احنا بخير

[لماضة مصرية جدا]

السلام عليكم و رحمة الله و بركاته

م الآخر كدهون انا هحط كل اللي في نفسي

ممكن يا جماعة لمدة أسبوع واحد بس نحاول نتغلب علي موجة الحزن و اليأس و الانسحاب اللي فعلا حاساها اتمكنت من روحنا

انا مصدقة ان المنتدي هنا ده الوطن اللي بحاول اعوض بيه الغياب عن الحضن الحقيقي

حقيقي ان احنا بنمر بظروف صعبة

لكن انتو مش واخدين بالكم من حاجة

احنا مع بعض

بنطبطب علي بعض

طب ليه كل طاقتنا دي منحولهاش طاقة بناء

خلينا نتبت في حاجات جوانا حلوة

هطلب منكم....الله يكرمكم لمدة اسبوع..

طب بلاش خلوه 3 ايام....

طب بلاش خلوه يوم و نص.....

عايزين نتكلم في حاجات ترفع معنوياتنا

تبني إيماننا بالخير لسه موجود

تقوينا....و تعلينا

حتي لو فيه خبر منيل و مزفت من مصر...معلشي في اللفظ.....حاولوا حاولوا من فضلكم نعيد قراءته بزاوية تانية

و مش معني كده اني بقلل من اي مصيبة حصلت....لكن منسبشي الحزن يجرنا لدوامة نشوف بيها كل حاجة باللون الغامق

ممكن من فضلكم و احنا بنطرح مواضيعنا....منتخانقشي....و لا نتحمق...و لا نتعصب

ممكن احسن انا خلاص

قربت اقول جاااااااي

فيه واحد رافع ايده و بيقولي يا بنتي مش عاجبك الحال عادي يعني متخشيش المنتدي

و طبعا ده الطالب المحروم من اعمال السنة للعام الدراسي 2011- 2012(وش البت ايمي غانم و هي طالعة في فيلم عسل اسود و بتزعق و بتقول مين طلعني من الكيلاس)

معاكو حق.....بس بقيتوا حتة مني....و الحتة دي يعز عليا اسيبها يشدها الحزن لتحت

و ده مش معناه ابدا ان محدش فينا موجوع من الي حصل و لا اللي بيحصل

بس خلونا نشد بعض لطاقة نور

مافيش حاجة تغلب الوجع و تجيبه تثبيت اكتاف ع الارض غير لما نشمر و نقف علي رجلينا تاني

الغربة مش اني اسافر في مكان تاني

الغربة اني و انا في المكان التاني يفضل مشيول جويا الوجع اللي فكرت اسافر عشان انساه

الغربة اني افتح بيبان قلبي ع الوجع و اسيبه يستعمرني...و يموت روحي ببطء

تعالوا نقوي بعض

تعالوا....نعاند الحزن

و هنغلبه

بس مش هقدر اعملها لوحدي

عايزة اطمن ان احنا بخير

بس خلاص

ع جنب بقي

سامحوني...و اعتبروها يعني حبة فضفضة...و بحبكم كلكم

و كونوا دايما معاندين للحزن

[The Sun]

ان شاء الله الرد يكون بشكل عملى

تحياتى لحضرتك وأشكرك على فكرة الموضوع

[المهندسه]

والله يا لماضه انتى حطيتى ايدك على الجرح الجوانا فعلا...احنا كلنا جوانا حزن وجرح

وكلنا معذورين ...لان الحصل كان مصيبه على كل مصرى

تعالوا نحول حزننا لطاقه ايجابيه ..

تعالوا نحب بعض اكتر و نخاف على بعض اكتر و اكتر ونتحد اكتر و اكتر واكتر

انا ما اقدرش اعيش من غير الاخر و الاخر ما يقدرش يعيش من غيرى

احنا جزء واحد ...احنا وجهين لعمله واحده و كيان واحد هو مصر

مصر ماتنفعش من غيرى او من غيرك

وعلشان بنحبها لازم نقرب اكتر من بعض و نتفق

نتفق ازاى نحميها علشان نحمى نفسنا

احنا طول عمرنا بنحب بعض و البيوجعك بيوجعنى وهو ده ال مش عاوزه عدونا

عدوى هو عدوك اوعى تسيبه يوقع بينى و بينك وخاليك عارف انى بحبك

وخاليك عارف ان مصر ماتنفعش من غيرى او من غيرك.

[م تيمور المراغي]

تعالوا نقوي بعض

تعالوا....نعاند الحزن

و هنغلبه

بس مش هقدر اعملها لوحدي

عايزة اطمن ان احنا بخير

طيب اول قطره من الغيث ,,

الشهيد سيد بلال

رحمت الله عليه

ان شاء الله انه في عالم البرزخ الآن عايش وحي ,,

لان الشهداء يقينا احياء ,,

عند ربهم يرزقون

وفرحين بما اتاهم الله من فضله

عن نفسي حستبدل الحزن بالفرحه ,,

لانه الان في راحة ونعيم ما بعده نعيم

ان شاء الله ,,,

[raouf]

وبما انى اصبحت من اكثر المتشائمين هنا وشكلى بقيت متخصص كوارث

مش هاكتب مواضيع تزعل تانى

وهارجع لموضوع النكت والضحك والمواضيع الاقتصادية زى الاول

:P:P:P:P:P:P:P:P:P:P:P

[moory]

السلام عليكم،

هوا اليوم و نص خلصو ولا لسه؟!!:blink:

ااه صحيح ما التاريخ فووق اهوو، لسه لسسه

و حتى لو خلصو، احنا نقدر يا لماضة اننا نشووف الايجيابيات من حوالنا حتى في الحوادث و القضايا الهبااااب الي بتحصل في حوالينا و في بلدنا الحبيبة بالذات،

وانت فعلا حطيت ايديك على نقطة مهمة جدا، و هيا و احنا هنا في الغربة الحاجات الي بتحصل في مصر بتأثر فينا بالظبط زي ما بتكوون، يعنى لو ايجابية بنفرح و نبقى سعيدين، و لو سلبية برده بنحزن و نزعل عليها، لأننا مهما بعدنا دايما بلدنا احب مكان لقلوبنا، حياتنا و ذكرياتنا و ناسنا و أهلنا..كل حاجة حلوة فعلا...

في حاجات سلبية و زي ما قلتي زفت و نيلة بتحصل في البلد؟ اكييد فييه و كتيير كمان،

واحنا زي ما قلتي انت نقدر نبص للموضوع من نظرة ايجابية، مش طبطبة أو نضحك على نفسنا، بالعكس، ده احنا عشان ايجابين و عايزين نوصل لحل مشترك مع بعض الحاجة او القضية دي بنبصلها من الناحية الايجابية، لأننا عمرنا ما هانوصل لحاجة لو احنا شايفين الدنيا سوودة و مافيهاش حاجة حلوة، مش هنعرف نفكر صح...

ومن الحاجات الايجابية الي ممكن نتكلم عنها فعلا، المشاركات الحلوة و الفعالة الي بتتعمل هنا في المنتدى اننا بنطرح القضية و نجيب قرارها، و بعدين نبتدي نفكر مع بعض اييه الي ممكن نعمله احنا، محاورتي المنتدى، في اننا نقدر نوصل لحل حتى لو كان الحل ده ممكن ما يطبقش، بس دي في حد ذاتها خطوة ايجابية و ايجابية جدا هنا في المنتدى الرائع ده، اننا نشارك بعض القضية و الرأي و الحوار المحترم الهادف للوصول لحل، و الي ممكن بعدها الي عندو القدرة في تفعيل النتائج الي بنوصلها مع بعض، تبقى حااجة هاايلة...

و المنتدى مليان أمثلة على كده كتييير، زي مثلا الخطوة المحترمة الايجابية جدا من الاستاذ The Sun في موضوعه اننا نوصل ازاي ممكن نساعد في حل الاحتقان بعد عملية التفجيير،

و كمان موضوعك انت الهايل ده، اننا نتشارك بالأفكاار و الموضوعات و الرؤية في المواضيع الحياتية حتى لو كانت موضوعات عادية

[Dreamwithme]

ياسلام عليكي يا لماضة لما بتعبري بكلامك الجميل عن اللي جوايا

بأحس أنك دخلتي جوايا وقريتي حاجات محدش شايفها وعبرتي عنها

بصي يا ستي أنا معاكي في معاندة الحزن ويلا نعمل ثورة علي السفينة بونتي hpc:!:

ثورة ايجابية عايزين نخللي الدنيا منورة شوية ......هفتح شباكين من هنا وأنت اجري افتحي شباكين هناك والشمس تملا المكان وتطرد الضلمة من قلوبنا :cardred:

لكن حابه بس أقول لك يالماضة أن فترات الحزن في حياة الانسان بيتعلم منها المهم متطولش

يعني بصراحة الفترة الماضية في المنتدي احترمت كتير صمت وسكون بعض الأعضاء احتراما للموقف والحزن

وفي مواضيع ومشاركات بصراحة لما كنت بأقرأها كنت باستغرب وأقول ياجماعة شوية هدوء ده الرسول صلي الله عليه وسلم قال :" من كان منكم يؤمن بالله واليوم الآخر فليقل خيرا أو ليصمت"

الصمت في أحيان كثيرة بيبقي فضيلة لا يقدر عليها الكثيرون إلا من رحم ربي :shutup:

وفي مواضيع أخري بأحس إن الناس خلصت كل الكلام ووضحت وجهة نظرها والطرف التاني مش مقتنع خلاص كده في وجهة نظري النقاش انتهي

مش لازم نخرج من النقاش مقتنعيين برأي واحد المهم أن كل واحد وضح وجهة نظره وكل واحد حر وربنا هيحاسبه علي رأيه وعمله لوحده

وبأحس أن نفسي أقول لهم حديث النبي صلي الله عليه وسلم:"أنا زعيم ببيت في ربض الجنة لمن ترك المراء وإن كان محقا"

أسفة يا لماضة إذا كنت خرجت عن موضوعك بس الأفكار جرت بعض وأنا يمكن باسكت كتير لكن لما باتفتح مابعرفش أسكت

أنا معاكي وأؤكد لك أننا بخير والأمور هتبقي أفضل hg):: وأنا مؤمنة دائما أن اليوم أجمل من الأمس وغدا سيكون أجمل من اليوم برحمة ربنا

لأن شخصيتنا في تطور مستمر حتي لو مررنا بفترات حزن وألم ....هذه الفترات تصقل بداخلنا أشياء تجعل من اليوم والغد أجمل وأجمل

أنا هأرفع معاكي شعار الايجابية بس مش أسبوع يا لماضة ولكن لمدي الحياة ......أنا شخصيا خدت القرار ده من فترة طويلة والحمد لله ربنا مقدرني عليه لغاية دلوقتي

أني أشوف الجمال في كل شئ لغاية ما أموت وربنا يعينني علي ذلك