''السائق المصري الشجاع'' يقود ناقلة وقود مشتعلة وينقذ المنصورية بالجيزة من كارثة محققة

[م تيمور المراغي]

لك أن تتخيل أنه في لحظة واحدة.. يستجمع كل قواه.. ويقرر دون تفكير.. أن يغامر بحياته.؛ من أجل إنقاذ حياة آخرين.. ويجازف بروحه ويمنع بدعاءه القدر من تحقيق الكارثة.

عندها فقط يستحق بكل جدارة أن نلقبه بالبطل.. الذي أدرك ان التضحية ليست كلمات تترد على الألسنة.. أو شعارات تُكتب على اللافتات.. بل انها تحتاج فقط لسلامة صدر وضمير يقظ.

ما سبق ليس بقليل على " رمضان محمد سليمان"، سائق ناقلة بنزين، والذي فوجئ أثناء تفريغ الحمولة بإحدى محطات الوقود، أسفل محور المنيب بالمريوطية، باشتعال النار في صهريج البنزين.

على الفور سارع السائق باستقلال السيارة وهي مشتعلة لمسافة تزيد بقليل عن 150 مترًا، إلى أرض فضاء، وانقذته العناية الإلهية عندما استطاع أن ينجو بنفسه بابتعاده عنها.

لحظات وانفجرت الناقلة التي كانت تحمل 50 ألف لتر بنزين، لتُنقذ منطقة المنصورية بالجيزة من كارثة محققة، دون وجود أي إصابات.

الله يبارك فيك يا رمضان يا سليمان يابطل ,,

الهمتنا ورجعت لنا الامل ان مصر ولادها لسه فيهم الخير ,,,

ياريت اعلامنا وفضائياتنا تركز عل النموذج ده ,, وينال التكريم اللي يستحقه

فارس نبيل غامر بحياته ,,

عشان ينقذ ناس بريئه ما يعرفهاش من الموت والحرق

[Handasah]

نموذج لرجل مصرى جدع من نماذج الجدعنة والبطولة التى قلت فى وقتنا هذا .

[أسد]

واقعة مشابهة حدثت منذ خمسة وعشرون عاماً في محطة البنزين اللي في ميدان الدقي

وأنقذ السائق المنطقة من كارثة كانت ستحفر في خلد المصريين للأبد في ميدانالدقي

ستر ربنا ان الشاحنة وقتها كانت تقريباً فضيت

خدها وحركها ونقلها وهي مشتعلة إلى مكان بعيد عن المحطة .. لكن كان في موقع كارثي أيضاً لطبيعة المكان

أعتقد انه نقلها اسف الكوبري .. في نصف الميدان

وتظافرت جهود المواطنين

المصريين

لإيقاف لاسير في كل الشوارع المؤدية لمكان الحريق .. وساهم الجميع في إخماد الحريق

وساهم الجميع في تسهيل وصول فرق المطافي إلىمكان الحريق

هكذا هم المصريين .. ونتمنى أن نكون كذلك..

هذا أفضل بكثير من أن نشجب تأخر فرق الإطفاء بعد أن تقع الكارثة لأنها تأخرت في الوصول ..

ونسب ونلعن في الزحام .. الذي أدى لتأخر المطافي

ونسب ونلعن في الشرطة التي تفرغت لحاجات تانية وسابت الشوارع زحمة ..

الخ .. الخ .. الخ ...

هذه هي البطولة .. والإيجابية التي تبني الأوطان ..

وترفعها

[م تيمور المراغي]

ان توقد شمعه

خير من ان تلعن الظلام الف مره ,,

للاسف قد بلينا في زمننا هذا بكثرة اللاعنين ,,

لكن قليل جدا منهم

من يوقد الشموع

[عبد الله غريب]

الله على رجالتك يا مصر،

وقت الشدة تبان المعادن،

متنساش انهم "خير أجناد الارض"

و مش نادرين و الله في زيه كدا كتير بس اخلق لهم فرصة و هتشوف العجب، مش قصدي ناقلة نفط تتحرق كل يوم، لا قصدي اختبرهم في مواقف شرف و عز و فداء و مهما كانت صعبة و حتشوف ازاي حيتسابقوا على خوضها و اجتيازها و بنفس الشجاعة و التضحية و طبعا طاقتهم مصدرها .. وعد الله لهم.

جزاه الله كل خير

و حفظها له ليوم لقياه .. آمين

[م تيمور المراغي]

انا عارف والله ان المعدن الاصيل للانسان المصري حيفضل محفور في الوجدان

مهما توالى عليه اشر الحكام او ثقافات مستورده من بلدان اخرى

ومسير الغمه تنزاح

وياتي لنا المخلص الذي يبعث الروح المصريه الاصيله من تحت الرماد ,,

ان شاءا لله

[محمد عبدالعزيز]

مليون تحية وتقدير للبطل وربنا يكتر من أمثاله

[arkan]

ماشاء الله ربنا يجزيه الخير

ياريت الاعلام يسلط الضوء على النماذج المفرحة دي

[ريمون]

ربنا يكرمه و يعوضه و يخليهاله فى ولاده

يا ريت صاحب شركه كبيره يشغله شغلانه حلوه

و اكيد اللى يشغل بطل زى ده هيكسب

[ozoozo]

من سنتين حصل نفس الموقف في احدي مدن الصعيد

والسائق البطل بعد بالسياره بعيد عن البلد وانقذها من كارثه

وهو بيجري بالعربيه كسر عمود نور وبعد ماالمحافظ كرمه وجد مطالبه من المحافظه بدفع ثمن العمود:blink:

[م تيمور المراغي]

ربنا يكرمه و يعوضه و يخليهاله فى ولاده

يا ريت صاحب شركه كبيره يشغله شغلانه حلوه

و اكيد اللى يشغل بطل زى ده هيكسب

لو حد يا جماعه له اتصال باحد رجال الاعمال الكبار فقط يلفت نظره لهذا السائق الشهم ,,

اكيد رجل بمواصفات البطوله دي يؤتمن على ارواح وممتلكات وامانات اي مكان يعمل فيه ,,

انا حكلم المدير العام عندنا وهو مصري بالمناسبه وسيقدر بطولته ان شاء الله ,,

سبحان الذي جعل مجرد توقيع من هذا الرجل كافيا لتعيين اي انسان باي مرتب ,,

سبحان الله العظيم ,,

[ريمون]

خبر جميل

اكتر من وزاره كرمت البطل :)

المقال من مصراوى

تم تعديل 22 ديسمبر 2010 بواسطة ريمون

[م تيمور المراغي]

خبر جميل

اكتر من وزاره كرمت البطل :)

المقال من مصراوى

تسلم ايديك يا ريمون على الخبر المفرح

مصر لسه بخير والله طول مافيها الابطال دول

[ريمون]

الوزير سامح فهمى يقرر تعيين السائق الشجاع فى شركه بترول

الف مبروك يا بطل

و شكرا للمهندس سامح

الخبر من اليوم السابع

[م تيمور المراغي]

يارب يا بلدي الاقي فيكي مليون راجل زي الراجل ده,,

,,

ايها الرجل الشهم الشجاع البطل ,,

اشكرك

لانك الهمتنا

واحييت في نفوسنا كل الامل ,,

لله الحمد ان المروؤه لم تمت فينا بعد

[masraweya]

الوزير سامح فهمى يقرر تعيين السائق الشجاع فى شركه بترول

الف مبروك يا بطل

و شكرا للمهندس سامح

الخبر من اليوم السابع

سائق شاحنة البنزين المشتعلة يرفض تعيينه بالبترول

القاهرة - أخبار مصر

في واقعة يندر تكرارها،‏‏ رفض السائق رمضان محمد عمر تعيينه في إحدي شركات البترول تكريما له من الوزير سامح فهمي على شهامته،‏ بعدما قاد الشاحنة المحملة بـ35‏ ألف لتر من البنزين بعد اشتعال النيران بها الى خارج الكتلة السكنية‏ لتنفجر في الصحراء، بحسب صحيفة الاهرام الخميس.

وفي اتصال هاتفي معه لاستيضاح الأمر،‏ تبين أنه بعد أن تكبد مصروفات السفر من قريته قصاصين الأزهار،‏ فوجئ بأن راتبه الشهري يتراوح ما بين 800 و ‏1000‏ جنيه وهو أقل كثيرا مما يتقاضاه في عمله الحر‏.

ربنا يكرمه و يوفقه أيا كان قراره في الشغل

ما فكرش في نفسه و ما افتكرش كان بيفكر في مكافأة و هو بيسوق العربية بعيد عن ناس ما يعرفهاش

[م تيمور المراغي]

يا مصر اصحي وفوقي ,,

جمعه الشوان باع كل اللي حيلته

والسائق الشهم تكافئية بربع اللي كان بيجيه ؟

وعجبي ,,

[عبد الله غريب]

سبحان الله !!!!

يعني جت على الكام جنيه المرتب اللي حيخدهم و قفلت ؟؟؟؟

دا زي ما يكونوا بيعلموا الناس محدش يبقى يفكر يعمل فيها شهم تاني !

الغريب عاملين إعلان بإن الوزير عينه في شركة البترول تكريماً له ، و قال إن هذا المواطن يستحق التقدير بعد مجازفته بحياته من أجل سلامة المواطنين ومنع كارثة محققة فى منطقة الهرم !!!

طيب فين هو التقدير ؟؟؟؟؟

و حتفرق معاهم أيه لو اعتبروا مرتبه حالة استثنائية خاصة و أعطوه راتب عالي كتقدير مادي على إنكاره لذاته و مجازفته بحياته بطريقة عفوية فورية؟

يعني واحد زي ده مش غلط ياخد مرتب استثنائي بعيداً عن المؤهلات و خلافه كنوع تقدير خاص له و تشجيع للغير و إشعار لهم إن المعروف ما بيتنسيش و له تقديره، لكن بالشكل ده و مع الإعلان عن تكريمه في الصحافة و اللي إنكشف إنه مش تكريم لأن الراتب ضئيل جداً، بالشكل ده أصبح كأنه عمل مقصود منه هدم الروح الجميلة، هدم ما تبقى لدى المواطن المصري من إحساس قد يراوده بالشهامة أو التضحية أو أي شئ جميل ذا قيمة لأنه عارف إن حتى التقدير المعنوي مش حيلاقيه لأن معنى إنهم يعطوه هذا الراتب الصغير جدا و هم عارفين عظم ما قام به دا في حد ذاته يصيبه بإحباط داخلي يمكن ما يظهرهوش (لأنه شهم) لكنه أكيد موجود جواه لأن الإنسان مهما كان يحب التقدير المعنوي، دا بالرغم من إنه ما قصدش وقت ما قام بعمله البطولي (اللي كان ممكن يكلفه حياته) أي شهرة و مانتظرشي أي مكافأة،

و طالما الدولة حبت تسلط الضوء عليه و تكافئه يبقى تسلط الضوء على حاجة تتشاف، مش بالشكل دا، دول حسسوه إنه ولا حاجة و إن تضحيته اللي قام بها لا تساوي شئ حتى الكام جنيه اللي كان ممكن يعبروا بيهم له عن شكرهم و امتنانهم .. بخلوا بيهم عليه! :angry:

حسبنا الله فيمن يقصد عمداً قتل الروح الجميلة في الشعب المصري.

و كل التقدير لك ايها البطل .. جزاؤك محفوظ عند رب العالمين. bv:-

تم تعديل 30 ديسمبر 2010 بواسطة عبد الله غريب

[م تيمور المراغي]

تصدق اول مره اخذ بالي

وحكاية جمعه الشوان كمان

يعني ده تخطيط منظم لقتل اي مشاعر للتضحيه و الشهامه في الانسان المصري

اقعد كده و خليك في حالك ما تعملش بطل

خليك كده ميت

حسبنا الله ونعم الوكيل

[عبد الله غريب]

شخص زي ده عنده نفس مستعدة للتضحية .. دا ممكن يلهب مشاعر ألف واحد حواليه .. دا مش بس بيفكر .. دا بياخد خطوة كمان ... دا بينفذ .. دا اتغلب على نزعة البقاء و الأنا اللي جواه ... ده خطر .. النموذج ده لازم ينمحي من الواقع المصري ... و من ذاكرة المصريين.