الفيس بوك و فرص الزواج

[مغتربة]

كنت بتصفح موقع نسائى مصرى شهير جدا و موجود فيه قسم لطلبات الزواج يعنى الى عندها عروسه بتحط مواصفتها و الى عندها عريس بدور له على عروسه برضه بتحط مواصفاته و تقول هو عايز عروسه مواصفاتها ايه و كدا يعنى

بصراحه كنت داخله بدافع الفضول لكن لفت نظرى حاجه اتكررت فى كذا طلب و خصوصا لما بتكون الى عمله الطلب عندها عروسه و بدور على عريس

فيه جمبه اتكررت كتير بصيغ مختلفه لفتت نظرى و هى انها معندهاش اكونت على الفيس بوك و الى بتتكتب كنوع من سرد مميزات العروسه يعنى مثلا تلاقى فى الطلب مكتوب دى مؤدبه جدا و ملهاش فى الفيس بوك او كان عندها اكونت على الفيس بوك بس الحمد الله قفلته او دى حتى مرضيتش تعمل حساب على الفيس بوك

هو اكيد مش فى كل الطلبات لكنها اتكررت فى كذا طلب

علشان كدا عايزه اخد رايكم و خصوصا راى الشباب فى المنتدى

هو فعلا ممكن يكون من طلبات العريس فى الجواز انها ميكونش ليها حساب فيس بوك ؟ طيب و ليه ؟

و ايه علاقه الفيس بوك بمعيار الاخلاق و ازاى ممكن يتاكد انها معندهاش فعلا حساب و قفلته

هل الكلام دا افتكسات من الستات مثلا علشان يبرهنوا عل اد ايه بناتهم مؤدبين ( مع انى مش عارفه ايه العلاقه ) و لا فعلا دى طلبات للشباب دلوقتى

و يا ترى فى شروط تانيه او طلبات تانيه بتطلب دلوقتى غير دى و ليها علاقه بالاستخدامات الحديثه للتكنولوجيا يعنى مثلا متكونش بتكتب فى المنتديات مثلا او معندهاش بلوج او اى حاجه كدا

يالله سمعونا صوتكم و قولوا لنا على اصل الحكايه ايه

[pink rose]

كويس انك نبهتيني يا مغتربة للموضوع دا

اما الحق الغي الاكونت بتاع مريم من على الفيس بوك لحسن البت تبور و تقعد في ارابيزي

و الله العظيم مش عارفه الخبر دا يضحك و لا يبكي

ايه الفكر العجيب دا

هو دا مقياس الادب و الاخلاق

طب فرض المحروسة دي ما عندهاش اكونت على الفيس بوك يا ترى ما عندهاش موبايل كمان

ما عندهمش دش في البيت؟

ما راحتش كلية و ليها زمايل من الشباب؟

اتمنى يكون دا كلام ستات هبلة لانه لو دا الكلام المتداول في الاوساط النسائية و مقتنعين بيه

هانلاقي بعد كده في الاعلانات اللي من النوع دا ان البنت ما خرجتش من بيت ابوها من يوم ما اتولدت زيادة توكيد على الادب و الاخلاق

[مغتربة]

كويس انك نبهتيني يا مغتربة للموضوع دا

اما الحق الغي الاكونت بتاع مريم من على الفيس بوك لحسن البت تبور و تقعد في ارابيزي

و الله العظيم مش عارفه الخبر دا يضحك و لا يبكي

ايه الفكر العجيب دا

هو دا مقياس الادب و الاخلاق

طب فرض المحروسة دي ما عندهاش اكونت على الفيس بوك يا ترى ما عندهاش موبايل كمان

ما عندهمش دش في البيت؟

ما راحتش كلية و ليها زمايل من الشباب؟

اتمنى يكون دا كلام ستات هبلة لانه لو دا الكلام المتداول في الاوساط النسائية و مقتنعين بيه

هانلاقي بعد كده في الاعلانات اللي من النوع دا ان البنت ما خرجتش من بيت ابوها من يوم ما اتولدت زيادة توكيد على الادب و الاخلاق

هو انا اول ما دخلت استغربت زيك

لكن انا ممكن ابعتلك الروابط على الخاص وتشوفى بنفسك

انا قولت يمكن انا فهمه غلط او يمكن دا السائد دلوقتى فحبيت اسمع الاراء الاول

سلام لمريمومه و قوليلها متمسحش الاكونت و لا حاجه هى زى العسل طبيعى

ربنا يهنيكى بيها يا رب

تحياتى

[novocaine]

هامسك نفسي و أقول مدارس تفكير و ربنا يهني سعيد بسعيدة لأنه اذا كانت هيا تفكيرها كده و اللي هيتجوزها برضه تفكيره كده يبقوا

perfect match

اللي أنا باشوفه مشكلة الوشين..يعني مثلا في الحالة دي انها يبقي عندها أكونت عالفسيبوك و تقفله عشان عريس الغفلة...دي المصيبة في مجتمعنا المصون...تتغير عشان العريس/العروسة...طب و بعد الجواز؟خلاص اتدبس/اتدبست؟ليه الناس مش مقتنعة أنه لازم الاتنين يكونوا متوافقين فكريا و الا الحياة هتبقي جحيم؟!

[SAW]

أنا إتجوزت مراتي من خلال النت و الحمد لله سعيد جداَ و مبسوط و ده كان أفضل إختيار بالنسبة لي مع إني شفت عرايس كتير و سبحان الله النصيب جه من طريق تاني خالص أي نعم إخواتي إستغربوا الفكرة شوية و قلتلهم و الله لو كل واحد دخل على النت وحش يبقى أنا أول الوحشين - مرة و أنا قاعد مع خطيبة محتملة و بنتكلم قالتلي أنا مبتفرجش على التليفزيون خالص بصراحة ده كان سبب إضافي و ليس رئيسي في رفضي للموضوع ده - و من خلال النت إتعرفت على بنات كتير - بغرض الجواز طبعاَ - و إتصالات و مقابلات و مكنش في نصيب - إلى أن وجدت ما أبحث عنه و الحمد لله.

فرص الجواز الكويسة اليومين دول قليلة جداَ و طبيعي إن البنت توسع دائرة معارفها لأنها لو حابسة نفسها و لا معارفها محدودة مين هيعرف إن في هنا عروسة و قلبي مع كل بنت ربنا يوفقها في فرصة كويسة

[ام لبناتى]

بجد الموضوع غريب

مع انى بشوف حاجات غريبة برضه من طلبات مباغ فيها من جانب العريس

لكن اكونت الفيس بوك دى جديدة بجد

يعنى بناتى بقى احافظ عليهم من الفيس

والاخ ماسنجر

واحميهم من التلفاز

دة مش تفكير

دة تكفير

ربنا يهدى

وميرسى ليكى مغتربة على الطرح

[مغتربة]

على فكره يا جماعه الغريب ان الموضوع داالى بيكتبه الى بيكون عندها عروسه و عمله ليها طلب زواج

كانها من نفسها لنفسها كدا فاكره ان هى كده هتحليها او هترفع اسهمها

ساعات بحس ان الستات هما الى بيخنوقوا بعضهم البعض يعنى ممكن يكون الشباب فى باله مثلا و لا بيفكر فى كدا

يمكن لكتره المعروض دلوقتى من العرائس بتحاول اى ام انها تعظم مميزات بنتها باى طريقه حتى لو كان بحاجات لا هى معيار و لا مطلوبه اساسا

[اغابي]

الحمدالله

انا ما ليش اكونت على الفيس بوك

:lol:

كل ما فى الموضوع ان مفيش وقت ولو عندى وقت يبقى على المحاورات او انى اذاكر

لكن اوعدكم اوعدكم وبعد الموضوع داه - لو عندى وقت حاعمل بسرعة اكونت ع الفيس بوك ايه رايكم بقى بلعند يعنى

ضحكيني يا مغتربة

دى ناس بتخدع ناس يا بنتى صدقيني

طب الحقى بقى يا ريمو شيلى اكونت بنتك لحسن تقعد فى رقبتك

[doha]

فعلا جملة عجيبة جدا ..

اتوقع والله اعلم ـ وان كنت مش متاكده ـ السبب في العباره دي ان الفيس بوك موقع تواصل اجتماعي ضخم جدا وسواء اعترفنا لنفسنا بذلك او لم نعترف فنسبة كبيرة من البنات الموجودين على الفيس بوك هدفهم الاول هو التعرف على نصفهم الاخر لا اكثر ولا اقل .. عن نفسي مش بشوف في ده عيب او مشكلة وان كنت لا اعول كثيرا على الطريقة دي في العثور على الشخص المناسب .

ومن جهة ثانية فاحنا في مجتمع مازال يقدس الطرق التقليدية في الزواج بالذات وممكن البعض ينتقص من البنت الي تصرح برغبتها في الزواج او تسعى اليه بشكل علني زي ماهو حاصل في الموقع النسائي الي ذكرتيه والي بجد لغايه دلوقت مش قادره اتخيل ان ممكن فعلا وحده تتوفق في زوج كويس عن طريقه بس يجوز انا دقة قديمه والتوفيق هنا وارد ..

فاتوقع والله اعلم ان العباره دي بتذكر كانهم يعني بيقولوا احنا مش ( بندلل ) على البنت ونعرض مواصفاتها في الموقع لاننا مش لاقيين بديل بدليل ان البنت لو عاوزه من نفسها تتجوز ولا هي الي بتدور من نفسها كانت من بكرا الصبح عملت لها اكونت على الفيس بوك وكانوا العرسان وقفوا على بابها طوابير . . احنا عارضين مواصفاتها من وراها انما هي ملاك بريء متعرفش اصلا كلمه جواز معناها ايه ..

اتوقع والله اعلم ده المقصود بالعباره دي او انها مجرد عباره وحده كتبتها مرة ولان التقليد صفة غالبة جدا في المنتديات النسائية فالموضوع بقى موضه او اكلشيه لازم ينحط حتى لو مش صحيح ..

[psychologyteacher]

أتوقع بعد ردودكم دى يا جماعة انكم منزلتوش مصر من زماااااااااااااااان

أو نزلتوا بس متابعتوش كويس

الفيس بوك يا حضرات بتتعمل بإسمه جرائم كتيرررررررررة

الولد يظيط البت على الفيس ( واسف على اللفظ بس للاسف هو ده اللفظ المناسب فى زمن اجمل حاجة بحبها فيكى هى دى ) وياخد تليفونها ويكلمهاويقابلها مرة واتنين وتلاتة على اساس انه هيخطبها قريب جدا ، وتخيلوا بقى بعد الوعد ده ممكن يحصل ايه بينهم ... مصااااايب

هتقولولى طب ماهو ممكن يحصل ده من خلال الموبايل .. كلامكم صحيح جدا

بس الفيس بوك وسع الدايرة بقى شوية وخلاها ع البحرى .. يعنى بتاع بورسعيد ممكن يظبط ف اسوان وبتاع شمال سينا ممكن يظبط ف الوادى الجديد .

يعنى للأسف بقوا شواذ القاعدة هما المؤدبات اللى محدش بيقدر يظبطهم حتى لو عندهم اكونت ع الفيس بوك

فبقى التفكير السائد ماشى بقاعدة الباب اللى يجليلك منه الريح

البنت تقول على نفسها او امها تقول عليها انها لا تملك اكونت على الفيس وبكدة تبقى طلعت نفسها من دائرة الشك .. لأن البنت أو الام او حتى الخاطبة دول كلهم بيخاطبوا عقول الشباب ( العرسان ) مرتادى الفيس بوك اللى هما اعلم ناس بالمصايب اللى بتحصل بسببه

وللامانة انا مرت عليا مشاكل كتييييييييييييير من النوع ده بحكم شغلى

تعارف عبر المحافظات

وللامانة كمان كل القصص دى انتهت بالفشل بعد ما كانت وصلت لمستوى خطير وحساس جدا ولا داعى للتوضيح أكثر

صدقونى عندى واحد صاحبى وزميلى من ايام الدراسة .. على رأس قائمة شروطه ف العروسة اللى لغاية دلوقتى بيدور عليها ان ميكونش عندها جهاز كمبيوتر اصلا ... شفتوا الحكاية وصلت لإيه ؟؟؟

فمتستغربوش لأن ما خفى كان اعظم

وتحياتى