فيروس الأدب الشرق أسيوي

[se_ Elsyed]

اللي عاشوا في الخليج أو تعاملوا مع مواطني بلاد دول شرق اسيا .. الفلبين .. ماليزيا .. اليابان .... الصين ..... إلخ

هايلاحظوا حاجه غريبة جداً .. وهو إنتشار فيروس الأدب عندهم بطريقة مرضية ..

يعني .... حاول كده تاكل مثلاً في مطعم عماله من الفلبين أو الصين ... وشوف الإبتسامة وشوف طريقة الخدمة .. وشوف عدم التأفف من طلبات الزباين المتكررة واللي ساعات مستفزة وشوف بيكرر كلمة Sir كام مره وهو بيكلمك ..

أما عن ... التمريض .. فحدث ولا حرج ... بصراحة ... لم أرى زي الممرضات الفلبينيات في أدبهم - ومش عاوزين كلام كتير وتلميحات عشان المنتدى متراقب ...... وتحيا جمهورية مصر العربية - .... وأعلم تماماً إنهم مش بتلك الكفاءة اللي عليها الممرضات المصريات مثلاً بدليل إني شوفت هنا مستشفيات بتعتمد إعتماد كُلي على ستاف تمريض مصري في غرف العمليات أو الـ ICU لكن الإحتكاك المباشر بالمرضى والتعامل معهم خصوصاً في أقسام التنويم ... فالممرضات الفلبينيات بيبقوا على أعلى مستوىوهما اللي واكلين الجو هنا .. أنا ساعات بيتهيألي إنهم مركبين عجل في رجليهم وما بيهمدوش .. وبرضوا في منتهى الأدب والأخلاق وإبتسامة لا تفارق مُحياهم - أول مره أقول مُحياهم دي .. لكن هي جت كده -

أعتقد إن الذكاء الإجتماعي مطلوب في كل امور الحياة .. يعني إذا كنت أنا بكفاءة قليلة في عملي .. فإن طريقة معاملتي الحسنة للناس وأبتسامتي ممكن أن تعوض ذلك النقص .. بالتأكيد طبعاً إذا كنت اعمل في مكان خدمي أتعامل فيه مع الناس بشكل دائم ...

نرجع مرجوعنا ..

إيه بقى .. ها ؟

يعني إيه السبب إن الناس دي كده ؟

الأكل

ولا المياه

ولا الهوا عندهم بيخليهم كده

زميلي المحاوراتي العزيز المختفي والمشغول دائماً الدكتور Bodi لما بنجلس سوا ويحكي لي على مغامراته وفترة دراستة في اليابان وعن الناس اللي مؤدبه أدب يستفزك .. بأبقى مشتاق أسمع أكتر عن الحاجات اللي للأسف إفتقدناها دي

فناس تقول لي : يا عم اصلهم إتربوا على كده

أيوه اتربوا ليه على كده ومين اللي رباهم على كده وإمتى بالتحديد من أنهي جيل يعني بدأ الفيروس ده عندهم ؟

بالمناسبة .... الإنسان بينه ويبن نفسه إن شالله يكون بيشم شرابات إخواته وبيعمل اللي ما يتعملش ... مالناش دعوة ... نحن لنا الظاهر .. ولنا ما يصدر من الشخص من أفعال علانية

لإني عارف إن في ناس هاتقول إن الفلبينيين بالذات شاربي خمر درجة أولى ... ولعب القُمار ده بيجري في دمهم ... ناهيك عن أمور - داخلية - أخرى مالناش دعوه بها .... فأنا لما أروح مطعم أو مركز صيانة مثلاً وألقى معاملة في المنتهى الإحترام من ناس أول مره أتعامل معهم ... مش هاجيب الواحد واقول له : إفتح بؤك ياض وقول حاحا .... أو أسأل البت الممرضة هي بتعمل إيه في الويك إند في البطحا هنا هههههههههه

لا يستطع أحد أن يُنصب نفسه إلهاً ويحاسب الأخرون ...

على العكس بقى ..

تلاقي ناس بتتعامل معاهم .. بيبقى عند إنطباعات مُسبقة عن طريقتهم في التعامل ... منتهى العدوانية ... منتهى التعجرف والتكبر وكإن رايح تشحت منه ..... وجه عابث يدل على إنه بينضرب قبل ما يخرج من بيتهم كل يوم وييجي يطلع زهقه علينا ..

نرجع تاني عشان ما نتشتتش ... مين السبب في الأدب .. الحسب ولا النسب ؟

[اغابي]

ايوهههههههه كدا

علشان الاسويين عندهم الابتسامة واحنا فاهمينها غلط كمنهج تطبيقى وعيب خلقى

الابتسامة - انا عفريتي الراجل او الست اللى مكشرة وعاملة 111 فى جبينها بتبقى شكلها كئيبة و عجوزة - يععععععع

فيها ايه انى ابتسم بطريقة لطيفة ومؤدبة - مع اى حد بيسالنى عن حاجة - انا ما بقولشي اتصاحبى عليه

وما بقولشي اديها ضحكة الياهو ولا تتمايلى ولا توقفى معوجة

فى ابتسامة رقيقة تقابلى بيها كل الناس حتى اعدائك

فى ابتسامة فى الشغل بتحرج اللى قدامك او اللى يتعدي حدوده

فى ابتسامة خجل وادب وترحيب

التعامل مع الناس دى صنعة يا استاذ س س لازم قبلها تدرس علم نفس

وتذاكر كويس المناهج الكونية لطبيعة البشر علشان مش كل الناس من نفس البيئة ولا من مستوى تعليم واحد او ثقافة واحدة لكن فى تعبيرات انسانية مشتركة بين الجميع

الانسان البسيط اللى بيسالنى عن ورقة فى ايده فيها عنوان وهو مش عارف يقراه

ومش عارف بتصرف ازاى لما بابتسم له وهو طبعا بيعتذر كتير على انه عطلنى

مفيش مشكلة هات الورقة مكتوب فيها كذا كذا بابتسامه هادية بافهمه وبطمنه

وهكذا نماذج كتير بتقابلنى فى حياتى اليومية - اصلى انا متاملة جدا المواقف اللى بتحصل حوالية كل يوم وبدقة شديدة

انا معاكم يا استاذ س س - كمل الوجبة الدسمة دى

كمل يا مبدع وموضوعاتك المميزة - كمل

تم تعديل 9 ديسمبر 2010 بواسطة اغابي

[physicfor]

بصراحة انا لما ادخل محل فيه مصرين بخرج ومحبش اتعامل معاهم لانك فعلا تحس انك رايح تشحت منهم والسبب فى ذلك بسيط اللى بيروح يجيب ناس من مصر بيختار اسواء فئة فى المجتمع ويجيبهم هنا يفضحونا ويكونو مثال سئ لمصر والمصرين

لكن الحقيقية تقال انا مرة زمان بس مش فاكر امتي شفت واحد بياع مصري تعامله ممتاز

ياراجل ده انا رحت جاد اللى فى الرياض اشتري فول وطعمية حسيت اني بشحت منهم

الحقيقة نحن اولى بهذا الخلق من غيرنا

فحسن الخلق باب من ابواب الرزق

وتبسمك فى وجه اخيك صدقة او كما قال صل الله علية وسلم

[se_ Elsyed]

بصراحة انا لما ادخل محل فيه مصرين بخرج ومحبش اتعامل معاهم لانك فعلا تحس انك رايح تشحت منهم والسبب فى ذلك بسيط اللى بيروح يجيب ناس من مصر بيختار اسواء فئة فى المجتمع ويجيبهم هنا يفضحونا ويكونو مثال سئ لمصر والمصرين

لكن الحقيقية تقال انا مرة زمان بس مش فاكر امتي شفت واحد بياع مصري تعامله ممتاز

ياراجل ده انا رحت جاد اللى فى الرياض اشتري فول وطعمية حسيت اني بشحت منهم

الحقيقة نحن اولى بهذا الخلق من غيرنا

فحسن الخلق باب من ابواب الرزق

وتبسمك فى وجه اخيك صدقة او كما قال صل الله علية وسلم

لا أتفق معك يا أخي الكريم في هذا التعميم

أنا ساكن في الملز ... وبأتعامل مع جاد بالذات في شارع جرير والتاني اللي في مجمع المطاعم اللي في التخصصي ... ولا عُمري لقيتهم مكشرين أو بيعاملوا الناس وحش ..

بالعكس ... في رمضان ده روحت قبل الفطار بدقائق وإنت عارف بيبقى زحمه موت إزاي ... ولقيت كبسه عليهم من البلدية ووزارة الصحة .. وإنت عارف إن الاستاف كلهم مصريين . بامانة شديدة الناس خدوا بعضهم ومشيوا وما كتبوش ولا ملاحظة لإن المحل على مستوى عالي من النضافة ..

[dongol]

اولا الناس دي اتربت علي كده

يعني يقول شكرا و حضرتك و مع السلامة ده طبيعي جدا في حياتهم

نيجي بقي لحبايبنا المصريين طبعا موضع الادب ده مش فطري عندهم زي بقيه مخاليق ربنا

و الحل الوحيد انه لازم يبقي في سيستم صارم في العمل يكون فيه ثواب و عقاب و يطبق علي الكبير زي الصغير

يعني مش علشان انا ابقي ابن خالة المدير ابلطج علي الزباين زي ما بيحصل في مصر و مفيش حد يقدر يكلمني حتي لو الزباين اشتكيت

شوفوا الناس اللي في كنتاكي او ماكدونالدز في مصر بيتعاملوا بادمية ازاي مع الزباين و مش هقول بادب لانه فيه ثواب و عقاب و اي حد بتيجي منه شكوي بيقولوله مع السلامه و خليك قاعد جنب مامي في البيت لغاية ما تتعلم الادب.

الموضوع عبارة عن سيستم شغل صارم بيطبق علي الجميع و شوف النتيجة

[Howayda Ismail]

والله حضرتك ابن حلال انا لسة يادوب داخلة البيت وانا فى طريقى فكرت اكتب موضوع عن كده

نزلت رايحة السوق اصل خدامتى الفلبينية اجازة كالعادةههههههههه

كنت صاحية من نومى متفائلة ومبتسمة على الاقل متصالحة مع نفسى الا وافوجئ بحالة من الكآبة على وشوش الناس

كلها دون استثناء وحسيت انى انا اللى مش طبيعية واللى زعلنى اكتر ان الحزن لم يعد مقتصرا على كبار السن حاملى

المسئولية والهموم والمشاكل لكن لاقيته على وشوش الاطفال والشباب الى معندهمش مسئوليات غير مذاكرتهم وكان الدنيا

اغتالت الفرحة بدرى منهم قبل اوانها طيب ليه وصلوا للحالة دى

على راى عبد الباسط حمودة لاقيت روحى فجاة ............ونزلت دمعتى بجد والله اتعديت منهم بقى او زعلت على زعلهم

المهم رجعت البيت 111 زى مااغابى قالت كده وشكل الراجل حيكرشنى انهاردة لانى حاسة جوايا بقيت كده

فتشوا عن العدوى ثم العدوى ثم العدوى

[Om Zayd]

السلام عليكم و رحمة الله و بركاته

التربية و التدريب

حكيتلكم على الاولاد الصغيرين ازاي بيعلموهم يستنوا دورهم في المراجيح و يقولوا لو سمحت و شكرا و آسف

و حكيتلكم كمان على العاملين مع الزباين .. ازاي لازم يربوهم على الابتسامة و الذوق و الاحترام

احيانا ده بيبقى لدرجة تخنق "حضرتك هتدفع 100 استرليني غرامة .. ابتسامة واسعة .. يومك سعيد .. أقدر أساعدك في حاجة تانية؟" .... تبقى هتولع

[عبير يونس]

الفكرة المسبقة هي السبب

احنا اتعودنا دايما نلاحظ الآخرين و نراقب ردود أفعالهم

و مفيش مانع نحلل شخصياتهم كمان

كل ده و ما بناخدش بالنا من نفسنا احنا

يعني انا أؤمن تماما اني بفضل الله أقدر آخد ابتسامة من أي حد مهما كان كشر

لأني ببساطة بابتسم أنا الأول

و بنفس هادية و صافية ابدأ كلامي أو طلبي

و الحمد لله ده بيحصل معايا كتير جدا

الا بقى لو اللي قدامي ده انسان مفرط في القتامة أو السلبية

و احساسه بما و من حوله توقف

او واخد أجازة طويلة

ده بيبقى صعب شوية

انما مش مستحيل

كل بني آدم له مفتاح خاص جدا

و المعافرة مع البني آدم بمفتاح تاني تأتي دائما بنتائج عكسية تماما

و يا سلام لو حاولت بطفاشة

و اعتقدت انك تقدر

فدي بقى انت و بختك

يا صابت

يا اتنين عور

كثرة التحليل للناس

و "تفلية" كلامهم كلمة كلمة و حرف حرف

بجد مبتوصلش لأي نتيجة

سيب احساسك بالناس هو اللي يحركك

و خليك مبادر

متستناش الآخر يبتسم في وشك

بادر انت بالابتسامة

سبحان الله

ربنا جعل القاء السلام على من عرفت و من لم تعرف

على وجه الاستحباب

و مش فرض

لأن الموضوع ده بيبقى صعب على كتير من الناس

اللي بيخجلوا مثلا

أو اللي بيعتبروا المبادرة بالود نقص

و الا بيهتموا اوي برد الفعل و يخافوا من رد الفعل السلبي

او بيخافوا من الرفض من الآخرين

جرب و بادر بالسلام و الابتسامة

و لا تنتظر الآخرين

فالمشاعر تنتقل كالعدوى

أيا كان نوعها

فإذا رأيت ان من يتعامل معك متجهم أو يعاملك بعنف

فأسرع و اخرج من جيبك مرآة صغيرة و انظر إلى وجهك

ربما كنت انت من بادرت بالتجهم أو العنف دون أن تدري

من حسن الحظ

ان الابتسامة ببلاش

لا و أكتر من كده

قوله صلوات الله و سلامه عليه

" تبسمك في وجه أخيك صدقة"

[Dreamwithme]

أعتقد إن السبب هو التربية فعلا والفرق بينا وبينهم أنهم قصدي شعوب شرق أسيا

تمسكوا بالتربية والحفاظ علي ثقافتهم الخاصة بالرغم من العولمة بعكسنا وبرضه أنا مؤخرا

حاسه أن أصلا مفيش حاجة أسمها تربية في مصر .كتير من الأباء والأمهات بيتعاملوا مع أولادهم إن المهم يأكلوا ويشربوا ويروحوا المدرسة

ومش مركزيين في التربية الأخلاقية والروحية ... وغالبا الطفل بيأخد عاداته من التليفزيون أو أصدقائه وأيضا طبعا والده ووالدته اللي كتير

مبيخدوش بالهم من تصرفاتهم أمام أطفالهم.

يعني باختصار هم تمسكوا بالتربية وتمسكوا بالسلوكيات الحسنة في التعامل مع الآخرين

وإحنا لم نتمسك بالتربية وللأسف الشديد الأجيال الجديدة لاتؤمن بمعني احترام الأخرين وقيمة حسن التعامل

فبالتالي بالنسبة لهم حسن التعامل أصبح سجية شئ طبيعي جدا

وعلي العكس أصبحنا كل واحد ماشي بدماغه زي ماهو اتربي .

[se_ Elsyed]

على فكرة الموضوع مالوش دعوه بالحالة الأقتصادية .

الفلبين على سبيل المثال بياكلوا تراب ... وبلد تعبانه وعندها مشاكل كتيره جداً وتقريباً مصدر الدخل الأول لها هو تحويلات العاملين بالخارج .. وهي البلد رقم واحد في تصدير الممرضات والعمالة المنزلية للعالم كله

أيوه يا دنجل : ليه أتربوا على كده ؟

ما هو ده اللي عاوزين نوصل له يمكن نبقى زيهم ؟

وأوعى حد يقول لي نظام سياسي .... فالصين بلد شيوعية وحتى وقت قريب كانت الدبابات بتدهس المتظاهرين في ميدان تيانانا مين أو الميدان السماوي زي ما بيقولوه ؟

سماوي يعني بيطلع أي حد يتظاهر على السما على طول ههههههههه

والفلبين كان عندهم ديكتاتور " فرديناند ماركوس " بهدل كرامتهم لحد ما خلعوه سنة 86 وبيفتحوا دواليب الوليه إميلدا ماركوس مراته لقوا عندها 3000 جوز أحذيه ولا محل باتا في زمانه

طب إيه ؟

[Howayda Ismail]

أعتقد إن السبب هو التربية فعلا والفرق بينا وبينهم أنهم قصدي شعوب شرق أسيا

تمسكوا بالتربية والحفاظ علي ثقافتهم الخاصة بالرغم من العولمة بعكسنا وبرضه أنا مؤخرا

حاسه أن أصلا مفيش حاجة أسمها تربية في مصر .كتير من الأباء والأمهات بيتعاملوا مع أولادهم إن المهم يأكلوا ويشربوا ويروحوا المدرسة

ومش مركزيين في التربية الأخلاقية والروحية ... وغالبا الطفل بيأخد عاداته من التليفزيون أو أصدقائه وأيضا طبعا والده ووالدته اللي كتير

مبيخدوش بالهم من تصرفاتهم أمام أطفالهم.

يعني باختصار هم تمسكوا بالتربية وتمسكوا بالسلوكيات الحسنة في التعامل مع الآخرين

وإحنا لم نتمسك بالتربية وللأسف الشديد الأجيال الجديدة لاتؤمن بمعني احترام الأخرين وقيمة حسن التعامل

فبالتالي بالنسبة لهم حسن التعامل أصبح سجية شئ طبيعي جدا

وعلي العكس أصبحنا كل واحد ماشي بدماغه زي ماهو اتربي .

لا يادريم فى ناس كتير بتربى ولادها كويس لكن مااصبحش البيت وحده اللى بيربى ابسط حاجة

الاولاد فى المدارس بيعتبروا الولد المؤدب ده طفل معقد ومش مريح بالنسبة لهم وممكن يبقى

تسليتهم واضحكوتهم وبتوصل ضربه على قفاه مستضعفينه متوقعين انه مش حيرد الاساءة وده كتير

بيحصل فى مدارس الاعدادى والثانوى بالاخص بغض النظر عن مستوى المدرسة الاجتماعى لان الاعلام السئ

لرفع قيمة البلطجة والفهلوة واصل لجميع الطبقات دون تمييز

الاعلام المسئول الاكبر لانتشار قلة الادب والذوق للدرجة السيئة دى مع عوامل تانية كتير

[se_ Elsyed]

أعتقد إن السبب هو التربية فعلا والفرق بينا وبينهم أنهم قصدي شعوب شرق أسيا

تمسكوا بالتربية والحفاظ علي ثقافتهم الخاصة بالرغم من العولمة بعكسنا وبرضه أنا مؤخرا

حاسه أن أصلا مفيش حاجة أسمها تربية في مصر . .

ليه يا فندم ؟

يعني كلنا شوارعيه وعيالنا مش متربيين ؟

بالعكس ... مازلت الأغلبية هي اللي متربية ... واللي مش متربي بيبقى منبوذ والناس بتتحاشاه

لكن أتفق معكم جميعاً على عنصر التربية ....

مش إحنا كنا بنضحك زمان على النصائح اللي مكتوبه على ضهر الكراسات اللي كنا بنستلمها في المدرسة بلوشي .. بتاعت إحترام الكبير ومساعدة الصغير والكلام ده

وهي أساساً كانت قواعد مهمة جداً وكانت زي البذور اللي بتتزرع فينا وإحنا صغيرين

- بعد رمضان بأسبوع .. كنا بنتغدا أو قول بنفطر في مطعم هنا ... وكنا صايمين الستة أيام البيض في شوال ... ومتظرين المغرب .. لقيت أخ سعودي جاي بيسألني بإحترام عن موعد الإذان فقلت له .... هو هو نفس الشخص بقى كان معاه أولاده وأكبرهم عنده 5 سنوات بالظبط ... فأبني عُمر قاعد بيلعب بلاي ستيشن على جهاز في المطعم موجود في قسم العائلات عشان الأطفال يلعبوا ولسه ما كملش دقيقتين .. إلا والولد المفعوص جاي بيشده ويقومه عشان يلعب هو ... عُمر 10 سنوات دلوقت .. وده قد كده ومش باين من الأرض .. فعُمر قال له : إستنى هاخلص الدور وأخليك تلعب ... وانا سامع وشايف كل ده .. يقوم الولد بكل ثقه قايل له : لأ .. هالعب دلوقت .. أنا سعودي وداخل المطعم ده بفلوسي !!!

فقلت في بالي .. ربنا معاك يابني ده أنت هاتشوف أيام سودا ..

وتركت عُمر يتعامل معاه ويلقنه درس أعتقد إنه مش هاينساه ...

نموذج أخر لطفل سعودي برضوا بعدها بأيام بسيطة ... كنا في الملاهي .. والعيال بتلعب اللعبة بتاعت سباق السيارات والحروب بتاعت البلاي ستيشن ذات الشاشات الكبيرة دي ... وجنبنا لعبة أخرى بتبقى عامله زي الملقاط كده والطفل يوجهها لأسفل عشان يلقط بها لعبة أو دبدوب أو حلويات ... جنبنا على طول .. فلقيت الولد ده وعنده يمكن 11 سنة جاي بيسلم على الأولاد الصغيرين ولادي وبيقول لعلي إبني إتفضل الهدية دي مني .. سلام عليكم وراح ماشي ... منه لنفسه كده .....

هذه نماذج موجوده بيننا ...

-----------

ونماذج أخرى بقت معروفه زي ورقة البوسطة ... دول شمال أفريقيا وخصوصاً المغرب والجزائر ... عنف لا متناهي مزروع بداخلهم ... واللي عايش في أوروبا عارف مين أكثر الجاليات عنفاً وشغباً وخصوصاًفي فرنسا مع إنه ممكن يكون من الجيل الثالث اللي الجيل اللي قبله نشأ وترعرع في هذا البلد يعني المفروض الفيروسات اللي عنده دي تكون إنتهت .. لكن هيهات

[akramgroup]

بردو موضوع التربيه هو الاصل

واغراس مبادىء معينه فى الاطفال من صغرهم زى اهمية

الابتسامه دى بصراحه احنا مش متعودين عليها ولاهى فى ثقافتنا

تستطيع يا بني أن تغير قناعات الناس ...

وأن تستحوذ على قلوب الناس وهي لا تشعر !

ليس بالسحر ولا بالشعوذة ... فبابتسامتك .. وعذوبة لفظك ..

تستطيع بهما أن تسحر !!

ابتسم ... فسبحان من جعل الابتسامة في ديننا..

(عبادة) وعليها نؤجر !!

تم تعديل 9 ديسمبر 2010 بواسطة akramgroup

[Dreamwithme]

أستاذة هند ....أستاذي س س ...أنا أسفة أني أسأت التعبير

أنا مش قصدي إن أولادنا كلنا شوارعيه ومعندهمش أخلاق

لكن زي ما أستاذة هند قالت أصبح الناس بتتريق علي الطفل المهذب

يعني في حاجات صغيرة جدا معادتش موجودة في مجتمعنا زي الأول

يعني أنا لغاية دلوقتي مابكلمش حد غير ما أقول له حضرتك ولوسمحت ويا أستاذ فلان

حتي لو كان عامل بسيط أو شخص أصغر مني جدا في السن أو الوظيفة وكتير جدا بلاقي الناس بتتريق عليا

وبتستغربني إذا قمت وقفت وتركت ما أفعله لأسلم علي عاملة النظافة اللي في مكان عملي وأرحب بها

عندما تدخل مكتبي.....

وبعدين زي ما حضرتك قلت

مش إحنا كنا بنضحك زمان على النصائح اللي مكتوبه على ضهر الكراسات اللي كنا بنستلمها في المدرسة بلوشي .. بتاعت إحترام الكبير ومساعدة الصغير والكلام ده

المجتمع بنسبة كبيرة في قيم فقدت منه زي الابتسامة والمعاملة الحسنة

وده سببه أنهم تمسكوا بثقافتهم وقيمهم جدا وإحنا لم نتمسك بنفس القيم اللي كانت بتحكمنا زمان

[se_ Elsyed]

بس يا دريم ما فيش أي تعارض بين كون الإنسان مهذب .. وكونه ضعيف ...

فليس كل صاحب جسد ضئيل مهذب

أو كل صاحب جسد ضخم غير مهذب ...

والدليل .. الصينيين في تعاملهم مؤدبين جداً .. وكتير منهم بيلعبوا ألعاب الدفاع عن النفس وبيجيدوها ...

بل أننا أعتقد إن قوة الإنسان المفروض تزيده تواضعاً وأخلاقاً .. لإنه مش محتاج يستعرض قوته أو يتظاهر بذلك لغنه قوي بالفعل ..

[Dreamwithme]

أنا مع حضرتك مفيش علاقة بين التهذيب والضعف

لكن للأسف فعلا الأطفال بيسخروا من بعض وبالذات المراهقين الأولاد

طبعا ده مش تعميم ...البعض منهم بيشبهوا الولد المهذب بأنه بنوتة

أنا شخصيا اتعاملت مع صينين ويابنيين ....بصراحة مبقتش مصدقة

ونفسي جدا نبقي زيهم ....ناس مهذبة جدا جدا جدا

المشكلة ترجع للتمسك بالعادات والقيم الخاصة بكل شعب

أنا أنسة ومعنديش أطفال فبالتالي كلامي عن التربية مجرد كلام نظري

أو من تأملي في حال الأطفال اللي بأشوفهم ياتري نقدر نعمل إيه عشان نرجع القيم اللي إحنا اتربينا عليها

أنا مرة كنت في انتظار طبيب في العيادة وجت واحدة ومعاها بنتها البنت عندها 7 سنين

كانت بتحجز عند الدكتور ...وهي متعودة علي التمرجي .....بصراحة اتصدمت من طريقة هزار البنت وطريقة كلامها مع التمرجي

بالرغم من أنه راجل كبير ...بتكلمه باسمه مجرد وتقوله هأضربك وكلام تاني بعدم احترام ومامتها بتضحك ...كان نفسي بجد أكلم الأم

بس لاقيتها بتضحك وبتكلم التمرجي بنفس الطريقة فسكت.

[se_ Elsyed]

الحل بسيط جداً ... التربية الصحيحة .. إحترام الكبير .. التواضع .... القوة ليست معناه البلطجة .. ولا الضعف معناه الإستسلام ... والمؤدب مش هو الضعيف ... لكن الضعيف هو اللي قوته في لسانه فقط مش في جسده أو عقله ... والقوي هو اللي قوي العقل والحُجة ويقدر يدافع عن نفسه حتى بأستخدام القوة الجسدية اللي مش شرط تكون متوفره قوي .

[se_ Elsyed]

أن

...كان نفسي بجد أكلم الأم

بس لاقيتها بتضحك وبتكلم التمرجي بنفس الطريقة فسكت.

على فكره

الموضوع ده ما فيهوش هزار أو نقاش .. يعني الأُسرة اللي بتعود الطفل على قلة الأدب ... وأشتم عمو يا حبيبي ... وورينا بتضرب بابا على قفاه إزاي .. ويا عم ده لسه صغير ومش فاهم حاجه ... هي نظرية 1+1 = 2 .. ومستحيل تساوي إتنين ونصف .. يعني المُحصلة . إن قلة الادب اللي فرحانين بها دي أول ما الطفل هايستخدمها .. هاتبىىق معاهم هما ..

ده على مستوى الطفولة ..

أما لما يشب عن الطوق ويبقى حلو كده ... فمش بعيد توصل لمد الإيد أو القتل في بعض الأحيان .... لإنه بالتأكيد هايطور نفسه وبالتأكيد هايعرف إن أبوه وأمه مُهزئين ويستاهلوا اللي يجرا لهم ..

والطفل زي العود الأخضر . إذا نشأ معوجاً .. فمستحيل يتم تقويمه على كِبر ..

كان لي موضوع قديم إسمه

عيب يا ولد .. غلط يا بنت

[عبير يونس]

أنا مع حضرتك مفيش علاقة بين التهذيب والضعف

لكن للأسف فعلا الأطفال بيسخروا من بعض وبالذات المراهقين الأولاد

طبعا ده مش تعميم ...البعض منهم بيشبهوا الولد المهذب بأنه بنوتة

أنا شخصيا اتعاملت مع صينين ويابنيين ....بصراحة مبقتش مصدقة

ونفسي جدا نبقي زيهم ....ناس مهذبة جدا جدا جدا

المشكلة ترجع للتمسك بالعادات والقيم الخاصة بكل شعب

أنا أنسة ومعنديش أطفال فبالتالي كلامي عن التربية مجرد كلام نظري

أو من تأملي في حال الأطفال اللي بأشوفهم ياتري نقدر نعمل إيه عشان نرجع القيم اللي إحنا اتربينا عليها

أنا مرة كنت في انتظار طبيب في العيادة وجت واحدة ومعاها بنتها البنت عندها 7 سنين

كانت بتحجز عند الدكتور ...وهي متعودة علي التمرجي .....بصراحة اتصدمت من طريقة هزار البنت وطريقة كلامها مع التمرجي

بالرغم من أنه راجل كبير ...بتكلمه باسمه مجرد وتقوله هأضربك وكلام تاني بعدم احترام ومامتها بتضحك ...كان نفسي بجد أكلم الأم

بس لاقيتها بتضحك وبتكلم التمرجي بنفس الطريقة فسكت.

تعرفي يا دريم

كنت محبطة سنين طويلة من نظرية ان الطفل بعد سن 5 سنين

بيبقى خلاص تشكل

و العقد اللي فيه اتكونت و يستحيل الخلاص منها

بعد ما اكتشفوا ان زي ما الكومبيوتر بيتعمل له برمجة

البني آدم كمان ممكن تتم برمجته من اول وجديد في اي سن

يعني مثلا

تخيلي د. الفقي

كان ابوه بيقول له

"ادي دقني اهي ان نفعت" !!!

:)

و اهو ما شاء الله نفع

احترمته جدا لما قال بكل بساطة ان والده " أمي" لا يقرأ و لا يكتب

ما استعرش منه

و غيره كتير من الناجحين

مش كلهم على فكرة اتربوا بالورقة والقلم

و اساليب التربية الحديثة

يا ما ناس جاءت من بيئات عادية جدا و شعبية كمان

و قدروا يكونوا من الناجحين

لما قاموا بتغيير أفكارهم مع العلم اللي اكتسبوه

و يا ما ناس برضه

اتربوا في بيئات اجتماعية و مادية عالية

و عندهم كل الظروف اللي تساعد على النجاح

و مع ذلك بقوا ناس عاديين

و يمكن أقل من عاديين كمان

[raouf]

من وجهة نظرى

بالاضافة للى كتبتوه موضوع الرضا واحترام المهنة التى يعمل بها

بمعنى

تلاقيه الولد الفلبينى شغال فنى مثلا ويفهم احست من 1000 مهندس ولكنه مبسوط بموقعه ووظيفته ولا يتظر للى اعلى منه بينظر فقط للايجابيات

المصرى دايما باصص للى اعلى منه فديما مش عنده رضا بوظيفته

حابب يتنطط ويغير ويشغل بيه او باشا

ومستحيل يقتنع بوظيفته او راتبه

الحاجة الاخرى نظرتهم الى وظيفتهم

دائما بيقدسوا وظيفتهم مهما كانت بينما احنا اتربينا على احتقار بعض الوظائف حتى اننا نتكسف نقولها

مثلا عامل نظافة كام واحد فى مصر بيعمل هذه المهنة ولما تساله يقولك انا باعمل عامل نظافة ؟

طبعا ولا مرة الا اذا كان عايز صدقة ليحنن قليك

هناك عندهم كل مهنه مقدسة ولها مزاياها

وهم اقتعوا نفسهم يمهنتهم فقدسوها واتقنوها

ايضا هو يعلم انه اذا لم يعامل الزبون باحترام هايتطرد من عمله وهيموت هو عيلته من الجوع بينما احنا يقولك فى داهية هلاقى عمل احسن منه وماحدش بيبات من غير عشا

تم تعديل 9 ديسمبر 2010 بواسطة raouf