اليوم السابع..أنباء عن انفجار سيارة مفخخة أمام كنيسة القديسين بالإسكندرية

[fatfouta]

خطاب الرئيس يذاع الآن على الفضائية المصرية

[fatfouta]

شوفتوا الخطاب؟؟؟؟؟؟؟ طب حد شاف الريس ؟؟؟؟؟

هو ده الريس؟؟؟؟؟؟؟؟؟؟

الميك أب مغرق وشه....بيغطوله العجز اللى باين عليه وماقدرش يقف خمس دقايق على بعض ويتكلم

حسبى الله ونعم الوكيل....أى مهانة نعيش

مش قادرة اتمالك نفسى من البكاء

قال الرئيس حسني مبارك إن إنفجار كنيسة القديسين في الاسكندرية، يحمل في طياته دلائل على تورط أصابع خارجية، تريد أن تصنع من مصر ساحة لشرور الارهاب.

وأضاف مبارك خلال كلمة القاها بعد ساعات من الحادث، أن مصر تعرضت لعمل ارهابي آثم استهدف الوطن بأقباطة ومسلميه.

وتابع "أن هذا العمل الارهابي هز ضمير الوطن وصدم مشاعرنا وأوجع المصريين مسلمين واقباط امتزجت دمائهم، لتقول ان مصر برمتها مستهدفة وان الارهاب الاعمى لا يفرق بين قبطي ومسلم".

وكان الرئيس قد أصدر تعليماته في وقت سابق بالإسراع في تحقيقات حادث الانفجار، لكشف ملابسات هذا العمل الإجرامى وتعقب مرتكبيه ومن يقفون وراءهم، وأعرب عن خالص عزائه ومواساته لأسر الضحايا، وأهاب بأبناء مصر - أقباطا ومسلمين - أن يقفوا صفا واحدا في مواجهة قوى الإرهاب والمتربصين بأمن الوطن واستقراره ووحدة أبنائه .

كما أمر بتوفير جميع الامكانات لعلاج الجرحى.كما وجه إلى سرعة ضبط الجناة، وطالب الرئيس المصريين بالوقوف صفا واحدا ضد قوى الارهاب والمتربصين بأمن الوطن والمستهدفين لوحدته.

اخبار مصر

صورة الرئيس وقت الخطاب

تم تعديل 1 يناير 2011 بواسطة fatfouta

[nagham hady]

حسبنا الله ونعم الوكيل

احنا هنلاقيها مينين ولا منين

لا حول ولا قوة الا بالله العلي العظيم

ربنا ولا تحملنا مالاطاقة لنا به واعف عنا واغفر لنا وارحمنا انت مولانا فانصرنا علي القوم الكافرين

[MaYousof]

إحنا شعب واحد ..

نسيج واحد ..

مُصابنا واحد .. واحد .. واحد ..

اقرأوا معي مداخلة أغابي من 10 شهور مضت:

كنا واحنا صغيرين انا واختى واخويا ماما تجمعنا باليل قبل ما ننام وتحكيلنا كل يوم حدوتة قبل النوم واحنا نشرنا الخبر وسط جيرانا وكان لينا جيران اصدقائنا جدا – ولدين وبنت – ونتجمع احنا الستة حواليها كل ليلة علشان ماما تحكيلنا حدوتة واعمارنا بالتقارب كده - 5 -8 - 9- سنين المهم التلات اطفال جيرانا دول اخوات - االوسط اللى فيهم اسمه ايمن – بس هما 5 اخوات اصلا بس اتنين كبار – وكان اكتر واحد بيخاف لو القصة فيها غوريلا او الست الخطافة اللى شعرها منكوش فى القصة برضوه - يروح يطلب من ماما لا يا خالتى ما تحكيش بخاف – ونفضل نتنطط حواليه الخواف اهو ونغيظه – شغل اطفال بقي – تروح ماما تغير القصة علشان خاطر ايمن باشا – وكنا الصبح نروح المدرسة مع بعض – تحس طول الايام والسنين ما يعديش يوم ما نشوفش بعضنا - وكانت بتحصل مواقف عادية زى اللى بين كل الجيران - لما الانبوبة تخلص نروح عندهم وفى العيد خبيز العيد عندهم – والاولاد يشيلو معانا صواني الخبيز ونمسح العمارة فى الاعياد مع بعض نفرح بالعيد اى عيد نتلم ونهيص – كنا حلويين بشكل لا يوصف – صدقونى من كتر المحبة اللى كانت بينا كلنا والجيران اللى حوالينا كنا بحس انها اجمل ايام ومامتهم الاولاد دول كانت طيبة وباباهم كان طيب جدا جدا – مفيش احنا مسلمين وانتم مسيحين – مفيش الكلام الغريب بتاع اليومين دول – لما اخو ايمن الاصغر سقط فى ثانوية عامة وقفنا فرحتنا رغم انى كنت نجحت لكن مراعاه لمشاعرهم لانه كان معايا فى ثانوية عامة

الواحد عمال يسمع عن احداث نجع حمادي

وبما انى من نجع حمادى كان جوايا الم وزعل وحسيت ان النفوس اتغيرت ... اوى ... اوى ... ايه جرا ... طب ما طول حياتنا مع المسلمين اخوات .... زي الفل .... مين زرع الكراهية دي .... وفضلت اسال نفسي هو انا بعيد عن نجع حمادي بقالى كتير؟؟ ومعقول بالشكل داه الناس اتغيرت – وكنت بابكى على المسيحين اللى ماتوا وصعبوا على اوى وبما انى مسيحية بقي ... فمتأثرة اوى اوى باللى حصل –

اكملكم - انا معايا اخويا هنا فى الكويت اتصل عليا فى التلفون فى وقت احداث نجع حمادي - كلمنى بيقولى سمعتى باللى حصل فى نجع حمادي دا الدنيا مقلوبة – قولتله طبعا داه كان عيد نكد علينا وحرقة دم مفيش حد احتفل بالعيد – ووقتها كانت المشاعر جوايا متضاربه وافكار وحاجات كتير متلخبطة – صدقونى داه الكلام اللى قالهولى اخويا فى التلفون وربنا شاهد على –

بيقولى ايه –

طيب اسالك سؤال انت زعلتى اوى على المسيحين اللى ماتوا ؟ – قولتله طبعا – راح قالى طب زعلتى على الشرطى المسلم اللى مات معاهم – قولتله لا ؟ وانا برد بعصبيه جدا فى السؤوال داه بالذات بقي – راح قالى طيب اقولك هو مين بس اوعى تبكي- وامسكي اعصابك لانى انا شخصيا بكيت عليه – عارفة هو مين – قولتله هو مين يعنى خلص – راح قالى ايمن حامد ابن خالتى ام جمال– ابقي اتصلى عزى ماما لانها عماله تبكي عليه – انا لسة متصل بنجع حمادي من ربع ساعة

انا قفلت التليفون وكان الخبر صاعقة على راسي - طخخخ – اكيد ربنا ليه حكمة من كدا – الليل كله سيبت المسيحيين وابكي على ايمن – انا بكيت على المسيحين ال6 لانهم صعبو عليا زى اى مسيحية وهما فرحانين بالعيد خارجين يعيدو من الكنيسة وايه الظلم داه لكن معرفة شخصية بيهم ما اعرفهمش – لكن بكيت على ايمن لاننا متربيين فى بيت واحد طووول حياتنا حتى مراته كانو جابوها فى قناه المحور على فكرة كانت بنت عمه - وهي وصغيره بتلعب معانا وانا عارفاها كويس – وهما قالوا عمرايمن 28 سنة لا دا غلط لانه من سن اختى الكبيرة وكانو فى فصل واحد وهى عمرها 35 سنة يبقي ايمن 35 سنة برضوه – وكمان ايمن بيحب المسيحيين اوى اوى بجد

المهم انا فعلا اتصلت بماما وقولتلها الباقيه فى حياتك يا ماما فى ايمن وماما بكت فى التلفون وقالتلى منهم لله اهو سايب 3 عيال فى رقبته اتيتيمه وغلبان – داه انا اللى مربياه من هو وعمره يوم – داه اتولد على ايدي لغايه ماحضرت فرحه - داه لسة مقابلنى الاسبوع اللى فات فى الشارع وقالى عاوزة اى حاجة يا خالتى اجيبهالك – منهم لله وفضلت ماما فى التلفون تتكلم كلام كتير عنه بهلوسة – اد ايه فيه حب جوانا – ( ام جمال الله يرحمها – ام ايمن يعنى - كانت نموذج محبه وعمري وانا فى حضنها ما كنت اعرف انها مسلمة وعمرى وانا فى حضنها ما كنت اعرف يعنى ايه مسلم ومسيحي )

اما بالنسبة لما نحب حد نهدية للنور – عاوزة اقول اللى حوليك ما دام فيه محبة فيه نور لكن الضلمة بتيجي من الكراهية – عمر ما حاقنع حد يغير دينه بحجة انى انا اللى على نور وحق وانت لاء ... ولازم اهديك ... داه كلام مرفوض رفضا باتا وغلط .....

الضلمة والكفر فى القلب الاسود اللى مليان كراهية اما القلب اللى فيه محبة فيه نور – ايمن كان نموذج مثالى وعشرة سنين العمر كله كان قلبه فيه محبة – وانا كمان قلبي فيه محبة لانى افتكرته وحكيت عنه فى كل مكان ..

اسفة طولت عليكم وانتم قلبتو عليا المواجع

:sad:

[م تيمور المراغي]

http://www.youtube.com/watch?v=n7Gcp30pGE0

تم تعديل 1 يناير 2011 بواسطة architect

[pink rose]

في تخبط جامد في المعلومات

شوية يقولوا عربية مفخخة و شهود العيان يقولوا كان مكتوب عليها البقية تأتي

و شوية يقولوا انتحاري و مات مع من ماتوا في الحادث و القنبلة محلية الصنع

و لا حد فاهم حاجه

يا ترى واخدينك لحد فين يا مصر

[م تيمور المراغي]

لحظة انفجار كنيسة القديسين من داخل الكنيسة

http://www.youtube.com/watch?v=8X3KMWuvkYc

[pink rose]

الحمدلله ان الانفجار ما طالش الناس اللي في الكنسية من جوة و الا كانت هاتبقى المصيبة اكبر بكتير

[عبير يونس]

لحظة انفجار كنيسة القديسين من داخل الكنيسة

http://www.youtube.com/watch?v=8X3KMWuvkYc

حسبي الله و نعم الوكيل

اللي عمل كده لا يمكن يكون بني آدم

[ريمون]

يا ملك السلام

اعطنا سلامك

قرر لنا سلامك

و أغفر لنا خطايانا

بلاش يا جماعه سياسه دفن الرأس فى الرمال

الانفجار قصد الخارجين من صلاه رأس السنه

اغلب الناس بتصلى لغايه نص الليل علشان تقضى مع ربنا اول لحظات السنه الجديده و بعد كده تروح

الصلاه بتستمر للصبح للى عاوز

توقيت الانفجار الساعه 12:20 معناه ان المهاجم عارف المعاد بالضبط و مخطط كويس

انا اختى ساكنه فى 45 بحرى يعنى على بعد 5 دقايق من الكنيسه دى

بس الحمد لله كانت بتصلى فى كنيسه تانيه مع بابا و ماما و اختى التانيه

جوز خالتى كان لسه طالع من الكنيسه دى قبلها بخمس دقايق

واحد من المصابين اسمه فيكتور اعرفه من الكليه

اعتقد ان اللى كان بيسأل ليه المسيحيين بيبنوا اسوار حوالين كنايسهم و حوالين نفسهم عرف الاجابه دلوقتى

[أبو محمد]

في تخبط جامد في المعلومات

شوية يقولوا عربية مفخخة و شهود العيان يقولوا كان مكتوب عليها البقية تأتي

و شوية يقولوا انتحاري و مات مع من ماتوا في الحادث و القنبلة محلية الصنع

و لا حد فاهم حاجه

يا ترى واخدينك لحد فين يا مصر

آخر المعلومات "المتضاربة" التى وصلتنى تقول إن حزاما ناسفا قد ألقى تحت سيارة 127 تخص مهندس مسيحى كان من الموجودين داخل الكنيسة

[أبو محمد]

يا ملك السلام

اعطنا سلامك

قرر لنا سلامك

و أغفر لنا خطايانا

بلاش يا جماعه سياسه دفن الرأس فى الرمال

الانفجار قصد الخارجين من صلاه رأس السنه

وماذا يثبت هذا ؟

واضح أنك من الإسكندرية

قل لإخوانك هنا .. كم عدد المصريين المسلمين الذين يدخلون إلى مستوصف مار مرقس الملحق بالكنيسة؟ أو مستوصف مار مينا ؟ أو مستشفى بيت النعمة ؟

[ريمون]

يا ملك السلام

اعطنا سلامك

قرر لنا سلامك

و أغفر لنا خطايانا

بلاش يا جماعه سياسه دفن الرأس فى الرمال

الانفجار قصد الخارجين من صلاه رأس السنه

وماذا يثبت هذا ؟

واضح أنك من الإسكندرية

قل لإخوانك هنا .. كم عدد المصريين المسلمين الذين يدخلون إلى مستوصف مار مرقس الملحق بالكنيسة؟ أو مستوصف مار مينا ؟ أو مستشفى بيت النعمة ؟

كتير

لمستشفى خيرى و بابها مفتوح لكل محتاج او مريض

بس ايه علاقه ده بالموضوع

لو كان المقصود المصريين جميعا كان استهدف سوق او مجمع حكومى

لكن انفجار قدام كنيسه وقت خروج الناس من الصلاه مع وجود تهديدات يبقى الموضوع واضح

يعنى

[أبو محمد]

يا ملك السلام

اعطنا سلامك

قرر لنا سلامك

و أغفر لنا خطايانا

بلاش يا جماعه سياسه دفن الرأس فى الرمال

الانفجار قصد الخارجين من صلاه رأس السنه

وماذا يثبت هذا ؟

واضح أنك من الإسكندرية

قل لإخوانك هنا .. كم عدد المصريين المسلمين الذين يدخلون إلى مستوصف مار مرقس الملحق بالكنيسة؟ أو مستوصف مار مينا ؟ أو مستشفى بيت النعمة ؟

كتير

لمستشفى خيرى و بابها مفتوح لكل محتاج او مريض

بس ايه علاقه ده بالموضوع

لو كان المقصود المصريين جميعا كان استهدف سوق او مجمع حكومى

لكن انفجار قدام كنيسه وقت خروج الناس من الصلاه مع وجود تهديدات يبقى الموضوع واضح

يعنى

الموضوع واضح لكل واحد فينا من الزاوية التى ينظر منها إليه

ووجهة نظرى هى أنه لو كان التفجير فى سوق تجارى حكومى أو غير حكومى - مثلا - لكان المقصود هو إثبات عجز الحكومة عن توفير الأمن للمواطنين .. يعنى تبقى الحكومة هى المقصودة .. أو زعزعة أركان نظام الحكم هى المقصودة

أما أن يكون التفجير فى هذا الموقع (بين كنيسة ومسجد) وفى هذا التوقيت بالذات ، فليست الحكومة هى المقصودة به .. بل الوطن ..

الوطن يا أستاذ ريمون ..

ياترى أى زاوية هى الأوسع والأشمل .. تلك التى تنظر منها أنت ؟ .. أم هذه التى نظرت منها أنا ؟

[mekkawy]

السلام عليكم

الحقيقة الواحد مش عارف يقول ايه .. بس هأقول اللي في نفسي

لا دين ولا عرف ولا أخلاق إنسانية تقبل ما حدث و لكن السؤال اللي بيطرح نفسه ... من المستفيد ؟؟؟

للأسف كلنا متاخدين على هوة عمييييييقة .. مسلمين و نصاري .. المستفيد مش مفرق .. مش مهم ايكش نولع كلنا عادي .. المهم المستفيد عارف من أين تؤكل الكتف!!!

سؤال رفيع كدة .. اشمعنى مبيحصلش أي تفجيرات في أعياد المسلمين؟؟؟ من غير ما نفكر عشان لو حصل مش مهم مش هيحصل حاجة ولا حد هتتهز في دماغه شعرة .. يا ريت منتفهمش غلط .. أنا أقصد أن قتل المسلمين مش هيعمل فتنة .. الوضع في مصر مستقر من سنين طويلة على الأقل ظاهرياً و زي ما بيقولوا اللي في القلب في القلب .. و لكن بردو مستقر و كلنا لينا حكاوي مع الآخر سواء كنا مسلمين أو نصاري .. حكاوى و ذكريات حلوة طبعاً .. بس لاااااازم تحصل الفتنة عشان مينفعش نفضل كدة .. بأة معقول الشعب المسكين ده عمالين نطحن فيه من جوة و برة و لسة متماسك كدة؟!!! لا طبعاً لازم نفركشه بأة و فرق تسد

هيطلع طبعاً الجهلة من الطرفين ينفخوا في النار .. فريق هيقولك أصلنا الأقلية المستباحة .. و فريق هيقولك أحسن يستاهلوا قارفنا .. بأتكلم عن جهلة الطرفين .. هتقوم دعاوى من هنا و من هنا .. دعاوى بتطالب بمزيد من الصلاحيات و دعاوى تانية بتطالب بالحذر الحذر .. و كالعادة هيكون موقف حكومتنا المتخلفة عن الركب الحضاري موقف مقزز .. هيقدموا كبش فداء و شوية سلاطات و مشهيات على حبة تسهيلات و امتيازات عشان يراضوا شركاء الوطن.. و مش مهم معلش المسلمين دلوقت يستنوا شوية .. شوية و يقوم فريق النفخ في النار يولعها تقوم الحكومة المبجلة توقف حبة التسهيلات بعد ما يكون الموضوع نام شوية عشان تراضي الفريق التاني طبعاً !!! ايه القرف ده!!!!

طب عالجتي يا حكومة الأزمة الداخلية .. عالجتي القلوب ؟؟؟ و مش هتعالج

طب متيجوا احنا بأة نعالج .. مهو لازم حد يعالج يا إخواننا .. بيقولوا أول رد فعل كان رشق المسجد المجاور للكنيسة .. طب المسجد ماله بس يا إخواننا .. و بالتالي تاني رد فعل كان رشق الشباب المسلم للمتظاهرين النصاري بالحجارة ... و شكراً يا شباب مصر .. برافو هو ده المطلوب ..

ها شايفين المستفيد اللي بيلعب بيكم بالخيوط و يجيب دول يمين و دول شمال ... و ايكش تولع .. يااااااااا رب نفهم جميعاً اللي بيتعمل فينا و الحفرة اللي بنتزق عليها

اسف ع الاطالة بس مبقوق

مكاوى

[MaYousof]

لو كان المقصود المصريين جميعا كان استهدف سوق او مجمع حكومى

لكن انفجار قدام كنيسه وقت خروج الناس من الصلاه مع وجود تهديدات يبقى الموضوع واضح

يعنى

بالفعل المقصود ليس المسيحيين .. ولكن المقصود هم المصريين جميعا جميعا .. كلهم كلهم .. المقصود هو إحداث فتنة في مجتمع واحد ماتعرفش تفرق فيه بين مسلم ومسيحي .. والعمل على الفتنة دي بقصد وبدون قائم بكل جد من أطراف عديدة .. وهذا الجرم الإرهابي تم بهذا الشكل ليكلل دعاوى الفتنة والعمل الحثيث - بقصد وبدون - في إعاملها بين نسيج الوطن بل والغوار فيها لأبعد الحدود ..

لو المقصود بالتفجير ده هم المسيحيين كان هيكون ليه مكان تاني وحسابات مختلفة ..

[ريمون]

السلام عليكم

هيطلع طبعاً الجهلة من الطرفين ينفخوا في النار .. فريق هيقولك أصلنا الأقلية المستباحة .. و فريق هيقولك أحسن يستاهلوا قارفنا .. بأتكلم عن جهلة الطرفين ..

مكاوى

جهله مين يا استاذ مكاوى؟

دى مش اول مره يحصل الكلام ده

التسعينات يا ما شافت احداث ارهابيه ضد القبط و الكنايس فى الصعيد

فى راس السنه سنه 2000 21 قبطى اتقتلوا فى الكشح

السنه اللى فاتت 6 اتقتلوا فى نجع حمادى

من 4 سنين واحد اتقتل فى نفس الكنيسه

و غيرها كتير

انا مش بتهم المسلمين عموما و لا الاسلام

بس فيه متطرفين مسلمين بيستهدفوا المسيحيين

و تمويع الموضوع بانه استهداف المصريين عموما او انه مخطط من جهات خارجيه و كأن مفيش احتقان داخلى ده هو احد الاسباب الرئيسيه لاستمرار المشكله

لازم نعرف السبب علشان نعرف نحل المشكله

[طبيبة بالخارج]

لم أعرف الخبر الا الآن و لقد أحسست كأن حجر وضع بصدري و ضيق شديد

عزائي هنا ليس للأخوة المسيحيين فقط و لكن لكل المصريين فالمصيبة مست المصريين كلهم سواء مسيحيين أو مسلمين

إن كان من ارتكب هذه الجريمة مسلما فالإسلام براء منه و هو من المفسدين في الأرض و هؤلاء ليس لهم سوى أن يقطعوا من خلاف أو يصلبوا أو ينفوا

لو كانت حدود الله تقام لم يكن ليتجرأ أحد على تلك الفعلة الشنعاء

من فعل ذلك لا يريد الا اثارة الفتنة فلا يجب أن نعطيه ما أراد يجب ان نكون أذكى من ذلك

فاللإختلاف بين المسيحيين و المسلمين هو فقط في الديانة و لكن خلاف ذلك فنحن مصريين لنا نفس الأحلام و الآمال و المشاكل

[م تيمور المراغي]

و تمويع الموضوع بانه استهداف المصريين عموما او انه مخطط من جهات خارجيه و كأن مفيش احتقان داخلى ده هو احد الاسباب الرئيسيه لاستمرار المشكله

الموضوع مافيهوش تمويع يا ريمون على الاطلاق ,,

هي دي الحقيقه بالظبط ,, الانفجار كان بتخطيط خارجي واستهدف اشعال الفتنه بين المسلميين والاقباط وكان اختيار التوقيت والمكان غايه في الذكاء الشيطاني ,,

دور العقلاء من الجانبين التكاتف ومواجهة المخططات دي بكل وحده وتلاحم ,,

[pink rose]

مقدرين انفعالك يا استاذ ريمون

بس ركز كده شوية

اشمعنى الكنيسة دي اللي قدامها جامع؟؟؟؟؟؟؟؟؟؟؟؟؟؟

عشان يحصل اللي حصل يطلع شباب من الكنيسة يولعوا في الجامع والدنيا كلها تولع و ما تسكتش

لو كانوا عاوزين مسيحين بس ما كان عندهم الكنايس اللي في احياء تجمع المسيحين

عندهم غيط العنب مثلا منطقة اغلب سكانها مسيحين

عندهم المرقسية اللي في شاع كنيسة الاقباط المنطقة اغلب سكانها مسيحين

عندهم الكنيسة اللي على ترام الابراهيمية

و غيرها اماكن كتير

لكن هما اختاروا المنطقة دي بعناية عشان كان في سيناريو هايحصل لكن ربنا ستر و اتلم في اوله