عسكرى المرور المصرى

[Cleo]

كذا مرة أبقى سايقة عربيتى و ماشية فى الشارع.. أنا أخر عربية فى الشارع... مفيش حد ورايا...

مفيش حد فى كمى....

إيدى أهى... :huh:

و أول لما أجى أعدى التقاطع العسكرى يقفل عليا الإشارة..!! مع إنه لو صبر لحد ما أنا أعدى (و أنا بسوق بسرعة مش بطيئة) أنا هاعدى، و هو هايقفل الإشارة برضه بس على الاتجاه الفاضى..

أول مرة قلت بيستظرف...

تانى يوم... قلت لأ.... دى مقصودة...

قعدت أفكر... قلت أكيد و هم بيدربوهم قالولهم حاجة نظام "و تروح قافل الإشارة على اللى جاى من الاتجاه ده"... فترسخ فى ذهنه إنه لازم يقفل الإشارة على حد.. ما ينفعش يقفلها على شارع فاضى.. يقوم يستنى أول ما حد يكون جاى عشان يقفل فى وشه الإشارة..!!

و استغربت جدا من الفكرة... معقول فيه بشر وصل به جمود الفكر و عدم المرونة للدرجة دى؟؟!!!!!!

لا عجب إن المرور فى مصر أصبح من المعالم السياحية..!!

[الأفوكاتو]

الأخت كليو قالت؛

لا عجب إن المرور فى مصر أصبح من المعالم السياحية

لعلك يا أختاه تقصدين القول :

لا عجب إن المرور فى مصرأصبح من المعالم " المنــــفرة " للسياحة!!!

[Cleo]

الأخت كليو قالت؛

لا عجب إن المرور فى مصر أصبح من المعالم السياحية

لعلك يا أختاه تقصدين القول :

لا عجب إن المرور فى مصرأصبح من المعالم " المنــــفرة " للسياحة!!!

أقصد إن الناس بييجوا من بره يقولوا إحنا سمعنا إن المرور فى مصر وحش أوى....

بس ماكناش متخيلين إنه وحش للدرجة دى.....!!!!!!

:huh:

[الأفوكاتو]

منظر عساكر المرور, الذين هم أصلا من جنود الأمن المركزى, مُنفر جدا, و لا يوجد أسوأ منه فى أى دولة درجة عشرين.

فزراير الجاكتة مفتوحة أو مقطوعة, و تحت الجاكتة نرى قمصان بألوان منفرة, و بعضها بياقات ممزقة.

و البنطلونات ليست مقيفة, فأحيانا تكون مقاس كبير, و ساعات , يكاد أن ينحشر فيها العسكرى بالعافية.مع وجود تمزقات فى كلا الجاكتة و البنطلون.

أما عن الأحذية, فهى ممزقة, و أحيانا يكون رباط الحذاء إما غير موجود, و إما بلون يخالف لون الحذاء الذى ذهب لونه على كل حال.

كل مرة أزور فيها مصر, العن أبو وزير الداخلية, و رئيس الجمهورية.

[kfaya]

مش عارف لية عندى فكرة مخيشة فى نافوخى ان أى أصلاح فى البلد دى لازم يبتدى الأول من المرور......

يعنى أعادة تخطيط و تلوين الأسفلت ( ايوة تلوين ) و الأهتمام بالسفلتة و تحديد الشوارع ذات الاتجاة الواحد و تركيب اشارات حمرا و برتقالى و خضراء زى باقى الدول الأفريقية ( مش هقول العربية ) .... رسالة ان هناك من يهتم بسلامتى ...

لو ضباط الشرطة والمستشارين و أعضاء مجلس الشعب و باقى فئات الكوسة دفعوا مخالفاتهم كاملة ...... دى رسالة ان مفيش محسوبية و مفيش حد هيدور على ضابط قريبة عشان يرح معاة ساعة التجديد ........

وهكذا .... المرور هو الأحتكاك اليومى بين المواطن و الدولة ...

ظبطنى فى المرور الأول ..... هى دى نقط البدء ....

[هيثم نافع]

منظر عساكر المرور, الذين هم  أصلا من جنود الأمن المركزى, مُنفر جدا, و لا يوجد أسوأ منه فى أى دولة درجة عشرين.

فزراير الجاكتة مفتوحة أو مقطوعة, و تحت الجاكتة نرى قمصان بألوان منفرة, و بعضها بياقات ممزقة.

و البنطلونات ليست مقيفة, فأحيانا تكون مقاس كبير, و ساعات , يكاد أن ينحشر فيها العسكرى بالعافية.مع وجود تمزقات فى كلا الجاكتة و البنطلون.

أما عن الأحذية, فهى ممزقة, و  أحيانا يكون رباط الحذاء إما غير موجود, و إما بلون يخالف لون الحذاء الذى ذهب لونه على كل حال.

يا عم محمود و هُمَّا رايحين يعملو أيه ؟؟

دول ناس غلابة و معظمهم أُميين !!!

[guivara]

بالإضافة إلى الشكل الخارجي و الإساءة لشكل الشارع المصري هناك وضعهم هم كفئة واضح انها في مقدمة صفوف الفئات المقهورة تعليميا و إقتصاديا و.....

مرة أوقفني أحد هؤلاء العساكر, ظننت أن هناك مخالفة إقترفتها إلى أن إقترب من الشباك و همس لي محرجا أنه يطلب شىء يفطر به ! نعم تسول ..مباشرة..

و ظننت حينئذ انه موقف فردي.. حتى حدث شئ مشابه أوقفني عسكري أخر منذ شهر و نفس السيناريو.. إلا أن هذه المرة طلب شىء للغذاء!!..

مؤلم حقا..

[Abouhemeed]

حالة المرور هي إنعكاس لحالة الشعب نظاميا و فكريا و إقتصاديا و أخلاقيا ... إلخ

إذا أردت أن تعرف حال شعب فأنظر كيف يمشون في طرقاتهم و يتعاملون في أسواقهم ...

:huh:

[afiona]

يتم إختيار عساكر المرور كالآتى:

بعد فاصل من الشتائم المنتقاة من الصول أو ضابط الصف فى الوحدة تبعا للروتين اليومى يأمر من يأكل بإيده اليمين أن يجلس فى الركن اليمين واللى بيأكل بإيده الشمال يترزع على الشمال....اللى بيفضل فى النص لأنه مايعرفش شماله من يمينه (أو عمره ما أكل قبل كده) يتم إختياره لتنظيم مرور عاصمتنا الغراء....

على فكره، عسكرى المرور بياخد 15 جنيه فى الشهر بعد لما كانوا بيقبضوا 6 جنيه....غير المنح والعلاوات و retirement plans كويسة..يعنى بصراحة صعب أن ننتقد فرد لعدم جدواه للمجتمع بينما المجتمع غير مجدى له.... أنا لو مكانه ولا يهمنى أى حاجة...تضرب تقلب :huh: ....

[White heart]

العيب مش فى عسكري المرور ..... لأنه بصراحة و بكل أسف - وجوده مثل عدمة!

العيب فى حاجة اسمها "حد أقصى" .... طالما لم نحترم الحد الأقصى الذى كان مخطط له منذ البداية فى قدرة إستيعاب أى مدينة، و لم نتشدد بإقامة أى "كردونات" سواء كانت طبيعية (و هى حالات نادرة) - أو صناعية كالطرق الدائرية Ring أو حزام أخضر كثيف، مع إحترام من قبل وضع قوانين ((( صارمة ))) بإرتفاعات محددة و موحدة لمعظم البنايات فى أى مدينة، فلا عجب من تهاوي و تدني مستويات الخدمات المرفقية الرئيسية، بداية من جمع القمامة، و حتى المرور، و بالتالي ينعكس هذا على سلوكيات الشعب و القائمين على خدمته سويا......

عسكري المرور ما هو الا "سنة" فى ترس من ضمن الوف التروس، لماكينة ضخمة غاية فى التعقيد، تحتاج ان نحدد لها مسبقا المهمة الموكلة اليها، و نلتزم بأدائها تلك المهمة فقط - لكن اذا ما قمنا كل عدة شهور بإضافة مهمة جديدة مطلوب أن تؤديها نفس تلك الماكينة، فلا عجب أن تنكسر تلك "السنة" - و من بعدها باقى "السنون"، ثم الترس كاملا .... و هلما جرا!!

الحل أبدا لن يكون بإضافة المزيد من الزيت، و الشحم، و "مروحة" قد تساعد على التبريد!!! الحل فى تحجيم و تحديد المهمة المنتظرة من تلك الماكينة، و الأهم صيانتها أول بأول .....أو إحلالها كلية، و إستبدالها بأخرى أقوى و أحدث، (و هذا ما لا طاقه لنا به ) يعني - هذه وجهة نظري

[lالمطحون]

صح يا وايتهارت الحل فى عاصمه جديده ومدن جديده فعلا مش ترتيق للتمزق لكن معلش الحكومه والريس طول مهما مش بيمشوا مع الشعب والمرور عندهم ميه ميه عمرهم ماهيفكروا فى حاجه زى كده احنا مش مبسوطين يولع الشعب والناس وبعدين دى مصلحه ليهم علشان جباة المخالفات والركن فى الممنوع وبمخافه مع انه مفيش مسموح اصلا شفتوا بقه ان استمرار الحال ده لمصلحة الحكومه الرشيده وريسنا الحبيب يسلم لنا ضهره

[Cleo]

يا جماعة الموضوع مش موضوع أزمة المرور فى البلد...

الموضوع موضوع إن المرور متروك فى أيدى ناس إما أنهم عاجزين عن إجراء عمليات عقلية بسيطة (زى إنه يستنى مثلا لما أعدى و يقفل الإشارة على الشارع الفاضى).. أو أنه متملكه الرعب من أمين الشرطة أو الظابط اللى واقف معاه و مش قادر "يعصى أوامرهم" و يقوم بنفس الإجراء...!!!

لو الناس دى فعلا عاجزة عن التفكير... يبقى إزاى متروك لهم أمر "إدارة" الشارع...!!!

[White heart]

Cleo كتبت:

لو الناس دى فعلا عاجزة عن التفكير... يبقى إزاى متروك لهم أمر "إدارة" الشارع...!!!

من هذه الناحيه انتِ محقة ... لكن بالله عليكِ انظري لتلك الصور، ثم قولي الحق - هل يمكن إطلاق كلمة "شارع" عليها - و من هو من يستطيع أن يطبق أى نظام فى مثل هكذا ظروف، و ان إستطاع يوم - أو يومين (عن طريق ما يسمى حملات) فهل سيستطيع فى كل شوارع العاصمة (وليس الجمهورية) - و فى باقي أيام الشهر، و ليس العام؟؟!!

[White heart]

الأفوكاتو كتب:

منظر عساكر المرور, الذين هم أصلا من جنود الأمن المركزى, مُنفر جدا, و لا يوجد أسوأ منه فى أى دولة درجة عشرين.

فعلا .. لكن أعتقد ان هذا يعتمد على المكان المعين على خدمته .. (يعني نظرية إكنس وخبي تحت السجادة! non:: )

ماذا ننتظر من عسكري مرور لا حول له و لا قوة أن يفعل حيال "مولد" - و ليس شارع؟؟!!!

[amir]

حكمه قالها اجدادنا

من خرج من داره اتقل مقداره!

[الأفوكاتو]

كلمة فى أذن الأخ نافع ردا على قوله:

يا عم محمود و هُمَّا رايحين يعملو أيه ؟؟

دول ناس غلابة و معظمهم أُميين !!!

هل قرأت كلماتى فى آخر سطر؟

[KWA]

بسم الله الرحمن الرحيم

السلام عليكم ورحمة الله وبركاته

المرور في مصر مش مشكله عسكري مرور و لا اداره المرور فقط ...جزء كبير من مشكله المرور في التزام السائق مهما كان ميكروباس ..ملاكي..تاكسي..اتوبيس

استعمال الفهلوه و قياده السياره و محاوله المرور بالدراع و كسر الأشارات و يركن العربيه صف تاني و ثالث...ماشي في الطريق و العربيه اللي جانبك سواقها عمال يضرب كلاكس علي الفاضي و المليان رغم الطريق فاضي ....سواق ميكروباص سايق علي الشمال مره واحده حدف علي اليمين علشان زبون شاورله ...لفته ممنوع الدخول ....او طريق واحد....تلاقي طوابير من العربيات داخله و لو العسكري اتكلم ..سائق السياره يقوله ...بس يا حمار و لو كان امين شرطه....تمنه خمسين قرش او جنيه علي الأكثر... و يغلق الدفتر

...مرور بعد الساعه 11 ليلا سداح مداح كل الطرق مفتوحه و انت و فهلوتك لا اشاره و لا عسكري و لا التزام....دي بعض الصور من المرور في الشارع المصري ..الجزء الأكبر من المشكله تقع علي سائق السياره ....و التزامه و اسلوبه في القياده...و الله حتي لو انشأنا عاصمه جديده هيكون نفس السناريو

طالما نحن لم نغير من انفسنا...

[ابو يوسف]

تحدثنا عن المظهر وعن العقلية

و لم نتحدث عن الفساد و البلطجة و السرقة بالاكراه !!!

يوقفك أمين الشرطة .. و يتلككلك ..

ويهددك بالمخالفات لا أول لها و لا آخر ( ممكن توصل لـ 1000 جنيه مرة واحدة ) و بعد ما دمك يهرب ... يجى الفرج و تلاقيه بيقولك " فتح مخك "

قدامك 4 حلول :

الاول انك تفتح مخك .. 10 جنيه أو 20 جنيه .. اللى يطلع من زمتك .. و الحل ده أسلمهم ..

التانى : تنشف دماغك .. و تخش فى دوامة سحب الرخصة و الغرامات و النيابة وح تدفع ح تدفع !!! غير البهدلة و ضياع الوقت

التالت : انك تستنجد بالظابط .. (أنصحك ألا تفعل) لأن الظابط بياخد تلات ارباع الحصة و الربع يوزع على الامناء و الفتات للعساكر .. و اهى سبوبة و مصلحة و خير جاى للجميع !! و ربنا ما يجعلنا قطاعين ارزاق :D

الرابع : تكلم فلان باشا أو علان بيه . من أصحاب المناصب العالية .. فتنتهى المشكلة فى لحظة مع اعتذارمن الامين و الظابط على ضياع وقت سعادتك و يلومونك لأنك أزعجت فلان باشا !!!