القذافى يترجل فى حى مصر الجديدة ويتناول عصير القصب

[Mohammad Abouzied]

القذافى يترجل فى حى مصر الجديدة ويتناول عصير القصب ويفشل فى الفوز بصحن كشرى .. !

(13-07-2004)

حينما خرج الزعيم الليبى معمر القذافي من منزل الرئيس حسني مبارك في الساعة العاشرة مساء أول من أمس, بعدما اطمأن إلى صحته, وهنأه بنجاح العملية الجراحية التي اجريت له في ألمانيا سار موكب الزعيم الليبى إلى حيث مقر إقامتة ، وفجأة سأل القذافي مرافقه المصري "أي حي هذا", فأجابه: "نحن في مصر الجديدة", فأبدى الزعيم الليبي إعجابه بنظافة الحي وبناياته العريقة, ثم أمر قائد السيارة بالتوقف, منبهاً أفراد الحراسة والمرافقين إلى أنه قرر أن "يتمشى" في مصر الجديدة .

كان الجزء الأكبر من موكب القذافي توجه إلى مقر إقامته, ولم يبقً معه سوى نفر قليل من الحراس المصريين والحارسات الليبيات وبعض المرافقين الذين أخبروه بأن الزمن تبدل, والأوضاع تغيرت ومصر الجديدة الآن غير تلك التي يراها في الأفلام, وأن شوارع الحي ليست خالية دائماً وإنما أخليت كي يمر موكبه, وحذروه من أن نزوله إلى الشارع سيربك المكان.

وتقول صحيف الحياة التى نشرت الموضوع ان الزعيم الليبي رفض النصيحة وأصر على الترجل في منطقة "الكوربة" الشعبية. كان سكان الحي ورواده يقفون على جانبي الطريق, أو سجنوا داخل المنازل والمحلات, وبعضهم استمر في لعبة نرد الطاولة على مقهى "السوايسيه" الشهير في الحي, وجميعهم ينتظرون مرور موكب الضيف ليمارسوا بعده حياتهم في شكل طبيعي. لكنهم لمحوا رأس القذافي وشعره الكثيف مترجلاً وحوله نفر قليل, فالتفوا حوله وداعبوه ونادوه: "يا سيادة الرئيس", "يا أخ معمر", فرد عليهم بصوت مسموع: "قولوا قائد الثورة لست رئيساً ولا عقيداً". كالموج البطيء, تحرك الجمع يحيط بالقذافي وسط ارتباك شديد بين الحراس ودهشة الناس. فجأة لمح القذافي محلاً لبيع العصير, فسأل: "في عنده عصير قصب؟!", ضحك من سمعوا السؤال, وردوا: طبعاًَ يا زعيم. اختلط الحابل بالنابل, وانطلقت زغاريد من سيدات يطلن من شرفات منازلهن على محل "جنة الفواكه", حيث وقف القذافي والجمع حوله وأمامه.

كان واضحاً أنها ليست المرة الأولى التي يشرب فيها الزعيم الليبي عصير القصب المصري, إذ طلب كوبين دفعة واحدة, وبعدما تناولهما قال باللهجة المصرية "ده كويس أوي". ثم أخذ ينصح أبناء الحي بالإكثار من تناوله بسبب فوائده للمعدة والكلى.

في الجهة المقابلة لمح القــذافي لافتة كـبيرة كُتب عليـها "كشري هند", فعرف أنه محل يقدم وجبة الكشري الشعبية المصرية الشهيرة, فطلب من الحراس والمرافقــين والجــمهور عبور الشــارع لتناول الكشري, فرفض حراسه ومرافقوه, فحاول إقـناعهم قائلاً بالعامــية المصرية: "علشان نكون أكلنا عدس وارز مع الاخوة بتوع مصر الجديدة"... في إشارة إلى العادة المصرية التي تعكس الحميمية والصداقة بتناول "العيش والملح".

أصر الحراس على موقفهم, فرضخ القذافي واتجه نحو سيارته قائلاً: "بلاها كشري" وركب سيارته ملوحاً بيديه, مودعاً شعب مصر الجديدة الذي حاول استمالته وتشجيعه على أكل وجبة من الكشري. وعندما انطلق الموكب, كان الناس يهتفون "كشري... كشري... هووه... هووه".

[فــيــروز]

فجأة لمح القذافي محلاً لبيع العصير, فسأل: "في عنده عصير قصب؟!", ضحك من سمعوا السؤال, وردوا: طبعاًَ يا زعيم. اختلط الحابل بالنابل, وانطلقت زغاريد من سيدات يطلن من شرفات منازلهن على محل "جنة الفواكه", حيث وقف القذافي والجمع حوله وأمامه.

:angry: lo:: lo::

بيزغردوا على ايه دول بس

وبعدين الحرس بتوع القذافى دول واضح انهم كانوا متربيين تربيه عاليه :unsure: وماسمعوش عن اختراع الكشرى فى الكيس اللى العيل من دول يشتريه و يخرم طرف الكيس و يفضل يدوس عليه عشان يطلع كشرى lo:: .. يااااااااه انا كرهت الكشرى فى فتره من حياتى بسبب المنظر ده :D

[Modest]

ماجابوش سيرة دَفَع ثمن العصير اللي شربُه و لا لأ :unsure:

و مادام كان في الكُربة المفروض يعَدِّي على صالون كريستال ياخد له شعره afr2:

[guivara]

"الترجل في منطقة "الكوربة" الشعبية"؟؟؟؟ منطقة الكوربة من أرقى المناطق في مصر الجديدة من أمتى أصبحت شعبية؟؟؟

[Mohammad Abouzied]

حي الكوربة الي تقصدة يشمل اماكن عديدة منها الشعبية وهي شارع رمسيس تقريبا على ما أذكر ومنطقة المساكن فعلا راقية جدا وصحيح فترة شبابنا كنا هناك دائما ولكن الكلام دا من خمسة وعشرون سنة ولا اعلم احوالها ايه دلوقتي

يمكن اصبحت شعبية لان حسني مبارك ساكن فيها :unsure:

[Lighthouse]

حي الكوربة الي تقصدة يشمل اماكن عديدة منها الشعبية وهي شارع رمسيس تقريبا على ما أذكر ومنطقة المساكن فعلا راقية جدا وصحيح فترة شبابنا كنا هناك دائما ولكن الكلام دا من خمسة وعشرون سنة ولا اعلم احوالها ايه دلوقتي

يمكن اصبحت شعبية لان حسني مبارك ساكن فيها  :angry:

ايه دخل الكوربة في شارع رمسيس :unsure:

وبعدين لما الكوربة حي شعبي

امال الاحياء الباقية تصنيفها ايه ( عشش ايواء يمكن lo:: )

بس القذافي ده رايق قوي وله نفس يشرب عصير

lo::

[Mohammad Abouzied]

يوجد شارع هناك اسمه شارع رمسيس غير شارع رمسيس بتاع البلد واعتقد انه الشارع الي فيه بياعين قطع غيار السيارات

والكربة زمان كانت فعلا تعتبر حي شعبي ومشهور بالبلطجية والفتوات

لكن يمكن الامور اتغيرت دلوقتي فعلا

[Cleo]

مادام العملية فيها عصير قصب و كشرى هند.... طب ماعداش ليه عالشبراوى ياخدله علبتين فول و ب2 جنيه طعمية و شوية طرشى؟؟ :unsure:

[kfaya]

الكوربة ( كاف واو ) من أرقى احياء القاهرة قاطبة .... طول عمرها ,, و أبدا لم تكن حى فتوات ولا بلطجية .... كلها مناطق فيلات هادئة وبها محلات قويدر مندارين للحلويات ..و الهوم ميد كيك ... و مستشفى الحياة ...و بسبب قربها من مقر الرئاسة , يطبق فيها قانون حظر هدم الفيلات بمنتهى الصرامة ...

كفاية : رئيس حى مصر الجديدة و سمسار فلل

[Cleo]

[و بسبب قربها من مقر الرئاسة , يطبق فيها قانون حظر هدم الفيلات بمنتهى الصرامة ...

الكلام ده فى الشوارع اللى عالوش بس و اللى فى طريق تشريفة الست الهانم...

إنما لو دخلت ميدان الجامع و الكوربة من جوه... هاتشوف الفيلل و العماات القديمة ذات الطابع المعمارى الرائع و هى متهدمة و أو مخلاة من الشبابيك و الأبواب فى انتظار هدمها و بناء غابات أسمنتية قبيحة مكانها...

[kfaya]

فيروز كتبت :

وماسمعوش عن اختراع الكشرى فى الكيس اللى العيل من دول يشتريه و يخرم طرف الكيس و يفضل يدوس عليه عشان يطلع كشرى  .. يااااااااه انا كرهت الكشرى فى فتره من حياتى بسبب المنظر ده 

بالزمة لما تقعد تفعص فى الكيس المخروم دة .... فكرك ممكن ينزل ايه ؟؟؟... :angry: عصير كشرى ؟؟؟؟.... ولا معجون كشرى ؟؟؟؟.... طب قولى مثلا يفتح الكيس وياكل انشالله بايدة ... . فعلا حاجة مقرفة :unsure:

[Abouhemeed]

خرجنا بره الموضوع كالعادة ...

السؤال : كم رئيس يجرؤ أن يسير على قدميه وسط الناس دون أن يتم التحضير لذلك أمنيا و إعلاميا ؟ ألا يعكس ذلك التصرف من الرئيس الليبي أو قائد الثورة كما يحب أن ينادى جزء من شخصيته التي حار الكثيرون في تحليلها ؟

:unsure:

[linux]

السؤال : كم رئيس يجرؤ أن يسير على قدميه وسط الناس دون أن يتم التحضير لذلك أمنيا و إعلاميا ؟ ألا يعكس ذلك التصرف من الرئيس الليبي أو قائد الثورة كما يحب أن ينادى جزء من شخصيته التي حار الكثيرون في تحليلها ؟

:angry:

بالظبط كده.

قرأت أن جمال عبد الناصر كان ساعات يقود سياره بنفسه و بدون حرس معه ...

و قرأت أيضا أن السادات كان بيحب يصلي الجمعة في مساجد مختلفة و بدون حراسة ...

و غير كده ما قريتش :unsure:

[Seafood]

خرجنا بره الموضوع كالعادة ...

السؤال : كم رئيس يجرؤ أن يسير على قدميه وسط الناس دون أن يتم التحضير لذلك أمنيا و إعلاميا ؟ ألا يعكس ذلك التصرف من الرئيس الليبي أو قائد الثورة كما يحب أن ينادى جزء من شخصيته التي حار الكثيرون في تحليلها ؟

:unsure:

لكنه لم يفعل ذلك في بلده يا صديقي .. بالإضافة إلى أن عامل المفاجأة في الموضوع يجعل من القيام بأي عمل إرهابي منظم مهمة شبه مستحيلة ..

هو فعلاً تصرف يعكس شخصيته الإسكيزويدية ..والتي أهلته لأن يكون إسكيزوفريني بشطة محترم ..

تم تعديل 13 يوليو 2004 بواسطة Seafood

[Cleo]

خرجنا بره الموضوع كالعادة ...

السؤال : كم رئيس يجرؤ أن يسير على قدميه وسط الناس دون أن يتم التحضير لذلك أمنيا و إعلاميا ؟ ألا يعكس ذلك التصرف من الرئيس الليبي أو قائد الثورة كما يحب أن ينادى جزء من شخصيته التي حار الكثيرون في تحليلها ؟

:unsure:

على فكرة أن كنت فاكرة الموضوع دعابة.... مش ببجد...

[disappointed]

القذافى ناصح يا جماعه

هوّه إستغل وجوده فى الكوربه و كان عايز بعد ما يشرب عصير القصب و الكشرى يكمّل جولته فى الكوربه ويروح يسحب قرشين من دفتر توفيره اللى فى مكتب بريد الكوربه , وبعدين يخش على مكتبة Every man's bookshop و يتأكّد بنفسه إن عندها كتابه الأخضر , وبعدين يأخذ له شوية "دانش" و "كرواسو" من مخبز فينوس , ويسيب مُزَز الحراسة الحريمى اللى معاه قاعدين شويّة فى "شانتييه" على بال ما يخطف له آيس كريم بالفزدق من "ماندرين" على "فروت سالاد" من "ماجيك" ويضرب له قزازتين بيره فى "الأمفتريون" مع حتتين جاتوه من "إيليت" , وبعدين "يعرُج "فى طريق عودته على مدرسة القوميّة علشان يقدّم أوراقه فى الكى جى تو بتاعتها , و آهو بالمرّة يتسنكح و يتمشّى لغاية "موباكو" و "سبانكر" يجيب له قميصين روشين قبل ما يروح سنترال الكوربه يكلّم الواد إبنه فى ليبيا يشوف أخبار الجماهير إيه , وقى الآخر يخطف رجله لمركز الحياة الطبّى يأخذ جلسة الكهرباء بتاعته وبعد ما يشيلوا العضـّاضة من بقّه ينزل يلم حريمه من شانتييه ويروّح........بس.....الله يسامح السيكيوريتى بتوعه بقى.... بوّظوا له الخروجه

:angry: lo::

السؤال : كم رئيس يجرؤ أن يسير على قدميه وسط الناس دون أن يتم التحضير لذلك أمنيا و إعلاميا ؟ ألا يعكس ذلك التصرف من الرئيس الليبي أو قائد الثورة كما يحب أن ينادى جزء من شخصيته التي حار الكثيرون في تحليلها ؟

شخصيّته فعلا فريدة من نوعها

أوّل مرّة أشوف دكتاتور رِوِش طحن كده

lo::

لكنه لم يفعل ذلك في بلده يا صديقي

بالظبط كده...

ولذلك كان مفروض عنوان المقالة يتغيّر من "القذافى يترجّل فى حى مصر الجديدة" إلى:

القذافى يسترجل فى حى مصر الجديدة

lo::

والكربة زمان كانت فعلا تعتبر حي شعبي ومشهور بالبلطجية والفتوات

:unsure:

عمرها ما كانت حى شعبى.... طول عمرها منطقة راقية , و كل مبانيها قام بإنشائها الشركة البلجيكية التى قامت أيضا بإنشاء قصر البارون إمبان و الكنيسة التى أمام الحرّية مول والتى تعتبر تحفة معمارية هى الأخرى

يوجد شارع هناك اسمه شارع رمسيس غير شارع رمسيس بتاع البلد واعتقد انه الشارع الي فيه بياعين قطع غيار السيارات

لا يا أستاذ محمد.....

أنا عارف إنت قصدك على إيه

بتوع قطع الغيار دول فى شارع موازى للكوربة بس بعيد عنه , وهو شارع دمشق , وبالفعل فى آخره عند الوصول لميدان الجامع منطقة شعبية لأن بها أفران بلدى و سوق خضار و محلاّت فرارجية و فطاطرية و جزّارين

وفيه برضه بتوع قطع غيار و إكسسوارات عربيّات فى شارع بيروت العمودى على شارع دمشق و الأقرب منه للكوربه...بس شارع نظيف بكثير عن شارع دمشق

د.محبط......مرشد سياحى

:D

وهتفوا له : كشرى كشرى...أووه أووه

شعب مالوووووش حل حقيقى يعنى

rs:

تم تعديل 13 يوليو 2004 بواسطة disappointed

[crossfield]

الحمد لله ان العملية جات على قد كوبايين العصير اللى قلبهم و مشى

يعنى لو الراجل لا سمح الله يعنى كان لاسع فعلاً كان طلب يعملوا له خيمة تاخد من أول الكوربة لحد ميدان الاسماعيلية :unsure:

[kfaya]

محبط كتب :

هوّه إستغل وجوده فى الكوربه و كان عايز بعد ما يشرب عصير القصب و الكشرى يكمّل جولته فى الكوربه ويروح يسحب قرشين من دفتر توفيره اللى فى مكتب بريد الكوربه , وبعدين يخش على مكتبة Every man's bookshop و يتأكّد بنفسه إن عندها كتابه الأخضر , وبعدين يأخذ له شوية "دانش" و "كرواسو" من مخبز فينوس , ويسيب مُزَز الحراسة الحريمى اللى معاه قاعدين شويّة فى "شانتييه" على بال ما يخطف له آيس كريم بالفزدق من "ماندرين" على "فروت سالاد" من "ماجيك" ويضرب له قزازتين بيره فى "الأمفتريون" مع حتتين جاتوه من "إيليت" , وبعدين "يعرُج "فى طريق عودته على مدرسة القوميّة علشان يقدّم أوراقه فى الكى جى تو بتاعتها , و آهو بالمرّة يتسنكح و يتمشّى لغاية "موباكو" و "سبانكر" يجيب له قميصين روشين قبل ما يروح سنترال الكوربه يكلّم الواد إبنه فى ليبيا يشوف أخبار الجماهير إيه , وقى الآخر يخطف رجله لمركز الحياة الطبّى يأخذ جلسة الكهرباء بتاعته وبعد ما يشيلوا العضـّاضة من بقّه ينزل يلم حريمه من شانتييه ويروّح........بس.....الله يسامح السيكيوريتى بتوعه بقى.... بوّظوا له الخروجه

الا قولى يا دكتور ... انت أكيد من المنطقة دى ... صح ؟؟؟؟

شانتيية اسمة سابقا هوم ميد كيك ... و اخوك من مواطنى ش الخرطوم ... خلف نادى ارارات بتاع الأرمن ....

و الكنيسة التى أمام الحرّية مول والتى تعتبر تحفة معمارية هى الأخرى

اسمها كنيسة البازليك

كفاية : رئيس حى الكوربة و شيخ حارة

[ابو حلاوه]

علي فكرة فيه معلم سياحي اثري ضخم في المنطقة ما حدش جاب سرته .. اسمه قهوة السوايسة ................ كانت ايام .........

[Mohammad Abouzied]

الكوربة ( كاف واو ) من أرقى احياء القاهرة قاطبة .... طول عمرها ,, و أبدا لم تكن حى فتوات ولا بلطجية .... كلها مناطق فيلات هادئة وبها محلات قويدر مندارين للحلويات ..و الهوم ميد كيك ... و مستشفى الحياة ...و بسبب قربها من مقر الرئاسة , يطبق فيها قانون حظر هدم الفيلات بمنتهى الصرامة ...

كفاية : رئيس حى مصر الجديدة و سمسار فلل

طول عمرها ازاي بس ما حي الزمالك كان عبارة عن عشش وخيم للعساكر واصبح ارقي حي في مصر في الستينات والسبعينات وحي بولاق (البحيرة الجميلة) كان مقر الامراء واثرياء البلد وتحول الى حي شعبي ومفيش حاجة زي ما هي ابدا منطقة المحكمة ونادي النصر وما حولها كانت مقابر كلها وعند بناء حمام السباحة في نادي النصر اخرجنا اكثر ربعمائة رفات للموتى واعادة دفنها من جديد في مدينة نصر والكلام دا كان من اربعين سنة تقريبا وفاكرة كويس

اليوم اختلفت الاحوال عزب اصبحت احياء راقية واحياء كان صععب اقتناء بيت فيها اصبحت اماكن لسكن المهاجرين من الريف والايجار بالغرفة فيها