بقرة عم الحاج السيد

[daktara]

كتبتها ايضا من 5 سنوات

بقرة عمّ الحاج السيد لسَه بتضحك

خيبه وحلِت

أول مرة أشوف البقرة بتضحك

لمَا اتولِت

كان من مده .. احنا ضحكنا عليها..

ضحكنا وهى اتسلِت

بعد شويَه .. من قسوتها علينا بكينا

وهى عينيها ..

عمر عينيها فى يوم ما اتبلِت

****

أكل ومرعه وقرون طالعه

ليه ما تاكلهاش دايما والعه

اللى معاه .. تلهيه بضريبه

والآمن .. تخلق له مصيبه

وتعادى اللى يخاف من ربُه

وتبارك عُهر الحبّيبه

لازم كل الشعب يئن

والدبابير على راسُه تزِن

ماهو علشان الناس تتكَن

لازم تفضل حافيه وقالعه

****

بقرة عم الحاج السيد فاسده وكلحه

غير كل البقرات التانيه فى كفر مصيلحه

أصلها لامَه عجول حواليها

بتسمَنها وتربيها

لاجل ما يوم تحتاجها ف خطبه

أو فى استفتا

أو فى انتخابات حرَه نزيهه

ساعة الجد تزوغ وتناور

وامَا تشاور.. تلقى ف وشك الف محاور

كلمته واضحه .. وحجته فاضحه

لحمته مُره .. وسحنته كالحه

***

خمسه وعشرين سنه ع الكرسى

خلوها قالت .. حقى وارثى

أضرب ست سنين دلوقتى

والجايين بقى زى ما ترسى

***

كبرت والله بجد .. وشاخت

والفُرَيره صابتها .. وداخت

لأ .. وكمان قال عايزه تمدد

ما التمديد .. بقى نكته وباخت

***

بعد ما سفَت والسكاكين حواليها اتلفت

بقرة عم الحاج السيد قامت لفَت

شاروا عليها مستشاريها

تلف كفورها تزور حواريها

تاخد صوره مع الصياد

تلعب حجله مع الأولاد

أو تتنى وترفع رجليها

وتحرك ودن وتتلفت

خالت والله على المساكين

بس كتير م المصريين

عارفين انها سَوَ بجد

مهما بكل بجاحه ادَارت ولا اتخبَت

دى بتحلبنا .. وتأنَبنا..

إن صدورنا من الجوع جفَت

***

بقرة عم الحاج السيد خربت بيتنا

ومجهزه لولادنا كمان بقرة بقرتنا

بتربيها على الدستور

على بال لما ييجيها الدور

تفتكروا هتبقى حنينه بقرة بقرتنا؟

***