اسكندرية غرقت يا جدعان

[الغريب]

اللهم حوالينا ولا علينا

ربنا يستر

على فكرة الموجة من المتوقع أنها تنتقل للخليج وبالتحديد الأجزاء الشمالية إبتداء من اليوم

في الحر الموجة تنتقل من الخليج لمصر وفي الشتا العكس

[pink rose]

الحمدلله لسا قافلة معاهم في اسكندرية دلوقتي بيقولوا ان الوضع بقى احسن

صحيح السما ملبدة غيوم لكن الحمدلله احسن من امبارح

و الحياة بدأت ترجع تاني

يعني الناس نزلت الشغل و المدارس و كده

الحمدلله و ربنا يكملها على خير

[pink rose]

يتوقع خبراء هيئة الأرصاد الجوية ان تخف حالة عدم الاستقرار اليوم الاثنين حيث تتجه درجات الحرارة نحو الارتفاع وان كانت اقل من معدلاتها.

كما تقل سرعة الرياح نسبيا ويستمر تكاثر السحب المنخفضة والمتوسطة على شمال البلاد وسيناء والبحر الاحمر يصاحبها سقوط الامطار على السواحل الشمالية

،كما يتوقع خبراء الارصاد ان يكون الطقس بارد نهارا شديد البرودة ليلا على كافة الانحاء ويتكون الصقيع على المزروعات فى اغلب المناطق والرياح اغلبها شمالية غربية.

ومن المتوقع أن تكون درجات الحرارة اليوم في القاهرة 16/ 9، الاسكندرية 15/ 9، مطروح 16/ 8، بورسعيد 16/ 9، الاسماعيلية 17/ 9، الغردقة 23/ 14، شرم الشيخ 22/ 15، والمنيا 18/ 10.

وكان عدد من محافظات مصر قد شهد لليوم الثانى على التوالى استمرار موجة من الطقس السىء المصحوب بالعواصف الترابية وهطول الأمطار الغزيرة ؛ مما أصاب بعض المناطق والشوارع الرئيسية بالشلل التام .

[alex fox]

أخيرا صوابعى فكت وهاقدر اكتب تانى...

انا مش مصدق اللى حصل ده...

فضلنا نقول الشتا السنة دى اتأخر...

هو هايجى امتى...

لحد ما الشتا دخل علينا فجأة و قالنا" بخ...انا جييييييييت"...

اول مرة أشوف نوة شديدة زى دى...

عمرها ما حصلت ان نوة تهد مصنع على اللى فيه...

هو كان قديم شوية بس مش للدرجة دى يعنى...

وكمان 3 اشخاص ماتو بسبب البرودة الشديدة...

وأبراج حمام كتييييييير اتهدت...

حتى الستاير اللى فى البلكونات اتقطعت خمسييييين حتة...

والطرق كلها واقفة تماما...

باختصار...مافيش حاجة فضلت على حالها...

بس الحمد لله النهاردة احسن...

الشمس بدأت تطلع على استحياء...

ولسعة البرد خفت كتيييير...

والهوا بقى اقل حدة عن امبارح بمراحل...

وبيقولو بالليل الجو هايكون اتحسن اكتر...

[pink rose]

http://www.youtube.com/watch?v=c51gn-mpkkk&feature=player_embedded

http://www.youtube.com/watch?v=TTN27P7s_0c&feature=player_embedded

[pink rose]

http://www.youtube.com/watch?v=-2x_xXjMxC0&feature=related

[pink rose]

على البحر الرملة طلعت برة عملت شط تاني على الرصيف

[pink rose]

اموت و اعرف المراكب دي طلعت على السلم كده ازاي

تم تعديل 13 ديسمبر 2010 بواسطة remo

[Howayda Ismail]

أهالى سيدى بشر يعطلون حركة القطارات بسبب الأمطار

الإثنين، 13 ديسمبر 2010 - 12:14

تجمهر أكثر من 50 شخصا من أهالى سيدى بشر بالإسكندرية بالقرب من محطة قطار سيدى بشر وقاموا بقطع الطريق احتجاجا على الخسائر التى تعرضوا لها نتيجة سقوط أمطار غزيرة مؤخرا.

وكان قسم شرطة أول المنتزه تلقى بلاغا يفيد بتجمع حوالى 50 شخصا من الأهالى وقيام بعضهم بوضع مخلفات خشبية على شريط سكة حديد أبى قير لتضررهم من تراكم المياه وارتفاع منسوبها بالمنطقة.

وتم رفع المخلفات من على شريط السكة الحديد والتى أدت إلى تعطيل القطار لمدة 20 دقيقة حيث انصرف المواطنون قبل قدوم قوات الشرطة وتم تحرير المحاضر اللازمة وأخطرت النيابة العامة.

[aimen]

عذرا مدام هند

http://dostor.org/society-and-people/variety/10/december/13/33208

المدينة ظلت 48 ساعة غارقة ومشلولة وبعض مواطنيها مدفون تحت الأنقاض وسط غياب فعالية أجهزة الانقاذ

الاسكندرية الغارقة كانت تنتظر من الحكومة المصرية معاملتها مثل حيفا الاسرائيلية

وهكذا جاءت النوة القاسية العاصفة لتكشف لكل سكندرى ومصرى أن عروس البحر الأبيض المتوسط اتمرمطت واتبهدلت، وأصبحت بفستان عرسها القديم الممزق المتسخ كالمتسولين والمشردين تدفعها الأمواج من رصيف لرصيف،

ومن شارع لشارع دون أن يبالى بها أحد، تحاول الجرى بساقين هزيلتين وتدفع الرياح العاتية خطواتها الى أماكن بعيدة وترفع يديها تحمى رأسها من أعمدة الانارة المتساقطة حولها، ومن أحجار المنازل المنهارة التى لم تقو على مقاومة الرياح العاصفة، ومن الأشلاء المتناثرة للافتات انتخابية ضخمة تتصدرها صور مرشحى الحزب الوطنى. وسط هذا الجو الكابوسى الذى يشبه أفلام الاثارة الهوليوودية تتساقط المنازل ويسقط مصنع على عماله وعاملاته وتتحرك المحافظة كالعادة ببلادة تعبر عنها بوضوح قيام المواطنين بأنفسهم بأعمال الانقاذ، ولا زالت معانى مثل الانقاذ والنجدة والاسعاف مرادف للقشة التى يتعلق بها الغريق، وبالأمس كانت الاسكندرية الغارقة تبحث عن القشة ولا تجدها.

رغم أن النوة العنيفة كانت معلومة قبل فترة وحذرت منها الأرصاد الجوية لم تلتفت أو تتحرك أجهزة الدولة والمحليات والمحافظة فغرقت الطرق والسيارات وهاجت الرياح العاصفة كوحش مجنون محطمة سور الكورنيش والأشجار وأعمدة الانارة واللافتات الاعلانية، وتوقفت الشوارع والمواصلات وتعطلت مصالح الناس، وحوصر التلاميذ فى الباصات التى تقلهم وكانت بالكاد تسير كأنها قوارب فينيسيا المدينة الايطالية الشهيرة، ارتفعت المياه من البحر الى البر، وهطلت الأمطار غزيرة وغابت معالم الشوارع وتحولت الى أنهر صغيرة،

هى المرة الأولى التى يرى فيها المواطن السكندرى رمال الشاطىء وقد تركت مكانها الطبيعى وقفزت من فوق سور الكورنيش وعبرت الشارع مع موجات البحر العاتية لتستقر تلال صغيرة على الرصيف المقابل، والبحر نفسه لم يكن كعادته فى النوات يرسل رشات ماء كثيفة من موجاته الهائجة على الشوارع والناس والسيارات، بل ضربت موج البحر الهائج سور كورنيش البحر وارتفع بشكل مخيف عن سطح الأرض ليغرق الشوارع حتى مسافات طويلة امتدت الى الأزقة الجانبية.

الكارثة التى شعر بها كل سكندرى لم تكن فى هذه الهجمة المناخية التى كانت أقسى مما توقعوا، بل كانت فى غياب أجهزة الانقاذ والدفاع المدنى والمحليات والاسعاف والمرور، اهتزت الاسكندرية تحت ضربات الرعد وعصف الرياح والأمطار الثقيلة، وبدا كما لو كانت أجهزة المحافظة كلها نائمة تحت البطاطين فى الغرف المغلقة المزودة بالدفايات. ما تعرضت له الاسكندرية من هجوم شتوى يصل الى حد حرب صغيرة خلفت كثير من التلفيات والقتلى دون أن يتصدى أحد لتخفيف أثارها أو انقاذ سكانها، طريق الكورنيش كله كان يعانى من أثار العاصفة وينظر الناس حولهم لا يصدقون هذا الغياب وتلك الغيبوبة لأجهزة الدولة.

وسط كل هذا الهجوم شلت قدرة الناس على التصرف والتحرك، نظر الجميع حولهم وقد توقفت طوابير السيارات فى كل مكان يومى السبت والأحد، وبدا أن أجهزة الدولة لم تجد فى هذه الكارثة كود يدفعها للتحرك، وهى الدولة التى تحشد ألاف من جنود الأمن المركزى فى ساعات قليلة اذا حاول مجموعة من الشباب أو الناشطين التظاهر السلمى احتجاجاً على تعذيب أو تزوير أو تلفيق، وهى الدولة التى تقبض علي الغاضبين المكبوتين فى العمرانية وتحبسهم بتهمة تخريب الممتلكات والتعدى على الأمن،

وفى الاسكندرية قامت العواصف بكل أنواع التخريب من شرق المدينة الى غربها، ولن يتحرك أحد، بدت عروس البحر الأبيض كالزوجة التى طردها زوجها فى نص الليل وفى عز البرد هائمة على وجهها لا تجد من ينجدها، وبالطبع لا يتعلق الأمر فقط بتواجد المسؤولين فى الشارع ساعة الكارثة لسرعة التصرف وحل الأزمات، بل هناك حديث يطول على عجز المحافظة والمحليات خلال السنوات السابقة على العمل على انقاذ الاسكندرية من الزحام المروى والصرف الصحى والشوارع الغير ممهدة فى الأحياء الخلفية، ومصافى مياه الأمطار التى لا تعمل بكفاءة رغم ان المحافظ الحالى أنفق الكثير فى بداية توليه منصبه على أمور مثل هد الأرصفة القديمة وتبديلها بجديدة وبناء مصافى المطر والمجارى،

ويظن زوار الاسكندرية أن الكورنيش وبعض الشوارع الشهيرة وأحياء وسط البلد المزينة هى الاسكندرية الحقيقية، ولكن للاسكندرية وجه أخر عشوائى يعيش مهملاً بعيداً عن الاهتمام ولا تلتفت له المحافظة كثيراً، ولا يتذكره أحد الا عندما تسقط احدى عماراته على رؤوس ساكنيها.

لم تطلب الاسكندرية وسط كارثتها فى اليومين الماضيين معاملة خاصة أو استثنائية من الدولة، لكنها كانت تنتظر من باب العشم والعشرة وشوية تاريخ قديم أن تعاملها الحكومة بالمثل كما عاملت حيفا الاسرائيلية حيث هرعت أجهزة انقاذ مصر المحمولة جواً بكل شهامة وخفة ونشاط للطيران صوب الصديقة اسرائيل للمساهمة فى اطفاء الحرائق التى شبت في بعض غاباتها .. مش احنا أولى بالجدعنة والشهامة ديه!

[hakeem]

فشل ذريع مستمر للمحليات

الأسبوع الماضي صدرت العديد من التحذيرات من هيئة الأرصاد الجوية بإننا مقبلين على موجه سيئة من الطقس هي إمتداد لما يحدث في أوروبا الان من صقيع ودمار ..

ومع ذلك ... على طول بنغرق في شبر ميه

والله كلامك سليم يا سى السيد وديما سابقنا انا كنت داخل لسه هسب والعن الحكومة اللى معملتش اى احتياطات علشان الحاجات المتوقعة دى.

انا مش هتكلم بقا عن اسكندرية ولا حاجة لان الناس هنا كفوا ووفوا انا هتكلم عن محافظه تانية..كفرالشيخ..لو حد سمع عنها

مطر ياجماعة متواصل من يوم السبت الساعة 5 المغرب ليوم الاتنين الصبح الساعة 6 ..طبعا كهربة قطعت ..نت وتليفونات مفيش..يعنى اكنهم بيقولونا ياريت تموتوا وتريحونا..عندنا بردوا ميه البحر طلعت على قرى فى بلطيم ومطوبس غرقتها..فين بئا الحكومة من ده كلة..تلاقيهم تحت البطاطين ومشغلين التليفزيون وبياكلوا لب..

لسه الكهربه جايه عندى حالا من يومين..ومش عارف لو كان المطر ده عام ولا فى منطقتنا بس ولا محافظتنا بس لان كل وسائل اتصالنا اتقطعت حتى الموبايل خلص شحن كهربه ومش عارف اشحنه ..ورصيد كمان مش عارف انزل اشحنه..يومين محبوسين فى البيوت..اية الذل دة ياجماعة

اول حاجه لما النور جه قلت ادخل هنا اعرف الدنيا حصل فيها اية بدل العزله اللى كنا فيها دى..

تم تعديل 13 ديسمبر 2010 بواسطة hakeem

[ريمون]

يا ساتر استر يا رب!

انا اللى خليف منه ان ميه الصرف تدخل على ميه الشرب

الموضوع ده ممكن يسبب مشاكل كتير و يا ريت الناس تغلى الميه قبل ما تشربها!

الطف بينا يا رب و ارحمنا!

[المهندسه]

عاملين ايه يا اهل اسكندريه ..ربنا يكون فى عونكم ويسترها عليكوا وعلى اولادكم يارب

انا بقه غيركوا خااالص بالرغم من انى اكره الشتاء وجوه لكن نفسى اشوف اسكندريه دلوقت وهى فى جوها ده

اصل انا عندى ايمان واعتقاد ان اسكندريه دى اجمل مدينه فى العالم كله ...بحبها حب غريب وعجيب بعشقها رغم انى مش من اهلها

فى الصيف مش بقدر استمتع بها علشان الزحمه ....علشان كده انا امنيتى اروح اسكندريه فى الشتاء علشان تبقى فاضيه

واستمتع بيها...

يا بختكوا ب اسكندريه وجمالها وربا يزيح عنكم غضب البحر ويسترها مع اهلها يارب.

وده اهداء منى ل اسكندريه واهلها

http://www.youtube.com/watch?v=e9fH401GYVg

http://www.youtube.com/watch?v=AkIeSoqUJ1k