ماذا تعرف عن صعوبات التعلم ؟

[بركة]

مدام بركة جزاكي الله كل خير علي فتح موضوع مهم جدا وقد يعاني منه ناس كتير لكن للأسف لاتوجد ثقافة وعلم به كاف

ربنا يعينيك ويثبتك في كفاحك مع ابنك لي صديقة عندها ابنتها تعاني من هذه المشكلة لكن المشكلة بتبدأ تقل مع تقدم الطفل في العمر والمثابرة والصبر

متابعة حضرتك وربنا ينفع الناس بخبرتك

ايوة يادريم فعلا دي معلومة انا قريتها

انه مع المتابعة الجيدة بتقل الاعراض دي

المهم ربنا يهدي المدرسة والمدرسين اللي كل شوية لازم اروح احفظهم

لازم نشجعه على الانجاز ونحفذه ونقارنه بنفسه

شوف كنت السنة اللي فاتت ازاي والسنة دي بقيت متفوق على نفسك

تحياتي

وجازاكي خيرا

[بركة]

ربنا يجعله في ميزان حسناتكم و يكرمكم

لي عودة بعد الشحن

ويكرمك يامصراوية

وبإذن الله الموضوع هنا هيشمل انواع صعوبات التعلم وتعريفه وازاي نكتشفه

عشان كل ما كان التدخل بدري كل ماكان افضل للام وللطفل ..

[زهره]

السلام عليكم يا بركه

انا عندى مشكله مختلفه شويه صعوبه التعلم عند ابنتى الصغرى و هى الصمت الاختيارى

بتروح المدرسه و لا تتفاعل مع المدرسين ولو مدرس سئل سؤال لا ترد

حتى لو سئل اسمها ايه

لكنها فاهمه كل الشرح و تعمل الواجب بالنسبه لموضوع الاملاء تبقى مذاكره

لكنها لاتكتب اى شىء مع المدرسه سواء عربى او انجليزى رغم انها عارفه

الصمت الاختيارى

نوعاً من الاضطراب النفسى، الذى قد يُصيب الطفل وخاصة فى الخامسة من

عمره، وهو عدم مقدرة الطفل على التواصل الاجتماعى مع الآخرين،

من خارج حدود أفرادأسرته، وتعتبر هذه الحالة وراثية ومكتسبة فى نفس الوقت

على فكره يا بركه انا كنت ملاحظه على بنتى هى عمرها شهور انها بتخاف من اى شخص لما كنا نسئل الدكتور يقول لا ده عادى ده دليل ذكاء

طلع مش ذكاء طلع خجل و خوف شديد مؤشر لمشكله اخرى

و خطوات العلاج كلها ان يكون فيه تواصل اجتماعى مستمر مع ناس مختلفه و انها تشترك فى العاب جماعيه و عدم العقاب على درجات فى المدرسه

اهم حاجه عدم احساس الطفل انه عند مشكله و الموضوع كله بيكون مساله وقت و صبر

عايزه اقولك على حاجه اخيره انتى طبيبه ابنك لانك اكتر واحده عارفه

ربنا يبارك لكى فى اولادك و تشوفيهم فى اسعد حال

[Howayda Ismail]

موضوع في غايه الاهمية .. حاولت احط تقييم ايجابي لكن للاسف الرصيد خلص .. لي عوده باذن الله لما اشحن :happy:

استاذه هند ..

بالنسبة لابن صديقتك ففي نقطه برضه في غايه الاهمية ممكن تساهم في تقليل معاناتهم مع مشكلته .. كون له اخوه اخرون واخ اصغر منه واكثر تفوقا فمن المحتمل جدا ان اللحظات الوحيده الي بيلاقي فيها اهتمام حقيقي من احد والديه هي لما بيخفق في التعلم بما يجبرهم البقاء جنبه لتوجيهه بما يعني اعطاؤه مزيد من تركيزهم .. نصيحه اطلبي منهم يهتموا بيه بشكل فردي يعني عنايه وتوجيه اهتمام له لوحده من وقت للتاني وتشجيعه على امور ملهاش علاقه بالتعليم عشان يترسخ في ذهنه انه مش محتاج يبقى فاشل ولا محتاج يخفق عشان يلقى منهم اهتمام او يلفت نظرهم ..

طبعا مبقولش انه بيتعمد الاخفاق ولكن ممكن جدا ( يسوق فيها ) يعني لو قلنا هو بيغلط عشر مرات في اليوم فممكن جدا يكون ثلاثه او اربع من المرات دي كان عارف الاجابه او التصرف الصحيح لكنه تعمد التظاهر بانه ميعرفش عشان يضمن ان والديه يركزوا معاه لمده اطول ..

جزاك الله خير استاذة ضحى

المشكلة اللى فهمتها من كلامها ان اخواته رغم كبر سنهم الا انهم بيتعاملوا معاه بالندية غير مراعين ظروفه

نهائى بالاضافة لخوفها انه يلعب مع اطفال احسن ياذوه مما يسبب له كتير من الانطوائية يعوضها بجلوسه على الكمبيوتر

مما يزيد الحالة وبالنسبة للدراسة هو بينسى بصورة كبيرة للمعلومات وفى راى اسلوب التدريس له لازم يختلف عن

التلميذ العادى يعنى محتاج مدرسين متخصصين او نوعية معينة من المدرسين للاسف غير متوفر فى بلدنا

[بركة]

السلام عليكم يا بركه

انا عندى مشكله مختلفه شويه صعوبه التعلم عند ابنتى الصغرى و هى الصمت الاختيارى

بتروح المدرسه و لا تتفاعل مع المدرسين ولو مدرس سئل سؤال لا ترد

حتى لو سئل اسمها ايه

لكنها فاهمه كل الشرح و تعمل الواجب بالنسبه لموضوع الاملاء تبقى مذاكره

لكنها لاتكتب اى شىء مع المدرسه سواء عربى او انجليزى رغم انها عارفه

الصمت الاختيارى

نوعاً من الاضطراب النفسى، الذى قد يُصيب الطفل وخاصة فى الخامسة من

عمره، وهو عدم مقدرة الطفل على التواصل الاجتماعى مع الآخرين،

من خارج حدود أفرادأسرته، وتعتبر هذه الحالة وراثية ومكتسبة فى نفس الوقت

على فكره يا بركه انا كنت ملاحظه على بنتى هى عمرها شهور انها بتخاف من اى شخص لما كنا نسئل الدكتور يقول لا ده عادى ده دليل ذكاء

طلع مش ذكاء طلع خجل و خوف شديد مؤشر لمشكله اخرى

و خطوات العلاج كلها ان يكون فيه تواصل اجتماعى مستمر مع ناس مختلفه و انها تشترك فى العاب جماعيه و عدم العقاب على درجات فى المدرسه

اهم حاجه عدم احساس الطفل انه عند مشكله و الموضوع كله بيكون مساله وقت و صبر

عايزه اقولك على حاجه اخيره انتى طبيبه ابنك لانك اكتر واحده عارفه

ربنا يبارك لكى فى اولادك و تشوفيهم فى اسعد حال

كل اللي انت قلت عليه هنا كان في ابني في سن الرابعة والخامسة

ولم يزول الا بالاختلاط بالاهل والاصدقاء وترك الطفل يلعب معهم بحرية بدون تعليقات

وبلاش اتكلم يا حبيبي مالك ساكت كده ليه

ولا يللا العبي مع العيال

ولا شوفي علطول ساكت كده.......الخ

صدقيني مسيرها هتنطق وتستخسر تضيع اللعب معاهم ..

وحشتينا يازهرة

[Howayda Ismail]

ويكرمك يامصراوية

وبإذن الله الموضوع هنا هيشمل انواع صعوبات التعلم وتعريفه وازاي نكتشفه

عشان كل ما كان التدخل بدري كل ماكان افضل للام وللطفل ..

مدام بركة لى سؤال لحضرتك

اعرف حالة لطفل عمره حوالى 15 سنة دلوقت كانت ظروف ولادته صعبة واتعرض لنقص فى نسبة الاكسجين الواصل للمخ

نتج عنه درجة اعاقة ظهرت فى الكلام ومستوى الذكاء الا انى باعتبره افضل من الحالة الاولى بكتير لانه مندمج

بصورة طبيعية مع اقرانه فى اللعب واهتمام والدته به فى دروس التخاطب وهو صغير حسن حالته

ولاحظت تقدمه كتير عن الاول رغم تعثره دراسيا ايضا

فى البداية والدته قدمت له فى المدارس الفكرية رفضوه على اساس نسبة ذكاءه اعلى من مستوى المدرسة

ولما قدمته لمدرسة حكومى رفضوه لكن لما قدمت تقرير نسبة ذكاءه وكانت معقولة فقبلوه ولكن لكثرة رسوبه

لم يصل للمرحلة الاعدادية فنصحتها بالحاقه بمركز حرفى تعلمه مهنة وده متوفر فى عدة مراكز فى اسكندرية

المشكلة الاساسية اللى كانت بتعانى منها فى صغره كان تنتابه نوبات صرع وان خفت الحالة كتير عن الاول

الا انه تقريبا مستمر فى تناول عقارات الصرع لكنه دلوقت متجاوب مع اخواته وممكن يروح اماكن بعيدة عن منزله والعودة

دون مساعدة ودرجة فهمه زادت عن الاول كتير

سؤالى دلوقت لحضرتك ايه الفرق بين الحالتين بمعنى هما الاتنين تصنيف واحد والعلاج السلوكى للاول ممكن يمشى

مع الطفل التانى فى محاولة ادماجه مع المجتمع

وايه اللى ممكن نقدمه لحالات زى دى ولو حتى نصيحة او معلومة معاونة للامهات

انا فاهمة ان ابن حضرتك مختلف كتير عن الحالات اللى ذكرتها ربنا يبارك لك فيه وعارفة ايضا قراءات وادراك

حضرتك للمشكلة اكبر واوسع من امهاتهم عشان كده سالتك جعله الله فى ميزان حسناتك

[بركة]

هندو المقالات دي فيها معلومات كويسة جدا

والموقع ده عموما مفيد جدا

http://www.gulfkids.com/ar/index.php?action=show_art&ArtCat=22&id=1388

http://www.gulfkids.com/ar/index.php?action=show_art&ArtCat=13&id=1387

http://www.gulfkids.com/ar/index.php?action=show_art&ArtCat=2&id=1385

http://www.gulfkids.com/ar/index.php?action=show_res&r_id=6&topic_id=2052

وتحت امرك

[fatfouta]

طب كنت عاوزة أسأل سؤال بمناسبة تعلم الاطفال او استجابتهم للتعلم

نعمل ايه فى الام اللى عندها صعوبة فى توصيل المعلومة لابنها مش جهل منها لأ ممكن تكون اى حاجة تانى....فيه ناس فعلا مش بتعرف توصل المعلومة للى ادامها

طب دى تعمل ايه؟؟؟

[بركة]

طب كنت عاوزة أسأل سؤال بمناسبة تعلم الاطفال او استجابتهم للتعلم

نعمل ايه فى الام اللى عندها صعوبة فى توصيل المعلومة لابنها مش جهل منها لأ ممكن تكون اى حاجة تانى....فيه ناس فعلا مش بتعرف توصل المعلومة للى ادامها

طب دى تعمل ايه؟؟؟

توتة حبيبتي سؤالك رائع وفيه وعي يفتقده الكثير

انا كنت اول الامهات دول ... حليتها ازاي ؟

كنت بروح المدرسة كل يوم والتاني اسأل المدرسات ازاي بيشرحو الحته دي

لي صديقة مدرسة كنت بحاول اتعلم منها عن طريق التليفون...والست دي فضلها عليا بعد ربنا كبير

وأخيرا .. التجربة والوقت والمحاولة والخطأ والصبر ثم الصبر .....

مش بقولك ..انا اكتشفت اني زي ابني

والله اكبر لما اكون مخنوقه من درس واطلعه على الواد .........يوووه فكرتيني

الحمد لله ...التحضير والنت والبحث ومساعدة المدرسات في المدرسة كانت النور اللي مشيت عليه

[مغتربة]

موضوع جميل جدا يا بركه و فى غايه الاهميه

عن صعوبات التعليم نعم اعرفها بشكل ما من خلال قصه سيده من اقربائى ابتليت فى ابنها بنفس الموضوع

هذه السيده بجد انا اطلق عليها مجاهده

لا استطيع ان اصف لك مى الجهد الخرافى الذى بذلته مع ابنها فى الدراسه من اول صف اول وحتى اصبح على مشارف التخرج الان فى السنه لنهائيه لمعهد عالى للسياحه و الفنادق و حتى الان مازالت تستذكر له دروسه بصبر شديد و تحمل بالغ

انا اعلم ان كل ام مصريه لن تقل عنها اذ لا قدر الله وضعت فى نفس الظروف

اقول لك هذا الكلام لانى اعلم ان الطريق مامك اعلم انه طويل و لكن ثقى فى الله و ان شاء الله سيعينك و لا تحزنى ان شاء الله سيعوضك الله فيه خير و يفرح قلبك به و مها طال عليك الطريق حاولى ان تفكرى فى تلك اللحظه الى احكى لك عنها و التى قريبتى فيها الان و هى ترى ابنها بسم الله ماشاء الله عليه شاب على وشك التخرج يتمتع بالدين والخلق و اصبحت على بعد امتار قليله من قطف ثمار عملها الدؤوب

عندما يختارنا الله لاختبار معين يجب ان نثق ان الله يرانا اهلا لاجتيازه بنجاح و الا لما كان ابتلانا به من البدايه فيكفينا ثقه الله فينا

ادعو الله ان يقر عينك به و يهديه لك باذن الله تعالى

[بركة]

عندما يختارنا الله لاختبار معين يجب ان نثق ان الله يرانا اهلا لاجتيازه بنجاح و الا لما كان ابتلانا به من البدايه فيكفينا ثقه الله فينا

ادعو الله ان يقر عينك به و يهديه لك باذن الله تعالى

حبيبتي مغتربة ربنا يجازيكي خير على دعمك ليا بالقصة والدعاء

حقيقي انا محتاجلهم جدا وبالذات النهاردة

لسه راجعه من المدرسة وواخده كلام محبط

لكني مؤمنه بيه وعارفه ان احنا بإذن الله هنوصل

اللهم اياك نعبد واياك نستعين

[زهره]

شكرا يا بركه انتى كمان وحشتينى جدا

شوفى ده رابط مركز بى برفكت ممكن تتواصلى مع الدكتوره منى

http://bperfect.net/ar/

متخليش كلام المدرسين يحبطك الموضوع محتاج صبر

و كله بامر الله

[ذهبية]

يااااااة يا مدام بركة مووضعك دة فى وقت انا فى قمة الاحباط فية بسبب ابنى لانة نفس الوصف الى بتشريحة دة

تعبانة معاة جدااااااو كنت ناوية انزل مووضع بخصوصة لانة فى مدارس لغات و الولد مش ماشىىى وكنت بافكر انى انقلة من المدرسة الى مدرسة عادية عربية لتقليل الحمل علية و فعلا كنت هاعمل كدة السنة اللى فاتت لكنة رفض بسبب ان اخواتة هيكونوا فى اللغات و هو لا لانهم فى مدرسة واحدة و اصحابة و غيرةةةة

الولد مش بيجمع اى جمل مفيدة دايما يشتكوا من عدم تركيزة و انة سرحان لدية قدرة على الحفظ لكن بعدم الفهم لو السؤال لف شوية او اتغير الاقية كانة بيشوفة لاول مرة

فى البيت كذلك و للاسف انا مش هاقولك انى متفهمة او مساعدة للاسف انى بقيت عصبية معاة ساعات اطبطب علية و براحة معاة و ساعات الاقى نفسى احرق طاقة بالساعات و الشرح المبسط و الاقية فى الاخر ولا حاااااااااجة ادخل فى نوبات بكاء شديدة

انا فعلا محبطة جداا يا مدام بركةةةة

ومش عارفة اعمل اية و لا تجهة فين و ياترى نقلة الى مدرسة بالعربى هيفيد فى حالتة بالذات انى اواجهة صعوبة معاة فى العلوم بالانجليزى والرياضة

طيب نفسيتة اعمل فيها اية و بعدة عن اخواتة

انا ساعات ابكى لوحدى و اقول هيدخل ثانوى ازاى هيمر بثانوية عامة ازاى

هو الان فى اولى اعدادى و المواد تقيلة علية وكل سنة اصعب من اللى قبلها

انا فعلا محبطة جدااااااا

[shiko]

متابعة باهتمام ...

وده موش من دواعى الثقافة والالمام ...

ده لانى احد افراد العائلات التى انعم الله عليها بطفل من اصحاب الاحتياجات الخاصة

ولن اتحدث عن الوضع فى مصر او مافيا مدارس ذوى الاحتياجات .....فهذا ليس موضوعنا

فقد حاولت فى الاول ارد على بركة ..بس استنيت شوية لاقيت رد ضحى وذهبية ومغتربة وفتفوتة وزهرة ومصراوية وهند ......

بيخلينى اسمع اكتر ما ارد ....

بس دلوقتى هاحكيلك حكاية صغننة ...شوفتها لاحدى الامهات على قناة اقرأ

الحكاية لطفلة تبلغ الحادية عشر تقريبا ...(موش متذكرة ) وكانت صماء ..بكماء ....ضريرة ....وبالطبع عندها صعوبات تعلم ....الحاسة الوحيدة اللى عندها ...اللمس ...والشم ....يعنى كل امكانيتها الذهنية تتركز فى اللمس والشم ....يالله يا صاحب النعم ....

وزى ماهو متوقع دائما ...الام تصنع المعجزات ....(زيك كده يا مدام بركة ان شاء الله لما نشوف ابنك ده مهندس فى يوم من الايام ) ....استطاعت ان ترود ابنتها وتجعلها انسانة مكتفية بذاتها ..ولا تعتمد على احد فقط باللمس ...تكتب لها ما تريد على كفيها فتهم البنت وتتوجه بارادة الله سبحانه وتعالى بذكاء فطن لما طلبته امها ....

حبيبتى فى الله بركة ....

سبحانه عز وجل اختارك ...لنعمة جميلة ...انتى لها (قدها وقدود) ...زى ما بنقول ....

وستصبحى يوما ما صانعة نجم ...ان شاء الله وسننغبطك عليه جميعا ...

كلامى ليس على سبيل شد الذر او المؤاذرة ...ولكنى احدثنى قبل اناحدثك ....واناشد همتى وهمة كل العائلات من اصحاب النعم الجميلة ...انتم لها ...

اللهم اقر به عينك ان شاء الله ...

اسمحيلى اتابعكن ....وباهتمام فلقد اثريتم الموضوع لدى اكثر بكثير

تم تعديل 17 يناير 2011 بواسطة shiko

[بركة]

شكرا يا بركه انتى كمان وحشتينى جدا

شوفى ده رابط مركز بى برفكت ممكن تتواصلى مع الدكتوره منى

http://bperfect.net/ar/

متخليش كلام المدرسين يحبطك الموضوع محتاج صبر

و كله بامر الله

ميرسي على اللينك يازهرة

ربنا يسعدك ويكرمك في ولادك

[بركة]

يااااااة يا مدام بركة مووضعك دة فى وقت انا فى قمة الاحباط فية بسبب ابنى لانة نفس الوصف الى بتشريحة دة

تعبانة معاة جدااااااو كنت ناوية انزل مووضع بخصوصة لانة فى مدارس لغات و الولد مش ماشىىى وكنت بافكر انى انقلة من المدرسة الى مدرسة عادية عربية لتقليل الحمل علية و فعلا كنت هاعمل كدة السنة اللى فاتت لكنة رفض بسبب ان اخواتة هيكونوا فى اللغات و هو لا لانهم فى مدرسة واحدة و اصحابة و غيرةةةة

الولد مش بيجمع اى جمل مفيدة دايما يشتكوا من عدم تركيزة و انة سرحان لدية قدرة على الحفظ لكن بعدم الفهم لو السؤال لف شوية او اتغير الاقية كانة بيشوفة لاول مرة

فى البيت كذلك و للاسف انا مش هاقولك انى متفهمة او مساعدة للاسف انى بقيت عصبية معاة ساعات اطبطب علية و براحة معاة و ساعات الاقى نفسى احرق طاقة بالساعات و الشرح المبسط و الاقية فى الاخر ولا حاااااااااجة ادخل فى نوبات بكاء شديدة

انا فعلا محبطة جداا يا مدام بركةةةة

ومش عارفة اعمل اية و لا تجهة فين و ياترى نقلة الى مدرسة بالعربى هيفيد فى حالتة بالذات انى اواجهة صعوبة معاة فى العلوم بالانجليزى والرياضة

طيب نفسيتة اعمل فيها اية و بعدة عن اخواتة

انا ساعات ابكى لوحدى و اقول هيدخل ثانوى ازاى هيمر بثانوية عامة ازاى

هو الان فى اولى اعدادى و المواد تقيلة علية وكل سنة اصعب من اللى قبلها

انا فعلا محبطة جدااااااا

شوفي ياذهبية هحكيلك على اللي شوفتو واللي سمعته

شوفي لو انت علمتي الولد لحد دلوقتي العلوم والحساب بالانجليزي يبقى لما تقلبيهم عربي

هتبقى صعبة عليه جدا

ونفسيته هتتأثر للغاية

أنا كنت في نفس موقفك ده بس بشكل مختلف

أنا ياستي ابني عنده 10 سنوات دلوقتي

اول اما جينا هنا كانت ظروفنا لا تسمح بمدارس مكلفة

فدخلته مدرسة حكومة....وعينك ماتشوف الا النور

هنا المدارس دي قائمة على حفظ القران والتوحيد والفقة ...يعني شوية زي الازهري في مصر

وقعد فيها سنة اولى وشهرين من تانية في الحكومة دي ..ويشاء ربنا ان ظروفنا كلها تتشقلب

للافضل الحمدلله فدخلناه مدرسة انترناشونال امريكي ودي اقرب حاجة للغات بتاع مصر

المهم الناظرة قبلته وقالتلنا يدخل عادي 2 وبلاش يعيد اولى لان عندها حالات زي كده كثير ومشيو تمام

وجبناله مدرسة من المدرسة تحسنه لانه مايعرفش الهوا في الانجلش

طبعا احنا كنا في وادي والدروس اللي في المدرسة في وادي

طلبت منهم في اول العام الدراسي بتاع 3 انهم يرجعوه 2 الوزارة ماقبلتش ابدا

عشان ناجح في 2 ...

اللي لاحظته ان الولد مستواه التحصيلي بالنسبة لصعوبة المواد كان ممتاز مع منهج 2

المهم قضينا 3 في عذاب ..لحد ما عملنا اختبار الذكاء وصعوبات التعلم

طلبت من الدكتور انه يحطلي في التقرير اي حاجة بحيث انه يقبلوها في الوزارة ويخلوه يعيد السنة

وقد كان ....قال اخيرا نزل قرار باستثناء حالات لتعثرها في المدرسة انها تعيد

ودي السنة اللي احنا فيها دلوقتي ....طبعا الضغط العصبي والنفسي على الولد قل جدا

بسبب سهولة المعلومات بالنسبة له دلوقتي

وطبعا انا ما اغفلتش الناحية النفسية فعملتله زي تثبيت لفكرة انه سنه صغير والمدرسة مش هتطلعه

سنة4 الا لما يكمل 10 سنوات وهو لسه بيكملها اخر فبراير فتكون السنة خلصت وعليك وعلى السنة الجاية عشان

تدخل 4 بإذن الله

المهم لو من مصلحته انه يعيد ويتأخر مش هتفرق سنة بس هيعيش مرتاح بعد كده

لكن تنقليه هتفرق ايه ماهو اتعود خلاص على الارقام بالانجليزي...

الدرس هو هو بالعربي ..المادة العلمية مش اخف

تم تعديل 17 يناير 2011 بواسطة بركة

[بركة]

shiko

دعمك معانا هنا له اثر كبير على معنوياتنا

ربنا يعطيكم الخير ويأجركم فإن لديكم منبع للحسنات والكرم ...

[لونا]

*************************************************

حبيبتى فى الله بركة ....

سبحانه عز وجل اختارك ...لنعمة جميلة ...انتى لها (قدها وقدود) ...زى ما بنقول ....

وستصبحى يوما ما صانعة نجم ...ان شاء الله وسننغبطك عليه جميعا ...

كلامى ليس على سبيل شد الذر او المؤاذرة ...ولكنى احدثنى قبل اناحدثك ....واناشد همتى وهمة كل العائلات من اصحاب النعم الجميلة ...انتم لها ...

اللهم اقر به عينك ان شاء الله ...

اسمحيلى اتابعكن ....وباهتمام فلقد اثريتم الموضوع لدى اكثر بكثير

عارفة يا شيكو الكلام المتلون بالأحمر ده ..

ربنا سبحانه و تعالى قاله في كتابه الحكيم في سورة البقرة:

لَا يُكَلِّفُ اللَّهُ نَفْسًا إِلَّا وُسْعَهَا لَهَا مَا كَسَبَتْ وَعَلَيْهَا مَا اكْتَسَبَتْ ۗ رَبَّنَا لَا تُؤَاخِذْنَا إِنْ نَسِينَا أَوْ أَخْطَأْنَا ۚ رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِنْ قَبْلِنَا ۚ

رَبَّنَا وَلَا تُحَمِّلْنَا مَا لَا طَاقَةَ لَنَا بِهِ ۖ وَاعْفُ عَنَّا وَاغْفِرْ لَنَا وَارْحَمْنَا ۚ أَنْتَ مَوْلَانَا فَانْصُرْنَا عَلَى الْقَوْمِ الْكَافِرِينَ ﴿286﴾

الله سبحانه و تعالى لن يبتلي أي إنسان إلا إبتلاء هو فعلًا قادر على تحمله

و لما نقرأ الآية كأن النفس هي التي تتحمل .. و كأنها وعاء يضيق و يتسع

و قد يكون هناك وعاء قادر على تحمل مشقة ما ..و وعاء آخر لا يتحملها

مثلًا الكوب المخصص للعصير إذا وضع فيه شاي ساخن ينكسر لأنه غير مصنع لتحمل درجات الحرارة العالية

و كذلك النفس ..

و لأن الذي خلق النفس هو أدرى بها

فسبحانه يعلم مدى تحمل و قدرة كل واحدة ..

ربنا لا تحملنا ما لا طاقة لنا به و اعف عنا و اغفر لنا وارحمنا أنت مولانا فانصرنا على القوم الكافرين

تم تعديل 18 يناير 2011 بواسطة لونا

[ذهبية]

بركة اشكرك اولا على اهتمامك

انافعلا عافرة ان صعوبات التعليم موجود سواء بالعربى او اللغات بس الفكرة ان الغات لود جامد مستوى رفيع و قصص انجليزى و السينسن و الماث مشكلة

خاصة الاسئلة الى بتيجى تستخدم طريقة اللف او التفكير

الولد عندة مشكلة الحفظ يعنى بيحفظ بدون تفكير يحفظ السؤال باجابتة لو السؤال لف شوية او اتقال باسلوب مختلف يجاوب يالشبة

مش عارفة اخلية يشغل تفكيرة ازاى

الولد مش بيدخل فى دماغة الدرس الا لو اتذاكر مش ااقل من عشرين مرة و نعيد و نزيد

انا فعلا عايزة طريقة ازاى اخلية يفكر يشغل مخة مش يحفظ بدون فهم دى اوصلها ازاى

و اله يا بركة كل العلوم لو ما اخدتة من ايدة و دخلت المطبخ و طلعت بقى كل الحلل و المواعين و عملت التجارب الىل علية و خليتة يمسك الحاجة بايدة و يعمل التجارب بنفسة مرتين تلاتة مش بيفهم

طيب اعمل اية اكتر من كدة نفسى يشغل تفكيرة

[بركة]

دهوبة

طيب هو شاطر ومتميز في ايه؟

لان من النقطة دي هيكون ردي عليكي بإذن الله