كيف تتفادي هجر المحاورات !!!!

[Simba]

بصراحة الفيديو اللي عمله الساري ولماضة محاورات زمان

اثر فية

لما شفت اسامي ناس كانت اعضاء فعالة ودايما لها مشاركات وكلام موزون وخفة دم وحاجات كتير

انا مش هاقول اسامي الاسامي اكتر من انها تتقال لكن من 2006 عاصرت اعضاء محترمين بمعني الكلمة

لكنهم في النهاية راحو ويمكن ده يكون الحال في اغلب المنتديات ناس تروح وناس تيجي

ففكرت ايه ممكن تكون الحلول المنطقية اللي تساعد علي عدم هجرة المحاورات

دي افكار من وجهة نظري الخاصة بالطبع

1_ نيفر ايفر يكون حد عندك علي الماسنجر من المشرفين

2- لما تكتب موضوع تستفسر عن حاجة اوعا بتاتا تنتظر رد اشكيف من الزرق انت كده عملت اللي عليك وقولت مشكلتك

وصدقني اغلب الرد انك تشيل ديسك توبك علي كتفك وتروح تصلحه وتشربلك سيجارة من بتوع شواشي الدرة علي ما يتصلح

3 - بلاش بقي تحط مواضيع من نوع الاخلاص والحب والوفاء والغرام للمحاورات وتعبر عن العشق الدفين جواك لان ببساطة بعد شويتين هتحس انك قولت كل حاجة عايز تقولها وشوية شوية هتلاقي نفسك بتبعد

وزي ما قالت بنت الجيران وانا عندي17 سنة الحب افعال مش اقوال

4- علشان تحس بالفة بينك وبين الاعضاء اتعامل مع مواضيع بلاش تتعامل مع اشخاص وكن متأكد ان كل عضو له فلتات ابداعية في مواضيعه ومشاركته من الاحس بلاش تفوتك

5_ لو اتخنقت والدنيا ضاقت بيك تعال لنا ديوانية الكويت فاتحين 24 ساعة

6- لو اشكيف ازرق غير كلامك وكتب لك بدمه الاحمر ونوه وقالك ده تحذير من الادارة يبقي خلاص انتهي الامر بلاش تحاول توضح وتبرر وتعيد تاني نفس كلامك

انت كده بقيت محطوط قدامهم علي الطاولة المستديرة في الغرفة المظلمة عايزينك تطلع لنا سليم من غير تقطيع

دي افكاري وحبيت اعرف افكاركم

[Dreamwithme]

2- لما تكتب موضوع تستفسر عن حاجة اوعا بتاتا تنتظر رد اشكيف من الزرق انت كده عملت اللي عليك وقولت مشكلتك

وصدقني اغلب الرد انك تشيل ديسك توبك علي كتفك وتروح تصلحه وتشربلك سيجارة من بتوع شواشي الدرة علي ما يتصلح

3 - بلاش بقي تحط مواضيع من نوع الاخلاص والحب والوفاء والغرام للمحاورات وتعبر عن العشق الدفين جواك لان ببساطة بعد شويتين هتحس انك قولت كل حاجة عايز تقولها وشوية شوية هتلاقي نفسك بتبعد

وزي ما قالت بنت الجيران وانا عندي17 سنة الحب افعال مش اقوال

4- علشان تحس بالفة بينك وبين الاعضاء اتعامل مع مواضيع بلاش تتعامل مع اشخاص وكن متأكد ان كل عضو له فلتات ابداعية في مواضيعه ومشاركته من الاحس بلاش تفوتك

السلام عليكم ورحمة الله وبركاته

أستاذي العزيز سمبا .....يومك مشرق سعيد بإذن الله

موضوع جميل جدا لأني بالرغم من أني عضوة جديدة بينكم لكن فعلا لما بقرأ حاجة من المشاركات القديمة للأعضاء القدامي الغير موجودين حاليا

باتسائل هي ليه الناس دي مفضلتش موجودة؟!

بالرغم من تعاملي مع الانترنت من زمان لكن لا أحب الاشتراك في المنتديات وحتي عندما أشترك في منتدي غالبا بتبقي مشاركة صامتة

لأني مبلاقيش شئ ينكشني ويخليني عايزة أشارك

لكن لما فتحت المحاورات حسيت بجو مختلف وحسيت إني عايزة أكون بينكم

عجبتني جدا اقترحات حضرتك خاصة فعلا الحب مش كلام الحب أفعال وفعلا حبنا للمحاورات لازم يكون بالفعل

واقتراح التعامل مع المشاركات لا الأشخاص ...اقتراح في الصميم وقاعدة مهمة جدا في الحياة عموما

لأن شخصنة الأراء والمشاركات بيحرم الواحد أنه يشوف الابداع والجمال في شخصية الآخرين خاصة إذا كان لايقبل بعض من أرائهم

أخيرا بعد ما طولت علي حضرتك اقتراحي الوحيد هو تقبل الأعضاء كما هم ..لا للحكم علي الأخرين أو محاولة تغيير الأخرين ورؤية الجمال والابداع في كل عضو

يكفي إن مع كل مشاركة العضو يكتبها هو أعطانا جزء خاص جدا من داخل نفسه ووقت من عمره .....ده في حد ذاته هدية وجمال

وياريت فعلا نقتنع جميعا أن الاراء ...كل الاراء لايجوز الحجر عليها

يعني في وجهة نظري لايوجد موضوع لا يجب النقاش فيه ...كل موضوع قابل للنقاش وحتي إذا كان هناك رأي فاسد

فالأفكار الفاسدة تعالج وتقوم بالأراء الصحيحة وليست بالحجر

أسفة إني طولت عليكم ...تحياتي

[se_ Elsyed]

ده رأيي كعضو طبعاً

- تعود البعض يا سمبا على " الإنتقاد فقط " يعني النقد من أجل النقد.. حتى على مستوى المجتمع اللي عايش فيه .. يعني مثلاً

تلاقيه ليل نهار يسب ويلعن في المكان اللي حواليه اللي مش نضيف وإن الحكومة أهملت في النضافة وإن وإن وإن

في نفس الوقت تلاقي إن في إيده هو شخصياً حاجات إيجابية وبسيطة ممكن يعملها .. لكن هو ينآى بنفسه عن ذلك .. هو بيعترض وينتقد بس أما الأفعال فيتوقعها دائماً من الأخرون لكي يعيش في جنه جاهزة ..

هاضيق الدائرة وأكلمك عن المحاورات .. نرى زملاء اعزاء من دفعة 2006 اللي حضرتك تكلمت عنهم .. ويمكن أعضاء من قبلها كمان ... والله وهذا حصل وموثق في موضوعات لهم .. يغيب يغيب لظروف عمل أو لظروف شخصية أو أنشغال يمكن لفترة شهور طويلة .. ويرجع بالسلامه واول كلمة يقولها : أنا حاسس إن المحاورات إتغيرت !!! مين الناس الجديدة دي ؟!!!! وفين الموضوعات التقيلة بتاعت زمان ؟!!!! وفين الأعضاء التقيلة بتاعت زمان ؟!!!!

طب سؤال لك إنت شخصياً .. المفروض الإدارة تعمل إيه أو الأعضاء نفسهم يعملوا إيه ؟

يعني يوقفوا الزمن لحد ما يرجع ؟

ولا نقول له حاضر بإذن الله هانشتغل في الموضوعات التقيلة وتعالى كُل على الجاهز ؟

ولا تتفق معي أن المكان يُصنع بأهله الموجودين فيه ؟

أو تلاقي ناس داخلة تقول : والله أنا بادخل كتير جداً بس مش لاقي موضوعات تشدني !!!

وكأن الموضوعات دي بتهبط علينا من السماء ... أو كإن هو كل دوره إنه يقرا من بعيد لبعيد ... أو كإنه مثلاً بيشتري جريدة بفلوس أو يدخل مكان يقدم خدمات بمقابل .. وبالتالي الخدمة مش عجباه اليومين دول !!!!

طب ما تجرب تشارك إنت ... ما تجرب تنزع غطاء الخوف وتكتب بحرية عن أي شيء لديك إن شالله لو كانت مشكلة شخصية ....

صح ؟

لا أخفي عليك إني مُعجب بعدة شخصيات هنا تمكنوا خلال أيام أو يمكن اسابيع قليلة إنهم يصبحوا أعضاء فاعلين وبامانة أصبحوا من أعمدة المنتدى نتيجة مشاركاتهم الإيجابية .. فهم لا ينتظرون أن يفتحوا المنتدى كل يوم أو كل فترة لكي يقرأوا " موضوعات تقيلة " كتبها الأخرون

بالعكس ... هم من يصنعون هذا الثقل الأن .. وهم من يجذبوننا فكرياً

هذا الكلام أقوله بمنتهى الأمانة .. واصبحت شخصياً أنتظر مشاركاتهم وموضوعاتهم لأنني أول المستفيدين منها

ومنهم على سبيل المثال لا الحصر

أغابي ... المكوك الذي لا يهدأ واللي حسيت في بعض الأوقات إنها .. سوري يعني يا اغابي .. زي اللزقة اللي مهما حاولت تشيلها من المنتدى فهي من النوع الإنجليزي اللي ما بيتشلش بسهولة وكأن لسان حالها بيقول : والله مهما ضايقتوني أو عملتوا إيه حتى أنا قاعدة على قلبكم ....

وكل ده حباً منها وتطوعاً منها في إثراء المكان فقط

ساري .... اللي إكتشفنا فيه خفة دم مصرية مستخبية وأخرجها وغرق بها المنتدى

لماضة .. مش محتاجه كلام

نايت مير بنشاطه الملحوظ

مغتربة بعقلها الراجح وأراءها التي تسبق سنها ( مش برضوا 21 يا فندم ؟ )

ومدام هند بجدعنة الأسكندرانية

ضحى .. حتى لو أختلفت مع كتير من أراءاها .. لكن يظل لها كل الأحترام

د / الغريب

جسار ... الراجل ده غريب قوي .. إزاي ما بقاش صحفي لحد دلوقت ؟ والله باتكلم جد

حى على المستوى المهني نجد إن أ خالد شحاته ومدام عطر الجنة والباشمهندس أشرف محمد مركزين في باب المغتربين و الموضوعات الإقتصادية خصوصاً المتعلقة بالعقارات بدون ما حد يوجههم أو يطلب منهم ذلك .. وبصراحة يكادوا يكونو " مشرفين من الباطن " ده حقيقي ؟

architect وديناميكة غير عادية

مصرية متغربة ... وشهادتي في أداءها هاتبقى مجروحة - الشهادة طبعاً - لانها اصبحت زميلة كفاح وبناكل من أروانه واحده في باب الإشراف

واسف لو كنت نسيت إسم حد عشان السن وكده :closedeyes:

لكن ألخص كلامي في إني أقول .. إن مش كل حاجه تتحملها الإدارة .... وخليني يا سيدي كعضو أعمل اللي عليه ولما ما الاقيش تقدير أو تعاون أو تجاوب .. يبقى ممكن اسيب المكان وأنا في منتهى الإقتناع والرضا ...

تحياتي للجميع

[Simba]

يكفي إن مع كل مشاركة العضو يكتبها هو أعطانا جزء خاص جدا من داخل نفسه ووقت من عمره .....ده في حد ذاته هدية وجمال

تحياتي

ده كلام في الصميم وعجبني جدا جزء من داخل نفسه

احييك جدا علي نظرتك للامور

[Simba]

أن المكان يُصنع بأهله الموجودين فيه ؟

تمام يا استاذ سين سين

المكان كلنا بصنعه مش حكر علي حد او مجموعة انما ملك للكل

والناس اللي حضرتك معجب بيهم كلها قولت فيهم كلمة حق ويمكن انا اشد اعجابا بمشاركتهم

[مغتربة]

( مش برضوا 21 يا فندم ؟ )

لا يا فندم يمكن اكون الست الوحيده الى معندهاش مشكله انها تقول عمرها كام

حضرتك كدا بحبح ايدك شويه حط عليهم يجى عشر سنين كمان علشان تظبط معاك ;) ;)

و ان شاء الله حتى لو وصل 121 و لا يهمنى

المهم انا حاسه بايه مش مكتوب فى شهاده الميلاد ايه smk:

تحياتى

تم تعديل 7 ديسمبر 2010 بواسطة مغتربة

[عبير يونس]

بأكتب طبعا كعضوة

و كل اللي زاد عليا شوية ادوات لدمج و نقل الموضوعات و حذف المكرر و تغيير العناوين لمن يطلب ذلك

و ليس لي و لا لأي مشرف حتى الادفايزور نفسه أي انفراد بقرار

للي متصورين ان اي حد فينا يقدر يقفل و يحذف يفتح مواضيع على كيفه و بمزاجه

انا عضوة من 2008

و دخلت قارئة بس يجي سنة كده

طبعاكنت لابدة في باب كندا

و دخلت مغتربين السعودية عشان أشارك في الكآبة و الشكوى من الانظمة العنصرية و الخنقة اللي مخلياني عايزة اهاجر

انجذبت بشكل غير طبيعي لكل الأبواب

و أصبحت أسيرة هنا

ابتعدت مرات كثيرة جدا و عدت في هدوء تام ... من غير هيصة

مشتركة في المنتديات الأخرى و لي مشاركات فيها

عمري ما اصطدمت مع الادارة قبل كده

مش لاني جبانة

و لا لاني بامسح جوخ

لاني بطبعي مبحبش الاصطدام باي حد

احنا داخلين هنا لأسباب مختلفة

و أهدافنا مش واحدة

و الادارة مش مكشوف عنها الحجاب عشان تحس بمشاعرنا اللي جواناما لم نعبر هنا بهدوء و عن طريق المراسلة الخاصة

أشهد بكلمة حق احاسب عليها عند الله

ما في مرة تقدمت كعضوة

بشكوى بمراسلة الادارة و تأخروا عليا

او لم يتخذوا بشأنها الاجراء السليم

على العكس عندما اصبحت منهم

لم استطع المطالبة بحقي عندما جهل عليا البعض

و احتسبته عند الله

و ياه على اللي شفته من بلاوي في كواليس الاشراف

من الاعضاء الذوق جدا ع العام

و ع الخاص

عينيكوا ما تشوف الا النور من كيل الاتهامات و الاهانات التي توجه للمشرفين عقابا ليهم على انهم قبلوا الاشراف

بصراحة و دون مواربة

ليه بنسقط احساسنا بالعجز عن العمل على الغير

عجبني كلام سين سين كالعادةومن قبل ماآكل معاه في اروانة واحدة

ايه كم الهجوم ده

و كأنها خدمة مدفوعة الأجر!!!

هي الموضوعات دي بتاعة مين ؟

مش بتاعتنا كأعضاء؟

مش احنا اللي بنطرحها؟

يا للي بتتساءلوا عن الناس اللي مشيت

و شايفين النص الفاضي من الكوب

ما تشوفوا الناس اللي لسه موجودة

و لسه بتكتب

ما تبصوا ع الناس الجداد اللي كلهم حب و حماس

للتواصل مع الآخرين

يا ناس يا اللي بتشتكوا

فين مشاركاتكم؟؟

ما ترفعوا المستوى حضراتكم؟

و بدال ما نلعن الظلام نقيد شمعة

المحاورات ما هياش كفيلنا على فكرة

يعني ممكن نسيبها بتأشيرة خروج نهائي بمنتهى البساطة

و من غير منتحط بلاك ليستد

و ممكن ناخد تأشيرة خروج و عودة

لما نزهق و نبقى نرجع لما دمنا يروق

و ممكن برضه نفضل قاعدين

ونقرأ بس

او نشارك

كله مسموح

لازم يكون في شويةانصاف

لأن الظلم ظلمات القيامة

وحرمه المولى جل وعلا على نفسه

مرة تانية كلامي ده كعضوة زاد عليها انها دخلت اروقة الادارة و شافت بعينها اللي بيحصل

كلامي هو مسئوليتي الخاصة

و عليه لايجب مطلقا ان يكون الرد عليه موجه للادارة الموقرة

تحياتي

[se_ Elsyed]

اللي أنا متأكد منه حتى الأن إن الزميل العزيز سمبا فتح الموضوع ده لكي نتحدث من القلب .. ولا نلقي اللوم على الإدارة او على الأعضاء ...

كنت عاوز أوضح النقطة دي قبل أن يعتقد أحد إن مداخلتي كانت للوم أو العتاب حتى .

[واحد تاني]

المحاورات ما هياش كفيلنا على فكرة

يعني ممكن نسيبها بتأشيرة خروج نهائي بمنتهى البساطة

و من غير منتحط بلاك ليستد

و ممكن ناخد تأشيرة خروج و عودة

لما نزهق و نبقى نرجع لما دمنا يروق

و ممكن برضه نفضل قاعدين

ونقرأ بس

او نشارك

كله مسموح

عجبني أوي التشبيه ده :)

أنا معايا خروج وعودة متعدد بجدده كل 6 شهور

كل سنة وانتم طيبين

[akramgroup]

بجد فعلا سبحان الله المحاورات هنا ليها طعم تانى

وانا مشترك فى اكتر من منتدى

بس هنا بحس ان فى ترابط وجو عائلى اكتر من اى مكان تانى

وياريت فعلا نبطل موضوع الانتقادات ده

وانا انتقد اذا انا موجود . يعنى اللى مش عاجبه توبيك معين

يلف ويطلع على اى توبيك تانى ومش لازم الجدال العقيم اللى بيزعل الناس من بعض

وبيقلب فى معظم الوقت للشخصنه والمناطق الرماديه اللى انتم عارفينها

وكل واحد يحاول فعلا انه يقدم اضافه للمكان

[shawshank]

عجبني أوي التشبيه ده :)

أنا معايا خروج وعودة متعدد بجدده كل 6 شهور

كل سنة وانتم طيبين

ياااااااااااااه ... لو ممكن تبقى كل أسبوع مثلا بدل 6 شهور هاكون سعيد جدًا.

معلش حبيت بس أقول كل سنة وانت طيب يا واحد تاني

[عادل أبوزيد]

بدأت قراءة هذا الموضوع صباح اليوم ووقتها كان هناك 25 عضوا قاموا بزيارة أو تصفح الموضوع و الآن فى المساء وصل عدد من زار أو تصفح الموضوع أظن 36 عضوا و زادت المشاركات هنا إلى إحدى عشر مشاركة.

ما سبق كان إستهلالا لابد منه

و إنتويت الكتابة هنا منذ الصباح و لم أشرع فى الكتابة إلا الآن و هذا بالضبط ما أراه ربما يكون سببا فى هجران محاورات المصريين ..... لماذا لم أكتب منذ الصباح و لماذا لم أشرع فى كتابة هذه المشاركة منذ إنتويتها فى صباح اليوم ........ السبب بصراحة هو الرغبة فى التجويد أو تحسين مستوى ما سأكتبه و ليتنى إستطعت أن أقول لنفسى فى الصباح "تقدم يا رجل و إبدأ الكتابة .... ما لا يدرك كله لا يترك كله"

و أنا أقولها للجميع تأكد أن ما ستكتبه سيجد آذانا صاغية و ستتلقفه العيون و الآذان بكل ترحيب و لكننا قد نكسل أو نتكاسل فى التعقيب على ما كتبته يداك رغم إهتمامنا و إعجابنا به فلا تتردد

نقطة أخرى قد تأتيك الفكرة و لكنها لم تكتمل فى ذهنك فى صورة موضوع متكامل .... إقتنص الفكرة و أكتب ما تدركه منها و دع الباقى للحوار الراقى هنا و هذا ما سأفعله الآن فعندى فكرة موضوع عن بيجة "والدة زوجتى عمرها 90 سنة" و عن مشكلة نشوة "زوجتى" معها بيجة إنتوت فى صمت أن تصنع عاشوراء و توزعها على الأقارب و الأحباب و لكن هذا العام على الأقل الآن لا يوجد عندنا شغالين ..... هذا موضوع أراه منقوصا و لكننى هذه المرة سأكتبه و سأواصل بنفس الطريقة و أترك الموضوع للحوار الراقى هنا ... الموضوع الآخر لا أملك منه إلا عدة سطور و هو عن مسلسل إبن الأرندلى و الذى لفت نظرى - لم أر الحلقات كاملة من قبل و لكنها حلقة واحدة أو إثنتان - الحلقات تدور عن محامى يلعب بالبيضة و الحجر و يجعلك مبهورا بتلاعبه بالقانون و سؤالى ما هو الفكر الذى يعطيه لنا مثل هذا المسلسل.

نعود لأصل الموضوع أو السؤال الأساسى فى الموضوع و أجيب عليه إفترض حسن النية بالكامل لا يمكن لمشرف أن يأخذ منك موقفا و نقطة أخرى لا تنغلق داخل موضوع واحد و باب واحد تنفس الهواء الطلق فى مواضيع أخرى و أبواب أخرى

أظن أن مشاركتى هذه طالت عن الحد المعقول لمشاركة واحدة

تم تعديل 7 ديسمبر 2010 بواسطة عادل أبوزيد
تصحيح عدد زوار الموضوع و عدد المشاركات

[أبو محمد]

لماذا لم أكتب منذ الصباح و لماذا لم أشرع فى كتابة هذه المشاركة منذ إنتويتها فى صباح اليوم ........ السبب بصراحة هو الرغبة فى التجويد أو تحسين مستوى ما سأكتبه و ليتنى إستطعت أن أقول لنفسى فى الصباح "تقدم يا رجل و إبدأ الكتابة .... ما لا يدرك كله لا يترك كله"

....................

....................

....................

نقطة أخرى قد تأتيك الفكرة و لكنها لم تكتمل فى ذهنك فى صورة موضوع متكامل .... إقتنص الفكرة و أكتب ما تدركه منها و دع الباقى للحوار الراقى هنا

يا أستاذ عادل

الظاهر إن اللى بتقول عليه ده من علامات التقدم فى السن

أصل أنا - برضه - بيبقى عندى أكثر من فكرة لمواضيع .. وبعد شوية ايام كده بلاقينى حطيتها على جنب .. مش بس بسبب حب التجويد .. ومش بس من باب إن ربنا بيحب اللى يبدأ مننا عمل إنه يتمه على أكمل وأجمل وجه ممكن .. لأ .. الصراحة دايما بالاقينى أقول لنفسى "الوقت مش مناسب"

ليه بقى "الوقت مش مناسب" .. لأن بتبقى فيه بعض المواضيع المفتوحة .. وفيها "احتقان فكرى" .. فأتجنب فتح المواضيع اللى بافكر فيها حتى لا يعتقد البعض إن ده توجيه "أيديولوجى" أو توجيه "مذهبى" ، أو توجيه "فكرى" من إدارة المحاورات .. تقدر تقول يا أستاذ عادل إنى كان ممكن أكون أكثر حرية فى استعمال حقى "كعضو" لو لم أكن عضوا فى فريق المشرفين ..

من حوالى أسبوعين بدأت قراءة (بمعنى أصح .. إعادة قراءة) الكتاب الرائع للإمام الأكبر الراحل ، الشيخ محمود شلتوت .. "الإسلام عقيدة وشريعة" .. استوقفنى عنوان من عناوين الكتاب بيقول ..

"الفهم الإنسانى فى الإسلام ليس دينا يتبع"

قلت أفتح موضوع بنفس العنوان .. لأنى لاحظت (وهنا بقى النقطة اللى بتتعلق بعنوان موضوع الفاضل "سمبا") إن عدد كبير ممن هجر المحاورات أو قلل من تواجده فى الموقع ، قد فعل ذلك بسبب هذه الظاهرة : ظاهرة الخلط بين الدين والفهم الإنسانى للدين .. ناس من على جانبى السور (إن صح التعبير) بيقرروا الابتعاد أو التشرنق بعيدا عن الآخر المختلف عنه .. يعنى ممكن ما يبعدش بسبب الاختلاف مع الآخر فى السياسة أو فى أى شئ تانى .. لكن مش عارف ليه عندما يطرح موضوع "الفهم الإنسانى للدين" بنلاقى انتفاخ الأوداج .. وعروق الرقبة تنفر .. و"عذرا" تطول الألسنة .. ويحصل اللى انا باسميه "الاحتقان الفكرى" الذى - فى العادة - تتبعه ظاهرة التشرنق والابتعاد

هى مشكلة إننا نقدر نفهم ونشوف الفاصل بين الدين والفهم الانسانى للدين ؟ ..

أنا شايف إن طاقة جبارة (وهى طاقة الشباب) بيستنفدها هذا الفكر (فكر توحيد الدين مع الفهم الانسانى للدين) وهو الفكر الذى يجرى الترويج له بخبث لينتشر انتشار الامراض الخبيثة التى لا نحس بها إلا بعد فوات الأوان .. لأنها فى العادة غير مصحوبة بألم .. أقصد نعمة الألم .. فيه ناس (سموهم زى ما تسموهم) قاصدين عملية الخلط دى .. لأنها من أسهل طرق قيادة الشباب

يعنى - مثلا - بعد فضيحة الانتخابات اللى ما كانش ليها انعكاس مؤثر على صفحات المحاورات برزت مواضيع "الاحتقان الفكرى" لتلهى الشباب عن مناقشة تلك الفضيحة التى لم تشهدها مصر من قبل

شفت بقى يا أستاذ عادل إن فيه أسباب تانية لإحجام البعض غير سبب الرغبة فى التجويد ؟

[doha]

في سبب ثالث كمان سيدي الفاضل بخلاف الرغبة في التجويد و( الاحتقان الفكري ) . . طبيعه المنتديات بشكل عام من انك متقدرش تحط رأي او مجرد فكرة عابرة تمر في ذهنك بدون مايكون عندك ( الوقت ) والدماغ والمزيد مما ستضطر لاضافته تباعا بعد مايطرح الموضوع ..

كتير جدا بيكون الي عندك مجرد فكرة عابرة عارف كويس جدا انك خلاص قلت الي فيها او على راي الفاضل شريف عبد الوهاب ( خلص الكلام ) .. وكتير بتكون الفكرة دي مينفعش يتعقب عليها يعني تكون انت كتبتها وصغتها بما لايدع مجال للتعقيب .. في حالة زي دي لو طرحنا الفكرة دي بصورتها دي مش هتلاقي حد يكتب رد تالي لها بمعنى ان موضوعها ( مش هينرفع ) وهتضيع في زحمه المواضيع مش هيقراها حد ..

اوقات تانية بتكون الفكرة شيقة ولها اكثر من رافد ممكن الحديث عنه لكن بكل اسف مبيكونش عندك الوقت و ( الصحة ) انك تدخل كل شويه تكتب رد على ردود الآخرين الي ممكن جدا يحجموا عن متابعة الحوار لمجرد ان صاحبه ( مش بيرد عليهم ) ..

اوقات ثالثه بتكون زحمه مواضيع ( الشللية ) وذوي المصالح من الي عندهم الوقت والجهد ودي شغلتهم انهم يضيفوا ردود لمجرد الردود وعندهم ( مشهلاتيه ) بتساعدهم وتكتب معاهم اي كلام ياعبد السلام لمجرد ان يبقى في شد وجذب فتلاقي ان مواضيع كتير مفيهاش مضمون وبتدور كلها حوالين فكرة عقيم طرحت باستفاضه في اول او ثاني مداخله بالكتير في الموضوع ومع ذلك تلاقي شخص داخل يقول كلمتين معارضه لصاحب الموضوع فيرد صاحب الموضوع بكلمتين تانيين ويستمر مسلسل الاخذ والرد مابينهم وتكتر صفحات الموضوع لتخرج منه في النهاية كما دخلته صفر اليدين مستفدتش حتى صلاة النبي .. الغريب ان اصحاب المواضيع من النوع ده هم نفسهم غالبا والاغرب ان المعارضين ـ او من يبدوا معارضين لهم ـ هم نفسهم برضه ملهمش اي مشاركات تانية غير مشاركات ( التشهيل ) في المواضيع المشابهة ..

لكل الاسباب السابقة هتلاقي ان صعب جدا على شخص عنده فكر حقيقي انه يكتب اكتر من موضوع كل كام شهر عشان يقدر يتابع موضوعه ده ويحط فيه من فكره وجهده .. صعب انك تلاقي في المنتديات لهذا السبب موضوعات غزيرة تحمل افكار اكثر غزارة لان الناس الي عندها وقت تفكر بكل اسف مش بالضرورة عندها وقت تنقل لنا افكارها دي ..

عشان كده انا بقترح اقتراح سهل اوي بفكر انا شخصيا اعمله مش لاني صاحبة فكر وانما لان معنديش وقت..

كل واحد مننا يفتح له توبيك خاص بيه .. بمثابة عامود في صحيفة .. يكتب فيه اي فكرة تخطر في ذهنه وكأنها مقالته اليوميه .. فكرة في اي موضوع واي اتجاه وباي صيغه .. يحطها ومش مهم حد يعقب عليها ومش مهم يكون لها تكملة ومش مهم ابدا تكون شديده الاهمية .. وهكذا ومع مرور الوقت هيبقى كل توبيك من دول دسم ومليان افكار وخواطر والمحصلة منتدى مليان بدوره توبيكات دسمه مليانة بالافكار والخواطر..

اعتقد بكده هننقذ الاف الافكار والمواضيع الي بيحجم اصحابها عن طرحها نظرا لطبيعه المنتديات الي سبق وتحدثت عنها .. واعتقد الطريقة دي ممكن جدا تجذب لنا عدد من العقول الي هاجرت من فترة طويلة ومظنش الاحتقان وتوحدية الفكر الانساني مع الدين هو السبب الابرز في هجرتها ..

[أبو محمد]

ومظنش الاحتقان وتوحدية الفكر الانساني مع الدين هو السبب الابرز في هجرتها ..

طرحت هذا كملاحظة ، ولم أطرحه كحقيقة أو أبرز الأسباب

فكرة مش بطالة فكرة "العامود الخاص بالعضو" .. المشكلة هى أننا فى موقع للحوار ولسنا موقع للإملاءات أو موقع صحيفة

بدأت المواقع الالكترونية للصحف من فترة فى فتح باب التعليق للقراء على مقالات الصحفيين و أصحاب الأعمدة فى الصحف .. تعليقات وليست حوارا

أوقات ثالثه بتكون زحمه مواضيع ( الشللية ) وذوي المصالح من الي عندهم الوقت والجهد ودي شغلتهم انهم يضيفوا ردود لمجرد الردود

أريد أن أضيف وجهة نظر قديمة لى وكتبتها فى موضوع قديم .. أريد أن أضيفها إلى ما ذكرتيه حضرتك فى الاقتباس السابق وربما تكون مرادفا لفكرة "الشللية" التى طرحتيها فى الاقتباس السابق

وجهة نظرى هى :

حوار المتفقين فى الرأى مريح ويبعث على السعادة والرضا والاطمئنان ويجعلنا نرى أن "الحياة بقى لونها بمبى .. وانا جنبك وانت جنبى" .. هذا صحيح فالمتحاورون يخرجون من حواراتهم فى غاية الاطمئنان وقد حصل كل منهم على دعم لوجهات نظره ولأفكاره ممن تحاور معهم .. ولكن فى أغلب الأحوال فإن مثل تلك الحوارات وتلك الطمأنينة زائفة خادعة .. فالخارج منها لم يتعرض لأى اختبار حقيقى لأفكاره ووجهات نظره وبالتالى يكون تقييمه لتلك الأفكار ولسلوكياته النابعة منها تقييما زائفا .. وإذا ما اضطرته الظروف إلى الحوار مع غير المتفقين معه فإنه يبدو كمن اكتشف فجأة أن هناك أناسا أخرون تختلف أفكارهم عن أفكاره وتختلف وجهات نظرهم عن وجهة نظره فينزعج ويتحول حواره معهم إلى صراخ وربما تطور إلى أكثر من الصراخ إلى حد الرغبة فى التخلص من ذلك الآخر المزعج المختلف معه فى الفكر .. فإن لم يستطع فإنه يؤثر السلامة ويوليه ظهره باحثا عمن يتفقون معه فى نفس المكان لتكوين جبهة ضد المخالفين لهم فى الرأى ، فإن لم يستطع فإنه يترك لهم الجمل بما حمل ويلوذ بنفسه إلى شرنقة تحميه من شر هؤلاء الأشرار

[جويرية]

انا بفضل ان العضوية في منتدي تبقي سنة مش اكتر

لكن انا سجلت في منتديات كتير ملقتش زي المحاورات

وهيا فعلا من اكتر المنتديات زيارة

فلقيت نفسي برجع المحاورات ، لأن مفيش منتدى زيها

[akramgroup]

ممكن انتهز الفرصه الحلوة دى

وبالمرة واحنا بنتكلم عن انتمائنا للمحاورات

وانه يعتبر بيت العيله

واطلب من العضو النشيط والصديق نايت ماير انه يرجع لبيت العيله

وانه يرجع يزهقنا فى عيشتنا قصدى يرجع يشارك معانا زى الاول

ارجع يانايت احسنلك وانت عارف انا ممكن اعمل فيك ايه

[Damo]

هاضيق الدائرة وأكلمك عن المحاورات .. نرى زملاء اعزاء من دفعة 2006 اللي حضرتك تكلمت عنهم .. ويمكن أعضاء من قبلها كمان ... والله وهذا حصل وموثق في موضوعات لهم .. يغيب يغيب لظروف عمل أو لظروف شخصية أو أنشغال يمكن لفترة شهور طويلة .. ويرجع بالسلامه واول كلمة يقولها : أنا حاسس إن المحاورات إتغيرت !!! مين الناس الجديدة دي ؟!!!! وفين الموضوعات التقيلة بتاعت زمان ؟!!!! وفين الأعضاء التقيلة بتاعت زمان ؟!!!!

طب سؤال لك إنت شخصياً .. المفروض الإدارة تعمل إيه أو الأعضاء نفسهم يعملوا إيه ؟

يعني يوقفوا الزمن لحد ما يرجع ؟

ولا نقول له حاضر بإذن الله هانشتغل في الموضوعات التقيلة وتعالى كُل على الجاهز ؟

ولا تتفق معي أن المكان يُصنع بأهله الموجودين فيه ؟

أو تلاقي ناس داخلة تقول : والله أنا بادخل كتير جداً بس مش لاقي موضوعات تشدني !!!

وكأن الموضوعات دي بتهبط علينا من السماء ... أو كإن هو كل دوره إنه يقرا من بعيد لبعيد ... أو كإنه مثلاً بيشتري جريدة بفلوس أو يدخل مكان يقدم خدمات بمقابل .. وبالتالي الخدمة مش عجباه اليومين دول !!!!

طب ما تجرب تشارك إنت ... ما تجرب تنزع غطاء الخوف وتكتب بحرية عن أي شيء لديك إن شالله لو كانت مشكلة شخصية ....

صح ؟

اللي بيميز محاورتنا مش المواضيع التقيلة

اللي بيميزها الinteractions اللي مابين الأعضاء.

عشان كده لما كتير يغيبوا مرة واحدة بنقول المحاورات كانت أحلى زمان .

اللي بيشدنا خلطة أعضاء المحاورات اللي مش في أي منتدى تاني