لماذا اصبحت جاسوس على بلدك ؟؟

[حبينى يا بلدى]

لماذا اصبحت جاسوس على بلدك ؟؟

الراى العام يقول اعدموا الخائن الجاسوس دة جبان ويستحق الاعدام .

افهم من كدة ان الخيانة عقابها الأعدام .... هل سئالنا لماذا أصبح الجاسوس جاسوسا ؟

ولماذا لم يصبح عالم او كاتب او مهندس او مفكر ناجح فى مجاله ؟

من وجهه نظرى أعرض عليكم مراحل تجهيز جاسوس علما بان من يجهز الجاسوس للخيانة هى وطنه وليس الاخرين

والان اقرؤا هذه السطور ................

مواصفات ومراحل حياة الجاسوس

1- الجاسوس (المنشا طفل رضيع )

2- حبو ولعب وشقاوة.( مش عارف بكرة مخبى اية )

3- حرمان من لعبة ( كفاية على الاهل اكلة وشربة )

4-الحرمان من حتى الملابس الجديدة ( خد بواقى الاقارب والجيران )

5-كبر شوية ودخل المدرسة .

6- اتحرم من حاجات كتير .

7- اتحمل وقال .. اخلص بس تعليمى واتسلح بشهادتى .. يمكن ؟؟؟؟؟

8- اكون بكرة حاجة كبيرة ويعوضنى ربنا سنين حرمانى.

9- ذاكر بجد وكان متفوق وخلص تعليمة ( مبروك عليك الشهادة ).

10- دخل الجيش والا اخد تأجيل ومعفاة من الخدمة ( قصدى الاهانة والمراسلة وسب الاهل).

11- المهم خلص اهانتة هو واهلة قصدى الخدمة العسكرية .

12- بداية مشوار البحث والتنقيب عن وظيفة .. قال اية بشهادتة .

13- دابت قدمية وفلس ابوة اكتر ما هو اصلا مفلس اصلة لسة بياخد مصروف منه.

14- سهر ليلة بينة وبين نفسة وقال ضيعت عمرى عشان ورقة ذلتنى زمان ولسة بتذل فيه.

15- نسى انة معاه شهادة وابتدا يدور على اى شغل.

16- ربنا كرمة وبقى حارس امن بمبلغ كبير اووووى 300 جنية فالشهر شاملة.

17- اشتغل وقال هاعمل اية حرام افضل حمل تقيل على ابويا.

18- طبعا زى كل انسان من حقة يحب ويفتح بيت ( يتنيل قصدى يتجوز).

19- فضل يفكر أزاى ااقدر اتجوز بصراحة حاجة مستحيلة .

20- المهم نزل قعد على القهوة وقال تغيير يمكن اخرج من هم التفكير.

21- وكان حظة جميل سمع خطاب لسعادة الريس كان مضمونة زيادة الاجور .

22- فرح وقال معقول الحمد لله انت كريم قوى يارب كدةممكن احوش والا ادخل جمعية واتجوز.

23- صبح تانى يوم وفعلا لقى زيادة فى الاجور المهم ما اخدش ولا ادى رضى بالمقسوم.

24 – وعلى طول بعد اسبوع من خبر زيادة الاجور لقى زيادة فالاسعار بمقام الضعف.

25- صرخ وقال والله دة حرام اللى بتدوة باليمين بتاخدوة بالشمال واكترر من الاول كمان.

26- سكت زى غيرة ملايين يتنهبوا ويفضلو ساكتين من الاخر مشى جنب الحيط.

27- وهو ماشى قابل واحد صاحبة من ايام التعاسة (الدراسة ) شبه عليه هو لا مش هو المهم .

28- قرب منه وسألة انت فلان رد علية وقال وانت فلان اهلا اية اخبارك انا فاكرك .

29- رد علية صاحبة وقالة اكيد انت ياما شرحت لية دروس اصلك كنت دحيح وموس.

30- المهم صاحبنا اللى هيبقى جاسوس سال زميلة اللى كان فاشل بتشتغل فين دالوقتى .

31- رد علية وهو بيبتسم فى وزارة من الوزارات ( مكان مهم ) اتصدم الزبون لما عرف .

32- سالة أزاى قدرت تشتغل فالمكان الجامد دة انت حتى كان تقديرك مقبول .

33- ابتسم تانى وقالة انا ( بابا ) بيشتغل فى منصب كبير بسهولة شغلنى هناك.

34- خلصت المقابلة وركب سيارته الجميلة طبعا صديقة مش المتنيل على عينة الجاسوس.

35- فضل يكلم فنفسة هى دى الحياة اصله كان كل لما يتقدم لوظيفة ويقرب خلاص بمجهودة ليها.

36- يتفجأ بواحد فرفور داخل بيسأل عن المدير ومعاة كرت توصية ولما يظهر الكرت الحلم يتهد.

37- رضى بحالة وقال اعمل مشروع واخد قرض من اى بنك يمكن تروق وتحلو معايا.

38- حصل وكان بس بعد لما كالعادة اتذل اصلة مش اجنبى ولا مستثمر مفروش طريقة ورد.

39- ابتدا المشوار من جديد نجح فالاول بس يا خسارة القوانين مدروسة على الغلبان مدسوسة.

40- ضرائب بجميع أشكالها ورسوم مش عارف اية واية المهم بسهولة انقضى عليه .

41- والبنك خد خبر رفع قضية وخد حكم عليه للحبس للسداد يعنى مستقبلة انقضى عليه.

42- هرب من مصيره المشئوم وسافر خارج البلاد وهناك حاول يلاقى شغل .

43- تعب من اللف وقال خلاص يعنى انا بلدى كان نصفتنى ما هى داست وداست عليه.

44- صاحبنا شوشو ( الشيطان ) همس وقاله مفيش غير الموساد هتلاقيهم مشتاقين عطشانين.

45- تم الاتصال وأستقبالوه بالترحاب وجندوه وبالدولارات ملو عينية وأصبح جاسوس.

46- أصل الظلم بيغير النفوس بلدى اللى كنت بروحى أفديها بقيت جاسوس عليها.

47-وبقيت اجند فناس كبيرة فمناصب كمان خطيرة وسالت نفسى الناس دى لية بتخون.

48- لا محتاجين مال ولا عاطلين صحيح عرفت ان الدنيا مش بخير.

49- لحد ما وقعت فكمين وكشفنى جهاز الخاينين , اتنفخت واهلى حطو راسهم فالطين .

50- والنهاية حكم اعدام ربنا يسامحنى وينتقم من كل الظالمين .

على فكرة انا مش بدافع عن الخيانة بس لازم يكون المبدا فالحساب واحد متكافئى

وهسال سؤال هل خيانة الوطن حاجة وخيانة الشعب من قائدهم داخل الوطن حاجة تانية ؟

أعتقد ان خيانة الامانة تستحق نفس عقاب اى جاسوس .

وختاما أحذروا عصر الجواسيس قادم لا محاله للاسباب السابقة واتحدى من يستطيع

ان بمنع انسان مقهور فى وطنه , ان يحمى وطن لم يحترمه.

كلكم راع وكلكم مسئول عن رعيته، فالإمام راع ومسئول عن رعيته، والرجل راع في أهل بيته ومسئول عن رعتيه، والمرأة راعية في بيت زوجها ومسئولة عن رعيتها، والخادم راع في مال سيده ومسئول عن رعيته، وكلكم راع ومسئول عن رعيته

ارجو التعليق من كل من يقرأ هذا الموضوع

[herohero]

هي فعلا كلام واقعي وحقيقي غياب العدالة الاجتماعية

هي من تجعل الانسان يرمي بنفسه في اي طريق

وهذا غير مبرر للخيانة

[om marawan]

معلش كل الاسباب اللى حضرتك حطتها ممكن نضيف عليهم خمسين سبب تانيين ومش هيبرروا الخيانة

عارف حضرتك السبب رقم 16 بتاع انه اشتغل حارس امن ده

انا شفته فى نموذج استضافه ابراهيم حجازى فى دائرة الضوء

بس هو بقا اشتغل مش بس معاه شهادة

لأ

ده اتخرج الاول على دفعته وماتعينش

فاخد الماجيستير ومن بعده الدكتورااة

وطبعا لانه زوج وأب فاضطر يشتغل فى شركة امن

ولان الشركة فى القاهرة وبيته فى المنوفيه بقا يبات فى الشركة عشان يوفر المواصلات ويرجع بيته خميس وجمعة

ومع ذلك هو انسان فيه رضا اضعااااااااف اضعاااااف ما فى قلبي او قلب ناس كتير معاها اضعاف ماعنده ويمكن مليونيرات

فيه ايمان

ايمــــــــان بانه مطلوب منه السعي وعلى ربه سبحانه وتعالى الرزق

لا شفته بيتحسبن ولا بيشتكي

هو كل اللى بيعمله بيطلب بكل تهذيب " حقه "

جتى لما سأله ابراهيم حجازى حد من الدفعات اللى بعدك اتعين

قال له فيه طبعا وكلهم اساتذتى

انا مش باقول كل ده عشان حد يقولى وهو ده الصح وده الطبيعي انه حقه يضيع كده

انا باقول كده عشان اقول ان فيه ناس لسه عارفة ان لها رب

تسعى لكل شىء وبكل عزم واجتهاد لكنها مش هتفكر ابدا تكون خاينة

ومش محتاج اضيف انه معروف كمان نهاية الخيانة

والحقيقة انا ماشفتش خاين لبلده الا وكان قبلها خاين لاهله وامه وابوه

انسان فكر فى مصلحته ونسي مصالح ناس كتير واحلامهم وحياتهم