ــــ 3ـــ طلبـــات وبــس - و مصباح علاء الدين

[اغابي]

اكيد بتيجي اللحظة دى لكل واحد مننا لما يبقى الواقع مؤلم -ومفيش منفس له غير الاحلام

فانا وصلت معايا لكدا يعنى- فقولت افكر لو لقيت الفانوس السحر - وطلعلى المارد العجيب وقالى

هاهاهاهاهاها - شوبيك لوبيك - خدامك وبين ايديك - تطلب ايه ؟؟ هاهاهاهااهاهااها

بس 3 طلبـــات يا موصطفى

1-

2-

3-

بصراحة انا فكرت شوية

ووصلت لاول طلب واهم طلب عندى - بس الاول

اشوف حكايتكم مع المصباح السحرى

هتطلبو ايه فى الاحلام ما دام الواقع بقى صعب اوى كدا ؟؟؟؟

[mekkawy]

مبتكر الموضوع ده و حلو أوي

تحياتي يا مسز أغابي كالعادة

شوفي يا ست ولا سيدك الا ماهو أنا مينفعش نخلي الأمنيات 30 بدل 3 .. الصفر يعني مش هيعمل حاجة و بعدين في العصر الحديث المارد بيحقق سبع امنيات .. فكي ايدك شوية دي أحلاااااام و الأحلام ببلاش .. يا ستير يا شيخة ع البخل ايه ده!!!!

خليهم سبعة اشيخة بالله عليكي .. بس من منطلق إنهم 3 هأقول و أمري لله

1- يغور الحاكم الظالم و ييجي حاكم عادل (و دي هييجي تحتها حاجات كتييييييييييير أوي هتتحقق)

2- يكون عندي بيتي الجميل اللي بحلم بيه مش مهم كبير بس مهم يكون جميل

3- عاوز أطير شوية

بس خلاص

مكاوى .. ويشز

[م تيمور المراغي]

بسم الله الرحمن الرحيم ,, الاجابه

1 - الحاكم الظالم يفضل

2 - البيت مايطلعلوش رخصة بناء

3 - مكاوي مايطيرش

[raouf]

- اطلب ان العفريتيدينى 30000 بدل من 3

- ثانى طلب ان العفريت يعيش معايا طول العمر مايسبنيش-

- ياخدنى انا واولادى ومراتى نعيش فى جزيرة بعييييييييييده يكون بها كل وسائل الراحة والحياة الفطرية بعيدا عن التلوث ولالكترونيات وكل مظاهر الحياة العصرية الحديثة

[اغابي]

ايه داه

هى الناس ما بقاش عندها امنيات

يا حراااااام صعبتم عليا

الواقع مؤلم اوى يا جماعة قضى على الاخضر واليابس

فاصل

وارجعلكم بامنياتى

[hOuSsAm]

حلو الموضوع ده يا اغابى

بصى يا ستى الاحلام كتيرة والامنيات اكتر

انا هستعبط عالفريت واطلب 5 وهقنعه ان الخمسة والتلاتة ولاد عم (كلها اعداد فردية :)

1- ان ربنا يرزقنى راحة البال

2- احفظ القران

3- اخلص الدراسة بتاعتى :D

4- اتعلم فرنساوى واعرف اكتب شعر كمان

5- ................................. خليها بينى وبين نفسى (بس لو هى اتحققت,,,, الاربعة اللى فوق هيتظبطوا)

تحياتى

[عنبو]

بسم الله الرحمن الرحيم ,, الاجابه

1 - الحاكم الظالم يفضل

2 - البيت مايطلعلوش رخصة بناء

3 - مكاوي مايطيرش

تيمور بيتمنى واحنا معاه

كل هذا الراجل يا هندزه المهم ان ميكاوى ( مكاوى ) يفضل كده

[رضوي]

اغااااااااااااابي

ايه دة يابنتي ........ 3 بس ........

طيب

طبعا علشان احنا مصريين وبنحب الفهلوة يعني هقولك هطلب ايه

1- ان العفريت يحققلي 100000 امنية ( ودي كانت اول امنية اللي احتمال تكون ضاعت بسبب الفهلوة )

2- اني اخلص اجزء الباقي من الرسالة واخد ادرجة بالتداول ( مع ان ساعتها مش هيبقي ليها طعم )

3- ربنا يشفى كل المرضى ويخفف آلامهم ...... ويعطي كل محتاج ومحروم ( مع اني لو كنت سبب في حاجة زي دي هحس بسعادة لامثيل لها )

لسة عندي 99997 امنية لسة هيحققهوملي

بس اقولك علي حاجة

ليت المطالب بالتمني ولكن تؤخذ الدنيا غلابا

اكيد مش هيبقي للحياه طعم من غير الملح والشطة ............. ماينفعش تكون عسل كلها

بقولك ايه ............. خدي دي

[Dreamwithme]

ياه يا غيبو لو علي الأمنيات دي ماتعديش

والجني هيهرب مني علي طول من كتر الأمنيات

عايزة أمنيات حقيقية ولا خيالية؟! كله موجود أنتي بس أختاري بس هو صعب أني أحصرهم في 3 بس بس عشان خاطرك أحاول

الأحلام الحقيقية:

1-أخلص الدكتوراة وأشتغل في مكان غير اللي أنا فيه

2-ألاقي نصي التاني

3-يكون عندي أنا وأخواتي بيت علي البحر مباشرة

الأحلام الخيالية شوية:

1- أني أقوم برحلة بحرية حول العالم لمدة شهور

2- أعيش علي جزيرة معزولة أنا واللي بأحبهم فقط

3-أمتلك القدرة علي قراءة أفكار الآخرين

[nagham hady]

3 طلبات

اول طلب واهم طلب

اني اجاوب كويس في امتحان بكرة

الطلب التاني

اني اخلص الكلية بتقدير عالي

الاخير

اني اشتغل في مكان كويس بقي

[se_ Elsyed]

خايف أحلم وأتخيل يطلع لي في الأخر

مصباح " علاء الدين مبارك "

وبدل ما يقول لي شبيك لُبيك ...يقولي : نفض لنفسك ياض وأعلى باللي في جيبك

[Dreamwithme]

خايف أحلم وأتخيل يطلع لي في الأخر

مصباح " علاء الدين مبارك "

وبدل ما يقول لي شبيك لُبيك ...يقولي : نفض لنفسك ياض وأعلى باللي في جيبك

ليه بس كده يا أستاذي .....الناس قاعدة وغمضت عنيها وبتحلم تفزعنا علي كابوس ليه

حرام عليك ياراجل .....سيبنا نحلم شوية يا سيدي الأحلام ماعليهاش جمرك

[Folana]

السلام عليكم ورحمة الله....

أول أمنيه حأطلبها ...

انى اسوق عربيتى بنفسى وأدى السواق استمارة ستة...

وده المارد يقدر عليه...بأنه يهش عنى العربيات وانا سايقة وماحدش يكسر على ولا يلبسنى فى حيطة....

تانى أمنية...

انى أطلع القمر..نفسى اروح رحلة للقمر.....ودى برضه المارد يقدر عليها ...بس بشرط يرجعنى تانى..:)

تالت أمنية ...

انه يوهب لى موهبته فى تحقيق الامنيات.....ياسلالام..ده الواحد يكسب دهب

اى حاجة تانية زى الصحة وسعة الرزق حأطلبها من ربنا ..

فين المصباح بقى؟؟؟

علاء الدين شارك فيه برضه ؟

:happy:

[اغابي]

raouf

علاء الدين لو عاش وياك هيزهقك

مكاوى

انشالله تطير يا مكاوى وتطلع رخصة البيت والحاكم الظالم يهج ولا يهمك كلام تيمور وابننا عنبو

عنبو

حرام عليك سيب مكاوى فى حاله

بشمهندس تيمور

حرام حرام عليك سيب مكاوى يعيش

رضوي

صحيح كلامك تؤخذ الدنيا غلابا لكن برضوه الغلابا تعبنا اوى منه فقولنا نروح بريك عند المصباح السحرى

دريم وث مى

انشالله امنياتك تتحقق كلها

ويعملك العفريت كمان ديسكوينت ويديكى على التلات امنيات امنية مجانا

علشان اسمك دريم تستهالى امنية كمان

nagham hady

هتنجح وتقول توبيك المارد العجيب واغابي وشه حلو عليا

حسام

انت امنياتك سكر سكر كلها متميزة

لكن مش ملاحظ انك زودت الامنيات شوية من دماغك

اصل العفريت ظهرلى وقالى يا اغابي شوبيك لبيك نبهى على المحاوراتيه انى مش عاوز كلام كتير هما 3 امنيات وبسسسسسسس

فلانة

سواقة العربية بنفسك ليها متعة وطعم تانى

انا عارفة صدقيني الامنية دي مهمة اد ايه

لكن انك تحققى الامنيات للناس - يبقى انتى واخداها سبوبة ولا ممكن يعنى تبقى مجاملات

علشان تفتكيريني - ابقى لو اتزنقت فى اى امنية على الماشي كدا اقصدك فيها زى مثلا رخصة سواقة

لبنت خالتى اللى فى حدائق الزيتون زى حاجات خفافى كدا يعني تخدمينا فيها بقى

انشالله كل واحد طلب امنية تتحقق له

الا البشمهندس تيمور لان لو اتحققت الامنيات التلاتة يبقى مكاوى خسر امنياته بالمستريح

امنيات تيمور الاكثر تميزا واضرار بالغير

ومشاركة الاستاذ س س الاكثر تميزا لانها ارعابا للغير - بيرعبنا - كمان لانها

- فوقتنى - وخلتنى تقريبا مش ناوية اثق فى علاء الدين ولا المصباح

انا هاقول اول امنية بس اوعى حد يضرب

bsh:)

[nagham hady]

متشكر

قصدي متشكرة يااغابي

أنا بنوتة ... بنت ..... فيميل ......

وان شاء الله التوبيك واغابي يكون وشها حلو عليا واخلص اخر مادة علي خير

ادعووووووووووولي

واول واحد يمسك المصباح يكون اول طلب ليه اني انجح واتخرج بقي وابقي مهندسة قد الدنيا

او دكتورة مافيش مانع يعني :closedeyes:

[Alshiekh]

كان نفسى مادام معايا الفانوس السحرى ، 3 أشياء يتحققوا ، أو على الأقل واحدة منهم لانها لم تتحقق فى حياة والدى ، وأتمنى ان تتحقق فى حياتى

الامنية الآولى : أن يكون عندنا فى مصر رؤساء جمهورية سابقون أو حتى على الأقل رئيس جمهورية سابق

الآمنية الثانى : أن يعود الشباب فاعيد ترتيب أوراقى.

الأمنية الثالثة: أن يكون لى " واسطة " .

http://www.youtube.com/watch?v=9AGYdUQoocI

[اغابي]

اول امنياتى وهاكشفها صراحة قدامكم

انى ابقى توأمها يعنى نفس شكل انجلينا جولى - اصل بحبها اوى من زمان وبحب افلامها

تانى امنية بقى

ان مصر تبقى من البلاد القوية - اللى الناس بتحلم تهاجر ليها مش تهاجر منها

يعنى من الاخر يتغير حال مصر كله للافضل

وكمان ما يتكلبش س س لان - لومان طرة صعب اوى - وس س هيتعب هناك

خليه يا عفريت معانا هنا فى المنتدي ينوبك ثواب فى ابو الاسيان

:P :P

ثالت امنية

انى اعمل حفلة كبيرة - لبيت العيلة محاورات المصريين واتشرف بمعرفتهم كلهم - كل واحد باسمه

حتى الناس اللى كنا بنختلف فى الاراء - اكيد حول المائدة المستديرة الحوار والمناقشات هيكون لها شكل مختلف

اما الامنيات التانية بقى اللى تخص اولادى والصحة والرضا دى هاطلبها من ربنا مش من الفانوس

تم تعديل 24 يناير 2011 بواسطة اغابي

[fatfouta]

الآمنية الثانى : أن يعود الشباب فاعيد ترتيب أوراقى.

انا كمان عاوزة اطلب الطلب ده عشان لو العمر رجع بيا تانى هعيد فعلا ترتيب اوراق كتيرة فى حياتى ولو رجع شبابى اللى مابقتش حاسة بيه ابدااا هحاول اعيشه من جديد

الأمنية التانية.....الصحة ترجع ذى ما كانت الاول ولا نعترض على الله طبعا

الأمنية الثالثة.....ماعنديش أمنية تالتة

ومانيل المطالب بالتمنى ولكن تؤخد الدنيا غلابا

تم تعديل 24 يناير 2011 بواسطة fatfouta

[أسد]

قبل ما أتمنى أي حاجة

عايز أدعي ربنا .. إنه يوهبني نعمة الرضاء الكامل

الرضا هي أكبر نعمة ينعم بها الله على عباده

أما العفريت ..

حاطلب منه شوية فلوس كتير كمان

وحاطلب منه يخلصنا من اللي بالي بالك .. بس مش عارف حيقدر ولا حيمسكوه وينفخوه

وحاطلب منه .. آخر حاجة .. لو إتنفخ .. يتخدني أنا وزوجتي وابني .. نروح حتة تانية خالص .. بس وقتها أنا حاختارها بمزاجي

[اغابي]

متشكر

قصدي متشكرة يااغابي

أنا بنوتة ... بنت ..... فيميل ......

وان شاء الله التوبيك واغابي يكون وشها حلو عليا واخلص اخر مادة علي خير

ادعووووووووووولي

واول واحد يمسك المصباح يكون اول طلب ليه اني انجح واتخرج بقي وابقي مهندسة قد الدنيا

او دكتورة مافيش مانع يعني :closedeyes:

يا خبررر - معلشي يا نغم حقك عليا ما تزعليش

يمكن لانى كنت برد بسرعة فلخبط شوية

خدى شمة

الوردة مسمومة

خلينا نخلص