احتفالات 10 سنوات من التميز - عيد ميلاد بيت العيلة

[عبد الله غريب]

متصدقيش .. فطار غدا إحنا جاهزين

ابعتي بس و ميهمكيش إحنا مش ممكن نكسف حضرتك أبداً

دي حتى الحاجات بتاعة الغدا دي ممتازة خالص ع الفطار :)

[عبير يونس]

الظاهر إنها عين وصابت الجميع ..

أنا عندي دور أنفلونزا غبي ومش شايف قدامي ... فاعذروني مش هاقدر أتكلم .. لكن هارجع لما أخف عشان ألم الأوسمة وأبيعها لحد المرتب ما ينزل ..

انا برضه مخستكة خالص من امبارح

و جيت ادخل المحاورات لاقتني مش قادرة خالص

سلامات على كل اللي تعبانين

وربنا يعافيكم جميعا

مبروك متأخرة خالص

للموضة و ارش

كل سنة و انتو طيبين

[engmido]

منتظرين تعليقاتكم

كل سنة وانتم طيبين

ونفسى نشوف احتفالات اليوبيل الفضى والذهبى والماسى كمان

وفى انتظار كلمة ا/عادل ابو زيد

و/ advisor

[مغتربة]

احتفاليه جميله جدا

اجمل ما فيها انها اتعملت بحب علشان كدا وصلت برضه بحب

الاحتفاليه دى كلنا مع بعضنا عملناها سوا من اول الفكره لغايه الحفل الختامى

كل فرد فى المحاورات شارك فى الاحتفاليه

علشان كدا العيد دا بتاعنا كلنا كلنا اشتركنا فيه و كلنا فى المقابل اتلقناه بفرحه و حب

ميرسى على كل الكلام الحلو الى قولتوه لشخصى المتواضع

و بجد بجد اخجلتم تواضعى

مبروك لاستاذ ارتيتيكت و لماضه المركز الاول

مبروك لاعضاء المنتدى كله عيد منتداهم الجميل و بيت العيله الحلو الى مجمعنا سوا

و يارب يفضل دايما مجمعنا سوا

تحيه حقيقيه لاستاذ محمد يوسف لانه و بحق الجندى المجهول فى الاحتفاليه دى و انا عارفه هو تعب فيها اد ايه لغايه ما خرجت بالشكل الجميل دا

و كل كل سنه و يارب محاورات المصريين طيبه باهلها

تحياتى لكل عضو فى المحاورات حاضر كان او غائب

:give_rose:

[Dreamwithme]

السلام عليكم ورحمة الله وبركاته

جزاكم الله كلكم خيرا كثيرا علي الأحتفالية الجميلة

ساري مخرج الروائع ولماضة الأبداع تسلم أيديكم علي الفيلم تحفة فعلا

الدمعة كانت هتفر من عيني يا ولاد

مبروووووووووك للماضة ومغتربة وأستاذة هند

مبرووووووووك لأركيتيكت وسي السيد والساري

وشكرا لكل من ساهم في الاحتفالية وشكر خاص لأستاذ مايوسف علي جهوده الجبارة

عايزة أقول كلمة واحدة أنا بحبكوا كلكوا قوي قوي والمحاورات فرقت في حياتي جامد بجد

وفعلا زي ما لماضة قالت بحس انا ده الركن الخاص بتاعي اللي برتاح فيه

كل سنة والمحاورات منورة ومدفية كل الناس زي ما أعطتني الدفء

كل سنة وكل أهل المحاورات طيبين وسعداء يارب

[أبوعمار]

يعني انت هاتفضلوا كده مقضيينها صور؟!

لا وأيه .... ماشيين بمبدأ أبو بلاش كتر منه

قاعدين تتفننوا في الصور وتجروا ريقنا وخلاص

ده حتى مفيش الـOPTION بتاع الريحة .... يعني نشوف وما نشمش الولائم دي

يلا الأرزاق على الله

عموما كل سنة واحنا طيبين ودايما متجمعين ومتحاورين

:cheer: :cheer:

[لماضة مصرية جدا]

السلام عليكم و رحمة الله و بركاته

احم احم

الحقيقة في حد غالي عندي اوي....عايز يقول لحضراتكم حاجة

منكن الميكرفون لوسمحتم....(و خبوا يا جدعان المحشي و الطيور اللي فوق ديت....انا عمالة اقول احنا خناكل سيمون فيميه و حركات)

كل سنة و انتو طيبين

و متهنين....

و يا رب دايما دايما قريبين لربنا

بشكركم كتير انكم اخترتم ريهام....في الحفلة اللطيفة ديت

و الحقيقة انا دايما بحس ان البنوتة ديت...."ملكة قلبي"

و يا رب متكونشي ضايقت حد منكم.....او زعلته و ادعولها دايما تلاقي سعادتها

و بين قوسين...(ادعولها تلاقي ابن الحلال و تستقر بقي....احسن هي تعبت قلبي معاها)

دي ماما علي فكرة...وصلت النهاردة.....و طبعا اخدتها من ايديها علي المحاورات

مسااااكم فرحة لقا الحبيبي

مساكم ماما....و انا

مساكم....لمة حلوة ربنا يديمها في كل خير

فوتكم بعافية...(ماما مصعوقة جنبي انا بقول فوتكم بعافية....و مذهولة من الصورة الرمزية...و بتقولي .....مين دي... :blink: )

[لماضة مصرية جدا]

الظاهر إنها عين وصابت الجميع ..

أنا عندي دور أنفلونزا غبي ومش شايف قدامي ... فاعذروني مش هاقدر أتكلم .. لكن هارجع لما أخف عشان ألم الأوسمة وأبيعها لحد المرتب ما ينزل ..

السلام عليكم و رحمة الله و بركاته

الف لا بأس علي حضرتك....طهور ان شاء الله

و بما ان احنا في حفلة سورايه و كده..جبت لحضرتك الزي التنكري دوت...اهو يمشي مع المناسبة

مليون سلامة علي حضرتك

مسااااا حضرتك كل العافية

[لماضة مصرية جدا]

الناس الحلوين اوي

مساكم حلا...لا يشبه أحد سواكم

ميرسي كتير ....آد البحر و السما....و النجوم الطايرة و السحاب اللي عمال يجري من حتة لحتة....بس عمره ماب يخلص

ميرسي...علي كل كلمة...حلوة...و احساس طلع من القلب...و دخل للقلب التاني من غير استئذان

ميرسي....يا طيبين اوي

كل سنة....و انتم أحلي من في الايام

كل سنة و أنت كل الخير

كل سنة و كل امنياتكم....اللي بنقولها بصوت عالي....و التانية التي لازالت معلقة بين السماء و الارض....كلها مجابة قريبا بكرم الله

كل سنة و انتم كل الحلا

و ميرسي مرة تانية

ع جنب بقي

انا مستغرباني.....جدا اوي خالص......(ايه ميرسي دي....فين منشكرين...فين توشكر يا ذوق....فين سا التماسي يا ورد قاعد ع الكراسي.....الحقيقة ماما متابعة....بس كلها نس ساعة و تنام....و ترجع ريما للحلق البريما....هههههههههه)

[م تيمور المراغي]

السلام عليكم و رحمة الله و بركاته

احم احم

الحقيقة في حد غالي عندي اوي....عايز يقول لحضراتكم حاجة

منكن الميكرفون لوسمحتم....(و خبوا يا جدعان المحشي و الطيور اللي فوق ديت....انا عمالة اقول احنا خناكل سيمون فيميه و حركات)

كل سنة و انتو طيبين

و متهنين....

و يا رب دايما دايما قريبين لربنا

بشكركم كتير انكم اخترتم ريهام....في الحفلة اللطيفة ديت

و الحقيقة انا دايما بحس ان البنوتة ديت...."ملكة قلبي"

و يا رب متكونشي ضايقت حد منكم.....او زعلته و ادعولها دايما تلاقي سعادتها

و بين قوسين...(ادعولها تلاقي ابن الحلال و تستقر بقي....احسن هي تعبت قلبي معاها)

دي ماما علي فكرة...وصلت النهاردة.....و طبعا اخدتها من ايديها علي المحاورات

مسااااكم فرحة لقا الحبيبي

مساكم ماما....و انا

مساكم....لمة حلوة ربنا يديمها في كل خير

فوتكم بعافية...(ماما مصعوقة جنبي انا بقول فوتكم بعافية....و مذهولة من الصورة الرمزية...و بتقولي .....مين دي... :blink: )

الف حمد الله على السلامه يا ست الحبايب ,,

ولو تعرفي احنا كلنا سعداء بوصول حضرتك قد ايه ,,

عاوز اقول اني اهنيكي على الجوهره المصونه الآنسه ريهام ,,

واللي اي واحد فينا يتمنى انها تكون اخته او بنته ,,

اكرر ترحيبي بحضرتك جدا جدا

واتمنى لكم يارب كل الفرحه والسعاده وراحة البال ,,

[الســـاري]

كل عام وانتي بخير يا ام ريهام ..

والف حمدلله على سلامتك .. وسلامةاختنا لماضة

اتمنى تكونوا بخير وصحة وعافية وسلامة ... مش عايزين نتشكر اكتر باختنا ريهام لان شهادتنا فيها مجروحة

بس عايزين نقول لك اننا ما شفناش منها الا كل خير .. والتميز حاجة بسيطة جدا تستاهلها

[خالد التهامى]

الاخوة الافاضل جميعا

بعد السلام والرحمة

كل عام وانتم جميعا بخير

الف مبروك لكل الفائزين وشكرا لكل من شارك فى هذا الاحتفال واضاف بسمة وفرحة لقلوبنا

ربما كثيرين جدا ممن اثرى المنتدى بمشاركاتة لايعلم انة قد قدم شىء ولو بسيط لانسان يبحث عن نور فى مكان مظلم وقع فية

نعم كثيرين لم يروا الاخرين روىء العين لبعد المسافات ولاكن رأوهم بروىء القلوب وهذا مايميز هذا المنتدى الرائع

فعلا اخوانى انتم اكثر من رائعون

[لونا]

مبروك للكل مع حفظ الألقاب

مبروك ل

لماضة وآرش

مبروك ل مغتربة و هند

مبروك ل سي السيد و ساري

و مبروك للمحاورات و لينا كلنا

و شكرًا ل( ما يوسف) تعب أوي الحقيقة الفترة اللي فاتت

تم تعديل 31 ديسمبر 2010 بواسطة لونا

[المهندسه]

الف مبروك ل

architect

سى السيد

السارى

لماضه

مغتربه

هند على

الف مبروك على الوسام واسفه للتأخير فى التهنئه ...انا لسه راجعه المحاورات بعد غيبه 10 ايام لظروف اسريه

الف مبروك عليكم وعلى المحاورات كلها و كل عام وانتم بخير و نرجو منكم المزيد فأنتم فعلا تمتعونا بمواضيعكم و اراءكم