مكتب الأستقدام وتعنته .... الله يسامحهم

[mnabil]

السلام عليكم ورحمه الله

أولا ده اول مشاركة ليا بس انا متابع المنتدي من فتره

صراحة منتدي رائع....شكرا لكل الاعضاء ومشاركتهم الممتعه

ثانيا لدي أستفسار او تقدروا تقولوا مشكله وأعتقد انها ممكن تكون صادفت أحدكم

أدخل في الموضوع علي طول....

أخوكم مهندس كمبيوتر خريج هندسة أسكندرية قسم حاسب ألي وحضرت للعمل في السعودية - الرياض - من حوالي 4 سنين

المهنة فني حاسب ألي - وده طبعا كان مفجأه ليا لاني كنت لسه جديد ومعرفش حاجه عن السفر والشركه قالتلي تغيير المهنة ممكن بالشهادة (الكلام ده من 4 سنين).....المهم مكنش فيه أي مشكلة لحد ما تزوجت الصيف الماضي ورحت اعمل استقدام

عايز بقي أقول أني كرهت نفسي وكرهت السعودية بسبب مكتب الأستقدام وموظفينه...الله يسامحهم...

الموظف : "فني حاسب ألي ليس لها أستقدام زياره بس"

أنا : طيب انا معايا شهاده التخرج وموثقه من الخارجيه والسفارة

الموظف : أبدا...روح غير المهنة

رحت 4 او 5 مرات لدرجه اني طلعت لمدير مكتب الأستقدام في الدور الأول وقالي نفس الكلام

المهم فضلت علي الحال ده من العيد الصغير لحد الأن

والشركه حاولت تغيرلي المهنة بس الظاهر هتاخد وقت كتييييييير

وحاولوا يجيبوا تاشيرة الأستقدام بالفلوس وبرده معرفوش .... "مش عارف ليه السعوديين اللي بيخلصوا بالفلوس او نقدر نقول رشوه مش عايزين يشتغلوا....كسلانين قوي يعني المفروض ندفعلهم وكمان احنا اللي نعمل الشغل"

اخر الكلام ان الشركه هتديني خروج نهائي وهرجع بتأشيرة جديده ان شاء الله "محلل نظم عام"

اخواني واخواتي اصحاب الخبره : هل محلل نظم عام فيها مشكله في الأستقدام ؟؟؟

[eng hoss]

بصراحه ده أسوء نظام فى السعوديه

مش عارف مين الجهبز اللى اخترع الاختراع الغريب ده

فنى حاسب ألى ايه السبب اللى يمنعه انه يستقدم زوجته

الموضوع من ناحيه ان المملكه هتستفيد من الاموال اللى هتتصرف على الحياه المعيشيه

زى السكن والاكل والمدارس ومن ناحيه هتبعد اى مقيم انه يتجه للحرام وتمنحه الاستقرارعلشان يركز فى شغله

قلنا العامل اللى مش لاقى يأكل وخايفين ليشغل زوجته فى حاجه مش كويسه

مقبوله انما فى عامل راتبه 10 الاف لأنه مش عامل والكل عارف

وفى مهنه زى محاسب قد يكون راتبه 1500 ريال ومش هيقدر على الحياه الزوجيه

طيب حتى اللى بيغير مهنه من عامل لمهندس مثلا بيقوله لأ انت ليك زياره لمدة سنه

لأن الاستقدام على مهنة الدخول يبقى انت كده ضربت كل مبرراتك فى تحديد الاستقدام فى مقتل

لأن اللى قدامك بقى مهندس مش عامل

اخيرا

ننتظر شخص بيفهم شويه يغير من نظام الاستقدام الجاهل اللى موجود فى المملكه

بالنسبه لسؤالك

المهنه الجديده مفيش فيها مشكله من ناحية الاستقدام

لأن مؤهلها عالى مش متوسط

لكن الغريب ان مهنتك فنى حاسب ألى فى اشخاص بيستقدموا عليها عادى

انما فى حالتك دى مش عارف ايه السبب ربما يكون مزاج او حاجه

[full moon]

السلام عليكم

ماتقلقش يا بشمهندس

اعرف ناس كتير وانا واحد منهم على مهنة مشابهة (محلل نظم ومعلومات) والحمد لله عملوا الاستقدام بدون مشاكل

[mnabil]

جزاكم الله خيرا .... انا كده اطمنت شويه

عايز بقي أقول حاجه تغيظ أكتر

بعد ما رحت مكتب الأستقدام واللي حصل حصل .... راح بعديا باسبوع واحد هندي شغال معايا في نفس الشركة ولا معاه اي مؤهلات خالص وهو اصلا مش خريج اي تخصص كمبيوتر من اي نوع وبرده علي نفس المهنة فني حاسب ألي.......

عارفين اللي حصل (خد التاشيرة)....هيا ارزاق ربنا يزفقه

[full moon]

فكرة تانية يا هندسة

ممكن تحاول تروح اي مكتب استقدام تاني يعني تحاول مع مكتب جدة مثلا ممكن الامور تمشي معاك بدل ما تروح تاخد تأشيرة تانية وتوفر الوقت والجهد والفلوس

اظن انها فكرة تستحق المحاولة بدل التعب اللف على تأشيرة جديدة من مصر وزى ما انت عارف ممكن تلاقي الامور في مصر اتاخرت او اتعقدت لاي سبب!!

ربنا يوفقك ولو هاتروح مكتب جدة قول علشان نعرفك تعمل ايه هناك

[mnabil]

والله انا سألت زملاء ليا في جده علي الموضوع ده...

قالولي برده الموضوع مش سهل قوي وممكن يكون صعب..

واحد منهم قالي انه مره كان هناك وشاف ناس رجعت لان الموظف قاله روح اعملها من الرياض.....الظاهر شاف إقامته علي الرياض.

بس هحاول أسال ناس تانيه وربنا يسهل...