مصطلحات مصرية .... بمفهوم واقعي

[أبوعمار]

التنوير : عملية تتم في الشوارع عندما يسكنها وزير.

العولمة : عملية تحول اجتماعي وثقافي وفني تمارسها فيفي عبده.

الشفافية : سمة ضرورية للملابس المستخدمة في العولمة.

الجات : مصيبة و جات على دماغنا.

النظام الملكي : عند وفاة الملك ينتقل الحكم لابنه ليصبح هو الملك الجديد.

النظام الجمهوري : عند وفاة الرئيس ينتقل الحكم لابنه ليصبح هو الرئيس الجديد.

المبايعة : ورقة تكتبها لما تبيع سيارة قديمة.

الدستور : كلمة تقال للحماية من الاسياد لما الواحد يدخل بيت مسكون.

الديمقراطية : نوع من الفنون الزخرفية يستخدم لتزويق صورة الحكومة.

القانون : آلة تصدر أصوات جميلة لما تـلعـب عليه في حفله.

الحرية للجميع : للشعـب ان يقول ما يشاء ، وللحكومة ان تـفعـل ما تـشاء.

حرية النشر : تمارسها النساء عـلى السطوح في المناطق الشعـبـية.

الدبلوماسية : احسن هدية تصالح بها مراتك بس بشرط الألماس يكون حر.

الصراع الطبقي : خناقة كل بيت على مين اللي يغسل الاطباق النهار دة.

حرب الشوارع : قيادة سيارة في شوارع القاهرة.

العمل الثوري : مذكر العمل البقري.

الشريط الحدودي : الشريط الجاي لعمرو دياب.

الوحدة العربية : ان تعاني كل دولة عربية من الشعور بالوحدة!

حرب التحرير : معركة شهيرة يخوضها كل من يريد استخراج جواز سفر من مجمع التحرير

واللي عايز يضيف مصطلحات من عنده يضيف .... خلونا نعمل قاموس للمصطلحات الخاصة بالمصريين

[akramgroup]

عجبتنى اوى المصطلحات دى وخصوصا بتاعة الصراع الطبقى

اقترح انت علينا مصطلح مش موجود فى دول واحنا نحاول نعرفه بالتفسير المصرى

تحياتى وصباح الفل

[moory]

حلوة يا ابو عماار،

ممكن نزود الحاجتين دوول كمان على القاموس ده

الخصخصة : تحدث في الحدائق يوم شم النسيم مع أكل الفسيخ .

الحرب الأهلية : حرب البنت مع أهلها عشان تتجوز الواد اللي هي عايزاه .

وفي مصطلحاات تانية كتيير للي عايز،

ليبرالية، رأسمالية، برجوازية، شيوعية

وماحدش يسألني الكلام ده يعني اييه

[باهى الطائر الحزين]

الديمقراطية : كلمه تكتب لتزين جدران مجلس الشعب

التوريث : دليل تحضر ومواكبه للعصر

مجلس الشعب : منتجع الاثرياء

مجلس الشورى : مجموعه من العرافين

موظفى الحكومه : اربعه مليون درج مفتوح

القانون : البيروقراطيه فى ازهى عصورها

المرور : ابجنى تجدنى

رأس الوزاره : نظفنا وباع الحديده

وزراة التموين : سرحان اجيب منين

وزراة الماليه : عودة المماليك

وزراة الداخليه : المواطن مدان حتى يثبت العكس

وزراة الثقافه : كعب عالى

وزراة الصحه : الفياجرا ضاره جدا بالصحه وادى وشك للترعه

وزارة الاسكان : رصيف عشوائى لكل مواطن

وزراة الصناعه : صينيه

وزراة الاعلام : سلمتها ام حسن

المواطن المصري : كان ياما كان كان فيه منه زمان

25 يناير : عيد الارهاب العربى

تم تعديل 25 يناير 2011 بواسطة طائر الليل الحزين