لو ما قعدش ساكت حاحبسك فى اوضة الفيران- مين بيخاف من الفيران

[اغابي]

اولا حمد لله على سلامتك يا اغابى

ايوه كده نورتى المحاورات من جديد بس اول ماتبتدى فيران ...فيران يااغابى

بس فكرتينى بحادثتين مش باقدر امسك نفسى من الضحك لما يجوا على بالى

تانى مرة بعد ماتزوجت كنت بازور امى فى الوقت ده البيت الملاصق لبيتها فى مخزن ورق بمجرد فتح بابه الفيران تخرج

واقرب باب لهم بيتنا وكنت طالعة على السلم باولادى واختى باولادها وكنت اول واحدة اوصل الشقة وسمعت العيال

بتصرخ تحت فار بيجرى تحت رجليهم طالع على السلم لاقيت نفسى جريت دخلت الشقة وقفلت الباب ورايا فى وشهم

اتاريه عدى على رجل اختى الكبيرة وطلعت بهدلتنى بتقولى انا حاطلع اخنقك على ضوافره الخشنة اللى خربشتنى

وانت السبب عشان قفلت علينا الباب رغم ان اختى دى جريئة و قلبها جامد وكانت بتشرح ضفادع وصراصير

الموضوع عندى انى باقرف منهم اوى وخصوصا البرص كنت حانط من البلكونة لما ايدى جت على واحد فى الشيش

لولا والدى مساكنى على اخر لحظة

كفاية ياختى احسن بيجوا على السيرة ربنا يجعل كلامنا خفيف عليهم

الله يسلمك يا هند - المحاورات منورة بيكم وشكرا جزيلا

بالنسبة للرجوع لازم يبقى بموضوع قوى زى الفيران - :) وانا حسيت انى لو نزلت بموضوع عن الاسود ما كنش هيجيب نتيجة زى موضوع الفيران

المهم بقى فى الموقف اللى بالازرق داه عاوزة اقولك ان الندالة فى الزمن داه جدعنة بجد

يعنى انت سيبتى كل العيال واختك واهم حاجة نفدتى بجلدك انت وبس

طب تراهنى ان لو كان اللى بيجرى وراهم نمر او اسد كنت فى منتهى الشجاعة هتطمنى ان اللى دخل الشقة الاول

اولادك واولاد اختك واختك وانت اخر واحدة لكن الموقف اتغير اهو لان اللى كان على السلم فار

عرفتى ان الفيران مرعبة عن الاسووود

صدقتيني

[MZohairy]

ابويا بقى الله يرحمه سنة 45 كان لسه شاب صغير

و فوجئ بفار يرتع في جنبات المنزل في المصيف

و بعد محاولات عديده شديده شهيده فريده لمدة اسبوع فشل فشل زريع في اصطياده

لغاية ما ربنا وفقه في يوم و حشره في كورنر بعصاية مقشه

و طبعا من كتر غيظه المتراكم لمدة اسبوع فضل حاشر الفار بعصاية المقشه في الكورنر

و راح جايب جاز او بنزين و دلقه عليه و راح رامي عليه عود كبريت مولع و فضل الفار يتأوه حرقا و يحاول يفلفص و العصايه زانقاه زنقه لا فكاك منها

لغاية ما زهقت روحه البريئه في تمام الخامسه عصر السابع من يوليه 1945

مانجيلكمش في حاجه وحشه

[اغابي]

حكايتي مع الفيران

انا انا اللي بينكم هنا مشيت ولا اشتكيت

و لا جيت في يوم بكيت و لا قلت يوم انا انا

لا عتاب حيشفي جراح ولا حيجيب اللي راح

دي حكايتي مع الفيران حكايتي مع الفيران

رسملي على السما جنه فيها الهنا

و قال حنعيش هنا قلت احلوت سنيني

و بنالي في الخيال قصور من الآمال

و قال مفيش محال نمت و غمضت عيني

دي حكايتي مع الفيران

من زمان (بتاع 19 سنه كده) و ايام ما كنت لسه جديد في السعوديه و ماعندناش ولاد و نايمين بالليل و اذ نسمع صوت حاجه بتتحرك تحت السرير :blink:

ايه ده؟ لألألألأ دحنا رجاله قوي و مابيهمناش :closedeyes:

قولت لمراتي بشجاعه: ابعدي انتي انا حشوف ايه اللي تحت السرير bsh:)

شلت المرتبه و اذ افاجأ بفار عتيد

روحنا خارجين من الأوضه فورا و قفلنا الباب و نمنا في الصاله :closedeyes:

فات كتير على الكلام ده؟

4 ايام بلياليهم

و احنا الاتنين نايمين في الصاله و الفار نايم في اوضة النوم لوحده :sad:

نحطله سم نحطله لزق نحطله جبنه نحطله شيشه ....ولا الهوى و مفيش اي فايده

قولت ما بدهاش بقى ياض يا Mzohairy

رحت لابس الجزمه الكاوتش

و رابط راسي بأستك زي بيورن بورج بطل العالم في التنس و واخد عصايه محترمه و داخل و قافل عليا الباب

و بقينا انا و هو ولا حد تالتنا انا و هو انا وهو و بس

بذلت مجهود خرافي في تتبعه لغاية ما ربنا وفقني و عرفت اخرجه من مكمنه

و طاردته لغاية ما لقيته بيتسلق سلك التكييف و طالع متجه لشباك التكييف علشان يستخبى جواه

وقفت قصاده و انا ماسك العصايه

و تربصت له و بقينا وجها لوجه :blink:

و عنينا جت في عنين بعض (كأنه بيبصلي البصه الأخيره)

و بكل ما اوتيت من قوه رزعته عصايه على دماغه و دماغ اللي جابوه

وقع على الأرض بدون اي حركه

جبت منديل و كفنته و رميته في الزباله و انا حاسس بزهو smk:

و رجعنا ننام تاني في اوضة النوم بسلام

ايه الشجاعة دى يا زوهيري الشجاعة انك تعترف انك بتخاف من الفيران او انك ما تقدرش تبات فى الاوضة اللى فيه فار انشالله تعيش كل ايام حياتك نايم فى الصالة مش مهم - المهم ان دى برضوه شجاعة

المشكلة انا معروفة على مستوى المحيط العائلى انى اترعب من الفيران

وفى مرة زرت اخت جوزى واحنا وواقفين فى المطبخ هى بتطبخ وانا شغالة ارغى معاها واسمع صوت واسالها ايه الخربشة دى تقولى يمكن الهوا بره شديد على الشباك فبيحرك البلاستيك اللى مغلفين بيه الشيش وكل شوية اسمع الصوت جوة المطبخ

وبعدين قولتلها لا داه مش صوت هوا - راحت بشويش حاولت تفتش على مصدر الصوت وراحت قالتلى نا لمحت ديل فاااااار

هى قبل ما تكمل الكلمة هى وانا خارجين من المطبخ نصراخ بصوت عالى جدا ونزق بعض - نوع من الندالة - وبره موجودين ضيوف كتير اخوات جوزها وجوزها وجوزى

ولما خرجنا من المطبخ بالمنظر البششع داه هما جريو بالبطاطين ودخلو المطبخ لانهم افتكرو ان فى المطبخ حريقة راحو يطفوها

طبعا انا لاقونى فى ثوانى فى الشارع تحت العمارة وهى اجبن منى احنا خرجنا من باب المطبخ على باب الاسانسير

ولا نعرفهم

احلى الذكريات

عملنا فضيحة فى العمارة - بس اتاكدنا انه فار

بجد انا لا ممكن رضيت اطلع فوق تانى على بيتى علطول ولا فيا اعصاب

تم تعديل 22 يناير 2011 بواسطة اغابي