بيجة مازالت تصر على عمل العاشوراء

[عادل أبوزيد]

والدة زوجتى بيجة (90سنة) دخلت تقريبا فى مشادة مع زوجتى لإصرارها على عمل العاشوراء و توزيعها على الأقارب و المعارف القاصى و الدانى.

ما سبق كان إستهلالا لابد منه

"خناقة" العاشوراء هذه نموذج للخلافات بين زوجتى و والدتها بيجة تصر على أن تشارك أو أن تتصدر العمل فى المطبخ أى من أفراد العائلة و خاصة الأحفاد لو خطر فى باله أكلة معينة ما عليه إلا أن يلمح فقط أمام بيجة و عندئذ يتم إعلان حالة الطوارئ فى بيتنا و فى مطبخنا حتى لو كان المطلوب لبن العصفور.

و يظل الأمر كذلك حتى يتم إنجاز المطلوب و توصيل الأكلة و توابعها حتى بيت صاحب الطلب أو دعوته إلى تناول تلك الأكلة هنا فى بيتنا.

المهم أنها لا تعترف بالسن و أن إمكانياتها الجسمية الآن ليست كما كانت منذ عام مضى أو حتى عشر سنوات مضت ....

هذه الأيام لا توجد شغالة عندنا و معنى ذلك أن العبئ البدنى فى عمل العاشوراء لابد أن يقع على شخص آخر و هو هنا زوجتى و على الأسطى على السائق المسئول عن توصيل العاشوراء من مدينة نصر الى غمرة و العباسية و المنيل و الدقى و (الروضة لو تانت فوزية موجودة بالقاهرة)

طبعا العاشوراء حالة خاصة من ناحية الحجم ....

منذ أيام جاء لزيارتنا مصطفى طالب طب أسنان فى السنة قبل الأخيرة و هو إبن شقيق زوجتى و بعد تناول الطعام لمح مجرد تلميح أنه كان يظن أنه سيأكل ملوخية - فى هذا اليوم كان الأكل عبارة عن سمك مشوى - قامت الوالدة الفاضلة بيجة بإستخراج مكونات الملوخية من المطبخ و بدأت فى إعداد الملوخية للدكتور مصطفى و عليه الإنتظار حتى يأخذ الملوخية معه فى علبة بلاستيك .......

و هكذا و هكذا

شخصيا و زوجتى نشفق على بيجة من التعب و لا تنسوا أن عمرها 90 سنة و لا نستطيع إجبارها على التخلى عن القيام بدور الجدة الرؤوم لقبيلة كثيرة العدد

[Dreamwithme]

المهم أنها لا تعترف بالسن و أن إمكانياتها الجسمية الآن ليست كما كانت منذ عام مضى أو حتى عشر سنوات مضت ....

الأستاذ الفاضل عادل أبوزيد في رأيي الشخصي كلما بيكبر الانسان كلما يقل اعترافه بالسن أو بالضعف

بالعكس ساعات بأحس أنه بيعافر أكثر عشان يثبت أنه لسه زي ماهوا

و لا نستطيع إجبارها على التخلى عن القيام بدور الجدة الرؤوم لقبيلة كثيرة العدد

طبعا بأشفق عليها وعلي حضرتك وزوجة حضرتك ...لكن فعلا ياريت تحاولوا تستعينوا بشغالة لكن لا تحرموها من القيام بهذا الدور

لأنه حياتها لو تم اجبارها علي تركه ستشعر أنها غير حية وهذا سيؤثر علي صحتها كثيرا

[عبير يونس]

لا أجد ما أقوله غير

ربنا يبارك لكم فيها و في صحتها و يبارك في عمرها و يديها الصحة

لا تحرموها مما تحب حتى لا تقتلوا الحياة بداخلها

الوردة دي مخصوص عشان تيتا بيجة

[أسد]

أسعدني الحظ والتقيت بالوالدة بيجه

كم هو جميل أن تعيش في منزل تحكمه الجده .. أو هكذا تريد ...

لأن هذا المنزل الذي تكون فيه الجده تأمر وتريد أن تطاع ..

يكون ملئ وعامر بالحب .. الذي لا يعرف هذا الجيل غيره

دعواتي لها بدوام الصحة والعافية وطول العمر

[الغريب]

أمرأة من زمن الحب والبركة

عملات نادرة هؤلاء الشوامخ وتلك الشامخات

[pink rose]

ربنا يديها الصحة و العافية

باتمنى و لو ليوم واحد تيتة ترجع للدنيا و تاخدني في حضنها

الجدات و الجدود بركة البيت فعلا

ربنا يديمها عليكم نعمة يا استاذ عادل

[التونسى]

ربنا يبارك عليها .. وينعم عليها بالصحه والسعاده والسكينه.. بقدر ما يعتمل بقلبها من مشاعر حب جياش وعطاء فياض للاخرين سواء أقارب او غيرهم

أكيد فى معظم عائلاتنا المصريه فيه نموذج السيده الفاضله ((بيجه))..لكن بأشكال متفاوته .. أنا عندى نفس النموذج .. بس مذكر وليس مؤنث ..أحد أقاربى. وأحد حكماءالعائله .. يبلغ من العمر 75 سنه .. ومازال يصر على أن يدير شئون محله التجارى بنفسه .. وأحيانا كثيره يستخدم الدراجه (العاديه وليست البخاريه) فى احضار بضائع محله .. رغم أنه ميسور الحال ..وبستطيع احضار عمال لمساعدته ..واولاده على درجه معقوله من الثراء .. لكنه مستمتع جدا بحياته تلك .. ويرى فيها قمة السعادة والرضا .. وينعكس ذلك إيجابيا .. على صحته النفسيه.. ومن ثم صحته الجسديه.. ومن الصعب جدا توقع عمره لمن لا يعرفه ..

فى رأيى الشخصى .. السن مجرد رقم .. لا يشكل اهميه ..أويمثل عائق.. فى استمتاع الشخص بحياته .. ولا يعتبر دلالة ذات اهميه ..عند الحكم على شخص ما.. من حيث تجاربه وخبراته وكذا نشاطاته وصحته الجسديه

تم تعديل 8 ديسمبر 2010 بواسطة التونسى

[masraweya]

ربنا يمتعها بالصحة و العافية

بجد ما تحرموهاش من الحاجات اللي بتحسسها انها موجودة

صحيح بيبقى مرهق ليهم و للي حواليها .. انا مجربة و عارفة

بس ندمانة جدا على كل لحظة ما طاوعتهاش فيها

وجودهم في البيت نعمة كبيرة جدا

[doha]

سبحان الله استاذ عادل .. للمرة الثانية يكون في ذهني موضوع واؤجل كتابته ثم افاجأ بحضرتك بتكتبه او شيء شبيه بيه ويكون للام الفاضلة بيجه علاقه بما فكرت فيه ..

مش عارفه ليه ذكرني موضوعك ده بفكرة كانت بتدور في ذهني من فترة وفكرت اطرحها هنا ثم نسيتها ضمن ما نسيت ..

كنت عاوزه اسأل ياترى كل واحد فينا حاسس بعمره بجد ؟ ياترى امتى مرت علي لحظة حسيت فيها بعمري الحقيقي وياترى احساسي ده كان مفاجيء لي ولا من البدايه وانا عارفه يقينا انا فين من سلم الحياه ..

من كام سنة حصل لي موقف لا انساه .. كنت ووالدي رايحين السنترال نقضي مشوار ولان المنطقة زحام مفيش مكان للباركنج قررنا ناخذ تاكسي .. عاده باخذ تاكسي في مشاوير كتير وعاده برضه سائق التاكسي بينزلني بعيد شويه عن المكان المطلوب لان طريقه بيكون كده . . في اليوم ده السائق نزلنا في المكان المطلوب بالظبط بل واضاف بنبره ابويه محدثا والدي (( لحظة واحده ياحاج اركن لك بالظبط جنب الرصيف )) . والدي شكره بسعاده وامسك بعصايته كويس وهو وبيترجل من التاكسي .

اصبت وقتها بذهول وقعدت افكر .. ايه ده .. عم الحج مين ؟؟ ده بابا ... معقول ؟؟ معقول بابا مش هيقدر يمشي الشويه دول ومحتاج يركن له مخصوص بالظبط جنب الرصيف ؟؟

وفجاه مرت الصور امام عيني متتابعه .. كنت بحس بسعاده والدي وانا بروح معاه مشاويره وهو بيترك لي قياده السيارة وانا معتقده ان ده اريح له مكنتش منتبهة ان نظره فعلا معادش ينفع يعتمد عليه في القياده ..

كنت بستغرب جدا لما بشوفه مازال يصر على امساك عصايته الي ملازماه بعد عملية الظهر وانا مقتنعه انه كويس اهوه ..

كانت كلمات السائق لحظة فارقة في طريقة تعاملي مع والدي الي اكتشفت انه بجد كبر ومعادش بابا بتاع زمان الي كان بيشيلني ويلعب معايا ويجيب لي كل شيء.. بقى بابا جديد محتاج مني احن عليه واهتم بيه وانا الي ادور هو محتاج ايه ..

استغرق الامر من اخواتي وقت لحد مايدركوا هم كمان الحقيقة دي بدورهم وان بابا سند العائلة الي مفروض انه مبيغلطش ومفروض انه مبيعياش ومفروض انه عارف كل حاجه في كل حاجه معادش كده وبقى هو دلوقت الي بيسال وبقى هو دلوقت الي بياخذ راينا وبقينا احنا الي بالنسبة له السند والي مفروض نكون عارفين بنعمل ايه ..

ساعات كتير بقعد مع نفسي وافكر ياترى انا كمان لسه زي ماانا في نفس صورتي الذهنية عن عمري ولا فعلا بدات ادخل مرحلة تانية خالص وبدأت اتحول لشخص تاني خالص ولسه محسيتش ؟؟

من فترة جمعتني الصدفة ببنت اظنها في المرحلة الجامعية اخذتها من باب الدعابة مناداتها لي بلقب ( طنط ) بس تصدقوا بعد فترة اختفت الابتسامه من على وجهي وانا بفكر .. معقول ؟ انا بجد بقيت للآنسة الكبيرة دي ( طنط ) ؟؟

اعتقد والله اعلم ان كلنا ( بيجه ) دون ان ندري ..

[مغتربة]

اثناء قراءتى لوصف حضرتك تداعت فى ذهنى امثله كثيره تحمل نفس الملامح الشخصيه للسيده بيجه و التى استخلصتها من كلماتك عنها ووصفك لها

كثيرات هن من يتشاركن معها فى نفس القوه و نفس العزه و نفس السيطره و نفس الشموخ و اعرفهن معرفه شخصيه او قرات عنهن او شاهدتهن عن قرب بالنسبه لى و عن بعد بالنسبه لهن و لكن اكثر ميزه تجمعهن لفتت نظرى انهن مصريات صميمات

ليس بغريب ان تفرد الدراما المصريه و على راسها ما ابدعه المتبحر فى عرض النماذج المصريه المغرقه فى المحليه اسامه انور عكاشه فى اكثر من عمل درامى نوذج لتلك المراه المتقدمه فى السن و لكنها مازالت القابضه على زمام الامور و المسيطره على مجريات الامور حتى و ان بدت فى الظل و هى فى كل هذا موضع التبجيل و التوقير من كل العائله و التى لم تنل مكانتها المتميزه تلك الا لحكمتها و صلابتها و دهاءها و ايضا حزمها الممزوج بالحنيه

هذا النموذج رايته فى الفلاحه المصريه التى تساعد رجلها فى حقله باعمال تنوء بها الجبال و رغم ذلك هى صامده معه تساعده فى حقله و تراعى اولاده و تخبز و تعجن و ترعى الماشيه و تتحايل على الزمان بكل الحيل لتبقى اسرتها و تصمد و رايته ايضا فى السيده الصعيديه التى تتحمل ظلف العيش و قسوه الظروف لمكانيه و المناخيه و هى فى كل هذا تساند رجلها تدون ان تهن او تضعف

وجدته فى نساء كثيرات مصريات من طول مصر و عرضها و شمالها و جنوبها حتى ان اختلفت اماكنهم فهم يتفقوا فى شيىء واحد و هو الصمود اما قسوه الزمان او المكان او الاشخاص ربما فى خضم معركتهم مع ايا من او كل ما سبق يتحملون صعاب كثيره لكن من الجانب الاخر تصقل شخصيتهم بمرور كل تلك الاحداث و الازمنه عليها فتتوهج بالحكمه و الصلابه و القوه

و هى اشياء لا يمحيها مرور الزمن لانهن لا يعترفن بالزمن كعامل نكسير و هد من الاساس

فهن يختزلن الزمن داخلهن و لا يختزلهن هو فى دوامه الحياه

ستجد دائما ان روحهن عفيه رغم انه قد يوجد حولهن ارواح كثيره شائخه رغم ان اصحابها مازالوا فى عز الشباب

تحيه واجبه لهن جميعا فكلما تواجهت مع قصه ايا منهن اتذكر الاغنيه الصعيديه التى تقول

انا غلبت الجبل و اسالوه عنى

و لكن الفارق ان كل واحده فيهن غلبت جبال و ليس جبل واحد

و لهذا احملك امانه سيدى الكريم تحيه واجبه للسيده بيجه تستحقها و عن جداره

تحياتى

[لماضة مصرية جدا]

السلام عليكم و رحمة الله و بركاته

يا استاذي الجميل اوي....مش عارفة اشكر حضرتك ازاي علي مساحة دافية الواحد اتونس بيها

كان امل حياتي....اني اعيش مع جدتي....لكن كلتاهما توفاهم الله بعد ولادتي بسنة....(قدم الخير انا صح)

لكن لما بشوف ماما في المطبخ و هي مجمعة الحفيدين حواليها....اوقات كتير بحس بغيرة

لاني معشتش كل اللحظات الحلوة دي

انا عندي امي....عاملة كراسي صغيرة بحجم الحفيدين....و كل واحد عارف كورسيه....و عارف البلاطة اللي المفروض يحط عليها الكورسي و يقعد

ماما لما بتكون بتشتغل في المطبخ.....بتدي للعفاريت....حاجات م اللي هي بتعملها....يعني هم مش بس متفرجين هما مشاركين...حتي لو كان اكل افتراضي او ني

اتعلمت من ماما ان الطبيخ.....بيبقي احلي لما بنربطه بحكاية

و عشان كده لما بكون في مصر و الحفيدين في رجليا...بنستقر في المبطخ.....في الاول استعبطت نفسي اوي من فكرة اني اتكلم مع اني كائن رغاي يعني

لكن احساس انك بتعمل حاجة مفيدة و فيه اطفال حواليك مصدقينك اوي و انت بتكلم البصل....و بتعتذر للطماطم لانك هتحولها عصير.....و بتسال الملح في علبته هتديني يا علبة منك اد ايه النهاردة

يمكن حضرتك استاذي الجميل قلقان علي تيتة بيجة....بس اللي حضرتك متعرفوش انه فيه حياة كاملة....و مصنع بني ادمين بحاله عقله و احساسه و مشاعره و خياله بيتشكل....في طبق العاشوراء دوت

ربنا يبارك لحضرتك فيها...و تكون دايما مصدر بركة و نور و سعادة محببة للنفس

واتفق مع الزملاء جدا في ضرورة ان حد يساعدها....في صنع....حياة العاشوراء....لانه مش مجرد طبق

سلامي كتير استاذي لتيتة....و قولها.....بقي ليكي معجبين يا تيتة...و لما ننزل مصر....هنحب نتعرف علي حضرتك اوي....و اكيد هنبقي مستنين طبق العاشوراء البيجاوي

ميرسي اد البحر....علي الاحساس الحلو ده

مسا حضرتك....بحلا...طبق العاشوراء من ايدين تيته بيجة

[قلب ابيض]

انا بحس انى بيجه من دلوقتى ...

مش بالعمر ربنا يطيل فى عمرها ويملاه صحه وبركه يارب

بشوف نفسى جده.. لاحفاد لو طلبوا من السما حته هاطير واجيبها لهم

امى ربنا يخليها لى بيجه ...امى بتبعت لى من مصر من اللى بتاكله هى هناك ...وبحس بحلاوته وجماله مع انها مابقتش تتقنه زى زمان

بس فيه نفس امى وريحه تيته لولادى

بحاول اكون ربعها وياااارب يديك الصحه يا تيته بيجه ويا مامتى وكل الامهات

ويار ب تصبحوا كلكم جدات .....وانا اولكم

ايام جميله ولحظات دافيه حلوه فكرتنا بيها ايها الاب الحنون كبير العيله بابا عادل

كل عاشورا وانتم طيبين

[أسد]

http://www.youtube.com/watch?v=9eLpLWBldww&feature=related

[خالد التهامى]

الاستاذ / عادل

اتمنى ان اتعلم معنى العطاء بدون انتظار رد مثلها

اطال اللة فى عمرها وبارك فى ابنائها واحفادها

تم تعديل 11 ديسمبر 2010 بواسطة khalid altohamo