حد محتار زيي في موضوع شراء شقة؟!ا

[kwala]

السلام عليكم

طبعا الجواب باين من عنوانه...اختكم محتارة في موضوع شراء شقة!!

مبدئيا اختياري وقع على مدينة الشروق...حسيت انها مستقبلا ليها وضع كويس جدا

ولو كان فيه سيولة اكتر بصراحة كنت هختار آخد في التجمع

المهم....نرجع للشروق..طبعا فيه اخوات افاضل هنا فادوني كتير بمعلومات عنها ولهم جزيل الشكر

ودخلت على مواقع لشركات بتبني في الشروق

لكن كل ما أقرب اوصل لقرار الاقيني برجع لورا

!!

مثلا:

موضوع ان المقدم المتوفر معايا هو ربع ثمن الشقة....فدا في عرف السوق معناه اني هستلمها بعد سنتين...يعني وقت التعاقد هتكون صحرااااااااااء!!!

موضوع خلفي وامامي وناصية وواجهة...احترت فيه ووصلت لقناعة غريبة وهي إن الخلفي دا حاجة وحشة...آجي ادور على الأمامي الاقيه مساحاته كبيرة!!! طب اعمل ايه؟!

موضوع عدد الأدوار....من مميزات الشروق بالنسبةالي ان الارتفاعات فيها تقريبا واحدة...مكان كدا هادي وراقي...لكن اللي فهمته ان مع الوقت ناس كتير هتعلى بأدوار برده كتير!! فمش عارفة اضمن منين ثبات عدد الأدوار علشان المنظر الجمالي!!!

نيجي بأه للضمانات...عرفت برده ان فيه ناس بتشترك وتبني عمارة ويبدءوا يبيعوا منها شقق....طب انا اضمن منين ان عندهم خبرة كافية؟ وان الموضوع هينتهي على خير وبسلاسة وبدون مشاكل...ولما بتكلم هنا على ناس فأنا اقصد ناس زيي يمكن صاحبتي يمكن جارتي...يمكن قريب جوزي...يعني ناس كويسين ونيتهم خير....لكن مازال السؤال قائم...هل خبرتهم كافية؟

زمان اهلي اشتروا شقة في مساكن شيراتون بالتقسيط كان سعرها حوالي 27 الف جنيه... دي تبع بنك الاسكان والتعمير على ما اعتقد فكانت (مضمونة)...فين بأة الضمان اللي زي كدا في مدينة الشروق دلوقتي؟؟

نرجع تاني لطريقة الدفع....تيجي تسأل حد من السوق يقولك ثوابت

25% مقدم..15% استلام اولي....15% استلام نهائي

أو 50% مقدم وتستلم...والباقي ايا كان

مع ان اصحابنا اشتروا شقة ماشاء الله مساحتها كبيرة ومطلة على الجولف سيتي بدون مقدم اصلا...وب 5000 جنيه شريا لمدة 5 سنوات

اللي اقصده ان فيه مرونة في طريقة السداد لكن مش عارفة الاقيها فين

طبعا بكرر شكري لكل اللي سالته بمعلومة وافادني...لكني فعلا في حيرة...فياريت لو حد محتار زيي نتشارك مع بعض يمكن نعمل (اتحاد محتارين)

أو لو حد عنده معلومة تقلل الحيرة دي ياريت ما يبخلش علينا بيها...

شكرا جزيلا

[Simba]

مع ان اصحابنا اشتروا شقة ماشاء الله مساحتها كبيرة ومطلة على الجولف سيتي بدون مقدم اصلا...وب 5000 جنيه شريا لمدة 5 سنوات

معندكيش واحدة كمان والنبي :happy: :happy:

[samehmagdy]

خليهم اتنين يا سمبا وليك الحلاوة يا عم

kwala

عندك حق فى حيرتك دى والله لانى انا كمان عندى نفس الحيره مش عارف اخد شقه فى الشروق ولا فى اكتوبر ولا اخد ارض وابنيها بنظام الشراكه مع احد الاصدقاء الموثوق فيهم ولو اخدنا ارض وبنيتها فرق السعر هيستاهل وجع القلب فى البناء ومشاكله الكتير

بالنسبه لموضوع انك معاكى ربع التمن ودى هيخليكى تاخدى شقه فى الصحراء فالصحراء النهارده بكره مش هتلاقى فيها خرم ابره والزمن بيعيد نفسه كل يوم واسالى اى حد كان ناوى يشترى فى مكان صحراء ولا بعيد واتردد وبعدها بكام سنه رجع يضرب نفسها بالشوز

انا كانت اكبر غلطه عملتها انى لما سافرت مربطش نفسى باقساط شقه او ارض اخدها كان زمان خلصتها من زمان وكان الواحد عمل حاجه

بس ملحوقه ان شاء الله

الضمانات بقى دى فالضامن ربنا سبحانه وتعالى بس موضوع انهم عندهم خبره فى البناء ولا لا اولا هما مش هيبنو دى حاجه ترجع للمهندس اللى بتكلفوه بالموضوع دى يعنى لو كان مهندس شاطر وامين فاحمدى ربنا انما لو كان غير كده فعليه العوض

ولو هتشترى فلو شركه يبقى ليه سابقه اعمال وحد مجربها قبل كده وتساليه على التزامهم فى المواصفات والمواعيد

او يكون حد معرفه وثقه وعنده قطعه ارض بيبنيها

طولت عليكى انا كده اوى بس لو لقيتى حاجه كويسه ابقى قوليلى الله يخليكى

ومتخفش يا سمبا هبقى اقولك انا كمان

[se_ Elsyed]

أنا لسه راجع من مصر ... وأي حد بيطلب نصيحتي بأنصحة بمدينة العبور .. لأنها من وجهة نظري أرقى بمراحل من الشروق وخدماتها متكاملة .

ولإن المعروض من العقارات كثير الأن ... فهناك تسهيلات غير مسبوقة في البيع والشرا ... وشقق بالعبيط . وأعلانات كتير جداً على الفلل والعماير يعني مش محتاج سمسار ..... اللي يخليك مطمئن بقى إن التسليم فوري إن شالله لو عاوز تسكن فيها بكره ...

وطبعاً بالتقسيط .....

أرقى 4 أحياء موجودين على التوالي :

1- الحي السابع فيلات

2- الحي السادس فيلات

3- الحي الأول فيلات

4- الحي التاسع عماير

والفيلا بيبقى مُسمى فيلا لكنها من الداخل بتتقسم عمارة ...

[ذهبية]

أنا لسه راجع من مصر ... وأي حد بيطلب نصيحتي بأنصحة بمدينة العبور .. لأنها من وجهة نظري أرقى بمراحل من الشروق وخدماتها متكاملة .

ولإن المعروض من العقارات كثير الأن ... فهناك تسهيلات غير مسبوقة في البيع والشرا ... وشقق بالعبيط . وأعلانات كتير جداً على الفلل والعماير يعني مش محتاج سمسار ..... اللي يخليك مطمئن بقى إن التسليم فوري إن شالله لو عاوز تسكن فيها بكره ...

وطبعاً بالتقسيط .....

أرقى 4 أحياء موجودين على التوالي :

1- الحي السابع فيلات

2- الحي السادس فيلات

3- الحي الأول فيلات

4- الحي التاسع عماير

والفيلا بيبقى مُسمى فيلا لكنها من الداخل بتتقسم عمارة ...

طيب ايةممكن تقولنا يا سى السيد لية العبور افضل

طيب حضرتك ذكرت الاماكن طيب ممكن الاسعار

[se_ Elsyed]

الأسعار ما عنديش فكرة لكنها متفاوته من حي لأخر ومن موقع لأخر وحسب حالة العمارة وكده والميزة إن ما بقاش فيه لازمه للسماسرة لإن الإعلانات كتيرة جداً طول ما أنتي ماشيه على العماير ...

العبور مميزة لإنها متخططة صح ... لكن الشروق كل اللي يروح يتوه فيها لإنها سايحه علي بعضها والواحد ممكن يشوف فيلتين تلاته فخمين جنب بعض وفجأة يلاقي في وسطهم مساكن وبلوكات شعبية

العبور أقرب للطريق الدائري ولوسط البلد بشكل عام وخصوصاً مصر الجديدة ومدينة نصر

العبور خدماتها متكاملة سواء التجارية أو الطبية أو التعليمية من مدارس بانواعها

العبور فيها سين سين هو العُمده ... لكن الشروق ما لهاش كبير يحكمها ههههههههههههه

-----------

وبعدين هاتشتري ولا هاتفعصي في البضاعة وتاخدي بعضك وتمشي ؟

[kwala]

مع ان اصحابنا اشتروا شقة ماشاء الله مساحتها كبيرة ومطلة على الجولف سيتي بدون مقدم اصلا...وب 5000 جنيه شريا لمدة 5 سنوات

معندكيش واحدة كمان والنبي :happy: :happy:

يا ريت...هو أكيد فيه لكن لازم الواحد يدور كويس....وطبعا بالنسبة للمغتربين دا صعب جدا!

لكن مفيش حاجة بعيدة على ربنا

[akramgroup]

العبور فيها سين سين هو العُمده ... لكن الشروق ما لهاش كبير يحكمها ههههههههههههه

طب يا س س ياريت تسالنا شيخ الغفر ولا حاجه عن يعنى رينج الاسعار كده

معلش هنتعبك معانا

وحمدلله على السلامه ياريس

[se_ Elsyed]

العبور فيها سين سين هو العُمده ... لكن الشروق ما لهاش كبير يحكمها ههههههههههههه

طب يا س س ياريت تسالنا شيخ الغفر ولا حاجه عن يعنى رينج الاسعار كده

معلش هنتعبك معانا

وحمدلله على السلامه ياريس

ما أنا قلت يا أكرم .. الأسعار متفاوته ..

طب عشان ترتاح الرينج من 1300 جيني إلى 2000 جيني .. نص تشطيب وفي تقسيط كمان وزمان من سنتين كان توتو على كبوته وما فيش مليم تقسيط الا الحاجات اللي كانت تحت الانشاء والتسليم كان بعد سنتين تلاته ... لكن دلوقت الجاهز كتير وخد في حجرك وأجري يا معلم

[engmido]

من 1300 جيني إلى 2000 جيني .

ايوة يعنى ده سعر الشقة كلها شاكب راكب ولا قسط شهرى

ههههههههههههههههههه

[kwala]

خليهم اتنين يا سمبا وليك الحلاوة يا عم

سلام عليكم يا استاذ سامح

للأسف مش هقدر افيك في موضوع مشاركة في البناء أو شراء شقة جاهزة لإني ماعنديش معلومات...لكن اللي اعرفه ان موضوع البناء مربح جدا لكن عاوز حد بيفهم فيه وليه في السوق

بالنسبة بأة لاكتوبرولا الشروق كل مكان ليه مميزاته...أنا عشت فترة في اكتوبر....هيا مدينة كويسة ونظيفة وخدماتها تكاد تكون متكاملة لكن عاوزة حد يكون حياته كلها هناك...يعني شغله ومدارس اولاده ويفضل لو قرايبه كمان يكونوا على الأقل قريبين منها...لإن النزول للقاهرة يوميا كان مهلك جسديا وماديا في البنزين..وعصبيا طبعا علشان السواقة!!

طبعا اللي بجنيه انهارده في الصحراء بكرة يبقى ب 10...بس أنا كان قصدي برده على الضمانات....كتير يقولوا لازم على الأقل العمارة تكون بدإت تطلع علشان تشوف جودة الشغل والاساسات والمقاسات وخلافه.

بالنسبة للشركات اديني شغالة تدوير على النت....لينا برده اصحاب خدوا في الشروق واستلموا بعد سنتين...صحيح الشركة اتاخرت عليهم شوية ودفعتلهم الغرامة...أنا بفكر اسالهم على موقع الشركة دي كمان وادور فيها

ربنا يوفقنا جميعا للصح والخير...ونكون بكرة من ملاك العمارات مش بس الشقق....آمين

تم تعديل 18 يناير 2011 بواسطة kwala

[kwala]

أنا لسه راجع من مصر ... وأي حد بيطلب نصيحتي بأنصحة بمدينة العبور ..

أولا نقول حمدلله على السلامة

طبعا أنا لما شفت اسم حضرتك قلت بسسسسسسس أنا هسمعلي كلمتين من اياهم (ياريت حضرتك تشوفي المواضيع اللي قبل كدا علشان ما تكتبيش موضوع مكرر....)وحاجات كدا يعني :)

المهم..طبعا العبور برده من الاختيارات الكويسة...وخصوصا بعد وجود كارفور والجولف سيتي مول...ومبروك على اللي أخد فيها

لكن لو بنتكلم على المدى البعيد شوية مثلا بعد عشر سنوات (يدينا ويديكم طولت العمر) اعتقد ان الشروق تكسب

صحيح ان الحياه في الشروق حاليا شبه مستحيلة لكن مستقبلا كل حاجة تقريبا هتفتح هناك....كارفور وهايبر ومترو

الجامعة البريطانية والفرنسية والعربية المفتوحة وجامعة الشروق

نادي الصيد وهليوبوليس ونادي الشروق وواحد كمان تقريبا اسمه جرين هيلز أو حاجة زي كدا

طبعا موضوع مترة الأنفاق هيفرق كتير

والجميل برده انها قريبة من العبور لو حد اولاده في جامعة عين شمس أو القاهرة مش هيتعب في المواصلات يعني

دا غير ان مافيهاش منطقة صناعية ولا سوق زي سوق العبور (مع احترامي)ا

حاليا الاسعار زي بعضها تقريبا في العبور والشروق (المتر بحوالي 1800 في الأماكن الكويسة وانت طالع)مع ان العبور تعتبر مدينة متكاملة والشروق لسة صحراء

طيب دا معناه ايه؟...اكيد الشروق لما تعمر اكتر اسعارها هتكون اغلى

الخلاصة

اللي محتار بين العبور والشروق لو كان عايز سكن حالي يسكن ويستقر فيه دلوقتي يبقى الأفضل العبور طبعا

انما اللي يقدر يصبر على الأقل 5 سنين كدا يعني ياخد الموضوع استثمار يبقى الشروق افضل

ودا طبعا رأي شخصي....وبالتوفيق للجميع

[engMostafa]

يا جماعه انا عندي شقه في الشروق وعايز ابيعها وده لغرض الهجرة ان شاء الله

هي الشقه مساحتها 65 م2 واللي عايز معلومات عنها ممكن يراسلني على الخاص

وانا بعتذر لصحابه الموضوع اني خرجت عن نص الحوار بس انا لقيت حضرتك محتاره في شراء شقه

وانا عايز ابيع شقه فقولت يمكن حد من اللي محتار في الشراء يكون تنسابه شقتي

بعتذر للمره الثانيه ليكي اختي عن الخروج عن النص.

وعلى فكره الشروق مش صحراء ولا حاجه الشروق رائعه جدا ومكان هادي وكله خضراء وانا روحت العبور وزورتها ولقيت ان الشروق افضل منها بكثير