اشعار احمد فؤاد نجم لاحداث الاسكندريه

[المهندسه]

اشعار احمد فؤاد نجم و احداث الإسكندرية

ينصر دينك يا بطل قتلت ناس عُزًّل كتير

ستات، شيوخ وكمان عيال ازحت عنا خطر كبير

دي ناس بتقول الله محبه والمحبه دي شئ خطير

إقتل بطرس وإقتل مينا اللي إخواتهم ماتوا في سيناء

واللي ولادهم رقصوا فـي فرحك واللي فـي ميّتم بيعزّينا

إقتل ماري وطنط تريزا ،دول ناس مافيهومشي ولا ميزه

دايمًا كده يبتسموا في وشك ويقولوا اهلاً خطوه عزيزه

وإقتل برضه عمّك حنا في اي خناقه بيحوش عنّّا

غاوي يصّلح بين الناس ولا يمكن يوّرد على جنّه

وإقتل سامي ناجي نجيب اصل الإسم صراحه مريب

يمكن يطلع واحد منهم او داقق على إيده صليب

ولا اقولك...إضرب شبرا والكيت كات وميدان الاوبرا

فجر واحده في كل مكان خلّي جيرانهم يصبحوا عبر

لينا رب إسمه الكريم وها يجي يوم تعرض عليه

تقف امامه و يسأل الشخص ده عملك إيه؟

بأي ذنب تقتله وفين ومين وإزاي وليه؟

إبقى قول لي يا بطل ها ترد يومها وتقول إيه؟

احمد فؤاد نجم

تم تعديل 5 يناير 2011 بواسطة المهندسه

[akramgroup]

فعلا قصيدة جميلة جدا وجايه فى وقتها

وعلى قد ماهى بسيطة وصغيرة انما فيها الشفى

اختيار موفق

[om marawan]

جميلة ياباشمهندسة

انا بصراحة تخيلت هاقراها هالاقيه زى باقى الكتاب متفرغ للهجوم على النظام

لكن الحقيقة لقيتها احلى مما توقعت

فيها الحزن والاستنكار ببساطة وعفوية

أشكرك على النقل

[م تيمور المراغي]

تسلم الايادي يا هندسة

[محمد عبدالعزيز]

من باب العلم بالشئ ليس أكثر

انتشرت فى الفترات الأخيرة أشعار منسوبة لأحمد فؤاد نجم, وهى غير ذلك, وده واضح من مستوى القصيدة وقصائد أخرى منشورة على مواقع كتير ومنهم المحاورات.

وعلى فكرة الراجل مش معترض على ده, وأنا سمعته بودانى فى حوار تليفزيونى, قال إنه عارف بالموضوع ده ومش زعلان عشان هو بيعتبر اللى بيعمل كده بيتحامى فيه.

وقال ساعتها إن دى زهور بتتفتح وهو سعيد إن الشباب دول بيتحاموا فى اسمه, رغم إنه مش هو اللى كتب القصائد دى.

وده جزء من حوار لقيته منشور على الإنترنت بخصوص الجزئية دى:

اعتاد كثيرون منا، في الأشهر الماضية، أن يستقبلوا على بريدهم الإلكتروني قصائد منسوبة إلى نجم، عادة ما تحمل عنوان «أحدث قصائد الفاجومي». محاولات هجينة تستعير - أو تحاول استعارة - أسلوبه، وتوجه نقداً شديداً مقذعاً بلغة يشوبها التقذيع، إلى رموز الحكم المصري.

موقف الفاجومي يبدو أشد غرابة من الظاهرة نفسها: إنّه ببساطة غير مهتمّ بالتبرّؤ من تلك القصائد أو نفي نسبتها إليه: «إنّهم يحتمون بي. لا ضرر. المهم أن يتجرّأوا على الأصنام التي تحكمنا». وحين يتدخل محمد هاشم ناشر «ميريت» معترضاً، ويلفت إلى سوء مستوى تلك القصائد في معظم الأحيان. يهز نجم رأسه كمن سمع هذا الرأي من قبل: «صافيناز قالت لي أن تلك القصائد لا بد من أن تحتوي حداً أدنى من الشعر على الأقل، لكني أجبتها: «دعوهم يستخبوا فيّا، وماله؟».

صافيناز هي صافيناز كاظم الكاتبة وزوجته السابقة وأمّ ابنته نوارة.

يستطرد نجم: «من يعلم؟ ربما خرج من بين هؤلاء شاعر كبير!».

نص الحوار بالكامل: الرابط الخاص بي

آسف للخروج عن الموضوع, لكنها معلومة حبيت أشارك بها كل من يحبون أشعار الفاجومى

[المهندسه]

شكرا يا اكرم و ام مروان و زميلى اركيتكت على مروركم الكريم

استاذ محمد شكرا على الايضاح و لكن بخصوص هذه القصيده لو يورد اى تكذيب من شاعرنا الكبير

و انا لم اتلاقاها على الايميل و لكنها منتشره على الفيس بوك

واوعدكم اذا عثرت على تكذيب بخصوصها سأنقله لكم بأمانه امام الله.

[محمد عبدالعزيز]

مفيش داعى للبحث عن تكذيب يا باشمهندسة, لأن زى ما ورد فى الحوار مع الفاجومى إنه بيعتبر اللى بينسب قصيدة من النوعية دى ليه بيتحامى فيه, وهو شخصياً مش متضايق من كده ومش بيكذب ولا يتبرأ منهم, أنا أوردت المعلومة من باب العلم بالشئ ليس أكثر زى ما ذكرت فى البداية.

أنا آسف مرة تانية للخروج عن الموضوع.

[جسار]

قول يا عم نجم قول ..

دور ياكلام على كيفك دور

خلى بلدنا تعوم فى النور

ترمى الكلمة فى بطن الضلمة

تحبل سلمى وتولد نور

تكشف عيبنا ويلهلبنا

لسعه بلسعه

نهب نثور

الراجل ده كل ما الواحد يقول ده خلاص شطب وفاضل عليه تكه واحدة ويودع ، تقوم تلاقيه صحى وقام

وقاوم مرضه ويأسه ويرزع القصيدة اللى هي ، وما تعرفش الموهوب موهوب ، قوامك فتل الكلام

وغزله وضفره ونسجه وطلعت حتة قماش تحفة

أول مرة سمعت نجم والشيخ امام كنت فى اعدادى هندسة 74 ولقيت مدرج الساوى فى قسم كهرباء

مليان بشر يعدوا الالفين ، وطبعا انا ما اعرفش حاجة فى أى حاجة ولسه جاى من طنطا طازه

وقعدت وسط الواقفين و افتكرتها حفلة غنائية ، وعندما بدأ الشيخ امام فى الغناء وسمعت

كل الموجودين بيرددوا وراه الصراحة شعر رأسى وقف ، وعندما وصل للختام وغنى اغنية جيفارا

مات تقريبا كده كان ناقص نجيب المطافى تطفى الحرارة الملتهبة الخارجة من أفواه الشباب

وهم يرددون كلمات نجم ، رحم الله الشيخ أمام تلميذ الشيخ زكريا احمد ، و أمد الله فى عمر نجم

لكى يهون علينا الايام المرة التى نتجرعها ...