رسائل زيد

[Om Zayd]

السلام عليكم و رحمة الله و بركاته

عندما أنظر في عيون ابني و أطفال آخرين لم يتكلموا بعد .. أو ما زالوا لم يحسنوا الكلام .. و أحس اني أقرأ فيها كتبا .. و أرى فيها المستقبل

هذا طبعا عدا "الأطفال اللمضين" .. الذين تخطوا مرحاة النظرات و العبرات و يفاجئونك بكلام أو تصرفات تتعدى ما ظننته عمرهم

من أجلهم .. أخصص هذا الموضوع

[Om Zayd]

هذه الأيام .. كلما عرض منظر الثلوج التي تغطي أوروبا .. يجري زيد على التلفاز .. يمد يديه في لهفة و فرح

يرتدان حائرتين .. يلتفت اليّ

SNOW

و أرى في عينيه

مش هنلعب على التلج

مش هنعمل رجل الثلج

أريه الشمس و الناس في الشارع الصغير أمامنا

بعض القطط المارة

لكن أعتذر صغيري .. لا ثلج

يندمج في العالم الجديد .. يلمح عربة يجرها حمار .. فيصيح في فرحرحة

HOSE

الراء مخطوفة و لم ندفع الفدية بعد

أضحك في سعادة

و أكرر "حمار" .. يهز رأسه غير مقتنع و يكرر

HOSE

!!!!

[Om Zayd]

أبكي في صمت و أنا لا أطن أنه يرقبني

يتسلقني .. أنظر إليه و أبتسم

لا زالت الدموع تنساب

يمد يدا صغيرة و نظرة حائرة

مايا في العيون؟؟؟

مايا

يقولها بابتسامة مصطنعة

يلمس الدموع .. يمسحها .. يلقى نفسه في حضني

تجف الدموع و تتصاعد الضحكات

[Om Zayd]

إيمان حجّو

عذرا لن أضع صورتها .. توجعني كثيرا

عيناها المسبلتان تطاردني أحيانا

أدقق النظر في أعين الأطفال في التقارير الاخبارية

أحيانا يصدمني خواء مرعب .. تصميم يبعث فيّ الأمل

يأس .. استغاثة .. فضول .. أمل

مشاعر صادقة لا زيف فيها تلخص الحكاية

في التليفزيون البريطاني كانوا يعرضون التماسات تقدمها جمعيات خيرية عاملة في أفريقيا و الهند

تطلب تبرعا شهريا ثابتا لضمان تعليم طفل .. أو لبناء الآبار للحصول على المياه النظيفة

يعرضون فيها أفلاما صغيرة للأطفال المطلوب مساعدتهم

ينظرون نظرات مختلفة

تشبه التي في التقارير الاخبارية

الغريب ان الناس كانت تعلق على اخراج الاعلان و الموسيقى المصاحبة أكثر من تعليقها على العمل الخيري ذاته

على اختلاف نظراتهم و ألوانهم أقرأ في عيونهم

نحن المستقبل

لا تتركونا

عنا ستُسألون

يوما سنكبر

يوما سنتكلم

[م تيمور المراغي]

تسجيل متابعه اكيد واهتمام !

ايه الحكايه يا جماعه ؟ :happy:

كل يوم بنكتشف كنز جميل في المنتدى

تم تعديل 26 ديسمبر 2010 بواسطة architect

[shiko]

متابعة ...واهتمام ....

موش عارفة ليه ...باعتبر الرسائل دى رسائل ربانية ؟؟

وان الاطفال دول ملائكة الرحمن على الارض

[pink rose]

امبارح كنت باتفرج على قناة الجزيرة و بيعرضوا برومو لبرنامج هايتذاع قريب اسمه اطفال غزة

من ضمن اللقطات المذاعة بيسألوا طفلة عمرها ما يزيدش عن 8 سنين

ايه امنياتك؟

صعقت من الرد

افتكرتها هاتقول ان نفسي الحرب توقف او نفسي ابقى طبيبة او اي شئ متوقع من طفلة

لقيتها بتقول

نفسي اموت

اد ايه قلبي وجعني

طفلة لسا ما شافتش الدنيا بتقول نفسي اخرج منها بقى

تم تعديل 26 ديسمبر 2010 بواسطة remo

[masraweya]

السلام عليكم

موضوع حلو بجد

نبقى لسانهم

العيال دول عليهم درر... و بيحرجوا الواحد احراج

:closedeyes:

المكان

السفرة عندي

الزمان

صيف 2008

غداء متأخر 3 حبات

الاشخاص

صاحبتي و اولادها كريم و فريدة

بصب لزينب البيبسي اللي بتموت فيه

كريم: مش البيبسي في المقاطعة يا ماما

:unsure:

:blink:

طبعا .. أنا سكت تماااااااااااااااااااما

و سبت مامته تتعامل

:happy:

ما فهمته بعد ذلك انه بسبب كريم ...البيبسي ممنوع من بيتهم

نهااااااااااااااااااااااااااااااااااااااااائيا

ملحوظة .. أنا أساسا ممنوع البيبسي في بيتي من قبل المقاطعة.. و كنت جايباه مخصووووص عشانها

جبتلها الكلام

نهاية الموقف

كيرم: عموما أنا كنت متأكد انك بتشربيه من ورايا

[Om Zayd]

السلام عليكم و رحمة الله و بركاته

سعيدة جدا برسائلكم و أنتظر المزيد

أنتظر رسائل مريم و حبيبة و مروان و عمر و ليلى و باقي أطفال القبيلة

مهما حسيتوا انها عادية

حلوة الرسائل العادية

لم تعد نتوقف عندها

[Om Zayd]

زوجي سافر مدينة أخرى لحضور مؤتمر

لم يتأخر كثيرا .. عاد تقريبا في نفس ميعاده المعتاد

زيد يلقي بنفسه في حضنه

بابي .. دادي

زوجي يكاد يسقط من التعب و من اندفاعة زيد نحوه

ينظر نحوي زوجي مستنجدا بابتسامة مرهقة

يزداد تشبث زيد به و هو يراني أتجه نحوهما

بذراعيه يبعدني .. بجسده كله يبعدني و يزداد غوصا في حضن أبيه

دادي وحشني

سيبيني معاه

وحشتني

يستسلم زوجي للأمر الواقع بينما يبدأ زيد في حكاية كل ما مر به اليوم

لا نفهم شيئا طبعا

يتساءل زوجي .. كيف عرف اني كنت مسافرا؟

أهز رأسي باسمة و أقول

وحشتنا

و في صدري كثير من السعادة .. و قليل قليل قليل من ال...غيرة؟؟

تم تعديل 27 ديسمبر 2010 بواسطة Om Zayd

[om marawan]

موضوعك مش بس جميل يا أم زيد

لكن كانه الغوص وسط سحب بيضاااا ...نقي ... ساحر .. ناعم

حلم جميل من الطهر والنقاء بنفتقده كتير جدااا ونبعد عنه

مافيش حاجة ممكن تعيشنا الحلم ده تاني غير نظرات الأطفال اللى بتقول كل حاجة بكل براءة

أجمل حاجة كلام بالعين او حتى بالحروف الطفولية الجميلة بس المهم يكون من القلب ويطلع يملا القلب

صباحكم ضحكة اطفال بريئة" مكركعة" من القلب :)

[Howayda Ismail]

زوجي سافر مدينة أخرى لحضور مؤتمر

لم يتأخر كثيرا .. عاد تقريبا في نفس ميعاده المعتاد

زيد يلقي بنفسه في حضنه

بابي .. دادي

زوجي يكاد يسقط من التعب و من اندفاعة زيد نحوه

ينظر نحوي زوجي مستنجدا بابتسامة مرهقة

يزداد تشبث زيد به و هو يراني أتجه نحوهما

بذراعيه يبعدني .. بجسده كله يبعدني و يزداد غوصا في حضن أبيه

دادي وحشني

سيبيني معاه

وحشتني

يستسلم زوجي للأمر الواقع بينما يبدأ زيد في حكاية كل ما مر به اليوم

لا نفهم شيئا طبعا

يتساءل زوجي .. كيف عرف اني كنت مسافرا؟

أهز رأسي باسمة و أقول

وحشتنا

و في صدري كثير من السعادة .. و قليل قليل قليل من ال...غيرة؟؟

ياه يا ام زيد موضوعك جميل جدا

مشاعر الاطفال الصغيرة عمرها متعرف تكدب خصوصا العفوية منها

فكرتينى بوقت ماسافر ابو عبد الله الحج السنة دى وكنا بنودعه فى المطار

حاولت امسك نفسى ودموعى لكن ماقدرتش بصيت فى عيون اولادى نفس الشئ حتى ابنى الكبير

رغم انه شاب ومعتز بنفسه وصعب دموعه قدام الناس الا وجدته بيبكى مدعى انى انا السبب فى

بكائهم كلهم وكذلك ايات حسيت بحاجات منها مش عارفة اوصفها

اما ابنى الصغير باقوله عيب انت راجل بقى وكبرت على العياط قال لى على اساس انتم اللى

صغيرين وانا الوحيد الكبير فيكم ايه دى اول مرة بابا يبعد عننا

وفعلا هو كان بيسافر وهم صغيرين مش فاهمين حاجة

العجيب انى انا الوحيدة اللى عيطت لما شفته خارج من صالةالعودة وابنى الكبير قالى

ايه ياما انت غاوية نكد بتيعطى رايح جاى .احنا الكبار بنعيط فى الفرح والزعل غيرهم

وزى ماوصفتى ابنى رغم عمره 10 سنوات اتشعبط فى رقبته عاوزه يشيله لكن نزلناه بالعافية

لانه كان راجع تعبان وفى شدة الارهاق

تصدقينى لو قلت لك لما بانزل الشارع واشوف نونو صغير بيبتسم لى بيبقى الدنيا ومافيها

وادعى من قلبى ساعتها اقول يارب ايامكم الجاية تبقى احسن والضحكة دى ماتروحش منكم ابدا

[MaYousof]

موضوعك مش بس جميل يا أم زيد

لكن كانه الغوص وسط سحب بيضاااا ...نقي ... ساحر .. ناعم

حلم جميل من الطهر والنقاء بنفتقده كتير جدااا ونبعد عنه

مافيش حاجة ممكن تعيشنا الحلم ده تاني غير نظرات الأطفال اللى بتقول كل حاجة بكل براءة

أجمل حاجة كلام بالعين او حتى بالحروف الطفولية الجميلة بس المهم يكون من القلب ويطلع يملا القلب

صباحكم ضحكة اطفال بريئة" مكركعة" من القلب :)

:blink:

إيه المداخلة القرديحي دي يا om marawa :blink:

فين يا بنت الحلال رسائل أطفالك الكتير ربنا يخليهملك كلهم وتفرحي بيهم يا رب ..

مستنيين رسايلهم واحد واحد ..

يلا يلا .. أسمع أول رسالة لو سمحتي؟

[Om Zayd]

موضوعك مش بس جميل يا أم زيد

لكن كانه الغوص وسط سحب بيضاااا ...نقي ... ساحر .. ناعم

حلم جميل من الطهر والنقاء بنفتقده كتير جدااا ونبعد عنه

مافيش حاجة ممكن تعيشنا الحلم ده تاني غير نظرات الأطفال اللى بتقول كل حاجة بكل براءة

أجمل حاجة كلام بالعين او حتى بالحروف الطفولية الجميلة بس المهم يكون من القلب ويطلع يملا القلب

صباحكم ضحكة اطفال بريئة" مكركعة" من القلب :)

:blink:

إيه المداخلة القرديحي دي يا om marawa :blink:

فين يا بنت الحلال رسائل أطفالك الكتير ربنا يخليهملك كلهم وتفرحي بيهم يا رب ..

مستنيين رسايلهم واحد واحد ..

يلا يلا .. أسمع أول رسالة لو سمحتي؟

أم مروان .. سعيدة جدا بتشريفك و في انتظار الرسائل

أ. محمد ..

يلا يلا .. أسمع أول رسالة لو سمحت؟

[Om Zayd]

تصدقينى لو قلت لك لما بانزل الشارع واشوف نونو صغير بيبتسم لى بيبقى الدنيا ومافيها

وادعى من قلبى ساعتها اقول يارب ايامكم الجاية تبقى احسن والضحكة دى ماتروحش منكم ابدا

آميين

و يجعل فيهم الخير و يبارك فيهم و يصلحهم و يصلح بهم

في انتظار رسائل أخرى

[masraweya]

السلام عليكم

قبل ما يدخل الغاز .. احتجت البواب يطلع لي أنبوبة "قبل الأزمات بزمااااان" .. ما كانش موجود .. زوجته تطوعت تطلعها و تركبها كمان .. الظاهر صعبت عليها

:closedeyes:

المهم بعد ما طلعت لقيت ابنها الكبير -7 سنوات - طالع وراها

.. ماما نازلة علطول عايز حاجة؟

نظر في الأرض و ظل واقفا على الباب

بحثت عن بعض الحلوى و عدت بها إليه

هز رأسه بلا و لم يمد يده ليأخذها .. ناديت أمه .. قوليله ياخدهم

خدهم يا محمود .. ما تتكسفش

هز رأسه في خجل و ظل واقفا على الباب

أنهت أمه تركيب الأنبوبة .. و لحقتنا على الباب

هيه يا محمود .. خير ..جيت ليه؟

نظر اليها و هو يقول في ثقة " عشان يبقى معاكِ راجل

نظرة سعادة غامرة في عيني الأم

ربنا يخليك ليا

تمتمت و أنا أودعهم على السلم .. جدع يا محمود ربنا يحميك

[arkan]

ربنا يبارك لك في زيد واخواته ان شاء الله

حسيت انه الموضوع ده للامهات هل لاننا عاطفيين وحساسين زي مايقال

ولا ذاكرتنا قوية

ولا لاننا بنستقبل رسايل اكتر لطول الوقت اللى بنقضيه مع اولادنا

يمكن اولادي كبار شوية

بس قعدت افتكر حاجات لهم تضحك ولكن تظل رسايلهم في القلب

[Om Zayd]

ربنا يبارك لك في زيد واخواته ان شاء الله

حسيت انه الموضوع ده للامهات هل لاننا عاطفيين وحساسين زي مايقال

ولا ذاكرتنا قوية

ولا لاننا بنستقبل رسايل اكتر لطول الوقت اللى بنقضيه مع اولادنا

يمكن اولادي كبار شوية

بس قعدت افتكر حاجات لهم تضحك ولكن تظل رسايلهم في القلب

جزاكم الله خيرا

ربنا يبارك فيهم جميعا

لسة ما كررتش التجربة ..مش عايزة أظلم زيد

كمان هي تجربة مش سهلة .. عاطفيا و بدنيا

أو تقريبا انا بتدلع و ده رأي ماما

الموضوع مفتوح لرسائل الاطفال عموما

بس مش عارفة الرجالة مش بيشتركوا ليه

في انتظار رسائل حضرتك

تم تعديل 30 ديسمبر 2010 بواسطة Om Zayd

[لماضة مصرية جدا]

السلام عليكم و رحمة الله و بركاته

ربنا يسعد قلب حضرتك و كل من شارك برسالة للقلب

يمكن هي حروف صحيح....لكن ليها مفعول اشبه كده بحالة الخدر اللذيذ اللي بتحبي تفتكريه و تاخديه معاكي لما الدنيا بتقسي علي الواحد شوية

و انا بقلب في الرسايل الجميلة اوي اللي هنا

افتكرت رسالة جاتلي من طفلة بعشقها حد الجنون

كانت صغنتتة اوي اوي اوي....مش فاكرة سنها الحقيقة....لكن في وقتها معرفشي ايه اللي جه في بالي اني افضل اكلمها عن شخصية خيالية اسمها "كتكت"

و أوقلها "كتكت" عمل....و "كتكت" قال....و احط فيها كل الحاجات اللي حصلتلي في اليوم و انا شايلاها و اقفة بيها في الشباك

الحقيقة و انا بحكيها كنت عايزة احكيلها...و احيانا كنت بستغرب من نظرتها ليا و كأنها يعني "متابعة"

و احيانا اكتر كنت بقول لنفسي...يا بنتي قوليلها اي كلمة من الكلمات اللي بتتقال للاطفال في السن ده زي..."إغ"....و كده

و احيانا تانية كنت بتكسف من نفسي لما بلاقي اخواتي بيضحكوا عليا و يتهموني اني فعلا خلاص هعفرت البنوتة الصغيرة

كنت مصدقة انها بتسمعني

و لما نطقت اول كلمة....طلعت الحروف بالعافية....و كانت "ك....كت"

و كان اول احساس ليا بالامومة مع انها مش بنوتي....بس خلاني اصدق ان فيه نوع من التواصل مش لازم كل اللي حوايلا يفهموه....كفاية انا و هي بس

و لسه لغاية دلوقتي بنعمل كده..

ربنا يخليها لي...و لينا

توبيك....بيصحي فينا رسايل كنا مخبينها جوه القلب

مسااااكي امومة.....جدا....بتفاصيلها الصغيرة

كان فيه توبيك رائع لاستاذ عادل ابو عمر اسمه "احاسيس اب"

انا كده ممكن احط التوبيكين علي بعض و احس انهم.....دفا انساني خاص....و فعلا حب الابوين هو الحب الوحيد الغير مشروط....هو استثنائي

جزاكي الله كل خير

و اذا كان عن اخواتنا الرجال....صدقيني عندهم مشاعر تفوق الوصف....

[Om Zayd]

و عليكم السلام و رحمة الله و بركاته

فرحت بمشاركتك اوي يا لماضة

احساس لا يوصف لما اول كلمة تنطقها هي الكلمة اللي كانت بتسمعها منك

بيحسوا بينا اوي الاطفال .. و على قد ما بتحبيهم بتقوى العلاقة بينكم

ممكن اوي تحسوا ببعض على بعد

و بتحصل فعلا