هذا ما شاهدته في مصر في رحلتي الأخيرة

[se_ Elsyed]

عشان ما حدش يفهمني غلط فليس كل ما يشاهده الإنسان بيكون سيئاً لهذه الدرجة ..

فبصراحة على السريع لأن ما كانش في وقت شاهدت أشياء جيده أيضاًُ .. ومنه :

1- بقى في أتوبيسات نقل عام جديدة منتشرة ونظيفة مكتوب عليها CTA ... بصراحة حسيت إنها أدمية غير الأتوبيسات الحمرا والزرقا بتاعت زمان اللي كانت كُهنة ... لكن يارب يحافظوا على صيانتها الدورية .. لأن الفرق بيننا وبين الدول الأخرى مش في إنشاء حاجه .. لا لأ . لكن في المحافظة عليها وصيانتها .

2- التليفونات الأرضية دلوقت بقى تأسيسها ببلاش وفي الحال والمصرية للاتصالات ناقص تعمل إعلانات وتقول فيها " اللي حيب ربنا ييجي يتصل من عندنا " ............ أنا مش كبير قوي ولا صغير قوي ... لكن لسه فاكر في السبعينات والثمانينات كان التليفون الأرضي بيقعد ما بين 10 - 20 عام لحد ما يجيلك ... ومش بيجيلك إنت لإن اللي بيقدم بيكون إنتقل الى الرفيق الأعلى لكنه أمن مستقبل أولاده بعدة تليفون سودا زي تيليفون العمدة كده - ملحوظة ده كان بيحصل في القاهرة خلوا بالكم

3- حدثت حالة وفاة في البلد عندنا لكن ما قدرتش أروح أدي الواجب عشان قصر الفترة الزمنية المتواجد فيها هناك ... فجزء من العيلة راحوا بالعربيات الخاصة بتاعتهم ... والباقي سطحوا بألسوبر جيت .. لما رجعوا مدحوا في مستوى الأتوبيس بصراحة وحاجه أخر شياكة .. والأتوبيس بيطلع من موقف عبود بشبرا إلى الزقازيق بلدنا .. تخيلوا تذكرة الفرد بـ 3 ج فقط ؟

4- كمان تذكرة المترو ... تاخد القاهرة من أولها لأخرها وتخرم لحد محافظة لحوان كمان كل ده بـ 1 ج فقط حتى الأن ...

5- الكوبري اللي على طريق مصر الإسماعيلية واللي حل مشكلة من الازمة المرورية أمام الطريق الداشري وكانت بتحصل بلاوي مرورية هناك من الزحام .... المرة دي لقيتهم إنتهوا من إنشاءه وأفتتحوه .. وبصراحة شركة النيل للطرق والكباري أنهته في وقت قياسي وبقى الطريق شكله أفضل بكثير ..

[alikhedr]

والله يا جماعه انا بقالى هنا مش كتير اقل من سنه لكن جوايا احساس جميل فى البلد دى يمكن فى بعض القوانين اللى مش بتعجبنا لكن الناس هنا طيبين ويخافون الله اذا ذكرتهم به صحيح ممكن تلاقى فى المصالح الحكومية ناس متكاسلين لكن مش بتلاقى تعقيدات كبيرة

وانا لا انسى ذهابى الى الحج السنة اللى فاتت بدون تصريح وازاى اللجان الامنية على الطريق لم تعارض اى حاج فقط تعارض السيارات وتخيلت فى اللحظة دى لو ان الكعبه دى فى مصر ازى كان هيبقى الحال تخيلت ان الدولة مش هتعدى نمله للحرم بدون دفع الرسوم او الاتاوة وان العساكر المسؤلين عن الاكمنه هيجهزو خزن لاستقبال الرشاوى

ولكم ان تتخيلو ان اسعار الاكل داخل مكه فى ايام الحج هى نفس اسعار الاكل فى اى مكان فى المملكه فى اي يوم فى السنه واتصور برضو ان الكلام ده لو فى مصر الاسعار ممكن تنضرب فى 10 او 15 مفيش اى مشكله الشىء الوحيد المختلف فى السعر هو اسعار الفنادق والسكن شعور بالامان والطمئنينة لما تشوف الدوله قادرة على السيطرة على الاسعار بالشكل ده غير الوضع فى مصر تماما عسكرى الشرطة والضباط فى غاية الادب والاحترام فى التعامل فلا تجد ظابط بيضرب مواطن على قفاه او بالشلوت ولا مقيم ايضا وبكا بساطة يمكنك ان تعترض وتناقش بدون خوف عكس مصر لا يمكن ان ترد على الضابط لما يوقفك وإلا انتو عرفين طبعا التامين الصحى وما ادراك ما التامين الصحى يكفى انك تروح تتعالج بكرامتك ويكفى انه يلزم القطاع الخاص بتحمل مسئوليته مش كل حاجه على الحكومه والمواطن الغلبان زى ما المستثنر بيكسب لازم يدفع ويلتزم والتزام المستثمر تجاه العامل مش بس مرتبه وخلاص اما فى مصر المستثمرين يكسبو المليارات والناس تتسحل فى مستشفيات الحكومه والا ازاى تضخمت ارصدت المستثمرين فى مصر زى عز و فرجلله بالله عليكم تعرفو كام مرتب العامل فى مصانع فرجلله فى برج العرب و المهندس وبيشتغل كام ساعه 12 ساعه ورادى صبح وليل ويكمل 4 ساعات مواصلات 6 ايام فى الاسبوع بالله عليكم دى عيشه ويوم الجمعه يروح يموت فى بيتهم ولو تعب او مرض يروح مستشفيات التامين الحكوميه وسلملى على الاستثمار وثماره

[abdulmuttaleb]

سيدي الكريم

se_Elsyed

تحية طيبة ولي تعليقات بسيطة ومختصرة شاكرا ومقدرا وقتكم الكريم،

طبعا بعد حمدا لـله على السلامة:

1-أنا أعمل في شركة في امتداد مكرم عبيد ولم أجرب انقطاع المياه إلا مرة واحدة خلال سنة وكان لبضعة ساعات.

كون المكان اللي حضرتك كنت فيه لديهم مشكلة في السباكة أو أن الموظف الإداري مثلا أحب أن يتنصل من المسؤولية ورماها على شركة المياه، أو أنه لغرض ما أحب أن يبدي لك شخصيا تذمرا من البلد والأحوال، فهذا أمر آخر، ولكن لا أعتقد أن يمكن تعميمه، علما بأنني أسكن في مدينة نصر أيضا.

2-الطين هو نتاج للتراب والغبار واختلاطهما بالماء، مش شايف مشكلة في كده، نحن دولة لدينا إمكانيات محددة والأرخص والأوفق لإمكانياتنا هو أن تحريك الاجهزة والمعدات للكسح بدلا من تجهيز الشوارع والأسفلت بتقنيات معينة قد تمنع مثل المنظر اللي حضرتك رأيته. أعتقد الوضع لدينا أفضل من دول مجاورة كانت تسبح في المياه:)

3-الطوابير: لماذا يا سيدي لوم الحكومة بنسبة مائة في المائة، تعمل ايه يعني الحكومة إذا كان فيه ناس لا دين ولا خلاق لهم يتاجرون في الدقيق المدعم، وآخرون يعذبون الناس ويظلمونهم في توزيع الحصص اليومية، وعاملون في المخبز يتعاملون لحسابهم ومصالحهم، وبالتالي فاللوم لا ينطبق فقط على الأجهزة الحكومية.

لا أدافع عن خطأ أو ظلم، ولكن فقط أريدأن أوضح أن العمل للوطن مسؤولية متكاملة للجميع، بل والـله لا أعفي نفسي من كوني شابا ربما لدي وقت أن أقف في ذلك الطابور بدلا من سيدة عجوز أو رجل مريض، وإن كنت ولا بد شانقا أحدا فابدأ بي.

ملحوظة على الهامش: تقابلت منذ بضعة سنوات أثناء الحج مع مأمور جمرك بميناء السويس أو رئيس وردية، مما قاله الرجل (وكنا بالإحرام يعني احتمال الكذب أو المبالغة ضعيف جدا) أن هنالك تعليمات شفوية عليا تصدر إليهم من الوزارة بعدم جمركة الحجاج القادمين على تلفزيوناتهم أو أجهزتهم الكهربائية حــتــى وإن تـجـاوزت حــد الـسـمـاح، وكان الرجل يحكي أنه أحيانا بعض الحجاج بيكونوا جايين ومجهزين نفسهم إنهم ح يدفعوا جمرك وبيقول في الصالة للمأمور أنا معايا مثلا أربع تلفزيونات وكذا كذا (اللي هو قانونا لازم يتجمرك)، فكانوا في الجمرك يطبطبوا عليه وحمدا لـله على السلامة يا حاج وخلاص يعدوهم.

تم تعديل 19 يناير 2011 بواسطة abdulmuttaleb

[shawshank]

عشان ما حدش يفهمني غلط فليس كل ما يشاهده الإنسان بيكون سيئاً لهذه الدرجة ..

شوف يا سي السيد باشا

ربنا خلق الناس واستخلفهم في كوكب الأرض. يعني إداهم كوكب الأرض ليهم إلى أن يرثها الله عز وجل. يبقى الكوكب ده بتاعنا كلنا احنا البشر. لظروف ما، اتقسم الكوكب على الناس. برضه لظروف ما خارجة عن إرادتنا، طلع نصيبنا في حتة من الكوكب اسمها مصر. تبقى مصر دي بكل ما فيها ملكنا، ملك المصريين. يعني مصر دي بتاعتنا احنا المصريين. واخد بالك؟ ملكنا احنا. يعني أنا ليا حق كبير أوي في البلد دي اللي أنا بملكها مع بقية المصريين. والحق ده اداهولي ربنا سبحانه وتعالى عشان يشوف هعمل فيه ايه، هاكون جدير بالخلافة واللا لأ. الحق ده اغتصبه ناس مصريين برضه زيي بالظبط. نهبوا حقي في نصيبي من كوكب الأرض. مش بس كده، قمعوا صوتي في إني أقول بعلو حسي: دول نهبوا حقي. (أو أنا "عايز حقي" زي الفيلم كده). يعني نهبوا حقي المادي في نصيبي من البلد أنا وغيري، ونهبوا حقي المعنوي كمان في الحرية. فأنا لما واحد يقول لي: يا سيدي مش انت عايش كويس ودخلك معقول؟ يبقى ايه المشكلة؟ ردي ببساطة عليه له وجهين: المادي والمعنوي. أقول له: آه عايش كويس الحمد لله، بس ده أد ايه من حقي؟ ده مش حقي أبدًا. لأن لما مرتب رئيس هيئة قناة السويس مليون جنيه شهريًا، ولما يبقى فيه من ميزانية البلد تريليون جنيه مفقودة، يبقى أنا باخد الفتات من حقي. غير كده إن اللي متوليين إدارة البلد، إللي أنا لي فيها نصيب، مش هما اللي أنا (ولا غيري من المصريين) عايزينهم. دول استبدوا بالبلد لصالحهم، وبالعافية كمان. يعني يا ريتهم مثلا استرضوا أصحاب الحق (اللي هم أنا وكل المصريين)، لأ. دول استبدوا بيها لصالحهم وليذهب أصحاب الحق للجحيم. ومنعوني إني أعبر عن كده عشان يحافظوا على اللي اغتصبوه من حقوقي وحقوق غيري من المصريين. والمنع ده استتبع قمع حريات مختلفة تانية ربنا اللي إداهالي وخلقنا كلنا احنا البشر بيها. فاهم حاجة؟

فالمسألة هنا ليها شقين: اللي أنا باخده أد ايه من حقي؟ وحريتي المفقودة راحت فين؟ يعني المميزات اللي معاليك بتقولها، أد ايه من حقنا تفتكر؟ وعلى الجانب الآخر، فين حريتنا في اختيار القائمين بإدارة حقوقنا في مصر؟ فين حريتي وحرية كل المصريين في إننا نقول: لأ ... أنا مش عايز ده يدير حقي في البلد. وبقية الحريات اللي ضاعت عشان خاطر المغتصبين يحافظوا على اللي اغتصبوه.

تحياتي لجنابك

[shawshank]

فعلا حيجيب لنا منين اذا كنا دولة من افقر دول العالم اقتصاديا

حضرتك فكرتني بالمفارقة الطريفة لما حسني مبارك قال نفس الكلام وهو قاعد في حديقة قصره في "شهادته للتاريخ" مع عماد أديب. المفارقة إن رئيس دولة قاعد في حديقة من أفخم ما يكون لقصر من أغلى ما يكون ويرتدي أفخر الثياب والصحفي بيقول له: مطالب المواطن البسيط لقمة ياكلها وقميص يلبسه وجزمة لابنه وعلاج لمراته. فيرد الرئيس بمنتهى الثقة في رسالة لشعبه: امكانياتنا على أدنا، واحنا دولة فقيرة، وأجيب منين.

[سكر]

مع احترامي لكل الاعضاء

مصر مش دوله فقيرة مصر دوله لا تستطيع ادارة مواردها بكفاءة

وعشان اكد الكلام شوف أي مكان حكومي في مصر من الى ميزانياته ضخمة او مشاريعه عملاقه الفلوس تتصرف على اية والاهدار بيكون قد ايه

كمثال وليس الحصر في طرق الصرف

مشروع فوسفات ابو طرطور

مشروع توشكي

مشروع الرقم القومي (تحول الى كارنيه نادى)

على الناحية الاخر شوف مشروع مستشفى السرطان ومشروع مجدى يعقوب

ده امثله فقط لطريقه الصرف

عايز تعرف الدخل

الناس بتكلم عن قناة السويس وكأنها بحر فلوس ابدا قناة السويس بكل اجلالها اقل بكثير من تحولات العاملين في الخارج

وقناة السويس د حسام بدراوي له مشروع اخر لاستفادة منها يحقق على الاقل 50 مليار جنيه في السنه ارباح

وهى اكبر مثال عن كيفيه استغلال الموارد

يعنى قناة السويس من ايام ديلسبس لم يحدث فيها قفزات بمعنى كلمة قفزات

واحلى كلمة سمعتها عن قناة السويس ان ثبات الوضع في قناة السويس ساهم بشكل كبير جدا في سرعة نمو الاخريين والكلان هنا موجه الى دبى

تحب مثل تانى

السياحة تقدر تقولي مصر نصيبها كام من الساحة الدولية على مستوى العالم

وتقدر تقولي هل في حاجة في مصر اسمها سياحة داخليه

اسعار الغرف للمصريين في اوقات كثيرة بتكون اغلى من الاجانب بحجة انه بدخل عمله صعبه وهو بيكون اصلا سائح شحات في بلدة

ومع اول اشاعة يهرب ومتلقيش سياحة داخليه تسندك في المواقف

عايزين تأنى ماشي

مصر البلد الوحيد صاحبة اختراع زراعة المباني

والحمد الله بنبنى على الأراضي الزراعية ونروح الصحراء نزرعها بألاف مؤلفه من الجنيهات هو ده مش اهدار في الثروة

بلاش لما تبقى مصر عايشه على مساحة 5% فقط من ارضها وتاركة الباقي صحرا

هل ينفع يكون متر الارض في المدن الجديدة 2200 جنيه من الوزارة وانت وحظك بقى الف القرعة

( راجع القرعة الحديثة)

ده فكر ناس عايز تعمر الصحراء ولا ناس عايزة تمص الى في جيوبك بحجة نقص الارض وارتفاع تكاليف المرافق

كفاية كدة عشان انا لما بسمع كلمة مصر دوله فقيرة بتعب نفسيا

هو في بلد فقيرة تجيب مدرب تدفع له 2 مليون جنيه في الشهر

وطبعا في ايجابيات في البلد ولى يقول غير كدة يبقى سلبى بس لها مداخله اخرى

[se_ Elsyed]

شكراً لكل المشاركين والمتفاعلين

نعود للمشاهدات السريعة نوعاً ما ...

- تقابلت في أثناء إجازتي مع أصدقاء الطفولة وهم يعملون في سلك التعليم وتحديداً مع أمين الشرطة الملقب بأحمد زكي بدر .... ومن قبل ما يحكو عنه .. فكلنا عارفين شخصيته وخلفياته وثقافته والبيت اللي إتربى فيه ....

- من ضمن اللي حكوه إنهم في رمضان الماضي أكتشفوا في حديقة الوزارة وخلف أحد أحواض الزرع .. أكتشفوا قطة مدبوحة وبدون رأس ومدفونه خلف الحوض ... طبعاص من قبل ما يكملوا عرفت إن ده سحر إسود معمولله يمكن يقطع الخلف هههههههههه .. لأ وفي رضمان على اساس يبقى مفعوله اقوى .... صاحبنا عرف وفضل يتنطط ويشتم كعادته بألفاظ نابية تدل على إنه متربي في الشارع مش في بيت محترم .... ملحوظة كل ده في رمضان ..

- بأعرف المدير أو الإداري الفاشل لما يركز على الهيافة ويسيب لُب الموضوع تماماً ... يعني بالله عليكم ... هل كل مسئولية وزير التعليم وإهتمامته تبقى التركيز على الحضور والانصراف والتوقيع إن وآوت وما يفكرش في حاجه من بعيد أو قريب عن تطوير التعليم أو جودته ؟ ...

هذا ما يفعله البيه

- ناهيك بقى عن الظهور بمظهر المُصلح والمطور ويرفد ده وينقل ده ويعاقب ده .. ويلف من الناحية التانية ويسكن أهل الثقة واللي تبعه ومختارهم بعناية عشان دمهم خفيف لتلك المناصب الشاغرة نتيجة معاقبة أصحابها ... واللي إتسكنوا دول لا علاقة لهم بالتعليم إطلاقاً .

--------

قابلت من زملاء أيضاً رجعوا من السودان لأنتهاء فترة عملهم هناك بفرع وزارة التعليم المصرية ... وأول حاجه سألتها كانت عن اللي شافوه وأحوال الجنوبيين في الشمال ...

- وكنت متوقع الإجابة ... معاملة ولا معاملة الكلاب الضالة .... وبخباثة سألت واحد فيهم : لما بيتقال حي " مايو " في الخرطوم بتاع الجنوبيين .. إيه الإنطباعات اللي بتيجي في دماغ السودانيين ؟ فقال لي كلميتن وبس " مخدرات ودعارة " من الفقر وعدم وجود فرص عمل لهم .. لان الجنوبيين مكتوب عليهم يشتغلوا في أحقر الأعمال ... بيقول لي لما أم سودانية تحب تهدد إبنها وتأدبة وهو صغير تقللو له : إوعى تلعب مع العيال السود الجنوبيين أحسن أموتك !!!!!!!!!!!!

وسكن الجنوبي عبارة عن عشه صفيح في أقرب مكان لعماير وبيوت الشماليين .. وبيجيي يتمترس جنبهم ويلم الزبالة بتاعتهم ويصنفها ويحاول يبيعها لو كانت تنفع تتباع ..

وفرجوني على شوية صور ملتقطة بالموبيل .. شيء بشع وعنصرية من رحم عنصرية ... ومن حقهم ونص إنهم ينفصلوا ويحسوا إنهم بني أدمين بصراحة ..

[om marawan]

والحمد الله بنبنى على الأراضي الزراعية ونروح الصحراء نزرعها بألاف مؤلفه من الجنيهات هو ده مش اهدار في الثروة

بلاش لما تبقى مصر عايشه على مساحة 5% فقط من ارضها وتاركة الباقي صحرا

هل ينفع يكون متر الارض في المدن الجديدة 2200 جنيه من الوزارة وانت وحظك بقى الف القرعة

( راجع القرعة الحديثة)

ده فكر ناس عايز تعمر الصحراء ولا ناس عايزة تمص الى في جيوبك بحجة نقص الارض وارتفاع تكاليف المرافق

كفاية كدة عشان انا لما بسمع كلمة مصر دوله فقيرة بتعب نفسيا

هو في بلد فقيرة تجيب مدرب تدفع له 2 مليون جنيه في الشهر

وطبعا في ايجابيات في البلد ولى يقول غير كدة يبقى سلبى بس لها مداخله اخرى

اوافق حضرتك على نقط كتيرة لكن لو ممكن اعلق على اخر نقط

البناء فى الارض الزراعية صدرت قرارات عديدة بمنعه واللى كانوا بيبنوا اصحاب الاراضي بعد ثورات واعتراضات ومحاولات لتبوير الارض

واهمال الفلاحين فى زراعة الارض واتجاههم للسكن فى المدن والعشوائيات

والحقيقة انى اوعى على جزء كبير من الاحداث دي واعتقد انها فى فترة كان فيه قرار بالحبس للي يبنى فى ارض زراعية ويمكن مازال موجود وطبعا الناس بتشتكي

زراعة الصحرا واستصلاح الاراضى كمان ظهر فى الوقت ده وكان وقتها كل الدعاوى اننا لازم نخرج من الشريط الاخضر الضيق

وان فيه سوء توزيع للكثافة السكانية

اما عن متر الارض فى القرعة الجديدة فبالفعل فيه زيادة كبيرة فى تكاليف المرافق

والنهارده انا باخد الارض والدولة ملزمة توصل لى كهربا للشوارع ومرافق ومياه شرب وصرف صحي لحد المنطقة اللى بابنى عليهاوطبعاده لايمنع ان الدولة ممكن تكون بتكسب نسبة وده حق مشروع بما ان اللى هياخد الارض مش من محدودي الدخل

فعلا فيه سلبيات كتيرة لكن مش معناها ان كل ميزانية الدولة مسروقة

ولا هم واخدين كل حاجة وسايبين الناس جعانة والا مش قادرة فعلا افسر لمين كم الشقق اللى اتباعت وبتتباع فى المدن الجديدة اللى انا شخصيا اوعى ان ماكنش فيه ولا مدينة منهم من حوالي 20 سنة

المدن الجديدة وان كانت الدولة لم تنشئها كاملة بالفعل فهي شجعت على وجود افراد وشركات عقارية وقدمت لهم مرافق للمناطق اللى هيبنوا فيها

صحيح احنا ماشيين أبطأ من السلحفاة وفيه تهاون كبير من الحكومة واستهتار وتقصير فى امور كتيرة لكن انا بس باحاول اكون موضوعية فى تحديد نقاط النقص فى الحكومة بانى انظر للصورة العامة سلبياتها وايجابياتها

معلش يا استاذ موعود الرد مش مقصود بيه رد على كلام حضرتك تحديدا لكن حضرتك قلت اننا هنقول شوية ايجابيات

ملحوظة اخيرة

اعتقد ان اجر المدرب بتاع الاهلى مش مدفوع من الدولة وانما هي ميزانية النادي اللى كمان بييجي جزء منها كبير من الاعلانات

انا امبفهمش فى الكورة لكن اعتقد كده

تم تعديل 20 يناير 2011 بواسطة om marawan

[سكر]

الاخت ام مروان تحيه طيبه

شاكر جدا على ردك على مداخلتى ولى تعقيب صغير

والحقيقة انى اوعى على جزء كبير من الاحداث دي واعتقد انها فى فترة كان فيه قرار بالحبس للي يبنى فى ارض زراعية ويمكن مازال موجود وطبعا الناس بتشتكي

عارفه الناس اشتكت ليه

عشان عايزين الاراضى الزراعيه تتباع عشان دخلت كردوان مبانى وبقت بالمتر واصبح الفلاح فى اقل سنوات معدودة مليونير

روحى شوفى شارع فيصل ناحية اليمين اتجاة الرمايه كنت بخاف امشى هناك عشان الاراضى الزراعية دلوقتى بقت كتل خرسانات ويارتها مخططة

برج 13 دور فى شارع عرضه 6 متر يبقى دة معناة عدم وجود دوله بتخطط والقانون حبر على ورق

لايمنع ان الدولة ممكن تكون بتكسب نسبة وده حق مشروع بما ان اللى هياخد الارض مش من محدودي الدخل

اسمحى لى ارفض فكر الدوله التاجر لان ليس هذا من مهام الدوله التربح من ارضها

وبالنسبه لتكاليف المرافق استحاله يكون فرق السعر فرق سعر مرافق

الوزير بيقول الاسعار زادت عشان التضخم بنسبه 10 % تقوم انت مزود السعر ولا تنقصه

فعلا فيه سلبيات كتيرة لكن مش معناها ان كل ميزانية الدولة مسروقة

اتفق معك فى ذلك وفعلا فى شرفاء كثير بس مش على وش القفص

صحيح احنا ماشيين أبطأ من السلحفاة وفيه تهاون كبير من الحكومة واستهتار وتقصير فى امور كتيرة

العدل البطى ظلم

اعتقد ان اجر المدرب بتاع الاهلى مش مدفوع من الدولة وانما هي ميزانية النادي اللى كمان بييجي جزء منها كبير من الاعلانات

انا امبفهمش فى الكورة لكن اعتقد كده

يجى من النادى يجى من الاعلانات حتى لو جيه من التبرعات مش هى دة القضيه ولكن المبلغ دليل قاطع على وجود الاموال

وهى الاعلانات هتيجى منين لو مكانش فى فلوس فى البلد اصلا

شوفى المرتب دة من صورة اعلى وليس من منظور من يدفع

وفى النهايه تحياتى وارجوا مكنش ضايقتك بالرد

تم تعديل 20 يناير 2011 بواسطة موعود

[om marawan]

الاخت ام مروان تحيه طيبه

شاكر جدا على ردك على مداخلتى ولى تعقيب صغير

والحقيقة انى اوعى على جزء كبير من الاحداث دي واعتقد انها فى فترة كان فيه قرار بالحبس للي يبنى فى ارض زراعية ويمكن مازال موجود وطبعا الناس بتشتكي

عارفه الناس اشتكت ليه

عشان عايزين الاراضى الزراعيه تتباع عشان دخلت كردوان مبانى وبقت بالمتر واصبح الفلاح فى اقل سنوات معدودة مليونير

روحى شوفى شارع فيصل ناحية اليمين اتجاة الرمايه كنت بخاف امشى هناك عشان الاراضى الزراعية دلوقتى بقت كتل خرسانات ويارتها مخططة

برج 13 دور فى شارع عرضه 6 متر يبقى دة معناة عدم وجود دوله بتخطط والقانون حبر على ورق

النقطة دي وذكر حضرتك للعدل البطيء اؤيدها تماما لانه من اصعب المشاكل بطء تنفيذ القرارات واحيانا عدم تنفيذها

يعنى أؤكد لحضرتك ان العقارات دي مخالفة والمفروض ان مجلس المدينة كان ياخد فيها قرار سريع ويتم هدمها

تعرف حضرتك ان الاماك دي تعد عشوائيات لانها زي ماحضرتك قلت بدون تخطيط

لابد من سرعة الضرب على يد المخالف زي ماحصل فى اسكندرية صحيح ناس كتير زعلت

لكن فى النهاية كله بيخضع للقانون طالما يساوي بين الجميع

المشكلة انه هتلاقي برضه اللى بيصرخ كل يوم من ضياع امواله طيب وهو بنى من مخالف ليه ؟؟

توسيع رقعة المباني امر طبيعي نتيجة الزيادة والموضوع فضل فترة فيها تنازعات كتير بين الناس والمسئولين

الدولة مخطئة فى عدم تغريم وهدم كل المخالفات لكن للاسف الناس شاركت فى اللى حصل

وده اللى باعنيه لما باقول ان فيه كتير من الشعب مستفيد من الفساد

لايمنع ان الدولة ممكن تكون بتكسب نسبة وده حق مشروع بما ان اللى هياخد الارض مش من محدودي الدخل

اسمحى لى ارفض فكر الدوله التاجر لان ليس هذا من مهام الدوله التربح من ارضها

وبالنسبه لتكاليف المرافق استحاله يكون فرق السعر فرق سعر مرافق

الوزير بيقول الاسعار زادت عشان التضخم بنسبه 10 % تقوم انت مزود السعر ولا تنقصه

هو انا ماعنديش فكرة تامة عن التكلفة او نسبة الزيادة لكن اكيد من مصلحة الدولة بيع الأراضي دي بسرعة وتعميرها لانها بتفتح مجالات للاستثمار فى مناطق جديدة

ربما تكون الدولة بتكسب منها وده دخل للخزانة وربما تكون مابتكسبش فعلا او انها بتعمل حساب زيادة التكلفة القادمة

لكنها تظل نقطة لا تندرج تحت بند الفساد أو التضييق على محدودي الدخل وربما تعد نوع من انواع عدم توفير التسهيلات

اعتقد ان اجر المدرب بتاع الاهلى مش مدفوع من الدولة وانما هي ميزانية النادي اللى كمان بييجي جزء منها كبير من الاعلانات

انا امبفهمش فى الكورة لكن اعتقد كده

يجى من النادى يجى من الاعلانات حتى لو جيه من التبرعات مش هى دة القضيه ولكن المبلغ دليل قاطع على وجود الاموال

وهى الاعلانات هتيجى منين لو مكانش فى فلوس فى البلد اصلا

شوفى المرتب دة من صورة اعلى وليس من منظور من يدفع

وفى النهايه تحياتى وارجوا مكنش ضايقتك بالرد

بالعكس انا اسعدنى رد حضرتك طبعا

انا مع حضرتك تماماااااااااا فى ان فيه فلوس فى البلد وكتير جدا واللى باقوله انها لا تقتصر على الحكومة ولا ( النظام واعوانه لوحدهم ) ولكنها تشمل شريحة كبيرة من المجتمع منهم اكيد كتير شرفاء ومنهم مستفيدين من وجود العدل البطيء والتهاون زى ماحضرتك ذكرت

وللاسف يقع بين المطرقة والسندان كتير من البسطاء اللى هم مسئولين بالدرجة الاولى من الحكومة وثانيا منا كافراد فى مجتمع واحد

تقبل تحياتي وشاكرة سعة صدرك

تم تعديل 20 يناير 2011 بواسطة om marawan

[سكر]

بالنسبه للايجابيات فى مصر التى لاحظتها حتى الان

زوجتى تشكر جدا فى المدرسه فى مصر كمنهج وتعليم وترفض تماما مدارس الرياض برفم ان فرق السعر تقريبا الثلث لصالح مصر

الانترنت فى مصر شى ممتاز مفيش حاجة محجوبه ولا بروكسى ولا الكلام الكبير الى ممكن تشوفه وانت على النت فى بعض الدول الاخرى

ودة من باب حريه ابداء الراى وفعلا الناس فى مصر بتكلم زى ماهى عايزة على النت والفضائيات

لحد الكلام فقط بس احسن من ناس لا بتتكلم ولا بتتحرك

فى انفتاح اكثر على كل ما هو جديد فى العالم افتكر زمان كان شراء الاجهزة الكهربائيه متعة من دول الخليج

حاليا تغير المفهوم ومحدش بيجيب حاجة غير لما يكون عايز يستعملها فى الاول وبعدين تروح مصر

الموتوسكلات والعربيات الجديدة فى كل حته فى مصر زدة دليل على ارتفاع مستوى الدخل ولكن مش بطريقه احمد عز

محلات الموبيلات بقت كثيرة جدا بدرجة ملحوظه

[se_ Elsyed]

إلى المغرضين الذين يريدون ضرب الوحده الوطنية والتفرقة بين المسلمين والمسيحيين ...

حضرت موقف في مصر يدُل على مدى التلاحم بين نسيجي الأمة ...

- زوجة بنت خالتي بيوصلها للمدرسة الأسبوع الماضي ... هي ناظرة مدرسة ... ووقف يادوب أمام المدرسة بيزنلها على جنب وأمامه سيارات أخرى .. تقوم جايه عربية مُسرعة ومصطدمه به من الخلف وهو يخبط في اللي أمامه وسيارته بقت عبارة عن علبة سردين مطبقة من اخلف والامام ... وما زاد وغطى هو إن في رجل كبير صاحب عيال كان بيعدي بين السيارات راح محشور بين السيارات المصطدمة وأتدمر تماماً وهو الأن في العناية المركزة

- طلعت الست دي مسيحية .... وطبعاً زوج بنت خالتي مسلم .... والراجل المسكين الضحية طلع مسيحي ... أتصل قريبي باخويا وجاله جري لقى المنظر لا يسُر عدو ولا حبيب و3 سيارات أتدمرت تماماً وراحوا جميعاً قسم الشرطة وجه زوج السيدة ومعاه المحامي بتاعهم ... وأتصلوا بمين ؟

أتصلوا بالمهندس الفني اللي بتنتدبة الشرطة لفحص السيارات في الحوادث وتقديم تقرير فني ..... هما اللي إتصلوا به خلوا بالكم ..

مين بقى فاكر فيلم الزوجة الثانية لما المأمور جه للتحقيق في بلاغ سرقة ضد أبو العلا مُقدم من العمدة عشان يضغط عليه ويطلق مراته عشان العُمدة يتجوزها .. فجاب فطير وبط وحمام للمأمور وقعد هو اللي يكتب المحضر سين ... ويجاوب على نفسه جيم كل ده وهو بيلغ في الأكل ؟

اهو المهندس عمل كده وكتب التقرير في قسم الشرطة من غير ما يشوف العربيات ولا يسمع عنها في طبق اليوم وذلك بناء على كلام كان بيمليه له المحامي بتاع الست هههههههههههههه.... يعني العملية في بيتها وبيننا وبين بعضينا

وطلع المهندس مسلم بسلامته .. وكتب في التقرير إن هناك سيارة أخرى أصطدمت بسيارة هذه السيدة المجرمة وفرت هاربه وطبعاً دفعتها للامام وبالتالي هي بريئة براءة الديب من دم إبن يعقوب ..

فأخويا قال له إتقي الله إنت شوفت السيارات أصلاً عشان تكتب كده ؟

طب السيارة لو مصدومة من الخلف .. مش هايبان ده ولا هاتبقى مسكوفة وتداري ؟

فقال له:لو سمحت...إنت بتشكك في ذمتي ؟

واتطرمخ الموضوع واتقفل عليه وكل واحد يلملم جراحه بنفسه

فقلت في عقل بالي ...عاش الهلال مع الصليب .. وكلنا في الفساد سواء .. وعاشت مصر حلوه ومستقرة

[سكر]

لما ولدتى دخلت المستشفى شفاة الله

كنت مش قادر اسيطر على بعض الامور

المهم وانا ماشى فى طريق العليا اخدت مخالفه سرعة على 96 كم ودفعت 500 ريال والصراحة زعلت

عدى ثلاث ايام ونزلت مصر وزرت ولدتى فى المستشفى وانا خارج منها بعد نصف كم وجدت زحمة كبيرة وهرج ومرج وانا ماشى بالعربيه

وكنت مركز فى حال ولدتى وفجاة

طلع عسكرى من تحت الارض والعربيه واقفه وواكد السيارة واقفه من زحمه المررو وقالى

الحزام .... رخصك ......

40 غرامة حزام

طيب ياعم اركن على جنب علشان الزحمة والطريق

هو انتى فاكرنى انا هجرى وراك رخصك

المهم دفعت 40 جنيه ومشيت

موقف الرياض والقاهرة كلهما انا المخطى ولكن

السوال انا حزنت على 500 ريال بتوع العليا لما دفعتهم

بس 40 جنيه بتوع الحزام حسيت انى اثبت فيهم واتاخدت غدر وضايقنى اكثر

حد يقدر يفسرلى ليه انا زعلت على 40 جنيه اكثر من 500 ريال ؟

[se_ Elsyed]

نكمل المشاهدات

- بيت العيلة في منطقة في القاهرة مشهورة بإنها أثرية .... نزلت المره دي لقيت مش عماير جديدة ظهرت في لمح البصر .. لأ .. دي ناطحات سحاب ... سألت هو في إيه هو الحاجات دي طلعت امتى وإزاي إشتروا البيوت اللي كانت مكانها ؟

وجاني الرد وهو عبارة عن حكمة وقول مأثور يقول " لو عاوز تغتني من غير ما تحتار .. عليك وعلى تجارة الأثار "

بقت صرعة وموضه وهوجه .... ناس في المنطقة تحولوا إلى " مليارديرات "

هاقول تاني ... مش مليونيرات .. لأ مليارديرات ودي مش مبالغه ... وضحكت لما عرفت إن منهم ناس كانوا زمايلي في المراحل الدراسية إبتدائي وأعدادي وثانوي ... وعرفوا السكة ومشيوا فيها .... وفي منهم ناس كنت قولت لكم إنهم رشحوا نفسهم في مجلس الشعب

- الموضوع زي شكت الدبوس ... بينشنوا على البيت من دول ... وما أعرفش معاهم أجهزة ولا إيه .... وييجي يستشكفوا .. ولما يلاقوا إن البيت عليه العين وتحته سبوبة ... لو البيت يساوي 100 الف .. عادي انهم يدفعوا فيه ملايين وساعات بيشتروا كذا بيت جنب بعض عشان الشغل يبقى على كبير ... يروحوا هدين البيت ومحوطين بكردون على أساسا إنهم يحفروا بمزاج

نكمل بعدين

[سكر]

نكمل بعدين

من غير ما تكمل النهايه معروفه بس السوال

هو المسؤليين مش عارفين

لو مش عارفين تبقى مصيبه

ولو عارفين تبقى مصبتين

[se_ Elsyed]

نكمل بعدين

من غير ما تكمل النهايه معروفه بس السوال

هو المسؤليين مش عارفين

لو مش عارفين تبقى مصيبه

ولو عارفين تبقى مصبتين

أقول لك حاجه يا موعود ؟

هما المسئولين مش عارفين تجار المخدرات بالإسم ؟

طب تعرف يعني إيه مرشد مباحث وبتبقى إيه كينونته ؟ ووظيفته

عارفين سيادتك ومش بيقع غير الصغير قوي والعبيط

-----------

نكمل

يقولك بقى ...بعد ما يحفروا .. يروحوا مخرجين "المصلحة " إسمها كده في عرفهم ... ويسلكوها .. وينتعوا العمارة التمام ويبيعوها شقق تمليك ... وتبتدي مرحلة غسيل الأموال

بأتناقش مع أخواتي ومع بعض اللي لهم علاقه بالموضوع ده هناك .. وشاوروا لي على منطقة فيها كما بيت كده لكن شكلها راقده على مصيبة .. وقالوا لي إن في مزاد اليومين دول بين المهتمين بتلك الموضوعات ووصلوا ثمن المنطقة والكام بيت إلى

تخيلوا كام ؟

80 مليون دولار

!!!!!!!!!!!!!!!!!

يا نهار مش فايت .....

[capitshino]

نكمل

يقولك بقى ...بعد ما يحفروا .. يروحوا مخرجين "المصلحة " إسمها كده في عرفهم ... ويسلكوها .. وينتعوا العمارة التمام ويبيعوها شقق تمليك ... وتبتدي مرحلة غسيل الأموال

بأتناقش مع أخواتي ومع بعض اللي لهم علاقه بالموضوع ده هناك .. وشاوروا لي على منطقة فيها كما بيت كده لكن شكلها راقده على مصيبة .. وقالوا لي إن في مزاد اليومين دول بين المهتمين بتلك الموضوعات ووصلوا ثمن المنطقة والكام بيت إلى

تخيلوا كام ؟

80 مليون دولار

!!!!!!!!!!!!!!!!!

يا نهار مش فايت .....

انا شارى .

[سكر]

بأتناقش مع أخواتي ومع بعض اللي لهم علاقه بالموضوع ده هناك .. وشاوروا لي على منطقة فيها كما بيت كده لكن شكلها راقده على مصيبة .. وقالوا لي إن في مزاد اليومين دول بين المهتمين بتلك الموضوعات ووصلوا ثمن المنطقة والكام بيت إلى

تخيلوا كام ؟

80 مليون دولار

خلاص كدة يا سى السيد انت كدة جبت من الاخر احنا هنبطل سفر وانا موجود حاليا فى مصر

اعمل زى البرادعى وافتح توبك جديد على المنتدى اطلب من كل الاعضاء يعملوا توكيلات ويطلعوا الى تحت البلاطه

وانا فرارة هخلص المصلحة دة بلا سفر وغربه يا عم خلينا نقب على وش الدنيا

فكرتنى بتمثليه المال والبنوان ياحاج سلامة فراويلة

[se_ Elsyed]

خلاص كدة يا سى السيد انت كدة جبت من الاخر احنا هنبطل سفر وانا موجود حاليا فى مصر

اعمل زى البرادعى وافتح توبك جديد على المنتدى اطلب من كل الاعضاء يعملوا توكيلات ويطلعوا الى تحت البلاطه

وانا فرارة هخلص المصلحة دة بلا سفر وغربه يا عم خلينا نقب على وش الدنيا

بلا توكيلات بلا شهر عقاري يا موعود

Money talks

صفي نهاية خدمتك ... على ثمن الكورولا على شوية العفش اللي عندك ... وجمد 85 مليون دولار وأنزل إضرب المزاد بخمساية زيادة وإحنا في شهرك ياريس ...