25 يناير ,, موعد المصريين

[capitshino]

لانهم طلبوا مني انضم ليهم بقلمي

وانا وافقت

لا ياسيدي الفاضل .. قلمك زي تعاطفك لوحده مش كفايه .. اتبرع ولو بلتر دم مينفعش ابدا الجهاد الانترنتي ده ..

انت دلوقت داخل ضمن حملة تسخين بتقول للناس طبقوا التجربة التونسيه انتم مش اقل منهم .. يعني انزلوا الشوارع تصادموا مع الجيش والشرطه احرقوا وولعوا وشوفوا ايه اخرتها .. بتقول للناس دمكم رخيص قصاد الي ممكن تكسبوه .. في حاله زي دي معليش يعني كلامك مهما كان مهم صوتك مهما كان مؤثر فحبرك لوحده مش كفايه ابدا وانت بتقول للناس ابذلوا الدم ..

مقتنع ان ( حملتكم ) هتجيب نتيجه خلاص انزل شارك فيها بشحمك ولحمك واركن ( قلمك ) دلوقت على جنب اصل في عشرات الاقلام غيرك ومئات والاف الشباب المتحمسين الي شايلين قضية القلم دي على اكتافهم ومساهمين .. الاقلام كترت اوي في الآونة الاخيرة وصدقني لوحدها مش كفايه .. مقتنع بالي بتقول فيه فضحي بحاجه اكتر من بعض دقائق تقضيها في التسخين وتنصرف بعدها لاحتساء الشاي .. انزل بنفسك واركن القلم دلوقت خالص على جنب .

عموما .. كنت فاقده الامل في نتائج الدعوات المماثلة على الانترنت واصبحت الآن اكثر فقدا للامل ـ والثقة ـ لما اكتشفت ان غالبية المشاركين فاكرين انهم بكده بيعملوا الي عليهم ومكتفين بالشعور الزائف بالاهمية الي بيصبغه انضمامهم لمثل هذه الحملات .. وهي في الآول والآخر بتطلع ( طز ـ فش ) .. للاسف واضح ان قطاع عريض بيدفعه الحماس والحماس فقط بدون اي تفكير او دراسه لعواقب الامور ..

طيب معلش يا مدام ضحى

ايه الحلول البديلة اللى عند حضرتك لعل وعسى .

[doha]

طيب معلش يا مدام ضحى

ايه الحلول البديلة اللى عند حضرتك لعل وعسى .

عن نفسي معنديش حل سريع او سحري اقدر اقترحه للخروج من الازمه ..

ولكن وبشكل عام وكحل بعيد المدى وكقضاء للواجب وإراحة للضمير .. فالحاجه الوحيده الي بقدر اعملها اني اغير نفسي والي حوالي باقصى مااقدر عليه .. مشكلتنا في مصر ان غالبيتنا متخلفين بالمعنى الحرفي للكلمه .. مفيش علم وبالتالي مفيش فهم .. الي بحاول اعمله اني اقرأ واتعلم وانقل الي تعلمته ده للي ربنا يقدرني انقله لهم .. بحاول ابدأ بنفسي واكون انسان متحضر وبقول لأه للظلم لما يكون صوتي هيعمل شيء وبقف جنب المظلوم لما يكون في ايدي اقدم له شيء ..

مباخذش رشوه ومبديش لحد رشوه وعمري ماطمعت في حق مش حقي ولا ساعدت حد ياخذ حق مش حقه .. مش بنافق ومش بداهن ومش ببيع مبادئي مهما كانت المغريات ..

ده عندي كافي جدا في الوقت الحالي ..واتمنى لو كل حد بيطمح في التغيير يبدأ بنفسه وتكون دي مبادئه ودي تصرفاته .. لو القاعده العريضه من الشعب تغيرت فكون على ثقة مستحيل القمه هتفضل على ماهي عليه .. كيفما تكونوا يولى عليكم ..

وطبعا الي بقوله ده مش (حل بديل ) لتطبيق التجربة التونسية ببساطة لان تطبيقها في مصر ليس بحل من الاساس ..

تم تعديل 16 يناير 2011 بواسطة doha

[مغتربة]

هو ليه لازم ان احنا نبقى اهلى و زمالك و خلاص

ليه لازم التصنيف و الى فى اغلب الاحوال بيكون بغرض المزايده تمهيدا لشن الهجوم المضاد

ليه مينفعش نكون ايد واحده او على الاقل على قلب رجل واحد

خصوصا فى ما يمس قضايا جوهريه

ليه الى بيحاول يعمل حاجه لازم نتفلسف عليه و خلاص

اثبات تفوق فكرى و لا تغطيه على عجز شخصى فى تقليده

اينعم الى ايده فى المايه مش زى الى ايده فى النار

لكن ممكن الى ايده فى المايه دا يتصرف بلامبالاه للى بيتعرض ليه الى ايده فى النار و بالعكس يكون لسان حاله بيقول ايكش يولع زياده ما هو والع

او انه يحاول يساعده بالى يقدر عليه

عماله اسمع اتهامات غريبه بنبرات اغرب و هجوم مش لقياله مبرر على المغتربين لمجرد انهم تجراوا و اتكلموا

محدش ناقش الكلام صح و لا غلط و لا حد قدم بديل و لا حد حتى شكر

ليه اى مبادره جديده بدل ما نتناقش فيها نهاجمها

طيب المغتربين اتكلموا معملوش كلام صح غلط اهو على الاقل حاولوا

لكن ما فيه ناس قاعده فى مصر لا عملت و لا حتى اتكلمت

المغتربين لولا انهم قلبهم على بلدهم و انتمئهم فعلا بيوجعهم ايه الى هيخليهم يتكلموا او يحاولوا يساعدوا و لو بشكل بسيط

بالعكس على راى كتير من الناس الى بتحسبها بالورقه و القلم هم اقل الفئات تضررا مما يحدث فى مصر

يعنى مش صايبهم حاجه لو ولعت على الى فيها

محدش بيدعوا للفوضى و لا حد يرضيه الفوضى لكن كمان مش كل فكره لمحاوله تغيير الحال نقعد نرمى عليها كل مخاوفنا و ضعفنا

و نقعد نحلل فيها اصلها جايه من مغترب اصلها جايه من مسيحى اصلحها جايه من شاب صغير

الافكار بتكون مواد خام المفروض ان احنا كل واحد يضع بصمته عليها بالشكل الى يطورها مش يخنقنها

و اكيد بالشكل دا بتطور للافضل بحيث انها تكون اكثر ايجابيه و اقل من حيث الاثار الجانبيه ليها

بعتذر من الجميع لو اسلوبى ضايقه و باكد انى مبقصدش اى حد معين بالكلام دا و لا انت طبعا استاذ عنبو بالعكس

لكن ان ابتكلم بشكل عام عن ظاهره شفتها كتير على النت و فى الحوارات مع الاخريين

احنا محتاجيين كل انسان عايز يساعد ولو بالقليل لان بلدنا غاليه علينا قوى خلينا نوحد صفوفنا ليها

[ابو محمود]

رغم انى عارف ان التقييم سيكون سلبى .لكنى اثق فى نفسى وفى الكثير ممن يكون العقل والعدل هو معيار حكمهم

نحن ابناء الداخل نحمل هكوم وطن وما أدراكم بوطن تتفشى بة كل انواع الفساد تقوم الصبح تلاقى على الريق فساد اما انتم احبائى ابناء وطنى المغتربين همومكم هى غربتكم فى اوطان ليست اوطانكم اما نحن ابناء مصر فأغترابنا يبدآ من داخل تراب مصر والفارث عظيم لو تعلمون

التضحية لاتأتى اثناء اكل وجبة ليس فيها شك بأنها مسرطنة او شراء شيء فاسد ممكن يؤدى الى كارثة لو طالة الفساد كالدواء وخلافة

التضحية هنا ماهو ثمنها وما هو الفارق ؟؟؟

احبائى ليس كرهآ او تقليل من شأنكم بل هو العقل الذى نطالب بة ان أمرت ان تطاع بأطلب ماهو مستطاع .. ان قيام شعب مصر وجماهيرها بعمل هبة شعبية تتطلب الكثير من الوعى اننا لسنا فى تونس او اى بلد عربى هناك ميزان يتم بة وزن الحدث مصر التى تريدون او تستعطفون او بالاحرى يتم تسخين شعبها ليس منكم بل من كل اعلام العرب والغرب اهلها 60%منهم تحت خط الفقر تونس دخل الفرد السنوى 3600دولار مصر لا يتعدى ال1000دولار ودة المتوسط للدخل من الفقراء هناك شريحة كبرى تأكل من الاعانات والفساد مستشرى لدرجة تذكم الانوف

عندها لايسعنى الا ادعى لكم بأن يهبكم الله نظرآ وفطنة اكثر مما تحملون حتى يكون الكلام فى مستوى الحدث

احبائى الكلام ممكن يكون قوى او بة ما يجرح لكن لابد من الانصاف

[م تيمور المراغي]

الافكار بتكون مواد خام المفروض ان احنا كل واحد يضع بصمته عليها بالشكل الى يطورها مش يخنقنها

و اكيد بالشكل دا بتطور للافضل بحيث انها تكون اكثر ايجابيه و اقل من حيث الاثار الجانبيه ليها

دي من اجمل الكلمات المحكمة اللي قريتها في الفتره الاخيره يا مغتربة

:redrose:

[م تيمور المراغي]

...........

عندها لايسعنى الا ادعى لكم بأن يهبكم الله نظرآ وفطنة اكثر مما تحملون حتى يكون الكلام فى مستوى الحدث

احبائى الكلام ممكن يكون قوى او بة ما يجرح لكن لابد من الانصاف

طيب ابقى خليك انت يا محمود ولا يكلف الله نفسا الا وسعها ,,

[ابو محمود]

معلهش سؤال اخوكم مذنوق فية استحملونى

لو حضرات المغتربين بعضآ منهم موجود بالداخل هل كانت مهاجمتة للنظام الحاكم كانت هتختلف ولا هتفضل زى ماهيى

المطلوب اثباتة

لماذا يشعر المغترب انة اعلى ممن فى الداخل وانة يضحى بتركة وطنة قصرآ رغم انة يعلم يقينآ ما يقاسية من بالداخل

هل هناك فارق بين من يقوم بصنع شيء ومن يشترية او ينتفع بة بعد صناعتة

هل من يصنع الشيء بيدة يتمتع بما صنعة دائمآ ام هناك من ينتفع بة غيرة

[عبير يونس]

أنا مع كل الأقلام العاقلة اللي بتطالب بضبط النفس

تجربتنا فعلا مختلفة تماما عن تونس

احنا شعبنا أكبر و شرائحه و انتماءاته الفكرية متعددة و متباينة

مين اللي حيقوم بالحملة دي؟؟

و فين التنظيم اللي فيها؟

الناس تخرج و خلاص

بدون ما تبقى عارفة حيعملوا ايه؟

طب لو القيادة عملت زي بن على

ايه اللي حيحصل؟؟

مين اللي حيمسك البلد؟؟

و الا الجيش برضه ؟؟؟

يبقى ما عملناش حاجة

الشعب للأسف دبت فيه الفرقة

في كل شرايحه و كل تياراته

حتى أصحاب التيار الواحد متناحرين

مش من مصلحتنا كمصريين أن تتكرر تجربة تونس عندنا

و فينا ناس كتير بتقول و انا مالي

و ياكش تولع

يا ترى الناس دي اللي انسحل قدامهم خالد سعيد

و اللي اتاخد من وسطهم سيد بلال

و اللي اغتُصبت قدامهم النساء و البنات في حركة كفاية

يا ترى الناس دي حيبقى موقفها ايه؟؟؟

و الا هو الهدف نفقد المزيد من شبابنا بلا هدف؟؟؟

الواحد لو بيموت عشان هدف نبيل

بيبقى شهيد

انما اللي يخرج بلا هدف و عارف انه حيتقتل

يبقى بيلقي بنفسه إلى التهلكة

و خطاب ربنا سبحانه و تعالى واضح تماما

{وَأَنفِقُواْ فِي سَبِيلِ اللّهِ وَلاَ تُلْقُواْ بِأَيْدِيكُمْ إِلَى التَّهْلُكَةِ وَأَحْسِنُوَاْ إِنَّ اللّهَ يُحِبُّ الْمُحْسِنِينَ }البقرة195

على هامش الحوار

ساءني جدا كلام البعض

بإن المغتربين مش مستعدين لأي تضحية

و اننا ايدينا في المية الباردة

تعرفوا حسيت بإيه

ان مصر لو انصلح حالها حتمنعونا من الدخول و تقولوا لنا انتو ملكوش حق تعيشوا بيننا

[ابو محمود]

يا باش مهندس يا تشيل كل المداخلة حتة واحدة على بعضها (شروة )

ياما بلاش ههههههههههههههههههههههههههههههههههههههه

هل انت قرأت من مداخلاتى ونهج ما أكتبة ما يخالف ؟؟

[raouf]

السلام عليكم

رغم اتفاقى عن عدم الحديث عن السلبيات فى موضوع سابق ولكن احب اقول رايى فى موضوع 25 يناير

اولا اكيد الحكومة عرفت بالموضوع وبتجهز ليه المهم الموضوع له احتمالان وهما

الاحتمال الاول

- عدم مواكبة الشعب للخروج فى 25 يناير وده هيكون القشة التى قسمت ظهر البعير لان اعتقد بعد انتفاضة البرادعى والحراك اللى عمله وبعد ثورة شعب تونس فاذا كانت هذه الاحداث لم تحرك الشعب فنستطيع القول ان الشعب قد انتهى تماما ولن يقوم له قائمة وبالتالى يعتبر الحديث عن موضوع التغيير والثورة والكلام ده موضوع منتهى ويعتبر اضاعة للوقت

الاحتمال الثانى :

الشعب يتحرك بقوة وده هيادى ان النظام عامل حسابه وهتكون مواجهة عنيفة جدا بها الكثير من الضحايا لان المعركة هتكون معركة حياة او موت بالنسبة للنظام فهيقاوم بكل قسوة مستخدم الامن المركزى والبلطجية والجيش اذا استدعى الامر ولا مانع من قيام اتباعه ببعض اعمال الشغب لاظهار الانتفاضة بمنظر المدمر الذى يريد حراق البلد بدلا من انقاذها

والاحتمالين كلاهما اسوء لمصر وهيقضى عليها يعنى من الاخير لاما قتل اى امل فى التغيير او حرب تقترب من الحرب الاهلية بين نظام لا يهمه الا الحفاظ على الكرسى والشعب

ملحوظة :

كما اتفقنا سابقا النظام عندنا وشه مكشوف يعنى مش هتفرق معاه ولا حقوق انسان ولا دعاء ابواما بالتهدئة

وتوقع شخصى ان يحدث اى عملية بعلم النظام يوم 20-24 يناير لضرب التحرك مبكرا وقد تكون هذه العملية تفجير او قتل او اغتيال او حتى اعتقال بعض الرموز او قرارات مثل اقالة وزير او حاجة من هذا القبيل

طبعا رايى انا مع اى تحرك ولكن يجب ان يكون منظم ويجب ان يكون له قائد متجهز ويقود هذا التحرك مثل ثورة يوليو لم تكن لتنجح لولا وجود قائد وشعار مثل اللواء محمد نجيب رحمه الله

[م تيمور المراغي]

محمود حقول لك القصه ببساطة عشان تبقى الصوره واضحه

فيه حركه وطنيه وليده اتكونت

وكل فرد فيها مطلوب منه يؤدي دور معين

زي تيم الكوره كده حيكون عندك مدرب وراس حربه وخط وسط ودفاع وناس بتجمع الكوره وتديها للعيبه

المهم بس انك ماتقعدش في المدرجات

حتى لو دورك تجيب الكره للهداف

حلو الكلام ؟

[م تيمور المراغي]

طبعا رايى انا مع اى تحرك ولكن يجب ان يكون منظم ويجب ان يكون له قائد متجهز ويقود هذا التحرك مثل ثورة يوليو لم تكن لتنجح لولا وجود قائد وشعار مثل اللواء محمد نجيب رحمه الله

تسلم يا رؤوف على الرأي السليم ,,

[م تيمور المراغي]

على هامش الحوار

ساءني جدا كلام البعض

بإن المغتربين مش مستعدين لأي تضحية

و اننا ايدينا في المية الباردة

تعرفوا حسيت بإيه

ان مصر لو انصلح حالها حتمنعونا من الدخول و تقولوا لنا انتو ملكوش حق تعيشوا بيننا

الغريبه ان فيهم مغتربين اعرفهم معرفة شخصية

كلهم شهامه وبيدوبوا عشق في مصر اكثر من اي حد ,, :happy:

[raouf]

طبعا رايى انا مع اى تحرك ولكن يجب ان يكون منظم ويجب ان يكون له قائد متجهز ويقود هذا التحرك مثل ثورة يوليو لم تكن لتنجح لولا وجود قائد وشعار مثل اللواء محمد نجيب رحمه الله

تسلم يا رؤوف على الرأي السليم ,,

شكرا حبيبى

اعتقد ان دو وقت نشوف فيه مدى رغبة القادة فى التضحية بنفسهم والاعلان عن وقوفهم مع الشعب فى هذا اليوم

فهذا سيكون يوم البراداعى او حمدين الصباحى او اى قائد يكون مترشح عن حب لوطنه وليس لطمع فى الكرسى

بجد نفسى اشوف رجال الدين المسلمين والمسيحين هم مع الشعب ولا مع النظام ؟

[ابو محمود]

سيدى كم احترمك ويعلم الله ويأتى هذا من مطالعتى لما تكتب ولتكن هذة هى نهاية حديثى هنا بالمحاورات لكل ماهو مغترب ...

مصر يا سيدى يحكمها الجيش وليس الشرطة الوضع مختلف ؟؟؟؟؟؟؟؟

عندما يحدث فى مصر يحدث فلتان امنى من الشرطة فى اول الثمانينيات وتدخل الجيش (تمرد الأمن المركذى) والجيش نزل الى شوارع مصر وتم اجهاض الانقلاب الشرطى لازالة وزير الداخلية

ان حدث ان قامت ثورة او ما الى ذلك سيكون الرد فظيع من الحاكم لكون مصر قوة عسكرية ولها جيش قوى ووولائة للحاكم ....

اذآ لن تكون نزهة كما يتصور البعض انها كلمات تخرج من افواة لا تشعر الا بمرارة الاغتراب .. وهنا لابد من وقفة .. من سيدفع ثمن التسخين من سيندم من هم بيدهم الزناد ام من يقفون امام فواهات البنادق ؟؟؟

انما شرعت لنفسى ان اكتب هذا وانا ممن يعيشون بالداخل ليس تقليلآ من من بالخارج بل لتتسع بؤرة العدسة ولنشاهد الصورة بوضوح وتكبر وتكبر

حتى لا نشعر بعد حين اننا مشاركون فى دم ابرياء بدون قصد

وعلى الله فليتوكل المؤمنين

يسعدنى انى تعرفت على عقول مغتربة اضاءت لى عقلى بالمعرفة والنقاش الجاد

وكم يحزننى ان أرى منهم من يريد ان يشعرنى بانة اعلى قدرآ ممن بالداخل

ورغم هذا فأنى اعترف بان ما ألمنى منهم فهم قلة والحمد للة

والسلام عليكم ورحمة الله وبركاتة

[الغريب]

أخواني الأفاضل

لا شك أن العامل المشترك بيننا في هذا الموضوع أن الجميع يريد تغيير البلاد للأفضل، حتى لو أختلفت وجهات النظر في منهج وأسلوب التغيير

بأختصار .. نحن الآن أمام تجربة تونسية لفتت الأنظار وقامت عليها دعوة لنموذج شبيه في مصر يوم 25 يناير

فأرجو من الأفاضل عدم الخروج بالموضوع من هذه الفكرة المنهجية إلى فكرة التغيير بشكل عام..

أرجو أن نجعل كل كلامنا هنا منصب على التجربة التونسية ، هل ستكون مجدية حال تجربتها في مصر ؟؟

أولا المتوقع أن كل من دعوا إلى هذه الدعوة أو أنضموا إليها لديهم إنبهار بالتجربة التونسية ، وهذا خطأ لأن أرض التجربة وهي تونس تختلف كليا عن مصر (والتفصيل في مداخلة الفاضلة مصرية متغربة) ولو أردت أن أزيد على مداخلتها لتوضيح الفروق والمعطيات في الواقع المصري عن الواقع التونسي لأستطعت وضع مشاركة من عشرات الأسطر.

ثانيا البعض يقول بأن علينا تطبيق التجربة بعد تعزيز إيجابيتها وتلافي سلبياتها كحل تغييري ، والسؤال. هل أنتهت التجربة التونسية أصلا أو بدت ثمرتها إلى الآن لنحكم عليها ونستخلص منها التوصيات ؟؟

الموضوع جد وخطير يا أخوة ، من ينبهر بالتجربة التونسية ، ويريد محاكتها في مصر ويدعوا إلى ذلك بشكل مبكر للغاية كما نرى ، فليتحمل أمام الله ..

تم تعديل 16 يناير 2011 بواسطة الغريب

[mohamedmohsen]

انا عايز نفكر بعقلانية وبصراحة في الكلام اللي هاقوله دا

هل يوجد مواطن عربي تحت قمع الفقر مثل المواطن المصري؟

هل يوجد مواطن عربي يعيش في ذل كل يوم مثل المواطن المصري؟

هل يوجد مواطن عربي يستيقظ في الصباح ويسأل نفسه العيال هايأكلوا ايه و منيين النهاردة لايوجد إلا المواطن المصري

هل سيشهداو سيحظى المواطن المصري بالاحترام والتقدير داخل بلده لانه لو حصل ذلك سيحظى بالاحترام خارج بلده وأعتقد ان الخليج خير دليل على ذلك

وغيرها من الاسئلة ولكن السؤال الاهم هل سيتكلم المواطن المصري؟ ام سيظل ساكن بلا حراك متقبل المهانة ومنخرط في مشاكله اليومية

وإذا تحدث هل سيتحدث تحت مظلة منطمة ام سيكون التحرك عشوائي ومتى سيكون هذا التحرك؟ وكيف؟

[akramgroup]

حتى لا نشعر بعد حين اننا مشاركون فى دم ابرياء بدون قصد

وعلى الله فليتوكل المؤمنين

هى دى الفكرة اللى كنت بتكلم عليها ياارش الصبح بصراحه الاخ محمود جاب جمله فى الصميم

انا كان رايى بس ان لو فى مظاهرات سلميه وليها هدف انها تحدد وتنظم من خلال النقابات مثلا

وتكون المطالب واضحه ومحدده وبعد كده ياسيدى تتسع الدايرة لكل النقابات ان شاالله توصل للمدارس

بس تكون عمليه منظمه من الاساس وفى نطاق سلمى واضح

[mohamedmohsen]

لو عايزين نعمل حاجة بجد يبقى نعملها صح مش كلام وخلاص عشوائي لازم نشوف مين يقدر ينظم الكلام دا من قلب مصر مش الواحد من الغربة ويطلب مظاهرات وخلافه إحنا كمغتربين ممكن يكون لينا أدوار تانية بس الدور التنطيمي لازم يكون من داخل مصر وممكن إحنا نساعد بطرق تانية كتتير

فكروا في كلامي ومنتظر أرائكم وافكاركم ويارب النصر للمصريين

[م تيمور المراغي]

حتى لا نشعر بعد حين اننا مشاركون فى دم ابرياء بدون قصد

وعلى الله فليتوكل المؤمنين

هى دى الفكرة اللى كنت بتكلم عليها ياارش الصبح بصراحه الاخ محمود جاب جمله فى الصميم

انا كان رايى بس ان لو فى مظاهرات سلميه وليها هدف انها تحدد وتنظم من خلال النقابات مثلا

وتكون المطالب واضحه ومحدده وبعد كده ياسيدى تتسع الدايرة لكل النقابات ان شاالله توصل للمدارس

بس تكون عمليه منظمه من الاساس وفى نطاق سلمى واضح

تسلم يا اكرم على التخطيط السليم ,,