** مطلوب رايكم عاجل جدا **

[Ahmed Anwer]

السلام عليكم ،،،

الموضوع عارف إنه بسيط جدا بس معلهشي ساعدوني بأفكاركم بسرعة

إن شاء الله بكره مسافر لأوربا أول مرة ،،، هدف الرحلة الرئيسي

زيارة معرض في المانيا

و إن شاء الله

هقابل أصدقاء أعزاء جدا ،، مصريين مغتربين عرفتهم من منتديات متفرقة و قابلتهم في مصر

واحد أعزب عايش في المانيا و التاني رب أسرة و عايش في هولندا

عايز أجيبلهم هدايا بسيطة بس تكون ذات قيمة بالنسبة ليهم

و مش مكلفة أووي بالنسبة ليا ،،

ليا تجارب سابقة لما كنت بسافر لأخواتي في دبي

كنت باخدلهم معايا حلويات شرقية و تسالي مصرية لب و سوداني و حاجات كده

بس بسبب طول رحلة الطيران المرة دي و كمان إني مش هاقابلهم غير بعد اسبوع من الوصول

مش هينفع النوعية دي من الهدايا علي الأقل مش هتكون حلوة عشان مش طازة

و مرة جبت لأخويا أعلام مصر و كان بناء علي طلبه

عايز أجيب بقه لأصحابي دوول هدية تكون حاجة ظريفة بالنسبة لهم

يعني مش عايز حاجة اللي بسهولة يلاقوها في اوربا

و بما إن كثير من أعضاء منتدانا الطيب مغتربين ،،، فهما أدري و ممكن يدوني أفكار أظرف

و كمان عشان أصحابي مش أعضاء هنا ،،، فهنا المكان المناسب عشان آخد افكار

فكرت في فانلة منتخب مصر أو الأهلي و الزمالك ،،، لقيتهم غاليين الصراحة عشان بيكونوا أورجينال أديداس

مفيش منهم مضروب في التوحيد و النور ،،،، ههههههه

ممكن علم مصر ؟؟

ممكن جبنة رومي ؟؟؟ سمعت إنها مش موجودة غير في مصر و المصريين عامة بيحبوها ،،،

ممكن ايه ؟؟؟

[م تيمور المراغي]

رأي التماثيل الفرعونيه الصغيره ولوحات البردي

سعرها مناسب جدا ولها قيمه كبيره اوي بره مصر ,,

تروح وترجع بالف سلامه ,,

[masraweya]

رغم ان الجبنة الرومي بيشتاقولها برة .. بس بلاش لا تيجي الطوبة في المعطوبة و الكلاب بتاعة التفتيش في المطار تشمشم عليها و يصادروها منك

مش عارفة ده بيحصل في ألمانيا و لاّ لأ .. بس هي ممنوعة في مطارات كثير

[ريمون]

عليك باللب و ابقى ادعيلى :)

[Ahmed Anwer]

ههههههه ،،،

طيب صوتين للهدايا التذكارية أيا كان نوعها

و صوتين للأكل ايا كان نوعه

شخصيا بحس كمصريين بنعز الأكل و بيأثر فينا أكتر

تم تعديل 15 يناير 2011 بواسطة Ahmed Anwer

[fatfouta]

لو اصحابك مقربين جدااا يعنى بينك وبينهم عشم وكده يبقى أسألهم انتوا عاوزين ايه من مصر وانا جاى وشوف كل واحد عاوز ايه وهاته بس طبعا فى حدود المعقول

لكن صحاب كده من بعيد لبعيد او ناس اول مرة هتقابلهم يبقى خليك فى الهدايا التذكارية وانزل خان الخليلى وهات حاجات تذكارية كده وخلاص

وابعد عن الأكل طبعا عشان البهدله

[جسار]

يا سلام على صفيحة فسيخ نبراوى ومعاهم كام حزمة بصل .. خدهم معاك و أبقى أدعى ..لى

[لماضة مصرية جدا]

السلام عليكم و رحمة الله و بركاته

طبعا انا داخلة و بعد ما قريت استفسار حضرتك كنت لسه هقترح انك توضب كام جوز انارب علي كام جوز حمام محشي بالفريك و لو حبة ملوخية ناشفة كده يبقي تومام

بس لقيت الجماهير الغفيرة ما شاء الله كفت ووفت و شفت...(وش اي صب جزار)

مع فكرة الباشمهندس ارك بتاعت الهدايا الفرعونية.....الفضة علي فكرة بتبقي محترمة اوي و خصوصا لما تبقي ميدالية او حاجات صغيرة كده تتحط علي المكتب

كمان بيبقي فيه صناديق صدف توحفة و دي عشان تحط فيها الهدية بدل التغليف العادي بينبهروا بيها

لو حضرتك هتشتري حاجات من خان الخليلي...ارجوك خلي بالك احسن فيه حاجات فرعونية كتير مكتوب عليها "صنع في الصين"

طبعا انا اشتريتها و دخلت علي اصحابي دخلت الفاتحين و كان منظري وحش اوي و هما بيسالوني...الا هي الصين عملت حاجات الفراعين....اومال انتم هتعملوا ايه؟؟؟ :sad:

تروح و ترجع بألف سلامة

و ابقي ادعيلنا مع حضرتك ع الطيارة....دعاء المسافر مستجاب....(انا اسمي لماضة بنت أم لماضة...ينوبك فيا ثواب)

مسا حضرتك كل الرضا

[لماضة مصرية جدا]

يا سلام على صفيحة فسيخ نبراوى ومعاهم كام حزمة بصل .. خدهم معاك و أبقى أدعى ..لى

هييييييييييييييييييه....انا مش لوحدي بقي

طب اقتراح رائع جدا و و برضه حزمة البصل ممكن يلفها بورق سوليفان و كدهون و تبقي شبه حزمة الجرجير اللي طلعت في المرسحية بتاعت لينا و مسعودي

انا اؤيد هذا الاقتراح الديناميتي

ع هامش التاييد و المبايعة و الذي منه

ليه صحيح كمصريين بنحب الاكل....عشان اللمة و لا عشان افتكاساته!!

[capitshino]

فى هولندا انواع جبن كثيرة جدا . افتكر ان موضوع الجبة الرومى مش الاختيار الانسب

[cup cake]

السلام عليكم

بما انى من المغتربين و دايما كل الى بيجى من مصر لازم يجيبلى حاجه و هو جاى فممكن يكون عندى شويه افكار بس محدش يضحك عليا اتفقنا

اوك انا عن نفسى بطلب عسلية و مجلات ميكى و حلاوة المولد و فوانيس رمضان بالذات الفوانيس الكبيرة علشان اعلقها فى البلكونه فى رمضان و كمان ممكن كتب لان الكتب هنا اغلى من مصر و اكيد طبعا اللب و السودانى دول اساسى

يارب تعجبك حاجه منهم

[الغريب]

أنا رأيي تسألهم مش عيب خالص

قولهم نفسكم في أيه من مصر من غير كسوف ، واللي أنتو عايزينو هيجلكم

كدة يفرحوا تمام ، يمكن يقولوا فسيخ أو مش أو حمام أو لب .. الله أعلم

لو مقالوش هات تذكار وخلاص

[مصري أصيل]

يا سلام على صفيحة فسيخ نبراوى ومعاهم كام حزمة بصل .. خدهم معاك و أبقى أدعى ..لى

لا بلاش الاقتراح ده لأن لو انكشف في المطار و غالباً هينكشف هيتهموك وقتها بأن معاك سلاح بيولوجي

[Ahmed Anwer]

شكرا جزيلا علي إقتراحاتكم القيمة

للاسف ،،، الوقت عدي بسرعة لإنشغالي بحاجات كتير

و السفر كمان ساعات

و مجبتش حاجة !!!