجباتهم و حقوقهم علينا

عدم ممانعة رئيس الهيئة شرعيآ لقيادة المرآة السيارة و تأثير هذا الخبر

كيف نعامل المراهقين من اولادنا

الأناقة الكلاسيكسة و بعدها عن الأسفاف

طريقة عمل اللانشون منزليآ

حماية المستهلك في التحذير في التعامل مع قطع غيار السيارات

الأعلام .. يبقي لازم يكون مقال منقول و تعليقاتنا عليه

دعم لجميع من يبحث عن معلومات تخص المنح الدراسية

التعريف ببرنامج يمكنك من خلاله ان تملكي ذاكرة الكترونية اضافبة تتبعك اينما ذهبتي

مناقشة التجاوزات المتعلقة بالبعثات

اشعار الأعضاء و اضافتهم الثقافية و الفنية

تفنيد اتهام تهريب الأسلحة لصالح الكنيسة

الخ ألخ الخ ...

معظم المواضيع الردود عليها ترجع الي اليوم او امس .. يعني فيه تفاعل ..

هذا ما اجده امامي الآن ... و لم اجد فيه الصورة الغارقة في السواد التي تم اضفائها علي المحاورات ...

اوافقك ان نسبة المشاركة و التفاعل علي تلك المواضيع تتفاوت و لا تحظي بنفس نسبة الردود التي كانت في السابق ... و لكنها فترات تعودنا عليها جميعآ ... تزيد و تنقص ... و لكن قلة المواضيع ليست هي السبب ...

لا أشاركك تلك النظرة التشاؤمية شديدة القتامة تلك التي جعلتني اشعر بالأحباط .. و لكن عندما راجعت الصفحة الرئيسية من المحاورات لم اجد كل هذا الأنهيار ...

[doha]

لا سيدي الفاضل بكل اسف .. المفروض تشاركني النظرة السوداوية وتزيد عليها كاروهات بنفسجي كمان على اعتبار ان حضرتك عاصرت الجيل الاول في المحاورات والمقارنة بين ماكان ومااصبح لازم هتزيد العتمة قتامة ..

حضرتك جايب لي امثلة تؤيد وجهة نظري مش تنقضها ..

ياريت حضرتك من القائمه الي سردتها دي تشيل زي ماقلت لك مواضيع الاخبار المنقولة زي القرش والحريق .. وتشيل المواضيع القديمه او المنقولة زي موضوع اللانشون .. وبالمرة تستثني مواضيع سب المشائخ والتطاول عليهم ودول حضرتك حاطط منهم في قائمتك اثنين مع اني ماكده في كلامي على استثناءهم .. وطبعا اكيد تشيل الاقسام الميته الي مفيهاش تفاعل من اساسه زي قسم الالغام الي بقالي سنتين في المنتدى مشفتش انرفع فيه غير موضوع واحد فقط والباقي مردوم بالتراب .. ها لقيت حاجه ممكن نقول عليها مواضيع حية تصلح لتقوم بمنتدى ؟؟

ياسيدي الفاضل اول خطوات الحل لاي مشكلة هو الاعتراف بوجود مشكلة اصلا .. بعد كده كله سهل .. لكن لو فضلنا نحط راسنا في الرمل ونقول كله تمام والشعب بيحب الحكومه بدليل اختياره كل نوابه من الوطني يبقى احنا بنضحك على نفسنا ..

عملنا احصائية لقياس زوار الموضوع وناشدنا الاعضاء النشطين للمشاركه .. لغايه آخر مرة دخلت فيها الموضوع كان عدد الزوار ثابت وهو 57 عضو والمشاركات لاتزيد عن حاجه وثلاثين مشاركه .. نستنتج من كده ايه ؟؟

عدد الاعضاء اقل بكتير من عدد كتاب جريده يوميه .. متخيل ايه هيعود علي المتابعين لو حتى فرضنا وانطرحت فكرة جديده .. كام راي هيكون موجود وكام معلومه جديده ممكن القاريء يطلع بيها ؟ صدقني ياسيدي الفاضل مفيش منتدى واحد مشتركه فيه فيه العدد ده من الاعضاء ولا حتى مائة ضعفهم .. وكلها منتديات محترمه متقلش عن المحاورات في شيء ..

ممكن نسأل نفسنا ايه السبب في وصول الحال لما اصبح عليه وليه معادش في اعضاء ؟ ليه الناس القديمه بل والي انضمامهم حديث نسبيا مشيوا وليه مفيش عضويات جديده تغطي مكانهم ؟؟؟

منتديات مشكور الي مش عجباكم وبتعتبروها رجس من عمل الشيطان فيها اعداد اعضاء متابعين اكتر من كده بمراحل المراحل .. وناس جديده بتشترك كل يوم وده يدل ان اكيد الناس دي بتستفيد وبتلاقي شيء يستحق بقائها من اجل متابعته والا مكانتش استمرت ..

هنقعد نضلل نفسنا ونقول اصل الناس دي مشتركه عشان الهلس والفرفشه واحنا منتدى جاد هقول لحضرتك طيب بص على التقييمات الايجابية واستثني منها تقييمات المجاملات ثم تقييمات الضحك والفرفشة وشوف كام واحد بيقيم على فكره جديده ولا راي يستحق الاحتفاء بيه .. احنا كاعضاء للمحاورات مش بدعه من بين مشتركي الانترنت واهتماماتنا هي نفسها زينا زيهم .. محناش مثقفين وقمه في العقلية والناس التانية حثالة وملهمش في الجد .. المنتديات الاخرى بتجذب عدد غير عادي مقارنة بالمحاورات يبقى لازم نقف ونسأل نفسنا عن السبب .. ايه الي بيلاقوه هناك ومش لاقيينه هنا .. او ربما .. ايه الي لاقيينه هنا ومش لاقيينه هناك ..

واخيرا اتمنى ان لا تاخذ كلامي السابق كاتهام للادارة لاني المرة دي بالذات مش بتهمهم بشيء .. انا بقول وجهة نظري واني شايفه المنتدى في حالة يرثى لها انا حتى مش عارفه اطلق عليه اسم منتدى .. احنا اصبحنا اقرب لقائمه بريدية من مجموعة من المعارف والاصدقاء بتتبادل فيما بينها الايميلات على نطاق ضيق .. محدش بيسمعهم وهم يكادوا ميسمعوش حد ..

ياريت كلامي ده يكون له صدى وينتج على اثره تحرك لمحاولة احياء المحاورات من جديد وياريت ميتعاملش كما العاده على انه دعوى مغرضة من قلة مندسة هدفها اثارة البلبلة لكن كل شيء في السليم وليس في الامكان ابدع مما كان ..

عارفه ممكن تقولي احنا ( صالون ثقافي ) والي مش عاجبه فباب الصالون مفتوح .. هقولك اوكي مفيش مشكلة بس مكانش ينفع ادخل واشوف الناس قاعدين ومدحرجش التماسي .. مساءك سعيد ..

تم تعديل 7 ديسمبر 2010 بواسطة doha

[Scorpion]

مساءك اسعد يا فندم ...

[se_ Elsyed]

الحمد لله إن الأراء الشخصية تُعبر عن الشخص نفسه وقناعاته

بقول وجهة نظري واني شايفه المنتدى في حالة يرثى لها انا حتى مش عارفه اطلق عليه اسم منتدى .. احنا اصبحنا اقرب لقائمه بريدية من مجموعة من المعارف والاصدقاء بتتبادل فيما بينها الايميلات على نطاق ضيق .. محدش بيسمعهم وهم يكادوا ميسمعوش حد ..

وإلا كانت تبقى كارثة

شكراً يا مدام ضحى لرأيك القيم ورؤيتك الثاقبة ...

لكن عفواً ... الحمد لله إن ده رأيك إنتي فقط ... والحمد لله إن إسمها " اراء شخصية "

لسه شايف الإحصائيات دلوقت حالاً لقيت المتواجدين حالياً 393 .. ويكيفينا فخراً ويثلج صدورنا أن يقرأ واحد من هؤلاء الزوار أو الأعضاء شيء محترم .. على أن يقرأ مشكور ومغفور ومقبور

وأرجوكي إنتي أن تُراجعي نفسك وتكتشفي المشكلة اللي عندك .. حقيقي والله دي نصيحة أخ ... مش عيب إن الإنسان يعترف إن عنده مشكلة ويحاول يعالجها ... وأول خيط لعلاج المشكلة إنك تشوفي عدد موضوعاتك المهمة على الأقل في الفترة الأخيرة أو يا ستي من ساعة ما اشتركتي خليها عليكي ... وتشوفي الأفكار الجادة اللي طرحتيها للناس ويا ترى كان في تفاعل معها أم لا ؟..

أما لو كان ما فيش وكانت كل موضوعاتك عبارة عن مداخلات للرد فقط أو للإدلاء بالرأي - عشان فعلاً ما عندكيش وقت بدليل كل المداخلات اللي عبارة عن 4 صفح فولسكاب أنا شخصياً ما بيبقاش عندي خُلق أقراها - يبقى فعلاً عندك مشكلة ولازم ترفعي راسك من الرمل وتنفضي الرمل كويس وتحاولي تعالجي الموضوع ده بسرعة .. ده لو كان فعلاً قلبك على المنتدى حقيقي .

وأخيراً : فعلاً أرجو أن تأخذي كلامي ده على إنه مش إتهام لكي لا سمح الله أو لمستوى موضوعاتك اللي مش شايفها أو مداخلاتك إلا مش باعتبر اغلبها مداخلات من اساسه ... لكن حقيقي دي نصيحة لوجه لله ...

وفعلاً مشكوره على مداخلتك دي وكويس إنك لقيتي وقت تكتبيها .

مكانش ينفع ادخل واشوف الناس قاعدين ومدحرجش التماسي

مره أخرى .. مشكورة على الدحرجة ... وإبقي تعالي

[se_ Elsyed]

إستدراج لابد منه

انا بقول وجهة نظري واني شايفه المنتدى في حالة يرثى لها انا حتى مش عارفه اطلق عليه اسم منتدى

أي كلام في أي محشي ...

يعني لما حد بيسألك : هو إنتي بتعملي إيه يا مدام ضحى وإيه اللي بتبصي عليه في النت ده ؟

بتقولي لهم إيه : ده فسحة المصريين .. أو مصطبة المصريين اللي بتواجد فيها طول اليوم ؟

ولما هو مش منتدى وبالنسبة لك بعكوكه غير معروفة الإسم .... حضرتك بتعملي عندنا إيه ؟

إيه عندك خطة إصلاح لإنتشال المكان من الضياع ويا عيني ماحدش مديكي فرصة تعبري عن اللي جواكي وتنفذي خططك؟

---------

عيب يا مدام ضحى ... المكان بما فيه من عيوب ومزايا لم يُسيء لكي في شيء ...

ومره أخرى أعتقد إن رأي واحد من ضمن الاف الأراء لن يفيد في شيء ولن يضر أيضاً ...

[se_ Elsyed]

عيب .. إحنا مش بنلعب هنا .. ده كان رأيي أمبارح في مووضع العزيز سمبا الكويتي ههههههه

تعود البعض يا سمبا على " الإنتقاد فقط " يعني النقد من أجل النقد.. حتى على مستوى المجتمع اللي عايش فيه .. يعني مثلاً

تلاقيه ليل نهار يسب ويلعن في المكان اللي حواليه اللي مش نضيف وإن الحكومة أهملت في النضافة وإن وإن وإن

في نفس الوقت تلاقي إن في إيده هو شخصياً حاجات إيجابية وبسيطة ممكن يعملها .. لكن هو ينآى بنفسه عن ذلك .. هو بيعترض وينتقد بس أما الأفعال فيتوقعها دائماً من الأخرون لكي يعيش في جنه جاهزة

[doha]

الفاضل سين سين ..

مداخلتك متوقعه تماما .. اصلي تعودت لما احط اقتراح ولا اكتب شيء ايجابي محدش بيعلق وكاني لم اقل شيئا او كان مفيش حد هنا .. بس لما انتقد ولا اقول رايي بصراحه الاقي خمسة سته دخلوا في شمال مرة واحده وطلعوني انا الغلطانه وكل شيء تمام ثم يبقى الحال على ماهو عليه وعلى المتضرر خبط راسه في الحيط ..

مش مستغربة ابدا خلطك مابين عدم وجود وقت عندي في اني اكتب مداخله فيها فكر او شيء متعوب عليه وبين اني بكتب فولوسكابيات طويلة ربما بتاخذ من واحد زي حضرتك وقت في كتابتها لكن بالنسبة لي فالكتابة على الكيبورد اسرع من الكلام كوني ماشاءا لله تبارك الله يعني خمسة وخميسة بكتب تاتش باكتر من ستين كلمه في الدقيقة .. طبعا المعلومه الاخيرة دي متخصكش ومش ملزمه اذكرها بس مش عارفه يمكن دي المرة الثالثه تقريبا الي تنوه فيها عن طول مداخلاتي الي كانك بتدفع لي فيها بالكلمه .. ياسيدي الي ميعجبكش اعمل له ايجنور ومتقراش كلامه وخلاص ..

المداخلات ذات القيمه سيدي الفاضل الي مش شويه تهريج وتلصيق لكلام يضحك وخلاص بتاخذ وقت وجهد والاهم تركيز مش متوافر لي حاليا بكل اسف .. سهل اوي اكتب كلمتين زي الي بكتبهم دلوقت او زي الي حضرتك كاتبهم لي من شويه بس من الصعب بجد اني اكتب اقتراح مفيد او حاجه تستحق انها تبقى لشهور وربما سنوات للناس الي هتيجي تقرأ .. من الصعب تكتب حاجه تستحق البقاء اما كلام المصاطب فما اسهل الخوض والاستفاضه فيه ..

قلت اني مش عارفه اسميه منتدى وحضرتك بتسألني امال هو ايه ولو حضرتك اخذت جزء من الوقت لقراءة ماكتبته سابقا بتركيز كنت عرفت اني بطلق عليه مسمى قائمه بريدية او مجموعه من الاصدقاء بتتبادل الحديث داخليا فيما بينهم ..

برضه لو حضرتك الاستشهاد بالـ 300 ولا 400 الاعضاء الي زاروا المنتدى النهرده يشوبه الكثير من المغالطه لان دول ببساطه يافي باب كندا ياسواح في باب المغتربين .. حضرتك بص على عدد زوار اي موضوع من الي بيبقى مسجل في اسفل الموضوع بعدين تعال اتكلم معايا في العدد ..

بصراحه مداخلتك الاخيرة دي ياسين سين ضحكتني اكتر من اي مداخله تانية لك بتكتبها وانت صابب جل اهتمامك فيها على الهجوم على شخصي ... طيب كنت سمعنا صوتك الملعلع ده في موضوع من المواضيع العشرتاشر المفتوحين في باب شئون المحاورات والي بيتسائل فيها الاعضاء المخلصين عن طريقة لانقاذ المنتدى .. مشفتكش هناك يعني ..

والا اقولك انت تاعب نفسك ليه وانا واجعه دماغي ودماغكم ليه .. هو كان منتدايا ؟ انا حياله ضيفه في صالون والي فيه عاجبهم الوضع وشكلي الوحيده الي شايفه ان فيه مشكلة .. خلاص ياسيدي اعتبرني مقلتش حاجه واعتبر الدنيا ميت فل واربعتاشر والعيب مش في الصورة ولا في النظارة .. العيب في الي لابسها ..

في عقل بالي ..

ربنا يسامحك بقى يامغتربة .. منا قلت لك خليهم يشوفوا لهم حل كان لازم يعني تنكشيني وتقولي لي مسؤوليتنا كلنا وابصر ايه .. اديني اتكلمت . طلعت انا الغلطانه وسبب تاخر المنتدى وانا الي فاتحه باب الصالون ومدخله لكم صاروخ الهوا ..

حاضر ياسيدي .. هاخذ الباب في ايدي ..

[شريف مان]

شكلي الوحيده الي شايفه ان فيه مشكلة .. خلاص ياسيدي اعتبرني مقلتش حاجه واعتبر الدنيا ميت فل واربعتاشر والعيب مش في الصورة ولا في النظارة .. العيب في الي لابسها ..

لا طبعا .. مش لوحدك يا مدام ضحى

أنا كمان شايف فى مشاكل كتير فى المنتدى وفى أعضاء كتير بردو شايفين دا

أنما المشكلة لما بنتكلم .. الاخوة فى الادارة بتفكر أن دا هجوم .. دا مش هجوم

دا نقد .. والمفروض الادارة بدل ما ترد بالهجوم أو بالحذف .. يبقى فيه حوار للوصول الى الحل

دا اذا كانت الادرة شايفة ان فيه مشكلة ..

[مغتربة]

ربنا يسامحك بقى يامغتربة .. منا قلت لك خليهم يشوفوا لهم حل كان لازم يعني تنكشيني وتقولي لي مسؤوليتنا كلنا وابصر ايه .. اديني اتكلمت . طلعت انا الغلطانه وسبب تاخر المنتدى وانا الي فاتحه باب الصالون ومدخله لكم صاروخ الهوا ..

الفاضله ضحى دعوتى كانت على مستوى عام و مازلت متمسكه بها و لا ارى بها مشكله

اما كيفيه معالجه تلك الدعوه فهو ما يتباين و تتباين حوله ردود الافعال

تحياتى

[se_ Elsyed]

.. خلاص ياسيدي اعتبرني مقلتش حاجه واعتبر الدنيا ميت فل واربعتاشر والعيب مش في الصورة ولا في النظارة .. العيب في الي لابسها ..

أنا متأكد من كده على فكرة

[se_ Elsyed]

شكلي الوحيده الي شايفه ان فيه مشكلة .. خلاص ياسيدي اعتبرني مقلتش حاجه واعتبر الدنيا ميت فل واربعتاشر والعيب مش في الصورة ولا في النظارة .. العيب في الي لابسها ..

لا طبعا .. مش لوحدك يا مدام ضحى

أنا كمان شايف فى مشاكل كتير فى المنتدى وفى أعضاء كتير بردو شايفين دا

أنما المشكلة لما بنتكلم .. الاخوة فى الادارة بتفكر أن دا هجوم .. دا مش هجوم

دا نقد .. والمفروض الادارة بدل ما ترد بالهجوم أو بالحذف .. يبقى فيه حوار للوصول الى الحل

دا اذا كانت الادرة شايفة ان فيه مشكلة ..

النقد الإيجابي هو المشاركة ...

مش بس الكلام والصريخ

هذا ما نفهمه نحن

[شريف مان]

النقد الإيجابي هو المشاركة ...

مش بس الكلام والصريخ

هذا ما نفهمه نحن

ما شاركنا يا ابو عمر

وايه اللى حصل .. غير حذف المواضيع

ما شاركنا وايه اللى حصل .. غير الهجوم وفرض مواضيع بعينها للهجوم على المتخلفين اللى عايشين فى الجحور واللى سبب خراب عقول الشباب

ما شاركنا وبقينا المتحدثين بأسم الله .. واللى مش عاجبوا ياخد الباب وراه

ما بعتنا واشتكينا بدل المرة ألف وايه اللى حصل .. القاء الرسائل فى سلة المهملات

هذا ما أفهمه أنا وغيرى من المغضوب عليهم