مالذي يمكن ان تقدمه لإسرائيل كجاسوس مصري؟

[MZohairy]

اخواني المواطنين الشرفاء

لو افترضنا ان واحد فيكم ربنا أكرمه و اتوفق في شغلانه حلوه بالدولار مع الموساد الإسرائيلي شامله بدل سكن و بدل انتقال و تليفون موبايل و كارت شحن

و ذلك مقابل نقل المعلومات المصرية لجهاز المخابرات الإسرائيلية

تقدروا تقولولي ايه هي المعلومات اللي ممكن تنقلوها للموساد و مايكونش عارفها عن طريق النت و الفضائيات و الصحف ؟

طبعا يإستثناء المناصب الحساسه في الدوله بتكلم على الناس العاديه زي جمعه الشوان و رأفت الهجان

حقيقة انا مش فاهم ازاي ممكن يكون فيه جواسيس عاديه و ذوي مناصب عاديه لغاية دلوقتي

حد فاهم؟

[مغتربة]

الى ممكن يتقدم كتير و كتير جدا كمان

استحاله المخابرات فى العالم تتنازل عن الجواسيس التقليديين و الاكتفاء بالمعلومات المجمعه من الوسائل التقنيه حتى لو كانوا اشخاص عاديين جدا مش فى مناصب حساسه لانهم بيتميزوا بعنصر استحاله العناصر التقنيه مهما تطورت تعرف تغطيه و هو البشريه

يعنى مثلا فى قضيه اخر جاسوس دا فالمهمه الى كان متكلف بيها هى التصنت على مكالمات مسؤليين فى مواقع حساسه

لما راح سوريا سيبك من انه كلف بجمع معلومات عن امن المطتر لان دا ممكن يكون بس تيست ليه يعنى هما عارفين المعلومات من قبل ما يجبها لكن كلفوه بيها علشان يتاكدوا من حجتين قدرته و صدقه لكنه برضه كان حلقه اتصال امنه ليهم بجاسوس ليهم فى سوريا و اظن ان دا من المهام الاساسيه ليه الى بعتوه علشانها سوريا عندك موقع التوظيف و السى فى هات الى جمعهوها اكيد السي فى هات دى هتخضع لدراسات دقيقه جدا سواء لاستخلاص جواسيس محتملين يقدروا يجندها او لجمع معلومات عن الشباب العربى بشكل عام

هو وفرلهم غطاء كويس جدا للقيام بحاجات كتير بدل ما هما الى يعملوها بنفسهم و تنكشف

و اهم ميزه لسه بيتمتع بيها الجاسوس التقليدى جمع المعلومات من البشر بالوسائل التقليديه و بالتالى ممكن يجمع لهم معلومات غير الى بتتنشر على النت و بالتالى بتكون مكمله ليها او تكون هى نفسها وبالتالى بتكون عامل تاكيد ان الى فى الحقيقه هو الى فى الواقع الافتراضى

و متنساش فضيحه الجواسيس الروس الى مسكوهم فى اميركا و الى كانت كل مهمتهم الذوبان فى المجتمع الامريكى كخلايا نائمه لغايه ما يجى وقت الاستفاده منها

[م تيمور المراغي]

الاعبهم على الشناكل والله يا زهير

[moory]

دي هيا دي قمة الذكااء في الاستخبارات،

انك تجيب واحد منصبه عادي، ممكن يبقى صاحب شركة او رجل أعمال او مغنى أو مطرب،،او حتى رد سجوون...

بس ببيقى عنده مميزات شخصية مش عادية، ثبات انفعالي واعصاب حديد ، قدرة على التأثير و الاقناع، وااد مخلص يعني،،

وقدرته و شخصيته و التدريبات طبعا الي بياخدها على ايد جهاز المخابرات، هاقدر يأسس شبكة علاقات و يعرف ازاي ياخد ويستخرج المعلومات الي هو عايزها،،

ويبقى في نفس الوقت بعيد عن الشبهات و بعيد عن الاماكن الحساسة الي ممكن تثير الانظار ناحيته...

وزي ما قلت يا زهيري باشا، رأفت الهجان اكبر مثال على كده،

واحد صايع رد سجوون، ازاي ممكن يبقى واحد من اهم الجواسيس المصرية؟!!

تم تعديل 21 ديسمبر 2010 بواسطة moory

[MZohairy]

بالعكس

ده انا حتى شايف ان ذوي المناصب المهمه ماعندهومش حاجه ممكن العدو مايكونش عارفها

يعني عارفين الاحتياطي النفطي بكل دقه

احتياطي القمح

الاسلحه

البنزين

الأسعار

الغضب الشعبي

كل ده بقى بديهي جدا

و مش عندنا بس

ده في كل الدنيا

الحاجه الوحيده اللي شايف الجاسوس ممكن يعملها دلوقتي هو نشر المعلومه جوه بلده حسب رغبة الجهه الخارجيه

او نشر اليأس

او زرع الفتنه

و ما شابه

انما نظام مصر امانه في رقبتك يا رأفت بقت غير صالحه للإستعمال حاليا ابدااا

[ابو محمد بن مصطفي]

بالعكس

ده انا حتى شايف ان ذوي المناصب المهمه ماعندهومش حاجه ممكن العدو مايكونش عارفها

هقولك ممكن ايه يحصل من واقع قصة حقيقية قالها رجل في جهاز المخابرات السوفيتي بعد انهيار الاتحاد

بانهم كانوا يشكون في ان احد المسئولين الكبار بأنه يعمل لحساب المخابرات الامريكية

وليس عندهم اي دليل قاطع يؤيد هذا الشك

بعد انهيار الاتحاد السوفيتي استدعي رجل المخابرات المسئول الكبير وحكي له عن هذه الشكوك

فأجاب المسئول بانه فعلا كان يعمل لحساب المخابرات الامريكية

وكانت مهمته تتلخص في

انه عندما يعرض عليه اشخاص لشغل منصب من المناصب الشاغرة

كان يختار اسوء المرشحين لشغل هذه الوظيفة

[أبوعمار]

حقيقة انا مش فاهم ازاي ممكن يكون فيه جواسيس عاديه و ذوي مناصب عاديه لغاية دلوقتي

حد فاهم؟

لا

بس ده ما يمنعش إني أفكر معاكم

مش هأقول هأشتغل عميل مزدوج ولا أعمل فيها رأفت الهجان وجمعة الشوان وأعيش في الدور مع مونيكا ولا جوجو "الغريبة الاتنين شعرهم أكرت"

لأني ما انفعش في الموضوع ده خالص

بس أعتقد انهم لو اتحروا عني قبل ما يفكروا يجندوني هايغيروا رأيهم فورا

ده أنا في الكويت وكل شوية عامل خناقة مع طوب الأرض بسبب اللي قاعدين يتريقوا على مصر والمصريين

يعني ماليش لقمة عيش عندهم الناس دي

[طبيبة بالخارج]

انا مع الرأي اللي بيقول ان مهمة الجواسيس بمصر لصالح اسرائيل هو في الأساس المساعدة على نشر الفساد و كسر الهمم

اسرائيل فهمت ان القتال المباشر لن يفيد بل انه بيوحد الأمة اكثر و كأنها بتخبط راسها بالحيط

يبقى الحل في تشتيت انتباه المصريين بهموم بلدهم زي كل الدول العربية الأخرى

اسرائيل على الأقل ضمنت عدم محاربة العرب لها من أجل فلسطين في الوقت الحالي

الحرب النفسية هي اخطر انواع الحروب و نجحت فيه اسرائيل

[طبيبة بالخارج]

مرة واحد اسرائيلي دخل على الياهو نيوز على أخبار الشرق الأوسط و قعد يتبجح

فدخلت و سكيته لكنه استمر و عندما هددته بإن العرب لن يظلوا عاجزين و ان مصر مسيرها تنهض من نكبتها و نحارب اسرائيل مرة اخرى ضحك و اتريق و قالي انتي لو حاولتي تعملي حاجة ضد حكومتكم حتروحي ورا الشمس

فهمتوا قصدي

[أسد]

هذا موضوع شائك

أرجو محاولة ضبط المداخلات وعدم قول أي كلام قد يكون غير مناسب ذكره هنا

لقد أخفيت عدد من المداخلات ..

[akramgroup]

هذا موضوع شائك

أرجو محاولة ضبط المداخلات وعدم قول أي كلام قد يكون غير مناسب ذكره هنا

لقد أخفيت عدد من المداخلات ..

احييك استاذ اسد يا خبرة

[م تيمور المراغي]

إسرائيل: قضية التجسس الجديدة في مصر تشبه اتهام الموساد بارسال اسماك قرش لشرم الشيخ

نفت إسرائيل ضلوعها في شبكة التجسس التي اعلنت مصر الاثنين القاء القبض على احد اعضائها وهو مهندس مصري الجنسية.

ونقلت صحيفة القدس العربي عن (يديعوت أحرونوت) الاسرائيلية الثلاثاء قول نائب وزير خارجية اسرائيل داني أيالون إن "قضية التجسس الجديدة في مصر تبدو مفندة مثل الاتهام المهووس الذي وجهه محافظ سيناء بأن الموساد الإسرائيلي أرسل سمكة القرش إلى شواطئ سيناء من أجل المس بالسياحة في مصر".

وقالت الصحيفة ان اتصالات تجري بين مصر واسرائيل لعقد لقاء بين الرئيس حسني مبارك ورئيس الوزراء الإسرائيلي بنيامين نتنياهو.

وقال مسؤولون سياسيون إسرائيليون للصحيفة إن مصر لم تسلم إسرائيل أية معلومات حول قضية التجسس "ونحن لا نعرف عمن يدور الحديث والأسماء الإسرائيلية ليست معروفة، ويبدو أن هذه القصة غير جدية".

وأضافت الصحيفة إنه في هذه الأثناء يعمل مكتبا مبارك ونتنياهو على تنسيق عقد لقاء بينهما في الأسبوع الأول من يناير المقبل يتناول احتمالات استئناف المفاوضات بين إسرائيل والفلسطينيين.

وكانت نيابة أمن الدولة قد أعلنت الاثنين كشف شبكة تجسس لإسرائيل تضم مصري يدعى طارق عبد الرازق وضابطي مخابرات إسرائيليين هاربين هما ايدي موشيه وجوزيف ديمور.

وأكدت أن الشبكة سعت إلى تجنيد مصريين وسوريين ولبنانيين للعمل لمصلحة الموساد.

وكشفت تحقيقات نيابة أمن الدولة مع المتهم المصري في القضية شبكة العديد من المفاجآت عن كيفية إنشاء هذه الشبكة، وكيف كانت تتم عملية التخابر.

وقالت تحقيقات النيابة إن المتهم طارق عبد الرازق حسين حسن يملك شركة استيراد وتصدير كان قد سافر للصين عام 2006 للبحث عن فرصة عمل من تلقاء نفسه، وقام بإرسال رسالة بالبريد الإلكتروني إلى جهاز المخابرات الإسرائيلية يعرض عليهم مساعدتهم والعمل كجاسوس وأرسل فيه بياناته.

[rar]

كل ما أقرا عن شبكات التجسس اللي الحكومة بتاعتنا بتمسكها، ال

BS Detector

بتاعي مؤشره بيعلي... تماما مثل العزيز زهيري

يعني مش فاهم انا جهاز مخابرات العدو المصهين ده نايم علي ودانه... كل ما نمسك جاسوس يطلع انه راح بعت للموساد جواب و لا راح بنفسه السفارة الاسرائيلية يبوس ايدهم عشان يتجسس... هوا الموساد ده ما بيشتغلش من نفسه و يجري ورا الجواسيس المصريين ابدا... لازم انا، قصدي الجاسوس يعني، يروح يعرض خدماته بنفسه

ده حتي شغل مش بروفيشنال خالص...

يا بتوع الموساد، خيبتكم تقيله... نرجو اسناد مهمات التجسس لشركات خاصة عشان المؤسسة الحكومية بتاعتك تعبانه قوي

و الله أعلم

[Mostafa Kasem]

فهمت من السؤال هو لماذا تحتاج اسرائيل جواسيس داخل مصر بينما النظام المصري في كامل انبطاحه و سجوده لها و لمعبودته امريكا

و لكن الاجابة على السؤال من وجهة نظره كالاتي

الحقيقة ان اي معلومة و لو كانت بسيطة يمكن ان يستفيد منها الخصم فيما لا يمكنك ان تتخيله

و المعلومة من الاشخاص بالتأكيد غير المعلومة من الجهات الرسمية و الاخبار و منتديات النت

فهي تعطي قدرا كبيرا من التفاصيل الدقيقة على ارض الواقع التي ستفيد الخصم

مثلا تخيل لو ان معلومة قام بتمريرها جاسوس عن منطقة سكنية ما في مصر ان بها توتر محتمل بين مسلمين و مسحيين او اي اقلية ثم قامت الجهة المعادية بناءا على تلك المعلومة بارسال فريق اعمال قذرة متخفي و قام بعمل ارهابي ضد الاقلية في تلك المنطقة - وهذه من اهم اهداف الموساد المعلنة داخل مصر للاسف

او زيادة اشتعال التوتر

قد تكون المعلومة عن اشخاص بعينها لتحييدهم او تصفيتهم

تذكرون عملية قتل العالم النووي الايراني منذ ايام قليلة - طبعا انا ارشح انها من صنع الموساد لانه تقريبا من الجهات الاستخبارية القلائل التي تصفي اعدائها و لها باع كبير في مصر بقتل علماء الصواريخ المصريين و الالمان في فترة الستينيات لمنعنا من تطوير صواريخ ضاربة تصل لاراضيها

قد تكون المعلومة عن منطقة بها ناس مستعدة للخروج على النظام العام في دولة ما - وهنا يحتاجون ان يعرفوا عن قرب من اهم الاسماء للتعامل و التدريب اذا لزم الامر على الخروج عن الدولة

مثال على ذلك انهم عملوا بدأب مع بعض الجماعات الكردية لعمل قلاقل في جنوب تركيا بل انهم دبروا لاغتيال اردوجان - وذلك تم كشفه مؤخرا بواسطة جهاز المخابرات التركي

و اخيرا المعلومات القادمة من اشخاص عن قرب تعد اهم و ابلغ للخصم نظرا لان الوسائل الاخرى يمكن التشويش عليها او بث معلومات خاطئة

لذلك لا بد لنا ان نحذر انفسنا و غيرنا من الادلاء بأي معلومات اجتماعية عن منطقة او شخص بعينه يحتمل ان يستفيد منها جهات غير مرغوب فيها كإسرائيل او غيرها

و على خلفية الحادثة الاخيرة لطارق عبد الرزاق

اود ارسال تحية للمخابرات المصرية التي توصلت لهذا الامر.. و الذي يدل على مجهود كبير و عين راصدة

و اهلا بفشل الموساد بعد فضح قتلته في الامارات سابقا

[ابو محمود]

بصراحة انا شايف اننا غير ملمين جميعآ بمعلومات حتى تعريف ماهى تخابر او مخابرات او ماهي تخصصات تلك المهنة الضخمة ويكفينا فقط ان نتكلم فى اشياء نعرفها حتى لا نقع فى اخطاء اما الأتفاق او الاختلاف جميعنا لا يفقة شيء عن شغل التخابر او حتى مجرد فروع منة يا سادة ارجوكم الاكتفاء بذلك الطرح ويكفى ان كلآ منا يحاول ان يكون ماسك العصا من الوسط حتى حين يهاجم بيكون معتدل اتمنى ان نهدأ ونترك التخصص لأهلة لانها ليست كرة قدم او طبخة او مناقشة مهنة بسيطة بصراحة المخابرات عدد من التخصصات والفروع ولابد من الاطلاع على ماهية الوظيفة حتى نتكلم عنها بالسلب او بالأيجاب نحمد الله اننا نمتلك على الاقل جهاز محترم الى اقرب وقت ويحترمة كثير من الدول رغم اننا نعيش عصر متضارب المصالح