يا تري تعرف عقد السناجل....اتفضل معانا

[لماضة مصرية جدا]

السلام عليكم و رحمة الله و بركاته

قريت مقال دمه خفيف و يا رب يعجبكم

اكتر حاجة عجبتني فيه....هو كمية المصطلحات الجديدة...زي "السناجل"....و اللي انا كنت فاكراها زي افلام الكارتون "السنافر"

المقال ليه جزئين و عجبني الجزء الثاني لانه بيتكم بايجابية كبيرة....ملخصها....."حب حياتك زي ما هي"

اسيبكم مع المقال....لاستاذ أحمد عاطف مجاهد

مساااااكم رضا

عن عُقد السناجل

~

السناجل جمع كلمة سينجل.

والسينجل هو الشخص الذى مازال يبحث عن نصفه الآخر.

السينجل يعيش وحيدا، يعيش قليلا ويحلم كثيرا. نادراً ما تتحقق أحلامه.

ولكن لكوابيسه نصيب كبير من التحقق. يتغذى هذا السينجل على المنتديات والشات والفيس بوك وتويتر.. (عقلي الباطن....احنا متراقبين و لا ايه :blink: )

قد تكون سنجليته سببا فى تقربه إلى الله أو فى بعده عنه.

كما أنها قد تكون سببا فى نجاحه وإثبات ذاته، أو فى تقوقعه داخل نفسه وإثبات ضعفه..

عن السناجل أتحدث.. عن عُقدهم وأنواعهم..

تعددت السناجل والعُقد واحدة.

السناجل هنا مقصود بهم الشباب والفتيات وليس الشباب فقط.

والعقد منها الأنثوى ومنها الذكوري، ومنها العام؛ أي عقدة موجودة عند الاثنين معا.

~

عُقدة مش حاسس

عُقدة عامة تصيب السناجل نتيجة تعلقهم بالماضي.. فيحاولون الدخول فى تجارب جديدة ولكنها دائما تنتهي بـ "مش حاسس - مش حاسة"، فتكون الفكرة المأخوذة عنهم أنهم من النوع اللى بيشوق ولا يدوق. ولكنهم فى الحقيقة بيحاولوا يحسوا ومش عارفين.

(البنت دى مش مفهومة وبتعلقك - الواد ده غامض وبيتسلى بيكي)

~

عُقدة مفيش قدامك حد؟

عُقدة عامة، وهى أخطر أنواع العُقد التى تصيب السناجل فتجعلهم دائمي السؤال والإلحاح على كل من حولهم، (ماعندكش عروسة - ماتظبطيلى عريس). وخطورة هذا النوع أنه وصل إلى حالة من اليأس والتعطش تجعله يبرر لنفسه السطو على ما ليس له حق فيه.

(البنت اللى بتخطف خطيب صحبتها)

(الواد اللى يسيب بنات الدنيا كلها وماتعجبوش غير البنت اللى صاحبه بيحبها)

~

عُقدة مش هتجوز صالونات

عُقدة عامة، ينتظر فيها السناجل أن يتكعبلوا فى الحب. وقد يطول انتظارهم، ولكنهم لا ييأسون، فهم لم يرتبطوا من قبل. ودائما يؤجلون مشاعرهم حتى يحين الوقت لمقابلة حب العمر. ولكن الحب رزق والأرزاق على الله.

~

عُقدة مش هتجوز غير صالونات

(الشهيرة بـ سيد بنجر)

عقدة عامة، يصرّ فيها السناجل على أنهم لن يتزوجوا إلا عن طريق الصالونات. ويكون ذلك نتيجة مرورهم بتجربة حب قاسية، فيعتقدون أن تغيير طريقة الارتباط هى التى ستضمن لهم النجاح. وتذكرني هذه العُقدة بموقف للفنان حسن فايق (صاحب أشهر ضحكة فى السينما المصرية) فى أحد أفلامه، حينما كان اسمه "سيد بنجر"، وكان هذا الاسم يسبب له كثيرا من الحرج، فقرر أن يغيره إلى "على بنجر" فى حين أن المشكلة مش فى "سيد" ولا فى "علي"، المشكلة الحقيقية فى "بنجر".. فالقضية هى اختيار الشخص المناسب والقدرة على اتخاذ القرار. صالونات بقى ولا حب مش هتفرق.

~

عُقدة مش هتجوز خالص

عقدة عامة، يشعر بها السناجل حينما ينظرون إلى حال أصدقائهم المتزوجين ويستمعون إلى نصائحهم.

(انت كده ملك ومش حاسس بالنعمة اللى انت فيها)

(أنتى فاكرة الجواز عِدل أوى!)

~

عُقدة الرجالة ماتوا فى الحرب

عقدة أنثوية، وتتردد كثيرا هذه الجملة على ألسنة الفتيات، ويصاب الشباب بحالة من الغثيان عند سماعها، تشبه تأثير سماع جملة "صايم ولا زى كل سنة" فى أول يوم رمضان. وتعتقد الفتيات أصحاب هذه العقدة أنه لا يوجد شاب له كلمة. فى الوقت الذى يعترف فيه الشباب المنعوتون بهذه الصفة أن نقطة الخلاف هى أن الفتيات يرفعن شعار (لو بتحبها روح لها لحد البيت)، والشباب يرفعون نفس الشعار ولكنهم يشترطون (أن يكون البيت فاضي).

~

عُقدة مفيش بنت محترمة...(وش واحدة هتطبق ايديها بونية و تضرب صاحب المقال)

عقدة ذكورية يشعر بها الشاب صاحب الجولات والخروجات والعربيات المتفيمة. ولا تزول هذه العقدة فهو دائم الشك فى كل الفتيات، وقد يصاب بهذه العقدة شاب ليس له أى تجارب ولكنه يسمع كثيرا عن "البنات الوحشين"، فيتولد بداخله اعتقاد أنه حتما سيتزوج فتاة سيئة، ويندم على أنه لم يفكر يوما فى أن يلعب بمشاعر فتاة، فكان هذا سيخفف من ألمه عندما يتزوج فتاة حد لعب بمشاعرها من قبل. ويبدأ فى البحث عن فتاة يلعب بمشاعرها بدلا من البحث عن عروسة.

~

عُقدة حب الوحدة

عقدة عامة تصيب السناجل بحالة من الألفة تنشأ بينهم وبين الوحدة، وذلك نتيجة طول فترة وحدتهم، لدرجة أنهم بيصعب عليهم يسيبوا الوحدة لوحدها.

~

عقدة مش دلوقتى

عقدة عامة تجعل السناجل دائما يرجئون ارتباطهم، ويربطونه بحدوث أشياء مستقبلية بعيدة المدى.

كل العُقد اللى فاتت بيجمع بينهم الخوف. الخوف من تكرار الفشل. الخوف من فشل الآخرين. الخوف من الاختيار الخاطىء. الخوف من رفض من نتعلق بهم لحبنا. الخوف من تقلب مشاعرنا. الخوف اللى دايما بيخلينا ما نعرفش نشوف.. أنا بكره الخوف وبخاف منه

طبعا بعد المقال دوت انا حسيت اني عندي كمية عقد تكفي....اجيال متلاحقة

بس امتر حاجة عجبتني....هي اخر جملة

"أنا بكره الخوف......و بخاف منه"

حقيق الخوف في اي ارتباط ممكن يخلي الواحد في حالة تجمد....فروزن....متخليهوش قادر ياخد اي خطوة تجاه شخص جدير بالاحترام....او يديله فرصة

حقيقي...ان الخوف يا اما الشخص بيكونحاطط سقف توقعات اكبر من اللي ممكن شريكه يوصلها...فبيبقي خايف دايما من الشعور الاحباط...بس هو اللي معجز مفسه من البداية

اتمني لكم قراءة ممتعة خفيفة للمقال...بيفكرني....بعمر طاهر....حدش يعرف هو راح فين!!!

[م تيمور المراغي]

ولكن الحب رزق والأرزاق على الله.

دي اكثر جمله عجبتني في المقال ده

تسلم الايادي

[لماضة مصرية جدا]

الجزء الثااااااني

11 طريقة لفك عُقد السناجل...(طب ليه مكملهومشي دستة مثلا....سؤال فلسفي عميق اهوت :)

تحدثت فيما سبق عن عُقد السناجل، وبما أن لكل عُقدة حلال،

وبما أن اللى حضر العقد لازم يصرفها، كان لازم افكر ازاى العقد دى ممكن تتفك.. ولما فكرت وصلت

لـ 11 طريقة لفك عُقد السناجل

حب وحدتك واستمتع بيها، بس خليك فاكر إن رغم حبنا لأيام المدرسة سيبناها و رُحنا الجامعة، ورغم حبنا لأيام الجامعة سيبناها واتخرجنا، وحلاوة كل مرحلة بتزيد لما بندخل فى المرحلة اللى بعدها.

لو واحد صاحبك متجوز قال لك «انت كده ملك ومش حاسس بالنعمة اللى انت فيها» قول له «انت كمان ملك بس مش عارف تحكم مملكتك». بس اتأكد الأول إنه مش متخانق مع مراته فى اليوم ده

لو واحدة صاحبتك قالت لك «أنتى فاكرة الجواز عِدل أوى» قولى لها «ماتجيبى جوزك وولادك وتاخدى بدلهم عربيتى الجديدة»، واتفرجى على نظرة القلق اللى هتشوفيها فى عينيها..(منتهي الشر)

لو بتحب بنت ارتبطت قبل كده ومعذباك أوى فكرة إن فى حد مسك إيديها قبلك، افتكر دايما إن الإيدين بتتغسل، المهم القلوب تفضل نضيفة.. نضف عقلك وروح كلمها.. يلا مستنى إيه؟!ا

لو كنتى بتحبى حد والحد ده خلاص خرج من حياتك، لازم تخرجيه من جواكى كمان، لأنك لو ماعملتيش كده الولد اللى هيرتبط بيكى هيبقى بيرتبط ببنت وبياخد عليها واحد مجانا، (اللى هو حبك القديم اللى عايش جواكى ومش عارفة تنسيه). طب ينفع كده؟!.. يعنى انتى ترضيها لنفسك؟!ا

إياكم ونظرية «الإستبن» يعنى إنك تحب حد وتكون انت بالنسبة للحد ده مجرد «أوبشن» بيرجع له لما يكون فاضى ويرميه لما ينشغل. لا تخلى نفسك إستبن لحد ولا تخلى حد بيحبك الإستبن بتاعك

أحلى حاجة فى الحب إنه بيخليك تفكر فى اللى قدامك أكتر ما تفكر فى نفسك وبيحول الأنانية إلى كرم زائد عن حده. حب الحب عشان تعرف تحب وتتحب

أحلى حاجة فى جواز الصالونات إن مفيش حد بيحب حد اكتر من التانى، الاتنين بيبدأوا من نقطة (ندى لبعض فرصة) وبيوصلوا سوا لنقطة (مرتاحيين لبعض). وما بين النقطتين خط مستقيم اسمه (نيتنا خير إن شاء الله).. حالة حلوة مش كده؟

لو حاسس إنك مش مستعد للارتباط، مفيش داعى تضغط على نفسك، لأنك هتتسبب فى جرح مشاعر اللى بيحبك، وتحويله لشخص مش حاسس زيك وعدد اللى مش حاسيين هيزيدوا واحد

أوعى تعلق شىء على حدوث شىء آخر عشان ماتبقاش عامل زى صاحبى الزملكاوى اللى قرر يتجوز لما الزمالك ياخد الدورى وكل ما الزمالك يتغلب فى ماتش يعتبرها إشارة من ربنا إنه لسه بدرى عليه

كان فى مغنى زمان اسمه على حميدة (صاحب أغنية لولاكى)، حقق شهرة ونجاح فى سن صغير وماحدش سمع عنه بعد كده. فى بقى الإعلامى محمود سعد، حقق نجاحه وشهرته فى العقد الرابع من عمره، أهو الارتباط زى النجاح والشهرة بالظبط.. مالوش وقت محدد ومش مهم يحصل امتى المهم يحصل صح.. فلا داعى للقلق أو الخوف

عجبني في الافكار اللي طرحها...مع ان اللغة يعني تحس انه حد من اصحابك قاعد يتكلم معاك:

1- لما قال "نضف عقلك"...حقيقي دايما بنتخيل ان بعض الناس فوق الناس التانية....او ان احنا ملايكة ماشية علي الارض....لو بطلنا ناخد مواقف مسبقة من الشريك بناء علي خبراتنا او خبراته اللي فاتت...متهيالي هيفرق

2- عجبني كلامه كتير عن جواز الصالونات.....بقيت اقتنع دلوقتي اكتر ان البدايات الصح بتؤدي لنهاية تدوم باستقرار اكتر....و دي وجهة نظري الشخصية

3-معجبنيش ردوده الهجومية علي الناس اللي ممكن تجرح اللي قدامها بالكلام....حقيقي ممكن تقابل ناس عندها قدرة غير عادية انها تحدف كلام و لا كأنه مدفع كلاشينكوف....و الله اعلم بنواياها...هل يقصدوا الجرح....و لا اهي عادة و السلام....راي الشخصي....مش هرد بالاساءة لكن بحب الاية القرآنية..."وإذا خاطبهم الجاهلون قالوا سلاما"

لو عندكم اقتراحات لانقاذ السناجل و كده...تبرعوا يا جماعة بيورو من اجل انقاذ البشرية المعذبة....(وش اي حد من جماعة السلام الاخضر....و هو رافع الصورة اللي حدفناها في اول التوبيك)

مسااااكم مش مهم سنجلز و لا كابلز....المهم.....راحة البال

فوتكم بعافية

[shiko]

طب مافيش حد يتـبنى

حمـلة

سـينجلاوى ...على طول (وش واحدة مستفذة ....)

لا بجد مالاقيش راعى رسمى للحملة اللى هاتجيبلنا ملايين ....

وبعديها صدقنى هانحل لكل السناجل عقدتها .....!!

اصلى بصراحة من السناجل اللى مقتنعة بحاجتين

أولا: الرجالة ماتوا فى الحرب ....انظر صفحة عقدة الرجالة ماتوا فى الحرب

ثانيا : انى كده ملك زمانى ومكانى ...انظر فصل عُقدة مش هتجوز خالص

[arkan]

السلام عليكم لماضة

عجبني قوي في كلامك

.........البدايات الصح بتؤدي لنهاية تدوم باستقرار اكتر.......

اكيدد ربنا بيبارك في الحياة اللى بتبدا بعدم معصية

من عقد السناجل برضة مفيش جواز غير لما اخلص دراستي ... لأ مش بس الجامعة ده كمان لما اخد الماجستير والدكتوراه

العقدة دي بقى حلها اجمعي بين الحسنييين كملي دراسة في بيتك مش مستحيلة

ربنا يوفق كل سنجل لنصيبه

[لماضة مصرية جدا]

طب مافيش حد يتـبنى

حمـلة

سـينجلاوى ...على طول (وش واحدة مستفذة ....)

لا بجد مالاقيش راعى رسمى للحملة اللى هاتجيبلنا ملايين ....

وبعديها صدقنى هانحل لكل السناجل عقدتها .....!!

اصلى بصراحة من السناجل اللى مقتنعة بحاجتين

أولا: الرجالة ماتوا فى الحرب ....انظر صفحة عقدة الرجالة ماتوا فى الحرب

ثانيا : انى كده ملك زمانى ومكانى ...انظر فصل عُقدة مش هتجوز خالص

:protest: :protest:

حطتلك كابلز اهوت محتجين....(وش حد بيرمي حاجة و بيطلع يجري)

متفقة معاكي في حتة انا ملك زماني و مكاني و اللاب توب بتاعي...و محدش يشاركني فيه و لا يقومني من عليه

بس تفتكري التطور الطبيعي للحاجة السائعة بيقول ايه....بيقول..."استرجل و اشرب بيريل صح"

مش يمكن حاجة يكون طعمها غريب جدا....تلبقلك....مش يمكن

ده اقتراح....و اوعي تضربي....انا ورايا رجالة تاكل الزلط...(وش حد بيتلفت فجاة مالقاش غير خياله)

مساااكي فيونكات في ضفاير احلي الصبايا و البنات

اصلي مش مع كلمة عقدة الحقيقة

[لماضة مصرية جدا]

السلام عليكم لماضة

عجبني قوي في كلامك

.........البدايات الصح بتؤدي لنهاية تدوم باستقرار اكتر.......

اكيدد ربنا بيبارك في الحياة اللى بتبدا بعدم معصية

من عقد السناجل برضة مفيش جواز غير لما اخلص دراستي ... لأ مش بس الجامعة ده كمان لما اخد الماجستير والدكتوراه

العقدة دي بقى حلها اجمعي بين الحسنييين كملي دراسة في بيتك مش مستحيلة

ربنا يوفق كل سنجل لنصيبه

و عليكم السلام و رحمة الله و بركاته

منورانا و الله يا تانت....و يا ريت حاولي مش تغيبي...

عجبتني اوي بتاعت اخلص دراستي و بعدين نبقي نتاهل

طب ايه راي حضرتك ان انا كنت فاكرة ان البنات هي اللي بتقول كده....الجديد بقي....ان الولاد بقوا يقولوا نفس الكلام....و طبعا بنتكلم عن الدراسات العليا,,,(و مش فاهمة ليه كل ما اسمع اسمها افتكر صورة حد بيتشعلق علي مواسير عااااااااالية)

وجهة نظري.....ليه ميكونشي حلمنا سوا ان احنا نكبر سوا....حتي في الدراسة....مين قال ان احنا يعني لازم نستني....مش يمكن الفرحة هتبقي مضاعفة لما يكون بيناقش....و يلاقي شريكة حياته واقفة وراه تزقه لغاية ما يقع علي وشه....قصدي يعني تدفعه للامام لمزيد من التقدم و الرقي...(مش هي بتتقال كده ;)

و دي وجهة نظر...سينجلاوية دا

دي وجهة نظر

[masraweya]

السلام عليكم و رحمة الله و بركاته

حيث اني كنت من هذا الحزب .. أحب أولا أسجل اعتراضي على اسم الحزب

و تأييدي لكثير مما ورد في المقال

أعتقد ان أفضل ما يفعله الواحد في هذه المرحلة .. ان يكون على طبيعته

ما يترسمش عشان حد

يثق تماما ان كله رزق .. بيد الله سبحانه و تعالى

يعيش المرحلة اللي هوا فيها .. يستمتع بكل ما فيها

ما يعلقش احلامه و حياته على حاجة لسة في علم الغيب

بالنسبة لنا .. برة البيت لازم نبقى بميت راجل

صعب نبين اننا مستنيين نصنا التاني او نتكلم عن ده الا مع ناس بنثق فيهم اوي

لازم نبان و لا في دماغنا عشان نرحم نفسنا من الرسم

عارفة ان ده ممكن يصد ناس كثير .. بس بيتهيألي ان ده احسن من وجع القلب

يمكن عشان كده جواز الصالون بيبقى أفضل .. لان اللي جاي .. نيته الزواج

مش محتاجين نتعب نفسنا و يا ترى يا هل ترى

و بيحبني ما بيحبنيش

دي كانت دماغي ايامها

و ساعة النصيب .. بتلاقي المستحيل بيتحقق بمنتهى السهولة

[hOuSsAm]

لو واحدة صاحبتك قالت لك «أنتى فاكرة الجواز عِدل أوى» قولى لها «ماتجيبى جوزك وولادك وتاخدى بدلهم عربيتى الجديدة»، واتفرجى على نظرة القلق اللى هتشوفيها فى عينيها..(منتهي الشر)

المقال جميل اوى (او بمعنى ادق جديد) يا لماضة - والجملة الى فوق دى ضحكتنى اوى :D

نيجى بقى للجد

بما انى من الحزب ده (حلوة السنجلاوى دى :lol: )

مرحلة ولازم تعدى بمميزاتها وعيوبها (نستفيد من المميزات ونتلافى العيوب)

فى المرحلة دى حجات كتيرة فى حياتك هتعملها مش ممكن تعملها فى المرحلة اللى بعدها

طبعا انا معترض على كل العقد دى (لانها مش واقعية ومش عامة يمكن اعداد شاذة اللى عندهم العقد دى عالاقل فى المحيط اللى اعرفه واللى هو مش قليل)

على راى مصراوية كله بيجى باوانه وفعلا المرحلة دى تستمتع بكل مافيها وتحقق نجاحات مش ممكن تحققها فى اى مرحلة تانية

انا بسميها مرحلة الاستقلالية وبناء الشخصية والتطور وتحقيق معظم الاهداف

مرحلة المغامرات والتجارب (مقصدش التجارب العاطفية اقصد تجارب تانية لاكتساب الخبرات)

عيوبها هى الوحدة واللى ممكن نتلافيها بالعلاقات والاصحاب

وعيوبها كمان ان مفيش تشير فى حياتك (يعنى لما بتنجح فى حاجة بيبقى نجاح جاف - ولم بتحتاج حد يقف جنبك وقت الضيق .... فى الغالب مش بتلاقى - بتروح تقف بقى جنب الحيطة باختلاف الوانتها (انت وحظك) :lol:

مميزاتها بيبقى عندك وقت كبير تحقق بيه كل اللى نفسك تحققه-بتقدر تغامرفى اى قرار انت محتاج تاخده لكن بعد كدة اى خطوة بتاخدها بيبقى بحساب وحساب تقيل كمان

------

موضوع لما تخلص دراسة (واللى بقت نسبة كبيرة من الشباب (باختلاف النوع) بيعملوا دراسات عليا او شهادات ما بعد الجامعة) ده رايي انا كمان (وكنت مصر عليه) ايوة متتاهلش الا لما تخلص شهادتك ( ده رايي من ساعة مكنت فى الكلية لحدمن اسبوعين فاتوا لما بدات احس ان الموضوع هيطول :ph34r:

والراى ده جالى من نصيحة اى حد يسبقنى فى العمر (استغل وقتك دلوقتى انت فاضى اعمل حاجة لنفسك ولما تخلصها فكر فى اى حاجة تانية)

انا فعلا بدات اتراجع عن الفكرة دى من فترة

هو مش تراجع عن الفكرة بس قررت انى مربطش المواضيع ببعضها (معملش زى الراجل بتاع الزمالك :)

لو عندكم اقتراحات لانقاذ السناجل و كده...تبرعوا يا جماعة بيورو من اجل انقاذ البشرية المعذبة....(وش اي حد من جماعة السلام الاخضر....و هو رافع الصورة اللي حدفناها في اول التوبيك)

انا مش فاهم دى - انقاذهم من ايه؟ طيب متخليها استرلينى :)

[عادل أبو عمر]

لو حاسس إنك مش مستعد للارتباط، مفيش داعى تضغط على نفسك، لأنك هتتسبب فى جرح مشاعر اللى بيحبك، وتحويله لشخص مش حاسس زيك وعدد اللى مش حاسيين هيزيدوا واحد

بيتهيألي إن الكاتب في النقطة دي مش حل عقدة ... دا عمل عقدة جديدة ... مش مستعد للارتباط ...

في رأيي .. السناجل ... مش عقد ...

السناجل ... أو حالة السنجل هي ناتج أخطاء كثيرة ... أخطاء منها تسبب فيها الاعلام و المجتمع و الظروف الاقتصادية

الاعلام أخطأ عن قصد ... في زيادة مساحة حرية العلاقة بين الجنسين تحت مسمى الحب ... على حساب الاستهزاء من زواج الصالونات ... بدون تقديم بديل محترم لكيفية الزواج خارج الصالونات يختصر من عمر الطرفين

المجتمع أخطأ .. في تشويه صورة الزواج و الأسرة .. فصار الزواج كأنه حكم بقتل الحب و صارت الأسرة قنابل موقوتة لجميع المشاكل و الأعباء ... كل ما تقابل حد يشكيلك ...

الظروف الاقتصاية .... لا تحتاج لتعليق و لا لتوضيح .. لكن العجيب هو الاصرار على المبالغة حتى في هذه الظروف

السنجل للأسف مع الوقت سقف مطالبه بيرتفع لمرحلة معينة و بعديها يرجع ممكن يتنازل شوية شوية ... و دي أسوأ احساس

ويبقى كل الكلام ده إرهاصات لا تقدم و لا تؤخر بعد الجملة الموجزة ... كل شيء نصيب ...

فإذا كان اللأب و الأم و مكان ووقت الميلاد نصيبا عايشناه بدون أي تدخل منا فلماذا نظن أن شريك الحياة هومحض قرار نتخذه بكل تداعياته ..

ربنا يسعدنا جميعا ويراضينا

[Dreamwithme]

أحم أحم ...... بالأصالة عن نفسي وعن كل السناجل في العالم بأحييكي يا لماضة علي المقال الجميل

أضحكني فعلا ..........بس أنبسطت واستغربت جدا

أولا أهم كلمة في المقال الأولاني

ولكن الحب رزق والأرزاق على الله.

أنبسطت لأني الحمد لله مالقيتش حاجة من العقد دي عندي أصل أنا بيني وبينكم كنت خايفة أكون معقدة

بس استغربت أني لاقيت العقد دي أصابت الناس اللي حواليا يعني مثلا عقدة الرجالة ماتوا في الحرب دي موجودة عند أختي الكبيرة بالرغم من أنها متجوزة

لكن علي طول دائما بتقول الجملة دي من كتر ماشافت معايا نماذج مش لطيفة (درر بيني وبينكم) :P

وعقدة مافيش حد مناسب دي أصابت أختي ومامتي :blink: ناقص يخطفوا الناس من الشارع

أنا حتي مرة قلت لماما لو عم علي بواب العمارة أتقدم ليكي هتوافقي وهي زعلت مني وصالحتها

بس أنا متفهمة أن ده بيبقي من خوفهم

بس في عقدة كاتب المقال نسيها وهي عقدة عندي من السؤال الشهير جدا "مفيش أخبار جديدة" بصراحة يا جماعة لو تعرفوا حد سنجل أبوس أيدكم متسألوش السؤال ده لأنه بيضايق فعلا

مالو أخبار جديدة هتعلن والكل هيعرف .........لكن مش كل يوم أتسأل السؤال ده عشرين مرة ....الرحمة

الجزء التاني من المقال جميل وأهم جزء فيه

حب وحدتك واستمتع بيها، بس خليك فاكر إن رغم حبنا لأيام المدرسة سيبناها و رُحنا الجامعة، ورغم حبنا لأيام الجامعة سيبناها واتخرجنا، وحلاوة كل مرحلة بتزيد لما بندخل فى المرحلة اللى بعدها.

مش عشان تحب الوحدة لكن في وجهة نظري حب حياتك واللي ربنا أدهولك زي ما هو واتعلم تستمتع بيه

عيش حياتك سعيد ومتستناش حاجة تخليك سعيد .....كل لحظة ليها حلاوة وليها سعادة بشكل خاص عيشها واستمتع بها ......ليه تؤجل السعادة لوقت أنت لاتضمنه ولست متأكدة أنه هيجي؟

أنا دائما أقول لماما أي الأحتمالات أكثر تأكيدا أني أتزوج ولا أموت؟ أنا متأكدة أني هأموت والحياة ستنتهي يبقي استمتع بحياتي وأحقق أهدافي وأشتغل للحياة الآخرة اللي أنا واثقة أنها جايه جايه

أما موضوع الارتباط فده رزق مش بأيدي و موجود في مساحة الغد اللي ممكن يجي وممكن ربنا ميكونش كاتب أني أعيشه أصلا يبقي ليه أقلق وأزعل عليه وأضيع مني اليوم اللي أنا فعلا ربنا رزقني الحياة فيه؟!

أنا عارفة أني طولت عليكم بس في نقطة أخيرة ما أعتقدش يا جماعة أن في حد ياجماعة بيأخر الارتباط عشان الدراسة

وبصراحة بأتضايق لما حد بيفتكر كده بالنسبة لي.........مرة واحدة قالتها لي صراحة وكانت أول مرة تشوفني

قالت لي سيبك من الدكتوراة اللي بتعمليها ودوري ليكي علي عريس mfb: مصدقتهاش بصراحة ومعرفتش أقول أيه غير نزلت عليا بضحك

مرة تانية كان موقف مضحك جدا من سنة.....كانت تانت محترمة جدا في مكان عملي جايه تتقدم لي عشان خاطر ابنها فبتسألني شروطك أيه

أنا بأتلبخ بصراحة في المواقف اللي زي دي و ما أحبش حد يكلمني أنا علي طول بأفضل حد يكلم أهلي بس استجمعت شجاعتي

وردت مفيش شروط معينة أهم حاجة أن يكون في تناسب في الأمور الأساسية قلت لها يعني عنده كم سنة؟ قالت لي (امسكوا نفسكم) 25 سنة :blink:

أنا علي رأي الأخ اللمبي أصنجيت قلت لها نعم !!!!! قلت لها حضرتك أنا عندي 31 سنة........الست ياعيني أدلق عليها جردل ماية ساقعة :P

صعبت عليا خالص :lol:

لقيتها بتقول لي أه أنتي بقي الماجيستير والدكتوراة خالوكي تنسي ..........كنت عايزة أديها بوكس بس قلت الطيب أحسن wst::

طولت عليكم بس الذنب ذنب لماضة هي اللي صحت المواجع والذكريات

أضم صوتي لصوت أستاذ حسام عبد الفتاح هننقذ السناجل من أيه؟ أحنا حلوين وميت فل وعشرة

[عنبو]

خليكم سنجل يا اولاد

انا بقولكم اهو خليكم سنجل بلا تعب دماغ

لو لم اكن سنجليلاً لوددت ان اكون سنجليلاً "" مش قوى يعنى كل حاجه فيها الحلو والوحش ""

كل حاجه فى الحياه ليها طعم حتى الحزن له طعم "" تخيلوا دى ""

الذكى بقى هو اللى ياخد من كل حاجه شويه وميزنقش نفسه فى حته وميطلعش منها

هو طبعاً حياة السنجل جميله قوى بس الاجمل منها انك تلاقى سنجل زيك تجمع سنجله على سنجلك

تعلموا سنجل برده بس من نوع جديد واخد مميزات كل سنجل

بس المشكله بقى انك فين هتلاقى السنجل اللى يتماشى مع السنجل بتاعك دى المشكله

على العموم خليك سنجل لحد لما تلاقى السنجل اللى يتماشى مع السنجل بتاعك غير كده

خليك سنجل احسن صدقنى

تحياتى

عنبو

[لماضة مصرية جدا]

السلام عليكم و رحمة الله و بركاته

أبنائي السنجلاوين الشرفاء

بحب اشكركم من كل قلبي علي مشاركتكم القيمة في هذه القضية المجعلصة و احب اذكركم و انتو خارجين من التوبيك متنسوش كل واحد فيكم ليه مج هدية مرسوم عليه نص قلب...(وش اي طفل شرير)

محترمة كل آراؤكم جدا و كمان خبراتكم الحقيقية اوي

شخصيا أستاذي قالي كل حاجة اتعاملي معاها كباكديج (يعني شوال لو انت من الصعيد الجواني يعني)يعني فيها الابيض و الاسود مش ممكن هلاقي شوال كله دقيق ابيض...و مش ممكن هلاقي شوال خروب يعني

يعني كل مرحلة فعلا ليها مميزاتها

بس اصعب حاجة البني آدم اللي اتعود انه يقضي فترة من حياته سنجلاوي....انه يتحول يلاقي نفسه كابلاوي

يعني هياخد فترة كده من التأقلم.....

من الرفض....

من التململ من الشخص التاني اللي حشر دماغه في الصورة

من الافتقاد الشديد....لحالة الفوضي....لحالة الانطلاق...لحالة انا قاعدة مع نفسي شوية...(هي ليه الناس بتتخض لما بتسمع الجملة دي)

بس لو الباكيدج يستحق....حقيقي يستحق....يبقي ساعتها الفترة دي ممكن تقصر و حاجات كتير ممكن نحبها و ممكن نعملها مع بعض....بداية بركوب العجل و انتهاء انه يقعد ع اللاب توب بتاعي و دي تضحية عظيمة مش متخيلة نفسي في يوم هقدر اوصلها(أكيد هيسقيني حاجة صفرا عشان يستولي علي جعيدي....و ده اسم اللاب بتاعي)

شكرا دريم....شكرا حسام...شكرا استاذي عادل و استاذة مصراوية...(و لو انهم مش من المعسكر السنجلاوي برضك...هههه)....و شكرا عنبوف

كل حد فينا من حقه ان يكون سعيد...و من حقه ان يلاقي سعادته بطريقته يا لاقاها فرديايا لقاها جوز

و الاكيد ان كل واحد ليه نصيب من السعادة....لو هو قرر انه يكون سعيد

مساااااكم قرار بالسعادة ياخدكم لحياة راضية دنيا و آخرة

فوتكم بعافية

تم تعديل 7 يناير 2011 بواسطة لماضة مصرية جدا

[Rosea]

فعلا انا متفقه مع الرأى اللى قال ان لو لقيت سنجل تانى ده بيهون كتير من مساوئ المرحلة دى من حياتك ...و بيلقى الضوء على كتير من مميزاتها يعنى فى مصر مش عارفة اقول من حسن الحظ و لا من سوءه كان فى كتير سناجل لذا كان الواحد بيقضى وقته بشكل طبيعى لكن هنا فى الامارات المشكله بقت اوضح لان المناسبات كلها موجهة للعائلات بالذات فى غير دبى....المهم انا بقترح ان السنجلات اللى هنا فى الامارات يتقابلوا بشكل او باخر مش عارفه اذا ده هيلاقى استحسان ...انا للاسف لسه مش ببعت رسايل خاصه بس انا شايفه اننا كتير و معظمنا فى نفس السن و الظروف و يمكن انا استنتجت اننا معظمنا فى مجالات متقاربه كمان يبقى لطيف اوى لو عملنا نادى سنجلات مصرى هنا ...

[mekkawy]

سلام عليكم يا سناجل

ينفع أتسنجل معاكوا شوية؟ أنا كنت مسنجل بردو و حالياً مسنجل مؤقتاً

خلوني بأة أكلمكم عن عقد السناجل الشباب

عقدة الور ور ور .. ايه بأة عقدة الور ور ور دي يا مكاوى؟!!

العقدة دي هي انك تاخد عربيتك و انت مسنجل و حلو كدة و تفضل طولة النهار و الليل أو كلما تيسر لك الوقت تور تور تور بلا هدى ولا هدف .. و دي مشتقة من عقدة الوحدة .. بالكم انتوا .. اليومين دول أم سلمى في مصر (تيجي بالسلامة يا رب .. قول آمين منك له لها له) و أنا بأة مسنجل ع الاخر .. أنزل و كلي حماس يا رايح أجري ع الكورنيش يا أمتن رايح أترسم في اي كافيه في اي مول و اشرب كوبتشينو شوجار فري .. قال يعني .. و اوصل لحد باب المول و بلاش ده .. و نطلع على واحد تاني يا ولداه .. و بردو بلاش ده و اديها ييجي نص ساعة لف كدة بالعربية و مشاري راشد عمال يقول يا أمي ما شكل السماء و أنا أعييييط و هو يقول أمشي أخاف تعثراً و أنا أعيييط .. كآبة الزمن بأة نزلت عليا و غرقتني .. في الاخر أزهق من كتر السواقة و أزهق من الشوارع و الناس و زي الباشا أروح زي ما رحت زي ما جيت

كان معكم سنجل مؤقت

مكاوي أحمد مكاوى

[ozoozo]

انا مش هاتجوز خالص

غير لما اكبر:closedeyes:

[Dreamwithme]

سلام عليكم يا سناجل

ينفع أتسنجل معاكوا شوية؟ أنا كنت مسنجل بردو و حالياً مسنجل مؤقتاً

خلوني بأة أكلمكم عن عقد السناجل الشباب

عقدة الور ور ور .. ايه بأة عقدة الور ور ور دي يا مكاوى؟!!

العقدة دي هي انك تاخد عربيتك و انت مسنجل و حلو كدة و تفضل طولة النهار و الليل أو كلما تيسر لك الوقت تور تور تور بلا هدى ولا هدف .. و دي مشتقة من عقدة الوحدة .. بالكم انتوا .. اليومين دول أم سلمى في مصر (تيجي بالسلامة يا رب .. قول آمين منك له لها له) و أنا بأة مسنجل ع الاخر .. أنزل و كلي حماس يا رايح أجري ع الكورنيش يا أمتن رايح أترسم في اي كافيه في اي مول و اشرب كوبتشينو شوجار فري .. قال يعني .. و اوصل لحد باب المول و بلاش ده .. و نطلع على واحد تاني يا ولداه .. و بردو بلاش ده و اديها ييجي نص ساعة لف كدة بالعربية و مشاري راشد عمال يقول يا أمي ما شكل السماء و أنا أعييييط و هو يقول أمشي أخاف تعثراً و أنا أعيييط .. كآبة الزمن بأة نزلت عليا و غرقتني .. في الاخر أزهق من كتر السواقة و أزهق من الشوارع و الناس و زي الباشا أروح زي ما رحت زي ما جيت

كان معكم سنجل مؤقت

مكاوي أحمد مكاوى

لأ قطعت قلبي يا أستاذ مكاوي....ربنا يرجعلك أم سلمي بألف سلامة وربنا مايحرمكم من بعض أبدا

لكن بما إنك مش سنجلاوي أصيل .....يعني سنجلاوي تايواني أحب أقول أن عقدة الور دي مش بتيقي موجودة عند السناجل الأصليين

أعتقد أنه عقدة مرتبطة بالشعور بالوحدة وافتقاد مشاركة حد لكن لو الواحد متعود أنه سنجلاوي ومنسجم مع نفسه وعارف هو ونفسه رايحيين فين وبيعملوا أيه

ومستمتع هو ونفسه مش هيور ولا حاجة .......لكن ميمنعش يعني تيجي لحظات يحس بالوحدة ويور بس بتبقي قليلة لأنه متعود علي وجوده مع نفسه

ربنا يتوب عليك من الوررر ...........وبلاش ربنا يخليك مشاري راشد و هذه الأنشودة ....اسمع له حاجة تانية فرايحي شوية بلاش تقفلها علي نفسك

[mekkawy]

انا مش هاتجوز خالص

غير لما اكبر:closedeyes:

خليك قاعدلنا كدة ف البيت زي البيت الوق... ولا بلاش أحسن تزعل .. خليك قاعدلنا كدة لحد ما مش هتلاقي رجل كنبة ترضى بيك .. لما تكبر تروح فين يا عم انت .. ما انت كبرت ولا انت مش واخد بالك .. ألم ترى الشيب الذي وخط فوديك و الشعر الذي تساقط على كتفيك و الأتب الذي حنى ظهريك .. ارجع يا أوزو لصوابك .. العزوبية فيها سم قاتل!!! :closedeyes:

مكاوى

تم تعديل 8 يناير 2011 بواسطة mekkawy

[ozoozo]

انا مش هاتجوز خالص

غير لما اكبر:closedeyes:

خليك قاعدلنا كدة ف البيت زي البيت الوق... ولا بلاش أحسن تزعل .. خليك قاعدلنا كدة لحد ما مش هتلاقي رجل كنبة ترضى بيك .. لما تكبر تروح فين يا عم انت .. ما انت كبرت ولا انت مش واخد بالك .. ألم ترى الشيب الذي وخط فوديك و الشعر الذي تساقط على كتفيك و الأتب الذي حنى ظهريك .. ارجع يا أوزو لصوابك .. العزوبية فيها سم قاتل!!! :closedeyes:

مكاوى

لما يبقي عندي ستين سنه هاتجوز تاني ان شاء الله

عشان الواحد يجدد شبابه بقي:closedeyes:

[mekkawy]

ليعني سنجلاوي تايواني give_rose:

هو أنا يا رب تايوان في كله :closedeyes: حتى السنجلة بيقولوا عليا تايوان .. منك لله يا عنبي انت و حسام انتوا اللي طلعتولي الكلمة دي مش عارف منين ... روح يا شيخ .. و متجيش تاني خليك هناك

مس/مسز دريم ويز مي (باعتبار ما استوضحته يعني)

الورورة دي ليها فوائد عديدة .. منها طبعاً انك بتشم هوا .. و بعدين لما بتور كتير بتشم هوا بردو .. غير بأة الهوا اللي الواحد بيشمه .. لا فوايد فوايد يعني و متنوعة زي ما هو واضح من كلامي!

هنشوف حل لموضوع الوروة ده و ربك يعدلها

مكاوى .. فوسح