إزاي أربي ولادي

[أهااات روح]

السلام عليكم ورحمة الله وبركاته

انا قرات الكلمات دى وعلى قدر مااعجبتنى تسببت فى الم فى قلبى

لانها فعلا حقيقة

يارب تنال اعجابكو

عندي إبني صغير يادوب سبع سنين

جالي و قال أنا عايز أفلح دنيا و دين

حيرني و قاعدت أفكر أربيه زي مين

و دا بسبب العنوسة جالي في سن كبير

و ابني طموحه جامح و نفسه يطلع وزير

و لا رئيس جمهورية و عليه ماهوش كتير

قلت أربيه زي أهلي ما ربوني زمان

نمت و شفت أبني شكل شبح إنسان

بيبكي ياعيني عليه وبيبص لي وغضبان

بيقول لي ليه يا أمي ربتيني غلط

و أدي نتيجة ربيتك بقيت أكل الزلط

و كل إللي حوليه يقولولي بطل عبط

طب ليه يا أمي قلتي إن الكذب حرام

و إللي يزور و يسرق عمره ما يعرف ينام

و الغشاش في النار و خارج عن الإسلام

و أنا شايف إللي زور عيشته عز في عز

و قاعد و نافش ريشه في برلمان الوز

لا أختشى على دمه و لا ضميره أتهز

و إللي بيسرق شريف و بيلف البلاد

ينهب بالمليارات و بيحترمه العباد

و إللي يخاف ربه عايش في إضطهاد

أنا قلت أصبر يا إبني دا ربنا كريم

بكره راح يفرجها و يغور عنا اللئيم

و في الأخره مصيره و أهله للجحيم

صحيت في قلبي غصة و إحساس بالألم

و أنا شايفة بعيني كل شريف محترم

يتلفق له قضايا لجل يدوخ و ينظلم

طيب حد يجوبني أزاي أربي ولادي

و أنا ضحيت بنفسي لعشقي تراب بلادي

وياريت محدش يقول لي إني أعيش عادي

منقوووول

ولكم تحياتى

[mekkawy]

السلام عليكم

الفاضل (ة) اهات الروح

الحقيقة أنا فكرت الموضوع فعلاً و بجد سؤال حقيقي محتاج اجابة (و بأقترح نخليه كدة:)) و لما قرأت الأبيات دي عجبتني أوي .. هي فعلاً تعبير عن الواقع بس انهزامية شوية .. يعني مش قاعدة ان اللي بيعمل كدة يحصله كدة ولا اللي بيعمل كدة يحصله كدة

خليني ألف بمحور الموضوع شوية بعيد عن الابيات و أجاوب سؤالك أو اتكلم عنه

فعلاً السؤال ده مرعب و مخوفني جداً شخصياً

أنا اتربيت الحمد لله رب العالمين بشكل أنا شايفه نموذجي و كذلك إخواتي .. بأقعد ابص لبنتي كدة و أقول يا ترى يا لومة يا سلومة هأعرف أربيكي زي ما اتربيت ؟!!!

و بأدعي ربنا .. يا رب يا رب وفقني اربي بنتي زي ما أبويا و أمي ربوني .. و بأقعد اسأل أمي .. الا انتي ياما ربتيني كدة ازاي؟!!!

ازاي خلتيني أخاف ربنا و ما أخافش عبيده .. ازاي ياما خلتيني مش كداب مع ان العيال تموت ف الكدب زي عنيها .. ازاي يابا بأحترمك من غير ما تضربني طول عمرك .. ازاي يابا طلعتني احب الصلاة أكتر من نفسي و أكتر من الأكل (أصلي بحب الأكل أوي :)) ازاي يابا طلعتني راجل أخاف على إخواتي و أكون رحيم و شديد معاهم في نفس الوقت

ازاي ياما حببتي أختي في الحجاب و لبسته بدون مناوشات ولا مشاكل .. ازاي يابا إخواتي عمرهم ما عرفوا شباب غير اجوازهم و انا عمري ما شفتك بتزعق لواحدة فيهم على حاجة .. ازاي اخواتي ياما طلعوا ستات بيو و أمهات بالشكل ده.. و ازاي ياما طلعتيني بنحب بعض و نخاف على بعض و عندنا توازن نفسي و اجتماعي ... مش عااااااارف ولا فاااااااااهم ازاي

طب إحنا هنعرف نربي عيالنا كدة ولا هنعمل ايه ... ربنا يستر علينا

طولت ؟ لأ ؟ لا لا طولت انا عارف .. أكمل ليتر أون بأة

مكاوى

[أهااات روح]

السلام عليكم

استاذ مكاوى انا سعيدة جدا بمشاركة حضرتك

ويارب يخليلك والد حضرتك ووالدتك واخواتك وجزاهم الله كل خير لاخراج هذه الذرية الصالحة للمجتمع

وربنا يعينك ويعينا فى تربية اولادنا

انا شخصيا قلقانة جدا وكل شوية اسال زوجى احنا هنربى ابننا ازاى يرد يقولى زى ماحنا اتربينا بس لما بفكر كده مع نفسى الزمن اختلف احنا مش كبار قوى والزمن مش بعيد قوى بس الفساد هو الى زاد وانا عارفة ان مش كل الناس كده فاسدين واكيد فى الناس الى بتتقى الله وبتخاف ربنا بس مبقوش كتير زى الاول الكويس بيحاول يقلد الفاسد علشان اموره تمشى

ربنا يستر علينا وعلى اولادنا ويعينا على تربيتهم

(( اللهم ربى لنا اولادنا واجعلهم ذرية صالحة بارين بوالديهم وساعين فى خدمة دينهم ))

اللهم امين يارب العالمين

[mekkawy]

الفاضلة اهات الروح

و الله شوفي .. بعد بحث و فحص في الموضوع ده و سؤالي لوالدتي كتير عملتيها ازاي يا عفريتة .. كانت بتقولي هي جت كدة :wub:

فقلت في عقل بالي خلاص .. أنا أربي نفسي .. و هي هتيجي كدة

يعني ان شاء الله أولادنا هيتبوا أحسن تربية .. بس لما نتربي احنا الأول

أكيد الأب لو بيصلي عياله هتصلي .. أكيد لو الأم متحجبة بناتها هيتحجبوا .. أكيد لو فيه قرآن في البيت الولد هيحبه .. شوف بتذرع ايه و انت تعرف هتحصد ايه .. بتذرع شعبولا و العنب العنب هتحصد عنب و منجة ان شاء الله .. بتذرع و المقيمين الصلاة هتحصد و المؤتون الزكاة .. هتذرع خوف هتحصد جبن (جبن مش جبنة) هتذرع اعتماد ع النفس هتحصد شجاعة و شخصية قوية .. و هكذا.

مكاوى .. ربينا يا رب

[أهااات روح]

انا مع حضرتك اوافقك الرأى مليييييييون بالمائة

وده الى بحاول اعمله والحمد لله الصلاة والقرآن والاذكار فى البيت نظام ثابت ودائم

بس الى مخوفنى المؤثرات الخارجية وسرعة تاثر الاولاد بيها لان بطبيعة الحال عند الاطفال او حتى الشباب وخصوصا فى السن الحرج (سن المراهقة) بتبقى الحاجة الى بره البيت حلوة حتى لو غلط

احنا هنتوكل على الله سبحانه وتعالى وربنا يسترها معانا ومع اولادنا

لك كل احترامى

[moory]

أهات الرووح،

فعلا كلمات معبرة و حقيقية، متهيألي ان كل شاب صغير او حتى كبير بيسأل نفسه الأسئلة دي..ما بقاش في حد صغير دلوقتي.. العيال الصغيرة بقو قرووود..فاهمييين كل حاجة

ده غير كده كمان، بقى المبدأ عن الشباب الصغير اني لازم اكون كلامنجي و محواراتي "مش محاواراتي :)" و بعرف اشتغل الناس و اثبتهم..

و الطيب ما بقالوش مكان كبيير قوي بنا في الزمن ده..

مكــــــــــــــــاوي،

والله جييت على الجرح فعلا،،

مع اني لسه ماتجوزتش بس السؤال ده فكرت فييه،، يا ترى هنربيكو ازاي يا ولاد.. يا ولادي

بس أما يجوووو بس، انا هوجع دماغي بيهم من دلوقتيي لييه smk:

[mekkawy]

بس أما يجوووو بس، انا هوجع دماغي بيهم من دلوقتيي لييه smk:

أهو كدة انت برنس يا عم عمر .. مش تقولي العيال .. رنـــــكز انت دلوقتي في أم العيال الأول بس خلي بالك .. و انت بتختار أم العيال خليك فاكر ان هي دي اللي هتجيبلك العيال و تربيلك العيال .. العيال اللي هيطلعوا عينك يا معلم bnd5:: و بالهنا و الشفا

مكاوى

[moory]

بس أما يجوووو بس، انا هوجع دماغي بيهم من دلوقتيي لييه smk:

أهو كدة انت برنس يا عم عمر .. مش تقولي العيال .. رنـــــكز انت دلوقتي في أم العيال الأول بس خلي بالك .. و انت بتختار أم العيال خليك فاكر ان هي دي اللي هتجيبلك العيال و تربيلك العيال .. العيال اللي هيطلعوا عينك يا معلم bnd5:: و بالهنا و الشفا

مكاوى

عارف يا مكمك،

الواحد لما كبر بيبص دلوقتي للحج و الحجة و يسأل نفسو.. هما عملو كده ازاي؟

كبرونا و علمونا و ربونا كويس..طلعنا عنيهم اكييد، بس فضلو ورانا لحد ما كل واحد فينا بقى حاجة محترمة،

ماكناش عارفيين هما تعبو قد اييه و احنا صعيريين،

انا افتكر والله حد من قرايبي كان بيقولي يارييت ولادي يبقو زيكوو وانت و اخواتك..

لما جيت بصييت للموضوع، لقيت ان جدي و جدتي ليهم فضل كبيير في كده، لانهم هما الي زرعو الحاجات دي كلها فيهم و هما صغيرين، كانو بيعلموهم يخافو ربنا و يحبو اخواتهم و الناس و يشووفو مستقبلهم..

جدتي كانت بتحكيلي و تقولي ان جدك كاان بيحفظني قراان و احنا لسه صغيرين،

وهيا كانت بتعلم اخواتها و تحفظهم..

طبعا الدنيا دلوقتي اتغيرت، بس برده نقدر نحافظ على الحاجات الحلوة دي، و نكبرها و نستخدم كل جديد و التكنولوجيا في التربية و نسخرها لمصلحتنا..لأنها موجوده فينا...

وكلها كاام شهر و احصلكوو ان شاء الله، وابقى في حزب المتزوجون

تم تعديل 3 يناير 2011 بواسطة moory

[عادل أبو عمر]

الحل في طاعة الله ...

الحل : وِقفة مع قوله تعالى: "وكان أبوهما صالحاً

و صلاح الأب يبدأ من لحظة اختيار شريكة عمره ... أم أولاده