إذا كنت من الثوار وقلبك قايد نار .. يبقى لا تقرا هذا القرار

[se_ Elsyed]

إحم إحم

عشان شعار المحاورات والرأي والرأي الأخر .. وإنتو عارفين كده لان كلكم في القلب

وأي حد من ولاد

الشعب وكدهوت ومش عاوز حد ظنه يروح لبعيد .. من حقه يعبر عن مكنون رأيه

فعاوز اقول لكم إن النهاردة إبتدى مجموعة من المصريين الأحرار بدأوا في توزيع منشورات لدعم سيادة الرئيس القائد

وجبت لكم هنا نص أول بيان ... وده بالمناسبة إترمى على عربية أخت من أخواتنا هنا .. لكن لحساسية موقفها الوطني مش هاقول هي مين أو أفتن وأقول إنها أبله المُشرفة الشهيرة بطنط فُلانة ..

ويأتي حساسية موقفها إنها مش عاوزانا نعرف موديل عربيتها إيه .. ما علينا .. كله هايتفتح في ملفات الثورة وهايبان

وإليكم البيان

منشور رقم (1)

ابنـــــــــــــــاء مصر

نحن ليس مع أو ضد أحد نحن مع مصر اكبر دولة عربية (مصر مصر مصر......الى نهاية عمرنا )

اخواننا المصريين مسلمين ومسيحين لاننكر انه كان هناك فساد فى كل شىء سلطة وحكومة وايضا شعب .

من منا كان بلا خطيئة ولكننا محط انظار العالم العربى وايضا العالم كله يريد ان يتفرج ويشمت فينا ونحن

نهين مبارك رئيسنا . نعم مبارك اخطىء ولكنه بمكانه الاب فهل اذا اخطأ والدك ستطاول عليه ستسبه

ان مبارك حارب فى يوم من الايام من اجل حرية تلك الشباب الذى يسبه اليوم

يا شباب مصر عندما تردون ان يترك مبارك الحكم فيجب علينا ان يخرج بكبرياء حتى لا نكون محط

سخرية العالم ونكون كاالابن العاق الذى ينسى فى لحظات غضب مافعله والده من اجله ولاتجعلوا الدخلاء

يلهون بكم لاشعال البلد وهم فى منتهى السعادة لان اعظم بلد يصل بها الحال لحرب عصابات فى الشوارع.

يا ابناء مصر لاتجعلوا الكراهية تعمينا ولا تجعلوا من هما اقل مكانة مننا ومن اسم مصر يشمتوا فينا وهما

يتمنوا من داخلهم ان يكونوا من هذا البلد ومن هذا الشعب العظيم خير جنود الارض استيقظوا واعرفوا من

هو عدوكم الحقيقى المستفيد من تفريقكم . اعطوا الرجل فرصة اخيرة ويكون حسابنا معه فى نهاية ولايته

ابنـــــــــــاء مصر

[aimen]

اعتقد ان من الأفضل وضع هذا الموضوع فى باب الإبتسام لأنه خلاص محدش بقى يأكل من الكلام ده

ابونا مبارك

رصيدك نفذ وياريت تحل عن دماغنا

كفاية عليك 30 سنة

ضيقت على الشعب واهنت مصر

وكسفتنا فى كل العالم

لو عندك ذرة دم واحدة

اختفى من الكرة الأرضية كلها

الناس قالتها بكل اللغات

بنكرهك

الثوار يحاولون التخلص من العبودية .... لكن هناك البعض الذى يحاول تحسين شروط العبودية

[Folana]

السلام عليكم ورحمة الله...

طب أقول ايه أنا دلوقت...غير انى مش حاحكى لك على حاجة تانى...:)

ابقى قابلنى فى قهوة المشرفين بعد ماتخلص النوباتجية بتاعتك...

[se_ Elsyed]

وإليكم تعليق الأخ الرفيق سين سين فرايد تشيكن ... قائد الجناح العسكري في معركة الكنتاكي على هذا البيان

اخواننا المصريين مسلمين ومسيحين لاننكر انه كان هناك فساد فى كل شىء سلطة وحكومة وايضا شعب

يا عم الأمور إنت بتساوي اللي سرق باللي إتسرق ؟ ماشي جايلك أوعى تمشي

نعم مبارك اخطىء ولكنه بمكانه الاب فهل اذا اخطأ والدك ستطاول عليه ستسبه

أبويا إيه ومرات ابويا إيه ؟

يا عم الحلو ده لو كان ابويا وشايفه عمال بيدبح في اخواتي لمدة 30 سنة .. وسرق حصالتي وسيغة ماما وباع العفش وخلانا على الحديدة .. أفضل أنا مآنتخ لحد ما يدبحني ويسرق هدومي ؟

ان مبارك حارب فى يوم من الايام من اجل حرية تلك الشباب الذى يسبه اليوم

أبوس وراك فراخ أهلك ... كفايه بقى ذل فينا ... ده أنتو حسستوني إن مبارك كان راكب طيارته وجواها دبابة .. وإيده اليمين على المدفع وكان عمال يمشي جوه الطيارة - على اساس إنه سلاح مشاه - وماسك خرطوم ميه بيدمر خط بارليف - سلاح مهندسين يا فندم -

ايييييييييييييييييييييييييييييييييه .. حارب وشيلناه فوق راسنا وحكم أكثر من 30 سنة اييييييييييييييييييه بقى ... ده أنتو ناقص تجيبوا لنا صك دخوله الجنة عشان حارب في 73 زيه زي الملايين سواء من القادة أو الجنود العاديين ؟ ده لو كان حارب في غزوة بدر يا أخي ما كنتوش تذلونا كده

يا شباب مصر عندما تردون ان يترك مبارك الحكم فيجب علينا ان يخرج بكبرياء حتى لا نكون محط سخرية العالم

خليك في نفسك وهو يخرج بس وهايشوف مين اللي هايسخر من مين ... ما تتكلمش بإسم العالم إنت وإتلهي

لان اعظم بلد يصل بها الحال لحرب عصابات فى الشوارع

إنت بتتكلم عن نيكارجوا ولا ليبريا ؟

حرب شوارع إيه يا عم .. فوق بقى

اعطوا الرجل فرصة اخيرة ويكون حسابنا معه فى نهاية ولايته

هيربيء هيريبيء هيريبيء ( دي ضحكه رقيعه )

ده على اساس إنه مانويل جوزيه وجاي يدرب الشعب المصري ومش هانحسبة بالقطعة وهانحاسبة في أخر الموسم ؟

أه يا ولاد الــــ

حد من المشرفين ييجي يشيلني من هنا بدل ما أرتكب خطيئة

[se_ Elsyed]

معليش بدون ضغط واستجواب يا ابله فلانه

سؤال بس

هما كانوا بيوزعوا الورق ده عادي ولا مكتوب جوه " اجنده "

[Folana]

السلام عليكم ورحمة الله...

لأ والله يا حضرة البكباشى الظباط...

ماكانش فيه أجندة ...ورق عادى خالص ومش صادر من جهة محددة..ولا مقطوع من اجندة ولا كراسة حتى

.ومن وجهة نظرى ، ومن اسلوب صياغة المنشور واضح ان اللى كتبوه شوية شباب بيحبوا الريس زى حالاتك كده :P

أروح بقى؟

[aimen]

طيب ما كنش فيه هدايا مع المنشور

شندوتش لحمة رأس ولا كنتاكى ولا 100 يورو حتى

بيقولوا الفلوس زى الرز فى ميدان التحرير

[حوريةعين]

السلام عليكم

استاذي العزيزسين سين

شوف نفسي بجد ارد بس خايفة من قلمك الاذع

من فضلك اديني الامان

اوك

طيب ممكن اقول حاجة لو سمحت( ايدي بترتعش وانا بكتب)

مش مهم انا راي زي رايك ولا لا

بس بجد ده راي مجموعة كبيرة من الشعب المصري

واول حاجة بنطالب بيها الحرية والاحترام

يبقى رايهم يحترم

وبلاش نبقى عدوين

اول حاجة لازم نتعلمها كيفية الاختلاف في الراي وكل منا يحترم الاخر

وبجد يا ريت يعملو تصويت على الرايين والاغلبية رايها يمشي

انا بكلمك من داخل الحدث

بس افتكر اني اخدت الامان منك

وبلاش الرد اللي بيوجع

مع كل تقديري لجميع اعضاء المنتدى

[se_ Elsyed]

أه ..

أوكي

طالما قولتي " الحدث " يبقى خلاص .. ما قدرش أتكلم

--------

شوفي يا حوريه

أنا دايماً وجهة نظري إني في حاجات تحتمل أن يكون هناك رأي ورأي مخالف ..

وفي حاجات ما فيهاش غير مُسلمات يعني رأي واحد

ودي قليلة في الحياة على فكرة

لكن لما أقلب الحقائق وألوي عنق الأدلة .. يبقى ده مش رأي .. ده يبقى مشاركة في الجريمة

هأقول لك على حاجه ...

خلي مبارك بعد إتهامه بإنه لهف 70 مليار دولار .. خليه ينفي ذلك ويجيب لنا برنت أوت من بنك التسليف الزراعي بتاع سويسرا يقول إن ثروتي مثلاً حوالي 35 جنيه وأنا شريف وطاهر وصفحتي بيضا ... بالله عليكي مش هانشيله فوق راسنا ساعتها ونعمل له تمثال من العجوة في ميدان التحرير ؟

وهل كل الدلائل على حياة البؤس اللي إحنا عايشين فيها لمدة 30 سنة دي مش دليل على إجرامه ؟

والله يخليكي .... عشان خاطري يا حورية .. أوعي تقولي إن ده زي بابا .. وماحدش يعمل في باباه اللي بيجيب لنا موز كل يوم كده ؟

لأن لو هو بابا وهانسامحه ونحب على راسه كلنا .. يبقى برضوا أحمد عز بابا وحبوب العادلي بابا وعاطف عبيد بابا .. وكلها أبهات في بعضيها ونقفل الدكان ونروح بقى

[زهرة الجبل]

شر البلية ما يضحك

و الله فعلاً هو ده شر البليه

[الســـاري]

لا اعتقد ان شعوب الارض قد قللت من احترامها للشعب الروماني عندما اطاح بدكتاتوره تشاوشيسكو

ولا اعتقد كذلك انهم رأوا الشعب الايراني عاقاً لوالده البار الشاه عندما اطاحوا به

بل العكس هو ما حصل .. لقد ارتقت تلك الشعوب في نظرهم .. وعرفوا انها شعوب غير قابلة للبيع

هناك فرق بين الشعوب التي تريد الحياة .. وبين من يريد ان لا يتأثر انتظام حياته اليومي .. ولو كان على حساب كرامته

طبعا هذا الكلام عام بالمجمل

بالنسبة للحالة المصرية

الاخت حورية محقة ان هناك قطاعا كبيرا من الشعب ضد وجهة نظر الثورة .. ليس حبا بالريس بالضرورة .. لكن لاسباب اوردتها قبل هذا الاخت مصرية مغتربة في موضع سابق عن انماط من هم ضد فكرة الثورة .. او من اصحاب فكرة توقفها الان ..

واسمح لي يا ابو الاسيان .. رغم اني اتفق معك قلبا وقالبا .. لكن ايضا لن نستطيع ان نقول انها قضية مسار واحد لا يقبل تعدد الاراء ..

ان كنت قد توضحت لك الصورة كاملة .. فهناك كثير لم تتوضح لهم بعد ..

او بمعنى آخر .. لا تستطيع اغفال تجييش القنوات الاعلامية وقدرتها على التأثير

وهنا يأتي دوركم للتوضيح .. دون ان تضعوا في اعتباركم ان القضية لا نقاش فيها .. لقد استمع الانبياء بصبر وحلم لحجج من يعبد البشر والكواكب .. فلا يضيركم ان تناقشوهم

ستقول لي حتما .. نحن نناقشهم .. الا ترى ذلك .. ؟ بلا ارى انكم تناقشوهم لكن لا تضع في اعتبارك ابدا ان هذه القضية هي من المسلمات .. فالمسلمات تلزمك وحدك .. وغيرك في حاجة الى النقاش لتصبح هذه القضية مسلمة في رأيه لا مجال فيها لاختلاف الاراء

[زهرة الجبل]

السلام عليكم

استاذي العزيزسين سين

شوف نفسي بجد ارد بس خايفة من قلمك الاذع

من فضلك اديني الامان

اوك

طيب ممكن اقول حاجة لو سمحت( ايدي بترتعش وانا بكتب)

مش مهم انا راي زي رايك ولا لا

بس بجد ده راي مجموعة كبيرة من الشعب المصري

واول حاجة بنطالب بيها الحرية والاحترام

يبقى رايهم يحترم

الأخت الكريمه حورية عين

مش هقول لك زي ما قال الأخ الكريم سي السيد إنه لو رجع المليارات اللي معاه للشعب هنسامحه .. علشان بس مش عاوزه أختصر المشكله كلها في الفلوس

المشكله أكبر بكتير .. المشكله كرامة شعب إتهان 30 سنه داخل بلده و خارجها

المشكله مشكلة شرطه كانت تستعبد الشعب و ياما شوفنا بلايا علناً و أكيد كما لنا أعين رأت و آذان سمعت الحكومه لها .. فهي ليست عمياء و لم تفقد السمع .. لكنها فضلت للأسف أن تكون بكماء

المشكله مشكلة مزروعات مسرطنه وضعتنا على رأس قائمة العالم في الأمراض الوبائيه.. و كانت هذه هي القائمه الوحيده التي تصدرناها على مستوى العالم على مدى ثلاث عقود مضت

المشكله مشكلة فساد إستشرى حتى أصبح يخيل لمن يصادفه عندنا أنه طحلب ذو لون و رائحه صبغ كل شئ في مصر

المشكله مشكلة غالبية الشعب الذي يرى بعينه مقدرات بلده توزع على 2% منه فقط و البقيه رعاع

المشكله مشكلة عشوائيات

الشكله مشكلة مياه ملوثه

المشكله مشكلة غاز من أرض بلدي بيروح برخص التراب لإسرائيل

المشكله مشكلة نظام يتعامل مع الشعب كأنهم بهائم .. و عفواً في اللفظ

بهائم يمنع عنهم و يمنحهم .. و يجمِّعهم بمنحه و يفرِّقهم بالعصا

مش ده حالنا ؟

مينفعش يبقى في حد مش شايف ده كله دلوقت .. و مينفعش حد يبقى شايفه و يتكلم عن إكرام المتسبب فيه

في كلمه سمعتها في التليفزيون ( و طبعاً مش التليفزيون المصري )و عجبتني جدا

إن الجهل حالياً مش عذر .. الجهل قد يكون جريمه .. و لو مش جريمه فهو عالأقل عيب

مفيش حد في المرحله اللي وصلناها حالياً من حقه انه يكون مش عارف أو مش فاهم

الجهل حالياً .. عيب

أم كريم

تم تعديل 9 فبراير 2011 بواسطة زهرة الجبل

[Scorpion]

والله قلبي وجعني ... وجعني مش علشان الكلام الأهبل اللي موجود في الرسالة دي ...

لكن وجعني لما لقيتنا بقينا زيهم ....

طول عمرنا محروقين من اللي ممشي كلامه هو بس و لما حد يفتح بقه يتسحل ...

مش كده برضه ؟؟؟

ليه لما الوضع أتعكس نوعآ ما ... ليه لما القرار بقي بيطلع مننا احنا مش منهم هما ... ما بقيناش نقبل اراء اللي في الخندق معانا .. اللي طول عمرهم شايلين الطين برضه .. اللي ليهم رأي برضه في اسلوب الوصول للهدف ...

الناس بقت خايفة تفتح بقها لتتهزأ و الا تتريقوا عليها ...

مثال علي كده .. في الموضوع ده نفسه و مش حنروح بعيد .. الفاضلة حورية عين تلات تربع مداخلتها بتتطلب ان ما حدش يسخر منها ... بتطلب الأمان علشان تقول رأيها ...

ايه ده ؟؟؟ ... ايه ده بجد ؟؟؟

اذا كان الغالبية العظمي من شباب المحاورات واخدهم الحماس في الكلام و التفكير فده شيء رائع ... رائع ... رائع مليون مرة ... لأن الحماس ده هو اللي وصلنا للنتايج الحالية ..

لكن مش معني ان مافيش اصوات بتقول ان فيه حلول تانية ان الكل موافق علي كل اللي بيحصل بحذافيره و بالنص ... لأ .. لأن مع اول بادرة بصوت مختلف بيتم اجهاضه هنا سواء بالتريقة .. سواء باتهامات بالأنضمام للحزب الوطني .. او بالترجيف و الخيانة و الأنبطاح ...

ما ينفعش ... ما ينفعش بجد ...

يا ريت نفكر شوية قبل ما نشوط في اللي بيتكلم قصادنا ... عاجبنا كان بها .. مش عاجبنا خلاص كان بها برضه .. بس ما نبتديش نصنفه و نحطه في كادر معين و نظام من هو ليس معي فهو ضدي ...

[se_ Elsyed]

معاك يا ساري

بس لاحظ إن إحنا أستمعنا للرأي الأخر لمدة 30 عاماً

وحان الوقت لكي يستمع ويُنصت هو فقط ولا مجال للأستماع إليه مرة أخرى

[عبير يونس]

يا جماعة

الموضوع في دعوة للابتسام

:blink:

المناقشات دائرة في المواضيع الجادة

و سبق أن قلنا كإدارة

و قلت كعضوة

أن حرية الرأي مكفولة للجميع

بس برضه

أهيب بالآراء المعارضة للثورة أو لأي شيء يتعلق بها

أن يراعوا مشاعر زملائهم المؤيدين

و العكس بالعكس

شوية هدوء يا جماعة

احنا كلنا مصريين

مهما اختلفت الآراء

فالنوايا يعلمها الله وحده المطلع على قلوب عباده

و ما علينا كعباد هو إحسان الظن ببعضنا و افتراض حسن النوايا لبعضنا البعض

و أكيد كلنا بنحب مصر

مهما اختلفت الزاوية التي نرى بها الصورة

[se_ Elsyed]

أهيب بالآراء المعارضة للثورة أو لأي شيء يتعلق بها

أيوه الله يخليكي .. هيبي بسكوربيون أحسن مبهدلني ومش عاوز امد إيدي عليه عشان برضوا . أخويا وحبيبي وأكبر مني ...

[عبير يونس]

أهيب بالآراء المعارضة للثورة أو لأي شيء يتعلق بها

أيوه الله يخليكي .. هيبي بسكوربيون أحسن مبهدلني ومش عاوز امد إيدي عليه عشان برضوا . أخويا وحبيبي وأكبر مني ...

سين سين احنا ع الهوا ( وش مذيعة بتجز على سنانها )

احم احم

فاصل و نواصل

:)

mf-:

bsh:)

سكوب وسين سين

من كواليس الإشراف

[عنبو]

كذبت وسائل الاعلام عندما صورت للناس ان علاقة مبارك بالشعب

علاقة اب بابنائه ولكن الكلام ده غير صحيح بالمره

علاقة مبارك بالشعب هو علاقة زوج بزوجته والزواج عرفى

والزوج الاول مخبى على مراته الاولى ومش بيروح لمراته التانيه الا يوم فى السنه وبيكون صايم كمان

والشعب ( اللى هو مراته التانيه يعنى ) اضطر انه يطلع بره علشان يدور على واحد يقوم بحقوق الزوج

اللى مبيجيش الا مره فى السنه

وعلشان كده من حق اللى زهق من زوجه انه يخلعه واللى عاوز يستمر فى العلاقه دى ويفضل يطلع لبره هو حر

اصل فيه ناس بتحب تمد لبره هنعمل ايه بقى

ده تصورى للعلاقه بالظبط

تحياتى

عنبو

[Folana]

طيب ما كنش فيه هدايا مع المنشور

شندوتش لحمة رأس ولا كنتاكى ولا 100 يورو حتى

بيقولوا الفلوس زى الرز فى ميدان التحرير

السلام عليكم ورحمة الله..

طب مش كنت تقول يا أيمن...كنت أروح ميدان التحرير :)

أنا أنضحك علىَ كده...لا فيه لحمة رأس ولا ممبار ولا حاجة خالص...

غالبا هم وزعوا الورق علينا ووزعوا لحمة الرأس والكنتاكى والفلوس على الحزب الوطنى تيمناً بما كان يحدث فى الانتخابات الملقبة بطنط "نزيهة"...

[Scorpion]

أهيب بالآراء المعارضة للثورة أو لأي شيء يتعلق بها

أن يراعوا مشاعر زملائهم المؤيدين

و العكس بالعكس

يا أختي العزيزة ... طلعيلي رأي واحد مننا كلنا مش مؤيد للثورة ....

ليه اللي بيقول لحد كده كويس جدآ نبتدي بقي نشتغل باللي في ايدينا بنطلعه خاين و مش مؤيد للثورة و نقسم الناس لمجموعتين ....

طلعيلي واحد من الفكر ده اهان اللي قصاده او اتريق عليه ... المشكلة ان العكس هو اللي بيحصل و ده اللي يضايق بجد و يخللي الواحد يحس بالخوف من اللي جاي .. لأن المعاملة بالطريقة دي حتفضل هي هي ... الفرق الوحيد ان الكراسي اتبدلت ...

اكرر اللي شايفه ان بخلاف الرأي و الرأي الآخر اللي اخويا سي السيد افتتح بيه الموضوع ده .. فيه رأي تالت واخد من الأتنين ... يعني بيوافقهم في حاجات و بيخالفهم في حاجات ... و في الحاجات اللي بيخالف فيها اللي هي حاجة او اتنين بالكتير خلاص اتصنف كخائن و منبطح او علي الأقل تنزل التقييمات السلبية ترف فوق دماغه زي طوب بلطجية الحزب الوطني ...

كل اللي بطلبه اننا نشم نفسنا قبل ما نرد علي رأي بيخالفنا...

تم تعديل 9 فبراير 2011 بواسطة Scorpion
إضافة الأقتباس