25 يناير ... موعد المصريين ( 12)

[عنبو]

بيقولوا خط الغاز اللى انفجر طلع بتاع الاردن

اما اسرائيل فوقفت خط الغاز كاجراء احترازى

دى حركة تهديد بس يا باش مهندس يعنى الرسالة وصلت

دلوقتى الاردن

ياترى مين بعدين

و ياترى ضرب امن الدولة بار بى جى فى العريش امبارح لة علاقة بالمووضع دة

مهى حرب بقى ولازم الكل يستفيد منها

الدوله نايمه ومهتمه بامن السيد الرئيس ومش مهم امن الدوله

ولا امن الحدود

عادى بقى مهى سايبه بقى

كل يوم بيعدى مش فى مصلحة البلد خاااااااااااااااااااالص

لازم السيد عمر سليمان يهتم بمصر اكتر من اهتمامه بالسيد الرئيس

وبكرامة السيد الرئيس

مصر والشعب فوق الجميع

تحياتى

عنبو

و الناس اللى فى التحرير يا محمد مش المفروض انهم يتحركوا برضه لمصلحة البلد ولا الحكومة اللى المفروض انهم خونة وعملاء هما اللى مطلوب منهم بس انهم يتحركوا

حماية الحدود والبلد يا محمد مسؤلية الجيش وليس مشؤلية اى حد تانى

المفروض الشرطه مسؤله عن حماية المواطن داخليا والجيش حماية الحدود

وارض الوطن

الجيش المفروض ولائه لمصر يا محمد وللشعب وليس للنظام

يعنى لما يبقى بقاء النظام يتعارض مع امن مصر العام

يبقى على الجيش ان يقوم بما فيه مصلحة مصر

انت ليه بتطلب من الناس اللى فى التحرير تروح علشان تحافظ على النظام متطلب من النظام انه ينفذ مطالب الاغلبيه من الشعب وانت تعرف

ان الاغلبيه من الشعب لا تختلف على فساد النظام والخلاف بينهم فى اعطائه فرصه خرى او عدم اعطائه فرصه اخرى

يعنى الشعب كله متفق على فساد النظام ليه بقى الجيش مش عاوز يفذ رغبة الشعب ومعرض امن مصر العام لخطر

مينفعش تطلب منى حاجه انا غير مسؤل عنها اساسا

تحياتى

عنبو

[Simba]

قال أنس الفقى، وزير الإعلام، فى مداخلة مع تغطية مركز أخبار مصر إنه لم يغادر مكتبه منذ بداية أزمة 25 يناير وكان أول من اجتمع مع بعض شباب ميدان التحرير، وكان له المبادرة فى توصيل مطالبهم إلى القيادة السياسية.

كما أشار الفقى إلى أن تغطية التليفزيون المصرى هى أفضل وأصدق تغطية تقترب من أرض الواقع بدون مزايدات أو تزييف.. مشيرا إلى أنه ليس لديه ما يخفيه عن الناس بل إن شاشة التليفزيون الرسمى أصبحت متاحة لكل التيارات لأنه تليفزيون الناس

الكمبيوتر بتاعي جاله شلل من الخبر

[لماضة مصرية جدا]

مبارك عمال يرفد كل اللي حواليه عشان يفضل هوواحنا مش عايزينك يا مبارك، وحتمشي، وحتمشي زي بن علي، بالهرب لسه ما كملناش اسبوعين،

تونس قعدت اربع اسابيع اللي يقول زهقت ما يقولش زهقت تاني: يقول انا مش راجل والتوانسة ارجل مننا

التوانسة عشرة مليون وصبروا شهرالمفروض احنا نصبر اضعافهم لان عددنا قدهم تمن مرات، احنا مش ماشيين قبل ما يمشي

بكره احد الشهداء..

ان شاء الله تبقى مليونية، وقداس الاحد سوف يقام في ميدان التحرير

مبارك بيعمل زي اسرائيل بالظبط، بيعاقب الشعب كله، اللي نزل واللي ما نزلش:

مانع مرتبات الموظفين والعمال

قاطع عيش الناس وعامل حظر تجول بدعوى ان فيه بلطجيةمع ان هو اللي منزل البلطجية،

ومع ان البلطجية بيظهروا في حظر التجول وبيختفوا في الزحمة،

كل اللي بيتقبض عليهم في الشارع من البلطجية - واللي بيطلعوا بعد كده شرطة وبلطجية رجال اعمال - بيتقبض عليهم في فترة عدم الحظر، بداية من الحظر البلد بتبقى مرتع للبلطجية يضربوا نار في الهوا،

لو شارع الجلاء رجع اتزحم تاني كالعادة مافيش بلطجي حيعرف يطلع بمبة يفرقعها والا حيموت ضربا بالشباشب في طريقه لدبابة الجيش حظر التجول بيساعد البلطجية،

وبيقطع عيش الناس، ومش احنا اللي عاملين حظر التجول، ومش احنا اللي قفلنا البنوك،

ومش احنا اللي وقفنا المرتبات، وماحدش فينا رجل اعمال واتسمح له يسحب اموال طائلة من البنوك عشان يوقع اقتصاد البلد

حقكم مع مبارك

حقكم مع مبارك

حقكم مع مبارك

مش معانا،

احنا في ميدان التحرير،

مال قفل البنوك ووقف المرتبات وحظر التجوال وتسليط البلطجية بينا؟

اللي قدر ينزل بينزل،

اللي مش قادر ينزل ومتعاطف بيبعت للمعتصمين اكل وادوية،

اللي مش مركز متضايق من قطع عيشه كويس، متضايق من قطع عيشه يعمل الاتي:

اذا كان موظف او عامل ومرتبه اتقطع يرفع قضية على جهة العمل

اذا كان من اللي بيسترزقوا يوم بيومه وحظر التجول خارب بيته يكتب يافطة: انا ما نزلتش الاعتصام، خربتوا بيتي ليه يا حكومة؟ويعلقها على المحل بتاعه او على التاكسي بتاعه او الميكروباص او حتى التوك توك

اللي متضرر من البلطجية، يرفع قضية على وزارة الداخلية

هي دي الجهات المسئولة، ده في حال انك مش عايز مبارك يمشي، ولو اني مش عارفة اي صنف من البني ادمين انت اللي مش عايز مبارك يمشي،

بس احنا بنطالب بالديمقراطية والحرية ومش حنفرض عليكم الانضمام الى الاعتصام المطالب برحيل مبارك بس على الاقل طالبوا بحقوقكم من نظام مبارك

مش عايزين تطالبوا بحقوقكم من مبارك ما تحملوش ناس مالهاش ذنب المسئولية ربنا مدينا مخ

اذا كنتوا بتعتبروا ان الاعتصام للمطالبة بمطلب انتوا نفسكم ياما رددتوه هو ذنب

وبدل الشحاتة على قناة النيل للاخبار: مش عارف انزل الشغل، انا مش عارف اقبض مرتبي

اتصلوا برضه بقناة النيل للاخبار واسألوهم: طب دلوقت احنا مش معتصمين، والمعتصمين مش بيتحركوا من اماكنهم، وانا شغلي مثلا في مدينة نصر، مال امي انا دلوقت؟ مبارك مقعدني في بيتي ليه وجهة العمل بتاعتي قاطعة مرتبي ليه؟ لو هم قلة فعلا زي ما التلفزيون بيقول يبقى خاربين بيت البلد كلها ليه؟ ماهم قاعدين في مكانهم، لو هم السبب في وقف حال البلد يبقى هم عددهم اكيد اكتر من عدد اللي قاعدين في البيت، خلاص، يبقى هم الاغلبية، اسمعوهم ونفذوا طلباتهم خلينا نخلص، او اعملوا اللي انتوا عايزينه معاهم تصطفلوا انتوا الاتنين، احنا مالناش فيه، سيبونا نروح الشغل ونقبض مرتباتنا وناكل عيش

اظن كده عدل كافي انما الراجل ياخدكم رهينة ودرع بشري وتطلعوا تشحتوا على التلفزيون المصري وكمان تهتفوا بحياة اللي خاطفكم؟

نوارة نجم

[م تيمور المراغي]

فكرة اقامة القداس بكره للاقباط في ميدان التحرير وسط حراسة المصريين المسلمين حيكون وقعها يا جماعه رااااائع ان شاء الله

ايه الجمال ده يارب

ايه اجمال ده يا مصر

تخيلوا لو مليون مصري قبطي بكره اقاموا اكبر قداس في تاريخ مصر !!

والمصريين المسلمين عاملين حواليهم كردون كبير اوي عشان يحموهم باجسادهم من اي خطر محتمل !!!!

[عنبو]

هذا ما قاله الملك فاروق قبيل رحيله

نقطة دم مصرية أثمن عندي من كل عروش الدنيا ، والرحيل فورا أهون على قلبي من سفك دماء مصرية حفاظا على منصبي "الملك فاروق

طب الكلام ده لا يحتاج تعليق عليه

تم تعديل 5 فبراير 2011 بواسطة عنبو

[se_ Elsyed]

أنا الحمد لله ثقتي كبيرة في الشباب الأسود... وقبلهم واول ثقة طبعا فى الله الحق اللي بينصر الحق ولو بعد حين

ومش خايف من تصريح فرانك ويزنر اللي بيقول لازم مبارك يقعد لحد ما ينتهي من التعديلات

------------

وأنا من موقعي هذا أما كشك السجاير المستقبلي

بأقوله

ده عندها يا ويزنر

وبالعند فيك ... مش هابيع سجاير مارلبورو .. ولا كِنت

وكل الأنواع هاتبقى فلوريدا ولاكي سترايك وسوبر اللي عامله زي الزمارة الطويلة

تم تعديل 5 فبراير 2011 بواسطة Salwa

[عنبو]

أنا الحمد لله ثقتي كبيرة في الشباب الأسود...وقبلهم واول ثقة طبعا فى الله الحق اللي بينصر الحق ولو بعد حين

ومش خايف من تصريح فرانك ويزنر اللي بيقول لازم مبارك يقعد لحد ما ينتهي من التعديلات

------------

وأنا من موقعي هذا أما كشك السجاير المستقبلي

بأقوله

ده عندها يا ويزنر

وبالعند فيك ... مش هابيع سجاير مارلبورو .. ولا كِنت

وكل الأنواع هاتبقى فلوريدا ولاكي سترايك وسوبر اللي عامله زي الزمارة الطويلة

والنبى علشان خاطرى تبقى تجيب سجاير بارليمنت اكسترا لايت

لانى مش بشرب الا هى وخايف لما انزل مصر يتهمونى بانى عميل

اجنى والدليل انى بشرب سجاير غريبه وشكلها غريب

تم تعديل 5 فبراير 2011 بواسطة Salwa

[mohamedmohsen]

فيديو جامد http://http://www.youtube.com/watch?v=kCBFHo0_PPA&feature=player_detailpagehttp://www.youtube.com/watch?v=kCBFHo0_PPA&feature=player_detailpage

[لماضة مصرية جدا]

والمصريين المسلمين عاملين حواليهم كردون كبير اوي عشان يحموهم باجسادهم من اي خطر محتمل !!!!

طبيعي جدا و متوقع اوي

و لو اني مبحبش اردد حكاية الوحدة الوطنية لانها بتحسسني اصلا ان احنا فريقين و بنحاول نلضمهم في بعض مش عارفين ان الفتلة واحدة....بس برضه نرجع نقول

النسيج الواحد عمره ما حد هيعرف ينسله من بعض

[م تيمور المراغي]

عاوز اعرف راي اخواني الاقباط في فكرة القداس المليوني بتاعت بكره ,,

[م تيمور المراغي]

والمصريين المسلمين عاملين حواليهم كردون كبير اوي عشان يحموهم باجسادهم من اي خطر محتمل !!!!

طبيعي جدا و متوقع اوي

و لو اني مبحبش اردد حكاية الوحدة الوطنية لانها بتحسسني اصلا ان احنا فريقين و بنحاول نلضمهم في بعض مش عارفين ان الفتلة واحدة....بس برضه نرجع نقول

النسيج الواحد عمره ما حد هيعرف ينسله من بعض

ايوه يا ريهام احنا هنا عارفين ,,

لكن عاوزنها رساله ينقلها العالم كله ,,

والصوره اللي فوق دي تتعكس ونلاقي المصريين المسلمين هما اللي عاملين الكردون حولين الراهبات والاقباط وهما بيؤدوا القداس في خشوع

ان شاء الله ,,

ويبقوا يقولوا وقتها على الثوره انها من تنظيم جماعة الاخوان ..................( المسيحيين ) :happy:

[طبيبة بالخارج]

يا جماعة انا بدعوكم للصفحة دي عن التلفزيون المصري

الشباب هناك بيقولوا كلام زي العسل

يمكن مفعول التايد بعد 4 ايام فصل النت يزول

http://www.facebook.com/?ref=home#!/pages/hmlh-mqath-altlyfzywn-almsry-almnafq/123392534401096

المصريين حيفضلوا طول عمرهم احسن ناس تنكت

أحد المعلقين على الصفحة قال: التليفزيون المصرى فاضله شويه ويقول فى كائنات فضائيه نزلت التحرير

[جبار سينج]

وثيقـــــة سريــّــة بممتلكات مبـــــارك في بنـــــــــك سويسري

مبارك أودع كميات ضخمة من معدن البلاتينيوم تقدّر قيمتها بـ14 مليارا و900 مليون دولار في حسابه

تكشف وثيقة سرية تحصلت ''النهار'' على نسخة منها، جانبا صغيرا من الثروة المالية الكبيرة للرئيس المصري حسني مبارك المودعة في بنوك سويسرا، حيث تبين الوثيقة الصادرة عن بنك سويسرا، أن مبارك قام بإيداع ممتلكات لدى البنك، في عام 1982، تقدر قيمتها حينذاك بقرابة ٥١ مليار دولار.

وتبين الوثيقة، بوضوح، كيف قام الرئيس المصري حسني مبارك، عاما واحدا بعد اعتلائه كرسي الرئاسة، بإيداع مادة ضخمة من معدن البلاتينيوم الخام، الذي يدخل في صناعة مجوهرات البلاتين أو ما يعرف بـ''الذهب الأبيض''، قدرتها وثيقة البنك السويسري بــ14 مليار و900 مليون دولار.

وحسب الوثيقة المؤرخة من طرف بنك سويسرا بتاريخ 11 ديسمبر 1982، فإن مبارك قام بعملية تحويل 19 ألف ونصف طن من معدن البلاتينيوم، عبر مساعدة من مكتب بريطاني يسمى ''فلايينغ هورس'' الكائن مقره في لندن وتحديدا في العنوان 711071، وهو شركة مختصة في المتاجرة في معدن البلاتينيوم ومشتقاته، نحو بنك سويسرا، ليتم حفظها وإيداعها على أساس أنها ممتلكات ثمينة.

وحملت نفس الوثيقة ختم وتوقيع محافظ بنك سويسرا، إلى جانب رقم الحساب الائتماني لمبارك لدى البنك وهو 5.709.40707، وعنوانه في العاصمة المصرية القاهرة.

وتُظهر الوثيقة كيف أن مبارك لم ينتظر طويلا للشروع في عملية السطو على ممتلكات الدولة والشعب المصريين، بدليل أن الوثيقة السرية لبنك سويسرا مؤرخة في ديسمبر 82، أي عاما واحدا بعد اعتلائه السلطة، وهو ما يعني أن الرئيس المصري كوّن طيلة 30 سنة كاملة، ثروات لا تعد ولا تحصى.

ويعتبر معدن البلاتينيوم، من بين أهم وأندر وأثمن المعادن في العالم، حيث تستخدم بعض مشتقاته في عمليات التنقيب عن البترول، إلى جانب مجال البحوث الطبية، فيما كانت شهرة معدن البلاتينيوم نابعة من كونه مصدر تصنيع مجوهرات البلاتين الثمينة، أو ما يعرف في البلدان العربية باسم ''الذهب الأبيض''، الذي يقدر في قيمته بأضعاف قيمة الذهب الأصفر.

ويعرف عن مبارك أيضا، كونه قام على مدار سنوات بتشكيل ثروات كبيرة من خلال تلقيه عمولات ورشاو نظير تصديقه على صفقات اقتناء أسلحة من دول عديدة، حيث قام فور اعتلائه سدة الحكم في مصر، بإجبار البرلمان على منحه تفويضا بسلطة التفاوض وعقد صفقات التسليح للجيش المصري، بصفته القائد الأعلى للقوات المسلحة في مصر.

[se_ Elsyed]

كما قلت لكم

التاريخ سيتوقف عند سنة 2011

وهاندرس تاريخ إسود لفترة 30 سنة من أسوء الفترات التي عاشتها مصر

ونفتح بقى كل الملفات

[fatfouta]

أفلام جيل ثورة 25 يناير... :)

ابي فوق الدبابة

عودة النت

المندس والأجندة

الرصاصة المطاطية لاتزال في جيبي

في بيتنا بلطجية

لا اختنق ولكني استغيث

ستاتس هزت عرش مصر

ليلة القبض على عز

عض بلدي ولا تعض نتي

جاءنا الرئيس التالي

نحن لا نرمى المولوتوف

مهمه في ميدان التحرير

الريس عمر سليمان

حرامية في شبرا

البحث عن دستور

تم تعديل 5 فبراير 2011 بواسطة fatfouta

[م تيمور المراغي]

عاوز اعرف راي اخواني الاقباط في فكرة القداس المليوني بتاعت بكره ,,

ويا سلام لو كمان نحط في التوبيك آيات الانجيل اللي بتتكلم عن شعب مصر انا فاكر اني قريتها بس من المصدر طبعا احسن ,,

[pink rose]

عاجل الامطار تسقط علي سماء القاهره وتعالوا نستطلع الاراء

قناة النيل للاخبار: لاصحه مما تبثه القنوات العميله انه هناك سقوط للامطار فوق المتظاهرين

الاخوان: لاحوار مع نظام مبارك قبل توقف الامطار

...

البرادعي: النظام مسؤل مسؤليه تامه عن هطول الامطار فوق الميدان

اوباما: النظام يستخدم اساليب مبلوله لفك الاعتصام

صفحة مقاطعة التليفزيون دي مسخرة بجد

[طبيبة بالخارج]

لمن يحذرنا من خطر الشيعة و إيران

يا جماعة احنا في مصر معندناش شيعة زي في دول الخليج و العراق (أنا شخصيا لم اعرف شيء عن الشيعة و وجودهم داخل العالم العربي إلا عند مجيئي للمنطقة الشرقية بالسعودية

نسبة وجودهم عندنا اقلية و لن يستطيعوا اعتلاء الحكم

اعداءنا ممكن يحاولوا يقسمونا لأقباط و مسلمين لكن ان شاء حنصمد و ما يحدث الآن من تضامن بينهم داخل ميدان التحرير خير رد على المتخوفين

[أحمد سيف]

رسالة الى المعارضين للتحرير- بواسطة عمر رخا

انا كاتب الكلام ده لفئة الناس اللي مقتنعة ان مبارك فعلاً مفروض يسيب الحكم بس خايفة من استمرار المظاهرات او من سيناريو الرحيل المفاجئ.. أما الناس اللي بتقول ماله مبارك ده زي الفل وعمللك ايه يعني وانا باحبه، فأنا معنديش وقت أرد على ناس مغيبة أو منتفعة أو معندهاش احترام لانسانيتها...

حكم مبارك بيلفظ انفاسه الأخيرة، وعشان كده بيرفرص زي العجل لما بيدبح، وده مخليهم بيلجأوا لأي شيء لتثبيط حماس المتظاهرين، وأحد الحاجات اللي بيعتمدوا عليها هي ضغط الناس في البيت على المتظاهرين عن طريق اشاعة سيناريوهات رعب وخوف هرد عليها كلها عشان نطمن ونصبر شوية، لأن الطرف اللي هيصبر أطول شوية هيوصل لهدفه.

ليه مش مصيبة ان مبارك يمشي دلوقتي أو إن المظاهرات تستمر:

1. الاقتصاد هينهار: ده كلام المقصود منه الترهيب فقط... الواقع بيقول ان خساير مصر كلها لو الموضوع ده استمر 100 يوم اقل من نص ثروة عز... لو فلوسه مرجعتش للبلد على الأقل هنكون منعناه انه يفضل ينهب فيها، وده بيوفر خساير في المستقبل، مش كده بس، الحرية السياسية طول عمرها افضل للاقتصاد، على سبيل المثال، فيه قطاعات كتيرة كانت مغلقة للاستثمار ومقصورة على شلة منتفعين بيكسبوا منها اصبحت الآن مفتوحة، زي الاستصلاح وصناعة الحديد والأسمدة والأخشاب وغيره، ولما شلة المنتفعين تأثيرهم يقل، الاستثمارات هتزيد، والكلام ده مش نظري ولا من دماغي، الكلام ده أنا جايبه من رجال أعمال شرفاء سألتهم سؤال مباشر: هتعملوا ايه لو النظام وقع؟ قالوا هنستثمر أكتر في مصر.. وده نفس كلام ساويرس، طبيعي هيكون فيه فترة صعبة في الأول بس الفترة دي مش هتطول وبعدها هتكون حياتنا كلنا أفضل.. وانا مش بقول الكلام ده وانا مش متضرر، انا شغلي الأساسي في البورصة اللي هي أصلا كانت بتعاني قبل القصة دي ما تبدأ.

2. مش هنلاقي ناكل لإن الأسعار بتغلى وفلوسنا بتخلص: لازم هنا نفصل بين الناس اللي بتقرأ الكلام ده وباقي الشعب... بذمتكم فيه حد فيكو مش لاقي ياكل؟ طب السجاير غليت شوية ماشي والبنزين مش موجود، برضه مفهوم بس محدش هنا يقنعني انه معدم، أما الناس المتضررة بجد ففي لجان شعبية ببتشكل كتير لمد يد العون ليهم الفترة اللي جاية، واللي مش قادر ييجي مظاهرة مفروض ده يكون دوره... ومعلوماتي ان عملية توزيع الأكل اشتغلت تاني خلاص وده معناه ان مش هيكون فيه مصيبة في الأكل والشرب.

3. اسرائيل هتستغل الوضع والجيش مشغول: دي حاجة مضحكة فعلاً... الجيش المصري قوامه حوالي مليون جندي نصهم احتياط... اللي بيأمنوا البلد كام واحد؟ عشرين الف؟ أكيد مش دول اللي هيضعفوا مصر، والمفروض ان قيادة الجيش عندها الوعي الكافي انها تخلي بعض القيادات مركزة في الجبهة الخارجية عشان نضمن امن مصر... لو الفرضية دي غلط يبقى في الحقيقة مش فارقة لإن في الحالة دي الجيش مش هيأمن مصر كده كده!

4. هيحصل فراغ دستوري: الكلام ده برضو مش صحيح لأن الكلام ده درسوه ناس كتير من زمان، بس باختصار كده لجنة الحكماء فيها على الاقل اتنين حجج في القانون أنا أعرفهم، فلو مفيش مخرج دستوري يأمن كل طلبات الشعب مكانوش طالبوا الرئيس بالاستجابة لمطالب الشعب.

5. المؤسسات والمرافق هتقف: تصور ان مبارك هو اللي بيشغل مصلحة الكهرباء ده تصور ساذج مش هقدر أرد عليه (بس أنا سمعته من بعض الناس)

6. الإخوان هيوصلوا الحكم: انا نفسي أفهم ده هيحصل ازاي لو مبارك مشي دلوقتي وسليمان مسك مكانه؟ هو سليمان اخوان؟ ولا سليمان راجل ضايع وميعرفش يسيطر؟ طب لو راجل عديم السيطرة ليه جابوا نائب؟ من باب المنظر والاستخفاف بالعقول مثلا؟ اللي بقى خايف الاخوان يوصلو الحكم في انتخابات ديموقراطية حظهم وحش لان ده الانتخابات جايه جايه، يبقى الصح كل واحد يعرف دوره هيكون ايه عشان ممارسته توصل اللي شايف انه يمثله للحكم، مش اننا نحط راسنا في الرمل عشان نستخبي طول عمرنا من بعبع الاخوان.

7. الإخوان وجماعات تانية هي اللي مقومة الدنيا عشان يوصلوا الحكم: التحرير مش اخوان ولا حماس ولا حزب الله ولا تبع حد، الناس في التحرير مجموعة كبيرة من جميع فئات الشعب اجتمعت على أنها تعبت من الريس، واللي مفترض ان اصل المظاهرات حركات اسلامية غلطان... يعني عمرو واكد وخالد الصاوي وخالد أبو النجا وخالد يوسف واسر ياسين وداوود عبدالسيد دول حركة اسلامية؟ هل أنا حركات اسلامية؟ الأصل في الموضوع مش حركات اسلامية ولا هيقدروا يركبوا الموجة زي ما بيقولوا.... واللي يروح التحرير يعرف ان مفيش مجموعة مسيطرة ولا بتحرك الوضع وان كل رمز جه في بعض الناس بتقف معاه والأغلبية يكبروا منه، بما في ذلك البرادعي والاخوان وغيرهم، الواقع ان المظاهرات في التحرير حركة شعبية ملهاش لون ولا توجه معين.

8. فيه أيد خفية أجنبية ورا المظاهرات: ده كلام مضحك... طبيعي ان فيه اجانب هناك بين صحفيين وسياح مش لاقيين حاجة تانية يعملوها، بس خلينا ورا الفكرة.. يعني لو ده تخطيط اجنبي، هل التخطيط ده عملنا غسيل مخ واقنعنا ان مبارك وحش، ولا هو فعلاً وحش؟ ليه صعب نصدق ان اللي حرك المظاهرات دي حس وطني مصري ملوش دعوة بيد خفية؟ هو تاريخ مصر مفيهوش ثورة 19 وسعد زغلول ومحمد فريد ومصطفي كامل؟ الفرق هنا ان المظاهرات دي ملهاش زعيم عشان بقى فيه انترنت يحرك الناس بدل الزعماء!

9. اللي بيحصل ده فتنة ولازم نوقفها (خاصة التلات اللي فات): انا مقدر ان اللي مارحاش مش فاهم قوي اللي بيحصل بس الموضوع ابسط من كده: كان فيه ناس عزل في ميدا التحرير هجم عليهم ناس بجمال وخيل وسلاح فاضطروا يدافعوا عن نفسهم... لما واحد بسلاح يهجم على واحد اعزل ده يبقى اسمه ايه؟ وعموماً لو كانت دي فتنة يبقى ليه علماء الأزهر هناك؟ وليه راغب السرجاني وصفوت حجازي ومحمد العوا مؤيدين؟ الناس دي كلها أنا شفتها هناك (بغض النظر اذا كنت انا شخصياً متفق معاهم او لا)

10. زهقنا وعايزين نروح شغلنا: وأنا كمان زهقت... موضوع المظاهرات ده مش مسلي قوي خصوصاً لما الواحد بينضرب لكن ده تمن التغيير، واللي مش قادر يشارك في التغيير ده على الأقل يستحمل الزهق شوية!

ليه مبارك لازم يمشي فوراً:

1. مش كل المطالب اتحققت لإن مبارك بيراوغ: فين الغاء قانون الطوارئ؟ فين الافراج عن المعتقلين (فين صديقي وائل غنيم)؟ اللي بيقول اننا اخدنا 90 في المية من مطالبنا وده كفاية مش قادر يشوف ان الموضوع زي السلم والتعبان، لو موصلناش لـ 100 ممكن ننزل لحد 2 أو 3، مش كده بس، فيه اعتقالات جديدة لسه بتحصل، آخرها قدامي كان يوم التلات اللي فات، يعني الكلام حلو لكن الواقع لسه زفت، وانا شايف ان اول حاجة الحكومة ممكن تعملها عشان تثبت حسن النية انها تفرج عن وائل غنيم، لكن الواقع بيقول ان ده نظام فاسد لا يمكن الوثوق فيه.

2. لازم الدرس التاريخي بخلص: عشان نضمن انه في المستقبل ميبقاش فيه استبداد، لازم مبارك يمشي عشان اي سيناريو هيفضل فيه رئيس هيكون هو الكتالوج بتاع اي واحد مستبد ييجي في المستقبل

3. انا كنت من انصار اعطاء الرئيس فرصة بعد خطبته بس بعد هجوم البلطجية اللي حصل ده لازم يمشي، لو هو اللي وراه انا مش عايزه رئيس لبلدي، ولو حد غيره واره ده معناه انه فقد السيطرة على الوحوش اللي رباهم في عهده وبالتالي لازم حد تاني يمسك الدنيا عشان يلمهم... في كل الحالات لازم يمشي لان الثقة اصبحت مفقودة

اخر الكلام، انا رايي اصلا مش مهم... احنا ممكن نقعد نتحاور ونتفاهم هنا، بس نفسي اشوف حد من دعاء التهدئة ينزل التحرير يقنع حد من اللي ماتلوا ابن في المظاهرات او يوم التلات ده ويقولوا معلش روح بقى عشان احنا زهقنا... الناس دي شافت ظلم رهيب ومينفعش عشان احنا تعبنا شوية في البيوت حقهم ميرجعش، وهم وجهة نظرهم ان حقهم يترد برحيل مبارك، ومفيش طريقة ممكن تمشيهم من هناك غير كده... ده الواقع اللي لازم الناس في البيوت والحكومة تفهمه، وبمرور الوقت أقل ناس بتتعب هم شباب التحرير، الوقت في صالحنا والحكومة هي اللي عليها ضغط ولا يوجد حل سوى الاستجابة لمطلب المتظاهرين برحيل مبارك

[se_ Elsyed]

أفلام جيل ثورة 25 يناير... :)

ابي فوق الدبابة

عودة النت

المندس والأجندة

الرصاصة المطاطية لاتزال في جيبي

في بيتنا بلطجية

لا اختنق ولكني استغيث

ستاتس هزت عرش مصر

ليلة القبض على عز

عض بلدي ولا تعض نتي

جاءنا الرئيس التالي

نحن لا نرمى المولوتوف

مهمه في ميدان التحرير

الريس عمر سليمان

حرامية في شبرا

البحث عن دستور

انا عن نفسي هاعمل مسلسل من 70 حلقة هايتعرض في رمضان الجاي بإذن الله

وسميته

من فضلك يا شاهنده .. اديني الأجندة

وممكن أعمل سهرات أو سباعيات تحت عنوان

يا مصر روحي فداكي .. بس اعيش وأكل كنتاكي

وممكن أتفق مع محمود ياسين ونعمل مسرحية جادة في المسرح القومي ونسميها

عندما سقط الجبان .. في وسط الميدان