هل تؤيد فكرة العصيان المدني ؟

[se_ Elsyed]

طالب الدكتور محمد البرادعى، المدير السابق للوكالة الدولية للطاقة الذرية، خلال لقائه بعدد من شباب الحملة المستقلة لدعم ومطالب التغيير وشباب 6 أبريل ورابطة دعم البرادعى وعدد من المستقلين، كافة الشباب إلى التنسيق الكامل بينهم خلال الفترة القادمة، مشجعا إياهم على التحرك الميدانى عبر المظاهرات والوقفات الاحتجاجية، خاصة بعدما شهدته انتخابات الشعب من انتهاكات وتزوير فاضح.

وشجع البرادعى، وفقا لما قاله أحمد ماهر، المنسق العام لحركة شباب 6 أبريل، فكرة البرلمان الموازى لكنه فى المقابل أوضح أنه لن يتقلد أى مناصب قيادية على أن يظل شريكا أساسيا فى عملية التغيير، مضيفا أنه دعا الشباب للعمل على نزع شرعية مجلس الشعب الجديد نظرا للانتهاكات التى ساهمت فى تشكيله وإسقاط كافة الأوجه الفاعلة من المعارضة والمستقلين.

وقال عبد المنعم إمام، القيادى بالحملة المستقلة لدعم البرادعى ومطالب التغيير، إن البرادعى شدد على ضرورة فتح جسور صلة بين جميع القوى السياسية خلال الفترة القادمة فى إطار تنسيقى دون أى استثناء، داعيا القوى السياسية للاستفادة من درس انتخابات الشعب الماضية.

وأضاف، أن البرادعى أكد أنه يشجع أى محاولات لإحداث الزخم الشعبى فى الشارع المصرى، موضحا أنه لم يبد اعتراضه على فكرة إقامة البرلمان البديل، لكنه أيضا أوضح أنه لن يتولى أى مناصب قيادية على أن يظل شريك فى عملية التغيير.

[se_ Elsyed]

انا أخترت نعم

لكنني ضد العنف والمظاهرات المخربة

لكن

طب نعمل إيه ؟

إيه اللي رماك على المُر ؟

المر اللي هو حزب فاشي أوحد بقى له 30 سنة بيحكم وأخرنا 100 سنة

وبطانة سوء بلسان واحد بيرشحوا شخص عنده 83 سنة لفترة أخرى عشان يموت وهو عالكرسي وهو أساساً فاصل ولم يعد له وجود ولم يعد يتدخل في أحداث وترك أمور البلد للعيال

وأحوال .. تسير من سيء إلى أسوء .... ويمكن نحن البلد الوحيد في المنطقة التى تتقهقر إلى الخلف أما الباقون فيسيرون بخطى ثابته إلى الأمام ..

البعض كان إقترح على البرادعي مثلاً إنه لو عاوز يغير فعليه أن ينضم إلى حزب من الأحزاب

!!!!!!!!!!!!!!!!!

أي احزاب تقصدون أيها السادة ...

عن حزب يُنفق الملايين على الشو الإعلامي عشان مقعد أو مقعدين في البرلمان من ضمن 500 مقعد ؟

أم أحزاب عبارة عن يافطة قماشية مُعلقه على باب شقة ... و99.9% من الشعب لا يعرف حتى إسمها

أم حزب يوم ما يتمطع ويتعملق ورئيسة يعمل البدع .. يجمع 500 الف صوت في إنتخابات الرئاسة .. عشان يُعطي شرعية للعملية الإنتخابية ويصورها إنها كانت شرسة ... ثم يفوز هو بنسبة تفوق 90 %

أعتقد إن ده هو الحل الوحيد ....

لكن ... يحتاج الكثير من التنظيم لكي لا تنفلت الأمور منا

[se_ Elsyed]

أنا أسف .... إضافة أخرى

حتى لو أتحدت قوى المعارضة ...

وأستبعد تماماً المعارضة الحزبية الصورية لإننا شايفين أداءها الغائب تماماً

وأقصد بالمعارضة هنا هي المعارضة الشريفة

المعارضة التي لا تسعى إلى كراسي

المعارضة التي تحب البلد بجد وتُعلنها من البداية أنها تسعى إلى إرساء وخلق نظام سياسي محترم

[mfarag]

للاسف

احتمالات التغيير السلمى بتقل

و الاحتمالات الاخرى بتزيد

كل الموشراءات ان البلد فى طريق الانفجار

[سكر]

كل الموشراءات ان البلد فى طريق الانفجار

اخشى كل ما اخشاه ان تتحول مصر الى عراق اخرى

ولذلك اتمنى عمليه نقل السلطة ان تتم بعداله وشفافيه

البلد كلها شادة فراميل اليد فى انتظار تولى الرئيس الحاكم

ومبارك حبيته او كرهته انتهت صلاحيته

والمجتمع امامه اختيارين

اما القبول بالوضع الحالى واستمرار اسرة مبارك حتى تاتى لحظة الانفجار فجاة

او الضغط على النظام باى الطرق لتحقيق الحريه السياسيه و الدفعة الاقتصادية

وهذا ما اتمنى ان يتم فى حياة مبارك لانى لا اضمن جمال واحمد عز

http://www.youtube.com/watch?v=_iGLXEU3vow

تم تعديل 10 ديسمبر 2010 بواسطة موعود

[Dreamwithme]

للأسف الأحوال في مصر وصلت لحد غير معقول

فبالرغم من أني لا أؤيد أي شكل من أشكال العنف

لكن في حالة الاضطرار...أمرنا لله زي ما حضرتك قلت يا أستاذ س س

أيه اللي رماك علي المر. أؤيد في حالة عدم وجود بدائل أخري

[abaomar]

السلام عليكم

الاخوه الكرام جزاكم الله خيرا

.

اخى الحبيب س س

ممكن افهم منك وجهه نظرك عن العصيان المدنى ما هو و كيف يتم تطبيقه ؟

[se_ Elsyed]

السلام عليكم

الاخوه الكرام جزاكم الله خيرا

.

اخى الحبيب س س

ممكن افهم منك وجهه نظرك عن العصيان المدنى ما هو و كيف يتم تطبيقه ؟

أقول لك يعني إيه عصيان مدني ؟

للاسف

العصيان المدني يعني تفوق الناس اللي بقت في غيبوبة وبقت تلجأ لأي حاجه تنسيها الغُلب ...

تفوق الناس اللي حضروا امبارح 50 الف لحفلة عمرو دياب في جامعة المستقبل .. والمستشفيات يا سيدي الأن إتملت بحالات إصابة نتيجة التدافع ونتيجة

أنا مكسوف أقولها

التحرش الجماعي اللي حصل

العصيان المدني عشان الأمن لغى حفلة تامر حُسني في جامعة عين شمس لأعترافه إنه مش هايقدر يسيطر على الوضع وممكن تحصل كوارث ..

أنا مش ضد الفن النظيف أو الناس تتبسط

لكن

ضد إن دوائر إنتخابية يا سيدي عدد المسموح لهم بالتصويت 300 الف .. ويروح 4 الاف فقط . وينجح المُرشح ويبقى راجل برلماني قد الدنيا ..

أنا أسف وهاشرح لحضرتك العصيان المدني ببساطة .

هو وجود قيادات محترمة في البلد يئست من التغيير السلمي السياسي من خلال القنوات الشرعية .. وبالتالي لجأت لجعل الناس تعمل إضرابات سلمية ... والعمال ما يروحوش مصانعهم والموظفين ما يروحوش مصالحهم ولا الطلبة تروح جامعاتها ولا مدارسها للضغط على النظام عشان ينكشح ..

ده ببساطة هو العصيان المدني

[أبوعمار]

نعم

وألف نعم

لأن كل الطرق الأخرى للاحتجاج باءت بالفشل، فالرئيس حسني مبارك وأعوانه يزدري ويحتقر المصريين، ويحكمنا بقانون طواريء منذ توليه الحكم، ضاربا عرض الحائط برغبة الشعب في التطور والتجديد والتحديث وحرية اختيار زعيمه

وقام هو أعوانه بالاعداد لما هو آت في مسرحية هزلية تحت سمعنا وبصرنا بمنتهى الاحتقار لنا, بدأت فصولها من مهزلة الانتخابات وكلنا يعلم ما حدث

وكانا نعلم النتيجة والمجلس الذي سيعد العدة للرئيس المنتظر

نعم أؤيده

بل وأعترف أنه سيكون أضعف الايمان

ألا يستحق منا وطننا الغلي أن نتحرك

أن نستيقظ؟

هل سنظل نلعن الفساد والمفسدين؟

ماذا سننتظر وعلى مدى ثلاثون عاما تعرضت مصرنا لأكبر عملية نهب وسرقة وفساد واستغلال وارهاب واستبداد وشللية اجرامية تحكم،

وحدث ولا حرج عن الوصول بكرامة المواطن المصري لأحط درجات المهانة التي يمارسها الرئيس وأجهزته، ثم اصراره على اختيار الفاشلين، والاحتفاظ بأكثر الوجوه كراهية من شعبه،

بمصر إلى الصفر في المجالات الادارية والاقتصادية والسياسية وحقوق الانسان

وحتى صفر في المجالات الرياضية

حسبنا الله ونعم الوكيل

[محمد عبدالعزيز]

أؤيد فكرة العصيان المدنى, وكل يوم يزيد اقتناعى بأنه لا حل لمشاكلنا سوى أن "نقف وقفة رجالة" طول ما عصابة الحرامية اللى بتحكمنا دى مسيطرة على كل شئ.

لأنه باختصار وبالمنطق هذه العصابة مصلحتها فقط فى أن تظل الأوضاع كما هى عليه حتى تظل متحكمة فى كل شئ وتحقق مصالحها, والتى هى مصالح أشخاص ضد مصلحة الوطن عموماً وبالتالى ضد مصلحة الشعب, فماذا يكون الحل معهم غير العصيان المدنى؟

[se_ Elsyed]

من أكثر الاسباب التي جعلتني أؤيد تلك الفكرة ...

تصريحات كل المسئولين الكبار - في السن وليس المقام - بعد مهزلة الإنتخابات البريملانية الأخيرة بإن العملية كانت زي الفل وإن المعارضة هاتملى المجلس ونتحدى اي حد يقول كان فيه تزوير ...

والزغلول الكبير بقى هو تصريح أحمد فتحي شرور المُكرر بعد تصريحات مبارك ونظيف السابقة في أن : الضغط المستمر على النظام في مصر لإدخال إصلاحات سياسية .. سيُمكن القوى الإسلامية الشريرة من الوصول للحكم .

يعني عاوزينها على مزاجهم ..

ديمقراطية بالصلصة أو الكاتشب .. حسب مزاج الزبون ..

----------------------

أما نحن فنريد نظام سياسي محترم يصل فيه من يُقنع الجميع ببرنامج واضح ولفترة محددة

بشرط

أن يكون هناك رقابة على أداء الرئيس نفسه وأداء الحكومة

وبالتالي اللي وصل للحكم ده هايبقى متأكد إنه مش مُخلد فيها أو مش هايلعب في الدستور عشان يقعد 36 سنة ...

والله يا جماعة كنت بفكر أمبارح في الشخصيات اللي دوبها الريس في فترة حكمه

يا نهار مش فايت .. ده قرب يخلص علينا كلنا

فاكرين

صوفي أبو طالب

وكمال حسن علي

وعاطف صدقي

وابو غزالة

زكي بدر

رفعت المحجوب

حسن أبو باشا

وغيرهم وغيرهم .. ده دول إفتكرتهم على السريع كده

وياريت بعد الفترة دي كلها يكون قدم شيء للشعب ..

مثال بسيط .... دخل الشتاء . وبدأت تتكرر تاني مصيبة أنابيب البوتاجاز اللي تفتق ذهن الدولة عن توزيع كوبونات إلكترونية من أول يناير لصرف أنبوبة لكل مواطن .... في مهزلة جديدة من مهازل النظام الديكتاتوري الهش

أسف للأطالة

نقطة أخيرة : شاهدت للمرة التي لا أدري كم سيمفونية الحرب العالمية الثانية على قناة ناشونال جيوجرافيك وأنا أساسًاً عندي الأفلام دي على سي ديهات

ولاحظت إن الدول العُظمى اليابان والمانيا وفرنسا وأنجلترا والنمسا .... خرجت ً من الحرب وهي تراب .. وسويت بالأرض ... وأساساً هي دول فقيرة في المواد الخام الطبيعية .. وكان سيكون لها عُذرها لو ظلت 100 عام تعاني من تلك الكارثة ...

لكن خلال أقل من 30 عاماً نهضت جميعهاً وأصبحت تقود العالم ..

وذلك لأنها تملك كنز من البشر الذين يخلصون لبلدهم ... ولا ينظرون إليها على إنها سبوبة ومصدر لملأ خزائنهم التي لا تشبع .

[akramgroup]

مع انى من مؤيدى العصيان المدنى

بس للاسف ماينفعش اننا نطبقه

بجد هايحصل مهازل وقد تصل لحرب اهليه

[se_ Elsyed]

مع انى من مؤيدى العصيان المدنى

بس للاسف ماينفعش اننا نطبقه

بجد هايحصل مهازل وقد تصل لحرب اهليه

ليه يا أكرم ؟

يعني لو ظهر شخص محترم أستطاع أن يجمع الناس على كلمة واحده وأضرب جميع العمال عن الذهاب إلى المصانع والطلبة لا يذهبون إلى المدارس ... إلخ

يا أخي شوف الطلبة في أنجلترا بيعملوا إيه عشان الحكومة زودت مصاريف التعليم العالي .... لا مؤخذه عيال صغيرة نزلت كلها الشارع تتظاهر بأدب وأنا متأكد إن تظاهراتهم هاتجيب نتيجة ...

يا أخي شوف المزارعين أو سائقي القطارات أو أو أو في اوروبا وشوف نقاباتهم بتحركهم إزاي لما يكون لهم مطالب شرعية مش مطلب شخصي مؤقت ..

إذن حرب أهليه من ضد من ؟

وليه ؟

هل العسس هايروحوا يقبضوا على الملايين في بيوتهم ؟

ألم نشاهد جميعاً مثال قريب للعصيان المدني في أوكرانيا وثورتها البرتقالية ؟

ألم نعرف بعد أحداث 79 إن السادات جهز نفسه للفرار خارج البلد هو وعائلته لما أحتدمت المظاهرات قبل أن يقمعها العسس ؟

هل سيخاف الناس من إنهم يترفدوا أو ينضروا في عملهم ؟

طب والوضع الحالي عبارة عن إيه ؟

الناس عايشه في سعادة وهنا كل يوم ؟

[akramgroup]

مع انى من مؤيدى العصيان المدنى

بس للاسف ماينفعش اننا نطبقه

بجد هايحصل مهازل وقد تصل لحرب اهليه

يا أخي شوف الطلبة في أنجلترا بيعملوا إيه عشان الحكومة زودت مصاريف التعليم العالي .... لا مؤخذه عيال صغيرة نزلت كلها الشارع تتظاهر بأدب وأنا متأكد إن تظاهراتهم هاتجيب نتيجة ...

يا أخي شوف المزارعين أو سائقي القطارات أو أو أو في اوروبا وشوف نقاباتهم بتحركهم إزاي لما يكون لهم مطالب شرعية مش مطلب شخصي مؤقت ..

كلامك صحيح وتمام التمام بس لما يكون فى ظل مناخ غير المناخ بتاع اليومين دول

انت عارف لو حصل مظاهرة بأدب زى ماحضرتك قولت هتلاقى بلطجيه الشرطه دخلت معاهم

ياما عشان تنضم ليهم شكليا وتقلب لتدمير ممتلكات وما الى ذلك عشان يبقى للشرطة حق فى التدخل

يا اما هايدخلوا وسطهم لافتعال معارك والاسم اهو الشعب منه فى بعضه

مش عاوز اكون متشائم بس للأسف الدلائل كلها بتقول غير كده

[aimen]

نقطة أخيرة : شاهدت للمرة التي لا أدري كم سيمفونية الحرب العالمية الثانية على قناة ناشونال جيوجرافيك وأنا أساسًاً عندي الأفلام دي على سي ديهات

ولاحظت إن الدول العُظمى اليابان والمانيا وفرنسا وأنجلترا والنمسا .... خرجت ً من الحرب وهي تراب .. وسويت بالأرض ... وأساساً هي دول فقيرة في المواد الخام الطبيعية .. وكان سيكون لها عُذرها لو ظلت 100 عام تعاني من تلك الكارثة ...

لكن خلال أقل من 30 عاماً نهضت جميعهاً وأصبحت تقود العالم ..

وذلك لأنها تملك كنز من البشر الذين يخلصون لبلدهم ... ولا ينظرون إليها على إنها سبوبة ومصدر لملأ خزائنهم التي لا تشبع .

والله العظيم كنت حكتب الجملتين دول بالضبط ولنفس السبب الخاص بحلقات ناشونال جيوغرافيك

يالله على توارد الأفكار

دى شعوب تستاهل الحياة ...احنا كل واحد عايش لنفسه

كل الشعوب العربية بلا استثناء ....

كما ان الشئ بالشى يذكر

وردت نقطة ان لما الرجال راحو يحاربوا وتم تجنيدهم بالجيش الأمريكى

حلت السيدات فى اماكنهم .....ياالله ...على المنظر

فعلا ناس تستاهل ...من الأربعينات ودا تفكيرهم طبعا لازم يتطورا جدا

احنا لسه بنتناقش فى هل يجوز قيادة السيارة للسيدات ؟

احنا فالحين بس فى الجعجعه ... والكلام الفارغ ...والمطرب الفلانى الفظيع اللى حضر له 50 الف هايف وهايفة و الشيخ العلانى اللى عمال يعطى نصائح لكن بلا تنفيذ فعلى على ارض الواقع كلها ديكور فقط

لكن عمل بمعنى العمل لأ

عن نفسى اى حاجه تفيد مصر وتنشلنا من المستنقع الراكد اللى احنا فيه ده

بلا تردد حعملها

[Howayda Ismail]

للاسف احنا عندنا هنا اضرب المربوط هحيهرب مليون سايب

ابسط مثل اللى اتعمل فى الشباب الى كان بيجمع توقيعات تاييد للبرادعى فى لابراهيمية لما اتسحلوا

فى الشارع كل الى وقعوا خدوا الاوراق وحرقوها وقطعوها

واللى اتعمل فى اسراء عبد الفتاح وشباب 6 ابريل

الخوف اتربى واتمكن جوا الناس وخوفهم على لقمة عيشهم خلت سيدهم وشعارهم خلينا ماشي جنب الحيط لما الحيط

قرب ينهار ويوقع علينا كلنا

[se_ Elsyed]

يا جماعة ما هو عشان كده سموه " عصيان مدني "

يبقى عشان نتجنب الصدام مع الشرطة اللي هما أبناء العشب زينا وليسوا مستودرين من الخارج ..

يبقى الكل يقعد في بيته والكل يعلق رايات سوداء على واجهات منازله ....

هي أفكار نُريد أن تتبلور في شكل منظم ....

[abaomar]

السلام عليكم

اخويا و حبيبى س س

ملهاش إلا حل واحد

ناس فى الجيش (القوه )يكون عندها ضمير و بتحب البلد دى بجد و خايفه من ربنا

و خايفه على صحه الراجل الكبير تقوم مريحاه و شايله الهم بداله

بعد كده تريح الطقم الموجود كله و تديهم مكافأه نهايه الخدمه و بعد كده تقدمهم للمحاكمه gjy::

غير كده و تحت اى شعارات اخرى الحال مش هاينصلح

الجماعه اللى راكبه ما بقاش هاممها حاجه و على عينك يا تاجر

و اللعب على المكشوف و ما فيش كسوف .

[jamalpody]

انا عن نفسي عامل عصيان مدني لوحدي كدهوت من غير ما حد يقولي من 17 سنة ولسة مستمر في العصيان المدني بس مش شايف اي نتيجة ولا اي بارقة امل ......

[SAW]

أنا أؤيد بشدة العصيان المدني و الإضراب عن العمل للأسباب التالية:

1- العصيان المدني و الإضراب هو الأقل تكلفة على الإطلاق لتغيير الأنظمة يعني كل واحد يقعد في بيته لا ينزل شغله و لا جامعته و لا مدرسته و طبعاَ مش معقول النظام هيبعت عساكر أمن مركزي لبيوت الناس تنزلهم شغلهم بالعافية و بفضل بعد قبض المرتبات مباشرة.

2- إذا كان الناس إستحملت 30 سنة قمع و كبت و قهر و فقر غصب عنها فما المانع أنها تتحمل أسبوع من نفس المعاناة و لكن برغبتها و إختيارها و إنتظار النتيجة.

3- النظام البدائي الحجري لم يع بعد أن الشعب لم يعد لديه ما يخسره و قد وصل بالفعل لمرحلة "يا روح ما بعدك روح".

4- النظام سيجن جنونه عندما تتحول طاعة الشعب إلى أشخاص أخرين شرفاء قادرين على التغيير مما سيفقده المزيد من التوازن.

5- نتذكر دعوة الإضراب السابقة و كيف إرتعدت الحكومة من نتائجها و بمنتهى الغباء السياسي شاركت الحكومة نفسها في تشجيع الناس على الإضراب دون وعي أو قصد عندما حذرت وزارة الداخلية الموظفين من عدم الذهاب إلى العمل و كان لهذا التحذير رد فعل عكسي لخوف الناس من حدوث أي مكروه لهم خارج منازلهم و فضلوا البقاء بالبيت.

6- توجد أفكار أخرى بجانب العصيان مثل مقاطعة كل ما يمت للنظام و الحكومة بصلة سواء مطبوعات - فضائيات - منتجات صناعية - أي حاجة تمثل أو تدافع عن العصابة التي تحكم.

و في النهاية لست حزيناَ على ما يجري فهي مرحلة مخاض قد تكون صعبة و مؤلمة و لكن لابد منها و لكن هل كان لابد من دفع كل هذة الأثمان الفادحة للتغيير - هل لابد أن نخسر سنوات و سنوات لمجرد أن الدكتاتور لا يريد الإصلاح و التغيير!!

وأخيراَ سيفشل مبارك لأنه يريد أن يموت و يدفن مصر معاه.