من سيحكمنا.... لو سقط مبارك؟؟؟؟؟؟؟

[fatfouta]

هو سؤال بسأله لنفسى من امبارح مين اللى هيحكمنا لو سقط مبارك؟؟؟؟؟

فرحانه بالمظاهرات الغاضبة طبعا بش قلقانة جدااا من اللى جاى

ليه مافيش عندنا رمز سياسى محبوب للشعب كله وبصفة كاملة؟؟؟؟؟

لو فعلا سقط مبارك وحكومته ان شاء الله او لو رحل عن مصر مين اللى هيحكم؟؟؟ بس كده هو سؤال

تم تعديل 26 يناير 2011 بواسطة fatfouta

[لماضة مصرية جدا]

السلام عليكم و رحمة الله و بركاته

طب كده يبقي جرعة مفرطة في التفاؤل...و الواحد خايف يموت من اوفر دوز

علي كل تفاؤلي من اللي بيحصل من امبارح...بربضه الواحد بيحاول يفكر بهدوء

اللي بيحصل في مصر دلوقتي اهم ما فيه انه اثبت ان احنا ممكن نتجمع و نتوحد...لما يبقي العدو واحد

لما يبقي الظلم فاق المدي...لما يبقي فيه منتهي القهر

و دي الرسالة اللي المفروض توصل لمبارك....(يا رب الناس تحس)...او اي حد هيجي بعده

مش معاكي في فكرة الرموز....انا شخصيا تعبت من حكاية يبقي عندنا رمز سياسي و لا ديني و لا حتي ترفيهمي

المفروض يكون فيه نظام قائم مش افراد بيتفصل عليهم النظام و يا ريته علي افراد لا ده ليهم و لولادهم كمان

و النظام ده لازم تحركه قوة الشعب نفسه و ارادته

و طول ما الشعب متوحد علي هدف واحد انه رافض الخوف...رافض الظلم بكل اشكاله يبقي مافيش قلق...مين هيجي...مين هيروح

هيبقي فيه حرية ارادة....و قرار للوطن كله...مش مجرد افراد...و لا شوية رموز....بنحاول نوصل بيهم لدرجة الآلهة و العياذ بالله

و مصر مليانة ناس كتير...بس المه ايه النظام...ايه الدستور اللي هيتحركوا فيه و بيخدموا مين....شعب بجاله و لا افراد

يبقي اللي لازم يتغير مش بس شخص "مبارك"....لا اللي لازم يتغير هو طريقة تفكيرنا ان الامل ان احنا نشيل شخص و نحط شخص

الامل ان يبقي فيه نظام يحمينا كشعب....نشعر بانسانيتنا و احترامنا جوه و بره...و النظام ده كل السواعد المصرية بكل اختلافاتها لازم تتوحد عليه

[Simba]

ياااااااااه ده أنتي متفائلة اوي .... بس اي حد اهو التغيير صحي برضه

[hanzalah]

من يحكمنا لو سقط مبارك

سؤال وجيه

اجابتي المتواضعة

انا

أو

مجلس حكماء

في حال رفضتني الاغلبية

[أهااات روح]

بصى يافتفوتة ياختى انا بصراحة كده مليش فى السياسة قوى

بس يادوب بتابع الاخبار علشان بس ابقى عارفة ايه الى بيحصل والدنيا ماشية ازاى

بس الى موجود فى الصورة دلوقتى وممكن (ممكن) يكون كويس هوالدكتور"محمد البرادعى"

ااه لو يجى واحد زى رجب اوردغان يااااااااااه اهو الواحد بيحلم بس والله مش بعيد على ربنا سبحانه وتعالى يرزقنا بحاكم عاقل وعادل

بس انتى ادعى من قلبك وانتى بتصلى ان ربنا يزيح الهم عن مصر

وتظاهر اباءنا واخوانا الشباب فى مصر يجيب نتيجة

تم تعديل 26 يناير 2011 بواسطة أهااات روح

[ComingSoon]

لايهم الاشخاص

المهم الدستور والقوانيين والنظام الديمقراطي

في الدول الديمقراطية عندما يأتي رئيس ويكون سئ فإن هناك فرصة لاستبداله في غضون 4-5 سنوات

بالاضافة انه لاسلطة بدون محاسبة فتكون فرصة افسادة قليله

في الدول الديكتاتورية ان جاء رئيس سئ يظل جالس 30-40 سنة حتي يدمر البلد نهائياً

وطبعاً لايوجد اي محاسبة مما يعطية الفرصة لنشر شبكة فساده واتباعة في كل اركان الدولة حتي يصبح كالسرطان الذي اما ينجح في اقتلاعة الشعب بخسائر كبيرة واما يظل ينهش في جسم هذه الدولة ويتغلغل فيها حتي تصبح الرشوة هي الطبيعي والنفاق هو المبدأ

[mfarag]

لايهم الاشخاص

المهم الدستور والقوانيين والنظام الديمقراطي

في الدول الديمقراطية عندما يأتي رئيس ويكون سئ فإن هناك فرصة لاستبداله في غضون 4-5 سنوات

بالاضافة انه لاسلطة بدون محاسبة فتكون فرصة افسادة قليله

في الدول الديكتاتورية ان جاء رئيس سئ يظل جالس 30-40 سنة حتي يدمر البلد نهائياً

وطبعاً لايوجد اي محاسبة مما يعطية الفرصة لنشر شبكة فساده واتباعة في كل اركان الدولة حتي يصبح كالسرطان الذي اما ينجح في اقتلاعة الشعب بخسائر كبيرة واما يظل ينهش في جسم هذه الدولة ويتغلغل فيها حتي تصبح الرشوة هي الطبيعي والنفاق هو المبدأ

هو دا الكلام

مش مهم الشخص المهم النظام

اللى ممكن يحاسبة و يشيلة

و حتى يحقق معاة و يسجنة

[ذهبية]

والله يا فتفوتة السؤال دة فى بالى مش دلوقتى من زمان

انا من جوايا اتمنى عمرو موسى من زمان انا معجبة بشخصيتة جدا وقت ما كان فى وزير الخارجية ولحد ما قضى علية النظام لما حس ان الشعب بيحبة

اتمنى ان ربنا يجيب لة حقة و اللى اتعمل فية و يرجع تانى بمنتهى القوة بجد من وجهة نظرى هو انسب شخص

[justtrying]

الفرعون الي بعدة

قَالَ فِرْعَوْنُ مَا أُرِيكُمْ إِلاَّ مَا أَرَى وَمَا أَهْدِيكُمْ إِلاَّ سَبِيلَ الرَّشَادِ

فصلت ـ 29

تاريخيا

صلاح الدين الايوبي تركماني

قطز خوارزمي

محمد علي مؤسس مصر الحديثة وهو ألباني

تم تعديل 26 يناير 2011 بواسطة justtrying

[عنبو]

اى حد ياجماعه يحكم بس المهم يكون جاى عن طريق انتخابات نزيهه بس

لو الناس عاوز حسنى مبارك نفسه يفضل فى مكانه مافيش مشكله

بس المهم الناس تكون عاوزه كده

ثم الكل بيدعوا الى دولة مؤسسات لا دولة اشخاص

بمعنى ان الرئيس مش هيكون مؤثر بالشكل الكبير

تحياتى

عنبو

[عبير يونس]

اخواني و اخواتي

اللي افهمه ان الرموز السياسية دي ترشح نفسها ببرامجها الانتخابية

و الشعب يختار

و بأعداد الأصوات الانتخابية الشريفة والغير مزورة يتم اختيار من يحكمنا

لفترة اربع سنوات

و لو كان كويس ياخد فترة تانية

يالانتخاب برضه

و بعد كده نقوله شكرااااااااااااااااا

و يرجع إلى صفوف المواطنين العاديين بكل احترام و تقدير

و هكذا دواليك

الرؤساء لما يخلوا الناس عايشة عيشة آدمية

ما يخافوش أبدا من العودة لصفوف الشعب

لأنه ساعتها حيفضل بني آدم برضه

و ياخد كل حقوق المواطنة

بل بالعكس

حيبقى نفسه يرتاح

و يستمتع بحصاد ما زرعه أثناء ما كان في السلطة

و برضه حيدي صوته للي يشوف انه ممكن يحافظ على انجازاته

بس السؤال القانوني دلوقت

ياريت القانونيين في الموقع يجاوبوا عليه

كيف يمكن اختيار حكومة مؤقتة

اذا تم حل مجلسي الشعب و الشورى؟؟

هل من باقي الأحزاب على الساحة؟؟

وهل من سلطات تلك الحكومة المؤقتة تعديل الدستور؟؟

يعني عايزة حد من الخبراء يشرحلنا

ايه اللي حيتم في المرحلة الانتقالية

لحد ما تحصل انتخابات حرة و نزيهة

نختار فيها بارادتنا

من نتوسم فيه القدرة على التغيير

تحياتي و تقديري

[aeye]

كل الانظمة البوليسية الدكتاتورية مثل النظام الموجود منذ حركة 1952 لا تسمح الا بظهور وتلميع من له الولاء للنظام يغدقون عليه بالمناصب والكتابات الصحفية والبرامج التليفزيونية من الفكر الموسوعي والتنظير المعرفي والاطلاع علي مختلف القوانين وغيره كثير اعود فاقول غير مسموح الا لمن علي الرضا لولاءه للحاكم.

لهذا كل الاسماء المعروضة علي الساحة اما تابع مصلق للنظام او عبدة مشتاق للمنصب او انتهي دوره فاصبح مناضل معارض سياسي يحي الجمل وزير ناصري عمرو موسي منفذ سياسة والان منفذ سياسه عربية وليس مبتكر او حتي مناضل البرادعي طلع لنا في البخت بس الحمد لله فقنا قبل الاستمرار في الاحلام او الوهم.

مصر لابد لها من فترة انتقالية يكون الرئيس ومجلس الوزراء والمحافظين واعضاء مجلسي الشعب والشوري دورة واحدة 4 سنوات علي الاقل12 سنة مبدئيا مع شفافية في الحصول علي المعلومات عن انشطتهم قبل واثناء وبعد تركهم المنصب.

[aeye]

اقتراحي ان يكونوا فترة واحدة 4 سنوات ولايكرر مدي الحياة والغاء حتي فكرة فترتين.

[مغتربة]

من معلوماتى القانونيه المتواضعه ان السلطه ستؤول الى رئيس مجلس الشعب ( لخلو منصب نائب الرئيس )

على ان يتم تنظيم انتخابات رئاسيه خلال فتره زمنيه اعتقد لا تزيد عن 60 يوم

هذا هو السيناريو القانونى لو استبعدنا سيناريوهات الانقلابات العسكريه

و لكن اعتقد ان مشكلتنا ليست فى اسم من سوف يحكمنا بعدها بقدر ما هو التغير الذى سيقر فى نظام الحكم بشكل يضمن الحفاظ على المكاسب الديموقراطيه و ضمان عدم انقلاب الامر فى النهايه الى فكره استبدال ديكتاتور باخر

تم تعديل 26 يناير 2011 بواسطة مغتربة

[التونسى]

ببساطه .. وكما قال بعض الاخوه .. سيحكمنا من نختاره وننتخبه بارادتنا الحره .. وذلك بعد زوال الكابوس الجاثم على أنفاسنا منذ 30 عام .. باذن الله

عايزين نشيل الطين مره على دماغنا... ونتحمل نتيجة اختيارنا ..سواء كان اختيار صح ام خطأ ,,بس فى الاخر احنا اللى نختار مصيرنا .. لكن اغتصاب للسلطه ونهب للثروات تانى لأ ... لأ ... لأ

[امير المستقبل]

ممكن عمرو موسى وليه لا او مبارك بس انتخابات نزيهه برضوا ليه لا

[Alshiekh]

هو سؤال بسأله لنفسى من امبارح مين اللى هيحكمنا لو سقط مبارك؟؟؟؟؟

طيب بس خليه يموت ومتحمليش هم

حتلاقى 100 مرشحين نفسهم ويمكن الف ، وابقى اختارى اللى يعجبك .

المشكلة اننا مش قادرين نعرف يعنى ايه دولة مؤسسات ، والرئيس ده بيبقى رئيس أو مدير للدولة يعاونه طاقم يساعده على تنفيذ خطته وفى نفس الوقت المؤسسات دى مفروض أنها لاتخضع لرئيس الدولة.

والمفروض أن رئيس الدولة له صلاحيات محددة طبقا للقانون والدستور وليس صلاحيات مفتوحة كما هو حادث حيث انه رئيس كل المؤسسات فى مصر قضائية وتشريعية وتنفيذية ومهلبية.

المهم يا استاذة فتفوتة متقلقيش ، خليه بس يموت وأحنا حنتصرف ونجيب واحد بداله.

هو مش برضه الريس متقال ماكانش ريس قبل مايبقى الريس متقال ؟ والا هو اتولد لقى نفسه الريس متقال؟

[fatfouta]

المهم يا استاذة فتفوتة متقلقيش ، خليه بس يموت وأحنا حنتصرف ونجيب واحد بداله.

هو مش برضه الريس متقال ماكانش ريس قبل مايبقى الريس متقال ؟ والا هو اتولد لقى نفسه الريس متقال؟

سؤال سألته لنفسى وقولت افكر معاكم بصوت عالى

ان شاء الله هيموت او يسقط حتى عالاقل وليه نهاية لان ماحدش مالوش نهاية يا أستاذ محمد

لكن ايه اللى جاب الريس متقال؟؟؟؟ وليه يعنى التريقة على اسلوبى؟؟؟؟؟؟؟؟؟

عموما الف شكر لردك يا استاذ محمد

تم تعديل 26 يناير 2011 بواسطة fatfouta

[عطر الجنة]

سؤال حلو و مفيش حد فى مصر مسئلهوش جوه نفسه فهو حديث الساعة منذ سنوات

لكن للاسف المتولين السلطة الان لم يسمحوا لاحد بالظهور فى اعمال جليلة حتى لا يصبحوا رموز تلتف الناس حولها

تذكروا منذ فترة ليست بالقليلة ما ألصقوه بالمشير ابوغزالة رحمه الله عندما التف الشعب حوله لانه كان نصير الازمات

انا اريد رئيس من خارج الجيش مع اننا نعتبر دولة حرب لوجود اسرائيل فى الجوار

تذكروا معى التجربة الماليزية و النهضة التى حدثت على يد طبيب بتوفيق من الله عز وجل و بعد ان ارسى القواعد اعتزل الرئاسة و عاد للطب طواعية لنفسه

فى ناس رافضة للدكتور البرادعى بدعوة انه عاش معظم حياته بعيدا عن الوطن

و انا بقول ده مش عيب لاننا فعلا لابد ان نكون على اتصال بالعالم اجمع

و بالنسبة للشئون الداخلية فده الحكم فيها عن طريق داتا قوية و صريحة تعرض على الوزراء و رئاستها و على رئيس الجمهورية

احنا نحتاج الى رؤساء متفتحى الافق

لكن قبل كل هذا نحتاج الى وقفة مع النفس و ليحاسب كل انسان نفسه على افعالها و يتقى الله فى الاخرين و يضع نفسه مكان الاخر قبل فعل اى شئ

حتى نحظى بمرضات الله و يولى امرنا الى من يتقيه

تحياتى

تم تعديل 26 يناير 2011 بواسطة عطر الجنة

[mfarag]

الناس اللى بتسال اية البديل عن مبارك

طيب

تفتكروا مبارك اللى مش بيقدر يطلع السلم لوجدة

وهو فوق ال 80 يقدر يحكم دولة تعدادها 80 مليون بكل تعقيداتها

مبارك دلوقى بحالتة الصحية ميقدرش يحكم مكتب بوسطة

هو محطوط بلاتوة عشان المستفيدين

البلد دى ماشية كدة

لو عايزين دليل

اسالوا نفسكوا هو فى نظام او قانون فى البلد

دا حتى قانون المرور مش عارفين يطبقوة