يعني اية اني انتمي للجنسية المصرية ؟!؟؟

[Amr Radwan]

موضوع ترك مصر او السفر للخارج او حتي الهجرة .. انا شايف انه سعي ورا الرزق .. و مش غلط ابدا اني اسعي علي رزقي و رزق من اعولهم في اي مكان.. و ده مش معناه اني عشان اكون وطني و بحب بلدي اني اقعد في مصر حتي لو مش لاقي فرصة كويسة .. بس الاهم اني ما انساش البلد اللي اتربيت فيها و اتعلمت فيها و كلت من خيرها.

و يكون من اهدافي اني ارجع و استقر في بلدي او حتي اساعد بلدي وارد جميلها عليا

احنا في مشوار حياتنا فيه ناس كتيرة ليها فضل في اللي احنا وصلناله..

اهلي و بلدي و جيراني و اصحابي و دول المجتمع او نقدر نقول اهل مصربالنسبة لنا

كل اما افكر افتكر جيرانا لما كانو بيبقو فرحانين بيا في الثانوية لما جبت مجموع عالي و الناس كانت فخورة و مبسوطة و كل واحد داخل بصندوق اوصندوقين بيبسي . :)

مش هنسي ابدا يوم فرحي و الناس و هي جاية تهنيني و تهني اسرتي واسرة زوجتي و اصحابي و اصحاب اخويا و الجيران و الاهل و اللمة الحلوة الجميلة والكل سعيد و فرحان .

برده مش هنسي اوقات الحزن لما بيكون فيه حالة وفاه بتلاقي الناس كلها جمبك و بتواسيك و بتقف معاك .. و تلاقي في بعض القري عندهم عادة جميلة جدا ..كل بيت في القرية بيعمل صانية عبارة عن فراخ او لحمة و سلطة و رز معمر و معالق طبعا و بطاطس محمرة و عيش فلاحي طازه غيره .. و بيبعتوا الصينية علي بيت المتوفي عشان الناس اللي جاية تعزي من برا القرية تيجي تلاقي البيت عامر و يخففوا المجهودعن اهل المتوفي .

مع ان ممكن يكون ده بس اللي في بيت الواحد منهم !!! و مفيش اكل تاني للعيال بس بيقول ده واجب و الجيران لعضيها و احنا اهل و نقف مع بعض

يااااااااااااااااااااه علي التعاون و الحب و الوفاء!!!

هل ده نجده في خارج مصر ؟؟ الا من المصريين

من اشد الحاجات اللي بحبها في مصر حب الناس لبعضها مع الالم والاحساس بضيق الحال و الموارد المادية .. بس اقل حاجة تسعد .. و اقل كلمه تسعد

كل لما بفكر في الوطنية و الانتماء بفتكر الدكتور زويل و الدكتورالبرادعي و الدكتور مجدي يعقوب و الدكتور فاروق الباز و الدكتور عصام حجي و غيرهم من العلماء البارزين خارج مصر .. و انهم ما برزوش و لا بانو الا لما خرجو برا مصرللاسف

ليه دايما بيجو مصر و بجيبوا اولادهم مصر حتي لو متزوجين من اجنبيات ؟ او معظم معيشتهم برا مصر ؟!

اكيد كلنا سمعنا كلام الدكتور الباز و لقاءاته مع مني الشاذلي خصوصا و اللي تحس و هو بيتكلم انه "ابن بلد" و عمره ما بيجيب في كلامة كلمة واحد "عنجليزي" و تحس انه بيتكلم بلهجة مصرية سليمة بل و ريفية اصيلة .. حتي الامثلة اللي بيقولها بتكون من التراث ..

ليه ما نبقاش زي دول ..

ليه ما نحطش دول قدوتنا ..

و اللي عاوز اركز عليه برده ان الناس زي ما هي برا بس عينها علي مساعدة مصر

المشروع اللي بيتكلم فيه الدكتور الباز "ممرالتنمية" بيفكر فيه من السبعينيات علي ما اتذكر و اول تقديم رسمي للحكومة المصرية كان في 1986 و بعد كده في 2005

http://www.almasry-a...84&IssueID=1992

يعني الراجل ده رغم مشاغله و مركزه المرموق في وكالة الفضاءالامريكية "ناسا" ما ناساش مصر و بيفكر ليها في تمنية و تطوير و بقاله سنين طوييييييييييييييله بيفكر و يدرس و يعرض و يترفض و يعدل و يعرض تاني .. اية اللي يجبره علي كده ؟؟ و ليه ما فقدش الامل ؟؟ و ما عملش زي التانيين ما عملوا ليه؟؟

نعم الابن البار ببلده ..

هو فعلا اقدر اقول عليه مصري بجد .. مصري مأصل .. و اصيل..

يا ريت نكون كلنا نساعد مصر و نعمل دورنا تجاهها حتي و لو كان صغير.

و اتمني ان اكون ممكن يحاولون القيام بما عليهم تجاه بلده

و صدقوني انا متأكد ان لو كل واحد عمل اللي عليه هيكون حالنا افضل..

هنهي كلامي بموقف من حياة الرسول الكريم صلي الله عليه و سلم لماهاجر من مكة الي المدينة

عن عبد الله بن عباس رضي الله عنهما قال: "لما خرج رسول الله صلىالله عليه وسلم من مكة قال: "أمَا والله لأخرج منك،وأني لأعلم أنك أحب بلاد الله إليَّ، وأكرمه على الله، ولولا أن أهلك أخرجوني منكِ مَا خرجت" .أخرجه أبو يعلى الموصلى في مسنده 5/69(2662) ، وقال الهيثمي في المجمع 3/283 :"رجاله ثقات " ، وأخرجه ابنسيد الناس في "عيونالاثر"6/219 بسنده

معلش طولت عليكم تاني في الفضفضة ..

اخيرا بشكر كل المصرييين جدا اللي فضفضو معانا.. الغريب - أسد - حسام عبد الفتاح - مدام هند علي - ام زياد- مصرية متغربة - لماضة مصرية جدا - مصراوية - زهرة الجبل - طبيبة بالخارج - دامو- ابو عمار - محمد عبد العزيز - دياب