التوربيني .. وسلحفاة العدالة

[se_ Elsyed]

كلنا فاكرين القضية اللي هزت الرأي العام سنة 2006 عن أطفال الشوارع .. وعصابة التوربيني اللي كان بيغتصب الأطفال في الشارع ويجبرهم على العمل بالتسول واللي كان بيعصى اوامره بيقتله بمنتهى البرود .. وتم كشف خيوط القضية بأكتشاف جثة لاحد الأطفال أسفل نفق بمنطقة الشرابية وتوالت الفواجع المؤلمة عن عالم أخر كان موجوداً بيننا ولكننا كنا نغض الطرف عنه وبنطنش ...

وعشان التوربيني ومساعده " حناطه " جهله ومتخلفين .. فلم يتذكروا عدد القتلى اللي راحوا ضحايا لإجرامهم لإن القتل كان في منتهى السهولة عندهم ...

ولإننا شعب جميعنا أدمنا تعاطي " حبوب النسيان "

ولأننا شعب تعودنا على الثورة الكلامية والفوران الوقتي زي الفوار بالظبط بتاع الحموضة اللي بياخد ثواني في الفوران وبعدين .. بخخخخخخخخخخخخخخخخخخخخخخخخخخخخخخ ينزل على مافيش

وأطفال الشوارع .. إزاي ؟حرام .... لازم نتحرك .. البلد رايحه في داهية ...

وبعد يومين : أطفال شوارع مين والناس نايمين ... يا عم خليني في حالي وفي عيالي وفي مدارسهم ودروسهم الخصوصية وفي اللحمه أم 70 ج ....

أتصدمت بقى لما أعرف إن التوربيني والمساعد بتاعه لسه حكم الإعدام متنفذ فيهم يوم الخميس الماضي

4 سنوات ؟؟؟؟؟.... 4 سنوات وكأنها قضية قلب نظام حكم ؟؟؟؟

وخد عندك الااااااااااااااااااااااااف القضايا الحساسة الأخرى ... ومنها

قضية مذبحة كنيسة نجع حمادي وضحايا أبرياء من المسيحيين المصليين اللي خارجين من الصلاة لا بهم ولا عليهم ويتغدر بيهم أمام الكنسية ...

وأجل يا عم ... وطنش .. و3 شهور أجازة القضاة ... طب إدينا فرصة نطلع على القضية ...

ودوخيني يا لمونه

ويرجع يقول لك " هو في إحتقان طائفي ليه " ؟

في ناس ممكن تقول : مش أحسن ما يسلقوا القضايا ويظلموا بريء أو يبرءوا جاني ؟

يا سلام .. وهو ما فيش وسط ؟

يعني عمرنا ما هانسمع عن عدالة سريعة تُعطي كل ذي حق حقه وتبرد ناره ؟

لا قدر الله وربنا ما يحكم على أحد .. لو إحنا عائلة أحد الضحايا ودمنا بيغلي ... إيه الفايدة إني الاقي الجاني إتحكم عليه بعد 4 او 5 سنوات ؟

ما هذا العبث أيها السادة ؟

ما عندكمش قضاة زيادة ..... أعمل معاهد أو دورات تدريبية مكثفة لتعيين قضاة أكفاء

يا أخي شيل من على كتف القضاة الاكفاء القضايا البسطية اللي ممكن تخلص في جلسة بس بتعطلهم

إعملوا حاجه تخلي العدل اللي هو اساس أي مُلك ينتشر في البلد ... والواحد يحس بامان في بلده .. واللي أكتر خلوه يشعر إنه لو إتظلم في يوم فحقه هايجيله