أقسم بالله لو حرب .. ما كان حصل كده ... نزززززيف الأسفلت

[se_ Elsyed]

فعلاً .. يحدث في مصر فقط ..

مصر التي كانت في خاطري والأن هي بدون رئيس

يومياً تطالعنا الصحف بهذا العدد من الضحايا ... مثلما حدث يوم أعتداء كنيسة القديسين وراح ضحية اتوبيس مدرسة 15 طالبة ولا حس ولا خبر

اليوم 25 قتيل في ميكروباص ... والجاني ... طبعاً بقيتوا عارفينه ... عربية نقل ركبت على الميكروباص وقتلت كل العدد ده

مصرع 25 وإصابة 24 فى حادثى بطريقى الصالحية وبلبيس بالشرقيةالثلاثاء، 11 يناير 2011 - 11:34

اللواء حسين أبو شناق مدير أمن الشرقية الشرقية - إيمان مهنا

لقى 25 شخصاً مصرعهم وأصيب 24 آخرون فى حادثى تصادم وقعا فجر اليوم، الثلاثاء، على طريقى القاهرة بلبيس الصحراوى وفاقوس الصالحية، بسبب الشبورة الكثيفة.

وتبين أن سيارة نقل اصطدمت بأخرى ميكروباص محملة بالركاب على طريق القاهرة بلبيس، فى الساعات الأولى من صباح اليوم الثلاثاء.

تلقى اللواء حسين أبو شناق، مدير أمن الشرقية، بلاغا بالحادث، وتم نقل الجثث والمصابين إلى مستشفى بلبيس العام ومستشفى الزوامل بمركز بلبيس.

وكشفت المعلومات الأولية أن من بين الضحايا "عبد الوهاب صبحى" (35 سنة)، و"شريف محمد عبد الجليل" (21 سنة)، و"محمد عبد الله" (21 سنة)، وشقيقه "عزت عبد الله" (27 سنة)، و"شحتة السيد"، و"سعيد على عبد الله".

فإذا كان الإنسان عدو نفسه وبيسرع في الشبوره ومش هامه حد ... فأين الشرطة من ذلك ولماذا لا تتواجد على الطرقات في مثل هذه الأيام ؟

ولا دول زي المطافي بيتحركوا بعد ما تحصل الحريقة ؟

[المهندسه]

والله احنا الشعب المصرى واجب علينا الرحمه احياء و اموات

لاننا كده كده ميتين و مدفونين بالحياه

مش عارفه ليه المواطن المصرى سعره رخيص اوى كده ليه على مصر

"و بدل انتى كارهانه بتخلفينا ليه"

[أسد]

المصريين بيرخصوا نفسهم باستهتارهم ورعونتهم وفوضويتهم

لو حطيت عسكري كل مسافة 500 متر حتلاقي الناس بتستهبل وتخالف في المسافة اللي بينهم

مش هم دول سواقين النقل اللي كانوا عاملين إضرابات واعتصامات الاسابيع اللي فاتت علشان تطبيق القانون عليهم

ويخرج علينا الناس تقول العربيات عليها اقساط .. والبعد الاجتماعي .. وتأجيل تطبيق القانون

إللي بيحصل ده إجرام

حاجة تانية ..

عايزين نغير لهجتنا شوية ..

مرة نتكلم عن سلبياتنا إحنا .. وفوضويتنا إحنا ..

مش كل حاجة نقول الرئيس الرئيس ..

الرئيس مش دريان بالدنيا ..

أنا مش بادافع عنه ..

لكن محتاجين نتكلم بواقعية شوية ..

الناس في مصر أدمنت الفوضى .. بل واحترفتها بشكل غريب ..

الناس في مصر استهانت بأرواحها بشكل عجيب .. ورخصت نفسها بهذا الاستهتار الذي لا يوجد له مثيل أبداً ..

[se_ Elsyed]

إنت تاني يا ابو أدهم ؟

يا حبيب قلبي .... القوانين معمولة عشان تمنع وقوع الجرائم أو التجاوزات في المقام الأول .. ثُم تطبق على المتجاوزين بعد ذلك ...

لكن لما أعمل قانون مرور ومثلثات وشنط طبية وكلام فاضي .. واناممممممممممممممممممممم .... وألم فلوس وبس .... يبقى كده إنت في جمهورية الموز العُظمى ...

ولو الشرطة أو امن الطرق - والعياذ بالله لو موجود يعني .- نزل في المناطق اللي فيها شبورة وهي بالمناسبة ليست على الطرقات .... يبقى الأمور هاتهدا شويه

أما إذا تركنا الناس لغوغائيتهم ... فسيحدث مثل هذا يومياً وأكتر ...

[شرف الدين]

ويا ترى دول هيتصرف لهم تعويض كام

وهل يا ترى حد من برامج التوك شو هيسأل فيهم ولا لأ ؟

وهل هنلاقي قناة مثلا تجيب أسماءهم وتقول أنهم دايما في القلب

ولا دول من الشعب المنسي

[capitshino]

ويا ترى دول هيتصرف لهم تعويض كام

وهل يا ترى حد من برامج التوك شو هيسأل فيهم ولا لأ ؟

وهل هنلاقي قناة مثلا تجيب أسماءهم وتقول أنهم دايما في القلب

ولا دول من الشعب المنسي

هيدفعو لمين ولا لمين يا استاذ شرف الدين ولا هيجيبو مين ولا مين فى برامج التوك شو

الناس كل يوم بتموت لا الطرق ... وزى ما حضرتك قلت .. دول من الشعب المنسى

[om marawan]

انا لله وانا اليه راجعون

لاحول ولا قوة الا بالله

حوادث الطرق فى مصر كارثة بكل المقاييس

استهتار من بعض السواقين ان ماكنش الاغلب بارواحهم وارواح الناس

بالفعل تعداد ضحايا حوادث الطرق فى مصر من الاعلى على مستوى العالم

ويجب الالتفات بقوة الى مايحدث

طيب يعنى لو قلنا ان الدولة تقدر تامن طرق السفر بحواجز من الجانبين منعا لان اى عربية نقل تظهر فجأة فى وسط الطريق

فنعمل ايه فى الطرق اللى زي بلبيس وغيرها اللى بالاساس بتعدى فى وسط المدينة او حتى على اطراف بعض المدن

فيه طرق كتير معروفة بطريق الموت

كان منهم طريق ابوحماد اللى اتعدل شوية مؤخرا واللى انا نفسي شفت عليه حادثة صعبة جدا

اكيد فيه تقصير من الحكومة لا نغفله

ويمكنها تطبيق عدة امور منها مثلا الدورية الراكبة يعنى مش بس وجود الرادار اللى الناس بتعامل معاه على انه عدوها !!!

ولذلك تظل السيطرة على جنون السائقين أمر صعب جداا

ولو قلنا نشدد العقوبات وغرامات المخالفات هنلاقى مليون صوت يعترض

مع ان ده فى اعتقادي امر مهم جداا

وهو عدم التهاون ابدا فى مخالفة السرعة تحديدا ويجب ان تصل الى سحب رخصة المخالف او رخصة السيارة

كما يجب التشديد على التفتيش على الرخص

حتى لا يخرج علينا المخالف مرة اخرى للطريق بدون رخصة من اساسه !!!

كلها محاولات يجب ان تكون تتزامن مع التوعية بمخاطر الطرق

هنا فى الكويت وعلى الرغم من ان البلد صغيرة جدا ومن ان مافيش هنا نقل ولا حاجة

الا انه نادرا ماتمشي على بعض الطرق يوميا تقريبا الا وتلاقى حادثة

صحيح معظمها الحمد لله مش حوادث خطيرة

بس ده مش نتيجة قانون وبس لكن نتيجة طبيعة الطرق مختلفة ولانه مافيش لا نقل ولا ميكروباصات الى جانب ان عدد الناس هنا لايقارن بمصر

ويسهل اكتر السيطرة على الامور

وعلى الرغم حتى من تشديد العقوبات ووجود الدورية المتنقلة وكاميرات السرعة الا انه يوجد العديد من المخالفين

رحم الله موتانا ورزق اهلهم الصبر

[جسار]

فى أحدى المرات كنت عائدا من شرم الشيخ وفاجئتنا السيول عند أبو زنيمة والمهم أننا أسرعنا وعبرنا

منطقة السيل ووجدنا بعدها نقطة المرور توقف أرتال المركبات وتسأل القدمين من الأتجاه العكسى عن وضع

الطريق وحدة السيل .... طيب ليه بقى أدارة المرور ما تطبقش نفس الاجراء فى حالة الشبورة وبالذات

على طرق الوجه البحرى ... ومش لازم يقفلوا الطريق كله بل يمكنهم السماح بمور عربة تلو عربة

مع وجود فاصل زمنى وليكن ثلاثة دقائق .. وبذلك تسمح بسيولة مؤقتة للمرور مع الحفاظ على مسافة آمنة

بين العربات وبعضها .

[ريمون]

هو فيه تسيب من الحكومه

بس فيه سلبيه برضوا من الشعب

يعنى الحكومه بقالها سنتين بتحاول تهكين المقطورات او تحويلها لتريلات

المقطوره هيه العربيه الاضافيه اللى بتتركب فى عربيه نقل تانيه

و بيبقى صعب التحكم فيها

و لما بتدخل فى حادثه بتبقى مصيبه (80% من حوادثها بتسبب حالات وفاه)

و حسب التقرير المرفق فالمقطورات السبب فى 40% من حالات الوفاه على الطرق رغم انها مسؤوله عن 13% فقط من الحوادث

لما الحكومه اتحركت لحل المشكله اصحاب المقطورات هاجوا و ماجوا رغم ان القانون ده بقالوا كذا سنه و الحكومه اديتهم فرصه لتظبيط اوضاعهم

السؤال هو ليه احنا سلبيين

احنا المفروض ندعم الحكومه فى قرار زى ده

او على الاقل نقدم اقتراحات ببدائل

لكل فيه لا مبالاه شعبيه لا مثيل لها

و الحكومه مش ناقصه وجع دماغ

فغالبا هيبطلوا القرار ده تحت ضغط اصحاب المقطورات

حد عنده اقتراح لتعديل القانون ده ؟

لو مكانش المفروض اننا نأيده

و بما اننى غير متخصص و معنديش اقتراحات فأنا بأيده

و ادى الخبر من مصراوى

http://www.masrawy.com/News/Egypt/Politics/2011/january/10/car_accidents.aspx

لجنة الصناعة بالشعب: 3500 حالة وفاة سنويا بسبب حوادث المقطورات

القاهرة - أ ش أ

أكد المهندس علاء فهمي، وزير النقل على أهمية تطبيق القانون الصادر عام 2008 بانهاء السماح بتسيير المقطورات بعد 31 أغسطس 2012 حفاظا على أرواح المواطنين موضحا أن المصانع المصرية قادرة على تحويل المقطورات إلى تريلات خلال المدة المحددة طبقا البروتوكول الموقع مع وزارة المالية والمصانع.

من جهته قال اللواء سراج زغلول، مساعد وزير الداخلية للشرطة المتخصصة، أن 80 % من حوادث المقطورات تسبب القتل، مشيرا، أمام لجنة الصناعة والطاقة بمجلس الشعب برئاسة السيد محمد أبوالعينين، إلى أن سيرالمقطورة خطر على الطريق نظرا لعدم تحكم السائق بها.

وقال المهندس عمرو عسل، رئيس هيئة التنمية الصناعية، أن عدد المقطورات بلغت حوالي نحو 34 ألف مقطورة منها 14 ألف لا تصلح للتعديل.

وكشفت مناقشات النواب عن خلافات وتباين فى الآراء حول إستمرار العمل بالمقطورات الحالية حفاظا على التنمية الاقتصادية وتحقيق معدل النمو المنتظر وهو 8 % ورفض البعض تسيير هذه المقطورات المسببة للحوادث على الطرق بنسبة 13 % ووفاة 40 % من عدد الوفيات البالغة 8000 حالة سنويا.

أما النائب رفعت الجميل فقد أعلن رفضه تحويل المقطورة إلى تريلا، مؤكدا أن هذه العملية من أخطر القرارات لأن حوادث التريلات أكثر خطورة من المقطورات، واقترح استيراد التريلات من الخارج لانها أقل تكلفة من التحويل ، موضحا أنه يوجد حوالى 14 الف مقطورة لا تصلح للتعديل من أجمالى 6ر34 الف مقطورة.

وحذر مجدي عباس، ممثل أصحاب المقطورات، من خطورة إلغاء المقطورات موضحا أنها ستتسبب في أزمة بالطرق والثقافة المرورية مطالبا بتحسين مستويات الطرق بدلا من إنفاق حوالي 15 مليار جنيه على التحويل فقط.

وأبدى أصحاب المقطورات غضبهم فى نهاية الاجتماع نظرا لعدم سماعهم فى حل المشكلة، وهددوا بالاضراب من جديد لانهاء تلك المشكلة.

تم تعديل 11 يناير 2011 بواسطة ريمون

[شرف الدين]

بسم الله الرحمن الرحيم

كلامك صحيح يا أخ ريمون في مسألة المقطورات

بس انت عارف ايه المشكلة أو ايه هيا غلطة الحكومة

المشكلة انك تسيب الأزمة تكبر تكبر وبعد كده عايز تحلها من غير ما تتعب

بمعنى ... من زمان جدا والعالم كله أوربا والدول المتقدمة وما لحقها من الدول التي تريد التقدم لغى نظام المقطورة واستبدلها بالتريلا

كنا احنا فين ساعتها - موضوع المقطورة ده مظهرش عندنا إلا من حوالي سنة

دي حاجة

الحاجة التانية

فاكر موضوع انفلونزا الطيور يا أخ ريمون

الناس برغم المشكلة كانت مستخسرة تدبح طيورها لأنها مش هتعرف تعوضها تاني... وأسعار اللحمة طبعا انت عارفها.

في موضوع المقطورة ... ايه الحل اللي الحكومة قدمته للناس وللسواقين عشان تخليهم يوافقو على فكرة التريلا

مينفعش أقول للسواق ... ستوب خلاص .. انت عربيتك متنفعش عشانها مقطورة ... لازم تشتري تريلا. والمقطورة بتاعتك ترميها في أقرب زبالة.

المفروض إني حاجة من اتنين

يا إما أوفر التريلا للسواق بسعر كويس = السعر اللي ممكن يبيع بيه المقطورة بتاعته

يا إما أساعد السواق إنه يحول المقطورة بتاعته لأي حاجة تانية يكسب منها...

بحيث أن السواق ميخسرش الجلد والسقط.

ممكن تقولي جملة الحكومة المشهورة ( هاجيب لكم منين )

هقولك اسأل كده... الفلوس اللي دفعها الأخ هشام طلعت مصطفى دية لسوزان تميم ... تفتكر كانت تساوي كام تريلا ؟

الفلوس اللي بتضيع علينا مقابل تصدير الغاز المدعوم لإسرائيل = كام تريلا

بلاش * برغم إني أهلاوي وبحب مانويل جوزيه جدا لكن تفتكر الفلوس اللي هياخدها مانويل جوزيه شهريا في عقده الجديد = كام تريلا.

وغيره كتير كتير كتير

تم تعديل 12 يناير 2011 بواسطة شرف الدين

[ريمون]

في موضوع المقطورة ... ايه الحل اللي الحكومة قدمته للناس وللسواقين عشان تخليهم يوافقو على فكرة التريلا

مينفعش أقول للسواق ... ستوب خلاص .. انت عربيتك متنفعش عشانها مقطورة ... لازم تشتري تريلا. والمقطورة بتاعتك ترميها في أقرب زبالة.

المفروض إني حاجة من اتنين

يا إما أوفر التريلا للسواق بسعر كويس = السعر اللي ممكن يبيع بيه المقطورة بتاعته

يا إما أساعد السواق إنه يحول المقطورة بتاعته لأي حاجة تانية يكسب منها...

بحيث أن السواق ميخسرش الجلد والسقط.

اتفق معاك تماما

المفروض الشعب يضغط على الحكومه علشان تمنع المقطورات

و المفروض اصحاب المقطورات و النقابه الممثله ليهم و الاحزاب و منظمات المجتمع المدنى تضغط على الحكومه فى انها توفر البديل

بالمناسبه الحكومه عرضت 100 الف جنيه اعفاء ضريبى للى هيحول مقطورته لتريلا

[فركيكو]

و عندك كمان 33 واحد النهاردة فى كفر الشيخ

[se_ Elsyed]

أوقات كثيرة بإحس إني مجنون أو بأهرتل وعندي ضلالات وتخيلات غير حقيقية أو إن الأخبار دي لابسه طاقية الأخفا وماحدش حاسس بها

أمبارح كمان 11 قتيل في تصادم ميكروباص بسيارة نقل في محافظة الجيزة .... هو في إيه ؟

النيابة تناظر ١١ جثة فى حادث أطفيح وتأمر بضبط سائق النقل

كتب أشرف غيث ١٨/ ١/ ٢٠١١

أمر المستشار مجاهد على مجاهد، المحامى العام لنيابات جنوب الجيزة بدفن جثث الضحايا الـ١١، فى حادث تصادم بين سيارتين ميكروباص ونقل ثقيل بطريق (حلوان- أطفيح الزراعى)، مساء أمس الأول، وسرعة ضبط وإحضار سائق السيارة النقل الهارب، وانتدب لجنة من المرور للمعاينة، وبيان سبب الحادث، واستمعت النيابة لأقوال المصابين، وناظرت جثث الضحايا.

كان اللواء عابدين يوسف، مدير أمن حلوان، قد تلقى بلاغا من الأهالى مساء أمس الأول، بوقوع تصادم بين سيارتين أمام قرية الحى بطريق حلوان- أطفيح الزراعى ووفاة عدد من الركاب وإصابة آخرين، بالانتقال إلى مكان الحادث تبين حدوث تصادم بين كل من السيارة رقم (ق ك ج - ٧٦٧١) مصر ميكروباص، والسيارة رقم (ر ف د -٩٧١) نقل ثقيل، وتم نقل الضحايا والمصابين إلى مستشفيات الصف العام وأطفيح ومستشفى قصر العينى

[أسد]

خد دي كمان لسه طازه

تسببت الشبورة الكثيفة وسوء الأحوال الجوية صباح اليوم، الثلاثاء، فى انقلاب أتوبيس نقل عام رقم 336 شرق الدلتا على بعد 25 كيلو من عيون موسى باتجاه رأس سدر بجنوب سيناء.

أسفر الحادث عن إصابة 20 شخصا، وتم نقلهم إلى مستشفى رأس سدر عن طريق 10 سيارات إسعاف تحت رعاية د/ هانى محمد صبحى، مدير مرفق الإسعاف.

كما تم نقل حالة خطيرة لفتاة تدعى "وسام محمد عباس" (27 سنة) من مواليد دمياط إلى مستشفى السويس العام.

الشبورة هي السبب

أو سوء الأحوال الجوية

أو نظام المرور

أو نظام الدولة

أو أي حاجة ..

لكن نقول أن السائق لم يتخذ إحتياطه وهو يقود الأتوبيس في ظروف استثنائية .. وهي الشبورة ..

لكن تعمل إيه للشبورة لاشريرة .. إللي خلت الراجل سايق الأتوبيس .. وراحت شايلاه فجأة وقلبته ...

مش ممكن اللي بيحصل ده

[الغريب]

أبسط يا عم س س ، الريس سمع صوتك وأبدى أنزعاجه لحوادث الطرق ووزير النقل وعد أنه أن شاء الله سيتم وضع خطط واسترتيجية جديدة للطرق ، مبسوط يا عم شوفت سرعة الاستجابة

]«مبارك» يبدى انزعاجه من زيادة حوادث الطرق.. ويطلب خطة عاجلة لمواجهتها

علمت «المصرى اليوم» أن الرئيس مبارك أبدى انزعاجا شديدا، بسبب تزايد حوادث الطرق، واستمرار نزيف الدماء على الأسفلت. وقالت مصادر مسؤولة بوزارة النقل إن الرئيس مبارك أبدى انزعاجه للوزير علاء فهمى، مطالبا إياه بتنفيذ مخطط عام للحد من حوادث الطرق.

من جانبه، أعلن «فهمى» فى بيان صحفى أمس، أن وزارته بدأت فى وضع استراتيجية جديدة تقضى بإنشاء طرق وحارات للنقل الثقيل والشاحنات، وإضافة مسارات خاصة به على الطرق القائمة بإضافة حارة على الطريق ذاته أو طرق جانبية.

وأكد الوزير أن السياسة الجديدة بدأ تطبيقها بالفعل على الطريق الدائرى الإقليمى، وطريق القاهرة - السويس، كما سيتم تطبيقها على كل الطرق التى ستقام فى مصر خلال الفترة المقبلة. وأوضح «فهمى» أن المرحلة الأولى من خطة تطوير الطريق تبدأ من الدائرى حتى الروبيكى (الكيلو ٥٦)، تليها المرحلة الثانية حتى السويس، مشيرا إلى أن طريق السويس يعد أحد محاور القاهرة الرئيسية المؤدية إلى السويس والمنطقة الصناعية بشمال خليج السويس وميناء السخنة، والذى خلق تجمعات سكنية وصناعية وتجارية على جانبيه مثل (الشروق، وبدر، والأمل وغيرها)، الأمر الذى زاد من كثافة حركة السيارات والمركبات المختلفة على الطريق، ودعا الوزير إلى ضرورة تطويره لاستيعاب الحركة المرورية والحد من الحوادث.

[Om Zayd]

السلام عليكم و رحمة الله و بركاته

كنا على الدائري النهارده

دي يمكن تاني مرة بعد رجوعنا

صدقت و آمنت ان مصر محروسة

بجد

عدد الحوادث بطريقة السواقة اللي شفتها المفروض يكون اكثر من الواقع 100 مرة

اللي سايقين دول كلهم محتاجين إعادة تأهيل

ممكن قرد نعلمه يشغل العربية

لكن البني آدم مفروض انه بيتعلم "قيادة

الحل الوحيد يعملوا امتحان سواقة بجد

يدوا فترة انتقالية للي معاهم رخص سنة .. يتعلموا فيها سواقة على حق .. بعدين يمتحنوا تاني بجد .. و يدوهم فرصتين يمتحنوا ببلاش بعدها يدفعوا رسوم الامتحان

تعليم السواقة مش فهلوة و شطارة و ينفد من خرم ابرة و يلبّس اللي وراه في اللي قدامه و يخلع هو

تعليم السواقة مش ذوق و أخلاق

السواقة لازم تركز على الأمان و الانضباط

القيادة الآمنة

و يا ريت المسئول عن الرخص يكون هيئة جديدة مستقلة عن الداخلية تماما

يبعتوهم يتدربوا في دولة محترمة

و يدربوا مدربين يعلموا الناس السواقة الصح

و يخلوا دخول الامتحان برسوم غالية شوية .. عشان الواحد من دول ما يدخلش الامتحان غير و هم مستعد كويس عشان ما تروحش عليه الفلوس

ما ينفعش نسيب حاجة خطيرة زي دي رهن بذوق الناس و سلوكهم

لازم قانون صارم و عقوبات موجعة على الكل من أكبر راس لاصغر واحد في البلد

مافيش رخص من غير امتحان و نجاح

و امتحان صعب

بيركز على القيادة الآمنة

لأن دي أرواح ناس و مستقبل عائلات بيضيعوا

يا رب حد يتحرك و ينفذ الكلام ده