من عينيك أقدر أقرا أفكارك!

[salma-7]

فيه ناس كتير كل اللى جواها بيطلع فى عينيها

يعنى واحد تلاقلى عينه مليانة عصبية و قلق و توتر و زايغين مش بيركزوا فى حاجة

واحد تانى تلاقى عينيه هادية و صافية_الهدوء اللى جواه مرسوم على ملامحه

و ناس تانية تلاقى عينيها بتلمع جداً و ده دليل ذكاء حاد "مقترن بخبث أحياناً"

ناس تبص فى عينيها تحس انها فاهمة اللى بيدور فى دماغك من غير ما تقوله لدرجة انك ممكن ترتبك :P -

و على العكس

فيه ناس تانية عينيها ميتة مبتقولش أى حاجة

الناس الأخيرة دى لا أميل للتعامل معاها مطلقا لأنها غالباً بتبقى روتينية و مملة

يا ترى انت مين فيهم؟

و تعرف تفهم اللى قدامك من نظرة عينيه؟ hpc:!: ً

[حشيش]

شوفى ياسلمى حقول لك حاجة ظريفة جدا...انا اجد متعة ان انظر الى الشخص او الشخصة فى عينيه او عينيها وخاصة ان تلتقى حدقات اعيننا...طبعا ما بطولش الا لو كانت بنت عينيها حلوة hpc:!:...كل انفعالات الانسان تبدو فى حدقة عينه...يعنى صادق...بيكدب...خايف...طيب...شرير...لئيم...ساذج...انظرى مثلا الى الاطفال وما تعكسه من طيبة وبراءة :P

[Farah]

يا ترى انت مين فيهم؟
و تعرف تفهم اللى قدامك من نظرة عينيه؟  ً

انا مين فيهم معرفش ؟؟؟؟؟؟؟؟؟؟؟

الغريبه ان انا مبفهمش نظرة العين الا من الناس القريبه جدا مني وعلي فكره برضه نظرة العين لوحدها مش كافيه ولكن الاحساس بالنظره هو اللي بيعرفني

[hamo90]

أنا بالنسبة لي

في ناس كتير مبقدرش أبص في عينيها كتير حتي القريبين مني

مش عارف ليه

بس أنا بعتبر نفسي من الناس الي عينيهم بتفضحهم

والدليل السؤال الشهير الي دائما بسمعه من الناس أما أكون قرفان

مالك في ايه ؟

hamo

[فــيــروز]

أنا بالنسبة لي

في ناس كتير مبقدرش  أبص في عينيها كتير حتي القريبين مني

أيييييييييوه هو الجدع ده قال اللى كنت هاقوله :)

انا مابعرفش اركز اصلا لو حد فضل مركز عينه فى عينى وحاجه تضايق فعلا :) وانا شخصيا اما اكلم حد لازم احول عينى عنه من وقت لآخر :)

ماقدرش اقول انا اى شخص ممن وصفهم التصنيف السابق

عادى يعنى hpc:!:

ناس تبص فى عينيها تحس انها فاهمة اللى بيدور فى دماغك من غير ما تقوله لدرجة انك ممكن ترتبك

ايوه فعلا فيه ناس كده .. الواحد اما يتكلم معاهم يحس ان عينيهم تخترق دماغه راسا الى النفوخ وانه محطوط فى الركن ax: و يحس انه مسلط عليه اشعاع مؤلم .. لدرجة انى فعلا باحس انى على جهاز كشف الكذب ومش هارتاح لحد ما الحديث يتوقف :) حاجه تعصب :P

[kfaya]

لما كنت صغير كانت أمى اللة يرحمها تبصلى بصة بعنيها .. أفهم على طول هى عايزة تقولى اية ...

فى بصة , كفاية تلفزيون و قوم ذاكر , وبصة خش استحمى , و بصة بلاش تجيب صحبك الفاقد دة يذاكر معاك تانى , لا انت ولا هو فالحين ... fsh::

دلوقت الحمد للة الأمور أحسن كتير ... مراتى تبصى بصة بعين واسعة ,أفهم على طول , يعنى فين مصروف البيت ... و لو البصة بعين ونصف , يعنى ليلتك مش هتعدى لو أتأخرت برة مع اصحابك زى امبارح ..... اما بقى لو العينتين اضيقوا شوية ... فهذا يدل على التفكير العميق فى حاجة كبيرة , مصيف ... كحك العيد .... خروف العيد الكبير ... :angry:

صراحة موضوع العينين دة مرعب خالص ..... :unsure:

[Cleo]

أنا زى فيروز.... ماعرفش أبص لحد فى عينيه لفترة طويلة.... و لو لاقتنى مركزة فى عينيك و انت بتتكلم يبقى أنا أكيد سرحت منك ولا سامعاك ولا شايفاك و دماغى فى دنيا تانية خالص...

برضه لو حد بيكلمنى أو أنا بكلمه و فضل مركز فى عينيه شوية... أرتبك و أتعصب و أحاول أنهى المناقشة على طول...بابقى مش مرتاحة ... يمكن لأنى بحس إنه عايز يقحم نفسه على أفكارى و داخلياتى....

بس عموما معظم الناس بتقوللى إن عينيه فضيحة... يعنى تبص فيهم تقرا اللى جوا "كلله" ( :unsure: ) و ده يمكن السبب إنى ماحبش حد يركز فى عيني و أنا بكلمه...

[crossfield]

حلو الموضوع ده يا سلمى

محسوبتك تخصص ننى lo::

أنا بحب أبص فى عين اللى قدامى وهو بيكلمنى و العكس برضو

يعنى لو حد كلمنى من غير ما يبصلى و يركز معايا باعرف على طول ان فيه حاجة غلط

سر يمكن

بلوة عاملها

الخ الخ.

و يمكن شكل حدقة عين اللى قدامى يحدد علاقتى بيه من أول مرة.

باخاف و اترعب من العينين الضيقة المدورة باحس انى مش مرتاحة و عايزة أنهى الكلام بأى شكل.

لينا واحدة جارتنا عينيها كده(مقورة يعنى) و رغم ان الست كانت علاقتنا بيها كويسة جداً لكن سبحان الله فعلاً مكنتش بالعاها خالص ؛عينيها مش مريحانى؛خبيثة و مش مريحة بالمرة. ومؤخراً حصل منها كام حركة كده أكدوا انطباعى عنها :unsure:

و على العكس لو كانت العين واسعة أو هادية زى ما بتقولى.

فعلاً لغة العيون دى نعمة من ربنا؛بتوفر على الواحد كتير.

أنا شخصياً من النوع اللى بيبان اللى جوايا عليا

لدرجة انى لما ابقى متضايقة أو متعصبة باخاف حد يبصلى و غالباً باقفل أوضتى عليا و مخليش حد يشوفنى أصلاً.

و عموماً يقال ان فيهم عصبية و شوية خبث صغنين(يعنى قليل منه يصلح المعيشة) :angry: